Ka Nupepa Kuokoa, Volume XXV, Number 11, 13 March 1886 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

 

BUKE XXV, HELU 11.     HONOLULU, POAONO, MARAKI 13, 1886.     NA HELU A PAU, 2067.

 

NA HOOLAHA KUMAU.

 

W R. KAKELA.

LOIO A HE KOKUA MA KE KANAWAI.

He Luna Hool@o Palapala.

tf

 

A ROSA. (AKONI.)

LOIO A HE KOKUA MA KE KANAWAI

He Luna Hooiaio Palapala

KEENA HANA : Ma ke Keena Loio Kuhinas.

tf.

 

 

DILLINGHAM & CO.

Mau Mea Kuai Lako Hoo

Alanui   Papu,    Honolulu,

 

FRANK PAHIA.

AHA AINA!   ANA AINA!!

  KEENA HANA : Aia ma alanui Moi, kokoke loa i ka Uwapo o Hooliliamanu.       tf

 

J P. HANAAUMOE.

He Loio a he Kokua ma ke Kanawai ma na

      Aha Hoomalu a Apana o keia Aupuni.

E loaa no au ma Puna, Hawaii.

 

CHAS H PULAA.

HE LOIO A HE KOKUA MA KE KANAWAI

A e loaa no au ma Honomakau, Kohala Akau, Hawaii.

               2001-tf.

 

CECIL BROWN.

LOIO A HE KOKUA MA KE KANAWAI

A he Agena Hooiaio Palapala no ka

Mokupuni o Oahu

KEENA HANA: Helu 8 alanui Kaahumanu

tf.

 

W A. KINI.

LOIO, LOIO, LOIO.

  KEENA HANA:  Helu  15  Alanui  Kaahumanu, Honolulu

               tf.

 

W. C. AKANA (KALAUKI.)

He Mahele a Unuhi-olelo ma ka olelo Pake me ka olelo Hawaii.  Ua makaukau no hoi a hana i na Palapala Kuai a Hoolimalima a pela aku maienena o na Pake a me na kanaka Hawaii.  E loaa no au ma ke Keena Helu 7, Alanui Moi, ma kahi e hokoke ana i ka uwapo o Haaliliamanu.

                2010-1y

 

WILDER & CO. (WAILA MA.)

Mea kuai papa a me na lako kukulu hale na ano a pau, a me na me ne pono a pau no ka hal@.

Kihi Alanui Moiwahine me Papu.     tf.

 

RICHARD F. BICKERTON.

              (PEKEKONA.)

LOIO A HE KOKUA MA KE KANAWAI

KEENA HANA : Helu 27 alanui Kalepa.

tf.

 

WILLIAM AULD.

Luna Hooiaio Palapala Kepa Paahana

no ka Apana o Kona.

  KEENA HANA: Ma ke Keena Wai o Honolulu.

               tf

 

JOSEPH WILLIAM KELIIKOA.

He loio, a he kokua, a he pale, a he koo ma ke Kanairai.  E loaa no au ma ke Keena o J. M. Poepoa, kihi o na Alanui Alii a Anini. Honolulu. Ua hiki no hoi ke hana i na Palapala pili Kanawai o kela me keia ano.

               1yr.

 

KE KAUKA IAPANA

Mr. m. Goto.

He Kauka no ka mai lepera, na mai e pili ana i ka ili o ke kanaka, ka mai kaokao,

            etc.      etc.      etc.

  KEENA HANA.  Aia ma Kapalama, mauka pono o @hi noho o ka Hon. J. Keau.

NA HORA HANA  { Hora i a ka 9 p. m.

  :       :      :      :       { Na La Sabati hora 8 a @ m.

                2047-1yr

 

J. A. MAGOON, (Makuna.)

LOIO A HE KOKUA MA KEKANAWAI

  Keena Hana, Helu 42 Alanui Kalepa, kokoke i ke Keena o Pekekona.

               tf

 

JAMES M. MONSARRAT.

          (MAUNAKEA.)

LOIO A HE KOKUA MA KE KANAWAI

He Luna Hool@io Palapala.

  E hana ia no na Palapala Kuai, Palapala Hoolimalima, a me na palapala pili kanawai e ae ma ka olelo Hawaii. Dala no ka hoaie ma ka moraki ma na waiwai paa.

  KEENA HANA: alanui Kalepa.

               tf

 

JOHN MAHIAI KANEAKUA.

  LOIO A HE KOKUA MA KE KANAWAI.

  HE MEA UNUHIOLELO MA KA OLELO

  BERITANIA A ME KA OLELO HAWAII.

