Ka Nupepa Kuokoa, Volume XXIV, Number 15, 11 ʻApelila 1885 — Page 2
| This text was transcribed by: | Naomi C. Losch |
| This work is dedicated to: | Mary Kulamanu Saffery Chan Wa |
Ka Nupepa Kuokoa
KE KILOHANA POOKELA NO KA LAHUI HAWAII.
Ka Nupepa Kuokoa
No ka Makahiki, ...........$2.00
No Eono Mahina, ...........1.00
KUIKE KA RULA
Poaono.....APERILA. 11, 1885
Lokomaikai.
Ua lokomaikai ke Kuhina Kalaiaina ma kona hoouna ana'ku i ka mokuahi Eleu e imi i ka waapa nalowale i ka po la Sabati nei me kona mau ohua ehiku. Ua lokahi pu na mea a pau i ka hoapono ana i keia hana aloha a ke Kuhina. A ina hoi e loaa aku ana kona puuwai i ka leo walohia a ke aloha e pa e mai nei mai ka hapa mahuahua mai o ko kakou poe kamaaina, o na Hawaii maoli a me na haole, e noi ana e hoomoe loa ia na laikini kuai waiona no na apana kuaaina me ka hoopuka ole ia aku, alaila o ke kiekie ia o kona aloha i ka lahui o ka aina a me na lahui e ae e noho nei.
Ua lawa iho la ke kuai waiona no ke kulanakauhale o Honolulu, a mai Honolulu aku ke loaa mau nei na waiona i na apana a pau, nolaila aole i hoonele ia ka makemake o ka poe inu. O ke ola a me ka malu a me ka pono o ka hanauna hou e ulu nei ke poino ana, ina e haawi ia na laikini no na apana kuaaina.
Ka Aha Euanelio o Oahu
Ma ka Poalua nei i noho ai keia aha hui, ma ka luakini o Kaumakapili. Ua akoakoa ae na kahu a me na elele o na ekalesia o keia mokupuni. O Rev J. Waiamau ka i kohoia i Lunahoomalu, a o S. Paualhi ke kakauolelo. Ma ka Poalua heluhelu nui ia na hoike o na apana. Ma ka Poakolu iho ua ulu ae he kamailio loihi no ka laikini ana i na haumana o ke kula kahunapule e hai i ka Olelo. Manao kekahi poe pono e waiho ka laikini ana ia lakou a puka pono mai ke kula aku, a na ka aha o kela a me keia apana kahi a lakou e noho ai e haawi na laikini, ke ike ia he pono. Olelo hoi kekahi poe e pono e haawi mua ia na laikini i keia wa, no ka mea ua manao ia e hele na lakou e ao aku ma kekahi mau apana ke hiki aku i ka wa hoomaha o ke kula iloko o ka mahina o Iune, a ina aole i loaa na laikini he mea ia e hoowahawaha ai ka lehulehu.
I ka Poaha iho ua ninau ia na haumana imua o ka aha, a ua haawiia na laikini haiolelo i kekahi poe o lakou eono. Hookahi haumana i hoike ae i kona manao imua o ka Aha ua haawi oia iaia iho no ka hana iwaena o ko na aina e, oia o Kaleoiki o Kohala.
Ua kamailio nuiia ka puu dala i hooholoia e ke kau ahaolelo o 1884 iho nei no ke kula hanai kaikamahine o Kawaiahao, aole nae i loaa mai. Hai mai kekahi hoa ua lohe oia no ke kue ia o kekahi mau hana a ka Papa, oia ka ke kumu loaa ole o ke dala i haawi ia e ka ahaolelo. Ua kohoia he komite nana e noi aku i ka Papa Hoonaauao no ua mau dala nei i oleloia.
Ua kohoia o Nalua, Waiwaiole, Kia a me Keone i mau elele no ka halawai makahiki o ka Aha Euanelio i ka malama o Iune, a hookuuia na hana i ka auina la Poaha nei.
Mahope mai o ka paa ana o na manao maluna ae, ua loheia mai ua noonoo hou ia na mea e pili ana i ka haawina dala no ke kula Kaikamahine, a ua hoopau wale ia ka manao e noi aku i ka Papa Hoonaauao.
____________________________________________________
(Kakauia no ke Kuokoa)
I KEIA mau la aku nei ua loaa aku i ke aupuni ne $9,000 hoaie no na bona aupuni, a ua lilo keia he mea hapai nui ia e kekahi mau pupepa pili aupuni, me ka manao a wehewehe mai he hilinaiia ke aupuni ma ia mea. He minamina makou i ka hoomaopopo aku ia oukou i ka omilumilu o keia mau wahi dala i ka Aupuni Hawaii, a o ke kumu o keia loaa ole no ka hilinai ole ia o ka Aha Kuhina. He nui no ka poe dala e noho nei ma Hawaii, a he poe no i makaukau e kokua i ke aupuni ina he poe e na Kuhina, he poe i hilinai ia, a he poe i kanalua ole ia ko lakou ike hookele hoopono. Mamuli o ke emi a uuku o na loaa o ke aupuni i keia manawa, ua hiki ole i ke aupuni ke hookaa aku i kona mau aie i kela a me keia manawa, a ua lilo keia i mea e hopohopo ia ai ke aupuni. Aole wale o keia, he mau kumu e ae no kekahi o ka Aha Kuhina i hooowahawahaia ai. Ke hoolilo nei kekahi mau hoa o ka aha kuhina i ke dala o ka waihona me ke kue aku o ke Kuhina Waiwai, oiai oia ka mea e hoino nui ia ana i ka loaa ole aku o ke dala ke kikoo ia aku ma o na kauoha a na keena e ae. Ua lohe mai makou, he elua a he ekolu kue ana o ke Kuhina Waiwai @ ke Kuhina o ko na aina e. Me ka hoomaopopo aku no o ke Kuhina Waiwai @ kona mau hoa i ka nele a uuku o na loaa o ka waihona, a kaohi aku i na hoolilo ana i hiki ke waiho puia a hiki mai ka wa dala, a loaa mai paha ka hoaie ia, aohe nae he akahele mai o ke Kuhina o ko na aina e, a me kona hoa ke Kuhina Kalaiaina. Mamuli o keia mau hana, ua lohe mai makou, ua kaa ole ke kumukuai o ka mokuahi kolo moku Eleu, a me kekahi mau aie e ae. He mea keia a kakou e hoomaopopo iho ai i ke like ole o na hookele aupuni. Ke akahele mai nei o Kapena, ke huki ku la no o Kipikona a me Kulika. Ke kuemi nei kekahi oiai na kona keena e hookaa, ke ka la no laua la i ke ino. Me he la i ka nana iho, ua ike Kuhina Kipikona a me kana haumana e ane piho ana ka moku, a nolaila, ke hao malu nei i ka waiwai o na ona, aia ka pono o ko laua pomaikai me na hoa, a ina e piholo aku no ke Kuhina Kapena me ka moku, ua hiki no. Ma ka ike aku a ka poe o waho i ka hoomau ia o keia mau hana ano e e Kipikona, ua noho mau ka hopohopo iloko o ka poe loaa a poe hiki ke kokua i ke aupuni. Ua noho mai nei keia aha kuhina a hiki i keia wa, a ano ke mokuahana liilii nei ka lakou hana. Ua like ole, a o ke kumu o ka like ole no ka huki-ku o Kipikona, a ake ana e kaihi i na hana a pau malalo o kana hooponopono ana, a ina e hiki mai ka wa e hookolokolo ia mai ai e ka ahaolelo, alaila, e kuhikuhi ana no na hoa ka hewa. Ma keia mau hana ua lilo ka pono o ka lahui i mea ole, a no ia mea ke uhi mai nei na ao poluluhi o ka poina maluna o ka lehulehu. Ke hoolilo ia nei na wahi dala o ke aupuni, aole me ka manao e loaa ka pono i ka poe o loko nei o ka aina, aka, o ke ake me ka poe o waho i aha ai? i pono lkike ai na aoao a elua, me ka nalo, oiai ka poe o waho mai, he poe ku ae no a hele, ke pau na mahelehele ana. No keia mau kumu, aole e loaa wale mai na kokua ana mailoko ae o ka aina, aia wale no a loli keia aha kuhina a noho mai he poe i hilinai ia.
