Ka Nupepa Kuokoa, Volume XXIV, Number 16, 18 April 1885 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

 

BUKE, XXIV, HELU 16.  HONOLULU, POAONO, APERILA 18, 1885.  NA HELU A PAU, 2020.

 

NA HOOLAHA KUMAU.

 

W R. KAKELA.

LOIO A HE KOKUA MA KE KANAWAI.  He Luna Hoolalo Palapala.  tf.

 

A.ROSA. (AKONI).

LOIO A HE KOKUA MA KE KUNAWAI.  He Luna Hoolalo Palapala.  KEENA HANA:  Ma ke Keena Loio Kuhina.  tf.

 

S B. DOLE.

LOIO, OIO, LOIO.  He Luna Hoolalo Palapala.  KEENA HANA:  Ma Alanui Kaahumanu.

 

DILLINGHAM & CO.

Mau Mea Kuai Lako Hoo  Alanui Papu, Honolulu.

 

FRANK PAHIA.

ANA AINA! ANA AINA!!  KEENA hana:  Aia ma alanui Moi, koko @ loa i ka Uwapo o Hooliliamanu.  tf.

 

C C. COLEMAN.

Amara a he mea hana Mekina  Kapili Kapuai hao lio.  A me ka Hana Kaaa Lio ana, etc., Hale Hana ma Alanui Alii.  E kokoke la i ke Alanui Papu. 

 

J P. HANAAUMOE.

He Loio a he Kokua ma ke kanawai ma na Aha Loomalu a Apana o keia Aupuni.  E loaa no au ma Puna, Hawaii.

 

E G. WALLER (WALA.)

Mea kuai io bipi ma Alanui Puowaina, ma ka hale i kapaia “Kawaiahao Market,” malaila e loaa ai na io bipi momona, a e hoolawa ia a ka makemake o na makamaka.  2006-@y.

 

CHAS H PULAA.

HE LOIO A HE KOKUA MAKEKANAWAI

A e loaa no au ma Honomakau, Kohala Akau, Hawaii.  2001-tf.

 

JOHN MAHIAI KANEAKUA.

LOIO A HE KOKUA MA KE KANAWAI MA NA AHA HOOKOLOKOLO A PAU O KEIA AUPUNI.  Keena Hana me Hon. E. Preston (loio Po-akane) ma Alanui Kaahumanu, Honolulul

 

 

 

CECIL BROWN.

LOIO A HE KOKUA MA KE KANAWAI.  A he Agena Hoolalo Palapala no ka Mokupuni o Oahu

KEENA HANA:  Helu 8 alanui Kaahumanu – tf.

 

RICHARD F. BICKERTON. (Pekekona.)

LOIO A HE KOKUA M KE KANAWAI.  KEENA HANA:  Helu 27 alanui Kalepa.  tf.

 

C BREWER & CO. (BURUA MA.)

Ua makemake ia ka poe mea ILIO KAO MALOO a me na ILI BIBI, a pela hoi me na ILI MIKO o na ano a pau, e kuai mai i ko kakou mau ILI me makou, a e haawi no ma kou i ke KUMUKUAI KIEKIE LOA a ko kakou Makeke.  tf.

 

W A. KINI.

LOIO, LOIO, LOIO.  KEENA HANA:  Helu 15 Alanui Kaahumanu, Honolulu.  tf.

 

W.C. AKANA (KALAUKI.)

He Mahele a Unuhi-olelo ma ka olelo Pake @ ka olelo Hawaii.  Ua makaukau no hoi @ hana i na Palapala Kuai a Hoolimalima a pela aku ma waena o na Pake a me na hanaka Hawaii.  E loaa no au ma ke Keena Helu @ Alanui @oi, ma kahi e kokoke ana i ka uwapo o Haaliliamanu.  2010 - @y

 

WILDER & CO. (WAILA MA.)

Mea kuai papa a me na lako kukulu hale o na @no a pau, a me na @ @ pono a pau no ka hala.

Kihi Alanui Moiwahine me Papu.  tf.

 

WILLIAM AULD.

Luna Hoolalo Palapala Kepa Paahana no ka Apana o Kona.  KEENA HANA:  Ma ke keena wai o Honolulu.  tf

 

S H. MEEKAPU.

Tela humuhumu lole.  HALE HANA:  Helu 11 alanui Nuuanu.

 

J NO. M. KEALOHA.

