Ka Nupepa Kuokoa, Volume XXII, Number 25, 23 June 1883 — KA HOOLEWA ANA O KA MEA KIEKIE R. KEELIKOLANI. [ARTICLE]

KA HOOLEWA ANA O KA MEA KIEKIE R. KEELIKOLANI.

Elike me ka hoolaha mua ana, ua hoonohoia ka huakai hoolewa o ke aliiwahine Keelikolani ma ka auina la Sabati, la 17 o keia malama, ma ka alanui Ema, mawaho ae o Kaakopua Hale. I ka hora elua, ua akoakoa na alii a me ka poe hanohano o ke kulanakauhale, me na alii o na moku kaua e ku ana ma ke awa, ma Kaakopua Hale, a ua piha na keena nui elua. Ua hele a uluwehiwehi ka pahu kupapau i na pua nani, a maluna ponoi o ke poo he kalaunu o na pua rose. Maluna o kekahi papa dala i kinohinohiia a nani ua kahakahaia ka inoa o ke alii penei: Ka Mea Kiekie, Ruth Keelikolani Keanolani Kanahoahoa, Kaikamahine a Pauahi a me Kekuanaoa, Hanau ma Honolulu, Oahu, Pepeluale 9, 1826, Make ma Kailua, Hawaii, Mei 24, 1883. Mahope iki iho o ka hora i oleloia, ua weheia na hana ma ka hale me ke mele kanikau ma o na papa himeni o Kawaiahao a me ko Kaumakapili i huiia. Pau ia, he mau heluhelu ana no loko ae o ka Olelo Hemolele, me ka haiolelo; he pule iho, a he himeni kanikau ka hope. Ma ka ilina ma Maunaala, i hookuuia ai na hana me ke mele ana o na papa himeni ma ka aoao 216 o ka Hoku Ao Nani, penei ka puana a ka leo: "Ma ka ulu wehiwehi, Ma ka ilina pua mau." He huakai nui loa keia a ua ku i ka eehia a me ka ilihia, elike no me ke ano kiekie o ke alii make.