Ka Nupepa Kuokoa, Volume XXII, Number 22, 2 June 1883 — KA DIABOLO ILOKO O KE KANAKA. [ARTICLE]

KA DIABOLO ILOKO O KE KANAKA.

(HANESE KE KUMEKA.) He kanaka maikai no o Hanese ke kumeka i kekahi manawa, a paa no i ka hana kamaa ana. I kekahi manawa nae; okoa kona ano. Hele no i ka hale inu bia, a inu bia, mea ino, awaawa loa, inu no nae, a inu, a inu, a ona. I kekahi la, hoi mai oia mai ka hale inu bia a i kona hale; a i ka halawai pu ana me Rekena kana kaikamahine, hooluliluli oia iaia a hoolei aku i waho o ka hale. Loaa oia ia Ani liilii e uwe nui ana ma ke alanui. I ka hoao ana o Rekena e hai aku ia Ani i ke ano e o kona makuakane i kekahi manawa; i kona haule ana ma ke kapuahi, a iloko o ke kio wai; pane o Ani: E! ua like oia me ke kanaka a Iesu i hoola ai Ninau Rekena: Heaha kona mai? He diabolo iloko ona, pane Ani. Oia paha ka mai o ko'u makuakane, pane Rekena; no ka mea, ua ninau aku au i ko'u makuahine, mamua aku nei: Heaha la ke ano o ko'u makuakane i kekahi manawa, huhu, ano pupule, hina ilalo, haule iloko o na kio wai, a maluna o ke kapuahi, a hana ino mai ia kaua? Pane mai oia: E kuu kaikamahine makamae, he diabolo iloko ona. Ina pela, hiki ia Iesu ke hoola iaia, olelo Ani. Aka, aole Iesu maanei, pane Rekena. Hiki nae ke noi aku ia Iesu. Lohe no oia a haawi mai i ka mea i noi ia aku, pane Ani. (Aole i pau.) E holo ana o Kauka Pika no Kalawao i keia Poakahi ae.