Ka Nupepa Kuokoa, Volume XXV, Number 23, 5 June 1886 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

KA NUPEPA KUOKOA

No ka Makahiki          $2.00

No Eono Mahina         $1.00

-KUIKE KA RULA-

Poaono            June 5, 1886

 

Haawina Kula Sabati

Haawina XIII

Iune 27, Haawina hop hope

NA HELUHELU LA.

Pakahi                         Io 1:1-51

Poalua                         Io 2:1-24

Poakolu           Io 3:1-36

Poaha              Io 4:1-34

Poalima           Io 5:1-47

Poaono            Io 6:1-71

Sabati              Io 7:1-53

Mele                Ala e ano H.A.N. 62.

Pule

NA NINAU

            Ma ka Euanelio hea na haawina o ka hapaha i hala?  Nawai i kakau ia Euanelio?  Owai kekahi mau palapala e ae a Ioane i kakau ai?  Mahea ka hana ia ana o na mea i hai ia ma keia mau haawina?

            Owai ka Logou?  Heaha kana hana i mea e pono ai kakou?  Io. 1:14.  Heaha kana i haawi ia kakou? p. 4, 14.  Heaha keia ola ana i haawi mai?  Ep. 2:1, 1Io 5:11-13.  Heaha ka malamalama ana i haawi mai ai?  Lilo anei ka ke Akua olelo i malamalama no na mea a pau e nana ana ilaila?  Nawai i hoike no ka malamalama?  p. 6, 7.  Nowai?  Heaha ka pomaikai o ka poe e malama ana Iaia? p. 12.

            Mahea ko Ioana bapetizo ana? p. 27.  Heaha kana olelo no Iesu i ka ike ana iaia? p.29.  Owai na haumana mua elua a Iesu?  Pehea ka hoomahuahua ana o na haumana?  He hana maikai anei keia, o ke alakai ana o na mea e i ka malamalama, i ke kumu o ke ola?  Ina pela ka hana a kanaka a pau, koe anei kekahi ma Hawaii nei i loaa ole keia pono iaia, i alakai ole ia io Iesu la?  Owai kekahi mau inoa o Iesu ma keia mokuna?  E hai mai no Natanaela?

            Hele aku o Iesu i hea mai Iudea aku?  Io 2:1.  Owai pu me ia?  Owai o keia mau haumana no Cana? Io 21:2.  Heaha ka ahaaina e malama ia ana ilaila?  Ua nele i ke aha?  Heaha ka hana mana a Iesu malaila?  Ua hana mana anei o Iesu mamua? p.11.  Ma ke aha, ke ano hou ana o kanaka e Iesu? Io 3:3, 5. Rom. 12:2. Pil. 3:21.  Ua mahuahua anei ka manaoio o na haumana a Iesu i ka ike ana i kana mau hana kamahao?

            Mahea ko Iesu hele ana? Io 2:13.  Heaha kana hana ma ka luakini? p. 14, 15.  Owai ka i hele ia Iesu i ka po? 3:12.  Heaha ka Iesu olelo iaia? p.5.  Pehea wale no e komo ai i ke aupuni o ke Akua?  Pehea e maopopo ai ina ua hana ia e ka Uhane? Gal. 5:22, 23.  I mea aha kela nahesa a Mose i hana ai?  Owai ka i kau ia ma ke kea: a ina e nana kanaka iaia e ola lakou? p. 14, 18.  Pehea ka nui o ko ke Akua aloha ia kakou? p. 16.  Pehea la e loaa ai ke ola?

            Mahea ko Iesu hoomaha ana? Io 4:5, 6,  E hele ana i hea? p.3.  Owai ka i halawai me ia malaila?  Heaha ke no a Iesu iaia?  Ua ae ia anei?  Ua hoomaopopo anei ka wahine i na mea a Iesu i hai aku ai iaia? p. 11, 12.  Ma ke aha i like ai ka Euanelio me ka wai?  He kumukuai anei?  He mea hoomaemae anei?  Imi anei kekahi i wai, ke ole oia i makewai?  Imi anei kekahi i wai, ke ola, ke ole ike i kona hewa, a makemake e haalele?  Pehea ka mea e imi ana i keia wai? p. 3, 14.  Pehea ka hoomana oiaio ana? p.24.

            Mahea na haumana, oiai, e kamailio ana o Iesu me ka wahine? p.8.  Kahaha anei lakou?  A ike keia wahine o ka Mesia keia, ua kii koke ia wai?  Maona o Iesu ma ke aha? p. 34.  Heaha ka uku o ka mea ohi? p. 36.  Heaha ka ohi ana ma Sukara? p. 29.

            Mai Sukara aku, i hea ko Iesu hele ana? p. 46.  Owai ka i lohe i kona hehi ana ilaila?  Heaha kana? p. 47.  Heaha ka Iesu i hanaʻi nona? p. 50-53.  Heaha ka pomaikai i loaa ia ohana?  Kokua anei ke Akua i ka poe a pau e hele ana iaia?  Ke ole manaoio loaa anei ka mea i imi ia?

