Ka Nupepa Kuokoa, Volume XXIV, Number 11, 14 March 1885 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

BUKE XXIV, HELU II.     HONOLULU, POAONO, MARAKI 14, 1885.     NA HELU A PAU, 2015.

 

HE MOOLELO KAAO NO

Ka-Mahina Malamalama

----------

Ke Keiki Alii o ka welau anu o ke aupuni o Hinedu, ka Hiapaiole o na waoakua

kanaka ole o Puricalia, a o ka naita hoi nana i ulupa na lua huna o na powa.

----------

(Kakauia no ke KUOKOA.)

 

            I NA naita o ka pilikua muumuu e moe a make la i ka holo no kahi o ko lakou alii a me ka nui o na naita, ua eleu koke aku la no ke koa opio a pua hou ae la i kana pahi poomuku, a emoole wala hou aku la oia i kana pahi a ku aku la kekahi o na naita ma kona hono a haule iho la i ka honua; koe no hookahi e ahai ana ka pupuhi i ka naele polikua o ua lua huna nei, a emoole, ku ana imua o ke alii mumuu a hoike aku la i na haawe o ke kaumaha maluna on a a me ka make ana o ka hapanui o lakou imua o ka kakou eueu, a wahi a kahi elele ahailono i pane aku ai me ka leo mauliawa o ka weli, E ke alii e, mau kuhi mai oe he pono keia, ia makou e hoomau ana i ke alualu i kela hoa naita o makou malalo o kau kauoha, ua hoea aku la makou ma kahi e waiho ana ke kino make o ka Moi Do Palado, a he mau hiona manaohao loa ka i hanaia maluna on a, ike pu aku la makou i kekahi keiki ui e ku ana malaila me kona kapa hahai holoholona, a ma koʻu hoomaopopo i kona mau hiona a me kona kulana, me he la he alii nui oia mai ka po mai, a aole no paha kakou e lanakila maluna on a, no ka mea, i kekahi no o makou i pane aku ai me ka pau pno ole o na olelo, o ka wa no ia i lele ae ai ke poo o ekolu mai ke kino ae iloko o ka imo ana a ka maka, a koe makou ekolu--huli like ae la makou a holo mai nei, a oiai makou e holo ana, me ka palanehe ua koa opio la i kuwala mai ai i kana pahi pepehi holoholona pokole a make aku la he elua o makou e holo pu ana a koe mai au he ahailono no ka pilikia. Ua make loa lakou, a aohe wahi pu-a hanu ae.

            I ka lohe ana o ke alii powa muumuu i keia mau hoakaka a ka ahailono ua lelele ae la oia iluna a pane ae la. Ina he ikaika kona i oi ae mamua o ke olai, ka mea hookahi i hiki ke hoonaue ae i ka honua holookoa, a e like me ka anapu ana a ka uwila ka mimo o kana mau hauna pahi, alaila, e hiki no iaia ke kulai mai i kuu ikaika iloko o ke apuepue ana, aka hoi, in a ua emi iho kona ikaika, kona mana, me kona akamai malalo iho o kuu mau apahu lima, alaila, e ike auanei ia i ka weluwelu liilii o kona mau iwi poo, a hu mai kona holo, he aila hoopahee ia no kuu poka ume. Ua kaulana mai la hoi oia no ke akamai lua ole ma ke ana pahikaua ana, aka, nana auanei paha e hoala i ka moe lolii ana o kuu pahikaua nui e waiho ae nei, a e hookaakaa ia hoi kona mau maka iloko o kona puuwai, a puka mai kona koko, he ai na kuu mau ilio ono koko. Ina he akamai hahau hewa kona, alaila, eia ae no kuu newa nui a kuu kupunakane kuakani mai, a o ka laau hoi i pau ai na poo o na naita o ke aupuni o Belegiuma a me Holani o ka nahoahoa. E ike ana ua opio hookano la i kona hopena awahua ma o ka huini la o kuu pahi, a e halawai koke auanei kona uhane me na tausani o na tausani uhane e hele ana ma ke alanui panopano o ka make mau loa.

