Ka Nupepa Kuokoa, Volume XXII, Number 42, 20 ʻOkakopa 1883 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

 

NA HOOLAHA KUMAU

 

MAIKAI KA HOI

 

KA PAPA

A ME

KA LAAU O KOU HALE

NOHEA LA!

KAI NO HOI NO KAHI O

WAILA MA

 

Nana aku no hoi ia la ohi ka Io o ka laau o Makawao, i ka ua mea hoi o ka nani

 

NA PAPA! NA PAPA

A ME

Na Pono Kukulu Hale

O ua Ano no a pau,

AIA MA KE KIHI O NA ALANUI

Papu me Moiwahine,

HONOLULU

Malaila e loaa ai e like me ka makemake no ke

KUMUKUAI MAKEPONO LOA.

 

PAPA! PAPA! PAPA!

NA PAPA HULUHULU,

NA PAPA MANOANOA,

NA PAPA I-KAHIIA,

NA PAPA KEPA,

PAPA HOLE KEOKEO,

PAPA HOLE ULAULA.

 

Na Laau, Na Laau

NA KUA,

NA KAOLA,

NA AAHO,

NA MOLINA,

NA PEAPEA.

PINE HULUHULU,

PINE I KAHIIA.

NA PAPA A ME NA LAAU ULAULA.

PILI ULAULA,

PILI KEOKEO,

PANI PUKA,

PUKA ANIANI,

PANI PUKA ANIANI,

PUKA OLEPELEPE.

 

PENA

O NA ANO A PAU

Hulu Pena mai liilii a ke nui,

Aila Pena,

Aila Hoomaloo,

Waniti, Pate,

 

Na Lako o kela a me keia

Ano.

 

NA AMI PUKA HALE,

NA AMI PUKA PA,

ANIANI

 

PEPA HALE A ME NA LIHILIHI

E loaa no malaila

 

PAAKAI HELU I,

-O-

KAKAAKO ME PUULOA

 

No ke Dala Kuike e loaa no na mea a pau i haiia ae la no ke Kamukuai Emi Loa. O na Kauoha mai Hawaii a Niihau; e loaa aku no me ka hooko pololeila. E kipa nui ilaila i ike ka oiaio. 905tf.

 

PAPA! PAPA!

NO

ALLEN & ROBINSON

 

Ua wehe ae ne maua

PA KU AI PAPA,

MA

Ka Uwapo o Pakaka.

 

Na Papa Ulaula o na ano a pau,

Na Papa Paina o na ano a pau,

Na Pili Hale Ulaula,

Na Pili Hale Keokeo,

Na Pepa Molina,

Na Pepa Hoonani Hale.

Na Pena a me na Aila Pena!

Na kui o na ano a pau.

Na pani Puka a me

Na Pani Puka Aniani,

Nap Pani Puka a me

Na Olepelepe

 

NA LAKO KUKULU HALE

O NA ANO A PAU!

 

E kuaiia ma

KE KUMUKUAI HAAHAA LOA

O keia Makeke,

 

PAPA! PAPA!

AIA MA KAHI O

LEWERS & COOKE,

(O LUI MA)

ma ke kahua kahiko ma alanui Papu a me Moi

E loaa ai na

PAPA NOU AIKI.

o kela a me keia ano.

 

Na Pani Puka, Na Puka Aniani, Na Olepelepe,

Na Pou, Na O-a, Na Papa Hele, Na Papu

Ku, A me na Papa Moe nui loa

Na Pili o na Hale o na Ano a Pau.

 

Na Pepa Hoonani, Na Pena o na Wai e pau,

Na Kui mai ke Nui a ka Makalii, Na Ami

Puka, Na Ami Puka Aniani, Na Ami

o na ano a pau, Na Aila Pena, o

kela me keia ano Na Aila Hoo-

maloo, he lehulehuwale,

Na Aila e ae o na

ano a pau

NA WAI VANIKI

-A ME NA-

WAI HOOHINUHINU NANI!

O NA ANO A PAU LOA.

NA BALAKI ANO NUI WALE.

