Ka Nupepa Kuokoa, Volume XXIII, Number 49, 6 December 1884 — Page 2

Ka Nupepa Kuokoa

KE KILOHANA POOKELA NO KA LAHUI HAWAII

 

Ka Nupepa Kuokoa

 

No ka Makakiki    $2.00

No Eono Mahina    1.00.

 

KUIKE KA RULA.

 

Poaono    Dekemaba 6, 1884.

 

OLELO PAIPAI.

    Ua hooholo iho nei ka Papa Hawaii e haawi i umi dala makana i ke Kahunapule Hawaii nana ka eo ma ka haku ana i kekahi palapala liilii e pili ana i ka pono o ka hele mau ana i na halawai haipule.  A penei na hoolaha ana:  Aole e oi aku ke kakau ana mamua o eha aoao kalana loihi.  A e hooiliia mai keia mau palapala ia Rev. C. M. Hyde D. D.,  Lunahoomalu o ke Komite Pai Palapala, mamua o ka la 15 o Ianuari, 1885, me ke kakauinoa ia e ka mea nana i haku.  A na kela Komitc e hooholo i ka palapala i oi ka maikai, a mamuli o ia hooholo ana, e haawiia ka makana i oleloia maluna.

 

A. O. POLEPE.

Kakauolelo.

 

Na Alanui.

    O Kekahi o na pono nui o ka lehulehu, oia na alanui, a he kuleana. no hoi ko ka lehulehu e hoohalahala ke malama pono ole ia na alanui kahi o lakou e heleai a e halihali ai hoi i ka lakou ukana.  Ua loheia mai na hoohalahala no kekahi mau alanui ma kekahi mau apana kuaaina o na moku.  Ma ka mokupuni o Oahu nei ua maikai ka nui o na ala loa a puni Oahu, koe ka pali o Nuuanu.

    Ma ke kulanakauhale nei o Honolulu ua maikai kekahi mau alanui a ua ino loa no hoi kekahi.  Maikai ke alanui Liliha i keia wa i ko na wa i hala.  Aka o ke alanui Puowaina a hiki i ke alanui Kula, a mai ke alanui Kula aku a hiki i ke ala Nuuanu, he ino loa.  He nui loa na alualua ma keia mau alanui o kakou, a pela no hoi ma kekahi hapa o ke alanui Beritania.  O ke alanui e pii ana i Manoa, ke hiki aku ka poe helc iuka mawaena o ka pa o Kapunahou a me ka pa laau o Palakiko, he ino loa ia wahi no ka haiki o ke ala; ua keakea mai ka pa i kahi o ke alanui, aole hiki pono na kaa a elua ke alo ae ma ia wahi.

    Aia no hoi ma Waialae kauwahi pilikia.  Ua ulu ae nei ke kolu a paapu o luna o ke alanui, a aneane hiki ole na kaa.  Mahope aku paha e kolo ana ka poe hele malalo o ka nahelehele.  Ke kokua nei makou mamuli o ka manao o ko laila poe, e pono i ka luna alanui e makaala i ka pono o ka lehulehu ma ia apana, i holo pono na kaa a me na holoholona o ka poe hookaa auhau alanui.

 

LEO PAIPAI.

    Ke hoike ia aku nei ka lohe i ko makou mau Luna Nupepa a pau, mai Hawaii a Kauai.  He mea pono e hoomakaukau lakou i na inoa lawe pepa o ka makahiki e hiki mai ana a hoouna mai i na inoa ma ka pule elua o Dec, I hiki ke kopeia ma ka Buke inoa o ka poe lawe pepa; a i mea hui e makaukau ai aole e lohi ka hoouna ana ke hiki mai ka makahiki hou.

    Ke kokoke mai nei ka La Karisimaka a me Hapenuia, a ke lohe pu ia aku nei na nune a kekahi poe iwaena iho o lakou e malama i mau wahi paina hoomanao no ka hooloihi ia ana o kahi aho a loaa ia makahiki hou.  Mahalo no ka makou no ia mau manao ana o ka lehulehu, a o makou pu me oukou

 

Ka Helu Lahui o 1884.

    Ua ike iho nei keia pepa i ka Papa Helu Kanaka i hoopukaia e ka Papa Hoonaauao no ka helu ana o keia makahiki.  O ka po o ka Poalima, ka la 26 o keia mahina ka manawa i hookaawaleia no keia hana.  E waihoia aku ana na papa pai hakahaka ma na lima o ka poe mea hale a pau o ka aina mamua o ka manawa i oleloia, a ua makemake ia lakou e hoopiha pololei i na hakahaka o ia mau papa helu me na huahelu oiaio o ka poe e noho ana ma na kauhale ia po.  Aia nae iloko o ia papa helu he mau mea pohihihi, a ko makou poe heluhelu paha e kanalua ai.  Ma ke poo o na kolamu paihakahaka, a ma ka aoao akau hoi o ka pepa, e kau ana na huaolelo penei:  "E heluhelu a kakau?" me ke kiko ninau.  E kuhihewa ana paha kekahi poe i ke ano o keia kauoha e heluhelu a e kakau i hui pu ia me ke kika.  E manao ana paha kahi poe he olelo ao keia i ka poe heluhelu e heluhelu a e kakau iho.  Aole nae oia ka oiaia.  Ua lalau ke kiko ninau, aohe ano.  O ka pololei malaila penei:  "Poe heluhelu a kakau."  O ke kolamu ia kahi e kiko ia ai na inoa o ka poe i ike i ka heluhelu a me ke kakaulima.  Aia ma ka aoao hema o ka pepa, malalo iho o ka huaolelo "Inoa," malaila e kakau ai ka inoa o ke kanaka, a ina he kanaka ia i ike i ka heluhelu a me ke kakau, alaila hooholo loa ae a i ke kolamu ma ka akau loa o ka pepa, kahi e kau la ka olelo "E heluhelu a kakau," a e kiko iho ma ia kolamu penei 1, alaila he hoailona ia na ike kela kanaka i ka heluhelu.