            I ka punawai hea ko Iesu hele ana? Io 5:2.  Owai malaila?  E aha ana malaila?  Pehea ka loihi o ka mai ana o keia kanaka? p. 5.   Heaha ka Iesu olelo iaia? 6, 8, 19.  Hiki anei ia Iesu ke hooia i ka mea noho iloko o ka hewa loihi?  Kala anei i kona hewa ke ole e makemake ana?  Hiki anei ke hoomau ma ka hewa a lilo i Karistiano?  Ua hewa anei o Iesu ma ka hoola ana iaia i ka la Sabati?

            Hele hou o Iesu i hea? Io 6:1.  No ke aha?  Owai ka i hahai iaia?  Pehea ka hiki ana aku ilaila?  Heaha ka Iesu hana aloha no lakou? Luk. 9:11.  Pehea ka hanai ana ia lehulehu?  Ehia o lakou.  Ua koe anei ka ai?  Ua manao kanaka e hoolilo o Iesu i aha? p. 13.  Hele aku oia i hea?  E aha?  Heaha ka pono i loaa i na haumana ma ka moanawai?  Pehea ka hoopakele ia ana?  He mana anei kona maluna o na mea a pau ano?  Aole anei o Iesu me kakou iloko o na ino, na pilikia, ina e makemake ana iaia?

            Ihea ka imi ana o kanaka ia Iesu? Io6:24.  Heaha ka olelo ao a Iesu ia lakou? p.27.  Owai ka berena e ola ai? p.35.  Pehea e loaa ai keia berena?  Heaha ka pomaikai e loaa ana i ka poe e hele aku ana ia Iesu? p. 37, 40.

            Hele o Iesu i ka ahaaina hea? Io. 7:2.  Heaha kekahi o na hana ma kela ahaaina?  Mai hea mai ka hali ana ia wai?  Heaha ka leo kahea a Iesu ma ka la hope o ia ahaaina? p.37, 38.  Nawai e haawi mai i ka Uhane Hemolele?  O keia wai, he maikai he wai ola, hoomaemae, kumukuai ole, e mau ana, a e kahe aku ana ia hai.

            Heaha ka Iesu olelo i na haumana ia la ae ma ka luakini? Io. 8:31, 32.  O ka poe hana hewa, he poe pio nawai?  He mama io anei ka hewa?  Hiki anei e hookipa i kekahi hewa me ka hookipa ole i ona mau hoa lehulehu?  Ina kuko i ka hai, aole anei e hoao koke e aihue a me hoopunipuni?  Aia a haawi i kau wahi lihi iki o ka naau ia Satana, aole anei e kaili okoa ana no?  Heaha ka hope o na hewa a pau?  Heaha ka mea e kuu aku ia kakou?  Nawai i haawi mai i keia pono?  Owai kekahi i manaoio aku ia Iesu, me ka ike ole iaia?  Mahea kakou e ku ai, me Iesu paha, a ola mau, me Satana paha me ona kaulahao?

            Mele.  Wa maikai e oli ai. H.A.N. 94.

            Pule.

 

            Na mea hou o Hanapepe.

            Ma ka po o kekahi mau la o ka pule ekolu o Aperila, ua hele mai kekahi mau pake elua a ka lae o Waipuhia e pili la i Kauwahio, ua nou ia mai la laua i ka pohaku me ka ike aku o na pake, elua kanaka ua nao aku la iloko o ka pouli, a hoi aku la na pake i kauhale.  "Heaha keia hana hilahila ole au e ke kanaka Hawaii?"

            NO KA WI. - Ke hahana mai nei ka wi i kekahi poe o Hanapepe, aia ke ola i Waiehu, a mai Honolulu mai me na pahu ai; kekahi poe kuai aku la i ka mea ai nui a ola ka la pololi.  No ke aha keia?  No ka huli o ka lima iluna.  Nana i na pake e noho nei ma Hanapepe, nui loa ko lakou kanu i ko raiki, hoolilo i ke dala kekahi hapa a i ka opu kekahi.

            NO KA HANA PAAPAANI - Elua kanaka e hana nei i keia hana me ka laua mau wahine.  Mahiai ka lakou hana.  E hana a 10, imua a lau pai.

            NO KA INU AWA, - He mea mau ia i keia aina, kani ka pu, he pu inu awa ia, o ka pii aku la no ia i ka hale inu awa.  A hoi ke kukui i waho o Kahalauaola, ke kukui inu awa, o ka iho iho la no ia i ka po.  I ka nana aku i ua poe inu awa nei, "Aohe ke kohu o Hanunanuna.  Puiwa ka manu eena i ke kanaka."  E aloha haole kaua.

 

Nuhou o Kekaha, Kauai.

