Ka Nupepa Kuokoa, Volume XXIII, Number 43, 25 October 1884 — Page 4
| This text was transcribed by: | Jean Danao |
| This work is dedicated to: | Awaiaulu |
Ka Nupepa Kuokoa
KE KILOHANA POOKELA NO KA LAHUI HAWAII.
-
No ka Makahiki...$2.00
No Eono Mahina...1.00.
-KUIKE KA RULA-
Poaonoo...Okatoba 25, 1884.
-
Haawina Kula Sabati.
Hela VII. Nov. 16.
Kumuhana. Ka hewa o Solomona: Pauku Baibala, 1 Na Lii 11:4-13
O KEIA hoi, a elemakule ae la o Solomona ua hoohuli ae kana mau wahine i kona naau mamuli o na akua ei aole i hemolele kona naau ia Iehova kona Akua, e like me ka naau o Davida kona makuakane.
5 No ka mea ua hahai ae la o Solomona mamuli o Aseterota ke akua wahine o ko Sidona, a mamuli o Milekoma ka mea I hoowahawahaia o ka Amona.
6 A hana ino ae la o Solomona ma ke alo o Iehova, aole hele okoa mamuli o Iehova, e like me Davida kona makuakane.
7 Alaila hana ae la o Solomona I wahi kiekie no Kemosa ka mea inaina ia o ka Moaba, ma ka puu mamua o Ierusalema, a no Moleka ka mea inainaia o na mamo a Amona.
8 Pela ia i hana’i no na wahine e ana a pau i kukuni i ka mea ala a i kaumaha aku no ko lakou mau akua.
9 Huhu mai la o Iehova ia Solomona, no ka huli ana'e o kona naau mai o Iehova ae ke Akua o ka Iseraela, ka mea i ikeia e ia i na manawa elua;
10 A i kauoha mai la hoi iaia no keia mea, i ole ia e hahai mamuli o na akua e: aka, aole oia i malama i ka mea a Iehova i kauoha mai ai iaia.
11 Nolaila i olelo mai ai o Iehova ia Solomona, No kau hana ana ia mea, aole hoi i malama mai i kuu berita, a me ko'u mau kanawai a'u i kauoha aku ai ia oe, e kaili ae auanei au i ke aupuni mai ou ae nei, a e haawi aku no ia i kau kauwa.
12 Aka, i kou mau la, aole au e hana i keia no Davida kou makuakane; aka, mailoko ae o ka lima o kau keiki e kaili ae au ia.
13 Aole hoi au e kaili honua i ke aupuni a pau, e haawi aku no au i hookahi ohana i kau keiki no Davida ka'u kauwa, a no Ierusalema a'u i koho ai.
Pauku Gula. E kiai oe i kou naau me ka malama loa; no ka mea, no loko olaila ka waipuna o ke ola. Sol. 4: 23.
Manao nui. O ka hoolohe ole i ke Akua ka mea e mahuahua ai ka hewa, a he poino ka hope.
Heluhelu la. 1 Na Lii 11: 1 - 13, 1 Na Lii 11: 14-25, Na Lii 11: 26-43 Kan. 7: 1-12, Kan. 17: 8 20, Puk. 34: @-14, Gal. 6: 1-15.
Mele, "Nana ia Iesu," Hoku Ao Na ni, aoao 34.
Pule. I naau hoolohe mau i ke Akua. Ninau me na wewehe.
Manawa. B. C. 985-980.
Ma Ierusalema a me Mauna Oliveta.
Paulele o Solomona i kona mana me ke akamai; ua lawe nui oia i na wahine nana-ka mea a ke Akua i papa loa ma Kan. 17: 17.
Ehia makahiki o Solomana i keia wa? Ehia makahiki o kona noho alii ana, p. 42. Ehia wahine a Solomona? 1 Na Lii 11: 3. Ua kue anei ke alii i ka ke Akua kauoha ma keia hana? Kan. 17: 17. Heaha kekahi kauoha e ae ana i malama ole ma keia hana? 11: 1-2, Kan 7: 1-4. No keaha ka papa ana ia lakou i ka lawe ana i na wahine no keia mau lahui? Kan. 17: 17. Pehea hoi ke kauoha ma Cor. 6: 14? Ma keaha ko Solomona lalau mua? Sol. 4: 23, 1 Na Lii 4: 4. Komo koke anei kanaka iloko o na hewa nui, me ka lawelawe ole i na hewa uuku mua?
E ae wale anei i na mea hoowalewale ma na home, me ka hoao oie e pale aku? Nawai, hoohuli i ka naau o Solomona mamuli o na akua e? Owai kekahi oia mau akua?