A ke hai ia aku nei ka lono i na Makamaka a

pau, ua makaukau keia mau Makamaka

o oukou e hoolawa aku ma

na mea a pau e pili ana

ma ka laua oihana

-NO KA-

UKU HAAHAA LOA.

E like me ka mea e holo ana mawaena o

Laua a me ka Mea Kuai.

E Hele mai! E na Makamaka!!

A e lawa no hoi ko oukou makemake

me ka oluolu a me ka maikai

 

LOLE MAKEPONO

 

Ke Kuike e loaa no ia ma kahi o

 

Kakela me Kuke.

-E laa na-

AHINAHINA, KALAKOA, KEO-

KEO, LEPONALO. PENA, AILA,

AILA HONUA, ANIANI,

NA MEA PIULA,

Kopa, Aila Hoomaloo, Kui Kakia, Pa

keke, Tabu Kaula, Noho Lio, Hulu

Palahi, na Palumi, ahe agena

no na mokupuni o Ha-

waii neino na Laina-

kini-nao

Lainakini Maoli, Ki-lika, Palule Kalakoa,

Alapia, Kelepa, Na Lole kupono i

ka Wawae, Paluuuule Huluhulu,

Na Lole Huluhulu, Na

ka hoohelo ana, Li

Lole no pini, Li-

hilihi, etc.

A ME NA

 

Mikini Humuhumu

MAKEPONO LOA.

A he mau

MEA AI KAHI:

 

KA PALAOA, KOPAA

RAIKI, PIA, HOOHU

PAAKAI, HUAALA,

PIA KULINA, KOPE,

-A HE-

Laau Lapaau Kaulana Loa

A DR. JAYNE.

LAAU HOOMAEMAE KOKO

LAAU HOOPAU NAIO,

PENIKILA, HUAALE,

LAAU KUNU,

Me na Laau Hamo, a Pela 'ku.

840-tf

 

NA HOOLAHA KUMAU.

 

MAKEMAKE IA.

         Ke hoike ia aku nei na mea a pau e makemake ana e loaa na PAI AI ma ka PAKEKE a me ka PAHU paha, e kauoha mai ia'u ma ka leta no ka hoolawa ana aku i na kauoha Ai a puni keia mau Paemoku; o na kauoha no ke kulanakauhale, e lawe ia aku no e like me ka makemake o ka mea kauoha ma ka ipuka o ko oukou mau hale, no ke kumukuai haahaa loa. E waiho ae i ka oukou mau kauoha ma na leta ma ka Hale Leta.

ALBERT K. KUNUIAKEA.

Honolulu, Mei 12, 1883. 1119 tf.

 

MAKANA LA KULAIA

KUAI!

MA LA

HALEKUAI LOLE NUI O

HONOLULU NEI

E makana waleia aku ana he

mau kii pena i ka mea kuai mai

a hiki aku i ka $1.00 a oi aku ka

lilo i ka wa hookahi.

EWEHE MUAIA ANA IKEIA LA

MA KA HALEKUAI LOLE NUI

O

HONOLULU

He Kuai Manuahi Launa ole.

He Kuai Hoopoho a Hoopakika.

E hele nui mai e na makamaka

E wae oukou e like me

o oukou makemae

iho i na

waiwai o kela a me

keia ano he nui

wale.

A.      M. MELEKI.

HELU 104 ALANUI PAPU.

 

NU HOU! NU HOU!

 

Na Waiwai Hou Loa!

NA PAIKINI O KEIA AU.

 

E Loaa no ma ka ha Halekuai o

DILLINGHAMA MA,

Ma Alanui Papu.

 

Oia na waiwai malalo iho nei:

Na Palau, Kaa Huilapalala, Kopala,

Piki, Oo, Koi, Koilipi, Na Hama-

re Kamana o na ano a pau,

Na mea Hana a na Ka-

mana, Poe Hamo

Puna, na Am-

ara a me

na mea

hana o ka

Poe Akeakamai

a pau. Pena Aila,

Vaniki a me na Palaki,

Pauda, Poka a me na Kukae-

pele, Palaki Hamo Puna, Pulumi,

Pakeke, Kapu Holoi Lole a me na Papa

 

Holoi Lole, na Iputi,

na Pa Palai, na Ma

kau Lawaia, Na

Aho Lawaia o na

ano a pau, na Kaula

o na ano a pau, na

Pahi, O, a me na

Puna, a he nui aku

no na mea i koe.