  Keena Hana ma Alanui Kalepa, Honolulu, ma Ewa iho o ke Keena Kuai Duk@ a ka Papa Hawaii.            1yr.

 

KA MOOLELO KAAO O

LAMEKA PULUKA.

 

Ka Makahiapo mua i oili mai, mai ka puhaka

o ka Ui Pua Rose a me Kahanuopaineki.

 

KA MEA I KAPAIA KA

Ka liona o na mauna hui o Arabia, ka naita nana

ulupa na kupua o ka lewa lani a me na kupua

e noho ana i ka papaku o ka moana, o ka

mea hoi nana i pani ka maka o ka la.

 

I KA ike ana mai o na mahele Naita o ua powa nei ua haulehia ko lakou haku alii powa i ka Naita malihini, hoouna mai la ko lakou pukaua nui i kekahi mau Naita o ua powa nei e kii mai i ko lakou haku a e hoihoi aku iloko o ko lakou halelole; a ua hookoia aku no hoi keia kauoha me ka hikiwawe, a aia hoi ke hoihoi ia la na apana kino o ua powa nei. Ia wa koke no poha mai la ka leo o ka o-le a ka pukaua nui o na powa, aia hoi, oili mai la ua mau Naita la o ke alii powa he 86,000 a e hulali ana hoi ka lakou mau pahikaua i ka malamalama o ka la, me ka hoopuka pu ana hoi me na huaolelo kupono ole. Poha mai la hoi ko lakou mau leo o ka maina : A mahope oe ike e keia wahi keiki lapuwale, e like me kou pepehi ana i ko makou haku, pela auanei oe e alualu aku ai ma kona meheu iloko o na sekona pokole loa. Me keia mau huaolelo a na powa i panai aku ai ke alii opio i keia wahi olelo: Aia no ia ia oukou.

  Aole i pau pono ae na huaolelo a ke kamaeu opio, ua lele like mai ua poe powa nei me ka manao e hopu pio i ke alii opio. A iloko no hoi o ia manawa i kuu pau aku ai ua opio nei i ka holo o kona lio imua pono o na enemi, a he imo ana na ka maka, halawai aku la kana hauna pahi me ka maka mua o na powa, a aohe hoi o lakou ahailono ua pau loa i ka make, a pela pu no hoi kona lio e peku ana e hehi ana, a ua palekana hoi ke alii opio ma keia mau hana a kona lio. A ma kona ala hele, aole he mea hookahi i lanakila imua ona, a hiki i kona oili ana aku ma kekahi aoao, aka, he mau heana o na powa a me ke moanawai koko o ko lakou mau kino ke lana ana maluna o kona kahua e ku ana. Huli hou aku la oia i hope a hoomaka hou aku la e luku i na enemi me ka weliweli nui.

  A oiai no hoi ua opio nei e hoomau ana i ka nee ana imua me ka luku ana i na enemi, aia hoi, halawai aku la oia me kona mau Naita e luku ana i na enemi, ma ka hoike ana aku o ka nunui Polepa i ka hoailona pilikia maluua o ko lakou haku opio, a i ko lakou hui pu ana, aole loa he wahi i manuheu o ko lakou haku opio, a ikuwa ae la ko lakou mau leo hauoli i ka lewa, a huli aku la e luku i na powa; aole hoi i hala he hapaha hora, ua pau loa iho la ka hapa nui o na powa a mahuka aku la hoi kekahi poe a e lawe ana i ke kino o ko lakou haku no ko lakou home kuahiwi , a oia hoi ka panina hope loa o keia kaua ana.

  I ka pau ana o keia hakaka ana, huli hoi aku la ka ohana alii a me na makaikai no ko lakou mau home iho; a o Lameka Puluka hoi, ua hoi pu aku la no oia me kona mau Naita mahope o ka huakai; a oiai hoi lakou nei e hoi nei me ka hoolohilohi ana mahope loa. A oiai ke hookokoke aku nei ka huakai no ka hale alii, oia no ka manawa i hoi ae ai na Naita o ua opio nei iloko o ko lakou aupuni pahikaua me ka ike ole ia. Holo aku la ua opio nei a hui pu aku la me ka ohana alii, a komo nui aku la iloko o ka pa alii. I ka lele ana iho o ua opio nei mai kona liko iho, hoihoi ae la hoi kona haku iaia iloko o kona aupuni buke, a he mea hoopahaohao keia i ka ohana alii a me ka lehulehu a pau.