____________________________________________
(Kakauia no ke Kuokoa.)
HE NUI no na hana hookamaemae a ke Kuhina Kipikona. I kona wa e hooikaika ana nona iho imua o ka lehulehu, he nui kana mau olelo pelo i ka lahui Hawaii. Nana ka olelo, “ma kahi hiki iaia ke kokua i keia lahui, e haawi ana oia i kona kokua. Ke ike nei anei kakou i ka oiaio o ia olelo?” Me he la o ka waha wai ka i pololei ma na olelo, aka, o ka noonoo o keia kanaka he okoa loa. I ka makou hoomaopopo iho i kana mau hana no ka lahui Hawaii, ua emi mai kana i ka kekahi mau kuhina e ae, i noho ma ka oihana. Ke ike nei makou ke haawiia nei ka oihana kupono i ka poe Hawaii ma ka lima o na hoaloha haole ona, me ke kapae loa ia o ka noonoo ana no ke kanaka Hawaii, a i ole hoi no ka haole i hanau a i hanaiia ma Hawaii. Ke alawa ae kakou ma o a maanei, aole he hookahi wahi hoailona e hoike mai ana i ka oiaio o kana mau olelo imua o ka lehulehu. Aole ma ka hoonoho ana i ke kanaka Hawaii, aole no hoi ma kekahi hana ano nui a hana uuku paha no ka pono o ka lahui. He nui na makalua i kupono e hoopiha ia e ka poe o ka aina, aka, aole i komo ia manao iloko o keia epa a kolohe
Iloko o na hoonohonoho ana, e hooikaika mau ana oia e hookomo i na hoa'loha haole ona, a ina ua komo ole ma kahi ana i manao ai, mamuli o ka alai mai o ka Moi no kekahi mea ana i makemake ai, ua imi wale aku la no oia i wahi e noho ai kona hoa'loha iloko o ka oihana, me ke kumu ole a me ke akaka ole o ka hana. Ke hoomaopopo nei makou i na la i olepeia ae ai o Alani a me ka Ilamuku, a pela aku, ua makemakeia o Wini, o ka Hale Leta, e hoopauia, i loaa ai he wahi e hoonoho ia aku ai kahi kiu ana, i hoopauia'i e Alani. Mamua ae nae o ka hoopuka ia ana o ke kauoha, ua ui aku la ua maalea nui nei i ka Lani, me ka hoike aku i na kumu, a me kona makaukau e hoopiha i ka makalua me kahi haole kiu ana; aka, ia manawa, oiai na ka Lani ka hookohu, ua waihoia mai la ka inoa o Mekia Boyd, e noho ma ka oihana leta. Aia ike iho la ua kolohe nei aole e ko ana kana, alaila, hoopohala hou ae la oia i kona manao hoopau ia Wini, a oia ko Wini mau ma ka oihana a me ko Boyd haule ana, no ka hiki ole i kahi kiu ana ke hoonoho ma ka oihana. Pela no ma na hana maalea. No ka hopohopoia o Iaukea ma ke Keena o ko na Aina e, ua imi hou ia aku la he wahi nona. He elua kumu o keia, --i ike ole ia kana mau hana malu ma ke Keena o ko na Aina e, a i komo pono mai o Weba, kela haole hoa ohumu ona, ma ka oihana. A no ke kanalua nui ia o ka moolelo o keia hoa ona, (ane like me kona) ua kapulu ia kona hookohuia, aole i hoolaha iki ia ma ke akea he Kakauolelo no ke Keena o ko na Aina e a hiki wale i keia wa. O keia na hana a keia Kuhina. Ua like ka aina iaia me he papa konane la, e waeleia ana ka poe i like ole me ia, a e hoonohoia ana ka poe i like me kona ano a me kona manao, a o na olelo hookamani no ka pono o ke kanaka Hawaii, e lawe kakou me ke akahele. Nolaila, oiai ke hookokoke mai nei ke kau holo balota, he hooko koke hou mai koe me na hana no i maa iaia, he pelo a he apuhi.
_________________________________________________
HE MANAO PAIPAI.
E ka Nupepa KUOKOA e Aloha oe:-
Ano i keia wa, e oluolu mai oe e ka mea ike i ke aloha a me ka hana pololei, e hookomo iho iloko o kou kino lahilahi piha ole i na tausani olelo a puni ke ao nei.
Nolaila, owau nei o ko oukou hoa makaainana, oiai kakou e o'u mau hoa kanaka aole i la-u-a aku i ka wa e hi-o-o mai ai ka poe a kakou e manao ai he mau Lunamakaainana no ia kau koho e hiki mai ana, no ka mea, “i ka lani no ka ua, wehe e no ke pulu.” Oiai au iloko o oukou, a pela no hoi oukou iloko o'u. E like me Kristo iloko o ka Makua, pela no hoi ka Makua iloko o kana Keiki, pela no hoi kakou e na hoa kanaka i na kau a kau.
