Ka Nupepa Kuokoa, Volume XXIII, Number 4, 26 Ianuali 1884 — Page 4
| This text was transcribed by: | Marti Steele |
| This work is dedicated to: | R. Dwayne Nakila Steele |
Ka Nupepa Kuokoa
KE KILOHANA POOKELA NO KA LAHUI HAWAII.
Ko kakou Kii Makana!
KA HAKU NELESONA,
NO KA M. H. 1884.
Elike me na mea i @aa mama e pili ana no ka manawa kowa e loaa ai na Ka MAKANA o na kau i hela hope ae.
@ makou o hooko ai i keia makahiki @ ike me ka mo@o a kahiko o "Luna @ ua pulu i ke pulu o iaia," pela n@ @u e kono aku nei i ko makou poe h@kolu e waele e ke pulu o kahi wai@ @. E awiwi, e "umauma kahi" w@hi hou a kahiko.
E loaa na na Laau Kii ma ka hale moe o J. J. Brans@ Opio ma na kihi o alanui Moi me Pelela no $1.75.
Ka Nupepa Kuokoa
No ka Makahiki $2.00
No Eono Mahina 1.00
KUIKE KA RULA.
Poaono Iaunari 26, 1884.
OLA PANAI.
(Substitution.)
Gospel Hymn No. 57.
1.
E Iesu he @ i kau
Maluna iho olu;
Na hewa ia o keia ao,
Me ko'u mau hewa pu.
Ua lilo oe i pani no'e,
I mama kuu luuluu.
2.
Ua haule ae maluna ou
Ko ke Akua kookoo.
Hahauia oe i pani no'u,
A eha kou naau.
Ma kou uwe a koko e,
Hoolaia au.
3.
Ua pa maluna iho ou
Ko ka Makua huhu
A weheia kou poli no'u
O oe kuu Paku.
Ua eha oe, maaino e,
Ua maluhia nae au.
4.
Iesu, ua make oe no'u
I make ole au.
Ua make no a ala hou
I ola panai no'u.
A nou no au, nou no a mau
Maanei a ma ke ao.
HAWAII
Haawina Kula Sabati.
Helu 6, Sabati Feb. 10.
Kumuhana, Ka huli ana o Ludia. Pauku Baibala, Oih. 16; 11 24.
NOLAILA hoi, hookuuia makou mai Teroa, a holo pololei aku la no Samoterake, a ia la iho, i Neapoli:
12 A malaila aku i Pilipi, oia ke kuakauhale nui o ia aoao o Makedohe panalaau ia. Noho iho la mama ia kulanakauhale i kekahi mau la.
13 A i ka la Sabati hele aku la makou iwaho o ke kulanakauhale ma kekahi kahawai, i kahi e pule mauia ai; noho iho la makou e olelo i na wahine i akoakoaia.
14. A o kekahi wahine, o Ludia kona inoa, no ke kulanakauhale no Tuateira, he wahine kuai i ka lole peni, ua hoomana hoi i ke Akua, hoolohe mai la ia a na ka Haku no i holahola kona naau, i hoolohe ia i na mea i oleloia i e Paulo.
15 A bapetizoia iho la ia, a me ko kona hale a nonoi mai la ia, i mai la. Ina manao oukou ua malama pono au i ka Haku, e hele mai i ko'u hale e noho ai. Koe mai la oia ia makou.
16 I ko makou hele ana i kahi e pule ai, halawai mai la kekahi kaikamahine me makou he uhane kilokilo ko loko ona; oia no ka i waiwai nui ai kona mau haku no kana kilokilo ana.
17 Hahai mai la no hoi oia ia Paulo a me makou, a kahea mai la, i mai la. O keia mau kanaka, he mau kauwa lakou na ke Akua kiekie loa, na lakou no i hoike mai ia kakou i ke ala o ke ola.
18 Hana mai no ia i kela mea i na la he nui. Ana ae la o Paulo, a huli ae la, i aku la i ua uhane la, Ke hookikina aku nei au ia oe, ma ka inoa o Iesu Kristo, e puka mai mawaho ona. Puka mai la no ia ia hora no.
19 A ike iho la kona mau haku ua lilo ko lakou mea i waiwai ai, hopu mai la lakou ia Paulo laua me Sila, a kauo aku la ia laua i kahi kuai, i na 'lii.
20 A alako aku la ia laua i na luna, i aku la. Ua nui loa ka hoohaunaele ana mai o keia mau kanaka Iudaio i ko kaou kulanakauhale.
21 A ke ao mai nei laua i ka aoao pono ole ia kakou ke apo aku a malama, no ka mea, he poe Roma kakou.
22 Kue pu mai la ka ahakanaka ia laua, a haehae iho la na luna i ko laua @a, kauoha aku la e hahau ia laua.
23 Hahau nui mai la lakou ia laua, hahao aku laia laua iloko o ka halepaahao kauoha ok@ la i ka luna o ka halepaahao e kiai ikaika loa ia.
