Ka Nupepa Kuokoa, Volume XXIII, Number 22, 31 May 1884 — Page 1
| This text was transcribed by: | Gwen Lazear |
| This work is dedicated to: | Awaiaulu |
Ka Nupepa Kuokoa
KE KILOHANA POOKELA NO KA LAHUI HAWAII.
BUKE XXIII, HELU 22. HONOLULU, POAONO, MEI 31, 1884. NA HELU A PAU, 1174.
NA HOOLAHA KUMAU.
MAIKAI KA HOI KA PAPA
- A ME -
KA LAAU O KOU HALE
- NOHEA LA? -
KA INO HOI NO KAHI O
WAILA MA!
NANA AKU NO HOI IA LA, OHI KA IO O
OHI KA IO O MAKAWAO I KA UA MEA O
KA NANI O
NA PAPA! NA PAPA!
- A ME -
NA PONO KUKULU HALE.
O na Ano no a Pau.
AIA MA KE KIHI O NA ALANUI
Papa me Moiwahine,
HONOLULU.
Malaila e loaa ai e like me ka makemake no ke
KUMUKUAI MAKEPONO LOA.
___
PAPA! PAPA! PAPA!
NA PAPA HULUHULU,
NA PAPA MANOANOA,
NA PAPA KEPA,
PAPA HOLE KEOKEO,
PAPA HOLE ULAULA.
_____
Na Laau, Na Laau,
NA KUA,
NA KAOLA,
NA AAHO,
NA MOLINA,
NA PEAPEA.
PINE HULUHULU,
PINE I KAHUA.
A PAPA A ME NA LAAU ULAULA.
PU I ULAULA,
PU I KEOKEO,
PANI PUKA,
PUKA ANIANI,
PANI PUKA ANIANI,
PUKA OLEPELEPE.
_____
P E N A
O NA ANO A PAU,
@A LAKO O KELA A ME KEIA ANO.
A AMI PUKA HALE,
NA AMI PUKA PA,
ANIANI
PEPA HALE A ME NA LIHILIHI,
E loaa no malaila.
____
PAAKAI HELU I,
- O -
KAKAAKO ME PUULOA.
____
No ke Dala Kuike e loaa no na mea a pau i haiia ae la no ke Kumukuai Emi Loa. O na kauoha ma, Hawaii a Niihau, e loaa aku no keia hooko pololeila. E kipa nui laila i ike oiaio. 905 tf.
NA HOOLAHA KUMAU.
DILLINGHAM & CO
MAU MEA KUAI LAKO HAO
Alanui Papa, Honolulu.
Frank Pahia.
ANA AINA! ANA AINA! !
KEENA HANA: Aia ma alanui Moi, kokoke loa i ka Uwapo o Hoohliamanu. U.
E wehe ana o A. M. Meleki.
No ka Hookahakaha nui,
-- NA LOLE NANI --
O NA LOLE KAU MAKALII, &C.
--OIA NA--
PAPALE KANE,
PAPALE WAHINE,
HULU, PUA LAU
--E HOOMAKA ANA,--
POAKAHI, LA 21,
POALUA, LA 22,
POAKOLU, LA 23.
Ma ka halekuai helu 104 alanui Papu.
1884! KAU AHAOLELO 1884 ! !
KUOI MAI NA MEA A PAU !
____
O ka Poakahi, Poalua, a me ka Poakolu, o keia pule ae, e hoomakaukau ana au e hoikeike aku imua o ko'u mau makamaka a hoa'loha Hawaii, he heluna piha o na papale kinohinohi o na wahine mai ka $2.00 o ka papale a pii aku i ke $@.@@@. He hiki no ia makou ke kinohinohi i na papale ma na kumukuai a pau. Aole o makou malama i na opala puehu wale i ka makani iloko o ko makou mau halekuai. He hiki no ia makou ke hooiaio he mau waiwai o ke ano maikai wale no ka makou e kuai aku. Aole o makou kuai i na waiwai ma na halekuai kudala ma Kapalakiko, aka, na makou iho no e kinohi a hana ko makou mau papale iho. A ma na lole aahu, aole e hiki i kekahi mau halekuai e ae ke hoopapa mai ia makou, a ke olelo nei maanei, he oi aku ka emi o na kumukuai o ka'u mau lole. He elima o makou halekuai, a ma o ko makou kuai emi ana i na waiwai, ke holopono nei ka makou maa hana. Ua oluolu pu makou i na puka nuku e loaa ana. O na papale piva, $3.00 wale no. CHAS. J FISHEL.