Ua haalele ahei oia i ke Akua? 1 Na Lii 9: 23. Ua hiki anei malama i ke Akua a me na akua e? Mat. 6: 24, Ep. 4:27. Ua hana hewa anei o Davida mamua? Ua hoomana anei i na akua e?
I ka manawa a Solomona i lawe ai i kela poe wahine hoomanakii nana-ia wa no ka hoomaka ana o kona haule ana. Heaha na hewa o Solomona? 1 Mare lehulehu ana. 2 Ka hoolaunaana me ka poe i papaia. 3 Ka hoomaunauna wale ana i ka waiwai. 4 Ka hookaumaha ana i na kanaka. 5 Hoomanakii. 6 Ka ae ana ia hai e hoomanakii. 7 Ka ae ana i na hana ino i komo pu me ia hoomanakii ana. 8 Pela i hoowahawaha ai oia i ke Akua io. 9 A ua hana no oia i keia mau mea, mahope o ka paipai pinepineia, a me ka loaa ana i na haawina he nui mai ke Akua mai. 10 Ua alakai oia i ka lahui iloko o ka hewa.
Nawai i hana i keia mau hewa? He kanaka akamai a naauao loa. Ka mea nana i kukulu i ka luakini. He kanaka i paipai ia hai.
Ma keaha kona kokua ana i ka hoomanakii ana? p. 7. O Aseterota he akua no ka lahui hea? Moleka no wai? Kemosa no hea? Mahea o Zidona?
He kii keleawe o Moleka-a hoa ia ke ahi iloko, a waiho ia na keiki ma na lima o ua kii nei, i pau i ke ahi.
Mahea ka noho ana o ka Amona? He poe mamo nawai? Mahea ke kukulu ana i wahi e hoomana ia Kemosa? Owai ka puu mamua o Ierusalema? Nowai kekahi, 2 Na Lii 23: 13. Ua ike anei o Solomona i ka pono? Ua ao anei oia ia hai?
O ka hoomanao ana i ko ke Akua lokomaikai iaia, he mea anei ia e hoopakele ai iaia mai ka hana ana i ka hewa? Heaha na mea a ke Akua i haawi mai ia kakou, i mau keakea ma ka hana hewa ana? Ka Baibala, ka Sabati, ke ao ia ana ma na mea e pono ai, ke alakai pono o hai, ka lani, ka Uhane Hemolele.
Heaha ka Iesu i olelo no ka poe e like me Solomona? Luka 12: 47, 48.
Heaha ke kumu o ko Iehova huhu ana ia Solomona? p. 9, 10.
Mahea kona hoike ana iaia iho i ke alii? Ua hana hewa anei o Solomona me ka ike ole? 1 Na Lii 6: 2; 9: 6.
No keia hoolohe ole i ka Iehova kauoha heaha ka hoopai? p. 11.
Ua ulu anei keia hoopai no loko o kana mau hewa? Ua pilikia anei na mea e ae ma ka hana hewa o Solomona? Ua hiki anei ia kakou e hana hewa, me ka hoopilikia ole ia hai?
Heaha ko Solomona mana nui, kona nani me ka hanohano, -kona mau pa kaua a me na mea kaua, i ka la a ke Akua e kue mai iaia, a e manao e kaili ae i kona aupuni?
Ia wai e haawi aku ai? I kekahi kauwa. Owai kona inoa? p 26 Nawai i hai aku ia Iereboama e lilo ana ke aupuni iaia? p. 29. E kaili koke ia anei? p. 12. No keaha? 2 Sam. 7: 13-16. E makaala o hooili auanei kakou i na poino maluna o na hanauna e hiki mai ana.
Ehia ohana na kana keiki? Ohana awai? 12: 21. Hoopoina anei ke Akua i na hana a Davida kana kauwa i hana'i? Hoopoina anei oia i Ierusalema-ke kulanakauhale ana i koho ai nona? Aole anei malaila ka Luakini-a me ka nani o Iehova?
Pela ke Akua i pale aku i na poino kupono no na aupuni, no ke aloha i kona poe kanaka.
Ua hai ia mai anei i ka mihi o keia alii? Mahea kona make ana? Ehia makahiki kona noho alii ana? Mahea ke kanu ana ia? Pehea ka ke Akua uku ana i kanaka? Ro. 2: 6.
Mele, "Ke kahuhipa Maikai," Hoku Ao Nai, aoao 36. Pule.
HE MANAO KOKUA I KA HAAWI NA KULA SABATI.