  Ia lakou i komo aku ai iloko o ka hale alii, ua makaukau mai la na mea ai, a haule aku la lakou paina; a i ka maona ana, hoi hou aku la lakou ma ka rumi hookipa no ka hooluolu ana. Ia lakou e nanea ana, a o ke kaikamahine alii hoi ma ka aoao o ka kakou kakou eueu, ua hoopuiwa ia na mea a pau i ke komo ana mai o kekahi kino pahaohao; oiai he kino bea he mau wawae no ka bea, a o kona poo a me na helehelena, kona umauma, he ano kanaka; a o kona mau kipoohiwi he kihikihi, a he nunui hoi a ka launa ole kona mau lima. Hele mai la oia a kokokoke i ke alii opio, kukuli iho la oia a kolo mai la me na waimaka e hiolo ana ma kona mau papalina; a pane mai la : E ke alii opio ka wiwo ole, ka mea hoi nana e pulumi na kupua ino o ka lewa, a o ka puukalahala hoi o ka poe i leohia i na pilikia, i kii mai nei au ia oe, e kii kaua i kuu kaikuahine, oiai ua lawe aihueia aku oia e ke kupua Milota o ke Kai Eleele, ka mea e noho mana ana ma na papaku o ka hoho nu o ka moana, a nona hoi ke aupuni i ike kona malamalama e like me ka mahina piha; ua hoao au e kii, aole nae e hiki, no ka mea he nui wale na kupua e hele mai ana me ko lakou mana nui; nolaila, ina he aloha kou ia'u, e hele kaua ano, o lohi loa auanei kaua a lilo e mai hoi ke ola o kuu kaikuahine aloha.

  I ka lohe ana o Lameka Puluka i ka hoike a ua kanaka nei, komo aku la ka manao aloha iloko o kona puuwai no ke kaikuahine o keia kanaka kino ano e i lawe aihue ia; a no ke koi ana mai hoi a ua kanaka nei i ke kamaeu opio, ku ae la o Lameka Puluka a hoomakaukau iho la nona iho. Ke uwe mai nei ka ohana alii a me ke kaikamahine alii me ka aua pu mai e noho no laua, aka, pane aku la ka kakou opio: I hanau ia mai au e ko'u makua i hoola a hoopakele i ka poe i loohia me na pilikia e like no hoi me oe, nolaila aole au e noho ana. Pane hou mai la ua kaikamahine alii nei: A pehea la ke aupuni a me a'u? Wahi a ke kamaeu opio : No'u ke aupuni, a o oe no hoi ka Moi, a ke lawe mai nei au i kuu aikane a oia hoi kau kane a mau loa, a na ka make e hookaawale i ko olua noho ana; a i keia hora e lawelawe ia ia ka laahia o ka mare mawaena o olua.

  Huli ae la ua opio nei a kahea aku la i ka haku hotele e hele mai imua ona, a ua hooko mai la no hoi ua haku hotele nei, a e ku ana oia imua o ke 'lii opio; a me na huaolelo o ke aloha ua opio nei i pane aku ai :  E kuu aikane aloha, i keia manawa e hooko aku ai au i ka'u i hoohiki paa aku ai imua ou oia hoi e lilo ia oe keia makana nani, a o ka lua hoi o na makana, me a'u ia a mau loa , a o keia hoi ke ko ana o ia hoohiki.

  Mahope iho o keia, ua mare ia iho la ka haku hotele me ke kaikamahine alii me ke ano pupuahulu, a ua malama ia he wahi paina ma ke ano mama, a i ka pau ana, ua haawi ke aloha hope loa mawaena o ke alii opio a me ka ohana alii, a oili aku la ua opio nei i ukali ia hoi e kana aikane me kana aliiwahine a me ka ohana alii. Pio aku aku la ua alii opio nei i na ano pio a pau ma ke ano hoonalonalo i kahi e hoea mai ai o kona lio, wehe ae la hoi oia i ke kui i omau o kona lio i paa ai, he manawa ole, ku ana o Lo Paina Huelo me kona nani nui. Pane iho la oia i kana aikane : E kuu aikane aloha, e noho oe me ka makaala loa ma ka hooponopono aupuni naauao, oiai he inoa wale iho no ko'u maluna o ke aupuni, a o olua no na Moi, a o na loaa a pau o ke aupuni nei, e ai olua me ka hookoe ole na'u kekahi, aka, e hoomanao mau no'u mai poina, a hiki i ko kakou wa e hui hou ai; haawi hou ke aloha muki me ka ui, a lulu lima pu hoi me kana aikane a me ka ohana alii a pau

  Kau ae la ua kamaeu opio nei maluna o kona lio, a ia wa no i pii malie ae la oia a kau aheahe iho la maluna o ka hale alii i ukali ia hoi e kona kamaaina a nana auanei e pailata aku i ke alii opio, a e like no hoi me kona ano kupanaha, pela i hiki ai iaia ke lele nona iho; a no ka manawa pokole loa keia kau hoolai ana, ua nalowale koke aku la lakou ma Peresia aku.  A oiai na kukuna o ka la e oili ae ana maluna o ilikai, ua hiki aku la laua ma kekahi mokupuni kupanaha iwaena o ka moana, a ua like paha me Nihoa kona nui.

