Ka Nupepa Kuokoa, Volume XXIII, Number 24, 14 June 1884 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

 

BUKE XXIII, HELU 24.

HONOLULU , POAONO,  IUNE 14, 1884.

NA HELU A PAU,  1176.

 

NA HOOLAHA KUMAU.

 

MAIKAI KA HOI KA  PAPA

             - A ME -

KA  LAAU  O  KOU  HALE.

          NOHEA LA?

KA I  NO  HOI  HO  KAHI  O

          WAILA  MA.

 NANA AKU NO HOI IA, OMI OHI EA IO

O KA LAAU O MAKAWAO I KA UA MEA

O KA NANI.

NA  PAPA!  NA  PAPA!

        -  A ME -

NA PONO KUKULU HALE

O na Ana no a Pau.

 AIA  MA  KE  KIHI  O  NA  ALANUI

Papu  me  Moiwahine,

     HONOLULU.

Malaila e loaa ai e like me ka makemake no ke

KUMUKUAI  MAKEPONO  LOA.

 

PAPA!  PAPA!  PAPA

NA PAPA HULUHULU,

NA PAPA MANOANOA,

NA PAPA I KAHIIA,

NA PAPA KEPA,

PAPA HOLE KEOKEO,

PAPA HOLE ULAULA.

 

Na  Laau,  Na Laau,

NA KUA,

NA KAOLA,

NA AAHO,

NA MOLINA,

NA PEAPEA.

PINE HULUHULU,

PINE I KAHIIA.

NA  PAPA  A  ME  NA  LAAU ULAULA.

PILI ULAULA,

PILI KEOKEO,

PANI PUKA,

PUKA ANIANI,

PANI PUKA ANIANI,

PUKA OLEPELEPE.

 

P  E  N  A

O  NA  ANO  A  PAU.

Hulu Pena mai ka liilii a ke nui,

Aila Pena,

Aila Hoomaloo.

Waniti, Pate,

NA LAKO O KELA A ME KEIA

            ANO.

NA AMI PUKA HALE,

NA AMI PUKA PA,

          ANIANI

PEPA  HALE  A  ME  NA  LIHILIHI,

E loaa no malaila. 

 

PAAKAI  HELU  I,

         - O -

KAKAAKO  ME  PUULOA.

 

  No ke Dala Kuike e loaa no na mea a pau i

haiia ae la so ke Kumukuai Emi Loa.  O na

Kauoha mai Hawaii a Niihau, e loaa aku no

me ka hooko pololeila.  E kipa nui ilaila i ike

i ka oiaio.                                905 tf.

 

NA HOOLAHA KUMAU.

 

DILLINGHAM & CO.

Mau Mea Kuai Lako Hao

Alanui  Papu,  Honolulu.

 

FRANK PAHIA.

ANA  AINA !  ANA  AINA  !!

  KEENA HANA:  Aia ma alanui Moi,

kokoke loa i ka Uwapo o Hooliliamanu.

tf.

 

E wehe ana o A.

M.  Meleki,

No ka Hookahakaha  nui,

- NA LOLE NANI -

O NA LOLE KAU MAKALII &C.

- OIA NA -

PAPALE KANE,

PAPALE WAHINE,

HULU, PUA LAU.

- E HOOMAKA ANA, -

POAKAHI , LA 21,

POALUA , LA 22,

POAKODU , LA 23.

Ma ka halekuai helu 104 alanui Papu.

 

1884 !  KAU  AHAOLELO  1884 !!

MUOI  MAI  NA  MEA  A  PAU !