 

I KUPONO NO KA HOOHIWAHIWA ANA I

NA HALE

 

I hiki ole ia makou ke huai pau aku aka, na oukou no e hele mai a e hoonuu iho. O keia maluna ae, e loaa no ma ka halekuai o

 

Dilinahama Ma,

1036-3m] Ma ka helu 37, Alanui Papu

 

KA MOOLELO

-O-

PILIPO KEKOA!

Ka Makai Kiu Ilikini

-O-

AMERIKA HUIPUIA!

-A O KA-

NANE HUNA O KA 1776.

 

(Mai ka peni a ka mea unuhi moolelo o

"Onila Maka, ka Makai Kiu

Kaulana o Enelani.")

MOKUNA. XX.

HE MEA HUNA HOU.

 

No ka pau ole o ke kanalua o ka Maki Kiu i na olelo a Lu Lavonia, nolaila, pane hou aku la oia:

         Aole loa no oe la i hele iki i kahi o Matina Aletona?

         Aole loa, a eia hou hoi keia, aole no au i lohe ia inoa mamua, a aole no hoi au i ike he wahi kekahi oia ano i keia la.

         A owai na kanaka au i hookomo mai ai iloko o ka rumi heluhelu o ko makuakane i ka po nei?

         Aole i maopopo ia'u ko'u kumu e pane aku ai ia oe, aka, i mea e pau ai kou kuhihewa, e hai aku no au ia oe, aole loa au i hookomo mai i kekahi mea iloko o ke keena heluhelu buuke o kuu makuakane i ka po nei.

         Kupanaha maoli ka hoi keia mea, wahi a ua Ilikini nei i namunamu iho ai.

         O keaha ke kupanaha?

         I ko hoole mai hoi aole oe i kahi o Matina Aletona i ka po nei, me kuu ike aku no ia oe ilaila, a ke hoole nei nae oe, o ko uhane ka paha ka'u i ike ai ilaila.

         He wahahee ia au.

         E hoole mai ana no paho oe aole oe i ike iki i ka make ana o Mariona Beramile?

         Ia wa, owaka-hulili ae la no onohi o Lu Lavonia, a hele aku la imua a kalele iho la kono mau lima maluna o ka poohiwi o ka Ilikini a pana aku la:

         E ke kanaka kupanaha e, e kolehe mai ana paha oe ia'u ? aia he mea huna iloko o kau mau olelo kupaianaha, aia pu no hoi he manao koikoi iloko o kau mau hoahewa ana mai ia'u, nolaila, ke noi aku nei au ia oe e olelo pololei mai oe!

         E hilinai mai ana anei oe i ka'u mau olelo ina wau e kamailio pono aku?

         Ae.

         Alaila, e ike oe i keia hora, he Makai Kiu au, no kekahi mau la, ua hoao iho nei au e imi i ke kumu o ko Mariona Beramile nalowale kupanaha ana.

         A heaha kau mea i ike?

         E hoolohe pono mai oe i ka'u mau olelo, no ka mea, ke hoike mai nei na hiona a pau, he kokua hewa oe me ka poe powa nana i pepehi o Mariona.

         A heaha ia mau hoike i loaa ia oe?

         Alaila, hoike pakahi aku la ka Makai Kiu i na mea a pau ana i ike ai a hiki i kona ike kino ia ana ia kakahiaka.

         I ka pau ana ae o kana mau olelo pane aku la oia:

         He wahi mea kamhao no hoi keia Ua like ko'u hewa ole me kekahi keiki iluna ke alo. Aia no nae paha ia oe ke kamaa i loaa ai ia oe?

         Ae.

         E hiki no auanei ia'u ke hooiaio aku@ ia oe aole no'u ia kamaa, a ua hai aku nae paha oe i kuu makukane no na mau mea i loaa ai ia oe?

         Aole.

         A aia no nae paha ia oe ka owili lauoho i loaa aku ai ia oe me ka pahi.

         Ae.

