Ka Nupepa Kuokoa, Volume XXII, Number 23, 9 Iune 1883 — Page 1
| This text was transcribed by: | Walt Kekoanahenahe Bodnar |
| This work is dedicated to: | Halau Malamalama O Ka Mahina |
Ka Nupepa Kuokoa
KE KILOHANA POOKELA NO KA LAHUI HAWAII.
BUKE XXII, HELU 23. poaono, Iune @9 1883. NA HELU A PAU 1123
NA HOOLAHA KUMAU.
MAIKAI KA HOI
KA PAPA,
-A ME-
KA LAAU O KOU HALE,
NOHEA LA?
KAI NO HOI NO KAHI O
WAILA MA.
Nana aku no hoi ia la ohi ka lo o ka laau o
Makawao. i ka ua mea hoi o ka nani.
NA PAPA! NA PAPA!
A ME
Na Pono Kukulu Hale
O na Ano no a I'au.
AIA MA KE KIHI O NA ALANUI
Papu me Moiwahine,
HONOLULU .
M@a ai e like me ka makemake no ke
KUMUKUAI MAKEPONO LOA.
PAPA! PAPA! PAPA!
NA PAPA HULUHULU,
NA PAPA MANOANOA,
NA PAPA I KAHIIA,
NA PAPA KEPA,
PAPA HOLE KEOKEO,
PAPA HOLE ULAULA.
Na Laau, Na Laau,
NA KUA,
NA KAOLA,
NA AAHO,
NA MOLINA,
NA PEAPEA.
PINE HULUHULU,
PINE I KAHIIA
NA PAPA A ME NA LAAU ULAULA.
PILI ULAULA,
PILI KEOKEO,
PANI PUKA
PUKA ANIANI,
PANI PUKA ANIANI,
PUKA OLEPELEPE
PENA
O NA ANO A PAU.
@ Pena mai ka liilii a ke nui,
Aila Pena,
Aila Hoomaloo,
Waniti, Pate,
Na lako o kela a me keia
ano.
NA AMI PUKA HALE,
NA AMI PUKA PA,
ANIANI
PEPA HALE A ME NA LIHILIHI,
E loaa no malaila.
PAAKAI HELU I,
-O-
KAKAAKO ME PUULOA
No ke Dala kuike i loaa no na mea a pau i hana ae la no ke Kumukuai Emi Loa. O na Kauoha mai Hawaii a Niihau, e loaa aku no me ka hooko pololeila. E kipa nui ilaila i ike ka oiaio. 905 tf.
NA HOOLAHA KUMAU.
PAPA! PAPA!
-NO-
ALLEN & Robinson
Ua wehe ae ne maua
PA KU AI PAPA
-MA-
Ka U@rapo o Pakaka.
Na Papa Ulaula o na ano a pau,
Na Papa Paina o na ano a pau,
Na Pili Hale Ulaula,
Na Pili Hale Keokeo,
NaPepa Molina,
Na Pepa Hoonani Hale.
Na Pena a me na Aila Pena !
Na kui a na ano a pau.
Na Pani Puka a me
Na Pani Puka Aniani,
Na Pani Puka a me
Na Olepelepe.
NA LAKO KUKULU HALE
O NA ANO A PAU!
E kuaiia ma
KE KUMUKUAI HAAHAA LOA
O keia Makeke.
PAPA! PAPA!
AIA MA KAHI O
LEWERS & COOOKE,
(O LUI MA)
ma ke kahua kahiko ma alanui Papu a me Moi.
E loaa ai na
PAPA NOUAIKI.
o kela a me keia ano.
Na Pani Puka, Na puka Aniani, Na Olepelepe,
Na Pou, Na O@a, Na Papa Hele, Na Papu
Ku, A me na Papa Moe nui loa
Na pili o na Hale o na Ano a Pau.
Na Pepa Hoonani, Na Pena o na Wai e pau,
Na Kui mai ke Nui a ka Makalii, Na ami
Puka, Na Ami Puka Aniani, Na Ami
o na ano a pau, Na Aila Pena, o
kela me keia ano Na Aila Hoo-
maloo, he lehulehu wale,
Na Aila e ae o na
ano a pau.
NA WAI VANIKI
-A ME NA-
WAI HOOHINUHINU NANI!
O NA ANO A PAU LOA.