24. I ka loaa ana o keia kauoha, hao aku ia oia ia laua maloko lilo o ka halepaahao, ia hoopaa iho la i ko laua mau wawae ma ka laau.
Pauku Gula. Oih. 16: 14.
Manao nui. Ka euanelio ka mea e pono ai ke kino me ka uhane.
Na Heluhelu La I. Oih. 16: 11--24. 2. Pil. 1: 1--30. 3. Luk. 24: 13--31, 4. Luk. 8: 26-40, 5. I Pet. 4: 12--19. 6. Rom. 12: 1--21. 7. Oih. 19: 23--41.
Mele, "Ike kuu Makua," Hoku Ao Nani. p. 109.
Pule no ka poe auwana i hoi mai.
KA WEHEWEHE ME KA NINAU ANA.
Ma ka helu 5 haalele kakou ia Paulo ma e aha ana? E hoomakaukau ana e hele ihea? No ke aha? Mahea lakou ia wa? Ma Tero Mahea ia?
NA MAHELE.
I. Ka huli ana o Ludia. P. 11--15.
II. Makou. Owai? Paulo, Sila, Luka, Timoteo, Teroa.
He wahi kumoku ia. Ua ee lakou maluna o ka moku, ua kau na pea, ua hukiia ka heleuma, a hoomaka lakou e holo. Holo pololei a ihea? Samoterake, he moku liilii ia ma ke kai o Egeana, (kai moku liilii) 38 mile mai Terake mai mawaena o Teroa me Neapoli. A malaila aku a Neapoli ma ka hikina hema ia o Makedonia he wahi kumoku hoi ia.
12. Holo no a hiki ihea? Pilipi, 10 paha mile mai Neapoli aku. He kulanakauhale ia e ku ana ma kekahi hapa kiekie o ka mauna Herumu. Nohea kona inoa? No Pilipo ka makuakane o Alekanedero ka Nui. Na Pilipo ia i kukulu. He panalaau ia no Roma, na ke aupuni o Roma i hoonoho i kekahi poe malaila. A haawi ia lakou i na pono o ia aupuni. Hiki ke balota ma ka la balota aupuni, a malaila i noho ai Paulo ma he mau la.
13. Aole halawai Iudaio malaila, nolaila ma ka la Sabati hele lakou mahea? Mawaho o ke kulanakauhale ma kekahi kahawai, Genesa ka inoa. He wahi pule malaila. He wahi lanai paha, ilaila i hele mau ai na hapule Iudaio e pule. Ilaila i hele ai Paulo ma e haiolelo ai i na wahine i akoakoa malaila.
14. Owai keia wahine malaila? Ludia he wahine Iudaio ma ka hoomana ana. He haipule oia. Nohea? Tuateira he kulanakauhale ma ke komohana o Asia Uuku. @ Heaha kana oihana? He oihana waiwai paha ia. Hoomana oia ia wai? Pehea oia i ka Paulo ma olelo? Hoolohe, a kokua ka Uhane a holahola i kona naau, wehe i ka puka i komo ka olelo a Paulo ma.
15 Manaoio oia a aha ia? Oia me wai? Kona ohana, he mau keiki, a he mau ohua pau pu i ka bapetizoia. Heaha kana i nonoi aku ia Paulo ma? Ua ae anei lakou?
II He uhane ino kai mahikiia e Paulo. P. 16--18.
16 I ka hele hou ana o Paulo ma i kahi e pule ai, owai ka i halawi pu me lakou? Owai ka i waiwai ma kona kilokilo ana.
17 Hahai oia ia Paulo ma ke kahea ana pehea? Oiaio anei kana mau olelo? Ae, manaoio no na daimonio. Iak. 2: 19. Akaka no i na uhane ino o Iesu ke kalahala.
18 No ka walaau mau ana o keia kaikamahine, aha Paulo i ka uhane ino? Ua puka mai anei ia iwaho? Ma ko Paulo mana anei?
III Hahao ia Paulo ma iloko o ka halepaahao. P. 19--24
19 Owai ka i huhu ia Paulo ma? No ke aha? Pau ka mea e waiwai ai na haku. Ma na hana kilokilo a keia kaikamahine ua loaa ke dala. Aole ka nona ponoi ia dala, aka, no kona mau haku. Kilokilo no oia ma ka mana o ka uhane ino, oia hoi ka daimonio iloko ona. Mahikiia ua daimonio la, aole hiki i ke kaikamahine ke kilokilo hou. Ua hahai paha oia mamuli o Paulo ma. Ua lilo i haumana na Iesu. Pau ia kumu e waiwai ai kona mau haku, nolaila huhu lakou a hopu ia wai? A kauo ia laua ihea? Paulo me Sila wale no ka i hopuia. Auhea Luka me Timoteo? Ma kahi e paha laua.
