Ka Nupepa Kuokoa, Volume XXII, Number 33, 17 August 1883 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

 

KA NUPEPA

KUOKOA ME KE AU OKOA.

(I Huiia)

 

No ka Makahiki          ..........$2.00

Eono Mahina   .......... 1.00

Dala Kuike ka Rula.

 

POAONO AUKAKE 17, 1883.

 

I’LL STAND BY YOU.

Gospel Hymn No. 253

            1

H@ @ ka @

Ma ka moku e

@ ko ana i ke make

Ma na ale kai

Cho.    Oli e! @  ka Haku

            Oli e!  hamau! hamau!

            @ pu @ oukou a ao la,

            @ mai makau.

            Owau pu me oukou a ao la;

Na'u e @ mai makau, mai makau.

 

            2

Luhi ana paopauaho

Na ohua @

Kei ka oli @ eia ae la

Ka Hoola e.

Cho.    Oli e, &c.

 

            3

Meia ma koonei moana,

Holo ana no

Na ohua a ane make

Eia nae Iesu.

Cho.    Oli e, &c.

 

            4

Na kahuna, kahu, kumu,

Haiolelo pu,

Holo, holo a kahea,

E ola ia Iesu.

Cho.    Oli e, &c.

            HAWAII.

 

HAAWINA KULA SABATI.

 

Helu 10, Sabati, Sept. 2.

 

Kumuhana, Ka make o Samesona.

Pauku Baibala, Lunk. 16; 21—31.

Hoopaa iho la ko Pilisetia iaia, poalo aku la i kona mau maka, a lawe la iaia i Gaza, a hoopaa iho la ma i na kupee keleawe; a wili ae la ia iloko o ka halepaahao.

            22 Hoomaka iho la ka lauoho o kona poo i ka ulu hou, e like me ia i ka wa i kahiia'i.

            23 Alaula, hoakoakoa mai na la 'lii o ko Pelesitia e kaumaha aku i mohai nui no Dagona, ko lakou akua, a e olioli; no ka mea, olelo mai lakou: ua haawi mai ko kakou akua ia Samesona o ko kakou enemi, iloko o ko kakou lima.

            24 A ike aku la na kanaka iaia, hoomana aku la lakou i ko lakou akua; no ka mea, olelo mai la lakou, ua haawi mai ko kakou akua iloko o ko lakou lima, i ko kakou enemi, i ka mea i anai ai i ko kakou aina, a luku nui mai ia kakoa.

            25 A i ka wa lealea ai ko lakou naau i ae la lakou, e kii aku ia Samesona, i hula mai ia no kakou. Kii aku la lakou ia Samesona ma ka halepaahao a hula mai la ia imua o lakou. A hookuu iha la lakou iaia iwaena o na kia.

            26 I ae la o Samesona i ke keiki e paa ana i kona lima, e hoomaha mai oe ia'u i haha aku au i na kia e paa ai ka hale i hilinai hoi au ma ia mau mea.

            27 Ua piha ka hale i na kanaka a me na wahine.  Malaila no na 'lii a pau o ko Pilisetia. Ekolu tausani kanaka a me na wahine maluna o ka hale i nana mai i ko Samesona hula ana.

            28 Hea aku la o Samesona ia Iehova, i aku ia, e ka Haku, e Iehova e, e hoomanao mai oe ia'u: ke nonoi aku nei aa a ia oe e hooikaika mai oe ia'u, e ke Akua e, i keia manawa hookahi no, i uku kokeia mai au e ko Pilesetia, no ko'u mau maka elua.

            29 Lalau iho la o Samesona ma na kia waenakonu elua, a oia hoi na mea e paa ai ka hale. Hilinai iho la oia ma ia mau mea, o ka lima akau ma kekahi, a o ka lima hema ma kehaki.

            30 I iho la o Samesona, e make pu au me ko Pilisetia. Kulou iho la me ka ikaika nui, a hina iho la ka hale maluna o na 'lii a maluna o na kanaka a pau maloko. Ua nui ka poe make, ana i luku ai i kona make ana, he hape ka poe ana i luku ai i kona wa i ola'i.

            31 Iho aku la kona poe hoaanua, a me ko ka hale o kona makuakane, lalau iho la iaia, a lawe ae la, a kanu iho la mawaena o Zora, a me Esetaola, ma ka ilina o Manoa, o kona makuakane. He iwakalua makahiki ana i hooponopono ai i ka Isaraela.

            Pauku Gula.  Hal. 68:35.

            Manao Nui. Mai ae i ka hoowalewaleia.