Halekuai kihi o alanui Hotele me Papu, a me kahi o alanui Nuuanu me Kalepa.
LOLE MAKEPONO
Ke Kuike e loaa no ia ma kahi o
Kakela me Kuke.
--E laa na--
AHINAHINA, KALAKOA. KEOKEO, LEPONALO, PENA, AILA,
AILA HONUA, ANIANI.
NA MEA PIULA,
Kopa, Aila Hoomaloo, Kui Kakia, Pa
keke, Tabu Kaula, Noho Lio, Hulu
Palahi,na Palumi, ahe agena
no na mokupuni o Hawaii
neino na Laina-
kini-nao
Lainakini Maoli, Ki-lika, Palule Kalakoa,
Alapia, Kelepa, Na lole kupono i
ka Wawae, Palule Huluhulu,
Na Lole Huluhulu, Na
ka hoohelo ana, Li
Lole no pini,
Lihilihi, etc.
A ME NA
Mikini Humuhumu
MAKEPONO LOA.
he mau
MEA AI KAHI:
KA PALAOA, KOPAA
RAIKI, PIA, HOOHU
PAAKAI, HUAALA,
PIA KULINA, KOPE
- A HE -
Laau Lapaau Kaulana Loa
A DR. JAYNE.
LAAU, HOOMAEMAE KOKO
LAAU HOOPAU NAIO,
PENIKILA, HUAALE,
LAAU KUNU
Ma na Laau Hamo, a Pala '@IL
@@
KA MOOLELO O
KIHAPIILANI,
KA MEA NANA KIPAPA KANAHELE
O OOPULOA, A ME KA ALA PUPU
I MOLOKAI
____
(KAKAUIA NO KE KUOKOA)
I MAI la ke kahuna, aia i waho o na i Hawaii. o Poo ka inoa, no kaau me ka iwakalua ka hohonu. No keia mau olelo, pane mai la ke 'lii: Pehea he makemake no oe a me kou poe hoa lawaia owau kekahi e holo pu me oukou? Ae mai la ke kahuna, nolaila, kii koke aku la oia i ka lua o kana Hokeo me ke ahu a me na makau lawaia he nui wale, a lawe mai la a haawi i ke alii 'i keia mau mea, a i kona ike ana, hai iho la ke alii ia Koleamoku. Eia au ke holo nei i ka lawaia, me na kamaaina o kaua, nolaila, e noho oe me ka maluhia, me ke kuko ole, a hoi mai au.
Ma keia olelo a Kihapiilani, ua ae maikai mai la o Koleamoku, ka manao he oiaio keia, eia ka he pelo a he uhiuhilau mamane. Mahope iho o ka pau ana o ka laua mau kukai olelo ana, ua ku ae la ke 'lii a honi aku la ia Koleamoku, a no ia mea, ua pane ae la o Koleamoku i ke 'liii, me he mea la e hele loa ana ka paha oe? wahi aku a ke 'lii, aole pela, oiai, he nui wale na pilikia o ka moana, a ma ka hoakaka pono ana a ke 'lii i ka nui o na pilikia ana i manao ai, nolaila, ua pau wale ka manao o ua Koleamoku nei, a ku ae la ke 'lii a hoi aku la a hiki i ka hale, oiai ke kahuna a me kana wahine makua, e kali mai ana iaia.