         E hoike ma, a e hai aku no auanei au ia oe, aole mai ko'u mau lauoho aku.

         Noonoo iki iho la ka Makai Kiu no kekahi wa, a ninau aku la:

         He kaikaina no nae paha kou?

         Aole.

         Aohe ou pilioko wahine i like loa na helehelena me kou?

         Aole loa hookahi.

         Kahaha! ke pohihi loa aku nei keia hana, aka, e loaa aku ana no nae ia'u i ka noii owelo ia.

         Alaila, e kokua aku au ia oe, wahi a Lu.

         I keia wa no.

         Ua makaukau au i na wa a pau

         Ua aa anei oe e ku imua o ka poino?

         Ua aa loa au.

         Alaila, e hahai mai oe ia'u i kahi o kaua e halawai aku ai me ka poino.

         Ae.

         He loihi loa aku no mai keia wahi aku.

         Ua hiki no.

         E ike ana oe i kekahi mea manaonao.

         Ua makaukau au.

         Ahea oe makaukau.

         I keia wa no.

         Ua pololi loa ia au,, e hoihoi mua aku ia'u i ka hale e paina ai, alaila, haele aku kaua.

         He hapalua hora mahope iho oia wa, ua hiki loa ke ikeia aku ka Ilikini me Lu Lavonia e hele ana no ka hale inu rama o Matina Aletona.

         E like me na mea i hoakaka mua ia, e ku hookahi ana keia hale me ke kokoke ole mai o kekahi hale, a he ululaau nui hoi ke ulu ana mahope aku o ua hale la maluna o kekahi puu.

         Lawe aku la ua Makai Kiu la ia Lu Lavonia mawaena o kekahi alanui ololi o ka ululaau a hiki i ko laua hiki ana mai ma kekahi puu mahope o ua hale inu rama la.

         Alaila, nana pono iho la ua Ilikini la i wahi kupono a pane aku la:

         He makau nae paha oe ke noho hookahi ianei?

         Aole.

         E pee malie oe a e makaala.

         Ae

         Iloko o keia wa, ke eha la ka puuwai o ua Hapa Ilikini la, no kona hoa ui opio nohenohea, no ka mea, ua hele ae la na papalina lahilahi o Lu Lavonia a weo me he ohelo ai la a ka manu. Aohe no e nele aku la.

         Haalele iho la ua Ilikini la ia Lu a hele aku la no ka hale inu rama.

         He mau anana mai kahi ana i haalele aku ai ia Lu nana pono iho la oia i kana mau lako kaua.

         Iaia i kokoke aku ai i ka hale, ua kahaha loa oia i kona ike ana aku aohe mea o loko, he meha wale no.

         Aka, iaia i kokoke loa aku ai i ka hale, haule iho la oia maluna o kona opu a kolo aku la imua a hiki i kona hiki ana mai ma ka puka.

         Aohe ana mea i lohe. Ku ae la oia iluna a hookokoke aku la i ka puka aniani, a nana aku la iloko.

         Aohe no ana mea i ike a i lohe hoi.

         Hapai ae la oia i ka puka aniani iluna a lele aku la iloko o ka hale kuke.

         No ka meha pu oloko, nolaila, hoomaopopo iho la oia ua hele na mea a pau.

         Hele aku la oia mai laila aku a loko o ka rumi inu rama, ike iho la oia he puu koko e waiho ana iluna o ka papahele.

         Aole oia i puiwa no keia mea, oiai, ua hoomaopopo koke ae la no oia, oia ke koko o kekahi o na kanaka i ku ai i ka pu iaia.

         Wehe malie aku la oia i ka puka, a nana aku la iloko, a ike iho la ua haalele maoli ia no ka hale, ua holo ua poe powa nei. (Aole i pau).

        

HE MOOLELO EEHIA

 

HANA HOOWELIWELI

-O KE-

TOWERA O LADANA.

 

Mai ka peni a ka mea unuhi moolelo o "Be-

[riana ka Wiwo Ole, a me Mahone ke Koa."]