Owai kau e Hawaii moku o Keawe, o ka ulu anei i waho i ka wekiu, oia ka ulu i hele a puupuu kepau, oia anei? Oia no. E koho oe me kou noonoo kanaka, mai hoohalike oe me ke kii, he poo no, aohe kunou; he pepeiao no, aohe lohe; he maka no, aohe nae he imo. A pehea hoi oe e ka Ua apuakea o Hana, o kahi a-i kekee no anei ka oukou, i nana kee mai ai ka ia i ka maunu ekaeka, hui aku hui mai kalo i ka nawao, oia anei? A pehea hoi oe e Molokai nui a Hina? hina oe iuka hina oe i kai, pau pulu aohe lau e kanu ai. A pehea hoi oe e Oahu a Kakuhihewa kahi hoi e kukulu ai Kanawai, a make o Laauli i Kanawai, o hele ka hoku o hele ka malama; ke malama ae nei i na wahi kenikeni he kepau ke ano ke nana iho, ua hala ka wa pono.
L. K. KALUAIKONAHALE. Kiilae, S. Kona.
__________________________
Na mea hou o Kaupo.
Nui ka la ma Kaupo nei i ka malama o Ian. a me Feb. Olelo kekahi poe kamaaina, aole i ikeia ka la i na makahiki i hala, e like me keia makahiki; ua hele na wahi lau uala a pikao, a i ka pule mua o Mar., ua haule mai la na paka-ua eloelo o Kulanihakoi, a hiki i keia la a'u e kakau nei, a he hoolana ana mai ia i ka poe mahiai. No ka Ahahui Opiopio, e like me ka panoa o ka aina i ka la, pela no na hana a ka Haku ma Kaupo nei, he neo ka mea loaa mau i ka halepule, ina he hale inu uala, piha-kui lua kela.
Ma ka la Sabati, Mar. 8, ua hele o Kumaaiku (w) ma kekahi hale okoa aku e nala moena ai, a e ole o Kawaiaea opio i papa iaia aole e hana, oiai he la Sabati ia. Ia la no, ua loaa o Kahiole ia J K Kawaiaea e hoi mai ana me na kiki uala; no ka loaa ole paha o ka ai i na la eono, nolaila hele ai i ka la pule. E, auhea oe e Kahiole, mai hana hou e like me keia. I ka po Poaha Mar. 19, ua hoohuiia ma ka berita maemae o ka mare o Mr. Waiwaiole me Mrs. Keomailani, na Kawaiaea opio laua i hoohui. Mahope o ka hookuu ana o na hana, ua malamaia he papaaina no ka hoopiha ana i na houpo lewalewa, o ka hora 10 a oi ia o ka po.
I ka po Poalima Mar. 20, ua malama ae o J. K. Kawaiaea, he ahaaina komo hale. Ua nui ka poe i hele mai ma ia la. O ka poe na lakou ka ahaaina, aole i malama ia he mau wai hooikaika kino, aole no hoi he mau umeke uala, aka, he poi wale no. O ka poe i hele mai ia la, ua ai no lakou ma ko lakou mau home; nana aku ia la, pioioi lua na maka, e hoohio ana ma o a maanei, e iho hee ana na olelo, a o ka hopena no ia o ia mea. I ka hora 2 a oi, puiwa hikilele ana ka mea e kakau nei i ka lohe ana aku i keia mea haalulu, eia ka he pahu. Oiai elua ahaaina i malamaia ma ia la o ko Naopuu kekahi, a o ia poe ka i kai-huakai mai, e kani halulu ana ka pahu, a e kani hooeoe ana hoi ka leo o na ohe. O ka aahu o na wahine, ua hanaia a like loa, a he ku maoli no i ka nani ke nana aku.
I ka hora 5 a oi, ua hele aku la o Noa Kaaa, ma ka hale o Kimo Kameki (haole), a ia ike ana mai o kana wahine o Honolulu, o ka manawa iho la no ia i lele mai ai maluna oia nei; ekolu lakou la a hookahi o Noa, o Honolulu Iosua a me Kameki, a paa pu iho la o Noa malalo. O keia poe a pau ua ona lakou, a o keia Honolulu ua hoopuka aku la ia Kameki e kii i pu a e ki aku ia Noa, ina la paha i hookoia ka manao o keia Honolulu, alaila, maopopo ka hopena o ia hana. Ua hiki mai o Noa imua o'u i kekahi la ae, a ua ike au i kona mau alina, ua poholehole ka papalina a puu ka lae. O ke kumu o keia huhu o Honolulu, no ka hele o Noa i ke kapae malolo piipii kai kela, e kani nae ka waha o ka pu, aohe nao ai i ka papaa. P. PUHALAHUA.
_______________________________________________
He moolelo walohia.
KULU NA WAIMAKA ILOKO O KA AHA HOOKOLOKOLO
Ua laweia ae imua o ka Aha Hookolokolo kekahi wahine nona ka inoa o Mrs. Della Gardner, no ka hewa ana i hana'i oia hoi kona kipu ana i kana kane mare a me ka laua bebe ma ko laua home ma ke kulanakauhale o Kikako, a penei na mea i hanaia: He Kauka ka oihana a kana kane e lawelawe ana, a ua noho pu laua iloko o ka berita mare no ka manawa loihi, a ua hanau mai na laua he kaikamahine ka mea i hoikeia ae la maluna. Mahope koke iho o ka hanau ana mai o ka laua bebe ua loaa koke iho la he kuee mawaena o ke kane, a nolaila ua hoouluhua mau aku keia kane i kana wahine me ka olelo ana e haalele iaia a me ka laua keiki. Aka, aia iloko o keia wahine ka manao oni paa o ke aloha no kana kane a me ka laua opuu rose hou i loaa mai ko laua mau puhaka mai. Ua hoopuka aku la keia kane imua o kana wahine i na olelo lapuwale loa a aloha ole me ka hooweliweli pu aku, a ua komo no na manao huhu a lili iloko o ka naau o kana wahine no keia mau hana, aole nae no ka hoomau loa, aka ua komo pu mai la iloko o kona naau huhu ka ikaika o ke aloha, a hooauhee aku la i na manao awahua o ka inaina iloko ona; ua ninau pinepine aku oia i kana kane e hoike mai i kumu o kona manao ana e hana pela, a aole nae he wahi mea a hoomakili ia mai, aole no hoi he mau huaolelo e hoike mai ana e hele ana no oia a hoi hou aku, aka, o ka hoouluhua mau wale iho la no i kana wahine i na wa a pau.