            Ua hoomaka iho nei ka wili ana o ke ko i ka la mua iho nei o keia malama (Apr.) ua pau pono na hemahema.  Elua pua uwahi, ekolu moewaa, mamuli o ka hooponopono hou ana a kona ona Mr. Isenberg.

            Ma ka makahiki i hala, ua hoomoe ia he alanui hao mai kahi aku o ka wili, e holo ana kekahi ma ka hikina a hiki i ka uwapo o Waimea, i ke komohana kekahi no 1 mile, a i keia mau mahina i hala iho nei ua hoomoe hou ia a hiki i ka mahiko o Mr. Faye & Co., ma Mana nona na mile 3 ka loihi.

            Ua kanuia iho nei e Messrs Faye & Meier he 50 paha eka ko hou a ma e hui ia mai o a o aole paha e emi malalo o 250 ka nui.

            Ua ana ia iho nei ka wai o Waimea e kekahi haole, a e manaoia ana e lawe i keia wai no ke kula o Mana.  E ola auanei ia aina panoa.

            Ma na la mua o keia mahina (Apr.) i hiki mai ai o Frank Damon a me kana lede no ka launa pu ana me na pake.  Ua akoakoa nui ae lakou ma ka la Sabati ma ka halekula o Pokii.  Maikai na hana.

            Ua make he elua Iapana, he kane a he wahine.  O ke kumu i make ai o ka wahine, he hanau keiki; a o ke kane, he mai ma ka wawae.  Ua kanu like ia laua i ka lua hookahi.

D. KUAILOKELE.

 

            KE KULA KAHUNAPULE

            Ma keia la e hoike ai ke kula Kahunapule o ka Pakifika Akau maloko o ka luakini o Kawaiahao.  E hoomaka ana na hana ma ka hora 9 o ke kakahiaka a hoomaha ma na hora awakea.  Ma ka hora 7:30 ahiahi o keia la e hoike ai na haiolelo, kumumanao a me na himeni a o ka panina ia o na hana hoike.  E hele ae na makamaka e ike kumaka i na hana.

 

APOPO

            E malamaia ai na haiolelo makahiki kuloko, e hoomaka ana ma ka hora 7 ahiahi.

 

HE MOOLELO KAAO

NO

Beretile Muda

KA

HIWAHIWA LUA OLE O KA NANI

A O

KE ALII HOI O NA KUPUA A PAU,

Ka mea nona ka Mana Kupanaha  lea maluna o na Haku o ka poulia me na Uhane ino o ka po, ka mea i oleloia "Ke Ki o ke ola a me ka make mau ioa." &c. &c.

            HOI AKU LA ua keiki nei no ka hale alii kahi a kona makuakane e kali ahonui mai la me na manao paumeume iloko ona no kana kamalei, aka, iaia e nalu ana pela, ua hoohikilelele ia oia no kekahi leo i pa-e iho iaia i ka i ana: E Iunepera e, e hoolana i kou manao, no ka mea, eia ʻe kau keiki ke hele mai la i ou la me ka mea nana oia i hoopakele mai nei mai ka make mai; nolaila, e ku iluna oiai oia ua kokoke i ou la.

            Lohe ae la oia i ka leo i pa-e iho ia ia, ua pane ae la oia: Ina he oiaio keia lono aʻu i lohe iho nei, nani wale ka hauoli o kuu puuwai i koʻu ike hou ana aku i kuu keiki i nalowale a e loaa hou mai ana ka!  Iaia e i hoolai iki iho ai oili mai la kana keiki mamua pono mai o kahi ana e nana pono aku nei, a lele koke ae la ka hauli iloko ona a haule pahu aku la oia i ka honua a nape malie ae la ka hana iloko o kona puuwai.  Iaia e waiho lolii la i ke kau o ka pohihihi, hiki mai la kana keiki ma kona aoao a hoolalelale ae la i kona makuakane, me ka i ana iho:  E kuu makua, e Iunepera e, eia wau keiki.  Ala ae la kona makuakane a ike ae la i kana keiki, me ka naau kaumaha me na waimaka e iho makawalu ana, lele aku la a honi aku la iaia.

            A hala ae la he mau minute o ko laua hui aloha ana, aia hoi ke keiki alii i kona wahi me kona nani nui a pane iho la oia i kona makuahine ka Moiwahine Ane Bela: E Ane Bela e, e hoouna ae oe i ke keiki a me kona makua, e hele koke mai imua oʻu i keia manawa i hai aku ai au i koʻu manao ia laua a ia oukou hoi koʻu ohana alii ma ka honua nei, a na oukou hoi ia e hai ae i na makaainana o ko kakou aupuni, no ka mea, eia na ouli o ka lewa la ke hoolale mai nei ia maua e hoi, a e haalele io ana maua ia oukou, eia ka manawa la ua kokoke loa, nolaila e kii koke aku ia laua e hele mai imua oʻu, a ia oukou hoi, makemake au maloko o ke keena kahi e malamaia nei ka hanohanohano o ke aupuni, a malaila kakou e hui hope ai mamua o koʻu hoi ana me koʻu makua a o ko kakou puuhonua hoi ma keia hope aku.