Ia manawa, pane aku ia ke @@ i ke kahuna, pehea la auanei keia e nalo ai i keia wa ? Hai mai la ke kahuna, ua manao ae nei au e o-pe ae keia i ka ahu moena makalii a lawe aku a kau iluna o na waa a kaa ku kakou mawaho ae nei la, alaila wehe ae, i ole e noonoo mai o Koleamoku, ae, ua pono ia manao, wahi a ke 'lii. (O keia mea e oleloia nei e ke 'lii a me ke kahuna, e hoomanao e ka mea heluhelu, oia no ka wahine a Kihapiilani i hele pu mai ai mai Lahaina mai, ka mea i ike pu i na inea a me ka luhi i ka hele pu ana me kana alii kane i ka imi ana i kahi e ku ai i ka moku, nolaila, ke kokoke aku nei ka mea nona keia moolelo e ku i ka moku o Maui. "a kau oia i Kilohana, i kaupoku o Hanalei.") a pau keia mau olelo ana e ke 'lii me ke kahuna, ua hoomaka koke ka wa-hi ia ana o ua wahine nei i ka ahu moena a paa a lawe ia'ku la e na kanaka me ke kahuna a hiki iluna o na waa, a kau aku la o Kihapiilani a o ka panee aku la no ia o na waa a lana aku la i ke kai a o Hawaii ka pahu hopu, o ka nui o na kanaka hoe waa he 24, a o ke kahuna ka hookele, hui pu me ke 'lii a me kana wahine he 27 ko lakou nui.
(E ka mea heluhelu e ae mai ia'u e wehewehe aku wau ma keia wahi o ko kakou moolelo alii, a nolaila, e waiho iki ko kakou olelo ana no ka holo ana o ke 'lii i Hawaii, a e kamailio pokole kakou no Koleamoku no kona noho ana iho e ho a-a a me kona hoi ana i Hana me kona mau makua a kakou i ike mua ae nei, a i mea e akaka pono ai ko kakou moolelo a me ka hanauna hou o keia au.)
Ia Kihapiilani i honi iho ai ia Koleamoku no ka manawa hope loa, aole paha he mau hihio a kahoaka o na moeuhane oia po iho a me na ouli e hoike mai ana iaia, e kaawale ana oia me ke 'lii kane, ka mea ana i hele hookahi mai ai e like me kona makemake a kakou i ike mua ai i kona moolelo mamua aka, i keia la, ke i mai nei keia mau lalani mele.
Ia Koleamoku i noho iho ai me ka manao ole ae he mau hana keia a kana aloha e haalele mai ai iaia, ua huli pono aku kona mau maka a nana aku la i na waa e holo la i ka moana me ka manao he holo io la keia i ka lawaia, ua hoomau aku o Koleamoku i ka nana ana i ke kilepalepa a ka pea o na waa i ka moana a hiki wale i ka nalowale loa ana o na waa i ka moana o Alenuihaha, nolaila ke manao nei ka mea kakau moolelo, ua pono no oe e ka mea heluhelu e puana'e i keia mau lalani mele e pili ana ia Koleamoku e nana wale aku nei no i ka holo o na waa me ke ili i ka moana, a i manao ia hoi, ua kupono ke puana e
"E ike oe auanei la.
I ka ohenana i ke kai lai,
Ke nana wale ia no i ka moana la,
Ka ua noeanu i Kaleponi la,
Anu iho nei ka po hoa ole la.
Ae, hoi mai la.
I ka wa o na waa i nalowale loa aku ai mai na maka aku o Koleamoku maluna o ka lii laumania o ka moana o Alenuihaha, ua hiki mai la kana mau aikane o Kipahulu a me kekahi poe kamaaina e ae a luana pu iho la me Koleamoku a hiki wale i ka poeleele ana.
