Ka Nupepa Kuokoa, Volume XXII, Number 51, 22 December 1883 — Page 1
| This text was transcribed by: | Marti Steele |
| This work is dedicated to: | R. Dwayne Nakila Steele |
Ka Nupepa Kuokoa
KE KILOHANA POOKELA NO KA LAHUI HAWAII.
BUKE XXII. HELU 51. POAONO, DEKEMABA 22, 1883. NA HELU A PAU 1151.
NA HOOLAHA KUMAU
MAIKAI KA HOI
KA PAPA
A ME
KA LAAU O KOU HALE
NOHEA LA?
KAI NO HOI NO KAHI O
WAILA MA.
Nana aku no hoi ia la ohi ka Io o ka laau o Makawao, i ka ua mea hoi o ka nani.
NA PAPA! NA PAPA!
A ME
Na Pono Kukulu Hale
O na Ano no a Pau.
AIA MA KE KIHI O NA ALANUI
Papu me Moiwahine,
HONOLULU.
Malaila e loaa ai e like me ka makemake no ke
KUMUKUAI MAKEPONO LOA.
PAPA! PAPA! PAPA!
NA PAPA HULUHULU,
NA PAPA MANOANOA,
NA PAPA I KAHIIA,
NA PAPA KEPA,
PAPA HOLE KEOKEO,
PAPA HOLE ULAULA.
Na Laau, Na Laau,
NA KUA,
NA KAOLA,
NA AAHO,
NA MOLINA,
NA PEAPEA.
PINE HULUHULU,
PINE I KAHIIA.
NA PAPA A ME NA LAAU ULAULA.
PILI ULAULA,
PILI KEOKEO,
PANI PUKA,
PUKA ANIANI,
PANI PUKA ANIANI,
PUKA OLEPELEPE.
PENA
O NA ANO A PUA,
H@ Pena mai ka liilii a ke nui,
Aila Pena,
Aila Hoomaloo,
Waniti, Pate,
Na Lako o kela a me keia Ano.
NA AMI PUKA HALE,
NA AMI PUKA PA,
ANIANI.
PEPA HALE A ME NA LIHILIHI,
E loaa na malaila.
PAAKAI HELU I,
O
KAKAAKO ME PUULOA.
No ke Dala Kuike e loaa no na mea a pau i haiia ae la no ke Kumukuai Emi Loa. O na Kauoha mai Hawaii a Niihau, e loaa aku no me ka hooko pololeila. E kipa nui ilaila i ike kaoiaio.
905 1y.
NA HOOLAHA KUMAU.
PAPA! PAPA!
NO ALLEN & ROBINSON
Ua wehe ae ne maua
PA KUAI PAPA,
MA
Ka Uwapo o Pakaka.
Na Papa Ulaula o na ano a pau,
Na Papa Paina o na ano a pau,
Na Pili Hale Ulaula,
Na Pili Hale Keokeo,
Na Pepa Molina,
Na Pepa Hoonani Hale.
Na Pena a me na Aila Pena!
Na kui o na ano a pau.
Na Pani Puka a me
Na Pani Puka Aniani,
Na Pani Puka a me
Na Olepelepe.
NA LAKO KUKULU HALE
O NA ANO A PAU!
E Kuaiia ma
KE KUMUKUAI HAAHAA LOA
O keia Makeke.
PAPA! PAPA!
AIA MA KAHI O
LEWERS & COOKE,
(O LUI MA)
ma ke kahua kahiko ma alanui Papu a me Moi.
E loaa ai na
PAPA NOU AIKI.
o kela a me keia ano.
Na Pani Puka, Na Puka Aniani, Na Olepelepe,
Na Pou, Na O-a, Na Papa Hele, Na Papu
Ku, A me na Papa Moe nui loa
Na Pili o na Hale o na Ano a Pau.
Na Pepa Hoonani, Na Pena o na Wai e pau,
Na Kui mai ke Nui a ka Makalii, Na Ami
Puka, Na Ami Puka Aniani, Na Ami
o na ano a pau, Na Aila Pena, o
kela me keia ano Na Aila Hoomaloo,
he lehulehu wale,
Na Aila e ae o na
ano a pau.
NA WAI VANIKI
A ME NA
WAI HOOHINUHINU NANI!