 

LUNA Hoolalo Palapala Kepa Pauhana no ka apana o Kawaihau, Kauai.  He Agena no ka Hoolalo ana i na Palapala no ka apana o Kawaihau, Kauai.  He K@ P@ Aina no ka apana o Kawaihau, Kauai, a he Luna H@ K@ no ka P@ Aina holo@.  1163-@.

 

HE MOOLELO KAAO NO

KA-MAHINA

MALAMALAMA

 

Ke Keiki Alii o ka welau anu o ke aupuni o Hinedu, ka Hiapaiole o na waoakua kanaka ole o Puricalia, a o ka naita hoi ana i ulupa na lua huna o na powa.

 

(Kakaui@ no ke KUOKOA.)

 

            A HALA he hora okoa ma keia moe ana, nipo loa aku la oia i ka hiamoe kulipolipo launa ole, oiai ua alako loa ia aku la oia iloko o na moeuhane pahaohao a hiki wale i ka mana wa i hele mai ai kona makuakane a hoala iaia ma ke kakahiaka nui.  Ala ae la ia me ke ano poluluhi o na maka no ka mea akahi no oia a hooluolu.  Haawi aku la keia i kona aloha kakahiaka, a pela no hoi ka makuakane i panai pu mai ai; ninau aku la keia i ka nuhou o ia kakahiaka, a hahai mai la kona makuahane :  O ka nuhou o keia kakahiaka nu, ua puka mai kuu aikane, oia ka naita kupueu a ahikanana hoi o ke Kaiwaenahonua, a aia oia me kona mau aumoku kaua ma ke awa hoolulu o ko kaua mau aumoku, o keia kanaka ea, oia no kekahi o na naita kupanaha loa.  Heaha hoi kona kupanaha ?  wahi a ka kakou koa opio i ninau aku ai.  Pane mai la kona makuakane : Eia ke kupanaha o ua naita la, he nui launa ole ko na kino, he 15 poe kanaka nana e hapai kana pahikaua, a he kanakolu poe kanaka e hiki ai ke oniu; eia hou keia kupanaha ona, he hookahi pipi nona na makahiki eha, alaila ua lawa ia no kona paina hookahi ana, a he ekolu pipi kona lawa pono i ka la.  Aia hoi maluna o kona moku alii he ekolu tausa ni naita pilikua, a o ka poe helu ekahi wale no, he nunui keia naita, he pake la ai, a he ikaika no hoi, aka o ka oi loa aku, oia kona kaikaina, ka mea e nohoalii la maluna o na ale kupikipikio o ka moana Iniana, a he nui na aupuni nui a ikaika i haule pio malalo o ko laua ikaiaka lua ole, aka, iloko o na la i aui ae e nohoalii ana ka ikaika maluna o kou makuakane nei, aole loa au i hopo i kona nui, kana pahikaua nui, a me kona ikaika.  Ua hakoko pu au me ia, a ua loaa ia’u ka lanakila ma ka hoomauia ana o ka paio mawaena o maua iloko o na la elua me na hora eono, a ua haawi pio mai oia ma o ka loaa ana aku iaia o na palapu mai ka’u pahikaua aku, a malalo o ka ihiihi o ka inoa o kou mkuakane nei, kona pono, kona ola, a me kona hanohano.

 

            I ka pau ana o na olelo a ka makuakane, ua pane aku la oia, e hauoli ana kakou ke hiki mai ia mau la kulaia o ko kakou kakela nei ke nui nae na hoa lealea e akoakoa mai ana ma ua mau la nei.  Ia laua e nanea ana, kani mai la ka hele aina kakahiaka a ke kuene, a mahope koke iho o ko laua makaukau ana hiki aku la laua ma ka papaaiana a paina nui iho la.  Mahope iho o ka paina ana, ua kauoha aku la ke alii i kona haku puuku e kahea aku i hookahi tausani o na naita uhai, holoholona e hele aku ma na ululaau a lawe mai i na dia opio wale no a e hoopiha pu i elua pa pipi, no ka mea ua hoea mai nei ke kanaka nunui nana e ai a pau poo a pau huelo ka pipi okoa.