  Oiai laua e hoomaha ana, pane mai la kona kamaaina : O keia ke aupuni pahaohao o ke kupuna Milona a o kona wahi hoomaha hoi; a he 18 aku aupuni i koe alaila hiki aku i ke aupuni a ua kupua Milona la e noho mai la i ka papaku o ka moana; a o ka uka kahi e komo ai, aia iloko o kela pali kiekie e ku mai la. O keia aina mamua, he aina i piha me na momona a me kekahi lahui kanaka, a i ka wa i noho mai ai o na kupua nei, ua pau loa kanaka i ka ai ia a neoneo ka aina; a ke kii nei ua kupua nei i na kanaka e ae o na aupuni mamao, a pela i lilo mai ai kuu

kaikuahine, oiai aia malaila kona ola; a ina e mau ke ola ana o keia kupua ino, e pau loa ana paha na mea o ko'u aupuni i ka make, a owau pu aku paha kekahi e pau i ka ai ia e ua kupua ino nei. A wahi a ke alii opio: E hoao no kaua e kii e paio, a ina he nui loa no ko iala mana, poino no kaua, aka e hoopau kaua i ke kamailio ana, a e paina kaua. Wehe ae la ua opio nei i kana wahi buke kupua, a e like no me kana i hana mua ai i ke alualu ana i kahi alopeka pela no hoi keia, a e ku ana kekahi papaaina imua o laua, a hopiha iho la laua i ko laua mau waihona me keia mau mea ai ono loa i hana ole ia e ka lima kanaka.

  Pau ae la ka laua paina ana a nalowale aku la no hoi keia mau mea, hoomaka aku la laua e hele no ka puka e hiki aku i kahi o ke kupua Milota; a ia laua i hookokoke aku ana i ka welelau o ua pali nei, ike mai la ka manu kiai o ua puka nei, a lele mai la oia me kona mana e haehae ae ia laua nei me kona nuku oioi a me kona mau maiuu, aka, unuhi ae la ke kanaka pahaohao i kana kakaka iwi Hipopotamu, a oili ka pua a ua hapa bea la, loaa pono aku la ua manu la a haule aku la ilalo o ka pali ua make loa. A i ko laua hiki ana aku i ka puka, iho aku la laua ma ke alapii e iho ana ilalo. Hoea aku la laua ma kekahi pani hao a kikeke aku la, aole nae he leo i pane mai; palua a pa-kolu ka laua nei kikeke ana, poha mai la kekahi leo nui i ka i ana mai: E ku a hai mai owai mawaho. Hemo ka puka. wahi a ka pane a ke alii opio. Hele pela, o make loa oe ia makou. Ia wa, hopu aku la ua opio nei i ka puka a kulai aku la, hemo aku la ka puka a loaa aku la na kiai a pau loa i ka make me ka pakele ole o kekahi o lakou. Unuhi ae la oia i kana pahi a hookuu ae la i kona pukaua nui, a kauoha aku la e hele aku oia mamua e luku i ka poe e kue mai ana iaia, a iho pu aku la no hoi lakou. Ike mai la na kupua e noho ana ma na pali, ua lele mai la lakou me na momoku ahi e a ana a me na hao wela, aka, i kumu hoopokole i ka luhi, ua hookuu aku la ke alii opio i kona mana, a oili aku la na elelo manamana o ka uwila a hamu aku la i na mea a pau e loaa aku ana i kona mana.