O NA ANO A PAU LOA.
NA BALAKI ANO NUI WALE.
A ke hai ia aku nei ka lono i na Makamaka a
pau, ua makaukau keia mau Makamaka
o oukou e hoolawa aku ma
na mea a pau e pili ana
ma ka laua oihana
NO KA
UKU HAAHAA LOA.
E like me ka mea e holo ana mawaena o
LAUA a me ka MEA KUAI.
E hele mai! E na makamaka!!
A e lawa no hoi ko oukou makemake
me ka oluolu a me ka maikai.
LOLE MAKEPONO
Ke kuike e loaa no ia ma kahi o
Kakela me Kuke.
E laa na
AHINAHINA, KALAKOA. KEOKEO, LEPONALO, PENA, AILA, AILA HONUA, ANIANI.
NA MEA PIULA,
Kopa, Aila Hoomaloo, Kui Kakia, Pakeke, Tabu Kaula, Noho Lio, Hulu, Palahi, na Palumi, ahe agena no na mokupuni o Hawaii neino na Laina-kini-nao
Lainakini Maoli, Ki-lika, Palule Kalakoa, Alapia, Kelepa, Na Lole kupono i ka Wawae, Palule, Huluhulu, Na Lole Huluhulu, Na ka hoohelo ana, Li Lole no pini, Lihilihi, etc.
A ME NA
Mikini Humuhumu
MAKEPONO LOA
A he mau
MEA AI KAHI:
KA PALAOA, KOPAA
RAIKI, PIA, HOOHU
PAAKAI, HUAALA,
PIA KULINA, KOPE,
A HE
Laau Lapaau Kaulana Loa
A DR. JAYNE,
LAAU HOOMAEMAE KOKO
LAAU HOOPAU NAIO,
PENIKILA, HUAALE,
LAAU KUNU
Me na Laau Hamo, a Pela 'ku
840-tf
KA MOOLELO
o
PILIPO KEKOA!
Ka Makai Kiu Ilikini
o
AMERIKA HUIPUIA!
A O KA
NANE HUNA O KA 1776.
(Mai ka peni a ka mea unuhi moolelo o "Onila Maka, ka Makai Kiu Kaulana o Enelani.")
MOKUNA. XXIX.
HE HAKAKA WELIWELI ILOKO O KA OPU O KA HONUA.
I KA Makai Kiu i papa aku ai i kana ilio aole e aoa, kauoha aku la oia iaia e moe ilalo, a kolo aku la oia imua.
Aole i loihi loa aku hana wahi i hele aku ai ike aku la oia i ka malamalama o ke kukui e uwiuwiki mai ana maloko o kekahi rumi.
A iaia i nee hou aku ai imua ike aku la oia i kekahi mea hou.
No ka mea, aia iwaena o kekahi rumi uuku e noho ana elna mau kanaka.
A e paa ana ma ka lima o kekahi he pu panapana e kau pono o kekahi he pu panapana e kau pono ana i ka puuwai o kekahi o laua.
Ia wa no hoi ike aku ai ka Makai Kiu ua mau kanaka la, oia hoi o Matina Aletona a me Winetona, a o Matina Aletona hoi ke kau ana i ka pu panapana i ka puuwai o kona hoa.
Nee malie hou aku la no hoi ua Ilikini nei a kokoke alohe aku la oia i ka leo o Aletona i ka olelo ana aku i kona hoa penei:
Auhea oe e ua hoa nei, ua hiki mai kaua i ka hopena o keia hana, a ua paa hoi oe ia'u iloko o keia lua. He powa wau, a ua ake hoi au e ko ko'u iini, a ina aole, alaila, e haawi aku no au i ko kino i keia la i ai na na iole e noho nei ma keia lua poeleele.
Heaha la kou makemake i hooko aku ai au?
He makemake ko'u e kakau inoa mai oe ma keia palapala.
A e waiho i kau pu ilalo, alaila, e kamalio pu kaua no ia mea.
Aole. Ua paa oe ia'u i keia wa, nolaila, aole e hiki ia'u ke ae aku i kau a hiki i ke ko ana o na mea a pau.
Aole anei e like ka'u olelo me ka palapala hoopaa?