20 Alakoia laua imua oa wai? Me ka olelo pehea? Oiaio anei na laua i hoohaunaele i ke kulanakauhale? Aole Auhea ka haunaele? Na ke kaikamahine kilokilo i hoohaunaele ma kona kahea mau ana, "o keia mau kanaka he mau kauwa lakou na ke Akua kiekie loa, na lakou no i hoike mai ia kakou i ke ala o ke ola." Oia ka mea i haunaele ai. I ka puka ana mai o ka daimonio iwaho, maluhia no.
21 Heaha kekahi mau olelo a na haku? Heaha na mea kupono ole i ko Roma ke apo a malama? Aole anei he pono i ko Roma poe ke manaoio ia Iesu ke kalahala a loaa ke ola?
22 Owai ka i hui pu me na haku o ke kaikamahine? aha na luna i ke kapa o Paulo me Sila? A kauoha e aha ia laua? Kupanaha! Hahau e ia laua me ka hookolokolo oleia, ae, he kue ia i ke kanawai o Roma, aia a hookolokolo ia a ku ka hewa alaila hiki ke hahauia.
23--24 Pehea laua i hanaia ai? Hahauia, hahaoia iloko o ka halepaahao, kiaiia, hoopaaia na wawae i ka****************** laau@. Hana ino loa ia laua elike me na mea hewa loa. Aole nae laua i hewa. Ua hookoia na olelo a Iesu. Mat. 10: 17, 18, 22, 24--25.
KA HOOPILI ANO.
1. Aia a akaka ka hana e wikiwiki e hana. Ina ua kaheaia kekahi e hele i kahi e, i ka ekalesia e, i ka oihana e, i ka aia e e hoi i ka euanelio, o hoomakaukau koke e hele a e hele no. Mai makau i na kai, i na moana mawaena.
2. E hana i mau wahi pule, he mau lanai, he mau wahi hale liilii paha, kahi e akoakoa ai na wahine e haipule, me na kane no kekahi. A e hele mau no ma ia mau wahi e pule, elike me Ludia ma.
3. I nui na Ludia, ka poe hoolohe i ka olelo a ke Akua me ka apo a malama koke. A e hoikeia ka manaoio ma ke noi e bapetizoia. E pule i ka Uhane Hemolele e wehe i ka puka o na naau i komo ka olelo a Iesu iloko i huli mai na makua me na keiki me na ohua a bapetizo like ia.
4 E noi na makua i na kahunapule e hele i ko lakou mau hale e ao i na lala i ka ke Akua olelo. Mai kali a hele na kahunapule, e kii aku, e noi aku, a e hoomakaukau e hookipa.
5 Nui na kaikamahine i uluhia i na uhane ino, a ae e alakaiia lakou iloko o na hewa a nui. E pule nui na haipule e mahikiia aku ua mau diamonio nei.
6 Waiwai kekahi poe i na hana hewa a kekahi poe. Waiwai kekahi mau makua i ka ae ana i na kaikamahine e lilo i poe hookamakama, a o na keikikane i poe aihue a pela aku a nui.
7 Huhu loa keia poe i hoowaiwaiia e na hewa o hai, ke hoopauia keia hana e waiwai ai. Huhu a hana ino i ka poe nana i kokua i ka hoopau ana. A pela aku. Mai makau ia lakou.
Mele, "Hookani Hui," Hoku Ao Nani, p. 134.
Pule i hui a hoonani aku ia Iehova.
OWAU A ME IA;
A I OLE,
OIA NO ANEI?
HE MOOLELO KAMAHAO!
MAHOPE koke iho o ka pau ana o ka D'Everina (oia hoi ka inoa o kuu hoaloha elemakule) mau kamailio ana no Salatusa, a oiai hoi oia e hoomalielie ana i kona mau noonoo kupikipikio, ua pane koke mai la ke kanaka kaahele, o Tairela kona inoa, me keia: "He mea ano e loa keia, oiai owau no kekahi i ike i kekahi kanaka i like loa na ano me ka olua mau mea i hoike mai nei, he kanaka hoi i hoopuniia e na mea hoopahaohao, a i hookau mai i na hoomanao ana e hiki ole ai ke kapae ae mai ko'u mau noonoo aku, elike hoi me ka Salatela a me Salatusa i hana ai maluna pakahi o olua."
