Ka Nupepa Kuokoa, Volume XXII, Number 34, 25 ʻAukake 1883 — NA MEA HOU O KALAWAO [ARTICLE]

NA MEA HOU O KALAWAO

Ke paonioni nei ka la, ua wa, ka makani ma na koolau nei o Kalawao, e kamoe ana ko lakou alanui hele i ke komohana. I keia mau la, akahi no a ike ia aku na kuemaka pali o na mauna e paa mau mai ana i na ao kaalelewa, e halii mau ae ana ka ohu pohina i ke kula, a e iku-wa mau ana ka leo o ke kai i na pali kahakai i ka po me ke ao. Ke kuai malu ia nei e ko makou luua nui C. Strawn, na laau hale a ka Papa Ola i hoouna mai nei no na mai lepera, ma ka 3 1/2 keneta o ke kapuai, ua lilo he mau haneri kapuai i ka la 16 o keia mahina. Akahi no makou a ike i keia mea, aole mai mua mai. Eia ke ku kilakila nei ka luakini hou o na hoahanau hoole pope o Kalawao nei, he nani kona mau paia, he molale kona hale pele ke nana aku, malalo o ka hana maiau ana a T. Solomoa, aole i paa loa. Ua hooponoponoia iho nei kekahi mau hihia ano nui ma Kalawao nei, e ka agena R. W. Meyer o ka Papa Ola, i na la mua o keia mahina; na hihia koi poho a W. H. Kala a me J. K. Awihi i ka Papa Ola, no ka hao wale

! ia ana o ko laua mau waiwai e ka Papa Ola, ika la 18 o lune i hala, nona ka huina poho $357.25 ; eia ka mea apiki ua huna ia keia hihia ano nui e R. W. Meyer, eia kana olelo hooholo. "Ua pono a ka Papa Ola ia mau waiwal" Ua hoopii hou aku laua imua o kekahi lunakanawai. O na leta i ike ia ka inoa mawaho no ke Kuokoa me ka Pae Āi/ia ke haehae ia nei, pela ko'u lohe mai. Eia ke hoouna ia nei keia leta ma Kalaupapa. William Puheemiki. !