Ka Nupepa Kuokoa, Volume XXIV, Number 22, 30 May 1885 — Halawai Hoole Waiona. [ARTICLE]

Halawai Hoole Waiona.

Ua malama ia keia halawai e ka Peresidena Mary E. Green ma ka luakini o Kaumakapili i ka hora 3 o ka auina la Poaha. Ua heluhelu mai oia i ke kahi mau pauku Baibala ma Solomona Mokuna XXI XXXL. "Mai nana i ka waina i kona ulaula ana. I kona aleale ana ma ke kiaha. 1 kona hu ana a maikai Mahope iho e nahu mai me he nahesa la, a e pa mai me he moonihoawa la."

Mahope iho o ka heluhelu ana, ua noi mai oaa i kekahi hoa e kamailio pokole no na mea e pili ana i ka waiona. Ku mai o J. E. Kahoa a kamailio mai i ka nui o na pilikia no ka waiona, he nui na ohana i hooneleia i ka noho maemae ana, a me noho maluhia ana iwaena o na lahui o ke ao nei. Nolaila, ma ke Kumukanawai o kakou, ua papa loa ia kakou aole e hoopa, aole hoi e inu, no ka mea, he mea maikai ole ia kakou ka hoi hou ana e inu i ka rama, a haalele i ka kakou hoohiki ana; mai hoohalike ia kakou me na ilio ka hoi hou e ka luai. Nolaila, e noho kakou me ka maluhia malalo o ko kakou Kumukanawai, me he ohana keiki la a na ka makua hookahi iloko o ke apo o ke kuikahi. Ku mai o Elia Kaululaau a kamailio nona iho, he nui ko'u manawa i hele ai i ka ona me kekahi o ko'u mau hoa, a iloko o keia mau ona ana a'u, ua ike au i ka ino o ka waiona; no ka mea, i kuu wa i inu ai a ona hoi aku la au a ka hale, nonoi aku la i ka wahine i mau wahi dala, i mea kuai rama. A loaa ole mai la, hoomaka aku la e pepehi a eha loa, alaila kii aku la e wawahi i ka pahu a lawe mai la i na wahi dala a ka wahine i hoiliili ai no na pilikia a me na hemahema o ke keiki. Mamuli o keia mea o ka ona ua eha aku la ka wahine me ka lilo na wahi dala i ka ona.

A pau ae la ka ona, nana aku la i ka wahine, he ano okoa loa kona helehelena, kaumaha mai ia ka manao, hu mai la ke aloha no ka wahine a noonoo iho au iloko o'u i ke ino o ka inu rama; nolaila, ua haalele aku au i ka inu rama, ke nonoi aku nei au ia oukou na haipule o ke Akua, e pule oukou i ke Akua no'u. Ku mai kekahi wahine no Lahaina a kamailio mai, he nui kuu hauoli ka hui pu ana me oukou ma keia halawai, a e lawe ana au i na hana o keia halawai i mea na'u e kamailio aku ai i ko'u ohanana ame na hoahanau o ko'u apana, e hoike aku ana wau i ka oukou mau hana maikai. Ku mai o Miss Johnson a kamailio mai no kona mahalo i keia hana maikai iwaena o na kanaka Hawaii, me kona manaolana e loaa ana i ke kanaka e hooikaika ana e hoole loa i ka waiona, ka noho maikai ana, a na ke Akua e kokua mai, mai haawi oukou i ka ikaika no na ilio, a me ko oukou akamai no na puaa, mahope kepa mai lakou, moku oukou. Ku mai o Miss Green a kamailio mai no na Ahahui e ku nei i keia manawa; ma ka Moiliili kekahi Ahahui hoole waiona, a aia ma Manoa kekahi, nolaila, o keia mau Ahahui ua lilo lakou i hookahi ma keia hope aku. Nolaila o ka poe e makemake ana e kakau i ko lakou mau inoa malalo o keia Kumukanawai e hele mai lakou e kakau. He nui ka poe i hele mai e kakau inoa iloko o keia Ahahui Hoole Waiona.