  Pau loa iho la ka hapa nui o na kupua a koa kakaikahi aku la kekahi o lakou, a na lakou i holo aku a hai i ke kupua Milota, ua pau ko lakou nui i ka make. a koe kakaikahi aku la lakou mai ko lakou mau enemi mai, oiai he ekolu wale no lakou, a he mana nae i oi aku i o Milota.  A i ka lohe ana o ua kupua nei, ua hoouna hou mai la oia ia lakou e hele hou mai e kaua, a i kokua pu ia me kekahi mau tausani kupua, a hele nui mai la e kaua i ke kamaeu opio a me kona mau hoa. Iloko o keia kaua ana, ua koe aku la elua wale no, a ua pau hoi ka nui i ka make. Hoi aku la keia mau wahi kupua a hai aku la i ke kupua Milota ua pio lakou, a noi pu aku la e haawi pio aku ka pono, i ole ai e pau loa na kanaka i ka make. Pii ae la ka inana o ua kupua nei a kauoha ae la i kona pukaua nui e hopu aku i na wahi kanaka hohe wale a e okioki ia ko laua mau pepeiao i ole laua e hoopuka hou i keahi huaolelo e haawi pio aku iaia imua o ka eu o na mauna hui.  Anehe mai la ka pukaua o ua kupua nei e hopu mai ia laua, huli ae la nae laua a holo aku la imua o Lameka Puluka ma no ko laua pakele. Hui aku la ua mau wahi kanei me ke alii opio, a he mea e kona aloha i ka laua mau kamailio; hoohiki pu aku la no hoi laua e lilo no Lameka Puluka a mau loa.

  Hoomau hou aku lakou elima i ka nee ana imua, a i ka hala ana o na aupuni he 12 me ka nui no hoi o na pilikia, ua hoea aku la lakou i ka 13 o na aupuni o ua Milota nei, a ilaila i halawai aku ai lakou me na mauna ahi he 18 a me na lua ahi 7.  I ka ike ana o ke alii opio 1 keia pilikia, kauoha aku la oia 1 kona hoa'loha Laiana Bea, e noho lakou malaila a oia a me kona pukaua ke komo iloko e kinai ai i ke ahi; a mamuli o ka hoike a kona mau kanaka hou, o ke kumu o ke ahi, no ke kookoo kupua no ia o Milota, a i ka wa e paa ai ke poi o ua kookoo nei, oia ka wa e pio ai ke ahi. Hemo ae la ke koloka o ua opio nei, a haawi aku la i kona hoa'loha, a unuhi ae la i kana pahikaua a komo aku la iloko. Kauoha mai la kona lio e huki ae i kona hulu a-i a e hoolei aku iloko o ke ahi, a e loaa auanei ko kaua alahele e hiki aku ai i kahi o ke kookoo alu o ke kupua Milota; ua hooko aku la no hoi ke alii opio i keia kauoha, a e moole, ua mahae ia ae la ke ahi, a pela laua i komo maalahi aku mawaena o ke ahi, a aole i liuliu, hiki aku la laua ma kahi o ua kookoo nei e ku ana oiai kona welelau iloko o ka honua.

  Ia manawa i komo aku ai ke alii opio i komo aku ai i kahi a moo e hoopuni ana i ua kookoo nei, aluku aku la ia laua; luai aku la hoi ka nunui Polepa i ka luai pele maluna o ua mau moo nei, a lilo ae la i papa pahoehoe. Lalau aku la ke alii opio i ke kookoo a kolu iho la i ke poi a paa, huki ae la oia mai ka honua ae, a oia no ka wa i naueue ae ai ke aupuni o ke kupua Milota, a he mea hoopuiwa keia i ua kupua nei. Kau hou ae la ua opio nei maluna o kona lio a hele aku la no ka hale alii o Milota. Oili mai la ua Milota nei a ike mai la i ka kakou kamaeu opio, ua kau iho la ke ano makau no ka make e kau aku ana maluna ona, aka me kona ano kupua, ua pane mai la oia me ka maalea nui i kumu e punihei aku ai ke alii opio : O oe mai la ka ia e kuu haku; eia aku nei ka ia oe ke kookoo o kaua o ka'u no ia e kakali aku nei ia oe o kou hiki mai, a ua hoohiki paa no au nou ia kookoo a me keia wahi mea mana uuku, eia iloko nei o keia wahi holowaa uuku. Aka mamua o ka hoopuka ana aku o ke alii opio i kekahi huaolelo, ua hawanawana mai la kona pukaua nui me keia mau huaolelo : E kuu haku opio, mai puni aku oe i kela mau olelo hoopunipuni, no ka mea, i ka wa e pili aku ai keia kookoo i kela wahi pahu, e ike auanei oe e nalowale ana keia kookoo a hoi hou aku no a pili me iala, a nui aku ko kaua luhi a me ka alo ana i na pilikia a pau mai kela kupua ino mai.