I'ela iho la lakou i nanea i a hiki wale i ko lakou moe ana, a ma ke ao ana'e, ua hai ae la kekahi wahine i ka moe imua o Koleamoku a me kona mau hoa, a i ka lohe pono ana mai o Koleamoku i keia olelo, ninau pono mai la oia i ke kaikamahine nana ka moe e kamailio nei, hai aku la, ae, he moeuhane ka'u i keia po iho nei, pehea kau moe ? Wahi a Koleamoku, hai mai la ka mea nana ka moe: o na waa no a me ko kane i holo pu aku nei me ko Kipahulu nei poe, ike aku nei ko'u uhane i ko kane e kamailio pu ana me ke 'lii nui aimoku o Hawaii, ua aahu iho i ka ahuula a e piha ana he anaina nui aole o kana mai, ike aku la au i na u-a laau ka ihe e paa ana ma ka lima o na kanaka a e hana mai ana kekahi poe i na waa he nui wale. Ma ia hope iho ike aku la au i ke 'lii nui o Hawaii e kau ana iluna o na waa nui e holo mai ana i Maui nei a mahope mai na waa a pau, aole nae au i ike i kahi i pae mai ai o ua poe waa nei a o ko'u puoho ae la no ia a noonoo iho la, eia he moe. I ka lohe pono ana o Koleamoku i keia moe olele ae la oia, owai la auanei o kakou e hiki ai e hoakaka mai i ke ano o kau moe ? Olelo ae la hoi kekahi wahine, aole he mea hiki o makou a pau e noho aku nei e hoike i ke ano o ka moe a ianei; aka, he mea pono no ia kakou ke nana aku i keia la a me keia mau la aku mamua: malia, o ka holo io aku nei no keia o ua kane nei au i Hawaii, nolaila ea e kali aku no kakou a i hoi mai aole hoi ana, aka hoi i hoi ole mai alaila, he oiaio ka hoike a ka po iaia nei ma ka moeuhane.
Ma keia olelo a keia wahine ua pono ole ko Koleamoku manao, a ma kekahi la ae, ua hiki mai la ka lono imua o Koleamoku mai kekahi kanaka kamaaina o kahi ana e noho nei ma Kihepali i Kipahulu, ua hala o Kihapiilani i Hawaii me ke kahuna, a na keia kanaka i hai pololei ka moe a ka wahine. I ka lohe ana o Koleamoku i keia mau olelo a keia kanaka, he mea e ke kaumaha a me ke ano e o kona mau noonoo ana, hala na la elima me ka hoi ole mai o ua mau waa nei me ke 'lii, ua maopopo ka moe a ka wahine a me ka hahai ana a ke kanaka, a ma keia mea, ua naauau wa o Koleamoku me ka uwe ana, a ua niki ole iaia ke ai i ka ai: aole no hoi aha mea lealea iloko o kela manawa, ua uwe mau oia i ka po a me ke ao, a ua oleloia ma keia moolelo, hookahi anahulu me na la keu ehiku kona kumakena ana i ke aloha a ua hiki ole i na kaikamahine e noho pu nei meia a me kahi poe e ae ike hoomalielie i kona aloha ia Kihapiilani, a no ia mea, ua kupu mai na noonoo ana iloko o kahi poe e noho pu ana me ia e hoihoi i Hana, a ma ka po ana me ia e hoihoi ae kekahi poe i na lealea hula kilu a he olioli hoi ka kekahi poe a na keia mau hana lealea i hoonanea i ko Koleamoku mau manao kupilikii aloha kane, au hoi e puana ae ai e ka mea heluhelu i keia mau lalani mele malalo iho.
"Akahi hoi au a ike ia.
I ka noiau a ke aloha ia,
Ua ku i ka ii a loko la,
I ka papa nolu i ke puuwai la,
Kupiikiimai mai ka manao la.
Hana e mai nei ia'u la."