  O ka Poakahi, Poalua, a me ka Poakolu.  o keia pule ae, e hoomakaukau ana au e hoikeike aku imua o ko'u mau makamaka a hoa'loha Hawaii, he heluna piha o na papale kinohinohi o na wahine mai ka $2.00 o ka papale a pii aku i ke $6.000  He hiki no ia makou ke kinohinohi i na papale ma na kumukuai a pau.  Aole o makou malama i na opala puehu wale i ka makani iloko o ko makou mau halekuai.  He hiki no ia makou ke hooiaio he mau waiwai o ke ano maikai wale no ka makou e kuai aku.  Aole o makou kuai i na waiwai ma na halekuai kudala ma Kapalakiko, aka, na makou iho no e kinohi a hana ko makou mau papale iho.  A ma na lole aahu, aole e hiki i kekahi mau halekuai e ae ke hoopapa mai ia makou, a ke olelo nei maanei, he oi aku ka emi o na kumukuai o ka'u mau lole.  He elima o makou halekuai, a ma o ko makou i na puka uuku e loaa ana.  O na papale piva, $3.00 wale no.                      CHAS. J  FISHEL.

  Halekuai kihi o alanui Hotele me Papu, a me kihi o alanui Nuuanu me Kalepa.

 

LOLE  MAKEPONO

Ke Kuike e loaa no ia ma kahi o

Kakela  me  Kuke.

 - E laa na -

AHINAHINA, KALAKOA.  KEOKEO,

LEPONALO.  PENA,  AILA,

AILA HONUA,  ANIANI.

NA  MEA  PIULA,

Kopa, Aila Hoomaloo, Kui Kakia, Pakeke,

Tabu Kaula, Noho Lao, Hulu

Palahi, na Palumi, ahe agena

no na mokupuni o Hawaii

neino na Lainakini-nao

Lainakini Maoli, Ki-lika, Palule Kalakoa,

Alapia, Kelepa, Na Lole kupono i

ka Wawae, Palule Huluhulu,

Na Lole Huluhulu, Na

ka hoohelo ana, Li

Lole no pini, Lihilihi, etc.

A ME NA

Mikini  Humuhumu

MAKEPONO  LOA.

A he mau

MEA  AI  KAHI:

KA PALAOA,  KOPAA

RAIKI,  PIA,  HOOHU

PAAKAI  HUAALA,

PIA KULINA,  KOPE,

- A ME -

Laau  Lapaau  Kaulana  Loa

A  DR .  JAYNE.

LAAU  HOOMAEMAE  KOKO

LAAU  HOOPAU  NAIO.

PENIKILA,  HUAALE,

LAAU  KUNU.

Me na laau Hamo, a Pela 'ku.

                       860  tf

 

KA MOOLELO KAAO O

Kahanuopaimeki,

Ke keiki alii o ke aupuni o Italia.

Ka Olali o na Waoakua o Arabia,

Ka Naita nana i kuokoa na i na

hana o na Powa.

  E o'u mau hoa hooniponipo o ka moolelo o Kahanuopaineki, e kamailio iki au ua hewa ka hoopuka mua ana a ua haule kekahi man mahele, a nolaila ke hoopololei aku nei au, aia ma kahi o na mahele ehiku kahi i haule, a eia ka pololei:  O na mahele ehiku malalo o na alakai pakahi ehiku, penei ka hoonohonoho ana:  O ka mahele ekahi malalo o ka naita o Pela, me kona mau naita O ka aahu ulaula, ka mea i kapaia ka liona o ke kahua kaua, me kona mau naita he 25; ka mahele ekolu, malalo o ka naita O ka aahu keokeo, ka mea i kapaia ka weli o ke kahua kaua, me kona mau naita he 25; o ka mahele eha, malalo o ka naita o na Ululaau hui o na mauna o Arabia, ka mea i kapaia ka lima hao, me kona mau naita 25; ka mahele elima, malalo o ka naita o ka Hulu omaomao, me kona mau naita he 25; ka mahele eono, malalo o ka Makuisa, ka mea i kapaia ke ahi enaena o ke kahua kaua; ka mahele ehiku malalo o ka naita o ka aahu koko me kona mau naita he 25.

  Oia iho la ke ano o ka hoonohonoho ana ma kahi e pili ana i na mahele ehiku o na naita me ko lakou mau alakai pakahi.