Ua hai ia mamua no ko Solomona komo ana iloko o kela me keia hana, a ua lilo i ke kalepa ana. Aole nae i pomaikai nui ka aina ma ia kalepa ana, no ka mea, aia no ma ka lima o ka Moi wale no-aole o na makaainana ke kahi. He nui na lilo o ke aupuni-no ka hale alii a me na mea e pono ai. Na Davida i hoahu i na waiwai he nui, i mea e pono ai ka Luakini, a me ka hoonolo ana i ke aupuni o Solomona i na makahiki mua o kona noho alii ana.
Pau ia mau dala, alaila huli ke alii ma o a maanei i piha hou ka waihona waiwai. Aole lawa na mea i loaa, na auhau &e o na aupuni e mai-a ua hookaumaha ia kona aupuni iho me na auhau. 1 Na Lii 12: 4. A no ka hoomama ole ana o kana keiki ia mau auhau, ua mahele ia ke aupuni, a lilo ka hapa nui ia hai.
Ua pono no na mea maikai a nani, ina e loaa ana i kekahi me ka hoopilikia ole ia hai. Aka, o ka hookaumaha ana ia hai i mea e mahuahua ai kou hanohano, he hewa maoli no ia.
Ua naauao o Solomana-a ua naaupo no hoi.
Aia no ka naaupo iloko o ka naau o kela a me keia-a ina ua loaa i kekahi ka haawina o ka naauao-aole no e kipaku ia ana ka lapuwale. E paio mau ka mea e pono ai.
Lanakila pinepine o Solomona; a mahope nanea iho la, a lilo oia i ka lapuwale. Ua lohe pinepine ia kona mau olelo noeau; ua hoike pinepine no ka oiaio; ua imi e hoonani i ke Akua.
Me e kona haule ana, oiai ua ike no ia i ka pono. Ina e kokua mai ana ke Akua, aole no e haule ana kakou. No keaha kona ae ana i ka haule ana o Solomona. Aole makemake o Solomona e kokua ia mai, manao oia ua hiki no iaia ke ku, oia wale no. Ua paulele ia ia iho, i kona ikaika iho i kona naau iho.
Ua like paha ia me ke kanaka waiwai ma ka olelo nane, i i iho, "Ua waiwai no au, ua mahuahua ko'u mau pono kino, aole o'u pilikia."
Mai noho nanea kekahi, o haule auanei oia iloko o ka hewa. O ka uku o ka hewa, he make no ia.
HE MAU HUNAHUNA NO KA HAAWINA KULA SABATI.
E makaala a e kiai kakou o haule; aole i pakele o Solomona me kona akamai a pau.
O ke kanaka i manao na kupaa ia e 20 hoi ia o hina.
E hahai ana na hewa nui i na hewa liilii. Na ke Akua i hookeakea nui i ka hana hewa ana. Aole hiki i kekahi ke hana hewa me ka hoopilikia ole la hai.
Aole nele ka hoopai ana i ka hewa.
Hoopai no ke Akua me ke Aloha.
Wahi a kekahi kaao Arabia, he wahi ilo iloko o ke kookoo a Solomona i hilinai nui ai, -a ua ai mau iloko a hiki i ka hai ana oia kookoo. Pela kona aupuni a me kona hopena.
O ka hoopai o kekahi mau hewa aia no iloko oia mau hewa. O ka hewa, ua like ia me ka ho laau a na kanaka o Troy i huki iloko o ko lakou kulanakauhale,-eia ka! ua piha ia me na enemi! Puka lakou iwaho a luku ia wahi.
MOOLELO O KA AHAHUI EUANELIO O OAHU
Halawai ka Ahahui Euanelio o Oahu ma Waialua, Oct. la 7, 8, 1884.
NA LALA I HIKI MAI.
Ekalesia Kahu Elele
Kawaiahao - S. Kapu
Kaumakapili - J. Alapai
Kalihi & Moanalua S. Paluhi, Moolehua
Ewa - Puahiki
Waianae J. Kekahuna Naoho
Waialua Timoteo Emesona
Kahuku - Niau
Hauula & Kahana J. W. Kaapu, Naili
Waikane Paikuli Konaaihele
Kaneohe - Kauhikoa
Waimanalo S. Waiwaiole -
Na lala mau; Polepe a me Hai.
Kohoia o Kaapu i lunahoomalu, a ia Paaluhi i kakauolelo.
Komite Imihana, Polepe, Waiwaiole, a me Kekahuna.
Komite Imi haawina, Alapai, Naili, Paikuli.
Komite pai moolelo, Paaluhi a me Waiwaiole.
Hoike mai o Polepe Komite Imihana penei:
Hapalua hora haipule i ka hoomaka ana o ka halawai i kela a me keia la.
Na hoike kihapai.
Na palapala hoopii.
Heluhelu haawina.
Ke Kula kahunapule
Ka waihona kuloko.
Hoike waha a ke Kakauleta.