 

    A pela no hoi na kolamu malalo iho, e pili ana no na hoomana, ka poe mea kuleana, a hiki loa ilalo o ka papa helu.  O na inoa ma ka aoao hema o ka pepa a o na hoailona e maopopo ai ke ano o ka inoa ma na kowa liilii e kau ana ma ka akau.

Eia no hoi kekahi hemahema a he mea e pohinihi ai ka helu ana.  O na "Haole Polunesia," owai ia poe?  O ka poe Polunesia, oia no na lahui e noho mai nei ma na mokupuni o ka moana Pakipika e pili ana i na poai olu e like me ko Maikonisia, na paeaina Nuuhiwa, ko Polapola, Samoa, a ua komo no hoi ko Hawaii paeaina iloko o Polunesia.  Nolaila, owai la na haole Polunesia?  Eia paha ka manao o ka poe nana i hana keia papa helu, o ka poe o na mokupuni e ae o ka moana Pakipika, mawaho ae o Hawaii, oia paha na " haole Polunesia ."   O lakou wale no ka i kupono e kakauia ma na hakahaka i hookaawaleia no na " haole Polunesia."

    Ma keia papa helu ua koe ke kowa no na haole Aferika, malia nae paha e komo ana lakou malalo o ke poo o "Na haole e ae."

 

[KAKAUIA NO KE KUOKOA.]

 

    Mamua aku o ke koho balota ana o ke kulanakauhale o Honolulu nei, ua hele kaapuni na holo--balota e haiolelo a e hoomaikeike aku i ke kahua o ka lakou mau hana no ka pono o ka lehulehu.  He nui na olelo pahele a kela a me keia hoa, a me na kumumanao i hoakaka ia aku i mea e huli mai ai ka manao o ka poe koho balota.  Ua hoomaopopo makou ma kekahi mau halawai ana ia mau la, ua hoolaha ae ke Kuhina o ko na aina e, o kekahi kumuhana nui ana i manao ai e hooikaika no ka pono o ka Lahui Hawaii, oia no ke Ola o ka lehulehu.  E like me kona hapai haanui ana ma na haiolelo mamua o ka koho ana, pela no oia i hoonuinui ai i kana mau olelo maloko o ka Hale Ahaolelo i ke Kau o 1882, a mamuli o keia pono a me kekahi mau pono e ae o ka lehulehu, ua ano kuhihewa kekahi poe e oiaio ana kana mau kamailio ana a e hooko aku ana oia i na hana no ke ola o ka lahui Hawaii e like me ke kuhikuhi o ke kanawai a e like no hoi me kana mau olelo.  No keia kumu ua hakilo mau makou i kana mau hana, no ko makou ano kanalua i ka oiaio o kana mau olelo i kukulu ia ma o kona moolelo, aole i keia wa ma na mea a pau i kualehelehe aku ai i ka lehulehu, aka, ma kana mau hana e pili ana i ke ola o ka lehulehu, oiai, ua ike ia e na mea a pau ua ko kona ake nui e lilo oia ka Peresidena o ka Papa Ola, (no kona aloha loa i teia lahui?)  Mai kona noho Peresidena ana no ka Papa Ola a hiki i keia wa ua mahuahua ka manawa i loaa iaia no ka hookele ana i na hana o ia Papa, e ike ia ai ke ko o kana mau kaena ana no ke ola ae a no ka pomaikai a mama ae hoi o na palapu o keia lahui.  Eia nae, mai mua mai a keia wa aole e hiki ia makou ke ike