A iloko oia manawa, ua ike aku la au ia Tairela me he la e hoowalea iho na oia i na noonoo ana no ke au i hala. A iloko o ka manawa a makou e noho malie nei, me he mea la ka apoia makou e kekahi mana ano e, oiai na hoomanao ana no na mea pakahi a makou i ike like ai e ku mai ana mamua o ko makou mao alo. E noho ana o D'Everina me kona poo e kulou ana mamua o kona umauma, a o kona mau noonoo ia manawa, no na kia hoomanao no ia o Aigupita; a owau hoi, ka mea e kau nui nei no ka hahai ana i na meheu a pau e pili ana no Salatela, ua hoomanao ole ae la au no keia noho mumule ana o ko'u mau hoa, a pane koke aku la au ia Tairela me ka hoopulalelale ole elike me ka hiki ia'u ke uumi: "Ua kau nui loa ko'u manao no ka lohe ana i na mea a pau e pili ana no Salatela, a ma keia kau nui loa ana o'u e ae mai ana anei oe ke noi aku au e hahai mai i kau mau mea i ike no keia kanaka au i ike ai?"
"Ae," wahi a Tairela, "he hauoli nui ko'u no ka hahai ana aku ia olua i na mea a pau a'u i ike ai ma ka halawai ana me kekahi kanaka ano e. I ke kaahele ana mao a maanei o ka honua, elike me a'u i kaahele ai, e halawai mai ana no oe me na mea ano e o kela a me keia ano au e kahaha iho ai, a o na mea wale no i oi loa aku ke ano e ke paa mau ana iloko o kou mau noonoo, a e hooia mai ana hoi no oe, i ka manawa e pau ai kuu hahai ana i ka'u mea i ike ai, he mea hiki ole paha ia oe ke hoopoina iho no keia kanaka a'u e hahai aku nei."
"He hiki loa ia'u ke hoike aku," wahi a'u, "ina e halawai ana kekahi me Salatela, ina no ka manawa hookahi--."
"Ina io o Salatela," wahi a Tairela i hoopuoho mai ai.
"E lawe ae paha kaua kapa iho oia no," wahi a'u, "no ka mea, oia wale no, ina hookahi ou halawai ana me ia, e nalowale ole ana kona mau hiohiona ia oe, e like ae la hoi me ko Salatusa mau hiohiona i nalowale ole aku mai ko D'Everina mau hoomanao ana."
"He mea pahaohao io no," wahi a Tairela i pane mai ai, "aka, e hahai aku ana no wau i ka'u moolelo, a nau no ia e kaana pono iho ina io o Salatela ka'u mea i ike ai."
Panee mai la o D'Everina i kona noho a kokoke, me kona mau maka hulili e kau pono ana maluna o Tairela, a o kona mau helehelena hoi e hoike mai ana e ake ana oia e lohe i na mea a pau e pili ana no keia kanaka ano e a Tairela i ike ai.
"He iwakalua ae nei makahiki i hala," wahi a Tairela i pane mai ai, "i ka manawa o'u e hana ana malalo o ka Hui o Iaia Hikina ma Calcutta, kahi hoi a'u i noho ai a kupa i ka olelo a me ka moolelo o ia aina; a mahope iho o kuu haalele ana i ua hana la, ua komo hou mai la na manao iloko o'u no ke kaahele ana, a pela iho la au i hiki ai i Benare iloko o na manawa e malamaia ana na anaina haipule he nui wale. Ua piha mau na alanui olowi o ke kulanakauhale i na poe haipule a makaikai no hoi, a hiki ole iho la i kekahi mea ke hele me ka ole e hookeke ia mai, aka, ua maha iki au i kekahi la ia'u i auwana hele aku ai a ma ke kau wahi oneanea i hele mau ole ia. He wahi kowa iki mamua pono iho o kekahi hale nui kahiko, nona hoi na paia i kapiliia mailoko mai o na pohaku i laia mai mai kekahi hale okoa i oi loa aku ke kahiko, a maluna pono o ka puka komo o ua hale nei he papainoa popopo ke kau ana me kekahi mau huaolelo ano e loa, me ko'u ike pu iho i keia mau huaolelo aole e hiki ke hoomaopopo ia ke ano e ka poe o keia au no ke kahiko loa. E nanea ana au i ka nana ana i ua mau huaolelo nei, a ia'u i huli ae ai ua hikilele ae la au i ko'u ike ana aku i kekahi kanaka e ku kokoke mai ana, a i like loa hoi na helehelena e like me kau mau mea i hoike mai nei. E nana pono ana hoi oia maluna o keai mau hua kakau, a i ko'u manawa i ike aku ai iaia ua hookuiia mai la o loko o'u e na nanaina luuluu a kaumaha, me he mea la e kanikau ana oia no ke ao holookoa. I kona manawa i hoomaopopo iho ai ua ike au iaia e ku ana, ua kunou aloha hoomaikai mai oia ia'u. A kunou aloha aku la no hoi au me na kamakamailio liilii ana i hele aku i ka nui loa, a ma keia mau kamailio ana ua ike iho la au he kanaka keia i piha i ka naauao, no ia mea, ua ninau hoopaani aku la au ina he mea hiki iaia ke hai mai i ke ano o kela mau huaolelo maluna o ka pohaku. Me ko'u kahaha nui ua hahai koke mai la oia ia'u i ke ano o ua mau huaolelo la, e pili ana no ka pokole o ke ola ana o ke kanaka, me he mea la aole oia i ike ua manao au he hiki iaia ke mahele mai i ke ano o ua huaolelo la, a hoomaka mai la oia e wehewehe mai ia'u i ke ano o na hua pakahi me ko'u hoomaopopo ana iho he hiki loa iaia ke ike i na mea a pau loa e pili ana no keia mau huaolelo ano e.
