Ka Nupepa Kuokoa, Volume XXIV, Number 22, 30 May 1885 — Page 4
| This text was transcribed by: | L. A. Marchildon |
| This work is dedicated to: | Any Canadians calling Hawaii home...I'm so envious !! |
Ka Nupepa Kuokoa
KE KILOHANA POOKELA NO KA LAHUI HAWAII.
Ka Nupepa Kuokoa
No Ka Makahiki, $2.00
Eono Mahina, 1.00.
--KUIKE KA RULA.—
Poaono MEI, 30, 1885.
KUA E.
[CUT IT DOWN.]
G. H. No 238.
1.
Kanawai. Kua e, kua e.
Mai minamina, e.
Lau hookamani wale nei,
A hoohihia wale mai;
He laau hua ole oe.
Kua e, kua e.
2.
Minamina. Waiho no, hoao hou;
E minamina e.
Nana i kona lau omao;
E eli, a kipulu hou.
Malia paha a hua no.
Waiho no, hoao hou;
3.
Kanawai. Kua e, kua e.
E pau i ke ahi e.
E kanu i ka hua e,
A hua ia a maikai,
A nui ae la kou waiwai.
Kua e, kua e.
4.
Minamina. I wa hou, i wa hou.
E minamina e.
I wa hou e paipai ai,
Malia paha a hua mai.
A i ole e, e kua e.
I wa hou, i wa hou.
5.
Kanawai. Ke ku nei, ke ku nei.
Ke hua nei anei?
Nana ka Haku, nana mai,
Mau nae ka hua ole ae.
Ua pau ke aho, a kena'e,
Kua e, kua e.
HAWAII
Haawina Kula Sabati,
Haawina Kula Sabati. XII. Iune 21, 1885.
Kumuhana, Ka holomua o ka haipule, 2 Pet. 1: 1-11.
O SIMONA Petero, he kauwa a he lunaolelo na Iesu Kristo, na ka poe i loaa pu ka manao oiaio i maikai like, ma ka pono o ko kakou Akua, a me Iesu Kristo ko kakou Hoola;
2 E nui ko oukou alohaia mai, a me ka maluhia hoi, no ka ike pono ana i ke Akua, a me Iesu, ko kakou Haku;
3 E like me ka haawi ana mai o kona mana Akua i na mea a pau no kakou, e ola'i, a e haipule ai, ma ka ike ana aku i ka mea nana kakou i wae mai ma ka nani a me ka pono.
4 Malaila no ua haiia mai na mea nui loa, e pomaikai nui ai; i mea e loaa ai ia oukou kekahi ano e like me ko ke Akua, no ka mea, ua haalele oukou i ka hewa iloko o ke ao nei, ma ke kuko.
5 Eia hoi kekahi, e hooikaika loa oukou, me ko oukou manaoio e kui aku i ka hana pono; a me ka hana pono, i ka naauao;
6 A me ka naauao, i ka pakiko; a me ka pakiko, i ke ahonui; a me ke ahonui, i ka haipule;
7 A me ka haipule, i ka launa hoahanau; a me launa hoahanau, i ke aloha.
8 Ina iloko o oukou keia mau mea, a i mahuahua hoi, aole oukou e lilo i poe hoopalaleha, a i poe hua ole, ma ka ike aku i ko kakou Haku ia Iesu Kristo.
9 Aka, o ka mea i nele i keia mau mea, ua makapo ia, ua powehiwehi ka ike ana, a ua poina ia ia kona huikalaia ana i na hewa kahiko.
10 Nolaila, ea, e na hoahanau, e hooikaika loa oukou, i hooiaioia ko oukou heaia mai, a me ko oukou kohoia ana; no ka mea, ina e hana oukou i keia mau mea, aole loa oukou e haule.
11 Pela e hookomo lokomaikai ia'ku ai oukou iloko o ke aupuni mau loa o ko kakou Haku a Hoola hoi o Iesu Kristo.
Pauku Gula, E hooikaika oukou i mahuahua ke alohaia mai, a me ko oukou ike ana aku i ko kakou Haku e ola'i, ia Iesu Kristo, a Pet. 3: 18.