 

MOKUNA X

 

Mamua ae o ke kiei ana mai o ka pawa o ke ao o kekahi la ae, ua hookoia ka olelo a ka luahine Guinora, ma ka hiki ana ma o Guilafoda Dudele a hui pu me kana aloha Iane O keia hui ana o Iane me kana kane, ua hooni ia ka ikoi o ko laua mau puuwai me ka hakukoi, a he mau minute puanuanu ia a ke aloha e hue pau ana i kana ukana he waimaka, a oiai laua e lulumi ana i na kipona a ke aloha, e apo ana kekahi i kekahi, pane aku la o Iane i kana kane: E kuu haku kane aloha, ina paha kaua aole i punihei i na apuhi ana a ka nani, ka hanohano a me ke kiekie, ina la aole kaua e haalele iho i keia home i haiamu ia e ka maluhia! a ina hoi e ae ia mai kaua, e hoohala iho i ke koena o ko kaua mau la maanei!

         Pane aku la kana kane, aole i mamao loa aku mai o'u aku nei na manaolana ana a pau no ka nohoalii, e hoi hou mai no ia iloko o ko kaua malu.

         Aole loa, wahi a Iane; aole loa ia e hoi hou mai ia kaua, pela ka ike a ko'u lunaikehala. Ina i haawi hou ia mai ke kalaunu ia'u, a ua maopop le'a ia no'u, aole, aole loa au e ae e lawe hou mai. Aole loa, e kuu Dudele, ua kau mai ka moeuhane o ka poilikia maluna o kaua, a ua ike maopopo le'a au i ka hewa a'u i hana ai.

         Pane aku la o Dudele, e like me ka mea i oluolu ia e oe e kuu aliiwahine, aka, ina ke paa la no kuu makuakane i na mea kaua ma kona lima, e komo pu aku no au e kokua iaia, me ko maua hooikaika ana no ka manawa hope e hoihoi hou mai i ke kalaunu, a make paha iloko o keia hoao ana.

         E alako aku auanei kou mau manao ahiu ia oe iho i ka paepae oki poo, me ka lawe pu ana aku iaʻu ilaila, wahi a Iane i pane aku ai i kana kane. Ina aole e hiki ia kaua ke paa iho i ka mana oiai ia iloko o ko kaua lima, pehea la oe i manao ai e hiki ana ia oe ke hoihoi hou mai.

         Aole i lilo aku; aole au i manaoio ia mau lono a hiki i ko'u hooiaio ana i ka pulima ponoi o kuu luaui, ua haalele aku oia i ua mana la, i pane aku ai o Dudele. Aole paha oe i hoomaopopo nona e Iane. Aia malalo ona he elima tausani koa e hooko ana i kana mau kauoha, a ina o ka hapalima o ia heluna kai koe me ia, aole loa e hiki i kona mau enemi ke ku aku imua ona. E ike auanei kau iaia, he haku no ke Towera holookoa a me keia kulanakauhale kipi. E ike pu no auanei kau i kokaua mau enemi e hali ia ae ana no kahi oki poo. A ina au e ike aku ana i na kipi, ia Renada, Pemeberoke a me Arunadela e hali ia ae ana no ia wahi, e kapae ae auanei au i ka hoino ana i ke au pomaikai o ka manawa.

         E na lani, e huikala ae i ko lakou mau mano kipi, e like me aʻu i huikala aku ai ia lakou! i pane ae ai o Iane. Aka, ke hopohopo nei au, aole e hoonana ia ko lakou inaina, a hiki i ka wa a lakou e alakai aku ai ia maua no ka paepae oki poo, kahi hoi e kau mai ai ka hoopai manaonao maluna ou.

         Aole keia he wa no ka hoahewa ana e kuu Iane, wahi a Dudele i pane aku ai me ka malie; ina aole oe i paulele i na apuhi hoopunipuni ana a ke kipi Renada ia oe, me ka maliu ole ana i kana mau olele mali a me kou ae ole ana i ka'u noi no ke kalaunu, me ka hookikina ana i kuu makuakane e hele ma ka huakai kue ia Mere, ina la ua pono loa. A me keia wa, ke noho nei oe he moiwahne, a owau hoi he moikane:

         Ua hoahewa loa mai oe ia'u, e kuu Dudele, i pane aku ai o Iane; aole i oi aku kau hoahewa ana ia'u mamua o ko'u ahewa ana ia'u iho. Ina au i ae aku i kou manao, a hookiekie ae ia oe ma ka nohoalii, me ka papani ana ae i ko'u mau pepeiao i ka Renada mau olelo, me ka haawi ole ia'u iho e alakai hewa ia e kona mau kokua, oia o Arunadela me Pemeberoke, me ke kaohi ana hoi i kou luaui e noho oia iloko o ke Towera, ina la aole e loaa ia'u he mau la o ka noho hookele aupuni ana.