A ua hoomau ia na lealea ma ia mau la a me na po, a hiki wale i ka manawa i hoihoi ia ai o Koleamoku i Hana a noho pu me kona mau makua, a he mea kahaha keia no Hoolaemakua i ka haalele ana o ke 'lii Kihapiilani i kana kaikamahine aka, ua maopopo no iaia ke kumu o ko ke 'lii haalele ana i kana kaikamahine, oia no kona ae ole ana'ku i na aina ekolu, a kana kaikamahine i hele aku ai e noi iaia, elike me ka makemake o ke 'lii a me ke kahuna ma ia mea i maopopo ai ia Hoolaemakua a ma kona ano kahuna no hoi kekahi, ma ia mau la ua noho pu o Koleamoku me kona mau makua a hiki wale i kona hanau ana i ke keiki a laua me ke 'lii Kihapiilani. (E ka mea e heluhelu ana i keia moolelo, aole he olelo hou ana i koe no Koleamoku mamua ku o keia moolelo a hiki i ka pau ana. He wahi olelo pokole mamua aku no ke keiki a lama a e pono e hoomaka kakou e hana i ka holo ana o ke 'lii i Hawaii a me kona halawai ana me Umi kona kaikoeke Haku.) Ia Kihapiilani ma i kau ai maluna o na waa a haalele iho ia Kipahulu i kahi ana i noho loihi loa ai a mawaho koke aku no o ke awa aia ua wehe ia ae la ka ahumoena i ope ia ai ka wahine a Kihapiilani.
Aia iloko o keia wa e holo nei ke 'lii me ke kahuna a me na kanaka oi pono ka noho ana o na kanaka maluna o na noho-ana me na hoe pakahi i na lima e kaiehu ana na mapuna hoe, a o ke 'lii hoi nona ka moolelo a me kana wahine aia laua iluna o ke olokea. oia hoi mawaena o na waa kaulua a o ka makani i kela wa e holo nei na waa, he kiu he makani ma Maui aku nei ka waa, he moemoe ka ale, a he kalania ka moana, o keia huakai holo moana a ke 'lii aole he mau noonoo a hoomanao ana'e ana no kona hoa o ka noho ana ma Kipahulu e hoi la me ka waimaka i ke alanui, mai ke kau ana o ua alii nei iluna o na waa a hala loa iwaho moana, aole oia i huli hou a nana i hope, ua hoolei pau kona nanaina ia Hawaii wale no, pela ka liolo ana a hiki wale i ka wa a lakou i ike ai i na manu nene e au ana i ka moana.
I ka ike ia ana o na manu nene e lana ana iluna o ka ilikai, ua pane aku ke kahuna e, auhea oe e kuu alii, pane mai la ke 'lii e o. e hai aku wau ia oe i ke ano o keia auna manu nene e au mai nei i ke kai a e hoomaopopo oe e ke 'lii, o na manu a pau e huli like mai nei na poo i o kakou nei, o ko Maui manu ia no ke kuahiwi o Haleakala, a o na poe manu no hoi e huli like la i Hawaii, no ke kuahiwi la o Maunakea. aole e hui pu ko Maui manu me ko Hawaii, a o Alenuihaha ponoi keia, ina oe ke 'lii e nana pono ae ana i ka puu o Kauiki ua hele a au i ke kai. ke hele iho la o Kaihuakala a waha maluna o Kauwiki, a ke noi iho la i ka wai o Punahoa. A i huli io ae no hoi ka hana o ua alii nei a nana ia Maui, ua like pu io no me ka olelo a ke kahuna. i ke kokoke loa ana aku o na waa ma kahi a ua poe manu nei e au ana, ua lele ko Maui manu a hoi, a pela no hoi ko Hawaii. Aole i pau.
OWAU A ME IA ;
- A I OLE, -
OIA NO ANEI ?
HE MOOLELO KAMAHAO!
