Ka Nupepa Kuokoa, Volume XXII, Number 22, 2 Iune 1883 — HE HOALOHALOHA ALII. [ARTICLE]
HE HOALOHALOHA ALII.
I KA MEA KIEKIE HON. MRS. C. R. BISHOP, KEKAHI O NA ALII HANAU O KA AINA. Aloha oe: — Ua oluolu i ka Makua Mana Loa ka lawe ana aku i ke ola o kou Kaikuaana hoahanau ke Alii ka Mea Kiekie R. Keelikolani mai keia ola ana a i ka hopena mau o na mea a pau. Nolaila, o makou o na Hoahanau o ka Ekalesia Makua o Kawaiahao, ke komo pu aku nei makou me Oe iloko o ke kanikau kumakena no kou hoahanau Alii i aloha nuiia. Nolaila, E Hooholoia: Ke hoike aku nei makou i ko makou Aloha Alii ma ke komo pu ana aku me Oe iloko o na wa kumakena no ka make ana o kou hoahanau Alii. Hooholoia: Ke kulou haahaa aku nei makou imua o ka Mea Mana Loa, a ke nonoi aku nei i Kona Lokomaikai e hoomama mai i kou naau kaumaha, a Nana e kokua mai ia Oe i na manawa a pau o keia mau la kanikau. Ma o ko makou Komite, S. L. DESHA, J. WANA, J. NALUA, Na Komite. G. KOLOPAPELA.