 

            Aole he wa i hookaulua ia ai ke kauoha a ke alii e kona haku puuku, oiai ka leo o kana o-le kahea e uwe hone ana i na pahukani o ke tausani naita i makemake ia, a mahope koke iho o ke kuu ana o ka leo maokioki o kana o-le, ua loheia aku la kekahi halulu nui me he kikiao makani la, a ku ana na naita i kaheaia me ko lakou mau pono a pau no ia oihana a lakou i ao ai a ailolo.  I ka loaa ana mai o na kauoha a pau ia lakou, o ko lakou manawa no ia i nalo koke aku ai iloko na ululaau iloko o ka imo ana a ka maka.  Kauoha hou aku la ke alii i kona haku puuku e kahea aku i kanalima mau kaikamahine opio o na lua huna o lalo e pii mai i ke kakela e hoomaemae ai, no ka mea o ka la e poni ia ai kana keiki, o ka la ia e aahu ai ka halealii me ka nani nui.  Ua hooko koke aku la ka haku puuku i ke kauoha, a hoea koke mai la na kaikamahine opio i kauohaia a nalo aku la iloko o na @umi no ka hoomaemae ana me ka ike ole aku i na helehelena o ka naita opio puuwai wiwo ole.

 

            Iloko no hoi o ia mau la ua puka aku la ke kuahaua a ke alii i na aupuni e ae malalo o kana hoomalu ana e hui pu mai me ia ma ka la e poni ia ai kana keiki.  Ua ikeia aku la na aumoku o kela a me keia aupuni e holo mai ana, a ua hoopihaia ke awa me na moku a piha pu me ka moana, a o ka poe a pau i hele mai ma na moku no ka hoohiwahiwa ana i ka hanohano o ka la e poni ia ai ka kakou koa, aia no lakou a pau maluna o ka moku, a ua kali lakou a hiki i ka la e poni ia ai; aia pu no hoi iwaena o keia mau moku na kupueu o kela me keia aupuni.

 

            Ma keia wahi e na makamaka e maopopo ai aia na naita hahai holoholona iloko o na ululaau kahi i wae ai i na dia opio momona wale no, aia hoi na haia wahine iloko o na keena o ke kakela kahi i hoomaemae ai, a aia pu no hoi na aumoku kaua o na aupuni a pau ma ke awa kahi i hoolulu ai, a o keia mau hiona a pau, oia no ka ke eueu o Hinedu e nalu ana, heaha la ka manao nui o keia mau hiona a’u e ike nei ?  a heaha la ka hopena a’u e ike aku ai ?  a heaha keia piha pu o ke awa hoolulu o na aumoku o kuu makuakane i na moku o na aupuni e, he kaua anei ?  Iaia e nalu ana no ke kaua, ua puiwa koke ae la ia, no ka mea, o na manao iloko o kona makuakane no ka poni ana iaia aole loa i hoopu-a iki aku imua ona, a ua moakaka lea paha ia i na makamaka heluhelu o keia nanea, oiai aole i hoike aku ke alii i kana keiki i ka manawa e poni ia ai oia ma na helu i hala mua aku nei o keia nanea.  Nolaila, ua kali malie na manao uluku o ka naita opio a maopopo keia mau hiona. 

 

            Ma ke kakahiaka nui o kekahi la ae, ua lele mai la ka naita nunui o na moku kaua o ke Kaiwaenahonua e halawai pu me kana aikane, a o ka makuakane hoi o ka kakou opio naita; halawai pu iho la laua a ninau aku la ua nunui nei i ka laua keiki, a ua hoike aku la ke ‘lii aia oia iloko o na ululaau kahi i walea ai, a o kahi hoi ana e hele mau nei ma na la a pau.  (Maanei no hoi e na hoa e hai pokole aku ai ka mea kakau i ke ano nui o keia hele mau ana o ka naita opio iloko o na ululaau i na la a pau, a mai ui-ha na makamaka no keia, a penei kahi moolelo pokole :)

 

            Mai ka la i hoomaka ai keia hele no ka ululaau a hiki i ka wa i hoea aku ai ka weli o ke Kaiwaenahonua maloko o ke kakela alii, o ke kolu no ia o na mahina a ka naita i hele mau ai maloko o na ululaau ma ke ao ana ma kekahi o na hana i ao ole ia e ia mamua, a o ua hana la oia no kona hakoko pu ana me na kumulaau nunui, a me ka hoao ana i kona ikaika ma ke oki ana i ke kumulaau me ka hauna pahi hookahi a pela pu me ke koi, a ua ike oia i ka holopono a me kona ikaika ma ia hana.  Ma keia kakahiaka hoi i hoea aku ai ka naita nunui, ua hala e aku ke koa opio i ka ululaau mahope o ka pau ana o ka paina kakahiaka, me ka hali pu ana ae i kana pahi me ke kakaka a kona makuakane ponoi i hooili ai iaia, a e paa pu ana me kekahi koi oki laau.  Iloko o keia mau la loihi a ke koa opio i hoomaamaa ai, ua oleloia ma keia moolelo ua hiki iaia ke kulai i ke kumulaau @i me kona ikaika, a ua hiki pu no iaia ke uhuki, ke oki hoi me ka hauna hookahi o kana pahi a me ke koi, e oniu ana hoi i kana pahi a kikonikoni aku la ma ka ili o na laau me ka lele pololei ana o ka maka pahi ma kahi hookahi me ka hikiwawe loa, a ua pana ia hoi e ia me kana pua na mea kolo, na mea holoholo, a me na mea lele, a hiki aku i ke aka o ke kanaka i hoohalikeia kona nui me ke kino o ka uku ma kahi mamao.  Ma keia mau hana a ke koa opio, ua papa loa oia i kona makuakane aole e hele pu me ia, aole ka puuku, aole hoi kona mau ukali, a oia wale iho no ma kana huakai i ka ululaau, a o ka mea e hooko ole ana ia mau kauoha, he make wale no ka hoopai.  I ka piha ana o na mahina ekolu a oi o keia ao ana, ua holomua kona ike ma ia oihana hou, a oia ka kakou e makahehi aku ai i kana mau hana ma keia mua aku. 