  HE MAU wahi keiki opiopio wale no ke aa aku ana e paio me oukou i keia la, wahi a ka puuku imua o na naita, a nolaila, e na naita punahele a ko'u Moi aloha, e pono oukou e makaukau, no ka mea ua lohe pono mai nei au i na olelo a ua mau wahi keiki nei, i ka pane ana mai nei, aole ka he mea e kanalua ai, aole no ka opiopio ke kumu e hiki ole ai i ko laua mau lima ke oniu i ka pahikaua a ko laua mau kupuna, me ka olelo mai e hoi mai au a olelo aku ia oukou, aole ka i aahu i ka papale o ka hohe wale maluna o ko laua mau poo, a o ko laua umauma, ua lalapaia e ke ahi o ka hopo ole, a nolaila, eia wale no ko'u manao, e malama loa oukou i ka oukou mau hauna pahi me ka eleu nui, no ka mea ina e haulehia kekahi o oukou i kela mau wahi keiki opiopio, alaila e iilo ana ka oukou mau hauna pahi i mea ole.  Ka lohe aku la no ia, a e malama oukou me ka maluhia.

  I ka pau ana o keia mau oleio a ka puuku, ua haawi ae la na naita i na leo huro ekolu, a i ka pau ana o keia mau huro ua haawi ae la na alakai o kela a me keia mahele i ka lakou mau kauoha e laina ko lakou mau puali, a e hoi aku i ko lakou mau hale lole iho me ka makaukau i na wa a pau no ke kauoha ia aku.  E uleu koke mai me ka hakalia ole.  Ia wa i hoike mai ai kela a me keia mau mahele i ko lakou eleu maoli no, ke nana aku ka mea makaikai, aole wahi e hoohalahala ai.

  I ka hoi ana o kela a me keia mea i ko lakou halelole iho, ua meha iho la ke anaina, aole no hoi kekahi mea a maaloalo ae mamua o ke anaina, o ke kali wale aku no o ka hiki mai o ka naita malihini, ka mea a lakou.  Ua hooholo lakou a pau e hoohoka i ka naita malihini me he mea paani la, aka, aole lakou i moeuhane mua o keia keiki a naita opio hoi oia ko lakou mea nana e hoohoka.  I ka hiki pono ana o ka manawa,  o ka manawa no ia i hoike mai ai na lani i ka molale maikai, oiai ua kalae na kuahiwi, ahu wale na kualono, ikeia na pae mauna o Arabia, a ua hoike pu mai la hoi na puu, na awawa, a me na ululaau i ko lakou nani.

  I keia manawa i ikeia aku ai kekahi huakai e puka mai ana mai ka halealii mai, o ka Moi keia me kana mau keiki ka mea ana i kapa aku ai, he mau naita laua mai ka Ululaau mai o ka ehaeha.  O ka Moi, ua aahu oia i kona aanu piha o ke kulana Moi, me kona mahiole nui, a maluna iho e kuuwelu iho ana na ano hulu elima, oia hoi ka hulu ulaula, keokeo, omaomao, eleele, a me ke polu, a ma ke kumu o kahi i hoopaaia ai keia mau hulu, ua hoopuni ia e kekahi kii moe deragona gula i kinohinohiia me na pohaku makamae a pau, a o ua papale nei ua oleloia ma keia moolelo, o ke kumukuai, he hookahi miliona dala.