I ka pau ana ae o keia olelo ana a Iosepa, haikea ae la nanaina o ke alii Deruse no ka piha huhu i kona ike ana iho he mana hiki ole iaia ke pale ae kai loaa ia Iosepa, a mamuli hoi o ia mana ua hiki loa i kona enemi ino loa, (Iosepa) ka hookelakela ana maluna ona; a o kona poe kanaka hoi. i ko lakou ike ana no i ke siganeta e paa ia ana e Iosepa, ua piha loa ia lakou i ka makau, a hiki ole ia lakou ke oni ae no ka hooko ana i ke kauoha a ko lakou alii ponoi aole e hookuu i ka lakou mau paahao. Aka, no ka piha huhu loa o ua alii Deruse nei, hoao makehewa hou mai la oia e hookelakela hou ae i kona mana malunao ka mana nui (siganeta) ana i kauohaia mai ai e hooko, a me keia kana hookelakela ana mai:
"Ua elemakule ke Alii Nui" (Salatela), wahi a ua alii Deruse nei. "I kona hoea hope ana mai nei ma Damasekusa, ua hina ia kona poo a ua alula mai la kona mau nanaina. Ua nalohia mai ona aku ka Mea Huna o ke Ola, ka mea hoi nana i hoolilo iaia i mea hoopahaohao. Ke hoea mai nei ka make i ona la, a ma ia mea e hoomana hou ole ia ai kana mau kauoha a e hoopau ia ai hoi na manao kaulike. A me keia mau mea a pau ua haalele pu mai la iaia ka noeau nana i hoomana loa iaia mawaena o ko kakou mau kupuna, a nolaila, oiai ua hoonawaliwali ia oia mamuli o kona elemakule ana, aole loa e hiki hou iaia ke alakai i na lahuikanaka me na mana ikaika!"
A i ka pau ana ae o keia olelo ana a ke alii Deruse, poha ae la ka leo o Iosepa me ka moakaka, a pane aka la
"Ke ola nei no ke Alii Nui o na Lahui" O ka mea i loaa iaia ka Mea Huna o ke Ola, aole loa e hiki ke hoopau ia kona mana. E pau ana anei kona Alii Nui ana mamuli o kona ala@ wale no i na kanaka ma kona noeau ? Ua hoohiki ko@ kupuna a me ko'u hoolohe ia kana mau kauoha; a nolaila aole e@@@ a @ @ua kauohaia kana e hoolohe, i kona mau kanawai" Ma kana huaolelo e akoakoa mai auanei na tausani kanaka a hoolilo ae i na noho na kuee ana i mea ole ! A nolaila, ma kau hoohiki paa ana a me ka hoohiki ana a kou mau kupuna, ke kauoha aku nei au ia oe e hoolohe i ke kauoha a keia siganeta ! Ma o ka mea mana ikaika la, a ma o ka inoa o ka Mea Make Ole, ke kauoha aku nei au ia oe e ke Alii Iberahima e hookuu ae i na hoaloha o ke Alii Nui au i lawe pio mai nei"
Iloko o keia manawa aohe mea hookahi i hoopuka leo ae. Huli ae la ua alii Deruse nei a nana aku la i kona poe kanaka, me ka manao paha e kokua ia mai ana oia e kona lahui ponoi, aka, aole loa, oiai ma ko lakou ike ana i ke siganeta a me ka lohe ana i ka inoa o Salatela, ua wiwo loa lakou a ua aa ole hoi e kue mai i na kauoha a keia siganeta. I ka ike ana iho o ua alii Deruse nei ua ku hookahi oia ma kona aoao me ke kokua ole ia mai e kona poe kanaka, aole oia i pane hou ae, aka, hoohuli aku la oia i kona kua imua, o lakou me ka piha huhu, a me ka naunau ana i kona umiumi. Ike koke iho la o Tairela ua hiki mai kona manawa e hele lanakila ai, hopu aku la oia i kana mau mea kaua e waiho ana maluna o na paila ukana a lakou e waiho mokaki ana, e hopu ae la i kona lio a hele aku la, a i ka ike ana o kona mau ukali i keia, hahai aku la lakou mahope ona, me ka hoao ole mai o ua Deruse e papa ia lakou.
I ko Tairela ike ana iho o Iosepa ka mea e hele hope mai ana, ia manawa huli hope ae la oia a pane aku la iaia : "E ki ia mai auanei oe mahope e keia poe Deruse."