Kula keikikane.
Ka hebedoma haipule a me ka la pule no na kula.
No na hale kahu.
Kahi e halawai hou ai ka Aha.
Kumuhana 2 heluhelu mai ke kakauolelo 1 ko Kawaiahao, a na Paaluhi, Puahiki, Kahikoa, Kekahuna, Timoteo, Niau, Kaapu, Paikuli i ko lakou mau kihapai.
Hoopanee ka Aha a halawai hou ma ka hora 1 1/2 ahiahi. Pule o Polepe.
Halawai ka Aha i ka hora i hoopanee ai, pule o Waiwaiole. Heluhelu mai o Waiwaiole no kona kihapai.
Kumuhana 3. Heluhelu mai ke kakauolelo he palapala hoopii no Kaumakapili, ua lawe ka Aha a noonoo, a waihoia ma ka lima o kekahi komite, oia o Hai, Polepe, Waiwaiole.
No Ewa he palapala hoopii, a ua waihoia ma ka lima o ke komite Hai, Paikuli Waiwaiole, Paaluhi, a me Kaapu
Kumuhana 4. E wehewehe ia 2 Tes. 2; 2, 4. Ekalesia o Ewa.
E wehewehe i ka manao o ka mokuna 12 o Hoikeana Kekahuna.
Wehewehe i ka manao o ka pauku 20, mok. 3 Hoikeana Timoteo.
Wehewehe i ka manao o ka pauku 8, 8, o 2 Tes. 2. C. M. Hai.
Hookolo ka Aha e hoolaha ia mau haawina ma ka nupepa.
Heluhelu mai o Alapai no ke kihapai o Kaumakapili.
Hoopanee ka Aha a halawai hou ma ka hora 1 1/2 o ka la apopo. Pule o Hai a me Paikuli.
-
La hana 2, Oct. 8. Halawai ka Aha i ka hora i hoopaneeia, heluheluia ka moolelo o ka halawai i hala a aponoia.
Kumuhana 5. Na Hai i hoike mai i na mea e pili ana no ke kula kahunapule.
Kumuhana 6. Hooholoia, ke paipai nei keia Aha i na kahu ekalesia no ka haawina kuloko, a e hooikaika i ulu ae keia waihona a mahuahua e like me ka nui o na hana.
Kumuhana 7. Na ke kakauleta Polepe kekahi lala o ke komite, i heluhelu mai i ka palapala hoopii o Kaumakapili penei: Ma keia palapala hoopii, ke noi mai nei ka ekalasia o Kaumakapili, ma o ko lakou komite, e hoomana ia aku ua ekalesia nei, e wae, a koho i kekahi hoahanau a mau hoahanau noho pono iloko a mawaho ae o ua ekalesia ekalesia nei, i komite huli a imi aku i na kokua no ko lakou luakini hou iwaena o na ekalesia o keia Paeaina, no ka manawa a paa ua luakini nei; ala a koho ia ua komite nei, alaila e waiho ia aku na inoa imua o ka lunahoomalu a me ke kakauolelo o keia Aha, a na laua e haawi aku no palapala hoapono.
Ua noonoo akahele ko oukou komite i keia palpala hoopii a ua hoomaopopo lakou i keia mau kumu:
1 He hana nui a luhi loa keia i ili mai maluna o ka ekalesia o Kaumakapili ma ke kukulu ana i keia luakini. He ekolu makahiki i hala ae nei o ko lakou hooikaika ana me ka hoomana wanui ma ke kukulu ana i keia hale a ua pau iho nei ka aie i hoaie mua ia no keia hana ua nui nae ka hana i koe e paa pono ai ka luakini
2 Ua makemake nui ia e hana ia na hana i koe o keia hale me ke komo hou ole aku iloko o ka aie, a ke mahalo nei makou i kela manao. He mea weliweli ka aie a he mea kokua ole no hoi i na hana maemae o ka pono a ke Akua.
3 Elua makahiki i hala ae nei mai ke noi mua ana a keia ekalesia no ke kokua ia mai e na ekalesia e ae o keia Paeaina, a ua kokua nui mai na ekalesia i kela wa, aole nae i hoikeia mai na loaa imua o keia Aha. Ina no hoi ua hoike ia mai ma keia palapala ka nui o na loaa a me na lilo o ka luakini hou o Kaumakapili mai ka hoomaka ana a hiki i keia wa, a me ka nui o o na hana i koe e paa pono ai, ina no la ua pono ioa.
4 Eia nae, ua maopopo no ia makou ka hooikaika nui ana o keia ekalesia, iwaena ona iho ma keia hana, a hiki ole no ke ole e kokua ole ia mai. Nolaila he pono e hooholo kei Aha penei:
OLELO HOOHOLO.