  O ka aahu hoi o na naita malihini la, oia o Kahanuopaineki, he aahu ulaula ia i like kona ulaula me ka ula o kekahi umu ahi i pahiku ia kona enaena, he aahu kila paa loa keia a he aahu kahiko loa no hoi no ke kupunakane kualua o keia Moi powa, he aahu kila ano e loa keia, no ka mea ina o ka mea e aahu ana i keia kapa, a paio ana na mana kupua a pau maluna o ua kapa nei, oia kahi moolelo pokole e pili ana no keia kapa.  Ua kahikoia no hoi o Kahanuopaineki me ua aahu la, me ka nani a me ka hiehie nui.  O ke kahiko hoi o kahi aikane, he aahu kila omaomao ia, eia kekahi mea kupanaha loa, ua haawi mai la ke alii powa elua ano hulu, he ulaula me ke keokeo, iluna o na papale o laua nei.  Eia ke ano o ua mau hulu nei, o ka hulu ulaula, he hoailona ia o ke aloha pau ole o Kahanuopaineki i kana wahi aikane, o na hulu keokeo hoi, he hoailona ia no ke aloha o kahi aikane ia Kahanuopaineki, oia iho  la ke ano o keia mau hulu.  I ka makaukau ana o na mea a pau, ua kauohaia aku la ke kahu lio ka Moi e hoomakaukau i na lio kaua ekolu, he manawa ole ua makaukau mai la, a i ka ike ana o ka Moi ua makaukau na lio kaua ekolu, ua haawi mai la ke alii powa ia laua nei he elua mau pahi, elua koi kaua, elua laau ihe, a me elua kakaka me na pua.  I ka makaukau ana o na mea a pau, ua kau ae la lakou maluna o na lio kaua a kai aku la no kahi a ke anaina e noho mai la.  I ko lakou hiki pono ana aku mawaho pono o ka puka o ka pa alii, ua ike mai la ke anaina kanaka ia lakou nei, o ko lakou wa no ia i haawi ae ai i na leo huro ekolu me ka hooho pu mai,  E ola mau ko makou Moi i ke Akua, a e mau ka welo ana o kona hae alii ma na mauna nei o Arabia.  Iloko o keia mau leo huro ekolu, ua paiakuli ae la ka lewa i na leo ahiu o ua poe powa nei, a mahope iho ua hooho hou mai la lakou a pau,  E ola mau na naita malihini i kahi i hoomakaukauia no lakou, a i ka lele ana iho o ke 'lii mailuna iho o ka lio, ua lele like iho la na naita malihini ilalo a noho iho la maluna o na noho i hoomakaukauia, a i ke kuu ana iho o ka nae, ua ku mai la ka haku puuku a wehe mai la i na hana e pili ana no ua la nei me ka haiolelo pokole ana mai penei:  E na makaainana o ke 'lii i akoakoa pu mai i keia la, he la hauoli keia no ko kakou Moi a me kakou pu, me kona mau naita helu ekahi, e paani ana lakou me na wahi keiki nei, me kuu manao he mea hilahila loa no ko kakou mau naita ka paani ana aku me keia mau keiki liilii, no ka mea aole laua i haalele i ka waiu o ko laua makuahine ka mea e noho u la no ke aloha ia laua nolaila ke mauao nei au, aole i kupono iki i ko kakou mau naita ke paio me laua nei.  oiai ua ike no kakou i ko kakou mau naita aole he mea nana i pai ko lakou mau lae a puni no paha ke ao nei, aia no nae i ko laua manao.

  Ia wa i hooki ae ai ka haku puuku i kana haiolelo, o ka manawa no ia o ka kakou hiwahiwa i ku ae ai a pane aku la:  Aole maua e haawi pio aku ana i ko maua mau inoa naita, ka inoa hanohano hoi i loaa mai iloko o ko maua mau la opiopio, aia wale no me ka hoao ana e ike ia ai na lanakila, me ka mahalo nui ia oukou, aloha oukou.  Ia wa ku mai la ka Moi a kamailio mai la ua weheia na hana o ka la, o ke ku ae la no ia o ka haku puuku a lalau aku la i kana pu dala a puhi aku la i ka leo maokioki no ekolu manawa, emoole ua ikeia aku la he laina o na naita kaua lio me ko lakou mau alakai pakahi, e maki pololei mai ana i kahi a ka Moi e noho aku ana me kana mau malihini, a ku aku la lakou imua ona, aikeia aku la ka naita o Pela e hele mai ana imua o ka Moi a kamailio ma la ua makau kau kou mau naita no ka hooko ana i kau mau kauoha a pau i makemake ai e hana i keia la me ka mikioi.  I ka pau ana ae o kana mau olelo, ua puhi ae la ka haku puuku i kana pu no ekolu manawa a hookuu iho la i kana pu.