            Lohe ae la ka Moiwahine Ane Bela, ua laha koke ae la keia mea iwaena o ka ohana alii a na ia mea i hoaahu ia lakou me ke aloha mokumokuahua, a ua hookoia hoi ka makemake o ke keiki alii a ku ana ua keiki nei me kona makuakane imua ona a pane mai la o Baretile:  Ano, e Iuneperam eia oe a me kau keiki imua oʻu, ua hoopai aku au i kau keiki me ka hapa uuku loa o kuu inaina, a ua hoola mai au iaia me ka hapa nui o kuu aloha; a oiai nohoi oianei no ka mea nana i lawe ka hanohano o ka la ma ke kahua lelea, a ua hoopukaia no hoi he olelo hoohiki no ka mea e like me ianei, a o ua olelo la ua lilo ia i rula mawaena o makou a e hooko ia ia e pono ai: a olai no hoi, o oe no kekahi o na koko alii o Pelekane nei, a mahope aku o ka hooko ia ana o keia, e noho oukou me ke kuikahi loa a me ke aloha io kekahi i kekahi a me ka ohumu ole i kekahi mea noʻu nei a no ka ohana alii holookoa, no ka mea, i ka wa a i ka hora paha a kekahi o oukou e hana ai pela, owau no kekahi i kela manawa, a o kona hora hope loa no ia o kona ola ana.  Nolaila pehea la ko olua manao no keia mau olelo aʻu ia olua?

            Panu aku la no ua keiki nei:  E ke alii, ua hewa loa wau i hiki ole ke kala ia, no ka mea, ua oi loa ae ke kiekie o kaʻu mau mea a pau i hana ai i ko na kuahiwi kiekie a pau ma ka ili o ka honua nei, - Aole loa wau e haiiu kue hou aku ia oe a pau na la o koʻu ola ana, a aole hoi i kekahi mea e pili ana i ka ohana alii, no ka mea, ua ike iho nei au i ka hopena o keia mau mea a pau, aia ka he awaawa loa ia.

            Hookuu ae la ke keiki alii i kona kamailio ana me laua, a hoomaka aku la e huli hoi no ka rumi kahi e noho mai la ka ohana alii me ke kaumaha nona; a i kona komo ana aku iloko, ike aku la i ka ohana alii me na helehelena o ka luuluu maluna o lakou, a aia hoi ka makuakane mahope pono o kaa noho alii iluna pono o ka anuu, aia hoi ka ohana alii ke noho poai mai la a puni ke keena me na manao @loko o lakou no ke kaawale ana aku o ka wohi alii o ka lewa.

            Hele aku la ke keiki alii a ku iho la mamua pono o ka noho alii iluna pono o ka anuu, a pane aku la:  E kuu mau makua aloha e, a me oʻu mau mua ma ke kino, ano ke kokoke mai nei koʻu manawa e haalele iho ai ia oukou, a e hoi aku ana wau ma ka poli laahia o koʻu makua hanai, ka mea hoi nona keia pono nui maluna iho oʻu, nolaila e hoolana i ko oukou manao mai kaumano kekahi mea, no ka mea, aole au e haalele ia oukou me ka hoopoina ana ia oukou, a mahope aku o ko maua hoi ana no ka lewa, a noho iho oukou me ka maluhia, a e nana mai ana no au i ko oukou noho ana i ka maluhia a me ka ole, a e kiai no au i ka mea e hele mai ana e pakaha i ko kakou aina a me ke ola o oukou a naʻu no e hookaawale a e haawi i uku kupono no ko lakou hana ana.  A ke hai aku nei no hoi au ia oe e kuu kaikuahine aloha e Meriana hoi, e hookoia aku ana ka mare ana o ke keiki a Iunepera me oe mahope o koʻu hoi ana, me ke keiki a Iunepera ka mea aʻu i hoopai ai me koʻu inaina, a e noho iho oukou me ka maluhia loa, me ka haahaa o ka naau malalo o ko kakou makuakane a me ko kakou mau mama aloha nuiia.

            I ka hoomaha iki ana iho o ke keiki i kana mau kamailio ana, ua pane koke mai la kona makuakane: Auhea oe e kuu hiwahiwa aloha, aole anei hoi e pono ke kali iki ka hoi ana a pau ka mare ana o kou kaikuahine, alaila manao aku ka hoi, i pau iho me ka laelae, a noho iho makou hoi aku no hoi olua.

            Pane hou mai la kana keiki:  Mau aua oe iaʻu e kuu makuakane, no ka mea, eia na opua la ke hoohaili mai nei ia maua e hoi, aia la he hana ko luna, ke ike nei au i ka pouli o ka lewa, me he mea la ua piha i na kupua e hoohalua ana i ko maua mau ola ma ko maua mau alahele, nolaila aohe wa hou aku aʻu e kali ai, eia ka manawa ua kokoke loa.