No keia mau hana a kana kane, ua ano ulupuni loa mai la oia no ke aloha iaia a me ka laua keiki. Ua ano olalau kona noonoo i kekahi manawa, a e ike mau ia ana oia maloko o ko laua rumi moe e hii mau ana i ke keiki ma kona alo me ke kulu mau ana o kona mau waimaka, a he nanaina kaumaha hoi kona i na manawa a pau. Ua ike no ke kane i keia mau hiohiona o kana wahine, aole nae oia i hoomalielie aku. Nolaila, hele aku nei keia kane e hooponopono i kona mau pono no ka hele ana ma ia po, a ua maopopo no nae i keia wahine na hana a ua kane la. Hele aku nei ka wahine a pane aku la iaia me ka uwe ana: E kuu kane, heaha la keia mau hana au? E hele ana oe ihea i keia po? E hele ana anei oe a hoi hou mai? “E hele ana au,” na huaolelo i paneia aku e kana kane. Makaukau ae la na mea a pau oiai hoi ka wahine e ku ana a e nana ana maluna o kana kane me ke aloha, a e haule makawalu ana hoi kona mau waimaka eloelo. Oiai ka hana mao ole a ke aloha kane oiaio e hoonipo ana maluna o ka wahine, lele aku la oia a honi aku la i ke kane me ke kulu o na waimaka, a pane aku la me ka haalo'ulo'u: “E oluolu anei oe e kali iki iho a ike ia bebe? Ua ae koke aku la kana kane, a holo aku la oia a lawe mai la i ka bebe mai kona wahi moe mai oiai oia e hiamoe ana. Honi iho la ua kane la i ka laua keiki a huli aku e hele. Hoihoi koke aku la ka wahine i ka bebe ma kona moe, a oia hoi ka wa i hooi loa ia aku ai na manao uluku o ke aloha no kana kane; haalele iho la oia i ka bebe a e hoonaku ana hoi ma o a maanei o ka rumi. Komo ae la oia ma kekahi keena okoa, a ma ua rumi la hoi i loaa aku ai iaia kekahi pu panapana a puka koke aku la oia iwaho. A oiai kana kane aloha ole e hoomaka aku ana e iho ma @@ alanuipii, ua kani koke aku la ka pu no elua manawa, a haule aku la ua kane nei i lalo he kino make. Hoi hou aku nei keia wahine a ma ka moe e waiho ana o kana bebe a ki aku la a make, a mahope iho hoohuli pono ae la oia i ka waha o ka pu ma kona lae a kani ae la, a ma o kekahi ulia ua pahia ae la ka poka ma kona papalina a haule aku la ka pu mai kona lima aku. Hopu iho la oia i kana bebe e waiho make ana a holo aku la no kekahi mau hale e ku koke mai ana ma kona home a waiho aku la na lakou e malama, a hali loa ia aku la oia no ka halemai me na alina o ka manaonao o ka poka ma kona papalina, a iloko o ka lawelawe pono ana a ke kauka ua loaa iaia ka oluolu kupono. Ua make nae kana bebe me kana kane pu mamuli o na haawina ano e i loaa iaia.
Mahope iho o kona pohala ana mai na hoomailo ana a ka eha ma kona papalina, ua laweia ae oia imua o ka aha hookolokolo e noonoo pano i ke kumu o kona ki-pu ana a make kana kane mare a me ka laua kaikamahine. Iaia maloko o ka rumi hookolokolo, ua lulumi mai la kona mau makamaka, a me na hoaloha pu e hoomama ana i kona mau manao kaumaha, oiai oia e paiauma ana no kana kane a me ka laua bebe, a oiai hoi ua ao kanaka mai la oia i keia wa, a ua ulu mai la na hoomanao ana iloko ona no ka mea i hanaia ma kela po, a aole hoi i haalele mai ia ano kaumaha i kona mau nanaina. Ua hoohanini mau ia na waimaka o keia wahine, a nana no hoi e uwe, ua hui pu mai la ke anaina holookoa ma ia haawina hookahi. Ua weheia mai la ke anaina hookolokolo, a heluheluia mai la ka moolelo o na hana me ka ilihia anoano, a mahope iho o ka pau ana, ua hiki ole i na loio o na aoao a elua ke haawi i hookahi ninau i keia wahine no kekahi mau minute, oiai laua e ku ana me na waimaka e kahe a wai ana mai ko laua mau maka mai mamuli o ko laua lohe ana i keia moolelo walohia. No kekahi manawa, ua pane aku la ka loio o ka aoao pale imua o ka aha, “aole i hana keia wahine ma kona manao maikai, aka, ua uluhiaia kona noonoo i ke aloha a ano olalau a hana aku la i ka mea a kona noonoo maikai i makemake ole ai.
Me keia mau hoakaka wale no a ka loio pale, ua komo koke aku na Jure ma ke keena a emoole puka mai la ka olelo hooholo e hookuu loa ana i keia wahine. Huli ae la ka lunakanawai imua o na Jure a pane aku la: “E na keonimana, ua kuikahi pu ko'u manao me ko oukou, e hookuu ia keia wahine mai na umii ana a ke kanawai; oiai o ka hana i lawelaweia e ia, aole me ka noonoo kanaka.”
He manawa hou keia no na makamaka e lulumi mai ai me na waimaka i ka wahine i hookuuia, oiai oia e uwe ana ma ka umauma o kona mama aloha, a he mea hiki ke olelo ae ua naha kona puuwai i ke aloha.
_______________________
WAI! WAI!!
Ke kauohaia aku nei ka poe a pau he pono hookahekahe wai ko lakou, mai keia la aku, o ka manawa ho'okahekahe wale no i aeia oia na hora mai ka 6 a ka 8 A.M., a mai ka hora 4 a i ka 6 P. M.; aole ma na manawa e ae.
Ma ke Kauoha
CHAS. B WILSON, Luna Wai. Honolulu, Ian. 30, 1885. 2009-tf.
_____________________________________
G L. FITCH, (KAUKA PIKA.)
Ua wehe ae nei au he Keena Lapaau ma Alanui Maunakea, Honolulu, Helu 70, a e loaa no au ma ke Keena ma ka hora 9 a ka hora 12 o ke kakahiaka o kela a me keia la, hora 3.30 a i ka hora 7.30 ahiahi. 2007-m
____________________________________
JAMES M. MONSARRAT.
(MAUNAKEA.)
LOIO A HE KOKUA MA KE KANAWAI.
He Luna Hooiaio Palapala.
E hana ia no na Palapala Kuai, Palapala Hoolimalima, a me na palapala pili kanawai e ae ma ka olelo Hawaii. Dala no ka hoaie ma ka moraki ma na waiwai paa.
KEENA HANA: alanui Kalepa tf.
___________________________________
M THOMPSON, [KAMIKANA]
HE LOIO A KOKUA MA KE KANAWAI
Keena hana maluna o ka Hale Pohaku o Kamapela, (Campbell's Block,) Rumi helu 8 me 9. Puka komo e huli pono la i ke Alanui Kalepa, Honolulu.