NA BALAKI ANO NUI WALE.
a ke hai ia aku nei ka lono i na Makamaka a
pau, ua makaukau keia mau Makamaka
o oukou e hoolawa aku ma
na mea a pau e pili ana
ma ka laua oihana
-NO KA-
UKU HAAHAA LOA.
E like me ka mea e holo ana mawaena o
Laua a me ka MEA KUAI.
E Hele mai! E na Makamaka !!
A e lawa no hoi ko oukou makemake
me ka alualu a me ka maikai.
NA WAIWAI HOU LOA
O NA ANO A PAU.
E LOAA NA MA NA HALEKUAI O
WALAKAHAUKI MA !
MA ALANUI
Papu, Moi a me Moiwahine
OIA HOI:
Na noho lio hou
loa o na ano a pau,
Na palule Keokeo,
Huluhulu, o na ano
a pau, Na Pio
Ahinahina Pele-
kane hou loa o na
ano a pau. Na
Pena Kukaepele.
Na Kopa Bulu. Na
Lole o na Wahine o
na ano a pau. Na
Pahu Aila Mahu
maikai loa. Na Si-
lika, Pahoehoe, o
na ano a pau. Ki-
hei o na ano a pau.
HAINAKA LAU NUNUI SILIKA O NA ANO
A PAU.
He nui aku no i koe, ke piha pono ka
Koluma o ka pepa, ina a kuai pau
ia aku nei.
Eia hou ae a hoea mai i keia mau la iho he Lako Waiwai hou loa o na ano a pau, a he lako hou loa i wae pono ia e J. T. WATERHOUSE, Jr., ma Enelani, a he mau waiwai hoi i kupono loa no ko kakou mau kaiaulu. Nolaila, e eleu mai e na makamaka a me na hoi'loha e hoonuu i keia mau lako waiwai hou loa. 1076-3m
HE OLELO AO ENELANI.
NO KA POMAIKAI O NA OPIO HAWAII.
NA ANO OKOA O NA OLELO.
Mokuna I.
II. NA ANO OKOA O NA HUAPALA-
PALA ENELANI, A ME NA HUAPALAPA-
LA HAWAII .
Ua kuluma ka poe Hawaii e mahele i na huaolelo, a no na mapuna leo he kani ka hua hope loa a mau: Penei; hoo-hi-la-hi-la. Aole pela ka olelo Enelani. Ua lehulehu loa na huaolelo a me na mapuna leo, no lakou he leo kani pu ka hua hope: Penei, Inadvertency, shrimp. He mau huapalapala hoi iloko o na huaolelo me na leo ole: penei, debt, daughter. Ua hoohuiia kekahi mau leo kani ma ka leo hookahi, penei, boil: a me kekahi mau hua kanipu ma ka leo hookahi, penei, Scrpture. Pela no ua hoikeia kekahi leo hookahi ma na hua okoa, penei, fate, bait, play, skein, they, grlat, guage, gaol. Ua paipaluaia ka papa hoike o keia mau hua nui, leo ole, leo iki, ma na buke ao heluhelu Enelani.
Eia kekahi mau Haawina Ao. E heluhelu i keia mau huaolelo. Antiquity, Enlighten, hour, Stephen, read, deep, ceiling, people, key, valise, field.
8 ka mahele pololei ana i na huaolelo mamuli o na mapua olelo maoli, oia no ka hana ano nui keia no ke kamailio a me ka heluhelu pololei ana i na huaolelo Enelani a me ka Hawaii. Kaiamakawaha, aole Kai-a-maka-waha, aka nae Ka-i-a-ma-ka-wa-ha: an-tith-e-sis, aole an-tithe-sos. Ua aha ia? aole u-a-a-ha-i-a. Pela no ke ano o ka hoohui ana i na leo e lilo ai lakou i huaolelo, oia no kekahi hana e pono ai ke malama me ka akahele: Menemene aole oia Minamina: medal, aole Meddale. O ka puana oia no kekahi hana ano kiekie. Makemake, aole Maakeemaakee: mouning ka pololei, aole mornin': helm aole hellum. O ke kalele ana he hana hoi ia e pono ai ke malama, ina aole hu hewa loa ka poe Hawaii ma ka olelo Enelani. Aole like wahi, kahi i noha ai a what, oia no ka poi: tutu a me tulu, nana a me na'na, pela no ma ka olelo Enelani, August, August, august, hanohano: conjure, nonoi, conjure, kilokilo Aole like ke kalele ana o na hainoa Enelani a me na haina, ina paha ua like na huapalapala, confine palena, confine e hoopaahao, convict, he paahao, convict, e hoahewa. Ma ka hapanui o na huaolelo Enelani ua kaulia ia ke kalele ma ka mapuna olelo mamua iho o ka hope loa, ladder, potato: no kakaikahi ma ka hope loa, begin, forget, advertise impolite. Ua kupono hoi e malama i ka hanu kumu, ka hoopahee, a me ka hoonoo e like me kuluma o ka poe Enelani. Ma ka hana wale no, ma ke kamailio pinepine, aole ma ka huli ana i na loina, aole ma ka heluhelu ana me ka leo ole, ka lanakila no ka poe imi neau.