"Ua hoomaka iho la au e kope i keia mau mea a no ka nui loa o ka wela o ka la, ua huli aku la au a hele aku la malalo o ka malu o ke kuono o ka hale, a malaila hoi au e ike oleia mai ai e ka mea e hele mai ana ma kahi a'u i komo mai ai, oiai hoi e waiho mai ana imua o'u ke alo holookoa o ka hale a me ke kanaka hookahi a'u i haalele aku la malaila. Oiai au e nana ana i ua kanaka nei, ua ike aku la au i kekahi o na kahunapule haahaa loa e nihi malie mai ana mahope o kona kua, a na kona mau kapuai palanehe ole a me kona mau ouli i hoala ae i na manao iloko o'u e nana pono aku iaia. Kau pono aku la ua kahunapule nei i kona mau nanaina tiga maluna o ka malihini a o kona mau ano a pau ikolo o ia manawa he kiu a he powa maoli, a iloko o ia manawa i ike aku ai au i ka hulali ana ae o ka pahi iaia i huki ae ai mailoko ae o kona mau pulima loloa a, ma ka lele hookahi ana, aia aku la oia ma ka aoao o ka mea ana i manao ai e pepehi, aka, mamua ae o ka iho o ka pahi iloko o ka puuwai o ka malihini, ua lele hikiwawe aku la au maluna o ua kahunapule powa nei, kui aku la au i kona lima a haule aku la ka pahi iluna o ka lepo, a me ka puupuu hookahi a'u i kui aku ai nana i kiola pu aku iaia ilalo o ka honua. Me ka hikiwawe i huli ae ai ka malihini a ike iho la i na mea i hana ia, a mamua ae hoi o ka hoomaka ana o ka powa e kaapa no ke ku hou ana ae iluna, ua hopu koke aku la ka malihini i ka pahi, a e kukuli iho ana oia maluna o ka umauma o ka mea powa me ka makaukau e pepehi aku iaia a e ninau aku ana oia i ua kahunapule nei ma kana ano olelo i ke kumu o kona hele ana mai e hoao e pepehi iaia. No kekahi manawa aole i pane iki mai ua kahunapule la, aka, ma ka hoopa ana i kahi oi o ka pahi ma kona puu nana i wehe ae i kona mau lehelehe.
"Ua hoolimalima ia oia," wahi ana, "e kekahi o na Beramina kiekie loa, e hahai aku e pepehi i keia malihini, a i ka manawa e hina ai oia a pau kona ike ana, e huli iho ma kona kino no ka mea Huna o ke Ola ana e paa ana, ka mea hoi nana e hoopakele nei iaia mai ka make mai no na makahiki i hiki ole ke helu ia, elike me na kuhikuhi ana a ko lakou mau kupuna, ka poe i ike a i ma-ka iaia. Aole oia i manao e make ana oia iaia ke pepehi aku oia, no ka mea, ua manaoia aole oia e make iki ana oiai keia mea hana ma ona la.
"He mau nanaina o ka ehaeha a me ka haikea kai pahola ae maluna o na helehelena o ka malihini, a kiola aku la oia i ka wahi a kawa mai iaia aku, iaia i ku ae ai iluna. Aole au e poina iki ana ke hoomanao ae i kana mau olelo i piha i na manao hoinoino a me ke pahaohao iaia i pane aku ai i ke kahuna pule:
"E hele oe a e hai aku i kou haku, aole na ke kila a aole no hoi na ke ka ula, aole na ke koa a aole no hoi na ka mea powa, e hiki ke hoonaueue ae i ka mana ikaika loa o ke ola pau ole. E hai aku oe iaia e noho me ka maluhia iloko o kona mau la kakaikahi i heluia, me ka pakaha ole mai i ka noho na luuluu mau loa a me ka ukana kaumaha o ka ike palena ole, no ka mea, o ka Mea Huna o ke Ola ana e ake la e huli, ka mea hoopunihei weliweli o ka hanu ola palena ole ana e makemake la e loaa, a o ka mea mana ike ole ia nana e pale ae na maka ihe o ka make, aole ia he mea i kuniia a i ole he huaolelo hoonalonalo paha. Na'u a na'u wale no ia, aole he kanaka e hiki ke kaili aku, no ka mea, oia no ke KAUOHA O KA HOAHEWAIA!"
