Ka Nupepa Kuokoa, Volume XXII, Number 27, 7 July 1883 — HE MAU HALIALIA ALOHA. [ARTICLE]

HE MAU HALIALIA ALOHA.

He oiaio, e like me ka mea i puana mau ia i na la i hala ae, ua haiki mai na keehina kulana o ke kanaka Hawaii maluna o kona aina kulaiwi; a ua nele no hoi i na kumuhana hoolana manao mai ke Aupuni mai; aka, aole ia he kamailio ana no ka nele i na hana i ike mua'ia a i kamaaina a kuluma i na kupa o ka aina. O ka paeli ana i ka loi kalo a me na mahakea, a kanu aku i ka huli a me ka lau uala, aole ia he mau hana hou, aka, he mau hana ia i manaoia, ua hanau pu ia me ko kakou lahui, oiai, o ke o no ia o ko kakou mau kupuna, a hoea loa mai i o kakou nei. Iloko o na la i aui e aku la, he mea nui ka aina i ke kanaka Hawaii, a o ka hua, ke ola hoi e loaa mai ana mai kona mau makalua mai, mahope iho o ka luhi o ke kanu ana a hiki i ka wa e oo ai, he mea ia i oi pakela ia ka minamina nui a me ka makee nui ia; aka, i keia wa la a makou e kamailio nei, ua ike a ano hoowahawaha ia o ka hana mahiai kalo a uala; a ua ane pau ka manao nui ia o ka aina; no ka mea, ma ko makou hakilo ana a me na makai ana ma na kuaaina, ua hoomaopopoia ma kahi i nohoia e kanaka Hawaii a kuluma, kahi hoi i paeli ai mai kahiko mai a kani moopuna kualua, eia ke noho ia nei e ka malihini o ko na aina e ' mai, mamuli o ka moraki, a i ole, ma ke kuai maoli ana mai o ke kamaaina i kona waiwai a lilo i ka malihini. Ma na ninaninau ana a makou, he mea maopopo, aole loa e hiki ke kau ia aku kekahi kumu hoahewa i ka malihini, aka, e kala ia mai makou ke pane ae, (a he oiaio maoli no) o ke kamaaina no ke ahewaia no kona nele a me ka ilihune, no ka mea, ua hoolilo oia i ka molowa a me ka uhauha i haku maluna ona, a nana no i poloai aku i ka noho'na lapuwale e noho hoa'loha pu me ia. Aole no hoi ike mai ka poe e noho nei me na wahi apana kuleana i ka hopena o ko lakou mau hoakanaka, alaila noonoo iho; a hoao aku e pale ae i ke kau pu ana mai o ia hopena ano like maluna o lakou; aka, ua waiho hoohemahema wale lakou me ka hoopalaleha, aole loa he mahi aku, a kanu hoi i ke kalo a uala, a mea kanu waiwai e ae hoi; he ole loa no. Hookahi mea i ike ia, o ka nahelehele e ulu ana, a ua like ka nanaina me he aina la i noho ole ia e kanaka. No keia mau hiona i ike ia, ua ulu ae na manao kaniuhu iloko o makou no ka poe makamaka noho hoopalaleha o keia ano; a me ke aloha pu no hoi i ka aina. Ina me keia e mau aku ai, alaila, e nalo ana kona mau nanaina, a he mau helehelena malihini ke ike ia. Ma keia wahi, aole no e hiki ia makou ke hoopau i keia kamailio ana, me ka haawi ole ae i na mahalo kiekie i ka poe kakaikahi i noho me ka mikiala a me ka hooikaika, a e noho kuonoono nei me ka maikai a me ka lawa i na mea a pau no ke ola ana. A i ka poe noonoo ole ko makou mau paipai ana e ala a e hoohoihoi ae i ka papalina o ka ilihonua me na wehi o na lau mea ulu no ko oukou mau pono ponoi iho. Ua kokoke mai ka hopena o na mea a pau, nolaila, e kuoo oukou, a e hoomau ma ka pule. PETERO. E hoomau oukou ma ka mea kupono i ke ahonui iloko o oukou, a i hemolele hoi. IAKOBO. O ka huina nui o na lilo no ka hoomalamalama ana i ke kulanakauhale o Piledelepia iloko o ka mahina o Aperila, he $14,738.38.