Eia kekahi mau Haawina Ao.
E heluhelu i keia mau huaolelo. Altar, alter, bow, bough, indestructible, inelgibility, ignorant, insignificant, design, splendid, tremble, saddle, twitch, strong, resign, big, rip, pig, chick, sad, tick, use, chink, sugar. shoe, salt, flea, ship. free.
III He mau loina no ka hoohui ana i na leo pakui i na huaolelo mole.
Ua nui keia hookapili ana i na mapunaolelo i na juaolelo kumu ma ka olelo Enelani e like me kekahi hana ma olelo Hawaii, penei: hoomahuahua'na'aku. He uuku ka phihihi ma ka olelo Hawaii: ua hoohuiia na mapuna olelo ma ke pilikia ole. Aole pela ma ka olelo Enelani.
1 Mamua o ka leo pakui nana ka hua mua he leo kani, ua nalo loa ka e hope leo ole o na huaolelo kumu, remove, removing, removal, ua mau ka e, ina paha he leo kanipu ka hua mua, change, changeful.
2 Mamua o ka leo pakui, koe nae s a me na leo pakui nana ka i ka hua mua, ua hoololiia ka i hope loa o ka huaolelo kumu i i, (merry, merrier, pity, pitiless:) ina he leo kanipu mamua o ka y, dai, days, joy, joyful.
3 Mamua o ka leo pakui nana he leo kani ka hua. mua, ua hoopaluaia ka leo kanipu hope loa o ka huaolelo kumu, ina paha he mapunaolelo hookahi ka huaolelo kumu, a ina paha he kalele ma ka mapunaolelo hope loa, robt, robber, commit, committee,
Eia kekahi mau haawina ao. E kakou i na huaolelo, Peace, me na pakui ful-able: wesi, me-ly-est; Play, m@e- ed: Happy, me-ness-er:Sin, me-s-ing; Rubel, me-con. Differ, me-ence.
NA ANOAI O KA MAKANI
KILIOOPU.
Ke mau nei no ka pii mahuahua ana o ka Ahahui Opiopio o ka mak@i Kilioopu nei.
Ma ka la 24 o kela mahina @u nei, ua pii aku la kekahi wahi keiki @uku o Palapala kona inoa, maluna o @ekahi kumu laau, a ua haule oia a @ kona opu i ka hao, a ua kukonukor!ka eha, a ma ka la 25 ae make aku la@ia.
W. E.
Ua malamaia ka hoike o na Kula Sabati o Maui Waena ma ka luakini o Waihee, malalo o na hooponopono ana a J. W. Kalua, ke Kahu Kula Sabati Nui o Maui Waena, ma ka la 24 o kela mahina. Ma ka hora 9 ponoi ua weheia na hana me ka himeni a me ka pule. Ua hoomakaia na hana hoike ma ke Kula Sabati o Kahakuloa. Ua eleu no na Keiki ma ka himeni a me na ninau ma na ui kamalii. He kaikamahine opiopio ko lakou alakai; eleu no.
Ke Kula Sabali o Waihee mai, o S. W. P. Kanealii ke alakai. Ua nani no na mea i hanaia, ua eleu na haumana a me ko lakou alakai, he mau kumumanao no kekahi i hakuia e kekahi mau haumana; eleu no.