            Aole no i pau pono ae na olelo ana a ua alii muumuu nei, ikeia aku la ka holo paukiki ana mai o elua mau kiai a pane mai la me ka leo pihoihoi: E ke alii, o ka mea a kakou e upu aku nei e hakoko pu me ia me ka oi o na mea kaua, ua ike aku nei maua eia ae oia a hoea mai. Ia wa no i eleu ae ai ua alii ia a hoonohonoho aku la i na naita me he kikiao makani la, a e onoonou ana i na alakai e komo ae kela me keia e nalama i kona mahele iho; a oia lakou e puapuahulu ana me ka pihoihoi nui o na tausani naita, ua ku ae la lakou ma na laina me na maka e aloalo ana mao a maanei. Ikeia aku la kekahi naita e hele ana mamua o ka mahele mua a i kahiko iaia iho me kekahi aahu ulaula a mahope on a e ukali ana kekahi naita. Ma keia hoonohonoho ana, ua ikeia he ehiku mahele malalo o ke alakai ana a kela me keia naita pilikua, a o ka walu o na mahele malalo no ia o ke alakai ana a ua alii powa muumuu nei, a ma ka elima haneri naita o ka mahele hookahi, a o ko ke alii mau naita he poe helu ekahi wale no ma ke kaua, a e ku ana lakou me ka makaukau no ka hoolilo ana i ko lakou hoa paio i mea ole imua o lakou, a pela no ka haawina i loaa i kela me keia mahele pilikua.

            (E waiho aku kakou i na naita ihukani o ke alii muumuu e ku ana ma na laina, a e haka pono ana na maka no ka enemi, a e nana aku kakou i ke koa opio a me kona ukali pilikua e hele nei e hui me na enemi) Hoea aku la ke koa opio ma kekahi kahua molaelae e ike aku ai i na enemi, a ike aku la oia i ka nui o na enemi e ku laina mai ana, hoomau aku la oia i ka hele ana a ku iho la mamua o ka mahele mua ma kahi ano mamao iki mai. Ku iho la oia me ke ano haakei ole, e haawi ana iaia iho e make no ka pono, a e mauna ana i kona nani iloko o na lima kakauha o na pilikua o na lua huna o Heletela. Iaia i ku iho ai imua o ka mahele mua, ua pane aku la ke alakai o ua mahele la i ke koa opio, E ka lalau i hele hookano mai e lawe i ko makou home me ka lima pakaha wale, a i hoao e hoike i kona ikaika iwaena o na pilikua iwikani o Heletela, ano, e makaikai mai i ko makou kulana a me ka lehulehu e ku aku nei, a noonoo iho, in a ua oi ae a ua emi iho paha kou ikaika, alaila, eia wale no kau e panai mai ma kou aoao, e kaua mai in a he ikaika, a e haawi pio mai in a he nawaliwali a makau wale.

            I ka lohe ana o ka kakou koa i keia mau olelo, ua pane aku la oia me ka leo malie, Auhea ko oukou alii e keia mau iloko kawa-u?--F.! mai hoololiahili wale i kau ninau a mai hoao e pane hou ae i hookahi leo, he oiaio no e make oe e like me ka make ana o na mamo hookiekie o Belegiuma me Holani, wahi a ke alakai. E paa kou waha i keia sekona, a mai hoao e pane hou i hookahi leo, wahi hou a ke alakai. No keia mau olelo hoonaukiuki i pae mai i kona mau pahukani i hoopii malie ae i ka wela o kona inaina me ke akahele, a holo puni ae la ka ula ohelohelo o ke koko ma kona mau papalina; oni ae la kona mau io paahana, pehu ae la kona mau aa koko, hulili ae la hoi kona mau maka, a emoole, puni ae la kona kino i ka wela inaina. Paa ae la oia i kana pahi ma ke kumu, unuhi ae la oia me ka palanele loa, a owaka ana kona maka hulali i ka malamalama o ka la; hopu hou iho ia oia i ke kumu o kana koi kaua, a paa ae la ma kona lima hema, a ku iho la me ka makaukau a me ka pane leo ole no hoi. Ike mai la ka enemi i keia kulana wiwo ole o ka kakou eueu e ku aku nei imua o lakou, a na ia me ahoi i hookau e aku i ka weli o ka make maluna o kekahi hapa o ka mahele mua e huli pono ana i kona alo, a he wa hoi ia no na pilikua e emi hope ana oiai na alakai e hookikina ae ana i na mahele e lele poipu aku maluna o ka opio, a iloko o na hookikina ana i lele kaua aku ai kekahi hapa o ka mahele mua, aka, ua hao mai la ka ikaika o na hauna pahi a ke koa opio, a ahu mokaki iho la malalo o kona mau kapuai wawae, a e kahe ana ke koko o na naita pilikua me he muliwai nui la.