Aohe waiwai o kau olelo ia'u. No ka mea, e lilo auanei ia oe ke dala a pau loa, alaila, haawi ae oe ia'u i ka mana o ke kanawai. Aohe e hiki ia manao hoouhiuhi laumamane ou a hiki i ke ko ana o ka'u olelo, e lawe koke aku au i kou ola.
E kakau inoa aku no au i kena palapala ke make ke kaikamahine.
No ke aha kou mea i ake nui ai e make kela kaikamahine? Oiai ua manao ia oia ua make, nolaila, ua lawa kou imi nona.
Aole, no ka mea, ua ike ka Ilikini aole oia i make, a eia oia ke hookolo nei ma ka meheu o ka mea ola, aole hoi o ka mea make. Nolaila, e make oia e pono ai. Alaila, i ka wa e loaa ai o kona kino i na hoaaloha, e lawe aku no lakou e kanu iaia a nalo, a pau ae ko'u pilikia, a ina hoi aole oia e make e ana, alaila, e lilo no auanei kona mau hiona i mea hoomanao mau na'u, a hiki i ka hopena o ko'u mau la.
Olelo mai ana paha oe, aole oia i make. nolaila, hopohopo oe?
Ae. Aia oia a make e mamua, alaila, kakau inoa aku wau malalo o kena palapala.
E kakau mai oe, alaila, o kona hora no auanei ia e make ai.
Ahea?
Iloko o hookahi hora.
A pehea ke kino?
Alaila, e lawe aku a ka paepae o ka puka hale o kona makuakane.
Ua ae au e kakau inoa,
Ua pono, alia, e pane mua mai i ka'u ninau. Pehea e lilo ai ia oe keia waiwai ina e pau ana na hooilina i ka make?
Eia, no ka mea, owau ka moopuna a ka mea nana i hana ka palapala kauoha.
Alaila, he makuakane oe no keia kaikamahine ea?
Ae he inoa makuakane au no ua kaikamahine la a me Wekila Pika. No ka mea, mamua o ka mare ana o ko laua kupunakane i ko laua hupunawahine, ua hanau mua ke keiki a ko laua kupunakane me kana wahine mua, a owau ua keiki la.
A pehea i paa ole ai kou inoa iloko o ka palapala kauoha?
No ka mea, ua homo loa ko'u kupunakane i kana keiki, oia hoi ko'u makuakane, elike me ke diabolo. Nolaila, ma ko'u hoomaopopo iho he wahi makuakane haukae loa no paha ko'u.
Alaila, he keiki oe na ko Wekila Pika makuakane?
Ae, he hoahanau ko'u makuakane no ko Wekila Pika makuakane?
A pehea i ike ole ai o Wekila Pika ia oe a me kou makuakane?
O, he mea maopopo loa ia. No kona hilahila i kona hoahanau, a ua manao no hoi oia ua make; a me he mea la, aole no paha oia i ike eia no wau ke ola nei.
A pehea e hiki ai ia oe ke hooia aku i kou pili?
He mau hoike no ko'u. Oiai, ua make aku ia o Wekila Pika ma ka lima o na powa, a nolaila, ina e make pu ana me ke kaikamahine, alaila, aohe mea nana e keakea mai ko'u komo ana aku iloko o ka waiwai. No ka mea, owau wale no ka hoilina i koe.
Aka, e lilo no auanei ia Beramile ka hapa o kona kaikamahine, wahi a Aletona.
Aole loa, no ka mea, eia ia'u ka palapala kauoha mua i hana ia ai. Ua loaa mai ua palapala kauoha la i'au i ka po a kakou i komo ai iloko o kona rumi, no ka mea, ua ike no kuu kupunakane eia no wau ke ola nei, nolaila, ma na olelo o ua palapala kauoha la owau ka hooilina oiaio ke make o Wekila Pika a me Mariona me ka hanau keiki ole.
Ua ike no nae paha o Beramile eia no oe ke ola nei?
Aole loa oia i ike iki ia'u, aka, ma na olelo o ua palapala kauoha la, ua manao oia ua hana ia na olelo pela i loaa ai i kekahi mea e aku ana i ike ole ai. No ka mea, ina aole i ike ka mea nana keia palapala kauoha, eia no he hooilina ke ola nei, aole oia e hana pela.
A eia no nae paha ia oe ua palapala kauoha la?
Ae.