Manao nui, Ua holomua ma ka ike no Iesu, ma na olelo hoolana a ke Akua, a ma ke ao ana ma na pono Karistiano.
NA HELUHELU LA.
Poakahi, 1 Pet. 1: 1—25.
Poalua, " 2: 1—25.
Poakolu, " 3: 1—22.
Poaha, " 4 & 5.
Poalima, 2 " 1: 1—21.
Poaono, " 2: 1—22.
Sabati, " 3: 1—18.
Mele, "Naue e na koa," Hoku Ao Nani, p. 185.
Pule.
NA NINAU.
Nawai i kakau i ka Episetole, kahi o ka haawina o keia la? Ehia episetole ana i kakau ai? Mahea o Petero i ko Iesu kahea ana iaia e lilo i haumana nana? Mat. 4: 18.
Heaha kekahi inoa ona? Heaha ka inoa a Iesu i haawi iaia? I@ 1: 42. Heaha ko Petero ano? E hai mai no kona hele ana maluna owai? Mat. 14: 29.
Ua hele pinepine anei oia me Iesu? No ia launa mau ana me ia, he hoike kupono anei oia no Iesu a me kana mau hana? I ka wa hea kona hoole ana i kona Haku? Mat. 26: 69. Pehea oia ma ia hope iho? He lunaolelo kupaa a wiwo ole anei oia? Mahea kekahi haiolelo ana? Oih. 2: 14—39 3: 12—26.
Owai na mea ana i ao aku no ka hoopunipuni? Oih 5. Owai ka mea ana i hoala mai ka make mai? Oih. 9: 32. Ua hoouna ia oia e ao aku @wai? Oih. 10. No ke aha?
Pehea kona pakele ana mai ka halepaahao mai? Oih. 12. Heaha ka Iesu i olelo no kona make ana? Ioa. 21: 18. Pehea kona make ana?
Ia wai konakakau ana i keia mau leta? 1 Pet. 1: 1. No ke aha? a Pet. 3. 17, 18. Kapa o Petero iaia iho heaha? 2 Pet. 2: 1. Ehia lunaolelo a Iesu i wae ai? Mat. 10: 1. Heaha ka lakou hana? Mat. 10: 6—8. No hea ka mana e hoola i na mai, &c.? Ua like anei kanaka a pau ma ko ke Akua nana ana? Ua ao mua ia na Iudaio, ua ae anei lakou a pau no keia ao ana no Iesu? He nui anei o ko na aina e i manaoio ia Iesu? I nui keaha no lakou? p. 2.
No ka ike ana ia wai? Ma ka mana hea i loaa na mea e ola'i? Heaha na mea e kokua ana ma ka imi ana i ka pono? Ma ka ike ana ia wai? p. 3.
Ma keaha e hoomaopopo ai i ko ke Akua ano ke ole ma ka ike ana i ko Iesu? Pehea ka Paulo olelo ma Kol. 3: 11.? E huli i na pauku like Ua wae ia ma ke aha? O ko Iesu pono, he mea anei e kokua i ka mea e imi ana i ka pono?
Heaha na mea i haawi ia mai? p. 4. Owai ke ala a me ke ola? Heaha kekahi mau pomaikai i haiia mai? Ioa. 3: 16. Sol. 8: 17. Ioa. 14: 23. Sol. 3: 12. Hoik. 22: 14. &c.
Nawai e kala i na hala? No wai mai ka maluhia? Na wai mai ke ola? Na wai i haawi mai i na pomaikai a pau? Iak. 1: 17. O na pono hea ka mea nui? He nui anei na pono no luna mai? Heaha ka mea e loaa na ma keia mea? p. 4.
Ua haalele i ke aha? He nui anei ka hewa ma ke ao nei? No hea mai? Mat. 7: 21—23. Ina pela, heaha auanei ka pono? Sol. 4: 23 Hiki anei ke noho me ke kiai ole? 1 Pet. 5: 8, 9.