_____________________________________
MA KE KAUOHA
OLELO HOOLAHA:-Ke papa loa ia aku nei na kanaka a pau aole e auau ma ke Kawa (kiowai) o Kapena, Nuuanu, a ma na ano e ae paha e hoohaumia ai i ka wai, a i ke komohewa ana paha ma na wahi e pili ana. O ka poe kue i keia hoolaha, e hoopii ia e like me ka piha pono o ke kanawai.
CHAS. B WILSON. Luna Wai.
Aponoia
CHAS. T. GULIKA. Honolulu, Mar. 25, 1885. 2117-4ts.
__________________________________________
HOOLAHA PA AUPUNI. I keia la ua hookohuia o J. A. KIMEONA, i Luna no ka Pa Aupuni ma Kailua, Kona Akau, Hawaii, ma kahi o Poheepali.
POOMAIKELANI, Kiaaina o Hawaii. Hilo, Hawaii, Mar. 13, 1885. 2018-3ts.
_____________________________________
HOOLAHA PA AUPUNI. I keia la ua hookohuia o WILLIAM HOOKUANUI, i Luna no ka Pa Aupuni ma Waimea, Hawaii, ma kahi o J. H. Nahiwa i waiho mai.
POOMAIKELANI, Kiaaina o Hawaii. Hilo, Hawaii, Mar. 13, 1885. 2018-3ts.
________________________________
I keia la ua hookohuia o C. H. PULAA, i Hope Lunakanawai Hoomalu no Kohala Akau Mokupuni o Hawaii.
POOMAIKELANI, Kiaaina o Hawaii. Hilo, Hawaii, Mar. 13, 1885. 2018-3ts.
____________________________________
HOOLAHA HUI. Ma keia ke hoolaha nei na mea nona na inoa malalo aenei, o FRANK HUSTACE a me GEORGE H. ROBERTSON, no Honolulu, ua hui laua ma ka inoa hui o
HUSTACE & ROBERTSON,
no ka lawelawe ana i ka hana lawe ukana ma Honolulu.
FRANK HUSTACE,
GEORGE H. ROBERTSON.
Honolulu, Mar. 30, 1885. 2018-2ts. *
________________________________________
OLELO HOOLAHA:---Ua haalele kumu ole mai kuu wahine mare ia'u, o KAWAI o Honokua, Kona Hema, Hawaii. Nolaila, ke papa aku nei au i na mea a pau mai hoaie iki kekahi iaia, aole au e hookaa, maluna o oukou ko oukou poho ke hoolohe ole oukou i keia kauoha.
Ke papa pu nei au i ka'u mau mea a pau, aohe ona mana e kii me kuu ae ole.
Owau iho no me ka oiaio.
HAO (K.) S. Kona, H. Mar. 10, 1885. 2015-4t.
__________________________________________________
HOOLAHA HOOKAPU AINA. O makou o na hooilina o D L Keliikuli i make ke papa a ke hookapu aku nei makou i na palena a pau o Hoopuloa e pili ana me Milolii, mai ka uka a ke kai, a me ka aoao e pili ana me Papa, aole e hele wale na holoholona maluna o Hoopuloa, oia na pipi, lio, kao, hipa, puaa, oki, kekake, a o na ano holoholona no a pau loa, a ina e loaa aku na holoholona i na ona maluna o ka aina i papa ia, e hopu ia a hoouku ia no $1.00 o ke poo. Ua kapu pu no hoi na kahakai mai Pukawaa-iki a hiki i Namakahiki a me na i-a; aole e lawe na kane, wahine na keiki, i na opihi, limu, aama, a o na i-a no a pau e pili ana ma ia mau palena i hookapuia a aole no hoi e hele wale na kanaka a pau ma ia mau wahi, a e hooko no makou i ke kanawai maluna o ka mea a mau paha e kue ana i keia. Ke hookohu pu aku nei makou ia Kaulahao, Panila, Makelo, i mau luna nana.
D L WA@IA KELIIKULI
Hoopulua, S. Kona. Apr. 3, 1885. 2118 3t.
_________________________________________________________
HOOLAHA AKEA NO KA HUI O KANAHENA. Ua hookohuia mai au i Poo no ia hui e ka agena o ke 'lii Pauahi Bihopa, ma kahi o J. Kamawae i hoopauia; nolaila, ke kahea aku nei au i ka poe hui o Kanahena, Honuaula, Maui, e hele mai lakou a pau i ka la 14 o Aperila nei 1885, ma Kanahena, me ko lakou mau dala pu mai o keia makahiki o ka poe i koe aole i haawi mai ia'u, a ke kauoha pu ia aku nei me ka poe e makemake mai ana.
J. A. KAIANUI.
Kanahena, Honuaula, Maui, Apr. 2, 1885. 2018-1t. *
___________________________________________________
HOOLAHA HOOKO MORAKI. Ma keia ke hoolahaia aku nei, mamuli o kekahi mana kuai iloko o kekahi Palapala Moraki i kakauia i Mei 30, 1882, i haawiia e MOSES KUMALAE o Kaneohe, Koolaupoko, mokupuni o Oahu ia SAMUEL M. DAMON o Honolulu, o ka hoopaa ana i ka ukuia o eha haneri me kanalima dala, a i kakauia ma ke Keena Kakau o Kope o ke Aupuni, maloko o ka buke 76, ma na aoao 72 me 73, a no ka uhaiia no na olelo aelike o ua moraki nei i oleloia, nolaila e kuaiia ana ma ke kudala akea ia aina a pau a me na pono me na pomaikai a pau e pili ana i ikeia iloko o ua moraki nei, mahope iho o ka puka ana o keia hoolaha no ekolu, ma ka hale kuai kudala o Lyons a me Levey, ma Honolulu, i ka POAONO, Mei 2, 1885, no ka uhaiia o na olelo aelike o ua moraki nei i oleloia. O ka waiwai i hoakakaia maloko o ua moraki nei i oleloia, a i hoolahaia no ke kuai ana ma ka la i olelo mua ia, aia ma Pau, Kaneohe i oleloia, a oia no ka apana ekahi i hoakakaia ma ka Palapala Sila Nui helu 129, Kuleana 3121, i haawiia ia James Mahony; nona ka ili aina 19 7 10 eka, koe na kuleana o na kanaka.
S. M. DAMON,
Mea Moraki.
Wm. R. Anstin Loio. Honolulu, Apr. 2, 1885. 2019-4ts.
_____________________________________________
NA HOOLAHA HOU.
______________________________________________
Kuai Kudala
-o-
NA AINA WAIWAI
A ME NA
KAI LAWAIA.
Mamuli o ke kauoha a na Kahu Malama Waiwai o ka Waiwai o Lunalilo, e hoolilo aku ana au ma ke kuai na waiwai i hoikeia malalo iho,
MA KA
POAKAHI la 27 o APRILA, 1885.