ua hoomama ia ae na mai o keia lahui mamuli o kana mau hookele ana.  Aole he Kuhina i noho Peresidena no ka Papa Ola i oi aku na mana a me ke dala no kana hana e like me keia, a aole no hoi he Peresidena i ike ia mamua i hookele i na hana o ka Papa e like me ka keia Peresidena. Me he la, hookahi wale no ano nui i ike ia i keia manawa, oia ka hookele ia o keia oihana no ka pono o ke poo o keia Buro.  Ua kapae ia ke kauoha o ke kanawai e noho pu ka Peresidena a e kuka me na hoa o ka Papa; he kakaikahi ke kauoha ia aku o na hoa e halawai a e kuka pu me ia; aia wale no ma na hana ana i hopohopo ai ke hana hookahi, alaila, kahea ia aku na hoa, aka, ma na mea e pili ana i ka hoonohonoho ana i na luna, na kauka, a me ko lakou mau uku, ua lawe wale ae ka Peresidena i ka mana ma kona lima me ke kanawai ole, a hoonoho aku i ka poe e ae wale no i kana mau kauoha me ka ike ia no e na mea a pau he pono ole.  Ina ua loaa ke ka naka kupono no ka hana, a ua hoole mai nae i na kauoha hupo a hoole kanawai a ka Peresidena, no ka pono ole, ua hoopau koke ia aku la oia.  Aole i noonoo ia ka pono a me ka pomaikai o ka lehulehu, aka, ua hewa ia kanaka, ua kuokoa mamuli o kona ike, a ua haawi pio ole mai, nolaila, e pau ia e pono ai.  He hana keia a ka Peresidena mai mua mai a hiki no i keia wa, a iloko no o keia mau la pokole aku nei ua maopopo loa keia ano o ke Kuhina, ma o kona hoopauhonua anaia Kauka Pika.  Mahope o ko Kauka Pika hoopau ia ana, ua hoolaha oia i kekahi leta a ka Peresidena e kauoha ana iaia e hookuu mai ia Wainee mai ka Halemai ma Kakaako, e hoao ia e lapaau e kekahi kanaka, me ka olelo pu aku, aole no hoi he poino e loaa hou aku ia Wainee ma keia hoao ana a ke kanaka nana lapaau, a mamuli o ke koi ikaika ia ana mai kekahi.  Ua hoomaopopo makou i ke ano o keia leta, a ua olelo iho makou, ua kue keia mau hana a Kipikona i kana mau olelo mamua o kona koho ia ana i L. M. no ke Kau o 1882, oiai, ua lilo ke kino o ke kanaka Hawaii, he mea hoao ia e kela a me keia mea i hele mai e nonoi e hoao wale no, me kona ike no aole ia kanaka he mea hiki ke hilinai ia, a aole no oia, ma kana mau olelo ma ka leta ia Pika, i hilinai, aka, ua kauoha wale aku no oia mamuli o ke koi ikaika ia mai.  He mea kunanaha loa keia.  Ua lilo ke kanaka he holoholona i ka manao o ke Kuhina: he mea hoao.  Owai la ka mana i olelo ia ma ke kanawai nana e kei ikaika mai alaila he ae wale aku no ka ke Kuhina?  E na hoa heluhelu, ke hoole aku nei makou, aohe he mana e ae maluna o ka Papa i hoike ia ma ke kanawai  No ko makou ike mua i ke ano o ke Kuhina Kipikona, nolaila no makou i olelo mua ai, a e olelo mau ai, a e olelo hou nei, he kanaka kupono ole keia e lilo i alakai Aupuni.  E hoao wale ia no e hoololi i na kiko o leopata aole e loli, a pela ke ano o keia kanaka.  He nui maalea, he piha hookamani, a he pelo hoopunipuni na hana nui a keia kanaka  He hiki iaia ke kepa ae i na lima nana mai kana me ka loli ole o kona helehelena a me ke ano e ole o kona naau.  A he hopohopo ko makou e noho nei, ke mau oia ma ka oihana, e lilo ana oia he Iuda nana e kumakaia ka lahui  Hawaii ma keia mua aku, e like me kona kumakaia i ke kino o ke kanaka Hawaii no kona pono pilikino iho.

 

Ka huakai i ka

Aina Gula o Kaleponi.

(Kakauia no ke Kuokoa.)

    I ka la 18 o Iulai, ua hele au e makaikai i kela wahi kaulana o Kaleponi, oia o Woodward's Garden, kahi e malamaia ai na holoholona o kela a me keia ano, he hapaha wale no ka uku o ke komo ana iloko.  He nui na ano o na holoholona a'u i ike ai, o ka liona, ka tiga, ka hiena, ke kamelo, a me na keko o kela a me keia ano; a me na ia, na manu i hoomalooia me na wai o ke la me keia ano mai na wahi like ole o ka honua, a malaila no hoi au i ike ai i kekahi mau holoholona ano kupaianaha i hoomalooia; he puaa, he elua wahaa a hookahi no kino; he ilio, he elua poo a hookahi no nae kino; he wahi pipi keiki he elima wawae, a me kekahi mau holoholona kupanaha e iho he nui i loaa ole ia'u ko lakou mau inoa.  Kupanaha maoli na hana a ke Akua.

    Ma ka Poaono, Iulai 19, ua hele au e makaikai i ka hale pule o ka poe Iudaio oiai o ka Poaono ko lakou Sabati he hale nani maoli keia, a ua hoonaniia o loko me na waihooluu like ole, a o na puka aniani ua okomokomoia na aniani o na waihooluu a pau, a he keu a ka nani.  Ua hai ia mai ia'u he mau haneri tausani dala i lilo no ka hana ana i keia hale.

    O na nanaina oko lakou hoomana ana he ano like iki no ma kekahi mau mea me ko ka hoomana katolika.  O ka lakou mau himeni he ku i ke anoano a me ka eehia; oia no na Halelu a Davida, a o ke ano o ka himeni ana he ano heluhelu maoli no ma kekahi wahi e like paha me ka leo e himeni ia nei ka Pule a ka Haku.  He elua o lakou mau kahuna a he elua no hoi anuu o ka awai; he hookahi kahuna e lawelawe ana ma na hana pili i ka himeni a me ka heluhelu ana, a o kekahi kahuna ma ka haiolelo a me ka heluhelu ana i na kanawai.  O ka hapanui o ka lakou mau himeni he kike mawaena o ke kahuna a me ka papa himeni; i ka pau ana o ke kike himeni ana, ua huli like aku la na kahuna a pii aku la i ka lua o ke anuu a mahope aku o keia anuu he wahi keena, he kohu lua pao ke ano a ua lawe mai la laua mailoko mai o keia wahi keena he wahi ope i uhiia me ka lole silika nani a i kahikoia me na kinohinohi o ke gula, a he nani maoli no ke nana aku, ua auamoia mai la ua wahi puolo nei e kekahi kahuna me ka himeni hele ana mai, a hiki ma ke elua o na anuu o ka awai a waiho iho la, alaila hele mai la kekahi kanaka e noho ana ma ka aoao o ka awai a wehewehe ae la i ua ope nei a heluhelu mai la ka lua o ke kahuna mai ua owili ia, a oia no ka owili pepa o na kanawai a i ka pau ana o ka heluhelu, ua hele hou mai la no ka mea nana i wehewehe a ope hou ae la a auamo hou ae la ke kahuna me ka himeni no a hiki ma ke keena kahi i waiho mua ia ai alaila, hoi mai la ke kahuna a ke anuu o lalo a noho iho la, a o ka lua o ke kahuna, ku mai la oia ma ke anuu maluna a haiolelo mai la me ka leo nui; o ka loihi o ka manawa e malama ia ai keia anaina hoomana he elua hora me ka hapa a hiki i ka wa e hookuu ai ka halawai, ua hoomanawanui no ke anaina.