E hoike mai ana oe ia'u ia mau olelo alaila, kakau inoa mai oe, a e make no auanei ua kaikamahine la iloko o hookahi hora.
Ae e kakau aku au.
Hookahi mea i koe, wahi a Aletona, malia o ahewa ia mai oe nau no i pepehi, a lilo wale kou kuleana iloko o ka waiwai?
Aole.
A pehea e nalo ai ia oe na kohokoho o ka lehulehu?
Aohe mea i ike eia no au ke ola nei, no ka mea, aole au e hoike ae ana a hala na malama eono a hookahi paha makahiki, alaila, iloko o kela wa, aole e hiki ke manao ia mai owau ka mea nana i pepehi.
He hohonu no kou maalea a me ke akamai, wahi a Aletona.
Ae, aia a nui ka maalea a me ke akamai, alaila, ko ka iini iloko o keia hana wahi a ka pane a Winetona.
He oiaio, ua lohe ka Makai Kiu i keia mau olelo a pau i hoike ia ae la maluna.
Nolaila, noonoo iho la oia pehea la e hiki ai iaia ke lawelawe ai i ko ai kona iini.
Me ka eleu loa, hooholo iho la oia e hele kino maoli aku no a mua o na powa. Nolaila, hele aku la oia iloko o ua rumi la me na pu panapana ma na lima a elua a ku aku la imua o ua mau kanaka la a pane aku la:
E haawi pio mai! He mau pio olua na'u.
Ku ino ae la o Aletona a me Winetona iluna a ki like mai la i ka Ilikini.
Aka, moe e iho la ka Ilikini ilalo a hala ae la na poka.
Nolaila, me ka hakalia ole, ki aku la oia ia laua, aka, kanapi iho la nae kekahi pu a hala aku la kekahi, a mamua o ka hiki ana iaia ke ki hou aku, lele like mai la laua maluna ona me na pahi loloa, a lohe pu ae la no hoi oia i ka nakeke o na kapuai wawae mahope ona, e hoike mai ana, ua lohe ia keia kani uina ana a na pu.
Iloko oia hora kupilikii ua hoi mai iloko o kona mau aakoko ka hopo ole o kona mau kupuna Ilikini, a aa aku la oia e ku hookahi me laua.
Aka, aia nae ma kona kua mai e kolo mai ana ke kolu o ka powa e hou aku i kana pahi aloha ole ma kona iwihoehoe a e apahu ae hoi i kona ola iwaena o kana hoomanawanui ana a aneane e ko kana mea e imi nei.
He oiaio, ua sila paa ia kona hopena ma keia ao, a e haulehia ana hoi na koii a ka manaolana o kona puuwai i noho ia e ka hoomanawanui, aka, iloko pu oia sekona, ua lohe ia aku ka nunulu ana mai a kekahi leo ilio me ka huhu.
A, ua hiki mai he kokua, no ka mea, aia ka ilio a ua Ilikini la ke ku aku la me ka makaukau e lele aku maluna o ua kanaka la.
MOKUNA XXX.
KA HOPENA.
Ua hiki mai ka ilio a ua Makai Kiu la iloko o ka wa kupono loa e hoopakele aku ai i ke ola o kona haku.
No ka mea, e hoomaka ana na powa e ki iaia, oiai, ua waiho iho la oia i kana pahi, ia wa no i lele aku ai ua ilio la a paa ma ke kani-ai a hina aku la ilalo.
I ka wa i paa aku ai ka puu o ua kanaka la, ua kani aku la ka pu a ku ke kaupoku o ka hale.
A iloko no hoi o ia sekona hookahi haule aku la o Aletona ilalo, a pela pu no hoi me Winetona, no ka mea, ua ku aku la ko laua mau puuwai i ka maka pahi a ka Ilikini.
I ka wa i haule a make aku ai ua mau kanaka la, ua hookuu ae la ua ilio nei.
A i ka nana pono ana a ua Ilikini la ike iho la ia ua hiki kona hopena ma keia ao e hana ai i na karaima.
Oiai, ua lohe ua Ilikini la i ka olelo ana ae a Winetona no ka palapala kauoha, nolaila, huli iho la oia ma kona kino a loaa iho la ua palapala kauoha nei.