Ma ka hora 12 awakea, ma ke Keena Kudala, ma Alanui Moiwahine, Honolulu.
Apana A. 1 2-100 eka; Apana B. 1 4-100; eka; Apana C. 97-100 eka; Apana D. 1 11-100 eka; Apana E. 2 28-100 eka; Apana F. 4 98-100 eka; Apana G. 1 46-100 eka; Apana H. 4 3-100 eka; Apana I. 16 eka. O keia mau Apana aina mai ia A ia I., aia no ke waiho la ma ke kahakai ma KAALAWAI, mao aku o Leahi, a e huli pono mai ana ma ke alaloa o Kapiolani mai Honolulu aku, a ua kupono loa no ka noho ana, me na wahi auau kai akea e pili pu la.
Apana J--Ke Kai Lawaia o KAPAHULU, mokupuni o Oahu.
Apana K--Ke Kai Lawaia o KAALAEA mokupuni o Oahu.
Apana L--Na Kai Lawaia o WAIEHU mokupuni o Maui.
@ He kuike ke dala; o na lilo no na palapala me ka mea kuai. E ike ia no hoi na kii o na Apana aina mai a A. ia J. ma ko'u kudala.
E. P. ADAMS. 2116-5t.
________________________________________________
HOOLAHA LUNAHOOPONOPONO WAIWAI. Ke hoolaha aku nei ka mea nona ka inoa malalo, ua hookohuia oia i lunahooponopono no ka waiwai o Cpat. Thos. Spencer o Hilo, Hawaii, i make. Nolaila, ke kauohaia aku nei ka poe a pau he mau koina ko lakou e hoike koke mai me na hooiaio kupono iloko o na mahina eono mai keia la aku, a i ole ia, e hoole mau ia aku no lakou. A o ka poe he aie ko lakou i ua waiwai la, e hookaa koke mai. C. S. KITTREDGES.
Lunahooponopono Waiwai o ka waiwai o Thomas. Spencer, me ka Hooilina i huiia. Hilo, Oct. 5, 1884. 2000-6m
_______________________________________________
KUAI HOOKO MORAKI:---O kela apana aina waiwai nui ma Hilo. Ma keia, ke hoolahaia aku nei no ka hooko ana o kekahi mau moraki elua e hanaia e Hiram A. Bridges ia Mrs H. E. Cooke ma ke ano kahu no ka waiwai o J P Cooke i make, a i kopeia ma ka buke 82 aoao 221 a me ka buke 88 aoao 133, e kuaiia aku ana ma ke kudala akea ka aina i oleloia maloko, i ka mea koho kiekie loa, ma ka rumi kudala o E P Adams ma Honolulu, i ka hora 12 awakea o ka POAKAHI, MARAKI 30 1885.---O ka aina e kudalaia ana, oia no ka aina a me ka hale Briges ma Hilo, ma ka aoao akau o ke alanui Waianuenue a mawaena o kahi o Kipi a me ko ka lunakanawai Laimana wahi. Oia kekahi o na wahi nani loa ma kela kulanakauhale nani o Hilo. He 340 kapuai ka loa o kahi e pili la i ke alanui, a ua holo aku hoi a hiki i ka muliwai o Wailuku, a he 2 1/2 eka, he hale hou ka hale a he kulana kilakila, a aohe wahi e ae ka nani mamua o keia malaila. W R KAKELA. Loio no ka mea moraki mai. 2116-2ts
___________________________________________________
MA KE KEENA O KA LUNAKANAWAI KAAPUNI Apana Ekolu o ko Hawaii Pae Aina. Ma ka Waiwai o KELIIAUA (W,) no Hilo, Hawaii, i make.
Ua heluheluia a ua waihoia ka palapala noi a JOSEPH NAWAHI e noi ana e hooiaio ia ka palapala kauoha hope a KELIIAUA (w,) no Hilo, Hawaii, i make; a ua waihoia mai no kela palapala i ka Aha.
Nolaila, ua kauoha ia na mea a pau i pili, o ka POALIMA, oia ka la mua o MEI, 1885, i ka hora 10 kakahiaka, ma ka Hale Hookolokolo ma Hilo, oia kahi a me ka manawa i kohoia no ka hoolohe ana i ua noi la a me na mea kue ke hoike ia. F. S. LYMAN, Lunakanawai Kaapuni Apana Ekolu o ko H. P. A. Hilo, Hawaii, Mar 24, 1885. 2018-3ts.
_________________________________________________
MA KE KEENA O KA LUNAKANAWAI KAAPUNI Apana Ekolu o ko Hawaii Pae Aina. Ma ka Waiwai o MAKAHUHU (w) no Kihalani Hilo, Hawaii, i make. Ua heluheluia a ua waihoia ka palapala noi a B. H. NALIMU (k,) e noi ana e hooholoia na hooilina o ka waiwai o MAKAHUHU (w), no Kihalani, Hilo, Hawaii i make kauoha ole, a e hoonoho iaia i Lunahooponopono no ia waiwai.
Nolaila, ke kauohaia aku nei na kanaka a pau, ke pili, o ka POALIMA, oia ka la mua o MEI, 1885, ma ka hora 10 kakahiaka, ma ka Hale Hookolokolo ma Hilo, oia ka la a me kahi i kohoia no ka hoolohe ana i ua nonoi la a me na mea kue ke hoikeia. F. S. LYMAN. Lunakanawai Kaapuni Apana Ekolu o ko Hawaii Pae Aina. Hilo, Mar. 24, 1885. 2018-3t.
__________________________________________
MA KE KEENA O KA LUNAKANAWAI KAAPUNI Apana Ekolu o ko Hawaii Pae Aina. Ma ka Waiwai o APO (k,) no Hilo, Hawaii, i make.
Ua heluheluia a ua waihoia ka Palapala Noi a L. SEVERANCE ka Luna Hooponopono o ka waiwai o Apo (k.) no Hilo Hawaii, i make, e noi ana e aponoia kona hoike hope, a e hooholoia ka waiwai i koe i ka poe i pili, a e hookuu iaia me kona hope.
Nolaila, ke kauoha ia aku nei na kanaka a pau, ke pili, o ka POALIMA, oia ka la mua o MEI, 1885, ma ka hora 10 kakahiaka, ma ka Hale Hookolokolo ma Hilo, oia ka la a me kahi i kohoia no ka hoolohe ana i ua nonoi la a me na mea kue ke hoike ia.
F. S. LYMAN, Lunakanawai Kaapuni Apana Ekolu o ko Hawaii Pae Aina. Hilo, Mar. 24, 1885. 2018-3t.
______________________________________
MA KE KEENA O KA LUNAKANAWAI KAAPUNI Apana Elua o ko Hawaii Pae Aina. Ma ka Waiwai o MEO (k) no Kanaio, Honuaula, Maui, i make.