            Na Heluhelu La. 1, Lunk. 13; 1-25, 2, 14; 1-20, 3, Lunk. 15; 1-20, 4, Lunk 16; 1-31, 5, Ia. 1; 1-27, 6, Hoik. 2; 1-17., 7, Ezk. 36; 16-32.

            Ka Manawa. B.C. 1096. 126 mak. mahope o ka Haawina 9.

            Kahi i hanaia’i, Gaza, he kulanakauhale no Pilisetia, 50 mile komohana hema o Ioredane.

            Mele. “Mele Manaoio,” Hoku Ao Nani p. 93.

            Pule i loaa mai ia manaoio.

 

KA WEHEWE A NINAU ANA.

            Ma ka Helu 9 ua haalele kakou ia Gideona e kaua aku ana i ko Midiana me ka lanakila. Mailaila a i ka Haawina o keia la he 126 mak.

            Heaha na evena me na hana ma ia mau mak.?

            1 Ka maluhia malalo ae o Gideona, 40 mak. Lunk. 8; 28-35.

            2 Ka hooponopono ana o Abimeleka, 3 mak. Lunk. 9; 1-57.

            3 Ka hooponopono ana o Tola. 23 mak. Lunk. 10; 1-2

            4 Ka hooponopono ana o Iaina.  22 mak. Lunk. 10; 3-5

            5 Hookaumahaia o ko e ko Amana. 18 mak. Lunk 10; 6-18

            6 Ka hookuuia a hooponoponoia e Iepeta. 6 mak. Lunk. 11; 1-42. 12; 1-7

            7 Hooponopono e Ibarama. 7 mak. Lunk 12; 1-10.

            8 Hooponoponoia e Elona. 10 mak. Lunk. 12; 11-12.

            9 Hooponoponoia e Abedona 8 mak. Lunk. 12; 13-15.

            10 Hookaumahaia e ko Pilesetia. 40 mak. Lunk 13; 1.

            11 Kokuaia a hooponoponoia e Samesona, 20 mak. Lunk 13; 2-25, 14; 1-20, 15; 1-20, 16; 1-31.

            Ka Haawina o keia la ma ka mok. 16 p. 21 ka hoomaka ana.

 

NA MAHELE.

            I Samesona. Ke ano o ia inoa, like me ka la. Manoa kona makuakane. Ke ano o ka hanai ana, mok. 16; 2-5.

            Kona ikaika, aohe he kanaka ikaika elike me Samesona.

            Ua olelo oia, aia kona ikaika ma kona lauoho. Aka, mai ke Akua mai no ia i lanakila ai maluna o ko Pilisetia.

            Na Pilisetia, aia lakou ma ke komohana hema o Kanaana. He poe kahiko no. Nana Kin. 10; 14, 21; 32-34. ler. 47; 4, Amosa 9; 7. He poe enemi lakou i ka poe Iseraela. Ua lilo no i ka poe Iseraela ma o Iosua la. Ios. 13; 2.  Aka, kipi no lakou, a kue mau i na Iseraela a hiki i ka wa o Davida.

            Owai ka ke Akua i hoala'i e kaua aku i na Pilisetia a e lanakila hapa? O Samesona kue aku, pale aku, kaua aku, a ane 20 mak. Mai lanakila loa paha, ina aole oia i kumakaiaia e Delila kana wahine. He wahine pono ole keia. Ma kona koi ikaika ana ua hai Samesona i kahi o kona ikaika.  Oia hoi kona lauoho. Ina akoia kona lauoho e nawaliwali ana oia elike me na kanake e ae.

            Hai mai i ka hana a ka wahine i hiki iaia ke ako i ko Samesona, lauoho; p. 18-20.

            P 21 A pehea la i hana'i na Pilisetia ia Samesona? Ehia hana ino? Mahea Gaza?

            P 22 Pehea i loaa hou ai ka ikaika ia Samesona? Aole ke Akua i haalele loa ia Samesona. Ua hina no oia elike me Petero.  Aka, aole i hina loa. Ma ka nana aku ua mihi oia. Ua hilinai hou ia Iehova. Ua hoomanao i ka oihana a ke Akua i hooili mai maluna ona, oia ka hooponopono ana i na Iseraela me ke kaua ana aku i ko lakou poe enemi, na Piliseita. Ua hooulu hou ke Akua i kona lauoho. E hoihoi mai ana i ka ikaika mua iaia, i hiki iaia ke hoopau i ke koena o kana hana.

            P 23 Heaha ka hana a na Pilisetia? Ehia alii? E aha lakou no Dagona? Hai mai i ke ano o keia akua?  He kii ia, he ia kona kino, a o kona poo me na lima, he poo kanaka, he lima kanaka.  Ma ko lakou manao, nawai i haawi ia Samesona iloko o ko lakou mau lima? Pela io anei? He akua mana anei Dagona? Nana 1 Sam. 5; 2-4.