Aole anei e lanakila ana ia mau ino ke noho me ka nanea? E hooikaika i loaa ke aha? p. 5—7. Ehia o ia mau hua? Ua makemake anei e hoomau ma kahi hookahi, e holomua paha? O ka manaoio ka mua, heaha ka mea hope? Heaha ke Akua? 1 Ioa. 4: 16.
Ina loaa keia mau mea, heaha ka pomaikai? p. 8. Owai ka mea makapo? p. 9.
Heaha ka Iesu olelo ma Ioane 10: 41.? Pehea ma Cor. 8: 2, 3. Hoik. 3: 17, 18. 1 Ioa. 2: 9—11.
Heaha ka pooino iaia? Heaha ke kauoha ma ka pauku 10? E hooiaio i ke aha? Pehea? Heaha ka uku e loaa mai ana? p. 11.
Mele, "He aloha ke Aloha," p. 121.
Pule.
KA AHA MISIONARI LALAKAHI.
E hele ana kekahi makuahine i ka halawai misionari. he kaikamahine kana, o Kite ka inoa, noi oia e hele pu Pane kona mama, E aho e hana oe i Aha misionari nou iho.
Nolaila, hele Kite e ike ia Mine me Pane, me Iene, a me Nele. Ae lakou e hui ma ka Poakolu, hora 3 ahiahi.
Hiki i ka Poakolu. Kali Kite no ko lakou akoakoa ana mai ma ka hora 3. Aole hele mai o Mine, ua lilo i kekahi hana lealea. Pilikia o Pane i kona kaikua'na i hele me kana keiki e ike iaia.
Iene, he wahi nalulu kona, a he buke hou ana i makemake ai e heluhelu.
A o Nele, hoomaka oia e hele, aka, halawai pu oia me Mage, a olelo Mage, Aole o'u manao i na Aha Misionari. A hele pu Iaua i ka halekuai, a kuai i wahi mea ono me ka Nele ½ kenikeni ana e lawe ana no ka Aha Misionari o Kite:
Kali o Kite a pau ka hora ekolu. Aohe mea i hoea mai. Olelo oia iaia iho, Owau no ka Aha Misionari. A heluhelu oia, a pule, a himeni, a lawe i ke kokua.
Elima no keneta ka nui o ke kokua. He la ka'u e hana ai me keia mau keneta elima? ninau oia. Pane kona mama, E hoouna aku ia ia Inedia paha, i mea e kuai ai i wahi buke na kekahi Hinedu. Nolaila, ua hoouna ia 'ku ke kokua o keia Aha Misionari lala kahi ia Inedia.
Ua ike kahi misionari wahine o laila ia Kite. Kuai oia i buke Hinedu me na keneta elima, a haawi ia i kekahi kanaka Hinedu. Hoolei oia ia buke ma ke alanui. Ike kekahi kanaka pegana e ae ia buke, a kii a lawe a heluhelu, E hai ana ia i ke aloha o Iesu. A ma kana heluhelu ana, lilo oia i mea aloha ia Iesu. Lanakila ka Aha misionari a Kite. E aho ea, ka aha lala kahi ka mea i hana, i ka Aha lala nui i hele ole i na halawai misionari, a hana ole hoi.
Heaha ko oukou manao e na ai? Ina hele ole mai na hoa, he mea hookahi wale no, e lilo oia i aha lala kahi.
DAY SPRING.
NA MALA MISIONARI.
Olelo Suri i kona kaikunane, Ua kokoke ka wa e manao ai kaua i na Mala Misionari. Pela io no, pane Kale, e hana au he ana.
Na Mala Misionari: Heaha la lakou? E nalu ana kahi keonimana i lohe ia mau hua: Na Mala Misionari Pohihihi ia'u, E ninau paha au i na keiki. E na keiki, Heaha na Mala Misionari? Pane o Kale, Ke haawi mai nei ko maua makuakane i wahi mala e malama ai, e kanu, a hoopulu, a waele, a kipulu. A o na hua i loaa mai kuai maua, a haawi i ka loaa no na misionari.