            Mahope iho o kana hooki ana i kana mau kamailio ana, kauoha ae la oia i ka ohana alii e hele mai imua ona, a ku poai mai la lakou imua ona me na waimaka e iho makawalu ana ma ko lakou mau papalina, a pane hope aku la oia: Aloha oukou.  Puili pakahi ae la ia lakou no na kipona hope loa a hookuu ae la.

            Iloa no a hemo ae kona ohana mai iaia aku, ku mamao aku la lakou a uhi paapu iho la ke ao iloko o ka rumi kahi a lakou i akoakoa ai, a nee ae la ke ao mawaho o ka hale alii, aia no ke keiki alii iloko o ke ao, a i ke kaa pono ana mamua pono o ka paehumu o ka hale alii, ua akoakoa ae la ka ohana alii mawaho e nana ana no kona pii kamahao ana.

            He wa pokole loa ua hamama ae la ka lani a iho mai la elua anuenue me na kilihune o ka ua koko e hooleiehuna ana i ka maka o ka opua, a ku pono iho la ma kahi a laua nei e hoolai nei a o ka pii koke ae la no ia o ka punohu ao ma kahi a na anuenue e pipio ana a i ke kau pono ana maluna o ke towera o ke Kakela alii ua hoohakui iho la ka hekili no ekolu manawa, a i ka pau ana o keia mau haawi aloha hope ana, ua hao aku la ka mana o Hitegela, a komo aku la laua iwaena o na ea puanuanu o ka lewa, e paio ana me na makani e hoonee ana i na ao imua o lakou, a e mouo ana i ko laua alahele no ko laua home iuiu.      

            E haalele aku kaua ia laua e ke hoa heluhelu, a e nana iki aku i ka ohana alii.  He mau la i hala mai mahope o ka hoi ana mai o ke keiki alii, ua hookoia ka mare ana o ke kaikamahine a ka Moi Hitekela Muda me ke keiki a Iunepera me ka hanohano nui, a mahope o ka hookoia ana o keia mau mea a pau, ua noho iho la ka ohana alii me ka maluhia.

            Oiai ka kaua eueu e kamoe la no ko laua alahele iwaena o na ano kaalelewa o ka lani kuakaa, aia hoi ma kahi mamao aku, ike aku la laua i kekahi mea pouliuli ano e me na lalapa uila e hoholo ana iwaena o ke konouli panopano eleele, a nei nakulukulu ae la ka pae opua a pela wale no keia mau hiohiona weliweli a laua nei i ike ai a hiki wale i ko laua kokoke ana aku, a pane ae la ua keiki nei i kona makua hanai:  O ua poe ake nei paha kela e akoakoa mai la mamua aku o kaua?  Ae, oia no, aka mai makau oe e kuu keiki e hoolana i kou manao e kuu milimili, aole lakou i heluia imua o ko kaua kuleana.

            Ia laua nei no e ohumuhumu ana, poha mai la ka leo weliweli o na kupua ino na haku a me na uhane ino o ka pouli i ka i ana mai:  Aha! O oe ka ia e Baretile Muda, kahi keiki muli loa a Hitekela Muda ka Moi o Pelekane a me Hitegela ke kupua o ka lewa nei, noho mai nei olua ilalo a ike mai nei ia makou iluna nei a manao ae e hoi mai a e kaua mai ia makou; ae, e hele mai no eia mai no ka lua kupapau o olua ua hamama.

            Lohe ae la ua keiki nei i keia mau olelo ana, ua paila ae la ka inaina iloko ona a hoopuka ae la i kona makuakane i kona manao:  E kuu ae oe iaʻu iwaho, akahi mai la ka hoi ka wela o kuu inaina.

            Hoolohe ae la oia i ka leo o kana keiki a hookuu ae la iaia iwaho o ke ao, a ku aku la oia me ka hiehie nui, aole i liuliu, ua makaukau ae la ka aoao o na enemi a ku ana me ka makaukau, a luai koke mai la lakou i ka luaipele a kane mai la me ka weliweli nui, a ha aku la ke kamaeu Baretile a lilo koke ae la i aheahe kehau e pa kolonahe ana i ka po lai maikai, a hala hope ae la keia make nui, a hohola ae la oia i kona mau lima a puka aku la ke ahi a me ke koko i huiia a pahola ae la maluna o lakou, a mamua o ka loaa ana ia lakou he manawa e pale ai ua lilo koke ae la ko lakou mau kino i mau kulu wai awaawa e haule ana ma ka ili o ka honua, a pela i lanakila ai ka eueu o ka lewa maluna o lakou.

 

HE MOOLELO KAAO

NO

Lameka Puluka,

Ka Makahiapo mua i oili mai, mai ka puhaka o ka Ui Pua Rose a me Kahanuopaineki.