            A 24 Pehea na kanaka? A olelo  pehea? E kaena a hoaikola ana.

            P 25 Lealea lakou a kauoha e aha ia Samesona? E laweia mai mai hea mai? No ke aha? I hula oia. Ia lakou ke mele ana me ka leo, me na mea hookani. A ia Samesona ka hula ana. He mea hoomaewaewa; hoohenehene, hoaikola iaia.

            P 26 He heiau nui ko Dagona.  He mau kia nui elua mawaena e paa ai. A ua hooku lakou ia Samesona iwaena o na kia. He heiau paha keia.  He hale ahaaina lealea paha. Heaha ka Samesona i oleo aku ai i ke keiki e paa ana iaia? Ua hoomaka po ia Samesona. Nolaila kona noi ana i ke keiki e lawe i kona mau lima a e hoopa i kekahi lima i kekahi kia, a i kekahi kia.

            P 27 Pehea ka hale, ko loko, ko luna? He wahi palahalaha maluna o ka hale.  Ehia kanaka malaila? E aha ana? A pela paha ka nui o loko.  E pokole ana ko lakou lealea hoomaewaewa.

            P 28 Heaha ka pule a Samesona?  Ua hana ino lakou ma ka poalo wale ana i kona mau maka elua.  E noi ana oia ia Iehova e kokua i ka hoopai ana.  Na ke Akua i hoolilo ia Samesona i mea luku aku i na Pilisetia na enemi a kona poe kanaka.  Elike me kana kauoha ia Iosua ma e luku i na lahui 7 o Kanaana. Na Pilisetia kekahi hapa o ia mau lahui.

            P 29 Pehea ka Samesona hana ana me kona mau lima? Na ka uhane paha i kuhikuhi i ka hana. He manaoio ko Samesona ia Iehova.  Hilinai oia iaia, aole iaia iho.

            P 30 Heaha ka Samesona olelo hope? A aha iho la? A aha ka hale? Pehea ka nui o ka poe i make?  Ua make pu hoi o Samesona. Pehea, ua hewa anei oia no kona make ana pela? Hewa anei na koa i haule iloko o ke kaua ana no ko lakou hae, no ko lakou mau home ponoi? Hewa anei na misionari ke make lakou no ka hai ana i ka ke Akua oleo?

            Aole hewa Samesona. Ua haawi oia i kona ola no ka poe Iseraela. Mai ke Akua mai ka ikaika i hina'i kela hale.  Ma ka manaoio i hina'i ia, elike me na pa o Ieriko.

            P31 Ua aha na hoahanau o Samesona? Pehea ka loihi o kona hooponopono ana i ka poe Iseraela?  Heaha ka hope o Delila? Ua make pu paha me keia poe i make.

 

KA HOOPILI ANA

            1 Elike me ka hana mana a ke Akua. I na hana hewa kanaka, hoopai no ke Akua.  Ina mihi kanaka, kala mai ke Akua, a hoomama i na kaumaha.

            2 Nui ke ano o ka poe a ke Akua i kohe ai i poe kokua, a hoola i kona poe kanaka. Aole e nele ana oia i ka poe alakai a hooponopono ia lakou.

            3 E hoohalike me Samesona ma kekahi mau mea, ma ka waiho ana i na waiona maka imi ana i na mea e hiolo ai na enemi o ke Akua, a o kona poe naka. Ma makau ke lilo ko kakou ola no ka pono o hai, no ke aupuni o ke Iesu.

            E paa a halihali i ka hae o ke ola iwaena o na enemi.

            4 Mai hana nae i ka hewa i mea e holo ai ka pono. Mai hoopunipuni, mai mare me ka poe hewa i mea e pono ai ko Iesu aupuni.

            5 Iesu ka mea ikaika loa. Ma ona la e lanakila ai kona poe kanaka.

            Mele.  "Hamau e, he hehi koa," Hoku Ao Nani p. 264.

            Pule i ala a hehi koa.  &c.

            Haawina no Sept. 9, Ruta 1; 14-22.

 

AOLE KAULAWAHA; AOLE KAHI NO KE KAULAWAHA.

 

            He haku aina Sekotia me kana kauwa o Sami. E hele pu ana i kahi e hele ai. Ua inu rama laua pu mamua o ka hele ana. I ka ee ana maluna o na lio, ua holo hio no. A hiki i kahawai, ua haule ka haku iloko o ka wai.

            E Sami, Sami, ua haule kekahi mea. Hoole Sami, aohe mea i haule. He mea haule no, e Sami ua lohe au i ka haule ana iloko o ka wai. Ka iho no ia o Sami ilalo a nana, a olelo, o oe iho no ka i haule iloko o ka wai. "Aoole owau, eia no au." Lalau o Sami i kona haku, a kau iaia maluna o ka lio me kona alo nae i ka huelo, aole i ke poo o ka lio.