Makemake loa maua i keia hana. Na hua i loaa mai i ka makahiki i hala ua kuai aku maua a loaa ke dala, A oia dala, he dala misionari ia. Ua hoomaka maua i keia hana mamua, A makau o mama o paupauaho maua. Aka, ke hoomau nei no maua, a e hoomau ana no. Maikai ea.
DAY SPRING.
O KA HOOMANA BUDA.
Oia kekahi hoomana kii nui ma Asia. Nui na miliona ma ia hoomana. Owai la Buda? Heaha hoi kona ano, a me ke ano o kona hoomana?
He kanaka no oia, ekolu ona mau inoa, Sakiamuni, Cautama, a o Buda, kona inoa Pope ia, ke ano, ka mea i hoonaauao ia. No Inidia oia, ua hanau ia oia 600 makahiki mamua o ka hanau ana o Iesu Kristo, pela ka manao o ka poe i imi i kona kuauhau.
He alii kona makuakane. He kanaka hanohano a waiwai, he kanaka oi i kona mau hoa a pau ma ka ikaika. Ma kona wa ui noho ano kaumaha o Buda no ka nui o na pilikia o kona mau maka i ike ai, imi no na hoa e hoonanea, a hoolealea iaia, aole nae i hiki. Mau no kona noho kaumaha. He wahine no kana, a he keiki hoi, haalele nae oia i kona halealii, me kana wahine a me kana keiki, a lilo oia i kanaka makilo haipule. Aahu oia i ka lole kalakala a lawe ma kona lima i kahi bola makilo, kahi e hooia'e na apana moni me na apana barena.
Pela no oia i auwana'i, a lilo i ka noonoo a me ka hoole iaia iho.
O ka manao nui o Buda, eia no ia, aia a make ke kanaka me ke keiki komo no kona uhane iloko o kekahi mea e, he kanaka paha, he holoholona paha, komo ia uhane mua iloko o kekahi mea e. A pela no a nui na make me na ola hou. Aka, ina he kanaka i lilo i ka noonoo, a ma hana maikai, pakele kona uhane i keia mau make a ola nui, a komo oia iloko o ka pomaikai nui i kapaia o Nirevana, oia hoi kahi noonoo ole, me he make mau loa, aole noonoo iki, aole hana iki, aole ike iki. (Makemake anei kanaka Hawaii ia pomaikai?) No ka piha o keia ola ana i na poino; nolaila, eia ka pane, e imi ia wahi, Nirevana, kahi e pau ai ka noonoo ana. Ma ka noho maikai nae e loaa'i ia Nirevana.
Iho noho hewa, a kolohe, a make pela, e komo no kona uhane iloko o kahi holoholona, he pipi paha, he ilio paha, he popoki paha, he i-a paha, he enuhe paha, he ilo, he poko, he peelua paha. Nolaila, ua papa loa Buda i ka pepehi ana i keia mau holoholona me na mea kolo a lele a pau, o pepehi ia kekahi makuakane, a makuahine, a keiki paha i komo ka uhane iloko o kekahi o lakou.
Mai pepehi oe i kau puaa, aia paha loko ona kau makuakane, kau keiki, kau wahine paha, o lilo oe i pepehi kanaka.
Mai pepehi i ka nalo, i ka peelua, i ke koi, i ka poko, o aha, o make kou hoa iloko.
E ka Lahui Hawaii, aole oe he Lahui hoomana Buda. Ina nae, ua hoohalike oe me kekahi ano lokomaikai i na holoholona e pili ana ia hoomana, e aho ia i kou aloha ole i na holoholona, ma ka nana'ku, aole paha oe i manao he uhane ko na holoholona, aole paha lakou i eha ke hana ino aku. E maka'u oe o ala mai lakou ma ka la hookolokolo nui, a hoike kue ia oe no ka hana ino ana ia lakou.