  I ka lohe ana o Lameka Puluka i keia mau olelo a kona pukaua, ua pane aku la ua opio nei me ka leo nui : E ke kupua ino a aihue wale i na kaikamahine nani o na aupuni o ka honua a me ka lewa, o keia ka hora nou e make ai a e koala ia kou io i ke ahi a papaa; manao paha hoi oe kou paniku ana ae nei i ke ahi, aole e hiki ia'u ke koma mai a me kuu pukaua nei: a me kou hoonoho ana ae nei i ko mau wahi moo keiki au i hoonoho ai i mau kiai no kou kookoo, me kou manao e hiki ana ia laua ke hoopio mai i ko'u mau lima a me ke keakea ana i ko'u alahele e hele mai ai. Oiai laua e kamailio ana, lohe ia aku la ka leo o Laiana Bea a me kona mau hoa e uwauwa ana me ka leo nui. Aole i u iho, hoea ana lakou a hui pu iho la me ke alii opio.

 

KA MOOLELO KAAO EEHIA O KE KEIKI ALII

ROMURA.

(Ka Puuwai Liona,)

 

  Ka mea i kapaia, ka Opuu Rose o na kihapai me ka Punwai o kona Lahui, a o ka Manu Aeto lioi o na Kualono a me ua Ululaau anoano o Alegeria; he Iwikani no na au i hala.

 

Ka Hookalakupua o ka Makakila.

  [E na makainaka kuwili o ka Nupepa KUOKOA,--eia mai he nanea hoehaeha puuwai a ka manao e hiaai ai me ka hauoli a me ka eehia pu no hoi. A ke pahola ia aku nei imua o ko oukou mau alo me ka iini nui e loaa ana ia oukou ka lualai pua ana me ko kakou nanea ku i ka eehia a me ke paha'oha'o, a no ka hope loa o keia.--Aloha oukou a pau.]

 MAANEI, e hoomaka ana kakou no ka moolelo o na makua o Romura:--I ke au e nohoalii ana o Velona Rabona, ka Moi pahaohao o ke kalaunu o Alegaria a me kana aliiwahine opio Lavania, ka ua kaulana o na kakai mauna o Alebiona kahiko ke kaulana (oia hoi o Pelekane), o keia kekahi o na Moi puni hahai holoholona, a me he la ua hanau ia no oia no ia hana. Aia no hoi me ua alii la kekahi ilio nui huluhulu a nani no hoi o kona hulu a ka manao e hoohihi ai ke ike, a nona ka inoa i paanaau i na mea a pau o ke alo alii Rabona a hoea loa aku i na kuaaina o kona aupuni, oia hoi o Robine. He punahele keia ilio imua o ke alii, a ua mahalo nui ia ka hana a keia ilio, oiai ua hiki loa iaia ke hoohoka i ka mama o ke dia, he ole iaia na wailele a me na muliwai; a hiki loa aku no hoi ka palena o kana mau hana iwaena o na hana pohihihi i hanaia ma kahi malu.

  I kekahi la puanuanu o ka hooilo, ua kahiko ae la ke alii iaia iho me na lako o ka oihana hahai holoholona, a lawe ae la ia elua mau keiki lawelawe a me kana ilio punahele pu me ia. I ka makaukau ana o na mea a pau, kau ae la ke ahi ma kona lio me kana kakaka e paa ana ma kona lima, a pela no hoi kona mau keiki lawelawe a me kana ilio e holo ana malalo, a holo aku la no ka ululaau. I ka hala hope ana ae o ke kulanakauhale, hele ana lakou nei iwaena o na lau lipolipo o ka waokele, a ma kahi e kokoke aku ana i ka ululaau, malaila i hoomaha iho ai no kekahi mau minute a hele hou aku la. Kaa pono aku la lakou nei iwaena o ka polikua o ka ululaau, a ia wa i ike iho ai lakou i kekahi meheu wawae dia hou loa me he la o ka hala ana iho no ia, a ua hoohauoliia hoi ko ke alii manao no ka hoopokoleia o kana huakai. Hoomau aku la lakou i ka moali wawae dia, a e hi'o ana hoi o Robine ia wa, aka, ua papa aku la ka Moi i kona mau keiki lawelawe, aole e hookuu koke i ka ilio aia a ike pono ia ke dia.