         Aole o'u hoomaopopo i kau mea e kamailio nei, e ka madame, wahi a kana haku kane i pane aku ai me ke oolea.

         Penei e ike ia ai ka oiaio, wahi a Iane i pane aku ai; o na hoonalonalo ana i keia manawa no keia mea e kamailio ia nei, ua lilo i mea ole; ua maopopo no ia'u, o ke kalaunu wale no ka kou luaui i pula kaumaka ai e loaa iaia, a ua hoonoho wale ia no au ma ka nohoalii e hoomakaukau aku nona, a ke hiki mai ka manawa kupono, e kii mai no oia ia'u a kiola ae mai ia wahi mai.

         E Iane! i pane aku ai o Dudele me ka leo inaina.

         E kuu Dudele, e hooluolu iki iho i kou mano, i pane aku ai o Iane. Ke pane nei au i keia mau olelo aole no ka hoouluku ana aku i kou inaina a me ka hoonui ana aku i ke kuee iwaena o kaua. Ua ike no na lani i ka nui o ko kaua poino. Ke olelo nei au i ike ai oe i kou mau aoao iho, a i kaohi ia ai na manao inaina e uhu hae ana iloko ou, a'u hoi e ike nei ke hoopue nei iloko o kou umauma. Ke olelo nei au i kaohi ia ai oe mai ka hui pu ana aku me kou luaui me keia hana e hapai ia nei, a o ka hopena aku auanei ka poino pu o kakou a pau.

         Ke hoikeike mai nei oi i na manao e kue loa ana iaia, i pane aku ai o Dudele: ma ko'u ano he keiki au nana, ua hiki loa ia'u ke hoike aku ia oe ua komo kuhohonu loa ia oe iloko o ke kuhihewa.

         E Dudele, wahi a Iane. he mau hoike ko'u e hooia mai ana. na ke Duke ponoi i haawi aku i ka laau make e hanai aku i kuu cousini ka Moi Edewada. He mau hoike no hoi ko'u. e hanai mai ana no oia ia'u i ka laau make.

         He hoopunipuni ia mau olelo, i pane aku ai kana kane iaia me ka huhu: he mau olelo hakuepa hoina wale no ia na kona mau enemi iaia. a ua apuhi ia oe.

         Aole loa pela e kuu haku. i pane aku ai ka luahine: e hoolohe ana oia i keia mau olelo mawaena o Iane me kana kane me kona ike ole ia e laua (ua pee oia he wahi okoa.) Aole keia he mau olelo hakuepa. O ka Moi Edewada ua hanai ia oia i ka laau make e a'u, malalo o ke kauoha a me ka makemake a kou makuakane: a o oe a me kou poe ukali, mai auamo like oukou ia haawina hookahi. (Aole i pau.)

 

HE MEA OLE NA HOOMANA A PAU

         Alia. He mau hoike kue i keia hoole ou.

         He mea ole anei ka hoomana Karistianao io? Pela anei kou manao, e ka haiolelo Pake ma Kina? Heaha oe mamua? He pegana au mamua. He hoomana kii. He naaupo. Aole ike i ke ala o ke ola. Ua puni i ka pouli loa.

         A pehea oe i keia wa? Ua lohe au i ka Euanelio, i ka hoomana Karistiano. Ua ano hou au. Ua hee aku ka pouli. Ua puni au i ka malamalama. Ua loli ka'u oihana. He haiolelo au. Ke hele nei au ma na alanui e hai aku i ka olelo a Iesu i ka'u haumana.