 

 

 

KA MOOLELO KAAO O KAHANUOPAINEKI,

Ke Keiki alii o ke aupuni o Italia

Ka Olali o na Waeakua o Arabia, K@ Naita nana i ku@ na @ @ @ on na Pewa

 

            I ke kokoke ana aku o na puali naita o Arabia i kahi a na puali o ka Naita Peka a hoomoana ana, ua hiki mua aku la ka olali opio Kahanuopaineki i kahi a kona mau enemi e noho ana me ka nanea, aka, aia ua olali nei ke makaikai nei i ko lakou mau kulana oiai oia e kau hoolai ana i ka lewa, a e hakilo ana hoi i ke ano o ko na enemi nee ana.  Oiai na puali naita o ka olali e kau pono aku ai iluna o na kiekiena pali o ua mau kuahiwi nei, ua ike maopopo loa aku la lakou nei i ke kulana o na enemi me ka makaukau ilalo o ke awawa, a o ka wa no ia i h@awiia ae ai ke kauoha no ka mahele ana o na puali a eha ma ko lakou mau kulana eli@e me ka mea a ka opio i hoolala ai no ka hoopuni ana i na enemi.  I ko ka opio ike ana ua holopono kana mau hoolala ana, oiai hoi kona mau enemi ua paa i ka hoopuniia e kona mau puali naita, a me he imo ana la na ka maka, ku ana keia ma ka aoao akau o kona puali, a o ka oi kelakela hoi o kona mau tausani naita.  Iloko o keia wa i hoomaka aku ai ka nee ana o kona puali me ka puahi nui, a pela no hoi na puali e ae.  I ka ike ana o ka opio ua makaukau kona mau naita e poi-pu i na enemi, ua kauoha ae la ua olali nei e ku lakou me ka makaala loa i na wa a pau, a e hoolohe pono loa no hoi i ka leo kahea ke hoea mai i manawa.  Oiai na puali o na mauna hui e ku mamao ana no 200 iwilei mai na enemi mai me ka ike ole mai, ua holo aku la ke koa opio me kona puali a kokoke i na enemi, a oiai lakou nei ma ka aoao o ka puu e pili koke ana ma kahi a ua poe powa la e noho nanea nei, he mea e ko lakou puiwa i ka ike ana mai i keia puali naita nona ka heluna he 22 wale no i makaukau me na lako kaua e ku aku ana imua o lakou; no ia mea, puana ae la ua alii powa Peka nei : Ke kuhi nei au ua nalo la hoi ka’u mau hoolala ana, eia ka hoi ke hoomakakiu mai nei no ka ua poe, aka i kona ike ana mai i ko lakou nei wahi heluna uuku e ku aku nei imua o lakou, ua kauoha ae la ua alii powa nei i kona mau tausani naita powa e lele mai maluna o ka kakou eu a me kona mau naita, a e lawe pio mai ia lakou imua o’u a hoi lanakila aku i ko kakou home me ka hanohano nui.