  He mau mile i hala ae, hoea aku la lakou ma kekahi ponaha oneanea e ulu ia ana e na pipiwai a me na pua lilia a puni, a he ano iliwai like hoi ka waiho ana o ka aina aole nae lakou i ike aku i kekahi dia.  Lele iho la lakou mai na lio iho a kauoha aku la ka Moi i kona mau keiki lawelawe e wehe ae i ka noho o na lio, a ua hooko ia ae la keia. Noho iho la ka Moi a paina iho la i kona aina awakea me na keiki, a ia lakou e ai ana ua ike aku la ka Moi i kekahi dia wahine keokeo e inu ana i ka wai ma ka hu-a o ka ululaau, me ka malie ka Moi i lalau iho ai i kana kakaka a omau iho la i ka pua maluna o ke kaula, a ia wa no ua hookuu aku la oia i kana pua mai ke kakaka aku. E like me ka anapu ana o ka uwila pela ka oili hikiwawe ana o ka pua a ku aku la ua dia nei a hina make aku la i ka honua. Ua ku ke dia wahi a ka Moi i na keiki, e wiki, mai kali, wahi hou a ka Moi. Ku ae la o Ariela ka mea i olelo ia ke keiki alii o ke kipuka ili o na pali a me na kualono kapu anoano o Alegeria; aku ae la maluna o kona lio a haalele pau aku la i ka holo, a pela no hoi me ka Moi Velona Rabona, oiai laua e hookooke loa aku ana, ua puoho hou ae la ua dia nei a kaukoo malie aku la. I ka ike ana aku o Ariela ua hooi loa ae la oia i ka holo o kona lio i pili koke aku mahope o ke dia, a pela pu me ka Moi me Lakela, aka ua hoomamao mau ia lakou.

  Ia wa no i kauoha ae ai ka Moi e hookuu ae ia robine ke kamahele kaulana o na ululaau, he mau leina elua a ekolu ua naowale aku la ua Robine kaulana nei e uhai ana mahope o ka meheu o ke dia pahaohao o ke kakela pali o Liberia.  (E makamaka hoohialaai o keia nanea, e waiho iki ae ko kakou kamailio ana no ka Moi Rabona a me kana mau kauwa, a me Robine hoi kana ilio punahele e uhai la ma ka meheu o ke dia wahine pahaohao o na kakela pali he 17 a me na awawa kapu. A e huli hoi ko kakou hoonanea ana no ka meheu lepo o keia dia hookalapua). O keia dia wahine i ku ai i ka pua a ka Moi aole ia he me e ae, o ke kaikua hine ponoi no ia o Laureneta ka mabu hapa kino kanaka, a o ka weli hoi o na ululaau a me na kuahiwi, a o ka olali hoi o na kakela pali he 17 a me na awawa kapu, kahi ana e hoohoka mau ai i ka poe uhai mahope ona; nolaila, aole loa he mea hookahi e hiki ke hookolo aku mahope o ua mabu aiwaiwa nei. Elua wale no laua i hanau ia mai ai e ko laua mau makua, o Laureneta he keiki kane oia o ke kono kanaka a kino mabu, a ua puni hoi kono kino i ka huluhulu o na waihooluu like ole, a nona hoi ka ilaika a me ke oolea o ko na mau lala e like me ka hao, a he palemo oiaio hoi no ke kahua paio.

  Ua hiki iaia ke pulumi pau ina he mau tausasni o na kanaka e aa aku ana e ku a paio aku imua ona, a ua hiki no hoi iaia ke hoohoka i ka mama o ka poe holo lio ke uhai aku iaia, a o ka mana o ka pahikaua a me ka laau ihe oia kana hana i lehia iaia, a he mea ole hoi na mea make a pau e hiki aku ana imua ona. O kona kaikuahine o Bomebe kona inoa, a o kona kino he dia keokeo a nani no hoi o kona hulu, a ua kaulana keia dia no kona kaahele mau ana ma na aina a pau. Ua lewa iaia na kuahiwi, na waoakua, na kahawai a me na moana wai, na wailele, na pali kuhoho a me na kulanakauhale kamahao, na kihapai pua, na malaai a me na wahi kaulana a pau o ka aina. E ike ana oia i na kaikamahine ua a kaulana, a oia mau mea a pau oia kana mea e hoike aku ai imua o kona kaikunane hapa mabu, a ua nui a lihulihu wale na kaikamahine alii ua i lawe aihueia e ua Laureneta hookalakupua aiwaiwa lua ole la. He nui na makua i hookaumanaia a me na Moi no ka lakou mau kaikamahine, a ua hoala ia kekahi puali koa nui no ka hookolo ana aku ma na kapuai o Laureneta : aka, aole loa he wahi moali e hoike mai ana i kahi o keia hapa mabu e noho nei, oiai o kahi o ua aiwaiwa la e noho nei, aia no ia ma kahi o ka hau paa e nee mau ana i na wa a pau a puni ka makahiki. O kekahi kumu o ka loaa ole i ka poe uhai iaia, oia no kona hiki ke holo maluna o na lala laau o ke kuahiwi me ka mama nui, a hiki i kana wahi e huli mai mai e paio me ka poe e uhai aku ana iaia a hoopuehu mai ia lakou.