Uuuhi pu ae la no hoi oia mailoko ae o kona pakeke he apana lole aahu no Mariona, a honi iho la ka ilio a kauoha aku la kona kahu e hele imi.
Aole nae i loihi loa aku kona wahi i hele aku ai.
No ka mea, ua ike e aku la ka Makai Kiu i ka uwikiuwiki mai o ka malamalama kukui.
Kauoha aku la oia i kana ilio, e moe iho ilalo a kolo aku la oia imua.
Iaia i hiki aku ai ma ua rumi la, ua paku ia mai o mua i ka puka komo me kekahi huluhulu.
Wehe ae la oia ma kekahi aoao a kiei aku la iloko a ike aku la oia i kekahi mea hou.
No ka mea, aia maloko o ua rumi la he elua mau wahine opio.
Hookahi o laua e moe ana iluna ke alo o kekahi moe a o kekahi hoi e ku ana ma ka aoao me ka paa ana i ka pahi a me ka pu panapana.
Ike aku la oia ia wa o Mariona Beramile ka mea e hiolani ana, a o ka uhane a Lu Lavonia i ike ai ka mea e ku ana ma kona aoao.
He oiaio, e ku makaukau ana ua wahine opio la e hooko i ka hopena o Mariona ma keia ao ke loaa aku iaia ke kauoha mai ia Aletona aku.
E hoomaikai ia na lani, wahi a ka Makai Kiu, ua hiki mai au i ka hopena e hookoia ai ka holo lea ana o ka'u hana.
Ia wa komo kino aku la oia iloko me ka hopo ole a ku ana imua o ua wahine opio la.
I ka ike ana ona iaia nei, hapai ae la oia i kana pu panapana iluna a pane mai la:
E ku aku, ina oe e nee hou mai imua, e make no oe i keia wa.
Aka, aohe oia nei hoolohe aku i kana olelo, aka, hele aku la no nae keia a pane aku la:
He hoa'loha au, nolaila, mai hopohopo oe no'u.
Ia wa no i hookuu iho ai ua wahine opio la i kana pu ilalo, a huli ae la i ka mea e moe ana a puili ae i kona mau lima ma ka ai a hooho iho la:
E Mariona, ua ola kaua, o ka Makai Kiu keia.
Ahea kakou haalele i keia wahi, i ninau aku ka uhane, [malalo o keia inoa e kapaia ai ua wahine opio kamahao la.]
He hiki no nae paha i kou kokoolua ke hele?
Ae.
Mahope iho, hoike mai la o Mariona i ka Makai Kiu no ka hoao ana o kona hoa e hoopakele iaia, a oia hoi kana mea i olelo ai iloko o kana leta.
He oiaio hoi, o ka moolelo o Amelia Lavonia, he wahi moolelo kupanaha no ia.
No ka mea, ua aihue ia oia i kona wa opiopio e ka poe aeahaukae a malalo o ka Winetona alakai ana i ua poe la i hui pu ai oia iloko o keia hana.
I ka lohe ana o Amelia Lavonia eia no kona kaikaina o Lu Lavonia ke ola nei, a he hoahanau o Mariona nona, aole e hiki iaia ke uumi iho i kona aloha nona.
Mahope iho o ka lohe ana o ka Makai Kiu i keia mau mea a pau, hoomakaukau iho la lakou e hoi no ka home.
Ia wa, lawe aku la ka Ilikini ia laua ma kekahi ala okoa, a iloko o kekahi mau hora, hiki aku la lakou ma ka hale noho o Beramile.
Haalele iho la ka Makai Kiu i na wahine opio ma kekahi wahi a hele hookahi aku la oia e hoike i keia nuhou ano nui.
I ua Ilikini la i hiki aku ai iloko, ike aku la oia ia Wekila Pika, Lu Lavonia a me Beramile, a hele like aku la lakou ma kona aoao, me ka pane leo ole o kekahi a mahope iho pane aku la o Lu Lavonia:
Aole paha i ko kau hana, no ka mea, ke hoike mai nei kou mau hiona i ke kaumaha o kou puuwai.
Haka pono aku la ka Ilikini a pane aku la:
Aole loa au e haulehia ma ka'u hana.
A auhea o Mariona?
Aia o Mariona me ko kaikaina iloko o ka hale mawaho ae nei.