         Pehea ke ano o kau haiolelo ana? Penei: Ke hai aku nei au ia oukou i ke ola ma kea ao ma o Iesu la ke manaoio oukou iaia, a hahai mamuli ona.

         Aole o keia wale no aka he aloha Iesu, he kokua, makemake oia e hoola i ka poe puhi opiuma, ka poe moekolohe, ka poe pili waiwai, ka poe inu rama.

         Ke hoole nei anei oukou alole hiki ke haalele i keia mau hana? aohe mana e hiki ai. Ua mea, ua paa loa ia mau mea. E hoolohe oukou. Aia ia Iesu ka mana e hiki ai ke haalele ia mau hana i keia po.

         E ka mea puhi opiuma. e ka mea puhi baka, e ka mea inu rama, e noi aku oe ia Iesu e kokua. e hilinai iaia me ka naau, me ka ikaika a pau. a e ola no ano.

         Heaha kau hua o keia haiolelo ana? Eia. He kana ma ia kulanakauhale i makau nui ia. He hale pili waiwai kona mawaho ae o ke kulanakauhale kahi i akoakoa ai ka poe uhauha, powa, kolohe loa. Makau na makai me na lunakanawai ia hale. Ua lohe ua kanaka nei i ka haiolelo a na Pake nei. Olelo oia, ina hiki ia Iesu Kristo ke hoola mai ia'u, e hoola mai oia ia'u ano. Hoi pu oia me ka haiolelo. Kuka pu laua me ka pule pu. Ma ia ahi, hookuke aku oia i ka poe hana hewa iwaho o kona hale, a pani paa i ka puka.

         Ma ia po, hoea ma ka poe hana pili waiwai. Ina hana pu oia me lakou he 50 dala kona waiwai puka.

         Hoole nae oia me ka olelo ua hoopaa ia keia hale. Aole e hana hou ia ana na hana ino maloko. Ina e wehe hou ia keia hale, no ka poe haiolelo ia. A pela io no, wahi a ka misionari oia wahi. Ua haiolelo pinepine oia iloko. O ka ona, me kona ohana a pau he poe manaoio ia Iesu.

         A pela no kekahi Pake e ae. He puhi opiuma oia. Ua ike oia e hana ino ana ka opiuma i kona kino. Makemake oia e haalele i ka opiuma. Aole nae i hiki. Komo kekahi koa karistiano iloko o kona hale i kekahi la e heluhelu i ka ke Akua olelo. E moe ana oia ma kona bela, me ka ipu opiuma ma kona waha. Olelo ua kona nei. Aole anei oe i ike, aole hiki ia oe ke liko i Karistiano oiaaio e puhi opiuma ana oe? No ke aha hoi? No ka mea he hana hewa ia i ke Akua. Ke papa nei anei ka baibala i ka poiuma? Aole, aka, ua papa i na mea ona a he mea ona ka opiuma.

         No kou maa i ka puhi ana pono ia oe ke haalele liilii aole haalele loa ano o ino kou ola kino. Alia, ina he mea hewa ke puhi au i 3 derama, aole anei he mea hewa ke puhi ana i 2 derama a i 2 huna? Pule pu laua. Pau ka pule, lawe ka mea puhi opiuma i ka apana pepa, a kakau penai: E like me ka makemake o ka Makua ma ka lani, ke hoohiki nei au ano, aole au e hoopa hou i ka opiuma ma kahi malu, ma kahi akea mai keia wa a mau loa aku." Kapili oia i keia apana pepa ma ke alo o kona hale, a o ka pau no ia o kona hoopa ana i ka opiuma.

         Ina he mea ona, he mea puhi baka, mea puhi opiuma, e heluhelu ana i ka hana a keia puhi opiuma, e hoohalike oe me ia.

         E kakau i hoohiki e kapili ia ma ke alo o kou hale. E like me ka makemake o ka Makua ma ka lani. Ke hoohiki nei au ano, aole au e hoopa hou i ka mea ona, a i ka baka, a i ka opiuma ma kahi malu ma kahi akea, mai keia manawa a mau loa aku. He mea ole anei ka hoomana Karistiano io?

MESIAHS HERALD

Unuhiia e Hawaii