  O ka inoa o ko laua makuakane o Vera Baruba, he nunui i kaulana ma na moolelo o Arabia a me Aigupita, a i kaao mau ia ma ke alo alii o ka Moi Maximilian ke kaulana o Alebiona kahiko, a o ka luaui hoi o ka Moiwahine opio Lavania ka ui, a o ko laua makuahine o Volaga Seppe, oia hoi ka muliwai o ka aina papu palahalaha : ka mea i kaulana no ka ai kanaka a me ka heopoino ana i na kamahele, a e huluhulu hoi ko laua kino a puni. Ua noho laua a hiki i ka wa i hanau ai na keiki, he hapa mabu a he dia. A i keia wa o ko kakou nanea kamahao, ke ola nei no laua a hiki i ka wa a ke kamahele kaulana i pulumi aku ai ia lakou a pau, a o ka mea hoi nona keia nanea eehia i kapaia o "Romura ka puuwai liona. (E na makamaka, e aui hou ae ko kakou kamailio ana no Robine, ka ilio punahele hoi a ka Moi Rabona.) Ia Robine i haalele aku ai i kona kahu Moi a e haalele pau ana hoi i kona mama holo e like me ka mea i maa mau iaia. a oia no hoi ka wa i oi loa aku ai ka mama lua ole o Bomebe, a i ka wa i aneane loa aku ai o Robine e nahu aku, oia no ka wa i lele aku ai o Bomebe i ke kae o ka pali ekahi o ko laua mau home pali he 17 a nalo aku la iloko o ka hau e uhi ana. No ka paukiki loa o keia holo ana o Robine ua lele aku la oia i ka pali, mamua ae o kona haule ana, hae ae la oia hookahi leo no ka wa hope loa a nalo aku la iloko o ka hau iwaena o na pali kuhoho. O keia haule ana o Robine aole oia i make, aku, aole nae oia i loaa no umi makahiki a oi.

  I keia wa i nalo aku ai o Robine, ua kauoha ikaika ae la ka Moi Velona Rebona e hokolo ma ka meheu kahi a ke dia a me ka ilio i holo ai. Ua hookolo aku la lakou ma na meheu o ka mea a ka Moi e makemake nei e loaa a hiki i ka wa i uhi mai ai ka pouli maluna o na lau laau o ke kuahiwi, a i kela a me keia hapaha hora e hookani mau ana no hoi ka Moi i kana ulili kahea i kana ilio punahele aloha no ka hoi mai; aka, aole loa oia i hoi mai a hiki i ke ao ana o ua po la. I ka pahola ana mai o na kukuna malamalama o ka la maluna o na lau laau lipolipo o ke kuahiwi. I keia wa i ulu ae ai na manao hakukoi iloko o ka Moi no kana ilio punahele ka milimili hookahi hoi imua o kona alo, a ua ike pu ia aku no hoi na hiona kaumaha maluna o ka Moi. Pane ae la oia i na keiki, akahi wale no hele loihi ana o kuu ilio, ua halawai paha oia me kekahi mau ulia poino ? A kauhoa ae la oia ia Lakela e pii ae iluna o kekahi kumu lau a e puhi aku i ka ulili, ua hooko ia ke kauoha me ke kali ole. Pii ae la ua keiki nei a kau iluna o kekahi kumu laau nui kiekie a kani kapalili ku la ka leo o ka ulili a ke ke@ki uhai holoholona a hiki i ka aneane ana aku o ka la e nalo i ka ilikai. Po ia la a ao ia po aole loa i hoi iki mai ua Robine nei.

  I ka lima o ka la, ua pono ole ka manao o ka Moi, a e hoopuka mau ana oia me na huaolelo ku i ka walohia no kana ilio punahele ka milimili hookahi hoi imua o kona alo me ka uwe pu ana ae i kahi a laua e alo ai i na ino he nui, o na huaolelo i hoopuka ia e ka Moi me na waimaka e kihaehae ana ma kona mau papalina, a ua ono ole iaia ka ai a me ka wai. I ka hiku o ka la, ua kauoha ae la ka Moi e huli hoi aku lakou no ke kulanakauhale alii me ka luuluu a me ka mokumokuahua o na manao. O ka nuhou kamahao i hai ia ma na wahi a pau o ke kulanakauhale alii, oia no ka nalowale ana o ka ilio punahele a Moi, ua lilo i mea kamailio nuiia keia nalowale ana, a ua manao wale kekal@ poe ua make ka punahele a ka Moi. Ma kekahi la ae, ua hoopuka aka ka Moi he olelo hoolaha ma na wahi a pau o ke aupuni peni: "Ua makemakeia na mea a pau e hele mai lakou maloko nei o kuu pa alii i na la a pau a hiki i ka la hope keia mahina.