            Ho mai, ho mai i ke kaulawaha, e Sami. Aia oe, e kuu haku, a loaa ke kaulawaha.  Ho mai i kaulawaha. E kuu haku, aole he kaulawaha, aole hoi he wahi no ke kaulawaha, (e haha ana ma kahi o ka huelo.)

            E kuu haku, he mea kupanaha, ua hemo ke po o ka lio, aole hoi e loaa ana ia'u kahi o kona poo, he wahi hulu a-i wale no i koe. Ho mai ia wahi hulu a-i na'u e Sami. Whoa! e hele hope ana ka lio! Ua lilo ke poo. Lalau kahi hulu a-i.

            Ua nalowale hoi ke kaulawaha. Kekahi ano keia o ka ona. Ku anei i ka mahaloia?   JOHN B. GAUGH.

            UNUHIIA E HAWAII.

 

IT STINGS – HE MEA NAHU EHA.

 

            Komo o Samu iloko o ka mala lilaka a oki i kekahi huihui pua, me ka olelo, nani e na pua! A emoole hoolei ilalo, a hooho uwe, It Sting! It Sting!

            He mea nahu, ua nahu ia au.  He pua maikai nei, a ku i ka mahalo nui ia.

            No hea kona nahu ana? Aole no ka pua ke nahu ana. He mea hunaia iloko o ka pua. He wahi nalo meli, e omo ana i ka meli. Pehu no, a uwe oia no ka eha.  Ninini kona mama i ka laau hooluolu maluna o ka lima a wahi ae la, a olelo. E kuu Samu, kuu makamae, e aoia oe ma keia mea. Ua nui na mea nani ke nana aku, aka, he mau mea hoeha maloko.

            He mea maikai ke Keaka, (Circus.)  Hele kekahi keiki ilaila e nana i na lio nani.

            Nahuia oia. Lohe i na olelo ino, a lilo oia i keiki hoopuka i na olelo ino.

            Hele kekahi ui i ka Saluna, nana i ke kiaha waina. He hoa kona o Beni.

            E kuu hoa, maikai ka waina, ulaula, he mea ono paha. E hoao kaua. Ka inu no ia, a nahu ia laua, a lilo i mau ui ona.

            Nana kekahi kaikamahine i kekahi hinai i piha i ka alani, a ai i kekahi hua.  Nani ka ono! Haliia ka hinai i ka hale, a ninau kona mama. Ua ai anei oe i kekahi hua? I loaa hou mai, hoole oia, aole. A loaa he alani hou.  I ka ai ana nae, ua nahuia oia. Ala mai kona lunaikehala, a hoahewa, a hoeha iaia. Aole hiki ke moe ma ia po. Ua hoopunipuni oia.

            Nui na mea maikai ke nana aku; aka, e makau i ka lalau ana. Malia paha, he mea hoeha maloko. He mea nahu kela me keia hewa. He mea make, o ka uku o ka hewa, he make mau ia.

            Mai hoao, mai hoopa, mai lawelawe.  Ua hoopa ia nae. Ua nahuia. E make ana.

            Heaha ka laau hooluolu, a hoopakele i ka make? Ke koko o Iesu. E hamoia me ia koko me ka manaoio i hoolaia.            Owau o H.

 

            Ua aneane e paa ka hale hoahu ukana o Hakapila. He hale nui no.

 

HE WAHI KAMAILIO.

ELUA HOA KAMAILIO. WILAMA LAUA

ME KEKAHI CIGA.

 

            Ua lilo Wilama i ka huli naaoao ana.

            Komo malu o i Cga i kona keena.  Olelo, e Wiliama makemake, au e lilo i hoa pili nou a pau kou ola kino ana. He hoa au no kekahi poe Keonimana, poe loio, poe lunakanawai, poe kahunapule kekahi. Hiki paha ia'u ke hoohui ia oe me lakou, a lilo oe i mau hoahanau no lakou.

            Maikai oe, lokomaikai hoi, e Mika Ciga. Ke imi nei oe i mea e hanohano ai au. Aka, alia a ninau aku au ia oe i kekahi mau mea.

            Lilo nui anei ko'u manawa ia oe, ke ae au e lilo oe i hoa no'u?  Minamina au i ko'u mau hora.  He ui lalau au mamua.  Lilo na hora o'u i ka lapuwale. Okoa ko'u ano i keia wa.  Makemake au e lilo ko'u mau hora i ka imi ana i ka naauao. 