            He wa keia i hoolaaia ai ke koa opio no ka hookahe koko, oiai ua laahia loa kona kino i ke kau ana mai o kekahi mau alina maewaewa a manaheu iki ae hoi i na hauna pahi a me na maka koi a ka enemi e haule makawalu ana maluna on a, a he mea haohao loa i na alakai o ka enemi ke ahu a lala kukui o ko lakou mau koa, a me ka nahaha liilii o na kuea o ka enemi i hoonohonohoia ai, me he la, ma ka lakou hoomaopopo iho, aia iwaena o ko lakou mau mahele naita pilikua he lehulehu wale na naita o ke koa opio e paio nei iwaena o na enemi no ko lakou puehu liilii, aka, aole pela e na makamaka hoinainau o keia nanea, o ke koa opio hookahi wlae no keia e luku nei i na enemi me ka puahi nui, a e alo hookahi ana hoi i na elele a ka make e hoonou ia aku ana imua o na me ka makawalu. Nana aku la ka ukali o ka opio iwaena o na enemi, a me he waikahe la ka iho makawalu o na hauna pahi a me na koi a ka enemi maluna o ka naita opio, a me he ahi la hoi na hauna pahi a ka eu o Inia e holapu ana i kekahi puu opala nui, a e like hoi me na lau maloo o kekahi kumulaau nui ka helelei i ka wa a ka makani e lu ana ka nui o ka poe i make i na hauna koi a ke koa opio. Ike ae la na alakai o ka enemi i ka puehu a nahaha o na laina kuea i hoonohonohoia ai, nolaila, ua hoao ae la lakou e hoonoho hou i kuea mai na naita i puehu liilii i o a ianei, aka, ua pau lakou i ka hoohokaia, oiai lakou e holo ana no ka imi ana i wahi e pakele ai.

            Komo loa aku la ka luku ana a ka naita opio i ka eono o na mahele e hookahua ana ma kekahi wahi ano kiekiena, a o ka mahele keia o na enemi i manao ai, ilaila e pahua ai ka eleu a me ka ikaika o ka kakou eueu, aka, ua komo aku la ke koa nona ka lanakila iwaena o lakou, a he mau minute pokole wale no ia i ulupaia iho ai e ka eu a ua oki oe e kakaa ana na apahu kino a me na poo mailuna iho o ua kiekiena la, a na ia mea i hoomaeele aku i na puuwai pakahi o na naita a me ko lakou alakai o ka hiku o na mahele e ku laina mai ana malalo aku o ke kiekiena i hoomoanaia e ke ono o na mahele, a na ia pio ana no hoi i houilani loa aku i na manao ke alii muumuu e hui pu me ka kakou olali oiai oia e nana mai ana, a o ke ano eehia hoi o ka makau ka i hookahuaia maluna o kona mau naita helu ekahi wale no i wae ia.

            Ku iho la ka naita opio maluna o ua kiekiena nei e kali ana i ke koena o na enemi no ka hui hou ana mai me ia iloko o ka enaena o na mea kaua, aka, ua hoopuiwa koke ia oia i ka puliki ana ae o kekahi mau lima ma kona wawae, a iaia i alawa iho ai, ike iho la oia i kona ukali malalo on a, a e paa ana me kekahi omole laau a kona ukali pilikua e paa nei, a o ka mua loa hoi o na pilikua i haawi pio malalo o ka naita opio. Ae, e haohao ana no oukou, aka, e kala mai i ka mea kakau no kona hoaiai mua ole aku, a molaila, e hoike pokole aku ho au ia oukou penei:

--------------------

KA MOOLELO KAAO O

Kahanuopaineki,

Ke keiki alii o ke aupuni o Italia

Ka Olali o na Waoakua o Arabia,

Ka Naita nana i kuekaa na lua

huna o na Powa.