 

            No keia kauoha a ua powa Peka nei i kona mau tausani naita powa e hopu pio ia lakou nei, ua poha aku la kona leo olu waipahe : E ka mea i hoopiha i kona puuwai me ka makona o na manao lapuwale, he mea pono loa ia oukou a pau loa e kukuli mai imua o ka mea e kamailio aku nei , (ka olali opio) i kaawale ae ai ka hoopai weliweli o ka make mai o oukou aku; a no ko oukou komohewa ana mai ma na palena o kuu aina aloha, nolaila, o ko oukou pono wale no o ka haawi pio mai mamua ae o ka hookau ana aku o ko’u mau tausani naita i ka make weliweli maluna o oukou, a ehia ka hoi mea aloha o ka oukou mau wahine a me ka ohana o ka ike ole i ke kahe ana o ko oukou mau koko ma keia waoakua kanaka ole; a no keia mau hoonauluulu a ka opio puuwai ahi, ua paila ae la ia iloko o ka puuwai o ke alii powa Peka, a luai mai la ia i na huaolelo awahia i ka pane ana mai : Ekahi keiki lapuwale, e hookau aku no au i ka make mainoino me ka ike ole mai o kou mau makua ia oe a me kou mau ukali, a oiai ua hele mai nei oe e molia i kou ola a me kou mau naita, a e make ana hoi oukou i keia manawa.  Aole hoi e puka hou aku kekahi huaolelo a ka opio no ka panai ana aku i kela mau huaolelo a ke alii powa Peka i pane mai ai, no ka mea, i lawa no a kuu iho kana mau kamailio ana, ua lele like mai la lakou a pau maluna o ke koa opio me kona mau ukali, a oia mau manao ana a ua powa nei he mea la hoi ia e hoomaalili iki mai ai i kona huhu ma o ka paa pio ana o ke koa opio, aka , me he anapu ana la na ka uila, pela no ua opio nei a me kona mau ukali i hoolele aku ai i ko lakou mau lio iwaena o na enemi me ka hikiwawe, a iloko no hoi o keia manawa i hooukaia ai ke kaua hahana wawaena o na aoao a elua.  E hoomanao e na makamaka heluhelu o keia moolelo, ma kahi a ka olali opio a me kona mau ukali e hoolele ai i ko lakou mau lio iwaena o na enemi, aia he mau apahu kino o na powa e haule ana i ka honua oiai na pahikaua e niniu ana a puni ko lakou kino, a ua like hoi na powa me he mau paka-ua la e helelei ana, a no ka hapalua hora keia kaua ana o na enemi no lakou ka heluna i pa tausani ia i ko ka olali opio mau naita he 21 a o ua olali la no hoi ka 22, ua pau loa ka hapanui o na enemi i ka make, a ua kau e aku la ka weli i ke koena o na powa a me ko lakou alii a hoao aku la lakou e imi i wahi no lakou e pakele ai, oiai no Liona o na mauna hui e inu hala ole ana na huini oi o ka lakou mau pahikaua i ke koko o na enemi; no keia mau haawina o ka mainoino i ili iho maluna o kona mau hoa powa, ua auhee aku la oia me kekahi o kona mau tausani naita. 

 

            Auhea oukou e na hoa hooipo o keia nanea, ke hoohewahewa mai nei paha oukou no keia mau puali e hoopuni nei i na powa; he mea oiaio, ua kiai lakou me ka makaala loa, a aole no hoi lakou i komo pu me ke koa opio i ka hoouka kaua mua, aka, e ike no auanei oukou a pau i ko lakou komo ana e hui pu me na enemi.  I ka ike ana o ka olali opio i ka puhee o kona mau enemi, ua puhi ae la ua opio nei i ka ka o le kahea no ekolu manawa a kani kapalili aku la, e kauoha ana i na puali a pau e komo mai a e poai puni ae i na enemi me ka luku pu ana aku.  I ka lohe ana o keia mau puali e ku poai puni ana mawaho o ke kahua hoomoana o na powa, ua hoomaka mai la lakou e komo me ka awiwi, a no elua manawa o ka hoolele ana mai i ko lakou mau lio ma ke ala e hoea mai ai i ke kahua kaua, ua halawai pu mai la lakou me ka poe powa e hoao aku ana e holo mahuka, a ua luku aku la lakou i na enemi, a no ka manawa pokole ka hoouka ana o keia kaua, ua ike lihi ‘ku la ke koa opio i ke alii powa kona enemi, ia manawa hookele loa aku la ia i kona lio ma kahi o kona enemi, a i kona ike ana mai i ka mea i kauia ka weli a puni ke ao holookoa, ua holo mai la oia a uhau mai la i kana pahikaua maluna o ka opio, ua alo ae la nae keia a hala aku la kana hauna pahi a ua alii powa nei i halahu wale aku la, na ia mea i hoohaule iho iaia mai kona lio iho a i ka honua, aka, ua kau hou ae la no oia maluna o kona lio me ka hikiwawe, a uhau hou mai la no ua alii @@ kakou opio, aka he mea hoopau manawa wale no, nolaila, pii ae la ke ahi enaena o ka huhu a hoike mai la ka hulili o kona mau maka, a poha aku la kona leo me ka inaina: E ke alii powa puuwai eleele, ke noi hou aku nei au i kou oluolu no ka lua o ka manawa a ina aole e-aole i pau pono ae keia mau huaolelo a ka opio, ua pane mai la ia: Aole loa au e puni i kau a haule pio oe malalo o ko’u mau kapuai, a uhau mai la i kana pahi a hala aku la mamuli o ke akamai alo hauna pahi o ka opio.  I mea o hoopokoleia ai kou mau la ma keia honua, e ike koke no oe ano; oniu ae la ke koa opio i kana pahi a uhau aku la maluna o kona enemi, a aole i loaa pono ka pale a ua alii powa nei, loaa aku la ia i ka hauna pahi a ka olali opio, mahele pu ia iho la kona kino a haule aku la i ka honua he mau apana elua me ka manaonao. 