KA MEA I KAPAIA KA

Ka liona o na mauna hui o Arabia, ka naita nana ulupa na kupua o ka lewa lani a me na kupua e noho ana i ka papaku o ka moana o ka mea hoi nana i pani ka maka o ka la.

            ALIA, aole iaʻu kou pakele a me ka ole, e ninau ae au i aʻu mau keiki; aia mai ia laua kou ola, aka, ma kuu manao paa no he oiaio no e make oe e pono ai, no ka mea, he ino loa oe a me kau mau hana ino, ina no aole oe i haliu kue mai ia makou i kinohi ina no paha e aho ia.

            A huli ae la ka olomana e ninau i kana mau keiki.  A i ka lohe ana o kana mau keiki ua hoole like aku la lakou, a kauoha aku la e li ia ke kupua Matone Samadaria me ka hoopaapaa hou ole aku.  I ka lohe ana o ua kupua nei, ua naka ae la kona kino holookoa me ka haalulu nui.

            O ka manawa no ia o Lameka Puluka i kauoha aku ai ia Polepa a me kona mau mua, e hookomo koke i ke kaula li ma ka pu-ai o ke kupua a e li koke iaia.  I ka pau ana o keia mau mea i ka hooponopono ia, aia hoi ua li koke ia aku la ke kupua me ka pule ole ia, a manana ana iluna o ka amana.

            A ua kau ua kupueu la a hala na la elua, aole i make iki, a i ka ha o ka la akahi no a ike ia aku e kau mai ana ia me ka lolo - a ua pau kona oni ana.

            Ia manawa, i pouli ano e aw ai ka aina i ka noe a uhi ma la ka pouli maluna o ka aina holo okoa, hoole ka la i kona malamalama, olapa ae la ka uwila a kui ka hekili, hoonaue mai la ke olai me ka makani nui e pa ana mai ke komohana mai; a oia ka manawa i lele loa ae ai ka hanu o ua kupua Matone Samadaria nei.

            A he mau hora o ka pouli ana ua haule mai la ka ua, a helelei mai la na hua hekili a piha pu ke aupuni, a he mau la elua: aia hoi, ua wehe mai la ka lani i kona malamalama, a ike ia aku la ka nani o ua aina la.  No ka mea, ma na alanui a pau o ke kulana kauhale e luhiehu ana kona mau pua o kela me keia ano, nui ke ala?    

            I ke kuu ia ana iho o ke kino o ke kupua Samadaria, ua au koke aku la ke poo o ka ihe a ka olomana a hamu aku la i ke kino o ua kupua eu la o ka lewa.  Aole i liuliu ua lilo koke ae la kona kino i papa pahoehoe.

            A pela iho la i hoopau ia ai ka luhi o ka kakou mau kamaeu, a huli hoi like aku la na ʻlii a me na makaainana no ka hale alii,  Malaila lakou kahi i luana ai, a i ka uhi ana mai o ka malu po, ke hoonanea la na ʻlii.

            Ua haawiia he papa aina hoohanohano no na ʻlii opio mai na makaainana mai, a ua lealea lakou a hiki i ke ao ana.  A i ke kupono ana o ka la i ka lolo, ua piha-kui mai la na makaainana mamuli o ke kauoha ana a ke alii opio, e hele mai imua ona na makaainana a pau no ke koho ana i moi no lakoui, mea nana e malama i ka maluhia o ke aupuni.

            I ka akoakoa ana mai o na mea a pau ua puka mai la na alii opio, a ma kahi i hoomakaukau ia no lakou, ma i laila o Lameka Puluka i ku mai ai a haiolelo aku la imua o na makaainana penei no ia:

            "Ena makaainana o ke kupua Matone Samadaria, he malihini au imua o oukou, aole aʻu mea ano nui e ae e kamailio aku ai imua o ko oukou mau alo i keia wa; aka, ua kauoha aku au ia oukou e akoakoa mai imua oʻu, a o ke kumu hoi o koʻu kauoha ana aku ia oukou oia hoi, ua makemake au e koho i alii no oukou mai loko ae o ke kahi o oukou.  Ua manao au e hookohu aku i a puuku o ke kupua Matone Samadaria oia ko oukou moi ke kupono nae ia i ko oukou manao.

            I ka lohe ana o ke anaina, ua ku mai la lakou a pane like mai la e ke alii opio, aole o makou makemake e koho ia i alii e, o ko makou makemake o oe no ko makou moi, a o makou no kou mau makaainana e noho no kakou.  Ua pane hou aku la ke alii opio: Ae no au i ko oukou manao e lilo no au i makua no oukou, mhope iho o koʻu hoi ana e iki i kuu one hanau, a me kuu makuahine; alaila, hoi mai au a noho i makua no oukou, a e makemake ana au e koho i hope noʻu no koʻu wa e kaawale aku ai mai keia aupuni aku.