            Ae, pono ia, wahi a Mika Ciga, aka, aole nui na hora e lilo ana ia'u, hookahi, elua paha ma ka la hookahi. Hiki nae ia oe ke hana, ke kamailio, ke noonoo ma ia mau hora.

            A, peha ka'u dala?  E noi pinepine ana anei oe i wahi dala? Ninau Wilama. A pane Ciga, aole lilo nui ke dala ma kinohi, e mahuahua  liilii ana ka lilo ona dala.

            He aha ke pani o na dala ke lilo ia oe?  Well, he mea hooluolu, hoonanea au, hoopau ana i ke kaumaha, hoomaha ana.

            A'ole anei oe e hana ino ana i ke kino, e hoonawaliwali ana, e hoopouli ana, e hoemi ana i ka mana o ka lolo? Pela no au i laipelaia ai e kekahi poe pakela haipule.

            Pehea ka poe palaualelo, noho wale, hana hewa, hoomaloka? Haalele anei  lakou ia oe? Launa paha oe me lakou.

            Ae, launa me lakou, a launa lakou me a'u.  Aka, nui no ka poe haipule, ka poe naauao i launa pu me au.  He hoa pili loa au no lakou. 

            No ke aha kou makemake e lilo i hoa no'u?  Ninau Wilama. Pane oia. No ka mea, ka mea ia e waiwai ai ko'u mau haku.

            Hookahi a'u ninau i koe.  E Mika Ciga.  Ina e lilo oe i hoa no'u, oia auanei ka mea e mahuahua ai kau mau hana pono ana i na kamalii, i na ui, i na hoalauna o'u?

            Aole akaka ia, aka mahalo no kekahi poe ia oe, a olelo. H kanaka oluolu oe, hui pu ma ke puhi baka ana, aole huhu, aole hookaokoa.

            Lilo Wilama i ka noonoo ana, a liuliu iki, a olelo.  Eia ka'u e hooholo nei.  E malama au i ka rula. "O ka oukou mea e lawelawe ai ma ka olelo, a ma ka hana, e pau ia i ka hanaia iloko o ka inoa o ka Haku o Iesu."

            Aloha oe, e ka baka. Farewell, Tobacco.

            Aole au e komo ana iloko o kau pahele. Aole au e alakai ana ia hai iloko o kou pahele. Ua kaawale au.

            Hoi hoka aku la o Mika Ciga, (Kika.)  Nana aku la o Wilama a ike i na kaulahao i paa ai kekahi poe i ae e lilo o Ciga i hoapili no lakou. Pehea la e hemo ai? Ma ka mana paha o ka hoohiki e haalele i kokuaia e ka Uhane Hemolele.        UNUHIIA E HAWAII.

 

NA MANAMANALIMA KEKEE.

 

            Good Morning, Olomana. Ma ko kaua lulu lima ana, ike au he mau manamanalima kekee kou. Heaha ke kumu oia kekee ana? Ke kumu? Aole au i hilahila i ka hai ana aku. Pela paha. E hai mai nae. Well, he kanaka kahu kaa au, no na makahiki he 50. Ua maa au i ka hoopaa ana i ke kaula lio me ko'u mau lima. Ma ia maa ana, ua hookekeeia kekahi mau manamanalima o'u. Ua hoopeluia, aole hiki ke hoopolokeiia. 

            He mea ao keia ia oukou e na keiki, me na ui.

            E makau i ka hoomaka ana i kekahi mea ano ino.  He mea ino ka baka, ke puhi baka, ka nau baka. Nawai e aa e hoole, aole, he wahahee ia? He mea maikai ka baka, he mea ono. E haawi oe i kahi baka i kou lio, kau bipi, kau puaa, a ai anei ia? Pehea ka elepani ke haawiia aku i wahi baka nona? Wela loa kona huhu. E wiki oe e holo o lalau kona nuku ia oe; a he uku ke pakele oe i ka make.

            Akaka lea he mea ino ka baka.  No laila, mai hoomaka e lalau, e nau, e puhi, o maa oe ma ia hana, a lilo i kauwa na ka baka, a hiki ole ke hookuuia. E ake ana, e hoao e hemo. Paa nae ka auamo. Uwe waimaka oe no ka hiki ole e hoohemo.

            Pela hoi ka rama, ka waina, na waiona a pau. He mau mea ano ino no.

            Nawai e aa e hoole? Na naaupo paha.  Ina he mau mea maikai ia, no ke aha keia ala nui ana e kinai, e hookapu, e hoopai i na waiona?

            Akaka loa, he mea ino no ka waiona. Nolaila, mai hoomaka i ka inu liilii ana, o maa oe i ka inu ana, a lilo loa i ka ona. Ka ona kou haku. He kauwa oe i hoohuli ino ia. E ake auanei paha oe, me ka hoao ana e hookuuia, aole nae e hiki. Ua paa i kona kaulahao.