    Iulai 20, Sabati, ua hele au i ka'u pule ma Okalana i ka hale pule o ka hoa kula o Kauka  Hai. oia no keia kahunapule i hiki mai ai ianei, oia o Dr. Meclean.  He hale pule nui a nani no hoi keia; oia no ka hale pule nui loa ma ia wahi kulanakauhale, a oia no ka ekalesia nui o na hoahanau a holomua loa o na hana ma mokuaina o Kaleponi.  O ka lilo no ke kukulu ana i keia luakini, he 800,000 dala paha a oi iki; a o ka lawelawe ana o na hana he holomua no, no ka ikaika no o ke kahu me ka hope kahu a me na diakona o ka ekalesia.

    O ke ano o ko lakou mau lulu ana, he like me ko kakou ma kahi mau mea e lulu mau ana lakou i na Sabati a pau i ke kakahiaka me ke ahiahi, a o ke ano, ua pai hakahaka ia he wahi pepa a maluna o ia pepa e kakau ai oe i kou inoa, ka helu o kou wahi e noho ai me ka nui o kau mau dala e kokua ai, a i ka wa e hele mai ai ka mea ohi me ke pa e hoolei oe i kau iluna o ia pa, a ina no hoi he dala maoli ua hiki no, a o na pepa hoi ua hoiliili ia a na na luna e hooponopono a na lakou no e kii ae i kao dala ke pau ka hapaha.  He wahi apana pepa no kekahi e waiho pu ana me keia a ua hoike ia malaila he mau pauku baibala e hoikeike ana i ko ke Akua kuleana a me na kumu kupono au e haawi ai no ke kokua ana i kona aupuni.  Eia kekahi mau kumu a'u i unuhi ai mai keia wahi pepa mai:

    "E haawi no au i kau makana na ke Akua, no keia mau kumu.  1 No ka mea, o kau mau mea maikai a pau mai ke Akua mai no ia.  1 Oihanalii 29; 14 "No ka mea, nou mai na mea a pau, a o kau ka makou i haawi aku ai oe."

    2 "Ua makemake au e hoihoi aku i ke Akua no na pomaikai ana i haawi mai ai ia'u.  Hal. 116; 12.  "Heaha ka'u e haawi aku ai ia oe e Iehova, no kou lokomaikai mai a pau ia'u."  A he lehulehu wale o na kumu i paiia ma keia wahi pepa e hoala ana i na manao o na haipule e kokua nui i ke aupuni o ke Akua, a ua hui pu ia ma keia kekahi pepa i paiia a e hoakaka ana i ka nui o na hoolilo a me ka nui o na dala e hoolilo ia ana, a ua kakau inoa ia keia e na kahu waiwai o ka ekalesia, a o na hoolilo i ikeia, he pono no ia'u e hoike iki aku i ike ai kekahi mau ekalesia Hawaii i ka manao nui ia o ke aupuni o ke Akua ma na aina e, a eia na hoolilo a'u i lawe mai ai:

Hanai Kahu,                                                              $4,180 00

Mea malama hale,                                                          $900 00

No ka aila ea (Gas,)                                                          $600 00

No ka wai,                                                                   $90 00

Ka wahie a me ka lanahu no ka wa anu                                      $250 00

No ka Auhau,                                                              $1,170 00

No na hemahema e ae,                                                      $425 00

No na mea kani a me ka poe mele,                                         $1,360 00

No ke pani hakahaka,                                                        $480 00

No ka hope Kahu,                                                          $1500 00

No ke pena hou ana i ka Luakini                                            $1500 00

No na oihana e kokua ana i ke aupuni o ke Akua,                           $2,169 61

Huina pau,                                                               $14,584 61

    A iloko o keia nui o na lilo ua luhi ia me ka aie ole o ka Ekalesia no ka iini nui o na kanaka pono malaila e hooholomua i ke aupuni o Kristo ma ka honua nei.  A ua lawelaweia na hana me ka ohumu ole a me ka minamina ole i ke dala, ua lawe lakou e haawi i ka lakou kokua me ka manao maikai, he me maikai i na hoahanau o na Ekalesia Hawaii e haawi i ka ke Akua i ke Akua, a i ka Kaisala ia Kaisala.  E kamailio hou ana au no ke Kula Sabati o keia Ekalesia ma keia helu ae.

(Aole i pau.)

 

Ka Halawai na Kaumakapili.

    Ua piha loa ka luakini o Kaumakapili i ka po Sabati i hala no ka hoolohe ana i na olelo a Mrs. M. C. Leavitt.  Hookahi hora o kona kamailio ana me ka uiha ole o ke anaina, a na Rev. A. O. Polepe i mahele mai ma ka olelo Hawaii.

    Ua waiwai nui ka poe i hele ae e hoolohe i kana olelo, a no ka piha e o ka kakou pepa, aohe wahi kaawale e unuhi ai a waiho aku imua o ka lehulehu na manao i haiia mai imua o ia anaina.

    He wahine kaulana no keia; oia ka Hope Peresidena o ka Aha Hoole Waiona o na wahine o Amerika; he hookahi haneri tausani na hoa iloko o keia Ahahui, a he poe ikaika lakou ma ka hana.

    E kamailio hou ana o Mrs. Leavit i ka po o ka la apopo ma Kawaiahao.

 

Nu Hou o ko na Aina E.

AMERIKA.