"I ka lohe ana o ke kahunapule powa i keia mau olelo ua huli aku la oia a hele aku la, me kona mau nanaina i hele a haikea no ka piha i weliweli, a ua kolo hele aku la oia me he nahesa la i piha i ka makau no ke kanaka ana i hele mai ai e pepehi.'"
(Aole i pau)
Ko Kakou Kii Makana!
KA HAKU NELEKONA
HE
KEIKI ALII NO KA HEKILI
KE KANAKA I KAPAIA
KA PUKUNIAHI AU-MOANA
O ENELANI.
Na Hoomanao ana i na Kaua a ka Haku Nelekona i hoouka ai me kona mau Aumoku iloko o na kana kaulana i na la i bala aku la.
"Mokukaua Sana Keoki,}
"Aperila 22, M. H. 1801.}
"UA makaukau au e hai aku me ke kuleana he nui wale o na aliimoku a me na koa o na aumoku Denemaka, ua ike lakou i ka pono a me ka hewa, e like me ka mea hiki i ke kanaka hana pono ke hana, aole hoi malalo o na manao huhewa a a me ka nawaliwali o ko lakou alakai
"Ua loaa ia'u ka manawa e hai aku ai ia oe no ka hooiaio ana, mai na kukala hoike kaua leo nui ana a komodoa Olifeta Fisa. Ua olelo iho oia ma loko o kana leta, i kona wa ka i haalele iho ai i kona moku ponoi ka Daneboroga, e hoomau ia ana no ka ke kaua ana o keia moku i ko'u laina. Ina pela, e holahila loa aku oia no kona haalele ana aku i kona mau hoaloha wiwo ole e waiho a make ana maluna o ka oneki. O ke kahua kaua i hala iho nei, aole ia he kahua kaua i hoouka ia me na rula kaua moana naauao o Europa nei, aka, he kaua kipi maoli no keia o na aumoku Denemaka malalo o Komodoa Fisa, i ko lakou kipoka ana mai i ka laina kaua o na aumoku Beritania e hookomo nei i ka nuku o ke awa malalo o ko'u hanohano no ka mea, o ka leo kupinai mua loa o ka pukuniahi e kani ana, he kukala kaua ana ia ma ka hapa o ia aupuni.
"O keia kahua kaua kipikipi i hoike ia ae la, o kahi ia e hoikeia ai ke akamai o na Alihikaua i ke alakai ana i kona mau aumoku iloko o ke ahi, a ua makemake ia hoi oia maluna o ia kahua, e hoike aku oia i na haawina o ke koa a me ka wiwo ole, i hiki ai oia ke hilinai ia e kona aupuni. Ua holo aku oia me ka pupuahulu iluna o kekahi moku okoa aku, me ka haalele ana i kona moku ponoi me ke kumu ole, ua holo paha oia mamua o ka lawe pio ia ana mai o ua moku la, a i ole, mahope iki iho paha, a e like me kana mea i hoike ae ai maloko o kana hoike kaua, aole au i manaoio loa no ia mau hoike, no ka mea, he mea ia e olelo ia ai--ua poino anei oia i ka lawe pu ana i kona hae me ia? No ka hae o kona aupuni a me kona hae Komodoa e kau ana ma ke kia waena o ke Daneboroga, ua lawe pio mai au i ua moku la a me na mea a pau maluna o kona oenki a me na hae elua, a e koi poho aku auanei au i ke aupuni o Denemaka, he pio kela Komodoa na'u maluna o ke kahua kaua.
"Holo aku la oia a kau hou maluna o ka moku Holesetina, wahi ana maloko o kana leta, a lawe ae la i ka hanohano o keia moku malalo ona. O ke kapena wiwo ole o ua moku la, aole oia i makemake iaia e kau aku maluna o kona moku, a aole no hoi i kau ia kona hae i hoike oiaio aia oia iluna olaila. Mai keia moku aku, ua holo hou aku oia me ka pupuahulu a pae iuka o na kahakai ua holo paha oia mamua o ka manawa ilawe pio ia mai ai o ua moku la, ai ole, mahope iki mai paha, a e koi poho hou aku auanei au i ke aupuni o Deremaka he pio kela Komadoa na'u maluna o ke kahua kaua no ka manawa elua. A no kana mau olelo kaena ano ole no kona lanakila, a pela aku, he mea maikai no ke Keiki Alii ke kohe hou ana aku i Alihikaua koa a me ka wiwaole aole hoi i Alihikaua holo wale elike me keia Komodoa. No ka mea na'u i hoopoholo aku he ekolu moku o ka laina, na'u i puhi aku i ke ahi ka moku o ua Komadoa la, na'u i lawe pio moi he 13 aumoku ikaika, a na'u i wawahi liilii aku ka laina holookoa o na aumoku Denemaka i mouoia no ke pale ana i na kahakai o Kopenahegena.