Ia wa hooho like ae la lakou a holo like aku la i kahi a ka Makai Kiu i olelo mai ai, a hui hou iho la o Beramile me kana kaikamahine i nalowale, a o Lu Lavonia hoi me kona kaikaina.
Mahope iho, hoi hou mai la lakou iloko o ka hale, me ka manao ole ae no ka Ilikini, oiai e wehewehe ana ua mau wahine la i ko laua mau moolelo pakahi, a mahope iho, ninau ae la kekahi:
Auhea ka Ilikini? Auhea ko kakou hoopakele?
Aka, aole nae he mea i ike iki iaia, oiai, ua hala ae la he mau pule me ka lohe ole ia o ua Ilikini la. Ua nalowale kupanaha oia,
No ka mea, iloko o ia manawa, ua hoomaka ae ke kaua kipi kuloko o Amerika Hui ia wa.
Iloko keia wa ua hoohuiia ae la o Mariona me Wekila Pika ma ka berita mare.
He eono malama i hala ae me ka ike ole ia o ua Ilikini nei.
Aka, ma kekahi po, oiai o Lu Lavonia e holoholo hookahi ana ina ka mala pua ma kekahi po mahina, oili mai la kekahi mea mailoko mai o na laalaau a ku ana imua o ka wahine opio.
Malalo o ke aiai o ka mahina, ike aku la oia he kanaka ui i kahiko ia me ka aahu koa.
A iaia i nana pono loa aku ai, ike aku la oia o Pilipo Kekoa no ia ka Makai Kiu Ilikini.
Haawi aku la o Lu i kona lima iaia, aka, kuemi hope aku la oia a opea ae la kona mau lima ma kona alo a pane mai la:
I hele mai nei au e koi aku i ko'u uku.
Ae ua hauoli loa au, wahi a Lu.
Ua hauoli oe
Ae, no ka mea, ua kali iho nei o Beramile ia oe no ko hiki mai e koi i kou uku.
Ae, no ka mea, ua kali iho nei o Beramile ia oe no ko hiki mai e koi i kou uku.
Aohe aie o Beramile ia'u, o oe ka i aie ia'u.
Owai ka i aie ia oe? He oiaio, o ko'u hoomaikai aku ia oe no kou hoopakele ana i ko'u ola.
No ko hoohiki.
Ae, o kuu hoohiki.
E Lu Lavonia, aole owau kou hoa e kohu ai ke kaunu ana; no ka mea, ke holo nei ke koko o ke kanaka ili ulaula o ka ululaau iloko o ko'u mau aakoko; aka, ua aloha nae au ia oe, ua eha hoi ko'u puuwai i ka eha lima ole; aole anei oe e ae mai o ko ALOHA ko'u uku. Oia wale iho no ka'u noi i kou lokomaikai
Ko aloha,
Ko aloha
Ka'u mea nui.
He makana,
He makana
Na ka puuwai.
Ia wa no i haawi aku ai ua wahine opio la i kona lima, a hohola ae la ka mino aka ma na papalina o ua Ilikini la.
Paa iho la oia i ka lima palupalu o ka wahine opio iloko o kona lima no kekahi manawa, a hapai ae la iluna i kona mau lehelehe a muki iho la, hookuu ae la a pane aku la:
Ke hilinai nei au ia oe; a i hoi hou mai au, alaila, o ka lei anapanapa oe a ko'u puuwai, e mare ai. A ia wa hoi au e hoi mai ai e ike ai oe i ka alohilohi o na hoku ma kahi o keia mau pihi keleawe e hulali nei, a kuhi ae la ka Ilikini ma kona mau poohiwi.
No kekahi manawa ku iho la ia a pane hou aku la:
A ina i hoi ole mai au me na hoku ma keia mau wahi, alaila, e hoomanao ae oe ua hala au ma kela aoao, a kuhi kuhi ae la oia iluna o ka lani, e hoike aku ana iaia, ua hoi aku kona uhane ma na paepae kapu o ka Makua e hosana ai i kona inoa ma na lani kiekie.
Hauoli loa iho la o Lu, no ka mea, ua hoomaka mai la ka a ana o ke aloha iloko o kona puuwai no ka Ilikini, mai ka la i ana hoopakele ai iaia mai ka wa mai.