Aole i pau.

 

  Ku pakaki ma ko makou wahi P - e noke nei, nana aku oe, o ka helu o ke ka o ka hapala, paha ka imu, e ole no nae ia, ola ua la maka poniuniu.

 

OWAU  A  ME  IA;

- A  I  OLE, -

OIA NO ANEI?

ME  MOOLELO KAMAHAO !

NO EHIKU ia a maua i noho mehameha ai me Salatela, aohe mau leo e ae i lohe ia o ko maua wale no.  He kakaikahi loa ka maua mau wahi mea e ai ai, a o ka uwaina maikai loa i pai ia me ka wai  mai o ka punawai ka maua mea e inu ai, a o kahi hoi e ai maluna no ia o na papa pohaku i kalaiia i uhiia hoi me na kukini nolunolu, a i hanaia hoi mailoko mai o na lole kumukuai nui loa.  Ma ka paia e kau ana kekahi mau buke kakaikahi, a ua paiia lakou me na ano olelo ano e loa a'u i ike ole ai mamua, a he kope o ka buke Kauoha Hou i paiia ma ka olelo Helene ke waiho hamama mau ana maluna o  ke pakaukau nani nui e ku ana ma ka aoao o ko Salatela wahi moe.

  He ehiku mau la kamahao loa!  A iloko hoi o ia mau la i waihoia mai ai imua o'u ka haawe kaumaha o ka ike hohonu palena ole; a o na mea hoi a pau i pohina iloko o na moolelo, na akeakamai a me na kilokilo ana, ua hoomoakakaia mai ia'u.  Ua hoike pu ia mai ia'u ke kiekie a me ka hohonu o ko'u mau manao aloha ponoi iho, a ua hoopaanau hoi au me ka eehia nui i ke ano o ke ola ana o keia kanaka kamahao loa, ka mea hookahi hoi iloko o keia ao holookoa i hoopihaia me na luuluu a me na hoehaeha ana e hike ole ae ai i ke kanaka maoli nei ke hoomanawanui.

  Ua kamailio ia e maua na mea a pau a koe aku hookahi, a oia hoi ka hooiaio piha no kona ano maoli.  Ua hoohuoi ia e a'u, a ua hoakaka iki ia mai, aka, aole loa i hahai pololei loa ia mai.  Ike iho la au ina wau e ninau maoli aku ana iaia no ka hooiaio piha ana mai me kona waha ponoi no na mea i loaa ia'u e pili ana i kona moolelo, ua like ia me ka hoopa ana i kekahi ehaeha huna - he like hoi me ka uhaki ana i na manao like a me na launa maikai ana e waiho laelae nei mawaena o maua; aka, me ka oiaio loa, aole oia i hookamani iho i ka puana ana ae i keia hoikeike ana e pili ana nona:  "Owau no ka Kristo i kauoha mai ai e kalo a hiki i Kona hike ana."

  Iloko a ka'u mau hakilo ana a pau loa iaia ua hooia ia mai au no kekahi mea ano e e pili ana nona, a oia keia:  Iloko o kela a me keia la e ike mau ana au iaia e ku ana me ka haliu ana o kona mau maka iluna o ka lani, a me ka paa ana o kona mau lima a elua maluna o kona kookoo, a ma ko'u ike aku ma na helehelena o kona nanaina me ke mea la ua ike oia i kekahi mea ana i kaunui loa ai, a e kali wale ana no la no kekahi mea ana i makemake loa ai e ike a i manaolana loa ai hoi; aka, i ka manawa e kulou iho ai kona poo ilalo, a ku malie iho la me he la he mea ua hooluuluu loa ia, lohe aku la au i kona kaniuhu ana iho, me he uwe ana la, me he la ua oi aku ka paakiki o ke kali ana i kana mea e nana mau nei ilina mamua ae o ka hoomanawanui ana i na inea o na makahiki loihi e naue hele nei a i hala aku paha.

