Ka Nupepa Kuokoa, Volume XXIV, Number 2, 10 January 1885 — Leta Nuhou o Kona. [ARTICLE]

Leta Nuhou o Kona.

Koena mai ka aoao eha. HALANAIA E KA WAI. Ma ka ua o ka la 19, ua komoia e ka wai ka hale o Henry Kekualo, a ua hoolana pu ia o loko o ua hale la, a ua pulu na wahi opeope o ua pepeiao eepa la. Ma ka olelo mai a kekahi poe, aole i ikeia kekahi wai nui mamua aku nei e like me keia.

HILAHILA OLE MAOLI. I kela mau la aku nei, oiai kekahi haole malihini mai Waikapu, Maui mai, o J G kona inoa; a i kona mau la e hookikahakakaha ana i na kapakai o Kona, a he hoa hele hoi kona, he keiki Hawaii oiaio oia no Kona Akau nei. He keiki loihi oia, he ili kou a lauoho lau nui, he ku i ka hiehie hiona ke nana aku. Ua mare oia i ka wahine opiopio, a ua hanau mai na keiki na laua. Eia kana hana hilahila ole i hana ai: I kekahi po, hele aku nei oia e huli i wahine na keia haole malihini, a kii aku nei oia i kona kaikuahine ponoi, a na ko lakou makuakane i hoohoka mai i ka manao lapuwale o kela keiki.

He po mai no mahope mai, kena aku nei oia i kana wahine mare ponoi, e hele e moe rae ka haole malihini, me ka olelo aku, ina aole oe e hele e moe me ka haole, eha oe ia'u. Eia nae, aole i hooko iki kela wahine i ka manao daimonio o kana kane. Mahope mai no, hoao hou oia e hoomoekolohe i ke kaikaina o kana wahine, a me ka wahine a kona hoahanau, a ua hoka wale no oia imua o keie poe a pau. Auwe ! keia keiki opiopio i kuai i kana wahine no ka waiwai popopo wale ! He mea hilahila loa i na kane e hana ana i ka lakou mau wahine pela. Aole paha he uhane noonoo iloko o keia kanaka ui a maikai ke nana aku. Aole anei oe i ike ika olelo a Solomona i i mai ai "O ka wahine noho pono, he papale alii ia no kana kane."

A maluna o keia mau wahine ko'u mahalo piha loa ana, i ko lakou ae ole ana i ka hoowalewale a keia satana nui o ke ao nei. I loheia keia mai kana wahine ponoi ae, a me ke kaikaina o kana wahine.

Ma keia hapa o keia leia mea hou, ke hoopuka nei makou ma ke ano he mea hou, a aole makou i ike maoii i ka oiaio o keia mea.