Akaaka iho la o Iosepa i ka lohe ana i keia mau huaolelo a Tairela, a pane ae la me ka hoikeike ana ae i ke siganeta : "Aole loa au e make, no ka mea, eia ia'u ke Ki o ke Ola." A mahope o keia huli hou ae la o Iosepa a pane hou aku la i ke alii Deruse : "O keia poe a pau e hele aku no lakou no Damasekusa, a mai laila aku a i ko lakou wahi ponoi. E lohe wale aku ana no auanei kuuu Haku ua hoolohe oe i na kauoha e keia siganeta !"
Nana kee mai la ua alii Deruse nei ia Iosepa i haalele aku ai iaia, me ka pane hoomaikai ole mai i ka Iosepa mau olelo maikai i pane aku ai, a huli mai la lakou nei e hele, me ke alakai pakahi ana i na lio maluna o ke alanui nihinihi.
" A ano, " wahi a Tairela i ninau mai ai ia'u, mahope iho o ka pau ana o kana hahai ana mai i kana moolelo " owai la keia kanaka hoopahaohao nui wale e hiki nei ke hoolohe ia kana mau kauoha a pau e keia lahuikanaka ahiu---ka mea hoi nana e hookauwa nei i ke alii Iosepa a e hoopunihei nei i ke kanaka e like me oe. a e hookau nei hoi maluna ou i na manaoio hoopahaohao ana nona ? Ina wau e hoomanao hou ae i ka D'Everina moolelo e pili ana no Salatusa, ke alii koa Farani na na i hoopunihei ka Emepera Napolio na ; ina wau e hoomanao ae no ka'u mea i ike ai ma Inia a me ka mea hookahi nana i hoopakele ia'u iloko o ka Moana Inia, a me kela keonimana maikai nana i hoopahaohao i ko'u mau noonoo ma ke alanui Broadway ma NuIoka, a ke hoomanao hou ae hoi no ke la kanaka elemakule nana i haawi mai ia'u i ke siganeta no ka lawe ana imua ou ma Italia, ua hoohuikau loa ia ko'u mau noonoo ana ke hoao ae au e hoohalikelike i keia mau mea a'u i ike ai. Ke manao paa nei au me ka hiki ole ole ae ia'u ke hookaawale ae o keia mau kino ola a pau a'u i ike ai iloko o na manawa a me na wahi like ole he hookahi no ia kanaka, a oia no hoi keia Salatela, aka, o ka ninau paha nana e lapu mau ana ia'u ma keia hope aku o ko'u ola ana, oia no keia : 'Owai la keia kanaka, a heaha la kona ano ?" O oe wale no, ma ka'u ike aku, ka mea hookahi e hiki ke hahai mai ; a ina io he mea hiki ia oe ka hahai ana mai i ke ano o keia kanaka ke kau hou aku nei au i na hoomaikai nui loa ana ma luna ae o ka'u mau hoomaikai hope aku nei no kou hoopakele ana i ko'u ola mamuli o kou hoopau ana mai i keia mau manao hoopohihihi iloko ou. "
No keia noi a Tairela pane aku la au, "Aole e hiki ia'u ke hoike aku ia oe ano i ko Salatela ano maoli, no ka mea, aole loa i loaa ia'u na hooiaio loa ana o kona @@o. Aka ina e hiki @ ana ka @ @a keia imua aku e hiki ai ia'u ke hoike aku ia oe me ka hemolele, ke ae nei au e hana aku ia mea no kou pomaikai.