 

HE MOOLELO KAAO NO

KEAOMELEMELE.

 

KA PUA NANI IUIU O

 

Kealohilani, Kahiapaiole Nuumealani a me Kuaihelani; ka mea nana i @@e@@e ia Konahuanui a kaawale o Waolani ka aina o ka poe eepa a pau i noho ai.

 

Hoopukaia i ka Haku Moolelo kaulana Mose Manu no ke Kuokoa.

 

            Aia ma keia moolelo e ikeia’i ka nui o na moo i hoonohoia e Kamooinanea ma keia paeaina, mai Hawaii a Niihau, a ma ko lakou mau ano mana kupua kino pahaohao a kino kanaka maoli i kahi wa, a kino eepa no hoi i kahi wa.  A ma ia ano i lawe mai ai na alii a me ka lahuikanaka holookoa o keia mau aina, i mau akua no lakou; a mai ka wa kahiko mai a hiki wale no i keia au hou, eia no ke malama nei kekahi poe a hiki i keia au malamalama o ka pono karistiano a holomua o ka naanao; a eia ka mea e maopopo ai o keia mau hoakaka a ka mea kakau moolelo, ma ka manawa e hana ai kekahi kahuna i ka mea mai, alaila, e hopuka no auanei oia, “he kumupaa kou mea i mai ai, eia la he moo, a pela aku.”

 

            Aia ma keia huakai nui a ua poe moo nei, aia hoi, ua hiki mua aku la nae o Kamooinanea maluna o Waolani a ke luana pu la oia me kona mau kaikunane me Kane ma a me Keaomelemele ma no hoi.  O Koleana a me Alewa o laua ka makamua o na moo, a e ikeia no hoi keia mau wahi i kapaia na inoa o Koleana, aia keia ki-owai ma ke kahawai ma Moanalua, makai mai o Huluomanu ma ke alanui e hele la i Ewa, ma keia ki-owai i hunaia ai e kekahi mau wahine moo e Koleana a me Hailimanu, aia no hoi keia wahi makai mai o Koleana malalo iho o ka mile @, oia hoi ke alii o Kukaniloko, o Kakae kona inoa, a e ole o Huaa loaa ai, a oia ka mea i oleloia ai, “He like wale no ka noho a na kii a pau, a oi wale aku no o Huaa.”  O Alewa hoi, aia keia wahi ma Kapalama-uka pili pu me Kalaepohaku ma ka Halepupule.  O Laniwahine a me Alamuki, o laua na moo nana i pahi mai ka huakai a ua poe moo nei, aia keia mau moo maWaialua, a o Laniwai, aia oia ma ke kula o Lauhulu ma ka loko o Ukoa, a no keia loko ka olelo kaulana, “Pupuhi ka i’a o Ukoa, naue ke Uki.”  A Alamuki hoi, aia oia ma ka uwapo nui ma kela muliwai e waiho la ma Waialua, e pili pu la me Kamooloa, a no keia huakai nui o ka moo, ua oleloia ma keia moolelo, oia ka mea i kapaia ai kela wahi o Kamooloa, me ke Kulaokamoo ma Waialua a hiki i keia la.