  Mahope wale iho, hahai mai la oia ia'u i ke kumu o kona nana ana pela iluna i ka lani, no kona ike ana iho paha i ko'u nana pahaohao aku iaia:  "E kuu keiki, "  wahi ana, "i kela la a i keia la e ike mau ana au i ka hamama mai o na lani imua o'u, a iloko o ke pohaka i hoopuniia e ka malamalama nani e ike aku ana au i kekahi puulu kanaka nui e noho papa mai ana, a pela ko lakou hoonoho papa ia ana a hiki aku i ke kau wahi olinoolino loa.  Mawaena o keia aha kanaka he mau hele helena no kekahi a'u i ike mua ai, a o ka oi loa aku mawaena o lakou kekahi mau kino nani elua e ku aoao mau ana i na wa a pau o Isomara, kuu mea aloha loa o ke ao nei, a o Adelaide hoi, ka mea a'u e hiipoi mau nei he elele na ke aloha, a e kau mau nei iloko o ko'u mau noonoo ana he anela na ka Haku.  O keia poe a pau ke pahola mai nei i ko lakou mau lima imua o'u, he kahea mai nei ia'u me na peahi ana- he hoike ana mai ia ua makemake ia au e hui aku me lakou.  Aka, aole ! ke hoopuni nei lakou i kekahi kino waenakonu i hoaahuia me ka malamalama mau loa.  Ke nana mai nei keia kino hookahi maluna o'u me na helehelena i piha i ke aloha a me ka maemae, aka, oia hookahi wale no mawaena o lakou ka mea pahola ole mai i kona lima imua o'u l  Aia a hoea mai ka manawa e pahola mai ai kona lima imua o'u, e hoea mai no auanei ko'u manawa o ka haoli.  E kali no au nona e like me kela poe a kali mai ia ia'u.  Ke waiho nei kekahi mea imua o'u a'u e hana aku ai.  Malia paha a hoikeike ae au ia Kristo imua o na keiki a kanaka, e kokoke mai no auanei ko'u manawa.  Me keia kino nawaliwali aole loa au e hiki ke hoi hope aku a hoikeike ae Iaia imua o ke ao holookoa; o ka waonahele wale nei no ka mea i koe iho ia'u.  Apopo e hoea mai no o Iosepa, alaila, Ole kristo o na mea a pau e ike ia ana ua hoea aku au imua Ou! "

  I kekahi la ae i ka hoea ana mai o Iosepa, ua haawi hou ia aku la iaia ke siganeta me ke kauoha e hoouna ia na elele e kukala aku iwaena o na lahui kanaka mao a maanei e hui ma ke kau wahi ma kekahi manawa i hahai ia.  A o ke alii Iosepa hoi, mahope iho o ka pau ana o na kauoha i ka haawi ia, hoi hou mai la oia me a'u a noho ma ka wawae o Salatela, e hoolohe ana i kona pomaikai o keia mua aku.  Ike iho la au ma ko Iosepa mau helehelena ua ike oia ke nawaliwali mau nei o Salatela i kela a me keia hora, a o na helehelena mohaha maikai o na manawa i hala ae ke nalohia aku la mai kona mau nanaina aku.

  I ke awakea o kekahi la, oiai maua e ai ana i ko maua aina awakea, ike aku la au i ko Salatela kau ana ae i kona kiaha waina i kona waha, a kau iho la pela no kekahi manawa loihi, a mahope iho o keia ninau mai la oia ia'u:  "Ke mau nei no anei ke ano o ka waina i keia la e like me mamua? "

  " Alaila," wahi hou a Salatela, me ke ku ana iluna, "ua pau ae la ko'u ike ana i ka mikomiko a me ka honi ana i ka aala e ka waina.  He hoailona keia a ua hoea mai ka manawa!"