---------

            I NA moku e olali nei iluna o na ale kawahawaha o ka moana, oiai hoi ka makani e pa ikaika mai ana, a ke pii mahuahua mai nei hoi na leo huhu o ka ino. Ma ka po iho o ka lua o ka la a na moku e holo nei, ua ike ia kau la kela a me keia ano kukui e aa mai ana ma kela a me keia wahi a puni na moku o na Moi o Rusia a me ka alihikaua o Kahanuopaineki, a e hoomalamalama ana hoi i ka ili hualala o ka moana; a o keia mau kukui hoi, no na moku no ia o kela a me keia aupuni, a e lawe ana hoi i na keiki alii, na Moi, ka ohana alii, na makaainana, a me na puali naita, a pela pu hoi me na kaikamahine alii; a ke upu mau nei hoi ko lakou manao o ka hiki koke i Arabia e like me ka hoolaha a ke alii opio Kahanuopaineki. A i ke kakahiaka nui o ke kolu o ka la, ua ikeia aku na aumoku e nee mai ana i ka moana, a e welo ana hoi na hai kalaunu ma ka huini o na kia, a e kani ana hoi na leo hooho o ka hauoli, a i keia wa no hoi i ikeia aku ai na kakai mauna o Arabia. Oiai na aumoku e nee nei imua me ka malie, pa kolonahe mai la he wahi makani mai ka akau mai, a o ka wa keia i hao ae ai kela a me keia kapena i kona ike holo moku, aka he like wale no, oiai aole i oi aku kekahi a aole hoi i emi mai kekahi, aka he hookahi no ka nee papa like ana. No eha hora o keia holo ana, ua ahuwale ke kulanakauhale alii o ka ui Pua Rose o Arabia, a no ka elua hora hou, ua hekau aku la na aumoku i ke awa. I ka makaukau ana o na alii e lele i uka, aia hoi na kaa alii e ku makaukau mai ana no ka hookipa ana kau i na alii o kela a me keia aupuni. I ka hiki ana aku o na alii a me na tausani o na makaainana i ka hale alii, ua haawi ia he wahi kaawale ko na Moi, na ohana alii, a pela hoi na keiki alii a me na kaikamahine alii, a me na makaainana. A o naita hoi, ua huna loa ia lakou ma kahi paa, me ka ike ole ia mai e kekahi.

            No na keiki alii hoi, ke ninau aku a ninau mai nei lakou: Auhea la hoi o Kahanuopaineki a me ka Ui Pua Rose o Arabia nei, o ka ike lihi wale aku no ka hoi la i ka nani i kaulana a puni ke ao, hoi pono iho ka manao a lana malie. A o keia mau hana no hoi i na alii kane, ua kau aku no hoi ia haawina hookahi maluna o na aliiwahine opio, me ke aku nui e ike, aka, aole i hooko ia ko lakou mau kuko ana, aka nae hoi, e ike ana no lakou ke hoea mai ka la e mare ia ai lakou. Auhea oukou e na hoa heluhelu o keia ilihia kaili puuwai, o ka la e mare ai o na Moi opio, oia auanei ko kakou wa e ike ai a e lohe ai hoi i ke kapaia ana o ka inoa o kahi aikane a Kahanuopaineki, a mai kuhihewa o kekahi poe. I ke kokoke ana mai o ka manawa e mare ai, ua ikeia aku na Moi (na makuakane) a me na makaainana o Arabia e hoomakaukau ana i na mea a pau e pono ai no ka la mare me ka hoolako pono ana i na mea ai a pau o kela a me keia ano. I ka lawa pono ana o na hemahema a pau no ka la e hiki mai ana, a oiai ua kokoke mai ua la nei, ua kauohaia aku la na alii hanau o ka aina, na maka hanohano, na lede maka palupalu, e hele mai lakou ma ka hale alii e hoomakaukau ai i ko lakou mau aahu no ka ukali ana aku i na alii opio. I ka hiki ana mai o ka minute e hookau ia ai ka inoa laahia o ka mare maluna o na alii opio, ua ikeia aku la he mau huakai nui e oili mai ana maloko mai o na ululaau, a e kamoe ae ana hoi lakou i ka pa alii.

            O keia la, he la nui no Arabia, a oiai na ao kaalelewa ua auhee aku i na kukuna malamalama o ka la, a ua hoike mai hoi na kuahiwi, na puu, na awawa a me na kualono i ko lakou nani uliuli, a o na pua aala o ka waokele, e haawi mai ana i ko lakou moani onaona, a ua puia hoi ka hale alii i ke ala kupaoa o na mala pua e hoopuni ana i ka pa alii. Ua hoonohonohoia na tausani o na naita a mau hiena hoi o na mauna hui ma na kihi a pau o ka hale alii, a e kiai makaala ana hoi lakou no na poino e hoea mai ana. I ka makaukau ana o na paa mare o na alii opio, ua hoomaka mai la ko lakou nee ana no kahi i hookaawaleia no lakou e mare ai. I na paa mare e hiki aku ai ma ka puka, kahi hoi a na Moi a me na kaukau alii e ku ana, me ka makaukau no ka haawi ana mai i na hoomaikai, a o ka lehulehu holookoa hoi ua hoopuiwa ia lakou i ka lohe ana aku i ka leo o na makaainana e mele mai ana i na mele i haku noeau ia e lakou, a iloko hoi o ka ikuwa o keia mau leo, ua poha mai la ka leo o na mea kani e mele ana i ke mele lahui o Arabia. I keia wa no hoi i ku iho ai na alii opio ma ka lanai me ko lakou mau ukali he 50, oia hoi na keiki alii a me na kaikamahine alii i waeia mailoko mai o ka ohana alii o ka Ui Pua Rose a me ko na aupuni e ae i hiki mai, a oiai na alii opio e ku ana me ko lakou mau aahu nani i loaa mai na o kahi buke kupua a ka eu Kahanuopaineki, oiai e anapa mai ana na mea nani o kela a me keia ano maluna o ko lakou mau kahiko, a he nani maoli no. A maluna hoi o ka umauma o ua mau opio nei, e kau naa na hoku daimana a me na hoailona e hoike mai ana, he mau alii nui no Arabia a me kekahi mau aupuni e, a o ka oi aku nae iwaena o ka paa mare, o ka hiehie a me ka maikai o ke kulana o ke koa opio.

