Ka Nupepa Kuokoa, Volume XXII, Number 22, 2 Iune 1883 — HE MAU UI ME NA HAINA. [ARTICLE]

HE MAU UI ME NA HAINA.

ALOUIN KE KUMU, PEPIN KE KEIKI A KALEMANE (CHARLESMAGNE) KA HAUMANA, MAK. A. D. 800 PAHA. Na ka haumana e ninau; na ke kumu e pane. (Koena.) Heaha na pepeiao? Na waihona o na kani. Heaha ka lae? Ke kii o ka uhane. Heaha ka waha? Ka mea hanai i ke kino. Heaha na niho? Na pohaku wili ai. Heaha na lehelehe? Na puka o ka waha. Heaha ka puu? Ka mea moni i ka ai. Heaha na lima? Na paahana o ke kino. Heaha ka puuwai? Ka mea hookipa i ke ola. Heaha ke ake paa? Ka mea hoopaa i ka wela. Heaha ka spleen? Ke kumu o ka akaaka me ka oli. Heaha na iwi? Ka ikaika o ke kino. Heaha na uha? Na poo o na kia. Heaha na wawae? Na kia o ke kino. Heaha na kapuai? Na kahua hele. Heaha ke koko? Ka wai o na aa, ka ai o ke ola. Heaha na aa? Na punawai o ka io. Heaha ka lani? He poepoe kaa. Heaha ka malamalama? Ka maka o na mea a pau. Heaha ke ao? Ka mea paipai i ka hana. Heaha ka la? Ka olinolino o ke ao, ka nani o ka lani, ka maikai o ke ao; ka mahele hora. Heaha ka mahina? Ka maka o ka po, ka mea haawi i ka hau; ke kaula no ka manawa. Heaha na hoku? Na kii pena o na mea i hanaia; na pailaka o na Sela; na lei nani o ka po. Heaha ka ua? Ka mea i hoohapai i ka honua; ka makuahine o ke kulina. Heaha ke ao? Ka po o ka la, ka luhi o ka maka. Heaha ka makani? Ka mea hoaleale i ke ea; me ka wai, ka mea hoomaloo i ka honua, Heaha ka honua? Ka makuahine o na mea ulu; ka mea hanai i na mea ola; ka waihona o na mea ola; ka mea moni i na mea a pau. Heaha ke kai? Ke alanui o ka poe wiwo ole; ka palena o ka honua; ka mahele aina; ka waihona o na muliwai; ka punawai o na ua, ka puuhonua no ka poe mahuka, ka mea kokua i ka poe imi lealea. Heaha na muliwai? Na mea holo maha ole; na aniani o ka la; na mea hoopulu i ka honua. Heaha ka wai? Ka hoa o ke ola; ka mea hoopau lepo. Heaha ke ahi? Ka oi o ka wela; ka mea hanai i ka mea hanau hou: ka mea e oo ai na hua. Heaha ke anu? Ka hui o na lala. Heaha ka hau? Ka mea hoomaau i na mea ulu; ka mea hoomake i na lau; ke kaulahao o ka honua; ke kumu o na wai. Heaha ka hau paa? Ka wai maloo. Heaha ka makahiki? Ke kaa o ka honu. Heaha kana i halihali ai? Ka po me ke ao; ke anu me ka wela. Owai na kahu kaa? Ka la me ka mahina. Ehia ona mau hale? Umikumamalua. Heaha ka moku? He hale holo; he hale hotele mau; he mea hele me ka wawae ole; he hoa no na one. Heaha ke one? Ka pa o ka honua. Heaha ka mea e ono ai ka mea awaawa? Ka pololi. He kanaka, ewalu ma kona lima; ua

lawe ia ehiku koe eono. Pehea ia? He elele ekemu ole. Heaha ia? Heaha ia, he mea no, he ole nae? He kanaka e hele ana ma kona poo. Pehea ia? UNUHIIA E HAWAII.