            Iloko o keia manawa ua nui loa ka paakiki o na makaainana, a ua nui no hoi ka nooikaika ana o ke ʻlii opio, e ae ia e koho i hope nona.

            Ua koho ia ka puuku a ke kupua Matone Samadaria oia kona hope, a nana e hooponopono i ke aupuni i ka wa e kaawale aku ai ke alii opio, me ka hoolohe pono nae-o ua moi hou nei i na olelo, a me na kanawai a ke ʻlii opio e hahai aku ai, a ua ae mai la ua moi hou nei.

            Mahope iho o keia mau hooponopono ana, ua hookuu ia na hana a hoi aku la na makaainana i ko lakou mau home iho; a o na ʻlii opio hoi ua noho iho la no lakou me ka maikai.

            I kekahi mau la mai, ua hele kaapuni aku la na alii opio e kilohi i ka nani o ke aupuni hou o laua, a piha na pule ekolu, ua hiki hou aku la lakou i ka hale alii, a ua hoomaha iho la lakou no elua la; a i ke kolu o ka la ua puka aku la ka olelo kuahaua i na makaainana, e hele mai lakou e ike i na alii opio, no ka mea, e makaukau ana lakou e haalele ianei a hoi aku no ko lakou aina hanau.

            I ka lohe ana o na makaainana i keia olelo kuahaua, ua piha ae la ka lewa i na leo kumakena o ka uwe, no ko lakou minamina nui ia lakou, no ka mea, aole lakou nei i hoopoino wale aku i ko lakou mau ola a me ko lakou maluhia; a i ka wa hoi i ke kupua Matone Samadaria, e hoopoino mau ia ana ko lakou mau ola i kela la i keia la.

            Nolaila ua nui ko lakou minamina a ua hele mai lakou e hoonoho ia aku i Moi e ae, a e hoopau ia ka moi i koho mua ia; no ka mea, ua ike no lakou a ua maa hoi lakou i na hana ino a keia puuku i ka wa i aui ae, a no ia mea, ua mau no ka nui o ko lakou hopohopo a me ka makaʻu.

            Lohe ae la ke alii opio i keia mau leo ualo a na makaainana, ui ae la oia ia Laiana Bea; Pehea la kou manao, aole anei oe e ae e noho i Moi no keia aupuni?

            Wahi a Laiana Bea: He ae no au ke noho mai nae na nunui a pau he 16 me aʻu.  Pane aku la o Lameka Puluka: E kuu aikane, aole au e hoole i kou manao, ua hiki no kou manao ana pela.

            Pane hou aku la no o Laiana Bea: E noho iho no lakou pela e malama i ka maluhia, e hoi like no kakou a lalo a noho aku oe a hoi mai maua me ka wahine a kaua.  Ae mai la no kana aikane.

            A ia manawa ua alii opio nei i pane aku ai i na makaainana: O ka makemake o oukou, ua ae aku wau, a e hoonoho aku ana wau i kuu polii i Moi no oukou, a oia hoi ka mea e ku nei ma kuu aoao, he oluolu a he aloha i na makaainana, a e hoolohe hoi oukou i kona leo, no ka mea, oia no ko oukou Moi.

            I ka lohe ana o na makaainana i keia mau mea, ua piha kuʻi ae la ka lewa i na leo ahiu e hooho ana me ka hauoli nui.  A [ane hou aku la o Lameha Puluka: E hoonoho ana au i koʻu mau alihikaua he 16 e noho e malama ia oukou, a o ke alii o oukou, e hoi a hoi pu mai me ka makuahine o oukou ko oukou Moiwahine aloha, he makuahine i piha i ke aloha a me ka oluolu ko oukou Moiwahine e noho mai ana ma keia mua iho.

            Hookuu ae la ke alii opio i kana kamailio ana, ua ku mai la imua o ke anaina ke kauwahi makaainana a pane mai la: Ua oluolu loa i kou mau makaainana ka hookipa ana mai i ko makou Moiwahine me ka maluhia, a me ko makou apo lokahi ana aku iaia i kona wa e hiki mai ai.

            I kona noho ana iho, ua koho koke ia aku la oia i kiai no ke aupuni ekahi, a iaia no ka hooponopono ana o na mea a pau ma ke aupuni ekahi.

            I ka hiki ana mai o ka la e hoi ai na alii opio no ke aupuni o Alabia, ua kukuluia he papaaina maloko o ka pa alii no na alii a me na makaainana, a ua kauohaia lakou e hele mai e ai pu me na alii no ka manawa hope loa.

            I na makaainana e noke ana i ka nuu i na mea ai, ua nui loa ko lakou makemake i ke alii opio.  Ma ke poo o ka papaaina o na wahine e noho ana o Mahinakauahiahi; a ma ke poo o ka papaaina a na kane e noho ana o Lameka Puluka.  Ua ai iho la lakou a ua inu hoi no ke ola o ko lakou mau alii opio.