            Me ia hoi na olelo hoohiki ino i ka inoa o ke Aua, na hua go damu, hua haole hailiili. Mai hoomaka na keiki, na ui e hoopuka ia mau hua ino e maa auanei oe, a lilo oe i kauwa i hoopaaia e ia haku ou, ka olelo ino, a huki oia ia oe ilalo o kahi o na daimonio, a me lakou oe e home mau ai kou alakai hewa.                     HAWAII.

 

"PA KOLONAHE A KE KIU HOOLALE WAIANUHEA."

 

            I ke “Kilohana Pookela o ka Lahui Hawaii ke Aloha, a ina keiki ulele hua metala ka anoi poina ole a loko.  Ano, me ka hiaai nui au e kakau nei i keia lei Ahihi a ke onaona i ike mai ai na lehulehu o kuu aina hanau i ka la puka i Haehae a ka welo olu a ka wai kuauhoe a ka manu. O ka makahiki e nee mai nei 1884 he makahiki ia i piha me na mea ano nui, a iloko o ia makahiki e hooko pono ia ai ka makemake o na alakai aupuni a ka lehulehu e kahaha  mau nei ina la a pau, ina e loaa ana he mau lunamakaainana nana e kokua aku i ka lakou mau hana pono ole.  Nolaila, ano ka wa e noonoo pono ai e ka lahui i ka mea kupono a kuokoa me ka hoopili mea ai ole, a ake nui i ka hanohano, aka, o ka hanohano o ka apana nana i koho mai iaia kana e papahi ai a pau na la o kona noho ana maluna o ua noho hanohano la, e like me G. W. Pilipo maluna o ka noho o Kona Akau, ka mea i olelo ia ka liona o Kona Akau, a o ka hoku hele o ka moana Pakipika. O Hon. J. Nawahi hoi ma ka noho helu 1 o Hilo; o J. W. Kalua, no ka noho helu 1 o Wailuku, a me kekahi mau keonimano e ae o ka makahiki 1882 i aui aku nei.  E kuu aina kuamakani lele koae o Kaumaea la e, mai hoouna mai ia puni dala a me ake oihana, aka, e hoouna mai ia Rev. J. Kauhane i paaia ko oukou pono a loaa ia kakou ka lanakila. E Puna paia ala i ka hala, mai haalele ia J. M. Kauwila, a koho ia E. Kekoa, mahope pilikia oukou a pau pu mai hoi kakou. E Hilo i ka ua kaulana he “Kanilehua”, mai hoopoina i ka bea o na kaei anu oia o J. Nawahi ka mea nana e papahi mau nei na lei lehua o Mokaulele ina kau apau, aohe hoi he mea nana e kaili ae ia hanohano. Ina e loaa kona kokoolua e like me ia, pomaikai oukou a pomaikai pu no hoi kakou. E Hamakua i ka ala ulili, e makaala oukou a mai hoouna hou mai ia Kaunahoopilimeai o kuai hou no auanei i ko okou mau pono, a puni ka olelo iho he hoopilimeai &c.  E pono e hoao mai ia W. A. Mio a me R. A. Lyman, a o ka mea o laua e puka ana, o ka moho ia o keia kau ae.

            E Kohala i ka makani Apaapaa, ua ike iho au i na moho e uhai a holo ana no kou pono, a i ko'u kaupaona ana iho, aohe he moho nana e paa kou hanohano iloko oia mau inoa. E pono oe e hoomanao i kou kuakoa, a hooauna mai ia Rev. S. C. Luhiau a me ka makua Rev. E. Bona, alaila ola oukou.  Aohe ana a Kona kai opua i ka lai, oiai  aia kona manaolana maluna o ka liona a me ka poka pahu. (G. W. Pilipo)  Na makou ia, a nana makou. Ina e puni na moku ina koa a me na Generala o keia ano, alaila ola ka aina, pau ka paio ana, a noho ka aina i loko o ka maluhia a me ke kuikahi.  E Maui o Kama a me Molokai nui a Hina, e noonoo pono iho ina poino  he nui e pahola mai ana maluna ou e Hawaii, ina e koho pono ole ana kakou he mea oiaio, ua hiki mai ka hopena oiaio ou e Hawaii, a aia oe iloko o ka aie nui kuahewahewa, a na ka lahui e auamo hele ma na alanui me na leo kanikani a ula, aka, ua hala ka wa kupono. E Honolulu i ka ua Kukalahale, eia oe i ka piko o ke Capitala nei, aka, nau no e hoouna mau nei i ka poe hoopili me ai i na wa a pau, a ke uwalo aku nei keia leo, e noonoo pono a koho i mau moho no kou pono a me kou pomaikai.  E koho ia James Keau, Rev. J. Waiamau, Rev. H. H. Paleka, A. P. Kalaukoa, a me John Kalama.