Ke Kula Sabati o Waihee iho, o W. P. Waiwaiole ke alakai i kokuaia e D. Keaweamahi; eleu no na haumana o ia kula ma na himeni a me na ninau ma ke Kauoha Hou, a he haiolelo na kekahi haumana e pili ana i ka waiona.
Ke kula Sabati iho o Waikapu, o S. Halai ke alakai i kakuaia e Kaili; eleu no ia Kula Sabati ma na himeni a me ninau.
He mau olelo paipai na L. Aholo, N. Kapahu, W. P. Kahale, J. W. Kalua, me S. W. P. Kanealii. He lulu dala mahope iho a ua loaa na; dala he 50,00. Ua hoomakaukau ke Kula Sabati o Waihee he wahi paina, a ua ai a lawa kela a me keia, a he maikai a maluhia na hana o ia la.
MOSES KEKALOHE.
HUI KALEP O NA KANAKA
HAWAII .
Ke liuliu a hoomakaukau nei kekahi mau keiki lalawai o ua aina makani kaulana nei, e kukulu i Hale Kuai no lakou, malalo iho o ke poo e kau ae la maluna. Mai Kapaau a Kaipuhaa wale no ke komo, ua pani ia aku o waho. Ua hana lakou he mau kanawai a me na rula no lakou, a ua hooholo loa lakou ia mau mea a pau, a ua koho lakou he mau poo nui. Ua koho ia no hoi he mau komite imi hana elima, oia iho la na lala nui o keia Hui Kalepa. Ma ka Ahahui o ka la 25 o kela mahina, ua lulu dala lakou, a hiki aku ka huina o na oleni i loaa i ka 1, 056 o ka huina ia o na dala e wahiho nei ma ka lima o ka Puuku i keia manawa, aole nae i pau mai ka poe hookomo, ke manao ia nei e hala loa ana maluna o ekolu tausani, pela ka manao ke ae mai nae ka Haku mea hale.
JOHN. MUA.
Kapaau, N. Kohala.
NA MEA HOU O KOHALA
AKAU HAWAII.
E ka NUPEPE KUOKOA E, ALOHA OE: He wahi nuhou ano nui ka'u e hooili aku nei maluna o kou kua palahalaha, a nau ia e lawe hele aku imua o na tausani lehulehu a pau.
Ma ka po o ka la 30 o Mei nei, ua holo mahuka aku la o E. Haalou (w,) me kana kane manuahi, oia o Kahoo kaa, ua haalele iho la oia i kana kanemare a me ka laua kaikamahine e noho puanuanu ana ma ka rumi o ka hale, ma ka lono i loheia he hana mau no ia a keia wahine o ka haalele i kana kane, oiai o ka pakolu keia o kana hana ano ino.
Ua noho laua malalo o J. Kekipi me ka oluolu kupono, a hiki wale i ka wa a ka Liona nui i hiki mai ai, oia o diabalo ka enemi nui iwaena o ka lahui kanaka a pau o ka honua.
Ma ia po hookahi no, ua pakele ke ola o kekahi mau ohana ma ka wela ana o ka hale i ke ahi, a me ka ikaika o na kokua ua pio ke ahi.
Ma ka la 23 o Mei, ua hanau na J. M. Kawelo me Mrs. Kaohua Kawelo no Makapala, (aole i haiia ke ano o ke keiki) ma ia wahi no na Kanuha me Kalua i ka la 27 o ia mahina no he keiki kane, a ma ka la 31 ua loaa he keiki kane na Keawe me Milita, kana wahi- a ke ola maikai nei ko lakou mau ola a pau.
J. M. KAWELO.
KA DIABOLO ILOKO O KE
KANAKA.
(HANESE KE KUMEKA.)
Aka, he kanaka makua kou makuakane, a hiki paha iaia ke noi ia Iesu nona iho.
Aole i manao Rekena he kanaka ona kona makuakane. Aka, ma kona manao, aole e noi ana oia nona iho. Kuu iini nui, e noi aku oia ia Iesu. Pono ole loa keia ano ona. A e mahuahua ana ke ino, olelo Rebeka.
Aole olelo hou o Ani. Honi no ia Rekena, a paani pu laua ma kahi bebe lole (doll.)
I ke kii ia ana o Ani e hele e paina, hawanawana oia ia Rekena, e noi aku nae kaua ia Iesu.