  Iaia i pane ai pela, ku ana o Iosepa ma ka puka.  Ia manawa huli ae la o Salatela a pane aku la iaia: "E kuu aikane,"  wahi ana, "ke makemake nei au i mau lio.  no ka mea, ua makemake ia au e hele i na hale pea i keia la."

  Oia ka'u i hele mai nei, e kuu Haku,"  wahi a Iosepa.  "Ua hui ae nei na lahuikanaka ma na hale pea, a o ka hapanui o lakou he poe e noho kuee ana, a ke hahana mai nei na manao kuee mawaena o lakou.  O kou leo wale no ka mea nana e pale ae ke kaua a me ka hookahe koko ana.  Ua lawe mai nei au i na lio, me ka manaoio na kuu Haku e pale ae i ke kaua ana mamuli o kana huaolelo."

  A me keia mau huaolelo kau ae la makou maluna o na lio a hele aku la, a oiai makou i hoea aku ai mawaena o na kulanakauhale mehameha a'u i ike mua ai, ua hikilele au i ka ike ana aku ua paapu i na kanaka he mau tausani; e hulali ana me mea kaua mao a maanei.  e lohe ia ana na leo wawalo a hoopaapaa, a e hoike mai ana ua kokoke mai ka manawa o ke kaua a me ka hookahe koko ana.  Aka, i ko makou hiki ana aku, hamau iho la keia mau leo mau maka maluna o na helehelena ihiihi kapu o Salatela, a hooia iho la lakou ua hoea mai ka mea nona ka leo a ko la kou mau kupuna i makau a i wiwo ai.  Ia manawa me ka lea nui a moakaka puana ae la o Salatela i na huaolelo aloha me ka olelo pu ana:  "E maluhia oukou!" a i ka pau ana o keia olelo papa, lele iho la makou ilalo a noho iho la maluna o na puu pohaku iwaena konu o na poai hale pea, o Iosepa a me a'u ku ana ma kona aoao, a ia makou i noho iho ai kahea ae la oia i kela a me keia alii o na lahuikanaka pakahi i akoakoa mai, a kauoha aku la ia lakou e hoopau i na noho kuee ana a e noho ma keia mua aku me ka mahia.

  Mahope iho o ka hookoia ana o keia kauoha, a oiai hoi ka aha e malu ana ku ae ia o Salatela iluna, a ku nana aku la maluna o ka aha kanaka.  Mamua ae o kona kamailio ana, ua hoopiha loa ia iho la na kanaka i ke eehia no ke kau ana iho o kekahi anoano ano e maluna o lakou, a no kekahi manawa wale mahope iho o kona ku wale ana no pela, hoomaka aku la oia e kamailio, a no ka hapa loa o ko'u wahi ike ma ka olelo Arabia, nolaila, ua hiki ole ia'u ke hoike aku a i ole kakau paha i ke ano o kana haiolelo.  Aka, iaia e kamailio ana, ua ike ia aku la me ke kahaha nui ka hapai ia ana ae o Salatela iloko o ke ea a hoopuni ia ae la e kekahi malamalama olinolino nani a moakaka, a o keia malamalama e hoopuni nei iaia, aohe mea e like ai iloko o keia ao holookoa.

  Iloko o keia wa me he la e hoopuni ia ana makou e kekahi poe kino ike ole ia.  Ua lohe pono loa makou i kekahi nehe a nakeke ano e loa i kulike ole me ka nakeke a ka makani e hoonakeke ai, a oiai no hoi iloko o keia wa, aohe makani e pa ana, ua hooia iho la makou he mau kino mana kekahi malaila a makou i ike ole aku ai, a ua hooia ia ka maalo mau mai o keia mau kino ike ole ia mamua o makou mamuli o ka makani e pa mau ana ma ko makou mau papalina me he la he upoipoi ana o na eheu, a me ha mea la he mau anela kekahi malaila, oiai hoi maluna ae o ko makou mau poo e kau mau ana kekahi mea hiki ole ia'u ke hoomaopopo a ke hahai ae i ke ano me he aka la, a na ia mea i pale ae i na kukuna wela o ka la e pa mau nei maluna o makou.