            E Kauai i ka aina kaili la.  E hoouna mai ia J. M. Kealoha, Rev. J. R. Hanaike a me kahi mau kanaka kupono e ae. E na Koolau. E koho ina kanaka kuakoa a kupono. Pehea o J. Kaoliko. E hooauna mai iaia. Ina e loaa he 28 koa oiaio, alaila,  e lanakila kakou, a ola hou o Hawaii. E hoomanao i keia leo.           KONA AKAU.

 

KO HAIKU MAU ANOAI.

 

            Ua hanauia mai kekahi wahi puaa kane ano e ma ka la 2 o keia mahina, a eia no oia ke ola nei.

            Ua lilo i ka aihueia he pahu giana pauda mai kahi o ke "Ona Miliona" aku, a ua huli ia a ma ka la 6 iho nei ke kalohe o Huakini no Haiku. Ua loaa aku ka pahu malalo o ka hale ua eli ia ka lua a uhiia iho ka lepo. Ua miki mai la ka lima o na maikai kiu noho ana i Kawaapae; ua kuhi ae la i o a ia nei i na hoa ai waiu ona.

            Ma ia la no, ua hopuia o Paia k, no ka lawaia gaiana pauda, a ua hoopaiia i na $25.

            Ua hui ae nei kahi mau opio Hawaii a hoala he makeke kuai ia maanei; ke halulu mai nei na ipu haole  o Honolulu, a ke o-la mai nei hoi ka wai o na niu o Kona, a ke kapalili mai nei hoi na Kawakawa o Lahaina, a ke au mai nei na alani a me na kope o na Kona maluna mai o ka Iwalani  no ua makeke nei.

            Ma keia la i weheia ai he hale ai poi ma Paia no kekahi opio Hawaii.                                   J.P. HAULANI

 

NA HOOLAHA KUMAU

 

ASA KAULIA.

            Loio a he kokua ma ke Kanawai.

tf.

J. L. KAULUKO.

            Loio a he kokua ma ke Kanawai.

            KEENA HANA:  Ma ke keena W. C. Akana ma alanui Moi.          tf.

 

W. O. SMITH

            LOIO LOIO LOIO.

            KEENA HANA: Helu 36 alanui Kalepa.

tf.

 

HENRY N. KAHULU.

            LOIO LOIO LOIO.

            E loaa no ma Koolauloa a ma Honolulu  kahi wa ma ke Keena o W. L. Holokahiki ma alanui Betela.            1125 @.

 

W. A. KINI.

            LOIO LOIO LOIO.

            KEENA HANA: Helu 15 Alanui Kaahumanu. Honolulu.    tf.

 

W. R. KAKELA

            Loio a he kokua ma ke Kanawai.

            He Luna Hooiaio Palapala.

tf.

 

W. L. HOLOKAHIKI

            Loio a he kokua ma ke Kanawai.

            He Luna Hooiaio Palapala.

            KEENA HANA:  Wehekealaula alanui Betela.        tf.

 

A. ROSA. (AKONI.)

            Loio a he kokua ma ke Kanawai.

            He Luna Hooiaio Palapala.

            KEENA HANA:  Ma ke Keena Loio Kuhina.          tf.

 

S. B. DOLE.

            LOIO LOIO LOIO.

            He Luna Hooiaio Palapala.

            KEENA HANA: Ma alanui Kaahumanu.      tf.

 

CECIL BROWN.

            Loio a he kokua ma ke Kanawai.

            A he Agena Hooiaio Palapala no ka Mokupuni o Oahu.

            KEENA HANA: Helu 8 alanui Kaahumanu.

tf.

 

JAMES M. MONSARRAT. (MAUNAKEA).

            Loio a he kokua ma ke Kanawai.

            He Luna Hooiaio Palapala.

            KEENA HANA: alanui Kalepa.        tf.

 

RICHARD F. BICKERTON. (PEKEKONA.)

Loio a he kokua ma ke Kanawai.  Keena Hana: Helu 27 alanui Kalepa.      tf.

 

SAM’L L. KAWELO.

            LOIO LOIO LOIO.

            KEENA HANA: Puakalehua, alanui Maunakea, Honolulu.             tf.

 

SAM’L K. KAEO.

            LOIO LOIO LOIO.

            KEENA HANA: Me J. L. Kaulukou ma ke Keena o W. C. Akana. tf.

 

KALE KULIKA.

