Ka Nupepa Kuokoa, Volume XXII, Number 22, 2 June 1883 — HE HANA PONO OLE LOA. [ARTICLE]

HE HANA PONO OLE LOA.

Ua olelo makou maloko o kela pule i hala aku nei, i ko makou lohe ana mai i ka onouhele o Kipikona i ka oihana Loio Kuhina i na Loio naauao o ke kulanakauhale nei, a me ka hooleia, aohe makemake i ka oihana, no ka hilinai ole ia o Kipikona. I keia pule iho nei hoi, ua hoea mai nei maloko o kana nupepa haole he pane hookano, e hoike mai ana i ka hana pono ole loa o keia kanaka. Ua olelo mai nei oia, aole loa ka i noi ia aku kekahi loio e lawe i ka oihana. Ma ko makou noonoo, he hana ku keia i ka hoopilikia ia Hawaii. He hoike maopopo loa no ko Kipikona ake nui e kaa ka mana a pau loa o ka hookele ana i ke aupuni iloko o kona poholima hookahi. Ma na aupuni naauao a pau, ua panipu ia ka ipuka, kahi e hiki ai i na hookele aupuni ke hoao e hana i keia kumu hoopilikia aupuni. Aole loa e ae ka lahui e noho mana kekahi kanaka hookahi maluna o na hookele ana i ke aupuni. He mea i kue ikaika loa ia e ka pono a me ka oiaio. A pehea la keia hana ma Hawaii nei? Ke ae kaokoa mai nei keia Kipikona maloko o kana nupepa i kona hoao e hookele lima hookahi oia me na mana piha i ke aupuni Hawaii, me na huaolelo hookano a hookiekie. Ua manao oia e ko ana kona makemake, aka, ke hai aku nei makou, aole loa e ae ka lehulehu ia ano hana, a mai noho oia a hoao e lawelawe pela. Ua hoomanawanui ka lehulehu i kana mau hana uhauha a puni hoohanohano ohaka wale, a ua piha ko lakou mau waihona o ka hoomanawanui me na mapuna apu o ka paku-a, ke nauki a me ka manao kuihe; ua haule ko lakou mau manao maikai a hilinai i na ano hana a Kipikona, a ua aneane hiki mai ka manawa e ku ai ka poe aloha io ia Hawaii, a hoopakele ae iaia mai na hookele ana a keia kanaka ma ke ala o ka poino a me ke kahulihia. He like loa keia hana me ka pakaha wale i ka mana o ka lehulehu a anunu aku iloko o ka poholima o ke kanaka hookahi, a he mea hoi aole loa e ae ia e ka poe noonoo naauao a kuonoono o ka aina nei. Mai noho o Kipikona a hoao e kau i ka noho lio maluna o Hawaii, a e holo oia ma ke kua o Hawaii, o huli auanei kona au, a pio kona ipukukui.