"Ua olelo hou ae oia maloko o kana leta, ua haiia aku ka iaia he elua moku Pelekane i lawe pio ia: Heaha la kona mea i lawe ole ai i ua mau aumoku la? Ua akea ke kahua nona e hana ai--a manaoio ole iho la no ka oia i ka oiaio o ia mau lohe. Malia paha ua ike iho la oia mahope iho, i ka oiaio ole o ia lono mai ka mea nana oia i hai aku; a e olelo ae au ma keia wahi, aole hookahi moku Pelekane kokua e kokoke ana ma ka aoao o ko'u laina kaua, i ka manawa e hooukaia ana o keia kaua.
"Ua olelo hou ae no oia i ka moku e lawe ana i ka hanohano o ko'u hae Alihikaua maluna o ka Elepani, ua ki aku ka wau he hookahi wale no wahi papa pu. Me ka maikai o ka manao--He oiaio ia; aka, no ka mau a me ka hala ole o ka manawa o ko'u mau hoaloha wiwo ole--aole au i makemake e hoomaunauna wale ia i hookahi poka i ka makani.
"Ua ane ehaeha loa ka manao o ua Kamodoa la, i ka olelo ana maloko o kana leta, no ko'u hoouna koke ana aku ka i ka hae o ka lanakila imua o ke Keiki Alii, oiai na aoao elua e hoomau ana no i ke kaua. O ke kanaka i like me Komodoa Fisa ke ano, aole i loaa na haawina o na manaolana maikai, aole oia i minamina i ka maluhia o ke koko o kona mau hoaloha e hookaheia ana maluna o ke kahua enaena o ke ahi--a ua minamina nae oia i kona koko ponoi, a holo iuka o na lae kahakai me ka loaa ole o ka lanakila.
"I mea e hoomoakaka ai ia oe a me ke Keiki Alii, ua ike mai no olua i ke ano o ko'u papa kuhikuhi, oiai ko'u mau aumoku i kuu iho ai ko lakou mau heleuma ma ka aoao mawaho o na aumoku Denemaka. O na batari lana mamua iho o na pa pohaku o Kopenahegena, ua ki mai no ko lakou mau haneri pukuniahi a ku ko oukou mau moku ponoi, pilikia no oukou ia oukou iho. A no ko'u mau aumoku, ua like no a like ina wae e ki aku ana ia uka; no ka mea o ko'u maua umoku e ki aku nei i ko oukou, na ko oukou mau moku ponoi no e ki aku nei ia aku iloko o ka pouli uwahi. Maluna o keia mau mea a pau i hoikeia ae la, ke kukuli nei au a hoomaikai aku i na Lani, no ka haawi ana mai ia'u i ka ikaika maluna o ke kahua kaua--na'u i hoopuehu liilii na aumoku kaua Denemaka. Ina lakou e lilo mai ana i pio na'u maluna o ia kahua weliweli, alaila e lilo mai no auanei au--Owau no ko lakou hoopakele. O ka noho ana maluhia o ke aupuni, oia wale no ka mea nui i ko'u manao. O ke Keiki Alii ua hooko mai oia i ko'u manao, ma o kona lawe ana aku i na hoomakaukau o ke kuikahi, a'u hoi e pule aku nei i na Lani, e hoohui hou ia aku auanei keia mau aupuni iloko o ka hauli a me ka maluhia.
"Haku Nelekona.
"I ka Akukana Kenela Linaholona."
KA HALEKUAI EMI O KE KULA
NAKAUHALE NEI
Chas. J. Fishel,
He lono hauole i ke Akea.
Ua loaa mai nei iloko o keia mau la koke i o nei he 3000 paa lole o na kane, oia ke kuka, lole wawae, puliki, a e kuaiia aku ana no
5.00 Dala
Wale no o ka Paa hookahi. Heaha la ia!
KUAI HOEMI HOPE LOA!
UA KUAHA MAU WAIWAI MA NA HALEKAAI NUNUI O KA HIKINA NO KE KUMUKUAI HE $1000.
Ka Halekuai emi hookahi o ke Kulanakauhale nei.
16 I-a Kalakoa no
1.00 wale no!
HE MAU APA KALAKOA MAIKAI A PAA KEIA, AOLE HE HEHEE A MAE, HE OIA MAU.
2400 papale lede,
E KUAIIA AKU ANA NO KE KUMUKUI HAAHAA LOA, I KUMU E LOAA AI HE KOWA KU PONO NO NA WAIWAI HOU E UPUIA AKU NEI A HOEA MAI MA NA MOKU A KU MAI I KEIA MAU LA KOKE IHO.
E kipa mai e na makamaka a e hooiaio no oukou iho, he emi ka makou mau mea kuai, CHAS. J. FISHEL, Kihi o Alanui Papu me Hotele, me ke kihi o Alanui Nuuanu me (Hae ulaula) Kalepa. (Hae ulaula.)
NA HOOLAHA KUMAU
A S A KAUIIA.