MOOLELO O KA AHA LUNAKAHIKO O MAUI.
LA HANA 1. Mei 5, 1885.
Noho ka Ahahui Lunakahiko ma ka Luakini Kaahumanu, Wailuku, Maui, hora 10.
Rev. H. Manase ma ka noho lunahoomalu.
Hoomaka na hana, Himeni 127, me ka pule.
Hoomaopopoia na hoa o ka aha i hiki mai,
Kihapai, Kahu, Lunakahiko.
Paia Rev. Kuia --
Huelo -- Kanehoalani
Hana " Iosepa Kopa
Honuaula -- Simeona
Waikapu " Kaili Mahoe
Wailuku -- Hon Kalua
Waihee " Nawahine Kapoi
Honokohau -- Kalama
Kaanapali " Hihio Kalaola
Lahina " Pali Kamanonui
Olowalu " Kamakahiki Wahieala
Kaluaaha " Manase Poohea
Halawa " Paulo Ka@wipalaoa
Siloama " Hanaloa Kanuha
Na hoa mau, Rev. A. O. Polepe, W. P. Kahale, Paaluhi, P. Keaupuni, J. M. Alekanedero.
Kohoia o A. O. Polepe, J. W. Kalua, J. W. Poohea, i komite hoonohonoho hana.
A la Paalahi, Hanaloa, Kaiwipalaoa, i mau komite imi haawina.
1 Hapa hora haipule.
2 Na hoike o na kihapai.
3 Na palapala hoopii.
4 Heluhelu haawina.
5 Na Ekalesia Kahu ole.
6 Na oihana kuwaho.
7 Na oihana kuloko.
8 Kula Kaikamahine o Makawao.
9 Ke ola o na Kahu.
10 Koho makahiki ana i na lunakahiko.
11 No ka Waiona.
12 Kula hui o na Kahunapule i Honolulu.
13 Komite hoike kihapai i ka Aha Euanelio nui.
14 Komite hoike o na hana o ka Aha i Honolulu.
15 Na elele o keia Aha no ka Aha nui i Honolulu.
16 Kahi e noho hou ai keia Aha.
A. O. POLEPE.
J. W. KALUA.
J. M POOHEA. } kOMITE
Aponoia ka hoike a ke komite.
Lawe ka Aha i ke kumuhana 2, Hoike kihapai. Na Kuia, Kanehoalani, Iosepa, Simeona, Kaili, Hon J. W. Kalua, O Napahine, Kalama, Hihio, A Pali, S. K. Kamakahiki, H Manase, Paulo, Hanaloa, i hoike mai no na kihapai.
Ma ka hoike o Huelo, ua nana pono ka Aha, a ua ike ia he wahi hunahuna; 1 O Kanehoalani, aole ia he lunakahiko, a ua koho ka Aha iaia he hoa kuka.
1 Ma keia hoike no, ua lilo o B W Kawainui i kahu kiai no ia Ekalesia, a ua hanai ia i na dala he umi $10, no ka malama. Nolaila aole i ike keia Aha iaia. Ua hooholo ka Aha, e hele ke komite hoeueu e hooponopono me ua Ekalesia la.
Kumuhana 3, Na palapala hoopii.
Helu mai ke Kakauolelo i na palapala hoopii elua a ka Ekalesia o Wailuku i na Rev. Paaluhi a me D. Keaweamahi, i mau Kahu no lakou. Haawiia ma ka lima o na komite A O Polepe. Iosepa, Poohea.
Noi ia mai e hoopanee ka Aha, apopo, hora 9 hui hou mai ua hooholoia.
Hoopanee ka Aha me ka pule a A O Polepe.
Aole i pau.
MOOLELO O KA AHAHUI KULA SABATI O MAUI.
KOENA MAI KELA PULE MAI.
Kumuhana 2. Ka hoike a na Kahukula Sabati.