    Ma ke ku ana mai o ka mokuahi Auseteralia i ka wanaao Poalua nei, ua loheia mai na lono hope loa no ke koho Peresidena o Amerika, ua like no me na lono mua i lauahea mai ai.  Ua haawi pio aku ka aoao Ripubalika i ke eo o ka hanohano koho moho no ka aoao Democarata.  Ua koho pono ia o Cleveland i Persidena no Amerika Huipuia, Hendricks i hope Peresidena.

 

BERITANIA.

 

    Ua hoonaue ae ke olai ma kekahi mau apana aina o Enelani me ka ikaika, a hoohiolo iho la i na kanhale; na holoholona ma na alanui ua pau i ka hina; a he nui wale na poino ma o keia olai.  He pihoihoi o ka makau iwaena o na makaainana.

 

FARANI.

 

    Ke pahola ikaika la ka mai fiva ma Parisa, a ke ano pau mai la ka mai korela.  He nui ka poe i loaa koke i ka mai a make koke no.  Ke imi la na kauka i kahi i hoea mai ai keia fiva me ka ikaika loa.

 

AIGUPITA.

 

    Ke hoohahani la na pualikoa o ke Kaula Mahdi ma kahi he ekolu mile mai Katuma mai, ke kau la no hoik ka weli i ko laila mau makaainana.  Ma ka la i loheia ai ka hoohahani o El Mahdi i Katuma, ua hele koke ae o Kenela Wulese me kona mau pualikoa no ka hui pu ana me El Mahdi.

    O ka lono i hoea ae ma kahi taona o Honokaona, oia no ka lilo ana o Formosa i na Farani, a nolaila ua hoouluku loa ia ka noonoo o na alakai aupuni o Kina a hoouna awiwi ae la i na manuwa pake no ke kaua aku i na aumoku Farani e hoopuni la ia Formosa.

    O na lako kaua a pau a ke aupuni o Kina i kauoha ai i na aupuni e no ka hoolawa ana aku, ua hoea ae ia, eia nae ka apiki aole he mau kanaka i kupono no ka lawelawe ana i na mea kaua oiai he poe hou wale no lakou, a aole no i maa i ka paikau.  He hoike ana keia a Kina i kona ano nawaliwali imua o kona enemi no ke kahua hookahe koko.

    Ma o kekahi mau lono, ke kukakuka nei kekahi mau aha uwao no ka uwao ana ae i ke kaua mawaena o keia mau aupuni enemi.  Ua noi aku nei ke aupuni o Farani ia Kina e hoike mai oia i kona ae no ka Farani huina dala koi poho, e koi aku ana, a ke ole loa e ae ia keia, alaila aole o Farani e hoolohe ana i ka ka aha uwao no ka unuhi ana mai i kona mau pualikoa mai na palena mai o Kina.

    He kaua hahana ka i hooiliia e na pake a me na koa Farani ma Tonaquina ma ka la 23 o ka mahina i hala.  He puali nui hewahewa o na pake ke hoohahani la ma na papu o na pualikoa Farani me ka manao e lawe pioae i na Farani, mai na wahi a pau o ka aina.  Aole he mau hopena i ike ia no ke kaua.

    Ke hoomau la no na pualikoa pake i ke pani ku ia Kelong, ao ke kulana hoi o na Farani ma Tonaquina he nui ka poino.  Ua paniku pu ae no hoi na pake e loaa ai i na Earani ka ai, a oia kekahi kumu nui nana e hoemi mai i ka ikaika o na pualikoa Farani.  Aole no hoi he ola kupono o na pualikoa Farani ma Bacanina, a i kupono ole hoi e hele no ke kahua hookahe koko.

 

I LOKO o ka Aha Hookolokolo Kaapuni o ka Apana Ekolu o ke Aupuni Hawaii.  KALAKAUA, Ma ka lokomaikai o ke Akua o ko Hawaii Pae Aina, Moi.

    Ia Jno. H. Soper Esquire, Ilamuku o ke Aupuni, a ole i kona Hope iloko o ka Aha Hookolokolo Kaapuni Apana Ekolu.  Me ka Mahalo:

    Ke kauohaia aku nei oe e lii aku ia PETER VALENTINE ka mea i hoopii ia, ina e waiho mai ana oia i kana pane i kakauia iloko o na la he iwakalua mahope iho o ka hookoia ana o keia., e hele mai imua o ka Aha Hookolokolo Kaapuni Apana Ekolu, ma ke Kau o Novemaba o ua Aha la e malama ia ana ma ke Keena Hookolokolo o ka Hale Hookolokolo ma Waimea mokupuni o hawaii ma ka Poaha, ka la 6 o Novemaba e hiki mai ana, ma ka hora 9 A. M., e hoike mai, no ke aha la e ae ole ia ai ke noi a AKANA VALENTINE ka mea hoopii e like me ka mea i hoakakaia iloko o ka Palapala Hoopii i pakuiia.  A e hoihoi mai oe i keia palapala me ka hoike piha o kau mau hana mamuli o keia palapala.

    Ikea ka mea Hanohano A. FRANCIS JUDD Lunakanawai Kiekie o ko makou Aha Hookolokolo Kiekie i keia la 21 o Okatoba, A. D. 1884.    DANIEL PORTER, Kakauolelo aha Kaapuni Apana Ekolu.

 

    I keia Palapala kii, ua pane ka Ilamuku penei: Oiai ua imi au ia Peter Valentine i Oleloia, aka aole oia i loaa ia'u maloko o keia Aupuni.  A nolaila ke hoihoi aku nei au i ka Palapala Kii me ka hooko ole ia i keia la 29 o Okatoba, 1884.    J. H. SOPER, Ilamuku.