  Haiamu malie ae la kela a me keia kanaka iloko o ia manawa me ka eehia nui, poina iho la lakou i ko lakou mau enemi a hopu lima ae la lakou kekahi i kekahi.  O ka leo a makou e lohe nei o ko Salatela, aka, o na manao o ko ke Akua no ia.  E ku malie ana o Iosepa me he kii mabela la, a aole i huli iki ae kona mau maka ma kahi e koe wale no maluna o Salatela, a ua ike aku la au e helelei mai ana na waimaka mai kona mau maka mai; a owau hoi, aohe a'u mea e ae e hai aku ai koe wale iho no ua hookahaha loa ia au.

  Iloko o keia anoano malie nui, lohe ia aku la ka poha ana mai o na leo himeni nani loa i lohe ole ia mamua, a o ka poe nae nana e himeni ana aole i ike ia; a i ka pau ana iho o keia himeni ana, lohe hou ia aku la kekahi leo eehia loa, a no ia mea ua hoonaueue ia ae la ka aha kanaka, a o na huaolelo i lohe ia aku ma keia leo oia no keia:  "Ua pau!" - na huaolelo hope a ka Haku i pane ai maluna o ke Kea i ko ke Kea i ko ke ao nei, a o na huaolelo hope loa hoi a Salatela i lohe ai ma ke ao nei, a i kahea mai ai hoi iaia e haalele mai i keia ola luuluu ana a e hoi aku i kahi o ka maha mau loa.

  A me keia huaolelo hope loa i lohe ia aku la, puana ae la o Salatela i kana huaolelo eehia hope loa penei:  "A ! na lima e pahola mai nei !  E kuu kristo, e kuu Haku!  Ua hiki mai!  Ua hiki mai!"

  Hopu aku ia maua o Iosepa i kona kino e haule iho ana, aka, ua make e oia mamua o kona hina ana, a iloko koke no o ia manawa i nalohia aku ai na nani a pau e hoopuni ana ia makou oiai oia e ola ana.

                                                                          (Aole i pau.)

 

Na  mea hou.

  Ma ka la 25 o Mei nei, ua malamaia oe anaina hoolaa luakini ma Kawaihae nei, oiai, ma ka hooikaika ana, a me na imi loea ana  a ke kahu kula Sabati, Jno. Stupplebeen keia paa hou ana.

  Ekolu Apana i hiki mai ia la, oia hoi, Kawaihae-uka, Waimea, a me Puako, Piha-u no kahi hale.    

  Mahope o ka akoakoa ana mai o ke anaina holookoa, ua haiolelo mai la o Rev. S. C. Luhia, no na mea e pili ana i ka hoolaa ana.

  A mahope iho o ka pau ana o kana hai ana, ua ku mai la ke Kahu Kula Sabati, o Kawaihae nei Jno Stupplebeen, a hoakaka mai no ka hana mua ia ana, a ua hai pu mai oia no ka nui o na dala i hoolilo ia no keia hoomaemae hou ana i ka hale, ua piha $200.00 a oi aku, ke koena aie $57.00.

  Ia wa, ua hoomaka koke aku la ke anaina, ma ke kahea ana a ke Komite lulu, e wehe ae i na hipuu no ka hoopau ana i na palapu koena dala no ko ke Akua Betera.  O ka huina o na dala i luluia, ua piha, ka $94.10  Lulu hua nui keia, ua kanu pono ia paha i kahi o ka lepo maikai.

  Mahope o ka pau ana oia mau hana, he Ahaaina a ka Haku mahope iho i malamaia, a o ka hookuu noia o na hana me ke mele a me ka pule.

  Mau mea hou ia o ke kai Hawanawana nei.

T. S. N. K. NAKANELUA

    Kawaihae,  S. Kohala.

  Suosuolo no hoi ta voise o ko mateu Li-Fis, me neia mau huaolelo pua-ea ae la, "O sa oi oe o sau ise,  O ta wai olo o Taieies."