 

            I ka wa i hiki aku ai ua huakai nei mauka o Waolani, aia hoi, ua pani paa loa ia na wahi a pau o uka o ua wahi la, a i ko lakou akoakoa ana malaila, ua noho like lakou me ka hoolohe pono i na olelo a ko lakou haku me ka malama pono me ko lakou lalau ole ma na wahi a ae o Waolani, a mamuli o ka makemake o Kamooinanea, ua poina oia i kekahi mea ana i manao ai, nolaila ua hoouna hou oia i kekahi mau moo elua e hoi hou i Kuaihelani a me Kealohilani, e lawe mai i kekahi mau i-a a me kekahi mau mea melemele, a no keia kauoha ua ae koke aku no keia mau moo e hele e like me ka makemake o ko lakou alii nui Kamooinanea.  I ka pau ana o keia mau olelo, ua hoomaka koke laua e hele me ka wikiwiki loa, i oi aku mamua o ka pa ana a ka makani a me ka lele ana a ka manu maka lewa.  Ia laua i hiki aku ai ma Ku @ @ iaia ke kiai o ua mau aina la i ke kumu o ko laua hoi hou ana aku i Kuaihelani, a no ia mea, ua hai aku laua nei: “I hoounaia mai nei maua e ka haku alii o kakou e Kamooinanea e haawi mai oe i mau i-a a me ka mea au e malama nei, a oia kona mea i hoouna mai nei ia maua, nolaila, e haawi koke mai oe ia maua. 

 

            I ka pau ana ka laua nei mau olelo, ua poalo koke ae la ua moo kiai nei i kona maka akau a haawi mai la ia laua nei me ka olelo mai, e malama loa laua i keia mea me ka huna loa a hoike ole ma ko laua ala e hoi mai ai a hiki wale imua o Kamooinanea, ae aku la no hoi laua nei.  Mahope iho o ia wa, ua lele koke mai la lakou mai luna mai o Keahilani a hiki i Kuaihelani, a ia lakou malaila, ua haawi koke ia mai la ia laua nei kekahi mau i a elua, oia hoi ka Pipi.  I ka loaa ana mai o keia mau mea elua ia laua nei, o ko laua huli hoi koke mai la no ia me ka eleu nui a hiki ana imua o Kamooinannea ma Wao lani, a hoike aku la no hoi laua nei i na mea i kauohaia ia laua.  No keia manawa i liuliu ae ai na mea a pau no ka ho-a-o ana o Keamomelemele me Kaumailiula, aia malalo o ka Kamooinanea keia mau lawelawe ana o kona ohana nui a pau me ka holo o na hana.  A hala kekahi mau la a me na po, ua ike ia na mea a pau malalo ona, ua makaukau lakou a pau, oia ka wa i hoalaia ai na mana kupua a pau loa.  I ka wa i komo ae ai o Keaomelemele a me Kaumailiula iloko o ka hael i hoomakaukau ia-no laua, ua hookaawale mua o Kamooinanea i kona poe a pau me ke kokoke ole aku i ka hale o na mea e ho-a-o ana, a o Kane ma a me ka poe hoi e pili ana ia laua, aia lakou maloko o kekahi hale me Paliuli ma, a no ehiku anahulu ka loihi o ko Keamelemele ma noho ana me kona kaikunane kane maloko o ka hale a laua i noho ai me ka ike ole aku o na mea a pau.  A hala keia mau anahulu i oleloia, ua hele aku la o Kamooinanea a olelo aku la i na moopuna: Eia ka’u mohai ia olua, nolaila e-malama loa olua i keia mea, a ina e hemahema olua, alaila, e na hou ana no keia mau mea i ko kakou mau aina ma kukulu o Kahiki, (oia hoi mea a na moo i kii ai i Kuaihelani i haiia ae nei mamua.)

 

            I ka pau ana o keia mau olelo a Kamooinanea, ua komo aku la o Kane ma iloko a me na makua o lakou e ike ia laua, a ia manawa no hoi i pane mai ai o Keamomelemele i na makua, e hoomakuakauia na mea a pau i makemakeia e ai, a ua ae ia kana olelo.  Mahope iho o ka pau ana o keia mau olelo, ua kahea koke ae la o Keaomelemele ma ka inoa o Kaulanaikipokii ma Hawaii, e lawe koke mai i na laau elua oia hoi o Makalei a me Makuukao, he mau laau keia ia laua na lako ai a me ka i-a.  I ka lohe ana o Kaulanaikipokii i keia leo kahea, ua hele koke mai la oia me keia mau laau.