 

    Mamuli o na hoike aka Ilamuku ma o kona hoihoi ana mai i ka Palapala Kii, nolaila, ke hoike nei au ma keia, o ka palapala maluna ae, he kope oiaio a pololei ia o ka Palapala Kii i hoopukaia ma ka hihia oki mare o Akana Valentine kue ia Peter Valentine a iloko o ia manawa kowa e pai ia i kope oiaio o ua palapala Kii nei i oleloia, ma ke KUOKOA a me Hawaiian Gazette Iloko o eono pule e like me ka mea i hoakakaia ma ke kanawai, e kahea aku i ka mea i hoopii ia e pane mai ma ke Kau i oleloia.  I hoike no keia, ke kau nei au i ko'u lima i keia la 12 o Novemaba A.D. 1884.

DANIEL PORTER, Kakauolelelo o ka Aha Hookolokolo Kaapuni Apana Ekolu, o Hawaii.    2001-6w.

 

WAIWAI PAA MAIKAI NO KE KUAI.

    Ke haawi aku nei ka mea nona ka inoa malalo, no ke kuai he eha mau apana aina, me na hale maluna o ia mau aina, e waiho la ma Leleo, Honolulu, oia hoi ka waiwai o James Keau Esq.

    Apana 1--He 98 kp. ma alanui Moi, a he 111 kp. mahope a he 75 kp. ka hohonu, a he hale noho maluna o ua aina la 32x36 kp., he elima rumi, rumi kuke a me ka rumi ai.  He paa maikai ia hale, a ua hoolimalimaia no 240 dala o ka makahiki ma ka uku mahina me ka uku mua ua hoolimalimaia i ka la mua o Sepatemaba 1883 no elima makahiki, a e kuai ia'ku ana keia aina me ka hale, koe nae ka hoolimalima ana i Iune 24, 1885.  Hoopaaia ma ka Hui Panai no $1,000 e pau ana i Iune 25, 1885.

    Apana 2--He 112 kp. ka loa, a he 52 kp. ka hohonu, a he hale iluna ilalo, he 4 rumi o luna a he hookahi o lalo a he $20 ka hoolima lima no ka malama, aole i hana palapala hoolimalima ia.  Ua paa maikai ka hale a he 3 mak. ke kahiko, a he 36x32 kp., a he mau hale ohua he eha rumi. Hoopaaia ma ka Hui panai no $750, e pau ana i Iune 25 1885.

    Apana 3--He hale noho maluna o ia aina, he 39x34 kp., a he 117 kp. loa, a he 58 ka hohonu, malaloo o ka hoolimalima no $35 no ka malama.  Ua hoopaaia ma ka Hui Panai o 500 dala e pau ana i Iune 1885.

    Apana 4--He hale ilunailalo, 30x32 kp.  He 107 kp. ka hohonu a he 58 kp. laula, aole i hoolimalina ia.  Ua hoopaaia i ka Hui Panai no 250 e pau ana i Iune 25, 1885.

    He mau aina maikai loa keia, a he elua alanui e hiki ai ilaila ma ke alanui Moi aku.  E kuai ia aku ana ma ke kuai pakahi, a i ole, o ka pau loa i hookahi.  Ua pa ia keia mau aina pakahi.  No na mea i koe, no na kii o ka aina a pela aku, e loaa no ma ke Keena maluna ae o ka Baneko o Bihopa ma.  W. C. PARKE.  Honolulu, Dec. 3, 1884.    2001-tf.

 

A HA HOOKOLOKOLO KAAPUNI Apana Ekolu o ko Hawaii Pae Aina.  Ma ka hooponopono waiwai, ma ka waiwai o KAEA k. o Kohala Akau, Hawaii, i make kauoha ole imua o ka Lunakanawai Chas. F. Hart.

    Ma ka heluhelu a me ka waiho ana mai o ka palapala noi a D H Hikikoki o Hilo, Hawaii, e noi ana e haawi ia ka palapala hookohu. Lunahooponopono Waiwai ia kekahi mea kupono.

    Ua kauohaia o ka POAKAHI oia ka la 15 o DEKEMABA 1884, oia ka manawa i koho ia ao ka hoolohe ana i ua noi la, imua o ua Lunakanawai la ma ke keena hookolokolo o keia Aha ma Kapaau, Kohala Akau, Hawaii, ma ka hora 10 o kakahiaka, a ma ia manawa a ma ia wahi no e hele mai ai na mea a pau i pili e hoike mai i ke kumu, ina he kumu oiaio ko lakou e ae ole ia ai ua noi la.

    Kakauia ma Kohala Akau, Hawaii, ko Hawaii Pae Aina, Nov. 17 1884.  CHAS T. HART.   Lunakanawai Kaapuni Apana Ekolu.  2001-3

 

NA HOOLAHA HOU.

 

HOOLAHA HOOKAPU:--E ike auaneina mea a pau, ma keia ke hookapu loa ia aku nei na aina a pau ma Kahua, kohala, (Kahua Ranch) a e hoopii ia no ka poe e kue ana i keia.  O ka poe a pau e makemake ana e hookaawale i ko lakou mau pipi mai ka aina aku, e loaa no na kauoha i na Poakahi o kela a me keia pule ke, hele ae i ka mea nona ka inoa malalo iho, a i kona Luna paha.  Aole no hoi e ae ia kekahi mea o hele ma ia mau aina o Kahua me na lilo.  GEO. F. HOLMES.  Kahua, Kohala, Nov. 7, 1884.  1198 4ts.

 

A HA HOOKOLOKOLO Kaupuni Apana Ekolu o ko Hawaii Pae Aina, ma ka hooponopono Waiwai.  Ma ka waiwai o KAEA (k) no Kohala Akau, Hawaii, i make kauoha ole, imua o ka Lunakkanawai C. F. HART.

    Ma ka heluhelu a me ka waiho ana mai o ka Palapala Noi a D. D. HITCHCOCK, o Hilo, Hawaii, e hawiia ka Palapala Hookohu Lunahooponopono Waiwai i kekahi mea kupono.