Ua heluheluia a ua waihoia ka palapala noi a S. KALAOLA, e noi ana e hooponoponoia ka waiwai o MEO (k) no Kanaio, Honuaula, Maui, i make, a e maheleia iwaena o na hooilina.
Nolaila, ke kauohaia aku nei na kanaka a pau, ke pili, o ka POAHA, oia ka la 2 o APERILA 1885, ma ka hora 10 A. M., ma ka hale hookolokolo ma Lahaina, oia ka la a me kahi i kohoia no ka hoolohe ana i ua noi la a me na mea kue ke hoikeia.
ABR. FORNANDER. Lunakanawai Kaapuni Apana Elua H. P. A. Lahaina, Ma. 5, 1885. 2015-3t
_________________________________________________
MA KE KEENA O KA LUNAKANAWAI KAAPUNI Apana Elua o ko Hawaii Pae Aina. Ma ka Waiwai o KEA (w) no Honokowai, Maui, i make.
Ua heluheluia a ua waihoia ka palapala noi a Pueo (w) a me Kalawaianui (k), e noi ana e hooponopono ia ka waiwai Kea (w) no Honokowai, Kaanapali, Maui, i make, a e hooholo ia i na hooilina.
Nolaila, ke kauohaia aku nei na kanaka a pau, ke pili, o ka POALUA, oia ka la 14 o APEILA 1885, ma ka hora 10 A. M.; ma ka hale hookolokolo ma Lahaina, oia ka la a me kahi i kohoia no ka hoolohe ana i ua noi la, a me na kue ke hoikeia.
ABR. FORNANDER, Lunakanawai Kaapuni Apana Elua H. P. A. Lahaina, Mar. 20, 1885. 2117-3t.
______________________________________________
MA KE KEENA O KA LUNAKANAWAI KAAPUNI Apana Elua o ko Hawaii Pae Aina. Ma ka waiwai o IKEOLE (k) no Honolua, Maui, i make.
Ua heluheluia a ua waihoia ka palapala noi a ASAM a me KELIIPOINA, e noi ana e hoonohoia i Luna Hooponopono no ka waiwai o IKEOLE (k) no Honolua, Maui, i make.
Nolaila, ke kauohaia aku nei na kanaka a pau, ke pili, o ka POAHA, oia ka la 2 o APERILA, 1885, ma ka hora 9 A. M. ma ka hale hookolokolo ma Lahaina, oia ka la a me kahi i kohoia no ka hoolohe ana i ua noi la a me na mea kue ke hoikeia.
ABR. FORNANDER, Lunakanawai Kaapuni Apana Elua H. P. A. Lahaina, Mar. 5. 1885. 2015-3t.
_______________________________________________
NA HOOLAHA HOU.
_______________________________________________
HOOLAHA A KA LUNAHOOPONOPONO WAIWAI:---E ike na mea a pau ma keia hoolaha, ua hookohu pono ia mai ka mea nona ka inoa malalo iho i Lunahooponopono no ka waiwai o Wm. BELL, o Kohala, Hawaii, i make.
O ka poe a pau he mau koina ko lakou no ua waiwai la i oleloia, e waiho koke mai i ka lakou mau hoakaka kupono a me na hooiaio ana i ka mea nona ka inoa malalo iho iloko o na mahina eono mai ka la aku e puka ai keia hoolaha, a i ole pela e hoole mau ia no lakou.
A o ka poe he mau aie ko lakou i ua waiwai la i oleloia, e hookaa koke mai i ka mea nona ka inoa malalo iho ma kona Keena hana ma Alanui Kaahumanu, Helu 4. Honolulu.
J. AUSTIN, Lunahooponopono Waiwai o Wm. Bell March. 5th, 1885. 2014 4t
_________________________________________
MA KE KEENA O KA LUNAKANAWAI KAAPUNI Apana Elua o ko Hawaii Pae Aina. Ma ka Waiwai o KAHULIAIKAUA (k) Moakea, Molokai, i make.
Ua heluheluia a ua waihoia ka palapala noi a J. W. M. POOHEA, ka Luna Hooponopono o ka Waiwai o KAHULIAIKAUA (K) no Moakea, Molokai, i make, e noi ana e haawiia he laikini e kuai kudala ana i ka waiwai o ua Kahuliaikaua, i mea e hookaaia ai na aie @ @@ waiwai la.
Nolaila, ke kauohaia aku nei na kanaka a pau, ke pili, o ka POAKAHI, oia ka la o @ APERILA, 1885, ma ka hora 9 A. M., ma ka hale hookolokolo ma Pukoo, Molokai, oia ka la a me kahi i kohoia no ka hoolohe ana i ua noi la a me na mea kue ke hoikeia. ABR. FORNANDER, Lunakanawai Kaapuni Apana Elua H. P. A. Lahaina, Mar. 5, 1885. 2015 3t.
________________________________
OLELO HOOLAHA:--No ka mea, ua hookohuia ka mea nona ka inoa malalo iho nei, e ka Mea Hanohano ABR. FORNANDER, ka Lunakanawai Kaapuni o ka Apana Elua o ko Hawaii Pae Aina, i Lunahooponopono no ka waiwai o PEELUA (k.) o @@@, Koolau, Maui, i make aku nei.
Nolaila, ke kauoha ia aku nei ka poe a pau i aie mai ia Peelua (k) e hookaa koke mai i ka lakou mau aie ia'u; a o ka poe hoi a @@@@ elua i aie aku ai, e hoike koke mai ia'u @@@@ o na mahina eono; o hoole mau ia ka lakou mau koi ana. MAHIAI.
Lunahooponopono Waiwai o Peelua (k), Wailuku, Maui. Feb. 27, 1885 20@@@
____________________________________________
AHA HOOKOLOKOLO KIEKIE O KO Hawaii Pae Aina. Ma ka hooponopono Waiwai. Ma ka hana o ka Waiwai o Petero Wahakane, o Hilo, Hawaii, i make kauoha ole. Olelo kauoha mamuli o ke @@@@@ Lunahooponopono Waiwai no ke kuai ana i kekahi Waiwai Paa.
Ma ka heluhelu a me ka waihoia ana mai o ka Palapala Noi a W. Austin Whiting, Luna hooponopono Waiwai o Petero Wahakane i make e noi ana e kauoha ia oia e kuai i kekahi waiwai paa o ka mea i make i oleloia, e waiho la ma Hilo a me Hamakua Hawaii a e hoakaka ana i kekahi mau kumu ku i ke kanawai e ae ia ai e kuai ia ua waiwai paa la.