Na S Kaili i ka Papa Hoike Helu Kula Sabati o Waikapu. Na M P Waiwaiole ko Wailuku. Na ke Kakauolelo ko Honokohau a me ko Kaanapali. Na S Kauihou ko Olowalu. Na S N Pahupu i ka Papa Hoike Helu Kula Sabati o Kaunakakai. A o kekahi mau Kahukula Sabati; ua hoopanee ka lakou hoike a kahi la ae.
Kumuhana 3. Hoike a na Elele K S
Na J P Luna i ko Paihiihi.
" L Noholoa " Waikapu.
" S E Kaleikau " Waihee ua hoihoi houia.
Na W J Kahopukahi i ko Kaanapali.
" L Naauao " Lahaina.
Noi mai o O Nawahi e hoopanee i ka halawai a hui hou apopo, hoopanee ia me ka Himeni, a me ka pule a A O Polepe.
LA HANA 2.
Mei 6, hora 2, P. M.
Halawai ka Aha e like me ka hoopaneeia ana, Luna Hoomalu ma ka noho.
Weheia na hana ma ka Himeni, a me ka pule a Kalama a me Naauao.
Hapaiia no ke koena hoike a na Ka hukula Sabati.
Na ke Kakauolelo i heluhelu i ka Papa Hoike Helu o ke Kula Sabati o Hana.
Na Henry Peelua i ko Kawela.
" L Kaiwi " Honuaula.
" I D Iaea " Paia.
" H. Manase " Kaluaaha.
Koena a na Elele Kula Sabati.
Na J L Kopa i ko Hana.
" M Kealoha " Honuaula.
" J Nakookoo " Wailuku.
" E N Nameaaloha i ko Olowalu.
" Kanakanui " Lahainaluna.
" C K Kahai " Kaluaaha.
" Kaiwipalaoa " Halawa.
" E Kaulana i ko Honouli & Wailua.
" D Kumeheua i ko Kaunakakai.
" Kakauolelo " Kalaupapa.
" W Mahiki " Kahakuloa.
Kumuhana 4. Hoike a ka Puuku. Aole i makaukau.
Kumuhana 5. Hoike a ke Kakauolelo.
Noi ia mai, aia hoike pu me ka ka Puuku. Hooholoia.
Waiho mai o A Pali he olelo hoolo. Hooholoia. E haawi mokana aku keia Aha i ke kula kuikamahine o Makawa @ i ka hapalua o na dala e waiho nei ma ka waihona Hoholoia. A ua haawi ia keia hana ma ka lima o kahi Komite a ka Aha i koho ai, 1 D Iaea. C K Kahai
Kumuhana 6. Lala dala a ka Aha. $13.00.
Kumuhani 7. Hoopaneeia i ka Ahahui Nui ma Honolulu.
Kumuhana 8. Hooholoia ma ka malama o Ianuari 1, 1886.
Kumuhana 9. Hooholoia ma Molokai e hoike hui ai.
Kumuhana 10. Hooholoia, a penei ka hoonohonoho ana:
No Molokai, C K Kahai & E Kaulana. Maui Komohana, L Naauao, Nameaaloha, Kahopukahi, & Kalama. No Nawaieha, J Nakookoo & S E Kaleikau. Makawao, W P Keliikipi. Maui Hikina, J L Kopa.
Kumuhana 11. Hooholoia a penei: Molokai, J W M Poohea. Maui Komohana, D Kahaulelio. Nawaieha, J W Kalua. Makawao, John Kalama. Maui Hikina, S W Kaai.
Kumuhana 12. Hooholoia ma kahi e noho ai ka Ahahui Lunakahiko.
Noi ia mai e heluhelu ina @ oolelo elua o na halawai. Aaonoia, a e hoopuna ia ka moolelo iloko o ka Nupepa KUOKOA.
Noi mai o J W Poohea e hoopaneeia a hui hou ma ka Poalua mua o Novemaba. Hooholoia. Hookuuia me ka Himeni, a me ka pule a A Pali
MOSES P. WAIWAIOLE.
Kakauolelo.