    Ua kauohaia o ka POAKAHI, oia ka la 15 o DEKEMABA, 1884, oia ka manawa i kohoia no ka hoolohe ana i ua noi la, imua o ua Lunakanawai la ma ke Keena Hookolokolo o keia Aha ma Kapaau, Kohala Akau, Hawaii ma ka hora 10 o kakahiaka; a ma ia manawa a ma ia wahi no e hele mai ai na mea a pau i pili e hoike mai i ke kumu ina he kumu oiaio ko lakou, e ae ole ia ai ua noi la.

    Kakauia ma kohala Akau, Hawaii, ko Hawaii Pae Aina, Nov. 17. M. H. 1884.  CAS. F. HART.  Lunakanawai Kaapuni Apana Ekolu.  2000-3t

 

OLELO HOOLAHA:--Mai ka la 1 aku o DEKEMABA, o na ohua o hope a me mua e kau ana maluna o na mokuahi o ka HUI MOKUAHI HOLO-PILI AINA, e ku tickets ma ka Hale Oihana ma ka Uwapo.  A o ka poe a pau i loaa ole na Pepa Uku moku. e aihau kaulele ia.

    Ma ke kauoha.  J. ENA Jr.    Kakauolelo.  Honolulu, Nov. 24, 1884  2000-4t

 

OLELO HOOLAHA: E ike auanei na kanaka a pau, owau o KALUAHINE (w,) ka wahine mare a KE(Pake,) ke kauoha aku nei au iaia e hoi mai e noho pu maua, oiai ua haalele kumu ole mai oia ia'u iloko o na makahiki he umi i hala ae nei, aole oia i hoi iki mai a hiji i keia la a'u e hoolaha nei e hoi mai.  Ina eia no oia ke noho mai nei mana wahi o keia  Pae moku: a ina aole oia e hoi mai iloko o ka mahina hookahi, alaila, e manao ia no ua make oia, a ua hele paha i na Aina e, alaila, e hiki no ia'u ke mare hou i kane hou na'u i mea nana e malama i ko'u ola a me na pono kino.

Owau iho no me ka oiaio.

KALUAHINE (W.)

    Niulii, Kohala Akau.    2000-4t*

 

OLELO HOOLAHA:--E ike auanei na kanaka a pau, owau o SEE SING (Pake,) ke papa ia aku nei na mea holohoiona e hookuu wale ana maloko o ka Pa o Kapiolani Paka, aole e hele wale maloko.  Ina e loaa na holoholona e hele wale ana maloko, e lawe ia no ma ka Pa Aupuni.  A ke papa pu ia aku nei no hoi ke kii ana o na kanaka i na hua kiawe a lawe, ina e loaa kekahi e ohi ana a lawe i na hua kiawe, e hoopii ia no.

    A ke papa pu ia aku nei aole e hoohamama i ka puka pa mauka o Kapiolani Paka, a ina e ike ia ana kekahi e wehe ana a hoohamama, e hoopii ia no, aka e wehe a hoopaa hou.

SEE SING (Pake.)

20004t*

 

HOOLAHA KUEDALA:--Ekuai kudala ia aku ana 2 Lio, ke hiki aku i ka la 2 o DEKEMABA, hora 12 awakea, oia ka POALUA, ma ka Pa Aupuni ma Koholaloa, Honolulu.  Lio (k,) keokeo kukaenalo, elua ka maa mamua, hema J S P.  Lio (k) ulaula, hema A A E T.

A. B. KAAUKUU.

Luna Pa Aupuni.

Koholaloa, Nov. 28, 1884.    2000-1t*

 

HOOLAHA LUNAHOOPONOPONO WAIWAI.  Ke hoolaha aku nei ka mea nona ka inoa malalo,ua hookohuia oia i lunahooponopono no ka waiwai o Cpat. Thos. Spencer o Hilo Hawaii, i make; Nolaila ke kauohaia aku nei ka poe a pau he mau koina ko lakou e hoike koke mai me na hooiaio kupono iloko o na mahina eono mai keia la aku, a i ole ia, e hoole mau ia aku no lakou.  A o ka poe he aie ko lakou i ua waiwai la, e hookaa koke mai.  C. S. KITTREDGES.

Lunahooponopono Waiwai o ka waiwai o Thomas Spencer, me ka Hooilina i huiia.

Hilo, Oct. 5, 1884.    2000-6m

 

HOOLAHA LUNAHOOPONOPONO WAIWAI.  Ua hookohuia ka mea nona ka inoa malalo i Lunahooponopono no ka waiwai o J. W. Kahuila i make kauoha ole ma Kaneohe, Oahu, a o ke kauoha i kakauia ma ka la 11 o Novemaba, 1884, e hoike ana, o ka poe a pau he mau koina ko lakou i ka waiwai i oleloia, a ina paha ma ka moraki, e hoike mai lakou i na hooiaio kupono ma ke keena hana o W. R. Kakela iloko o na mahina eono mai keia la aku, a i ole e hoole mau loa ia aku lakou.  A o ka poe a pau he aie ko lakou i ka waiwai i oleleia, e hookaa koke ae ma kahi i hoikeia ae la maluna, kahi e loaa ai na palapala hookaa.

Kakauia ma Honolulu, Nov. 29, 1884.

Luisa Ahuki w.

W. R. KAKELA.

Lunahooponopono Waiwai o J W Kahuila.

2000-4t.

 

HOOLAHA A KA LUNA AUHAU. O HILO.  Ua weneia ke keena maluna o ka hale hookolokolo o Hilo no ka ohi ana i na auhau ma na manawa i hoikeia malalo nei.

Poha Nov. 20, ma ke keena ma Hilo.