Ma ia po, kukulu na kaikanmahine liilii elua ma na wahi moe liilii elua, e pule no ke kanaka iloko ona ke diabolo, no ka mea, o ke kuko rama, he doabolo io no ia maloko o ke kanaka, a hiki ole ke mahiki ia ke kokua ole Iesu. Hiki no i Iesu ke kokua.
Ua hoolohe Iesu i ka pule a keia mau kaikamahine liilii.
Noonoo no o Ani i ka hana e ko ai ka pule.
Ma ke kakahiaka ae, olelo Ani, e nana, ua nele kahi bebe lole i ke kamaa ole. E ae anei oe e hele au i ke kumeka o Hanese, e hana oia i paa kamaa maikai no kahi bebe lole?
Ae, o hele oe, he ala pokole no.
Ka holo no ia o Ani, a ku ma ka puka o ka hale o ke kumeka. Kapalili kona puuwai iaia e kikeke ana. Wehe no kae kumeka i ka puka a nana ia Ani me ka maka oluolu, a akaakai ka ninau o Ani; hiki anei ia oe ke hana i paakamaa no kuu wah bebe lole?
Ae; a kulou oia e ana i ke kapuai, me ka olelo, e hana au i paa kamaaa no kau bebe lole, a no ka bebe lole o kalu kaikamahine.
Ua olelo huhu au iaia i nehinei.
O ! o kela diabolo ia iloko ou, nana i hoala ia huhu a hana ino, wahi a Ani. No ke aha kou noi ole aku ia Iesu e kipaku ia iwaho ou?
Nana ke kumeka ia Ani me he la e huhu ana. Aka, he ano maikai ko Ani, oluolu ka olelo. Aole pane ke kume ka. Ninau hou Ani me ka ikaika. No ka aha kou noi ole ia Iesu? E noi aku oe, a e noi aku kau kaikamahine. Nui kona aloha ia oe, a olelo oia, he makuakane maikai oe ke loohia ole ia oe ia mea ino. Ua ike oe i ke keiki a kela makuakane. He diabolo iloko ona, a hoolauwili a hoohina iaia iloko o ka wai, a iloko o ke ahi. Aka, ua hoola Iesu iaia.
Pau ia olelo, hoi aku Ani i kona home me ke kanalua, ua pono paha kana hana, pono ole paha.
Aka, paa kela mau olelo a Ani i e kumeka. No ke aha kou noi ole ia Iesu e kipaku i ke diabolo iwaho ou? Oiaio no, he diabolo no ke kuko i ka bia. He mea ona no ka bia elike me ka wiseke ke inu a nui. A ina hoomaka au e inu, ala mai ka makemake e inu hou, a inu hou ae. Hiki ole ia'u ke oki. Ua hoao no e haalele, a hoi hou no nae.
No ke aha kou noi ole ia Iesu? kani pinepine ia ninau iloko o kona pepeiao. Hiki ole ke moe oluolu. A mahope, hoohaahaa oia iaia iho, kulou, a noi i Iesu. "E Iesu e kokua mai ia'u i ke kue ana aku i ke diabolo." Hoolohe Iesu i ka pule, a ua haalele keia uhane ino ia Hanese ke kumeka. Ua ko na pule a na kaikamahine.
Auhea ke kaikamahine Hawaii e aa e hoohalike me Ani Liilii?
SABBATH READING.
(Unihiia e Hawaii.)
NUHOU KULOKO.
Ua hoike iho nei a ua hoomaha ke Kula Kahunapule i ka Poaono o kela pule aku nei.
Ua huli hoi mai nei ka Luna Leta Nui mai Hawaii mai.
E alawa iho e na makamaka heluhelu i na Olelo Hoolaha e hoea aku nei ma kekahi wahi e ae o ka pepa o keia la
Ma Kikihale ae nei ma ka la 5 o keia mahina, he keiki ohaha maikai na Nahuina k, me Kaawihi w,
I ka poakahi nei i noho ai ka Ahahui Nui o na Mokupuni ma ka luakini o Kawaiahao.
Ua hele makaikai aku ke 'lii ka Moi i ka halemai lepera o Kakaako i ka Poaono o kela pule aku nei.
Ua ano hooulu hoohaunaele ae ka poe mai lepera o Kakaako i ka Poalima o kela pule aku nei, a no ia kumu ke kiaiia nei ka pa haiemai e na makai.