Loio @ ke K@ @ @
J. L. KAI @ @ @
@@@ A HE K@ @@@
KEENA HANA: M@@@
Ahana ma alanui Moi.
W. O. SMITH.
LOIO, LOIO, LOIO
KEENA HANA HELU 30.
HENRY N. KAIU@ LU.
LOIO. LOIO. LOIO
E loaa no ma K@ @ @
kahi @, no ke Keena o W. @ @ @
ma alanui Betela @ @ @
W. A. KINI.
LOIO. LOIO. LOIO.
KEENA HANA: Helu 15 A @ @ @
maau. Honolulu.
W. R. KAKELA.
LOIO A HE KOKUA MA K@ K@
He Luna Hooiaio Palapala
tf
W. L. HOLOKAHIKI
LOIO A HE KOKUA MA KE K@@@
He Luna Hooiaio Palapala
KEENA HANA: Wehekealaala a@@ la.
tf.
A. ROSA (AKONI)
LOIO A HE KOKUA @ KE K @ @ @
He Luna Hooiaia Palapala
KEENA HANA: Ma ke Kee@ @ @
tf
S. B. DOLE.
LOIO, LOIO, LOIO
He Luna Hooiaio Palapala
KEENA HANA: Alanui Kaahumanu.
tf
CECIL BROWN.
LOIO A HE KOKUA MA KE KANAWAI
A he Agena Hooiaio Palapala no ka M@
kupuni o Oahu
KEENA HANA: Helu 8 alanui Kaa@ @
tf
JAMES M. MONSARRAT.
(MAUNAKEA.)
LOIO A HE KOKUA MA KE KANAWAI
He Luna hooiaio Palapala.
KEENA HANA: alanui Kalepa.
RICHARD F. BICKERTON.
(P@ka@na)
LOIO A HE KOKUA MA KA KANAWAI
KEENA HANA: Helu 27 Alanui Kalepa
tf
SAM'L. L. KAWELO.
LOIO, LOIO, LOIO.
KEENA HANA, Puakalehua, alanui Maunakea, Honolulu
SAM'L. K. KAIO.
LOIO, LOIO, LOIO.
KEENA HANA: M@ L. L. K@
Keena o W. C. Akana.
KALE KULIKA
Luna Hooiaio Palapala Moraki a me no Palapala o ia ano, Luna Hooiaio Palapala Aelike mairaona o ka Haku me ke Kauiea, kumu huaai Palapala Mare.
KEENA HANA: Kihi o Alanui Maunak@ me Kaahumanu.
C. C. COLEMAN.
Amara a he mea hana Mekina
Kapili Kapuai hao lio.
A ME KA
Hana ana Kaa Lio, etc.,
Hale Hana ma Alanui Alii,
905-tf E @ ke la i ke Alanui Pa.
S. H. MEEKAPU.
Tela humuhumu lole.
HALE HANA: Helu 11 Alanui Nuuanu
F PAHIA, SAM,'L. M. KAAUKAI
Ana aina!! Ana aina!!!
KEENA HANA: Aia ma alanui Moi, ka @ ke loa i ka Uwapo o Hoohliamanu.
C BREWER & CO. (He ka a ma.)
Ua makemake ia ka poe mea ILI KAMALOO a me na ILI BIBI, a pela hoi o e na ILI MIKO o na ano a pau, e kuai mai @ lakou mau ILI me makou, a e haawi no @ kou i ke i ke KUMUKUAI KIEKIE LOA o @ kakou Makeke.
H HACKFELD & CO.
Ua makemakeia
NA ILI BIPI,
NA KIWI BIPI,
NA IWI BIPI,
E haawi ia no ke kumukuai kiekie o ko kakou makeke nei e
WILLIAM AULD.
Luna Hooiaio Palapala Kepa Pauhana no ka Apana o Kona.
KEENA HANA: Ma ke Keena Wai o Honolulu
OLELO HOOLAHA.
E ike auanei na kanaka a pau he nana mo@ keia Olelo Hoolaha, owau o Apoe (Pake) ka kaina ponoi o Iakoka (Pake) ua hookohu ponoia mai au i hope malama a hooponopono no kona mau waiwai a pau, oiai ua hoi aku no oia i Kina. Ma keia ke hoolahaia aku nei, ka poe a pau i aie iaia, e hookaa koke mai la kou i ko lakou mau aie ia'u iloko o na mahina elua mai ka la e puka aku nei keia Olelo Hoolaha, a i ole, e hoopiiia no lakou ma ke kana wai. Eia kekahi, aole loa au e ae e hookaa i kekahi aie i hoaie ia ma ko'u inoa, ke ole e loaa aku na hoapono ana mai ia'u aku. E lilo keiai kanawai mai keia la aku.
Hanalei, Kauai, Iune 11, '83. 1124 1yr.
WILLIAM WOND.
Luna Hoolulo Palapala Kepa.
KEENA HANA Ma ka Halewai