Polima     21,     do      do     do.

Poaono    22,     do      do     do.

Poakahi    24   ma Paukaa & Papaikou Plant.

Poalua     25, ma Onomea & Pepeekeo   "   

Poaha      27, ma Hakalau me Honohina

Poalima     28, ma kahi o Likeke.

Poaono      29, ma kahi o D K Pa-Laupahoehoi.

Poakahi Dec. 1, ma ke keena ma Hilo taona.

    Mahope aku o ia la, ma ke keena wale no au ma Hilo e loaa ai i ka poe hookaa auhau a pau.  E hoomanao hoi na kanaka a pau i ku i ka auhau, i mea e kulike ai me ke kanawai hou, o ka poe a pau e hookaa ole mai ana mamua ae o ka la 15 o Dek. e uku no lakou he umi pa-keneta maluna o kela a me keia dala i auhauia.  A mahope aku o ka la 1 o Dek. e hoomaka ai ke kanawai e pili ana i ka hooponpono ana i na dala.  F. S. LYMAN.

Luna Auhau o Hilo.  Nov. 20 1884    2001-4

 

HOOLAHA I KA POE AIE--Ke hoike aku nei na mea no laua na inoa malolo ma keia hoolaha, ua hookohu pono ia laua i mau Luna Hooko no ka Palapala Hooilina o Bernice Pauahi Bihopa i make ma honolulu, mokupuni o Oahu.  O ka poe a pau he mau koina ko lakou iloko o ua waiwai la i oleloia, ina ma ka moraki a ma kahi ano e ae paha, e hele mai lakou me na hooiaio kupono ana i na mea no laua na inoa malalo iho iloko o na mahina eono mai kkeia ia aku @ ka hoolaha, a ole pela, e hoole mau ioa ia lakou.  A o ka poe a pau he mau aie ko lakou i ka waiwai i oleloia, e hookaa koke mai lakou.

Chas. R. BIHOPA.    S. M. DAMON.

Honolulu, Dec. 2, 1884.    2001 4t

 

NA MEA I LOAA NO KA PAPA HAWAII NO KA MAHINA E PAU ANA OKATOBA 31,1884.

No na Misiona Kuwaho.

Mai ka ekalesia o Helani--S. W. Kawewegu               $ 13 60

Ekalasia o Kohalo--E. Bona                              200 00

Ekalasia o Kaukeano--J. A. Cruran                          65 55

Mai na Kilibati ma Kekaha Kauai                           12 70

Mai ka aina hoolimalima ma Hilo                           30 00

Mai a L. Kaaua--Vernon, Cala                               20 99

ai Ponape, Mortlock, Ruk me Puiglap, ma o

Rev. E. Rev. E.T. Doane                                    72 75

Mai ka Paemoku Kilibati--Rev. E. A. Walkup                19 60

                                                          $435 70

NO NA BAIBALA AMERIKA

Na buke i kualia ma Ponape--Doano                   25.00

Na buke i kualia ka Paeaina Kilibati   81 65    $106.70

No ka pomaikai o ka Oihana Pai Palapala ma Kilibati.

Na buke i kuai ia ma Kilibati     81 65

Huina   624.00

W W HALL--Kakauolelo.

 

NA HOOLAHA KUMAU

 

KAKELA & KUKE,

E laa na pahiolo, koi hole, hamale, koi nui a me liilii kila, wili puaa, rula, apuapu, kui o na ano a pau, kala kaa, hao hoopaa puka, pohaku hoana, kepa, lei ilio, kaula hao ilio, pahi, upa, pahi umiumi, kalapu, kope hulu, pulupulu, oepa kalakala, lina hao, ami, keehi, a me ke

 

--KAULA OPU.--

 

Palau o na ano a pau, Oo, ho, kopala, pe, kipikua, hao kope, au ho a pela aku, kua bipi, lei bipi, kaula hao bipi, uwea pa, uwea keleawe, hao pili piula, kaa palala, ipuhao, ipu ti

 

PA-PALAI, MAKAU ME KE AHO

 

Ili wai, papa holoi, kopa ala, kaula kuaina, hu'akai ehi wawae, hulu pena, a pela aku.

Pena wali, kini nui a me liilii o na ano a pau, me ka pepa kuhikuhi, pena keokeo, aila pena, aila hoomaloo, vaniki kaa, a me vaniki moe,

 

PENA HOOMALOO

 

--a me aniani hale--

 

AILA MAHU, AILA MIKINI, AILA HAMO ILI, AILA KAA, INIKA KAMAA.

 

PAUDA, KUKAEPELE, KIANA PAUDA, UIKI IPUKUI O NA ANO HE NUI A LEHULEHU.

 

LOLE MAKEPONO

 

--E laa na--

 

AHINAHINA, KALAKOA. KEOKEO, LEPONALO, HULUMANU, UWE-WAHINE, KUI HUMUHUMU, A ME KA LOPI.

 

Ke Kuike e koaa no la ma kahi o

 

Kakela & Kuke!

 

NA MEA PIULA,

 

Mikini Humuhumu

 

Mokini a WHEELER a me WILSON

 

MIKINI A WIILCOX ME GIBBS

 

NA MIKINI A

 

--REMINGTON.--

He nui loa na mea hao me na ukana e ae o na ano a pau, aole hiki ke hai pau ia aku, hewa i ka wai na maka ke ike.

 

Laau Lapaau Kaulana Loa

A DR. JAYNE.

LAAU HOOMAEMAE KOKO LAAU HOOPAU NAIO, LAAU KUNU, PENIKILA, HUAALE, PAAKAI, LAAU HOOPAA HI, A Me na Laau Hamo a Pela 'ku.

 

Kakela me Kuike.    1295-tf