E kilohi iho e na makamaka a me na luna nupepa i ka "Hoolaha Mau" o ka nupepa nei, a e hookaa@e i na dala i ka mea i hoakakaia ma na hoolaha la.
Ua huli hoi aku nei ka wahine muumuu ma ka mokuahi lawe leta i ka po la Sabati nei. Ua laki no oia me na wahi kenikeni mahuahua.
Nalo hou na hiohiona o ko kakou mau moolelo i keia pule. E ahonui mai e na makamaka a hoea aku i keia noa ana iho.
Ua laweia aku no Kalawao i ka Poalua nei he 50 mai lepera maluna o ka mokuahi Mokolii. Mai ka halemai lepera o Kakaako keia poe mai lepera i laweia aku la.
Ke puapuai mau mai nei na lono e hooiaio ana no ka holo io o ko kakou puali puhi ohe i Kapalakiko iloko ae nei o ka mahina o Iulai.
Ua hookuuia mai ka halemai lepera o Kakaako i ka Poaono o kela pule aku nei, he 9 mai lepera. He poe mai keia i hookuuia me ka mau no o na hiohiona o ka mai maluna o lakou. O keola paha kela a ke kauka e olelo nei la!
Ma ke ahiahi o ka Poakahi nei i puhi hui ai ka puali puhi ohe o ka manuwa Amerika Hartford e ku nei ma ke awa, me ko kakou puali puhi ohe, ma ka Hotele Hawaii. Nui ka poe i akoakoa malaila-ua maikai ka puhi ana o na puali a elua.
Ma ka halawai koho o na Luna Nui o ka Oihana Kinai Ahi o ke kulanakauhale nei i malamaia ma ka Hale Kaawai Helu 2 i ke ahiahi Poakahi nei, ua ike iho makou, ua kohoia o Mr. J. Nott i Luna Nui, Mr. Chas. B. Wilson, ke kokua ekahi, a me J, M. Monsurat (Maunakea opio) i kokua elua.
O keoa Poakahi iho la 11 o keia mahina, ka la i manaoia ai ma ia la i hanau ai ka Napoliona o ka Paeaina Hawaii nei. Ma ia la e malamaia ana he heihai lio nui ma ka Paka o Kapiolani elike me na hana i maa mau ia ia na makahiki i hala ae nei. Ke nanaia aku nei me ka manao nui ia na hana o ia la e ka hapa puni lealea o ke kulanakauhale nei.
KELA ME KEIA.
E weheia ana ka Ahaolelo o Nu Kilani i ka la 14 0 keia pule ae.
Ua make mai nei ka makuahine o Kenela Kalani
He hoopaapaa nui mawaena o na nupepa o ke kulanakauhale o Nu Ioka e pili ana no na Pake.
He mai onawaliwali ko ka Moiwahine Vitoria iloko o kela mau pule aku nei, a iloko o keia mau la ua ano oluolu ae a ua ano hiki iaia ke hele.
O na hana hooweliweli a ka mea hoopahu dynamite ma ke kulanakauhale o Nu Ioka, ke lawelaweia la ia hana hookahi ma ka apana aina o Kanada, a ke hoopiolokeia la ka noho'na o na kanaka a me na luna aupuni pu.
Mamuli o na hooponopono apakee o ke aupuni o Tureke no na hooponopono ana o ke apana aina o Aremenia ma Rusia, no ia kumu ua hoouna mai nei o Rusia i kekahi mahele nui o kona puali koa kaua ma na palena a pau a Aremenia.
O adimarala Myer o na Aumoku kaua Farani i hoonohoia ma na kai o Iapana a me Kina, ua loaa aku nei he kauoha iaia mai kona aupuni aku e kauoha aku ana iaia e keakea oia a me na koa i ke komo makawalu ana aku o na Pake i ka apana aina o Tonqrein o Kina.
Ua weheia ka hoikeike nui o na ia ma ka kulanakauhale o Ladana i ka la 12 o kela mahina aku nei, e ke keiki uli o Wale a hooilina kalaunu hoi o Beritania Hui a puni, imua hoi o kekahi aha kanaka nui
Ua oleloia ua uluhua loa ke keiki aliii Bisimaka i ka ua mea o ka hoopilipaa mau o ka mai i kona kino.