Eia malalo iho he Himeni i unuhi noeau ia e Miss Ella Parisa o Kona, Hawaii, no kekahi o na Kula Sabati o Kona-waena a i meleia ma Waiohinu, Kau, ma ka la 8 o Maraki 1885.—penei:
GOSPEL HYMNS NO. 52 BOOK IV.
E KALI ANA.
1.
Eia au e kali ana;
No ke alaula nani e;
Aia poha kona lama,
Pau koonei mau luuluu e.
Hui. Eia au—ke kali, kali
Baso. Eia au ke kali, kali, kali, kali, kali, kali,
A pau ae—na luhi nei;
Baso. A pau ae na luhi, luhi, a pau ae na luhi nei
Kali no—kahea aloha;
Baso. Kali no kahea aloha, hea alo ha, hea aloha,
Mai kuu Haku ma ka aina lai.
2.
Kali, maule, a kaumaha;
Ma ka paio luhi nei;
Aia nae a pau ke kaua,
Loaa kuu lei mae ole e.
3.
Kali me ka manaolana;
No ka hui mao ae.
Kali no kahea aloha,
O kuu Haku maluna'e.
Kauka H. @oanekona Sepia.
(Dr. H. Johnstone Spear.)
Ke hoike aku nei imua o kona poe mai a me ka lehulehu i lohia ia me na mai, ke hoomau nei no oia i ka lapaau ana i na mai aai a me na mai e ae me ka lanakila kamahao. E na Lede a me na Keonimana, e hoomanao oukou, o ka hoolohilohi oia ka mea aihue i ka manawa, nolaila, e hele mai e hoola ia! Aole nana ana i ke ano o ka pilikia, e hele mai a na ke Kauka e nana i kou ano mai. Aohe ou lilo no ke kuka ana, nolaila e oluolu e hele mai a e hoomaopopo no oukou iho ina he ike ke Kauka e nana i ke ano o kou pilikia a me ka ole. Ina he hiki iaia ke lapaau ia oe a ola, e hai aku no iaia pela: a ina aole, e hai aku ana no ia ia oe ia mea: no ka mea, aole ia e lawelawe ke ole e maopopo e ola ana iaia.
He makaukau loa o Kauka Sepia i ka lapaau ana i na mai o loko o ke kino, na mai aai na mai o na wahi huna, na mai o ka puumimi, a me na mai e ae. He lapaau ia na mai o ka ili me ke ola pono. He lapaau ola oiaio keia no na mai i ulu mai no na hana naaupo o na la opio, etc., etc., a me na mai o na wahine aole laau ai iwi e haawiia.
He lehulehu wale ka poe mawaena o kanakolu a me kanaono makahiki, ke noho nei me ka oluolu ole mamuli o ke ano hinape wale a me ka nawaliwali mamuli o kekahi kumu hiki ole ia lakou ke hoomaopopo. He nui ka poe i make mamuli o keia kumu, me ka maopopo ole. E hiki no ia Kauka Sepia ke hooiaio aku ke ola o ia ano mai a pau, a e hoihoi ia mai no ka ikaika o ke kino a puni.
KE HOOOPAA NEI AU E LILO KA'U $1,000 ke ola ole kekahi mai a'u e lawelawe ai a ola ole. AOHE auhau o ke kukakuka ana. Aohe lilo o na launa aloha ana.
NA HORA HANA.
Mai ka hora 9 a i ka hora 12 A. M., a mai ka hora 1 a i ka hora 4, a mai ka hora 6 a i ka 8 P. M. Na la Sabati, mai ka hora 10 a i ka 11 A. M.
KUKAKUKA ANA, AOLE UKU.
NO KA NANA PIHA ANA I KE ANO ME KE KULANA O KA MAI, A ME NA KUHIKUHI $5.00.
E kipa mai; a i ole e kakau ae ia
KAUKA H. IONEKANE SEPIA.
HELU 29 ALANUI BERITANIA, kokoke i ke Alanui Nuuanu, Honolulu.