            I ke kuu an aiho o keia mau leo hoomaikai a ka lehulehu, ikeia aku la he eha mau keiki alii e ku ana a e paa ana i ke kalauna o Arabia, a he eha no hoi e paa ana i ke kalaunu o Rusia. Iho aku la ka huakai o na paa mare ma ke alanui e hiki aku ai i ke anuu e pii aku ai i kahi e mare ia ai, ua haawi hou mai la ke anaina he mau leo huro o ka hauoli, i panai pu ia mai me ka leo hone o na mea kani. I ka hiki an aaku o ka huakai ma ke alanui e hookee ae ana no ka rumi mare, aia hoi ke alii powa Kono Giliko, ka Ilamuku nui o ka la, e ku ana me kona mau naita me ka makaukau pono i na mea kaua, a e malama ana hoi i ka ihiihi kapu o na Moi opio; a ma keia alanui, ua uhiia me ka lole veleveta nai, a o keia ke ala a ka huakai o na paa mare i pii aku ai no ka rumi i hoomakaukauia no lakou. I ke komo ana aku o ua mau opio nei, i ukaliia hoi e ko lakou mau kaukau alii opio, ua ku mai la ka Bihopa nui, a o ka wa no hoi ia i poha mai ai ka leo o na mea kani o na ano like ole, a poha pu mai la no hoi na leo hoanoano o ka papa himeni. I ke kuu ana iho o keia mau leo ilihia, o ka wa no ia i poha mia ka leo o ka Bihopa me ka haalulu, oiai ua kau aku la ke anoano ilihia maluna, i ka i ana mai; "Na ka Mana Lani e kokua mai i na alii opio."--Ma ka inoa laahia o ka Mea Mana Loa, ke lawe nei olua e na aliikane i na aliiwahine, a ke hoolilo nei hoi oukou i io hookahi, nolaila, e malama i ka laahia o ka inoa hanohano i loaa ia oukou i keia la." A iloko hoi o na kamailio ana a me na hoopuka ana a ka Bihopa i kekahi huaolelo, e hiolo mau mai ana hoi kona mau waimaka, a hiki wale i ka hookuu ana. A ua kapaia hoi kahi aikane a Kahanuopaineki, "Ke Keiki Alii Milena."

            I ka hoi ana aku o na alii opio mahope iho o ko lakou hoohuiia ana ma ka berita mare, a i ko lakou hiki ana aku ma ka puka, ua haawi mai la ke anaina i na leo huro ekolu, a kupinai mai la na leo o na mea kani a na kaikamahine alii a me ka poe no a pau i akoakoa mai, a iwaena hoi o keia anaina nui e hauoli nei a e lealea ana hoi no ka la mare o na alii opio, kekahi kaikamahine alii i hoopuka ae i kekahi mau huaolelo waipahe me ka minami na nui no ka kakou opio i lawe lilo ia aku la e ka Ui Pua Rose, ka mea hoi nona ka nani elike me ka onohi o ka la. Oiai ua mau opio nei i puka mai ai me ko lakou nani kilakila, a ua hoike mai la hoi ka nohenohea o ko lakou mau papalina imua o ke anaina, he mea e ka ha-i malule o na kaikamahine alii o na aupuni a pau i ke koa opio, a o keia kaikamahine hoi i hoike mua ia ae nei, ua puoho e wale ae la no ia a pane ae la: "A hoi au i koʻu aupuni, e hoala no au i ahaaina nui lealea, a i ahaaina hoohakakak hoi o na moho ikaika o ke ao nei, alaila e kauoha mai au ia oe a me kou mau naita e hele ae i koʻu aupuni. A i kou wa e hiki ai i koʻu aupuni, naʻu ponoi no auanei e kii mai ia oe maluna o koʻu kaa alii, a e halawai auanei kaua he maka a he maka, a lilo loa no hoi oe iaʻu e pono ai, a o koʻu wa auanei ia e ike ai ia oe holookoa, a o ka hooko ia ana hoi ia o na iini ana a koʻu puuwai nou e ka nani o na mauna hui, ka mea hoi a kaulana ma na welelau a puni ka honua." Nolaila, e na hoa heluhelu o keia nanea, e kali kakou no ka manawa, malia e ko ana paha na manao kuko o keia kaikamahine alii, aka, ke puana ae nei na lima hana, e ko no auanei ia mau iini on a, ke loaa ka hoalu ana iho i nei mau wahi hua mele:

            "Ma ko you poli no au, poli no au,

            E hoonipo ai, e sleep iho ai;

            Kani kahi aka hene iki o iala,

            E koʻukoʻu ko puu ke mo---ni."

            I ka hiki ana aku o na paa mare ma ka papaaina, a oiai ua hoopiha ia me na mea ai no ka hoopiha ana i na houpo lewalewa, aka o na kii onohi o na mea a pau ua hoolele mau aku lakou maluna o na alii opio, a o ka nani a me ka nohea o na papalina a me ka uliuli poniponi o na maka o ka opio puuwai ahi, he mea ia e hoouilani mau ana i ka manao o na kaikamahine, a pela pu no hoi me na keiki alii, ua hoolelel mau aku no hoi lakou i ko lakou mau lena ike maluna o ka ui o Atabia a me ka Wehi o Rusia, a ua hoolilo mau hoi keia poe alii i ka hapa nui o ko lakou manawa ma ke kamakamailio ana no na alii opio, me ke kuko mau ana e loaa la hoi kela mau pua, aka, o ka hoka a me ka nele ka i loaa mai. Ua ai a ua inu a kena. Pela mau ko lakou ai ana me ka hauoli, a e lohe mau ia ana hoi na leo o na hoa ai e puana mau ana i na huaolelo hoohiluhilu, i ko lakou wa e inu ae ai i na kiaha waina, "E ola, e ola mau na alii opio i ke akua." Ua malamaia keia la me ka hanohano nui, oiai na have kalaunu e pulelo haaheo ana i na aheahe makani, a no lakou hoi na waihooluu like ole. A i ka uhi ana mai o na eheu o ka po maluna o ka aina, ua malamaia he anaina hulahula, a ua hoike mai la hoi kela a me keia keiki alii a me na kaikamahine alii i ko lakou ike hula, a pela wale no hoi lakou i apa ai a hiki wale i na hora o ka wnaao, a no ka nui maluhiluhi o ke anaina i ka hooopo a ka waiona, ua pau loa lakou i ka hiamoe kulipolipo me ka ike ole ae i ka mea e hana ai, a o na alii opio hoi ua hoi aku la no ko lakou mau rumi, a o ka hookoia ana hoi keia o ka lakou mau hoohiki ana.

------------------

            Iloko o na helu o keia mua aku o na moolelo Kahanuopaineki a me Mahina Malamalama, e komo loa aku ai kakou i loko o ka loa me ka laula, ka naele me ka hohonu, ka nani me ke kiekie, ka nanea a me ka hoinainau maoli, a no Keaomelemele hoi, ke aneane aku nei kakou i kona hopena, a e pani ia ana ma kona hakahaka he nanea nani hou.

-----------------

HE MOOLELO KAAO NO

K E A O M E L E M E L E.

--------

-----KA PUA NANI IUIU O-----

 Kealohilani, Kahiapaiole Nuumealani a me Kuaihelani; ka mea nana i uneune ia

KOnahuanui a kaawale o Waolani ka aina

o ka põe eepa a pau i noho ai.

--------

Hoopukaia e ka Haku Moolelo kaulana

Mose Manu no ke Kuokoa.

 

            Hoa no a pau na olelo a Kamooinanea o ka lele koke mai la no ia o ua o Kilikilipua mai luna mai o Kealohilani a hiki ana keia ma kahi a Kaulanaikipokii e holoholo ana ma kahakai, a no ka wa pokole loa oia i kahea aku ai penei: "E ka leho i kai-uli i kai-ele i kai-hoee i kai mimiki la--e pii." I loa no a pau ke kahea ana a ua moo nei, he manawa ole, paka-ki ana keia ka manawa a ua walu leho nei i wa-hi ae ai a lilo i mea nui, e pau pono ai laua nei ke noho iho; ia kau ana iho no o laua nei, o ka niau aku la no ia o ua wahi leho nei; me he mea la, he mau minute helu wale no, o ka loaa mai la no ia o na waa o Kaumailiula ma e hookomo ana i ka nuku o Mamala.

