Ka Nupepa Kuokoa, Volume XXII, Number 24, 16 June 1883 — MELE INOA NO KEELIKOLANAI. [ARTICLE]

MELE INOA NO KEELIKOLANAI.

A ka lai au i Hulihee Nana na maka i Kaopuana I ka lai aloha a na kupuna Noho ana o kalani la i ka olu I ka olu kahela a ke kehau, Ka makani aloha ia i ka aina Aina ua nohoa ke aloha A kupa kamaaina ilaila I ka po mahina lailai Ka i kaua mai ia'u Haina ka pua i kaulana O Keanolani no he inoa. A ka lai au i ka Hilinai Ku au a nana ia Huehue O ka iho makawalu a na lae I ke kai hawanawana o Kawaihae Hea ana ke aloha la i ke anu I ka ua Kipuupuu o Waimea Me o'u hoa hui la i ka noe I ka uhi wai o Mana Huli au a nana ia Waiau Na Pua hoonani a Lilinoe Haina ka pua i kaulana O Keanolani no he inoa. A luna au o Hualalai Ku au nana i ka lai Apo ana ka malino i ka malie Lohi ana kehau a hinu ke kai Paa ana i ka pewe piko o ka lai Kahela ka olu i na kuahiwi Kahiko mai la i na kualono I ka luna kapukapu o Maunakea Ke pookela ia o na kuahiwi O ka oi kelakela o Hawaii Haina ka pua i kaulana O Keanolani no he inoa. A ka lai au i Hanakahi I ka nu'a Lehua i Haili Hiaai na manu ilaila I ka inu i ka wai ohelohelo Ohelo lei a Keanolani Ke kuia mai la e ka Puulena Ka makani hali ala o kanahele He ala ka pua o ke ahiahi llaupahiwa i ka wao I ka malu wehi o ka palai Haina ka pua i kaulana O Keanolani no he inoa. A ka lai au i Haliilua Anoano mai ana ke aloha O kuu aina hanau He haupu halia i ka manawa I o'u makua i ka lai Ua noho a kupa ilaila I aloha i ka malino a ehu I ka pa kolonahe a ke kehau Nahenahe i ka pili o ke ao Hoolale mai ana e ala Aia ke ola i ka opua Hihiki liliko i ka moana Hana kihene ua i ke ao Ola ai ke kupa o Konanui Haina ka pua i kaulana O Keanolani no he inoa. A ka lai au i Niumalu Holu ana e ka lau o ka Niu I ka pa kolonahe a ka Eka Ka makani kupa o ka aina Aina ua nohoaena Lani Kamaaina i ka makahonu I ka poli aloha i Ahuena Ku ana o Maile hahei Me na Lehua o Lehuakona I lei kahiko no Keanolani Haina ka pua i kaulana O Keanolani no he inoa. A ka lai au i Mauliola I ka la hiki mai ma Haehae Ke hoi ae la i Hanakaulua Elua pua oi ma ka hikina O Kumukahi la o Makanoni Na Lehua o malio i ka Ehukai I ka lae hala o Kookoolau Holu ana ka milo i Waiakea Nape ana i ka wai koolihilihi Wai makaikai a ka malihini Haina ka pua i kaulana O Keanolani no he inoa. A ka lai au i ka liwai I ka wai huailua i ke one Hee ana i ka nalu o Maliu Maliu mai oe e ka huapala Eia ka mea hou la he paluna Ka ai hooui o ka aina Hoolau kanaka i na hale Lai ai na manu i ke kula Poloai mai ana ke aloha Hoi mai kaua e pili Haina ka pua i kaulana O Keanolani no he inoa. A luna au o Maunaloa Nana i ke alo o Wahinekapu Ke oni ae nei i Puuonioni Ka pali kapu o Kohoalii Ka hale noho i Halemaumau Lauahi ka hana a ka wahine Ke Kuini nui o Kilauea Nana i palaina kai o Hilo Ke aiwaiwa o na moku Enaena ka lehua i ka hapapa Haina ka pua i kaulana O Keanolani no he inoa. A ka luna au o Kawaikini Kilohi i ka nani o Kailua Ka haki mua o na kanaka I ke one launoe o Niumalu Kau ka manao no Iwalani Ka iwakiani o na Kona Nana i olali na kai loa Aia ka ilina i Hanuapo Hea ana o Kawelohea i ke kai Ei ae ka pono ia Iwalani Ka uwahi poepoe o ka Okeni Ola ai na kupa o ka aina Haina ka pua i kaulana O Keanolani no he inoa. A ka lai au i Kakooililani Noho ana i ka uluwehiwehi Ka popohe maikai a na pua I nohea i ke ano ahiahi I ka welo'na a ka la i Lehua Ke i ae nei ka manao E hoi au i ka home lai I ka olu o Maunakamala I ike i ka wai aniani l ka wai aloha lua i ka maka Haina ka pua i kaulana O Keanolani no he inoa.