 

            I ka wa i hele mai ai o Kaulanaikipokii me na laau elua, a o ka laau nona ka inoa i kapaia o Makalei, ua nui loa na i-a o ke kai i hahai mai i keia laau ma ka moana mai Hawaii mai a hiki makai o Kailua ma Koolaupoko ma Oahu.  I keia wa i ikeia aku ai ka nui o na i-a, ke hele la a ula pu wale no ka moana.  A no keia wa hoi aia aku la o Kaulnaikipokii maluna o Waolani me kekahi laau me Makuukao, a ke hui pu la me Keaomelemele ma a me na poe a pau.  A iaia i hiki aku ai malaila, ua hai mua aku la oia ia Ku a me Hina a me Olopana ma, a pela no hoi me Paliuli ma me na aikane a laua, a ina i ike lakou i kekahi laau nui e pii mai ana mailoko mai o ke kai makai pono mai o Kailua, aole lakou e uwa ia mea, a ua ae lakou a pau i keia kauoha me ka hoolohe pono.

 

            I loa no a pau keia mau olelo, aia hoi ua laau nei e pii mai ana mailoko mai o ke kai, a i ka wa i hiki mai ai ua laau nei ma ka lokowai o Kawainui, ua pahaohao ae la ka manao o ka poe menehune a pau o Waolani a hoomake aku la lakou a uwa me ka leo nui, a o ke kumu nui o ko lakou uwa ana i kela wa, ua manao lakou he kupua ikaika keia mai Kahiki mai e hele mai ana e luku ia lakou, a oia ko lakou mea i uwa ai me ka leo nui wawalo, a ia manawa no, ua hina koke aku la o Makalei iloko o Kwainui a hiamoe malie; aia keia laau malaila e waiho nei a hiki i keia wa.  (Ina he poe e heluhelu ana i keia moolelo, a malihini ka hele ana ma Ka @ @ i waiho ai o keia laau, e ninau i na kamaaina o Kailua ma Koolau o Oahu.  Me keia uwaia ana o Makalei e ka poe menehune, ua hiki ole keia laau maluna o Waolani, a pela ka mea i oleloia ma keia moolelo e hoakaka nei:

 

            I ko Kaulanaikipokii lohe ana i keia mea, ua pii ae la ka ena o kona huhu a me ka ukinki nui, nolaila, ua hai aku oia i kona manao imua o Kane ma a me Kamooinanea, e kau aku i wahi hoopai maluna o lakou a pau, a ua ae ia kona manao, a no ia mea, ua hookaawaleia lakou a pau ma na wahi o keia mau mokupuni, a waiho iho la a Waolani me ke koe ole o kekahi ohana o keia poe malaila, a noho iho la o Kaumailiula me kona mana nui.  Iaia i hiki ai maluna o Waolani, oia no ka wa i makaukau ai na mea a pau loa no ka hele ana aku e launa me Keaomelemele ma ke ka nani nui a maikai iwaena o lakou iho me ka oluolu like.

 

            Iloko o keia wa a lakou e noho ana ma Waolani, ua kupu ae la ka manao iloko o Kamooinanea a me Kane ma, e hoonoho aku ia Kahaikakekua me Hiilaniwai ma ke ano he kane a he wahine, a ua holo ko lakou manao no ia mea me ke kanalua ole.  Ma ia hope iho ua hoi aku o Kaumaihula me Keaomelemele a noho ma ko laua hale ma ke kuahiwi o Kaala, a ua lilo ka nalu o Puaena i makemake loa nana: a o Paliuli a me kana kane, ua hoi laua ma ko laua wahi mau ma Olaa, a ua hele pu o Kukaohialaka me Hiilei me Waka laua me Paieie ma Hawaii, a o Olopana me Hina, ma Oahu a ma Kauai laua i ka hi manawa, a o Kahanaiakua me kana wahine ua noho laua ma Waolani me ka maikai a hiki wale i ko laua wa i hele ai e hooko i kana oihana ma keia paeaina; o Kaulanaikipokii hoi ua hooliloia oia i mea kaapuni i keia mau aina ma na wahi a pau loa e like me ka mea nonoa keia moolelo i haawi ai maluna ona i na mana ike a lapaau.  (Ma keia wahi o ko kakou moolelo e hiki ai i ka mea heluhelu ke hoomanao iho i ka nui o na moo i hoonohoia e Kamooinanea ma keia paeaina, aole no paha ia mea e hooleia mai ana e ka mea heluhelu, nolaila, e hoomaka kakou e ike i ko lakou wahi a me ko lakou mau inoa pakahi e like me ka mea i loaa i ka mea kakau nei i keia moolelo.)

 

            Ke puka aku nei na moolelo me ka momona mau, a o na helehelena o ka moolelo o ke keiki alii o Hinedu, e ike iho no oe e ka mea heluhelu he ano hou, e like me ka oili ana mai o ka mahina i keia mau po he mahina hou.