            I NA waa o Kaumailiula a me Kahanaiakekua e hookomo aku nei i ka nuku o Mamala, aia hoi ka punohu ua koko ke uhi paa la maluna o na waa, a me na kilihune na kualau o ia kakahiaka nui ke pehi la i ka ili o ke kai aloha o Mamala, kahi o kekahi mau lalani mele a ko kakou Lani Moi i haku ai, a oia hoi keia:

                        "A waho o Mamala,

                        Hao mai ana ehuehu,

                        Pulu au i ka huakai,

                        Kai heahea i ka ili."

            Ke uwa mai la ka pihe o uka o Kou, a ke olowalu mai la na leo kupinai o na eepa o Waolani, aia hoi i kela wa me he la ua puhiʻa o luna o Waolani i ke ahi, aole he wahi kaawale ka ua mea o ka pipio o ke anuenue, a ke makaukau mai la hoi na menehune e iho mai a hapai aku i na waa o lakou nei, a ua maopopo ia Kane ma keia mau mea a me ko laua kaikuahine. Aia o Keaomelemele i Hawaii me Paliuli ma ia wa, aka ua ike mai la no oia i ka hiki ana mai o kona mau kaikunane ma Oahu ia manawa.

            Aole he wahi noonoo iki iloko o Kaumailiula a me Kahanaiakekua eia ko laua muli kaikuahine mahope mai o laua. Aia nae ia lakou e hookomo ana iloko o ka nuku o Mamala, aia hoi, pakaki ana keia leho manae ae o ka boe maihole, a no ka maopopo ole o ka hana a keia leho ia lakou e ike aku nei, a ua paa iho la hoi ke awa i ko lakou nei mau waa, nolaila, ua kupu ae ka manao iloko o Kaulanakipokii, aole on a manao e hookiekie aku maluna o ko lakou mau kaikunane, a no ia kumu kona holoo ana ae ma kahi e e pae ai, a oia ke kumu o ke kapaia ana o Keawalua, o kahi ia a Kaulanaikipokii i pae mua ai a oia mau o ia inoa a hiki i keia wa. A he mau inoa kaulana keia no ia mau wahi elua, o ka nuku o Mamala a me Keawalua a me ka nalu o Puuiki malalo ma ka aoao e pili la i ka Mokuakulikuli, kahi e ku nei o na halemai hebera. I ke kokoke ana aku o na waa o lakou nei e hiki aku i Ulakua, ma kahi e ku nei o ka hale ipu kukui ma ke awa ku moku, ma ke kai aloha o Kuloloia, aia hoi, ua lohe hou ia aku la na leo pihe uwa o na poe menehune a me ka poe na-mu na-wa e ikuwa mai ana i uka o Waolani, nolaila, i puana ae ai na paahana i kekahi o na lalani mele o na Hulilua a Paoa,

                        Ke ikuwa mai la i ka uka o Kaliu

                        Ke ooki mai la i ka hale a-mo-ka,

                        Piko i ele ua-i ele ao,

                        I ka wai la e Haakula manu--e,

                        Pele--e.

            I ka wa i loheia aku ai keia mau leo ikuwa o ua poe eepa nei o Waolani, a he wahi meha ana iho ma ia hope, ua ikeia aku la ka makamua o ua poe menehune nei e iho mai ana ma ke kualapa palahalaha maluna aku o Puunui, a iho mai la a hiki ma Ulakoheo, o Kaumailiula a me Kahanaiakekua. Oiai lakou e ku malie ana, me ka pane leo ole a me ka hoolohe i na olelo kauoha a Kane ma, i ka manawa no i hiki pono aku ai o ua mau waa nei, o ka wa no ia i lalauia iho o mau waa nei e ua poe menehune nei, a hapaiia ae la iluna me kanaka no a pau loa; a ua lilo ke kaumaha i mea ole ia lakou. Ia lakou e hapai ana, ua uwa ae la ua poe menehune nei, a i ka lua no o ka uwa ana hele ana i uka o Puunui; a i ke kolu hele ana iluna ae o Hanaiakamalama; a i ka ha a me ka lima hiki i Waolani; a me ka maikai na malihini i hookipaia aku ai.

