Ka Nupepa Kuokoa, Volume XXII, Number 22, 2 Iune 1883 — KA LA HOOMANAO NO NA KOA I MAKE. [ARTICLE]

KA LA HOOMANAO NO NA KOA I MAKE.

O ka Poakolu nei, oia ka la a ka lahui Amerika i hookaawale ai no ka hoomanao aloha ana no ko lakou mau koa i hele ma ke kahua kaua aina a me ka moana no ke pale ana aku i ka enemi a me ka hoopakele ana i ko lakou aina aloha; he la i hoomanao huliamahi nuiia e ia lahui, a e hoakoakoa ana ka lehulehu o kela a me keia mokuaina ma na pa ilina kupapau, me ka hoonani ana i na ilina me na lau a me na pua, me ke mele ana i na mele a me na haiolelo aloha. Aole kela he la hauoli, aka, he la hoomanao me ka u, me na hoohiwahiwa ana i na hana a ia poe i ae e haalele i na home, na wahine a me na keiki, na makua a me na mea a pau, e make i mau ai ka welo lanakila ana o ka hae o ko lakou aina hanau.

Ua malamaia ua la nei ma keia kulanakauhale e ka hui a na koa e ola nei mawaena o kakou i komo pu ma ke kaua kuloko iho nei ma ua Repubalika nui la. Ua akoakoa ae lakou, he lehulehu wale, mauka o ka ilina pa kupapau ma Maemae, me na lau a me na pua nani, a ua uhiia na ilina o ka poe i komo ma ia kaua, a i holo mai ma Hawaii nei a waiho i ko lakou mau kino ma keia aina malihini. Ua haawiia he haiolelo ku i ke aloha a me ka mahalo nuiia e Rev. J. A. Cruzan o ka luakini o Kaukeano, oia hoi kekahi i komo ma kela kaua, a he mau tausani na lehulehu i akoakoa ae e ike. Ua malamaia ka la me ka maluhia, a ua maikai na hana hoalohaloha i kela poe koa oiaio i hala e mamua.