Ke ae aku nei keia Ahahui Euanelio o Oahu nei i ke noi o keia palapala hoopii a ka ekalesia o Kaumakapili, a ke apono aku nei i ko lakou imi pono ana i na kokua no ko lakou luakini hou iwaena o na Ekalesia o keia Paeaina, malalo nae o na rula o na ahahui mokupuni, a e like me ka manao oluolu o na ekalesia pakahi e kokua ai oiai aohe mana o keia ahahui maluna o ko lakou mau ekalesia iho.
Aia a koho pono ia ke komite o ka ekalesia o Kaumakapili no keia hana, a waiho ia mai na inoa imua o ka lunahoomalu a me ke kakauolelo o keia Aha, alaila na laua e haawi ua komite la i kekahi kope o keia olelo hooholo maluna, me ka pakui ana malalo iho i na huaolelo penei:
"Mamuli o ka olelo hooholo maluna ae nei i hooholoia e ka Ahahui Euanelio o Oahu ma ko lakou halawai ma Waialua, i ka la 8 o Okatoba 1884, ke aponoia aku nei o-ke komite i koho pono ia e ka ekalesia o Kaumakapili e imi a e huli i na kokua no ko lakou luakini hou, iwaena o na ekalesia o keia Paeiana."
Mr.-Lunahoomalu,
Mr.-Kakaulelo.
Na ko oukou komite A. O. Polepe
S. Waiwaiole
Ka pakui a Hai ka hapa uuku o ke komite, ua haule, hooholo ka Aha i na apono aku i ka hoike a ka hapanui o ke komite.
Heluhelu mai o Waiwaiole ke komite noi dala o ka luakini o Ewa, i hooholoia ai ma ka halawai ana o ka Ahahui ma Waikane
Ke hoike nei ko oukou komite, ua hele i na ekalesia a me na makamaka a puni keia mokupuni o Oahu nei.
Waimanalo $48.00
Waiahae 12.35
Ralihi & Moanalua 20.00
Waialua 3.00
Mai na makamaka 366.30
449.65
Nolaila ua pau ka aie o ka ekalesia o Ewa i ka luakini.
A ke haawi aku nei ko oukou komite i ka mahalo i ka Aha, no ka haawi ana i ka mana e hele iloko o ka mokupuni o Oahu, no ka pilikia o ka ekalesia o Ewa. Na Komite,
S. Waiwaiole, M. K. Nawaa, a me Kawaimaka.
Hooholo ka Aha e hoomaikai aku i ke Akua no ke kokua ana mai i ke komite noi dala o ka lukini o Ewa.
Heluhelu mai o Alapai ke komite Imi haawina.
E wehewehe i ka manao o ka pauku 23 Luka 19, Ekalesia o Ewa.
Wehewehe i ka manao o ka pauku 23 Luka 9, Ekalesia o Ewa.
Wehewehe i ka pauku 31, I Korineto 12. Kekahuna.
Wehewehe i ka pauku 18 o Hebera, mok. 6. Timoteo
Wehewehe i ka pauku 17 o I Ioane, mok. 5. C. M. Hai.
Wehewehe i ka pauku 16 o Mataio, mok. 3. Polepe.
E hoomau ia aku ka poe i heluhelu ole i ko lakou haawina.
Wehewehe i ka pauku I o Hoikeana mok. 7. H. H. Paleka.
Wehewehe i ka pauku 10 o Hoikea na mok. 17. Waiamau.
Wehewehe i ka pauku 17 hapa hope o Hoikeana mok. I. Waiwaiole.
Wehewehe i ka pauku 17 o Halelu mok, 51. Paikuli.
Wehewehe i ka pauku 11 hapa mua o Kor. 5. Kaapu.
Wehewehe i ka pauku I o Hoikeana mok. 16. Ekalesia o Kahuku.
Wehewehe i ka manao o ka pauku 4 o roma 6; hapa mua. S. Paaluhi.
Wehewehe i ka pauku 5 o Luka 12. Ekalesia o Kaneohoe.
Na Komite, Alapai, Paikuli, Naili.
Heluhelu mai o Hai ke komite no ka palapala hoopii o Ewa.
I ka ahahui mokupuni o Oahu, ua moonoo ko oukou komite i ka palapala hoopii mai ka ekalesia o Ewa a hui pu me ka palapala a ke komite o ua ekalesia la, a me ka olelo pane a S. P. K. Nawaa. Eia kekahi hemahema ano nui aole akaka ua malama ia ka hala wai ekalesia mamalo o ka hoomalu o na rula o ka Ahahui Euanelio o keia Paeaina.