            Luna Hooiaio Palapala Moraki a me na Palapala o ia ano, Luna Hooiaio Aelike mawaena o ka Haku a me ka Kauwa, Luna haawi Palapala Mare.

            KEENA HANA:  Kihi o alanui Moiwahine me Kaahumanu.           tf.

 

C. C. COLEMAN.

Amara a he mea hana Mekina.

Kapili Kapuai hao lio.

A me ka

Hana ana Kaa Lio, etc.,

Hale Hana ma Alanui Alii,

905-tf  E kokoke la i ke Alanui Papu.

 

S. H. MEEKAPU.

Tela humuhumu lole.

HALE HANA: Helu 11 alanui Nuuanu.        tf

 

F. PAHIA, SAM, L. M. KAAUKAI.

Ana aina!!  Ana aina!!

KEENA HANA:  Aia ma alanui Moi, kokoke loa i ka Uwapo o Hooliliamanu.      tf.

 

C. BREWER & CO. (BURUA MA.)

            Ua makemake ia ka poe mea ILI KAO MALOO a me na ILI BIBI, a pela hoi me na ILI MIKO o na ano apau, e kuai mai  i ko lakou mau ILI me makou, a e haawi no makou  i ke KUMUKUAI KIEKIE LOA o ko kakou Makeke.          tf.

 

JOSEPH E. WISEMAN.

LUNAHOOPONOPONO O NA WAIWAI PAA

–A ME-

Luna Imi Hana,

Helu 27 Alanui Kalepa, Honolulu

 

Luna Hoolimalima no na Kumi, na Hale, a me Luna Kuai me Hoolimalima o na Waiwai Paa ma na wahi  a pau o ka Paemoku, Luna imi Hana no ka poe a pau i nele i ka hana ole ma na wahi a pau i makemake ia ma kekahi mokupuni o ka Paeaina.

 

            N. B. – Na Palapala Hoolimalima e hanaia me ka eleu; e ohiia na Bila Aie a me na hana e ae a pau e pili ana i na hana Oihana Kalepa me ke eleu a me ka pololei. O na Unahiolelo a me na Maheleolelo ana, e hookoia me ka maikai. O na kauoha a me na kamailio ana maloko o na leta no kekahi o na hana maluna ae, hookoia me ka eleu loa.            tf.

 

NA HOOLAHA KUMAU

 

KA MIKINI

HUMUHUMU LOLE MAIKAI ST. JOHN.

 

E LOAA NO MA KA HALEKUAI O

 

MR. GEO. F. WELLS.

 

O ka Mikini Humuhumu Lole Maikai loa keia, i hiki ke kuila imua a i hope, a i ikeia ma ka Pae Aina Hawaii nei. He Mikini maikai loa no na kanaka Hawaii, he makini  luhi ole.

 

KUMUKUAI $55.00

me Hookahi Gita (Kika) hookani maikai loa makana.

 

            O ka poe ma na kuaaina e ake ana e loaa keia ano mikini humuhumu, e hoouna mai lakou i ke dala ia

GEO F WELLS

ma Honolulu, a nana no e hoouna aku ma kahi i makemakeia, me na mea a pau e pili ana i ka mikini, a nana e hookau aku maluna o ka moku, me ke kaki ole ia o ka mea nona ua mekini la.

            O ka poe a pau e holo mai ana no Honolulu nei, mai poina lakou i ke kipa ana ae i ka halekuai o

 

GEO. F. WELLS

Ma Alanui Papu, a e kilohi iho i ua mikini humuhumu la, oia ka

Royal St John.

Eia pu no me ia na pila hookahi o na ano a pau, o ka loaa koke ana mai nei no ia mai Amerika a me Europa mai, oia

Na Pila Guitar (Kika), he 150 ka nui, mai ka $5 a hiki i ka $125 ke kumukuai o ka pila hookahi.

200 Koliana mai ka $2 a hiki i ka $20 ke kumukuai o ka pila hookahi.

100 Ohe Puluka, $2.50 a hiki i ka $15 ke kumukuai o ka ohe hookahi.

12 Pahu Hookani nunui, a me 25 Pahu Hookani liilii, a me na ano mea kani keleawe a pau, e loaa no ma keia halekuai i hoikeia maluna me ke

KUMUKUAI EMI WAIPAHE.

Na Piano nunui maikai, e loaa no me ke Kumukuai Emi Loa; ike ole ia ma Hawaii nei.

 

            He nui aku no na mea i koe, na ke la a me keia e kilohi nona iho, ke nau ae ma ko'u halekuai ma Alanui Papu.

            E hookoia ka makemake o kela a me keia me ka eleu.

 

GEO. F. WELLS.

1094 tf                                                Alanui Papu.