            Ia Kaumailiula e hahai ana ia Kane ma i na mea a pau a Kahanaiakekua i hiki aku ai ma Kuaihelani, aia hoi, malu ana keia mea me he ao la, mamua pono o ka puka o ka hale. I ko lakou nana pono ana ae, eia ka o Keaomelemele; oia hoi kona hoi ana mai, mai Hawaii mai. Iaia e ku ana, pane mai la oia ia Kane ma a me Keanuenue e hoomakaukau i hale okoa nona, a ua aeia kona makemake. Kauoha aku la o Kane ma i ka poe menehune e hana i hale, he manawa pokole paa ana ka hale; a oia no ka mea i oleloia ai keia poe "He pupukahi wale no ka hana ia lakou." I ka lako ana o ka hale i na mea hoonani he nui wale, ua hoi aku la o Keaomelemele a noho iho la iloko o laila no ekolu anahulu, me ka ike ole ia Kaumailiula iloko o ia mau anahulu ekolu. Iaia nae e noho nei maloko o ua hale la, me ka hele ole mai o kekahi mea e ike i ke ano o kona noho ana maloko o ua hale la, ua hoomaka hou oia e hoomaamaa i kana hana i ao ai he hula. Nolaila, e waiho iki kakou ia lakou, a e nana ae hoi kakou ia Kaulanaikipokii, ka mea nana i holo mai me ka uleu a me ka lanakila maluna o ka leho a hiki ma na aekai aloha o Kuloloia, a me kona hiki ana mauka o Waolani. Ano ka manawa a kakou e olelo ai no ua wahi eueu nei o Nuumealani.

            I ka manawa i pae aku ai o Kaumailiula ma me ko lakou mau waa ma Kapapoko, a hapaiia ai e na menehune i uka o Waolani, aia hoi, ua pae aku la keia me kona wahi hoa hele me Kilikilipua ma Kakaako; a ia laua i pae aku ai malaila, ua hoi ae la ua wahi leho nei a uuku loa e like me kona mau. Ia wa i lalau iho ai o Kaulanaikipokii i ko laua wahi waa leho i holo mai ai, a paa ae la ma kona lima a o ko laua nei hele mai la no ia ma ia ae one a ma ia wahi mai, ike iho la ua Kaulanaikipokii nei he mau i-a aholehole elua, e holo ana ma ka aekai, o kona lalau iho la no ia a paa ae la ma kona lima, a haawi aku la oia i kona kokoolua. A no keia mau i-a i kapa ai o Kaulanaikipokii ia Kaholoakeahole e o nei a hiki i keia wa.

            Ia laua i hele aku ai a hiki ma ka pa o Mahuka i make aku nei, mauka iho o Honokaupu; ma keia wahi i olelo ae ai o Kilikilipua ma ka inoa o Kamooinanea i wahi hoailona e hookau iho maluna o Kaulanaikipokii; i loa no a pau keia olelo a ua moo nei o ka iho la no ia o ka ua koko a me ka punohu a uhi ana maluna o laua nei, a ike mai la na kanaka o ia wahi i keia wahi kaikamahine uuku ui launa ole e hele ana iloko o ka ua koko a me ka punohu, a no ka nonoula o ka ua i ke awakea a me na kilihune ua liilii, nolaila, ua kapa hou no ua wahi eueu nei ia wahi o "Kauanonoula," a ke mau nei no ia inoa a hiki i keia wa. I keia wahi i hoanoe ae ai ua moo nei i kona kino, a hookau ae la ia Kaulanaikipokii maluna on a, a emoole noho ana ia uka o Nuuanu; a hookuu aku la i na i a, a pii aku la laua nei a hiki maluna o Waolani, a hiki aku laua malaila, hookokoke aku la laua nei ma kahi o ka hale o Keaomelemele e ku ana, me ka ike ole ia mai e Kane ma.

            Ia laua nei nae e noho ana mawaho olaila, ua lohe aku la nae laua i ka leo hula o Keaomelemele, a no keia manawa, ua loaa he haupu ia Keaomelemele, me he mea la aia he kanaka mawaho e noho ana, a ua kau e aku la ka haliʻaliʻa iaia, nolaila, ua kupono paha keia mau lalani mele o Keikeikai i haku ai na ʻLii i keia mele o keiki i kapaia kona inoa a Keikeikai, oia hoi ka ike ana o Kamehameha I, me ke ʻLii o Kauai me Kaimualii, ma ke kai aloha o Mamala, a oia iho keia malalo iho:

                        "O oe no paha ia e ka lau o ke aloha,

                        Oia no paha ke kau mau nei ka haliʻa,

                        Ke haliʻaliʻa mai nei na maka,

                        He manao hiki mai no paha uanei."

            (E ka mea heluhelu, aole keia o ka Keaomelemele mele i oli mai ai, aka, ua lawe mai ka mea kakau moolelo a hoopili aku ma kahi o ka haliʻaliʻa, a he mea e hiki mai ana.)

                        Aole i pau.

 

247-8181