Me ke ano he olelo aelike keia mau palapala kahea mawaena o na kahu me na ekalesia, aka nae. ina aole lakou i hana ia mamuli o na rula o ka Ahahui Euanelio, e kipaku ia lakou me he mau mea waiwai ole imua o na kanawai o keia aupuni.
Nolaila, ke manao nei ko oukou komite e hapai hou ka ekalesia o Ewa i keia hana ma ke kahea ana i kekahi halawai no ke kahea ana i ke kahu malalo o ka hoomalu ana o kekahi kahu ekalesia. Me ka mahalo.
C. M. Hyde
Eia ka pakui a E. S. Timoteo: Aia a makaukau ka ekalesia o Ewa, alaila e noi aku i ka lunahoomalu e kahea i halawai kuikawa, a ua aponoia e ka Aha.
Kumuhana 9 No na hale kahu - E hoomau aku i ke komite mua, hooholo ia e ka Aha.
Kumuhana 10 Hebedoma haipule a me ka Poaha hope o Ianuari i la pule no na kula.
Kumuhana 11 Kahi e halawai hou ai keia Aha; ina e hoopanee keia Aha, e halawai hou ma Kaumakapili ma ka Poalua mua o Aperila 1885. Koho ka Aha ia Paikuli, Kaapu, Paaluhi, he komite hoalohaloha no Alekanedero a me kona ohana, a pela pu no hoi no ko M Kuaea ohana.
Ke mahalo aku nei keia Aha no ka ekalesia o Waialua no ko lakou kokua ana mai i na mea e oluolu ai na hoa o keia Aha. Heluheluia ka moolelo o ka Aha a hoaponoia. Hookuuia na hana me ka pule a Polepe.
S. Paaluhi Kakauolelo.
-
MOOLELO O KA AHAHUI KULA SABATI O MAUI KOMOHANA.
Halawai ka Ahahui Kula Sabati o Maui Komohana ma ka luakini o Wainee, Lahaiaa; hora 10 a. m. Oct. 4, 1884.
Ka Lunahoomalu Mr. M. Makalua ma ka noho. Kohoia o D. W. Keliiokamoku i Kakauolelo kuikawa.
Hoomakaia na hana me ka himeni a me ka pule.
Hoomaopopoia na lala i hiki mai.
OLOWALU
Rev. S. K. Kamakahiki K. K. S.
T.F. Nakai (Kumu)
LAHAINA
Kev. A. Pali K. K. S.
M. Makalua Hope " " "
S. E. Kaiue (Kakauolelo)
D. Kaiwikaola (Kumu)
Mrs. Paaoao Pali "
LAHAINALUNA
S. R. Haina K. K. S.
David Kahaulelio (Alakai himeni)
Mololani (Kumu)
KAANAPALI
Kalaola K. K. S.
Rev. J. K. Hihio Hope " " "
M. Meheula (Kumu)
G. W. Kaluahine "
P. Poina "
J. K. Nahaku (Kakauolelo)
M. K. Meheula Jr. (Alakai himeni)
HONOKOHAU
Geo. K. Kauhi K. K. S.
Ma ke noi a Rev. Kamakahiki, ua aponoia na hoa e ae i akoakoa mai, e lilo i mau hoa kuka.
Hoike mai ke Komite imi kumuhana mau, Rev. A. Pali i na kumuhana.
1 E kolu mea e pule. Ua malamaia.
2 Heluhelu ana i ka moolelo.
3 Na hoike a na Kahu Kula Sabati
Na S. K. Kamakahiki i heluhelu mai no ke kula Sabati o I anakila ma Olowalu.
Na Rev. A. Pali i hoike mai i ko Wainee, Lahaina.
Na S. R. Haina i heluhelu mai i ko Lahainaluna.
Na Geo. K. Kauhi i heluhelu mai i ko Honokohau. He holomua ke kulana o na Kula Sabati.
4 HELUHELU HAAWINA.
5 He mea pono anei i ka poe i wa waia ko lakou mau inoa, ke noho alakai ma na Kula Sabati, aole paha? (Hai.) Aole.
6 E hoike hui makahiki hou ana anei na Kula Sabati; a i ka la ehia? Hooholoia e hoike hui; a i ka la mua o Ianuari 1885.
7 E koho hou i Puuku no keia aha. Hooholoia. D. Kahaulelio Esq. ka Puuku hou.
Noi mai o J. K. Nahaku, e koho ia i Kakauolelo hou. Hooholoia. D. W. Keliiokamoku ke Kakauolelo.
8 He paina hui anei ko na Kula Sabati? Hooholoia he paina hui ma ka luakini o Wainee; a na kela a me keia kula e hoomakaukau nona iho.