" Me na hoomaikai nui wale, " wahi hou a Tairela, "e ae no wau e uumi iho i keia pilihua o'u a hiki mai ia manawa, ma io e hiki mau ana. Ke hoomanao ae au no keia kanaka ano e me he mea la aia wau ma na palena mawaho o kekahi aina i hehi kanaka ole ia, a oiai makou ma ka makou huakai hope mai nei me Iosepa ua hoohuoi aku wau iaia no ko'u makemake i kona lawe pu ana ia kaua ma kana wahi e lawe aku ai ia oe, aka, ua pane mai la ola o oe wale no ka kona Haku i hoouna mai ai iaia e lawe aku, a oiai oia i pane mai ae pela ua akaka iho la ia'u he mea makehewa wale no ka hoopaakiki ana aku imua ona, a ua hoohalike iho la au i kana' olelo me he kauoha na ka Emepera o Rusia i kona poe kanaka. He mea akaka o Salatela ka mea mana nui maluna o keia lahuikanaka, a aohe mea e hiki ke komo aku iloko o ko lakou mau kuono aia wale no a ae mai oia a alakai ia hoi e kona poe kanaka. Ke hoomaka mai nei e komo mai iloko o'u na manao hopohopo no kou hopena; ke hele nei oe mawaena o keia lahui ahiu a makanahelehele, a imua hoi o kekahi kanaka au i maopopo pono ole loa ai ke ano, a ke uwalo iku nei au ia oe e haalele aku i keia mau manao ou a e huli hoi mai me makou no Damasekusa a me Europa.
" Me na hoomaikai piha a pau no kou hoomanao ana i ko'u pono," wahi a'u. " e hele aku ana no wauma ka'u wahi i makemake ia ai e he'e aku. He hoa'loha io o Salatela na'u a pela no hoi o Iosepa a no ia mea he hilinai ko'u iloko o laua.
Mahope iho o ka maua pau kamailio ma pela, hooikaika loa mai la o Tairela i kona manao ana ia'u e noho, a aole make e hele aku mawaena o keia wahi ahiu, oiai, wahi ana, aole wau e puka hou mai ana mai loko mai o laila, a ina ka oia i ike mua e lawe ia aku ana wau me keia iloko o keia wahi a'u e hele aku ai, ina la ua kiola ia e ia ke siganeta iloko o ke kai i kona manawa i hoouna ia ae ai e lawe ae i ua siganeta nei imua o'u.
Mahope iho o ko'u lohe ana i kona manao pane hou aku la au: "E Tairela, " wahi a'u, "ina wau i ike he make ke kali mai ana ia'u ma ka'u wahi e hele aku nei, ke makemake loa nei wau no ka halawai hikiwawe loa ana me ua make nei, oiai, iloko o keia manawa, ua like pu ko'u makemake loa ana no ka make e like me Salatela. O na mea a pau e pili ana i ko'u ola e pili aku no ia me ka mea nana ke kauoha a'u e hele nei. Oiai aole wau e ike hou aku ana ia oe, mai hoopilihua oe ia oe iho no ia mea. I kou lawe ana mai i ke siganeta a Salatela imua o'u, ua lawe pu mai oe i na nani a pau o keia ao i waiho ia iho na'u, a nolaila ke hoomaikai aku nei wau ia oe no ia mea, a e lawe aku oe a manao iho o ka'u hoomaikai hope loa ana aku keia ia oe. "
Hiolo mai la na waimaka mai na maka mai o Tairela i ka pau ana ae o ka'u kamailio ana, a haalele ae la kona leo iaia i pane hope mai ai: " A ' ohe ae la a'u mea e hiki ai ke hana hou aku nou; aka, e kali no wau ma Damasekusa no ekolu a i ole eono paha mahina, a ina mahope aku o ia manawa aole wau e lohe i kekahi mea e pili ana nou, alaila, e hoao no au e hele huli i keia wahi au e hele nei. "
"Mamua ae o ia manawa, " wahia'u, "e lohe ana no oe i kekahi mea e pili ana no'u; a e manaoio oe, o kai, mea e lohe ai e pili ana no'u, ua pono no wau. "
I kekahi kakahiaka ae lu ia iho la na hale pea no ka hoomakaukau ana e hele io Salatela la, a hele mai la o Tairela a me kona poe uka no ko lakou aloha kino hope loa ana mai ia'u, a hoi aku la lakou no Damasekusa.
Aole i pau.
________
Ua hanau mai he keiki kane na Kololou laua o Mrs Luko, e malama pono i ka hua o ko olua Pahaka.