Ka Nupepa Kuokoa, Volume XXII, Number 34, 25 August 1883 — Heahi ka Waiona e hoopau ana. PEHEA KAKOU E PAKELE AI? [ARTICLE]

Heahi ka Waiona e hoopau ana.

PEHEA KAKOU E PAKELE AI?

HELU 4E oluolu ana no paha ka poe e heluhelu ana i keia mau helu manao no ka waiona, ke ike i ke kumu i loaa mai ai i keia aupuni ke kanawai hookapu waiona i hoopauia e ke Kau Ahaolelo o 1882. Iloko oka makahiki 1833 hoomaka iho la o Kauikeaouli i ke au o kona noho moi ana, he umikumamahiku wale no ona mau makahiki ia wa. Ua lilo oia malalo o na alakai ana a KaomL O Kaomi, he kanaka ia i hanau ia ma keia paeaina, o kona makuakane he Bolabola, a he Hawaii maoli kona makuahine. Ua alakai hewa ia o Kauikeaouli e keia kanaka no kekahi manawa, a ua hele

loa oia iloko o na hana uhauha ; ulu nui ae la ka ona a me na hana lapuwale e ae, ka aihue, ka pepehi, a me ka haumia, a puni ka aina, ma Honolulu nei nae ka oi oke ino. Ua haalele ia na halekula a me na halepule; ua hoi hope kahi poe i na hana hoomanakii oka wa kahiko; ua puhiia i ke ahi kekahi mau luakini; ua weheia na hale puhi waiona a me na halekuai waiona; ma Kaneohe, Oahu, ua ikeia he elima hale puhi rama e ku ana i ka wa hookahi; ua haunaele ka aina, a me he mea la e hoi hou mai ana ke au o na hana ptgana ; haalele na kane 1 ka lakou mau wahine, a pela no hoi na wahine i na kane; moe aku a moe mai, a moe huikau e like me na holoholona, na makua, na keiki, na kaikunane a me na kaikuahine, 0 ka hana he hakaka, pili waiwai, ona, a kipi no hoi kahi poe. 0 Kaikioewa kekahi o na koa kaulana kahiko o Kamehameha 1., a me kekahi poe aliikoa e ae, e noho ana ia wa ua huli ika pono; ua makemake lakou e hoala i ke kaua a e hoopau i keia mau haiv. hoohaunaele i hoalaia e Kauikeaouli mamuli o na alakai ana a Kaomi; aka, mahope oko lakou kuka ana ua hoomoe ia kela manao. (Pela ka hoike ana mai a kekahi 0 na mea kakau moolelo 0 ia wa, oia o J. J. Jarvis.) Ua hoike nui ia mai no hoi keia mau mea e Kekuanaoa a me Nahaolelua iloko o ke Kau Ahaolelo o 1864.

Pela ka noho ana o ka aina a hala he mau makahiki. Iloko oka makahiki 1836, ike pono iho la 0 Kauikeaouli i ke ino o kona aupuni, a hoolohe aku la oia i na alakai kupono, a hana īho la oia he kanawai e papa loa ana i ka hookomo ana 0 na waiona iloko 0 keia aupuni, me ka hookau ana i ke dute kiekie maluna 0 na waina a pau. Ua mahaloia keia hana, aua kokua nui ia e na haole he lehulehu. Maluhia hou iho la ka aina ia wa. O Kapena Belcher, kapena o kekahi o na mokukaua Beritania e ku ana ma ke, awa ia wa, i kona ike maka ana i ka hua maikai o keia hana a ka moi a me na alii, ua palapala aku oia ia Kauike- ! aouli e paipai ana iaia e hookau i dute kiekie loa maluna 0 na waiona a pau, i I kumu e lawe ole ia mai ai iloko 0 ke aupuni, aka, o La Plaee, ke kapena o kekahi mokukaua Farani i ku mai maanei iloko 0 1839, he okoa kona manao, aohe like me ko ke kapena Beritania, a ua hooikaika ua La Plaee

nei e hana i kuikahi e ae ana i ka hookomoia mai o na barani 0 Farani, me ke dute ia aole e oi aku i ka elima hapahaneri o ke kumukuai, a ua hokoia kona makemake, ua hanaia ke kuikahi oia ano. Alaila, oka wehe ana no ia o ka puka e komo mai ai na waiona 0 na aupuni e ae iloko o keia aina ; no ka mea, ina i aeia ko Farani, aole hiki ke hooleia ko na aupuni e ae. A iloko o Mei, 1840, hiki mai la kekahi moku kialua (Clcmentine,) mai Valaparaiso mai; o kona ukana he waiona. Ia wa ua pihoihoi a kaumaha ka manao o ka moi a me na 'lii, no ka mea, ua ike maka lakou i na hoopoino ana o keia mea iloko 0 na makahiki pokole maniua iho, a eia hou ke hoea mai nei na ouli 0 ia mau popilikia i manaoia ua hala loa. Ninau ae la lakou kekahi i kekahi, pehea- la e pono ai ? Manao iho la lakou e papa i ke kuai ana 0 na waiona ma ka aina nei; aka, ua hai ia aku ia lakou, he uhai ana ia i ke kuikahi me Farani. Alaila, ninau hou iho la lakou, heaha la ka lakou e hana ai i pakele ka lahui Hawaii mai ka make

aku aka waiona. Aua hai ia aku, he mea hiki no ke kauia he kanawai e papa ana i ke kuai ana o na waiona i ka lahui Hawaii, ua hana lakou ia kanawai. A i ka makahiki 1840, ua hanaia ke kumukanawai mua o keia aupuni, e hoonoho ana i ka ahaolelo kau kanawai o na 'lii a nie na makaainana, a na ia ahaolelo i hoapono i ke kanawai i hana mua ia e ka moi me na 'lii, e papa ana i ka waiona aole e kuai ia ina kanaka Hawaii. Pela iho la i loaa mai ai kela kanawai i hoopauia e ka ahaolelo o 1882. i imi ia a hanaia iloko o ka wa pilikia nui o keia lahui, i ka wa i aneane lilo ke ea o ka aina, ua kooia mai la ka pono o Hawaii e keia kanawai, a ola hou oia; aua hoomau ia mai kela koo 0 ko Hawaii kuokoa a hiki wale i ka la 1 kiolaia. (Aoli i pau.)