9 Ka manawa a me kahi e hui hou ai. Hoohi oia ma ka Poaono mua o Ianuari 3 1885; ma ka luakini o Wainee, Lahaina. Heluheluia ka moolelo aponoia. Hooholoia e hoopuka ma ka nupepa KUOKOA.
NA KUMU MANAO.
1 He mea anei e holo ai na hana maikai iloko o kekahi Kula Sabati, ke lilo na hookele ana na ka poe mawa ho o ka Ekalesia? J. K. Hihio
2 Heaha la na hoike maopopo lea, i ka holopono ana o kekahi Kula Sabati? T. F. Nakai
3 Pehea la e ala nui mai ai na Kula Sabati ma na hana lulu dala? D. Naanao
4 He mea hauoli anei ka paina hui ana o na Kula Sabati ma kahi hookahi, aole paha? S. R. Haina
5 He mea pono anei i kekahi kanaka mu awa ma ka oihana Kahu Kula Sabati? Rev. A. Pali
6 Heaha la ka pomaikai e loaa mai ana i na keiki i hoonaauaoia, ma na Kula Sabati? Rev. S. K. Kamakahiki
WILLIS D. KELUOKAMOKU
NA HOOLAHA KUMAU.HALEPAI O THOS. G. THRUM- O KA NUPEPA -SATURDAY PRESS me KUOKOAALANUI KALEPA. HONOLULUMalaila a paiia ai na ano a pau o naBUKE,HOIKE O NA KULA.HOIKE A NA KOMITE,NA HAAWINA KULA SABATI.PAPA KUHIKUHI O NA ANO A PAU,HOOLAHA NUNUI A LIILII,BALOTA, LIPINE PAPALE,TIKETA, WAHI LETA,BILA PAI HAKAUKAHOOLAHA KUDALA,&c. &c. &c.Iloko o ka wa pokole a me ka auhau haahaa.A ma ka halekuai o THOS. G. THRUMma ALANUI PAPU. e loaa ai naKalana kakau o na ano a pau,Wahi Leta " " "Inika " " "Penikala " " "Mea Hoopipili, buke hoomanao,Peni gula a me kumu gula,Kii, a me na laau,Buke kii a na keiki,Kaa a na keiki,Kaa huila lua o na opio.A he Agena no ke ana lole pepa o naKeiki a me na wahineNo ka hoailona ana i na lole me na inoa ponoie hookoia na kauoha a pau no na papa inoake waihoia ma keia halekuai me ka ukupu o ka papa inoa i makemakeia. Uku noka inoa hookahi me ka inika a me ka hulu,$1,50 ina ma ka papa inoa keleawe, a inama ka papa inoa dala, $2.O na kauoha apau mai na mokupuni ehookoia ina e hoouna pu ia mai me ke dalaa me ka moakaka pono o na hoakaka anaTHOS. G. THRUM.NU HOU ! NU HOU !Na Waiwai Hou Loa!NA PAIKINI O KEIA AU.E Loaa no ma ka ha Halekuai oDILLINGHAMA MA,Ma Alanui Papu.Oia na waiwai malalo iho nei:Na Palau, Kaa Huilapalala, Kopala,Piki, Oo, Kui, Koilipi, Na HamareKamana o na ano a pau, Na meaHana a na Kamana, Poe HamoPuna, na Amara a me na meahana o ka Poe Akeakamai a pau.Pena Aila, Vaniki a me na Palaki,Pauda, Poka a me na Kukaepele,Palaki Hamo Puna, Pulumi, Pakeke,Kapu Holoi Lole a me na Papa HoloiLole, na ipuli, na Pa Palai, na Ma kauLawaia, Na Ako Lawaia o na ano apau, na Kaula o na ano a pau, na Pahi,O, a me na Puna, a he nui aku no namea i koe.I KUPONO NO KA HOOHIWAHIWA ANA!NA HALEI hiki ole ia makou ke huai pau aku aka, naoukou no e hele mai a e hoonuuiho. O keiamaluna ae, e loaa no ma ka halekuai oDilinahama Ma,0136-3m Ma ka helu 37, Alanui Papu
W O. SMITHLOIO, LOIO, LOIO.KEENA HANA: Helu 36 alanui Kalepa. tf.W A. KINI.LOIO, LOIO, LOIO.KEENA HANA: Helu 15 Alanui Kaahumanu, Honolulu. tf.W R. KAKELA.LOIO A HE KOKUA MA KE KANAWAI.He Luna Hooiaio Palapala. tf. A ROSA. (AKONI.)LOIO A HE KOKUA MA KE KANAWAI.He Luna Hooiaio Palapala.KEENA HANA: Ma ke Keena S B. DOLE.LOIO, LOIO, LOIO.He Luna Hooiaio Palapala.KEENA HANA: Ma ke KeenaLoio Kuhina. tf.CECIL BROWN.LOIO A HE KOKUA MA KE KANAWAI.A he Agena Hooiaio Palapala noka Mokupuni o Oahu.KEENA HANA: Helu 8 alanuiKaahumanu. tf.JAMES M. MONSARRAT.(MAUNAKEA.)LOIO A HE KOKUAMA KE KANAWAI.He Luna Hooiaio Palapala.KEENA HANA: alanui Kalepa. tf.RICHARD F. BICKERTON.(PEKEKONA.)LOIO A HE KOKUA MA KE KANAWAI.KEENA HANA: Helu 27 alanuiKalepa. tf.