No hookahi hora paha ko la ia noho pu ana, a hele aku la o Pilipo Kekoa.
He eha makahiki ma ia mua mai, ma kekahi po, e hulili ana na kukui o ke keena hookipa o Beramile, no ka mea, he po mare ua po la.
Oiai ua hoi mai o Pilipo Kekoa mai ke kaua mai me na hoku maluna o ko na mau poohiwi, a ia wa i mare ai o Lu Lavonia me kekahi Alihikaua o ka Pu ali kaua o Amerika Hui.
He oiaio, ua lilo ka hanohano o ke kahua kaua i ka Makai Kiu, a ua loaa hoi iaia ka haawina o ka oihana koa, oia hoi ka HANOHANO ke KIEKIE me ke KAULANA.
Ma keia helu e na makamaka, ua hiki mai kakou i ka hopena o ka moolelo o Pilipo Kekoa, ka Makai Kiu Ilikini o Amerika. Ua lana mau ka manao o ko oukou mea unuhi e panee mau aku ma ke kahua o ke KUOKOA i na moolelo ku i ka naauao a me ka hoonaue puuwai; nolaila, ke pahola aku nei ko oukou mea unuhi i kona aloha Karisimaka no na makamaka heluhelu o ke KUOKOA. Welina.
SAM K. KAEO.
Honolulu, Dec. 20, 1883.
NA MEA HOU O KONA HEMA.
He mea hou ka ike ana i ka hana houia ana o ke alanui aupuni e kamoe ana mauka mai Honokua a Napoopoo, o na kumu kope a me na kumu ulu e ulu koke ana ma kapa alanui, ua pau i ke okiia, a o ka poe nona keia mau mea i okiia, ua piha loa lakou me ka huhu. O ka nui o na dala i lilo no keia hana hou ana, he 200 paha a oi. E aho ia mau dala i lilo malaila mamua o ka lilo wale i kekahi mau mea okoa.
Ma ka po o ka la 28 o Nov. ma Keokea, ua naha hookahi waa nui a me hookahi waa uuku a me hookahi upena opelu i weluwelu. O na mea nona keia mau waiwai, o Hamu a me Keawe.
Ma ke ahiahi o ua la nei, ua ikeia ke ano okaikai, a ma ka wanaao oia ka manawa i hiki mai ai o keia poino. O kahi waa uuku nae, ua lawe loa ke kai i kona kino a nalowale. E ao mai ana keia pilikia ia kakou no na manawa e hiki mai ana, e makaala.
S. M. PAAHAO.
Kona Hema, Hawaii.
KA LUA O KE KUAEA.
Ua ikeia ma ka hoolaha a E. P. Hoaai i puka ma keia pepa e pili ana no Keoni Kalama ka haiolelo kaulana, me ka mahaloia o kana haiolelo ma ka luakini o Haili ma Hilo; pela no, ku no i ka oiaio ole wale ke pakuiia mai kona kulana me ka loihi o ke a'u o ko ipu baka me ke kika, e hele ana ma ke alanui o Hilo nei me he luina la o na moku okohola, a ma ka lono oiaio mai, he hoa pahupahu no ka "Ua waahia o Waipio i Hamakua."
Kupono io no i kahu no kekahi ekalesia ma ke kaena a Hoaai. He oiaio no ia, o ke kookoolua io na o Ku: aea ka mea hana i na mea huna o ka pouli a hoikeia na haawina o ke kaumaha ma ke akea, aole anei pela ka mea hilinai ma kona akamai iho a hookiekie ka naau imua o ke Akua?
E makaala e na kahi ekalesia a mai ae hou ia Keoni Kalama e haiolelo hou ma na luakini, aia a ano hou ae oia mai na mea ano ino ae alaila he hoa loha ia no ka pono a ina aole, e hoo kaawale loa aku iaia me he mea e la.
J. S. KALANA
Hilo, Hawaii.
Ua olelo ae ko makou makamaka o J. L. Kaulukou, iloko o ka halawai makaainana o ka po Poakahi nei, ua hewa na kumu ao kahiko o ka lahui no ke ao ole i ka olelo Enelani, a he kumu ka ia e loaa ai na oihana i kahi poe He wahi manao kuhihewa paha ia; a i keia pule ae e kamailio ai makou maluna o ia kumuhana.