            A i ka maona ana, ua liuliu iho la ua mau alii opio nei e hoi; ua haawiia na aloha hope, a i ka pau ana o na ume aloha ana, ua huli hoi aku la na alii opio no ka hale uwila, a o na makaainana hoi, ke haawi mai la i na leo uwauwa o ke aloha no ko lakou mau alii.

            Aole i liuliu ua nalo wale aku la na ʻlii opio iloko o na ao polohiwa o ka lewa, a i a lakou nei e lele nei i ka lewa ua lele makaikai ae la lakou a puni ke ao a hiki loa aku la i ke aupuni o Mahinakauahiahi, a ma laila lakou kahi i hoomaha ai no na la loihi oia hoi ekolu pule me na la keo elua, ka noho ana o na ʻlii opio i ke aupuni o Mahinakauahiahi.

            A i ke kolu o ka la ua huli hoi aku la lakou i ke aupuni o Arabia me ka hanohano nui.  I ka piha ana o na la elua o ko lakou lele ana i ka lewa; a i ke kakahiaka nui o kekahi la awe, ua hiki kino aku la lakou i ke aupuni o Arabia.

            Ia lakou e makaikai ana i ke aupuni, ua ike iho la lakou e ia no ka ke aupuni iloko o ke kanikau kumakena, a e noho ana no ka ohana alii iloko o ke kumakena no ko lakou minamina i na alii opio.

            A ia lakou e kau nei i ka lewa, ua hoopuiwa ia ka manao o na mea a pau i ka ike ana ae i kekahi punohu nui e hoopuni ia ana e na ao opua, aia hoi ka punohu a me ka ua koko e hoopuni ana i ua ao opua ʻla.

            A o na anuenue he 16, e moe la kee ae ana mawaho o ua ao opua la; aole i liuliu, ua anapu koke ae la ka uwila, a kuʻi koke mai la ka hekili; o ka wa no ia o ua ao opua nei i ma hae ae ai, a lilo ae la na hoailona a pau i mea ole, a ike pono ia aku la ka hale uwila e kau hoolai mai ana i ka lewa.

            He hookahi mile ke kiekie mai ka ili honua ae; ia manawa i uwauwa ae ai ke kulanakauhale o Arabia me ka hauoli nui.  A he mau sekona mahope iho, aia hoi ua iho hoolai iho la ua hale uwila nei a ku ana i ka honua.

 

Kakela a me Kuke

            E laa na pahiolo, koi hole,

            hamale, koi nui a me liilii, kila,

            wili puaa, rula, apuapu, kui o @

            a pau, kala kaa, hao hoop@,

            pohaku hoana, kepa kei ilio, kaa

            la hao ilio, pahi, upa, pahi @,

            kalapu, kope hulu, pulupulu, @,

            lakala, lina hao, ami, keehi @.

KAULA OP@

            Palau o na ano a pau,

            Oo, ho, kopsls, pr, kipi

            kua, hao kope, au ho a

            a aku, kua bipi, lei bi-

            pi, kaula hao bipi, uwea

            pa, uwea keleawe, hao @

            piula, kaa palala, ipuhao, ipu@

PA PALAI MAKAU ME KI @

            Ili wai, papa holoi, koa ala, ia@

            kuaina, huʻakai, ehi wawae,

            hula pena, a pela aku.

            Pena wali, kini nui a me liilii @

            ano a pau, me ka pepa kuhi

            kuhi, pena keokeo, aila

            pena, aila hoomaloo,

            vaniki kaa, a me

            vaniki moe,

PENA HOOMALOO

            a me aniani hale

            AILA MAHU, AILA MIKINI, AILA MAM@

            AILA KAA, INIKA KAMAA.

PAUDA, KUKAEPELE, KIA@

PAUDA, UIKI IPUKUKUIO@

ANO HE NUI A LEHULE@

LOLE MAKEPONO

            E aa na

AHINAHINA, KALAKOA, KEO

KEO, LEPONALO, HULUMANU

UWE WAHINE, KUI HUMUHUMU

A ME KA LOPI

            Ke kuike a loaa no ia ma hehi i

            Kakela & Kuke

            NA MEA PIULA

Mikini Humuhumu

Mikini a WHEELER A ME wilson

MIKINI A WILCOX ME GIBBS

NA MIKINI A

REMINGTON

He nui loa na mea hao me na ukana @

ae o na ano a pau, aole hiki ke hai pa@

ia aku, hewa i ka wai na maka ke i@

            Laau Lapaau Kaulana Loa

            A DR. JAYNE,

LAAU HOOMAEMAE KOKO

LAAU HOOPAU NAIO, LAAU

KUNU, PENIKILA, HUAALE

PAAKAI, LAAU HOOPAA HI,

Ma na Laau Hamo a Pela ʻku.

            Kakela a me Kuke.