SN. EMERSON. (EMEKONA)
LUNA Hoolaio Palapala Kepa Paahana
no ka apana o Waialua, Oahu. Agena
no ka Hoolaio ana 4 na Palapala no ka
mokupuni o Oahu.
Ua makaukau no hoi oia e ANA AINA
ma ua wahi a pau i makemakeia..
Waialua, Oahu, Nov. 10 ’83. 1148-@
WILLIAM AULD.Luna Hooiaio Palapala Kepa Paahanano ka Apana o Kona.KEENA HANA: Ma ke Keena Wai oHonolulu. tf.S H. MEEKAPU.Tela humuhumu lole.HALE HANA: Helu 11 alanui Nuuanu. tf.C BREWER & CO. (BURUA MA.) Ua makemake ia ka poe mea ILI KAOMALOO a me na ILI BIBI, a pela hoi mena ILI MIKO o na ano a pau, e kuai mai i ko lakou mau ILI me makou, a e haawino makou i ke KUMUKUAI KIEKIELOA o ko kakou Makeke. tf.
JNO. M. KEALOHA.
Luna A Hoolaio Palapala Kepa Paahana
no ka apana o Kawaihau, Kauai. He
Agena no ka Hoolaio ana i no Palapala
no ka apana o Kawaihau, Kauai. He
Komisina Palena Aina no ka apana o
Kawaihau, Kauai, u he Luna Hooki
Mare no ka Pae Aina holookoa
1163-1 yr.
C C. COLEMAN.Amara a he mea hana MekinaKapili Kapuai hao lio.A ME KAHana ana Kaa Lio, etc.,Hale Hana ma Alanui Alii,905-tf E kokoke la i ke Alanui Papu. HE NUI ANEI KOU MAKEMAKE I NAMEKINI HUMUHUMU LOLE!Ina pela, alaila, e kipa mai no ma ka Halekuai oKAKELA & KUKE.A malaila oukou e ike ai a makaikai i na anoMEKINI a WHEEELER a me WILSONmai ke $40 a hiki i ke $50 ke kumukuai oka mea hookahi.NA MEINI A SINGER,ma ke $50 pakahi, ma ke anoMEKINI A WILCOX ME GIBBS,ma ke $30 a hiki i ke $50 ke kumukoai.mea e pau ai ko oukou kanalua e na Makamaka no ke kpono o keia mau Mekini, e naue mai no me kekuihe ole, a e ike no oukou iho.628 tf
PAPA! PAPA!
AIA MA KAHI O
LEWERS & COOKE
(O LUI MA)
ma ke kahua kahiko ma alanui Papu a me Moi.
E loaa ai na
PAPA NOUAIKI
o kela a me keia ano.
Na Pana Puka, Na Puka Aniani, Na Olepelepe,
Na Pou, Na O-a, Na Papa Hele, Na Papu
Ku, A me na Papa Moe nui loa
Na Pili o na Hale o na Ano a Pau.
Na Pepa Hoonani, Na Pena o na Wai e pau
Na Kui mai ke Nui a ka Makalii, Na Ami
Puka, Na Ami Puka Aniani, Na Ami
o na ano a pau, Na Aila Pena, o
keia me keia ano Na Aila Hoo-
maloo, helehulehu wale,
Na Aila e ae o na
ano a pau.
NA WAI VANIKI
A ME NA
WAI HOOHINUHINU NANI
O NA ANO A PAU LOA
NO BALAKI ANO NUI WALE.
A ke hai la aku nei ka lono i na Makamaka a
pau, ua makaukau keia mau Makamaka
o oukou e hoolawa aku ma
na mea a pau e pili ana
ma ka laua oihana
NO KA
UKU HAAHAA LOA.
me ka mea e holo ana mawaena o
LAUA a me ka MEA KUAI
E Hele mai ! E no Makamaka
A e lawa no hoi kooukou makemaka
A me ka oluolu ame kamaikai