Ka Nupepa Kuokoa, Volume XXII, Number 51, 22 Kekemapa 1883 — KA MAKANI KONA. [ARTICLE]

KA MAKANI KONA.

Aole he wa e ae a makou i ike ai a me kekahi poe e ae no hoi ka ikaika launa ole mai o ka pa ana a keia makani i kapaia "Makani Kona" i o kakou nei iloko o kela mau la aku nei i pakui pu ia me ka ua. Aole no hoi ma o kakou nei wale no, aka, ma na apana kua aku nei kekahi a ma na mokupuni pu. Ma o kakou nei ua ikeia na poino like ole. Ua hoohioloia ka hale lanai o ka mokuahi Likelike a me kekahi hale hoahu lanahu. Ua kuolo pu ia na moku i ke awa ma na pale o ka uwapo

ua mahuahua no na poino i loaa i kekahi o lakou, a malani no hoi kekahi. Ma ka po Poaono o kela pule ua pii mai ke kai me ka ikaika nui a halanaia kekahi mau hale ma Kakaako, na pa hale, aua hoopoino pu ia kekahi mau mea e ae. Ma keia kai nui no hoi i poino pu ai kekahi mau mea o ka hale waapa o ka Moi. O keia kai nui i pii ai me ka ikaika, ua halana pu ia na loko ia o ke 'lii Pauahi ma Moanalua, a he mau tausani dala ke poho. Ma Waialua, ua hoohioloia kekahi mau hale a palaha ilalo, a o kekahi hale hoi ua laweia ke kaupoku a he wahi okoa i waiho ai. He mau poino e ae no paha kekahi, aole nae i hoikeia mai ia makou. Ma na Koolau ae nei, malaila ka oi loa aku o ka ikaika. He mau hale ua pau ika ulupaia a waiho mokaki ana ilalo, he papa kimo raiki na ka pake he papa nui keia, ua hapaiia a laweia aku a waihoia ma kahi mamao aku mai kahi mua.

Ma na mokupuni he poino ano like me keia maluna ae ka ikeia ma Haiku he mau hale kai hohioloia a pau ka poe o ka hale i ka naholo i pakele ke ola. Ma Paia ma, he mau mile o ka auwaha wai kai puhiia a lele liilii i o a ianei, a pakele ke ola o kekahi kanaka mai poino, ma o kona pa i na apanapana laau. Na lono mai na Waieha mai, Lahaina me Kaanapali ma, aole i lohe ia mai i o makou nei. Ma Hawaii, ua like no na haawina i loaa. He mau puka uwahi hale wili ka i hoohioloia, nui ka ua me ka wai o na kahawai.