Ua kauohaia e hele mai na pili koko o ka mea i make me na mea a pau i kuleana i na waiwai la imua o keia Aha, ma ka Poakahi ka la 27 o Aperila 1885, ma ka hora 10 o ke kakahiaka, ma ke Keena Hookolokolo ma Honolulu, ma ia wa a ma ia wahi e hoike mai ai, ina he kumu kekahi e hoopuka oleia ai ka olelo kauoha e kuaiia ua waiwai la.
A ua kauoha hou ia e hoolahaia keia olelo kauoha no ekolu pule mamua ae o ka la e hooloheia'i i oleloia, iloko o ke KUOKOA a me ka Hawaiian Gazette he mau nupepa i paiia ma Honolulu i oleloia. Hanaia ma Honolulu, ko Hawaii Pae Aina, Maraki 16, M. H. 1885.
BENJ. H. AUSTIN. Lunakanawai o ka Aha Kiekie. Ikea: HENRY SMITH, Hope Kakauolelo 2016-3t.
____________________________________________
AHA KIEKIE O KO HAWAII PAE AINA. Ma ka Hooponopono Waiwai. Ma ka hana o ka waiwai o H. PAKEOKEO, o Honolulu, Oahu, i make.
Olelo Kauoha e koho ana i la e hooiaio ia ai ka Palapala Kauoha, a no ka hoolaha ana.
No ka mea, ma ka la 23 o Maraki M.H. 1885, ua waihoia mai imua o ka Aha, kekahi Palapala, i olelo ia, oia no ke Kauoha Hope Loa a H. Pakeokeo, i make aku la: a me ka Palapala Hoopii e noi ana e hooiaio ia kela Palapala Kauoha a e hoopuka ia hoi ka Palapala Luna Hooko ia Naneo w., ua waiho ia mai e Naneo (w) i oleloia.
Nolaila, ua Kauoha ia o ka POALUA ma ka la 14 o APERILA M.H. 1885, ma ka hora 10 kakahiaka ma ka Rumi Hookolokolo o ia Aha, ma Aliiolani Hale ma Honolulu oia ka la me ka hora, e hooiaio ia'u ia Palapala Kauoha, a e hoolohe ia ai hoi @@@noi ana mai, a me ka poe a pau i pili, e kue ana ia Palapala Kauoha, a me ka hoopuka ana i ka Palapala Luna Hooko.
A ua Kauoha houia, e hoolaha no ia mea no na pule ekolu iloko o ke KUOKOA he nupepa i paiia a i hoolahaia ma Honolulu.
Kakauia ma Honolulu, ko Hawaii Pae Aina Maraki, 23, 1885.
A. F. JUDD, Lunakanawai Nui o ka Aha Kiekie. Ikea e HENRY SMITH, hope Kakauolelo o ka Aha Kiekie. 2117 3t
______________________________________________
AHA HOOKOLOKOLO KIEKIE O KO Hawaii Pae Aina. Ma ka hooponopono waiwai. Ma ka hana o ka Waiwai o KAANAANA (K) o Honolulu a me Waimanalo, Oahu i make. Olelo kauoha e koho ana i la e hooiaioia ai ka Palapala Kauoha, a no ka hoolaha ana.
No ka mea, ma ka la 2 o Aperila, M. H. 1885, ua waiho ia mai imua o ka Aha, kekahi Palapala i oleloia, oia no ko ke Kauoha Hope loa a KAANAANA i make aku la; a me ka Palapala Hoopii e noi ana e hooiaioia kela Palapala Kauoha, a e hoopukaia hoi ka Palapala Luna Hooponopono me ia Palapala Kauoha i puka pu ia ua waihoia mai e Pelekini (w.)
Ua Kauoha ia, o ka POAKOLU ka la 2@ o APERILA, M. H. 1885, ma ka hora umi o kakahiaka, ma ka Rumi Hookolokolo @@@ Aha, ma Aliiolani Hale, Honolulu, ma ka la me ka hora e hooiaoiia ai ia Palapala Kauoha, a e hooloheia ai ia noi ana mai, a me ka poe a pau i pili, e kue ana ia Palapala Kauoha, a me ka hoopuka ana i ka Palapala Luna Hook@@
A ua kauoha hou ia, e hoolahaia no ia mea no na pule ekolu iloko o ke KUOKOA, he nupepa i paiia a i hoolahaia ma Honolulu.
Ua kakauia ma Honolulu, ko Hawaii Pae Aina, Aperila 2, 1885. L. McCULLY, Lunakanawai o ka Aha Kiekie.
Ikea: HENRY SMITH, Hope Kakauolelo. 2019 3t.
_____________________________________________
Ua ike iho au i ka hoolaha a kuu kane mare Hao, ma ka Nupepa KUOKOA, e pili ana no kuu haalele iaia; aole au i haalele e like me kana i hoolaha ai, a ke hoike aku nei au ma ke akea, o Hao ka i haalele mai ia'u ma ko u home ma Honokua, Kona. Ke hoike aku nei au ma keia pane, aole he waiwai paa a hale hoi o kuu kane mare, i akaka ai kana hoolaha no kuu haalele iaia, oia ka noho mai malalo o'u a oia no ka i haalele iho ia'u a e papa pu ana aole e hoaie a kii i kana mea kanu, ke pane aku nei au, he mana ko'u e kii a ai i @@ no e ola ai. A he mana pu no koi au maluna o na waiwai lewa a kuu kane e hoolilo ae ana.
MRS. KAWAI HAO. Honokua, Kona. Mar. 28, '85. 2117 3t*
________________________________________________
OLELO HOOLAHA
E ike auanei na kanaka a pau, ma ka la 2 o Aperila, A. D. 1885, ua hoonohoia mai @@@ e ka Hon. Abr. Fornander Lunakanawai Kaapuni Apana 2, i Luna Hooponopono no ka waiwai o Ikeole (k,) o Kaanapali i make, o ka poe ana i aie ai, a me ka poe i aie mai iaia, e hoike koke mai lakou iloko o na malama eono, a i ole pela, e hoole mau ia no.
J. A. KAUKAU, Luna Hooponopono o ka waiwai o Ikeole (k) i make. 2019-3ts
___________________________________
OLELO HOOLAHA: ----Owau o ka mea nona ka inoa malalo nei, ke papa a hookapu aku nei au i kuu pa hale a me kuu aina mahiai kalo e waiho la ma Kahaluu, Kona akau Hawaii, ma ka inoa o kuu makuakane o Malaihi, aole e hoolilo wale ia i alanui no na kanaka, a o ka mea e kue i keia e hoopii no au ma ke kanawai. Ua koho aku au ia Kanaau i hope no'u, a ua mana oia e hopu a hoopii paha me ka oiaio. NAWELU MALAIHI. 2117-@