Ua hooholo iho nei ke aupuni o Geremania he Kuikahi me ka mokupuni o Madagaraka.
MELE INOA NO KEELIKOLANI.
A ka lai au i Halihee
Nana na maka i Kaopuana
I ka lai aloha a na kupuna
Noho ana o kalani la i ka olu
I ka olu kahela a ke kehau
Ka makani aloha ia o ka aina
Aina ua nohoa ke aloha
A kupa kamaaina ilaila
I ka po mahina lailai
Ka i kaua mai ia'u
Haina ka pua i kauiana
O Keanolani no he inoa.
A ka lai au i ka Hilinai
Ku au a nana ia Huehue
O ka iho makawalu a na lae
I ke kai hawanawana o Kawaihae
Kea ana ke aloha la i ke anu
I ka ua Kipuupuu o Waimea
Me o'u hoa hui la i ka noe
I ka uhi wai o Mana
Huli au a nana ia Waiau
Na Pua hoonani a Lilinoe
Haina ka pua i kauiana
O Keanolani no he inoa.
A luna au o Hualalai
Ku au nana i ka lai
Apo ana ka malino i ka malie
Lohi ana kehau a hinu ke kai
Paa ana i ka pewe piko o ka lai
Kahela ka olu i na kuahiwi
Kahiko mai la i na kualono
I ka luna kapukapu o Maunakea
Ke pookela ia o na kuahiwi
O ka oi kelakela o Hawaii
Haina ka pua i kauiana
O Keanolani no he inoa.
A ka lai au i Hanakahi
I ka nu'a Lehua i Kaili
Hiaai na manu ilaila
I ka unu i ka wai ohelohelo
Ohelo lei a Keanolani
Ke luia mai la e ka Puulena
Ka makani hali ala o kanahele
He ala ka pua o ke ahiahi
Haupahinoa i ka wao
I ka malu wehi o ka palai
Haina ka pua i kauiana
O Keanolani no he inoa.
A ka lai au i Haliilua
Anoano mai ana ke aloha
O kuu aina hanau
He haupu halia i ka manawa
I o'u makua i ka lai
Ua noho a kupa ilalia
I aloha i ka malino a Ehu
I ka pa kolonahe a ke kehau
Nahenahe i ka pili o ke ao
Hoolale mai ana e ala
Aia ke ola i ka opua
Hihiki liliko i ka moana
Hana kihene ua i ke ao
Ola ai ke kupa o Konanui
Haina ka pua i kauiana
O Keanolani no he inoa.
A ka Lai au i Niumalu
Holu ana e ka lau o ka Niu
I ka pa kolonahe a ka Eka
Ka makani kupa o ka aina
Aina ua nohoaena Lani
Kamaaina i ka makahonu
I ka poli aloha i Ahuena
Ku ana o Maile hahei
Me na Lehua o Lehuakona
I lei kahiko no Keanolani
Haina ka pua i kauiana
O Keanolani no he inoa.
A ka lai au i Mauliola
I ka lai hiki mai ma Haehae
Ke hoi ae la i Hanakaulua
Elua pua oi ma ka hikina
O Kumukahi la o Kakanoni
Na Lehua o malio i ka Ehukai
I ka lae hala o Kookoolau
Holu ana ka milo i Waiakea
Nape ana i ka wai hoolihilihi
Qai makaikai a ka malihini
Haina ka pua i kauiana
O Keanolani no he inoa.
A ka luna au o Kawaikini
Kilohi i ka nani o Kailua
Ka hiki mua o na kanak
I ke one launoe o Niumalu
Kau ka manao no Iwalani
Ka iwikani o na Kona
Nana i olali na kai loa
Aia ka ilina i Hanuapo
Hea ana o Kanoelohea i ke kai
Ei ae ka pono ia Iwalani
Ka uwahi poepoe o ka okeni
Ola ai na kupa o ka aina
Haina ka pua i kauiana
O Keanolani no he inoa.
A ka lai au i Kahoililani
Noho ana i ka uluwehiwehi
Ka popohe maikai a na pua
I nohea i ke ano ahiahi
I ka welo'na a ka la i Lehua
Ke i ae nei ka manao
E hoi au i ka home lai
I ka olu o Maunakamala
I ike i ka wai aniani
I ka wai aloha lua i ka maka
Haina ka pua i kauiana
O Keanolani no he inoa.