Ka Nupepa Kuokoa, Volume XXII, Number 15, 14 ʻApelila 1883 — Page 1
| This text was transcribed by: | Keanu Sai |
| This work is dedicated to: | Tutu Lucy Kapohaialiʻiokamamalu Koii Unauna |
Ka Nupepa Kuokoa
KE KILOHANA POOKELA NO KA LAHUI HAWAII.
BUKE XXII, HELU 15. POAONO, APERILA 14, 1883. NA HELU A PAU 1115
NA HOOLAHA.
-------------
MAIKAI KA HOI
KA PAPA,
---A ME---
KA LAAU O KOU HALE,
NOHEA LA?
KAI NO HOI NO KAHI O
WAILA MA.
-----
Nana aku no hoi ia la ohi ka la o ka laau o Makawao, i ka ua mea hoi o ka nani.
NA PAPA! NA PAPA!
A ME
Na Pono Kukulu Hale
O na Ano no a Pau.
AIA MA KE KIHI O NA ALANUI
Papu me Moiwahine,
HONOLULU.
Malaila e loaa ai e like me ka makemake no ke
KUMUKUAI MAKEPONO LOA.
----------
PAPA! PAPA! PAPA!
NA PAPA HULUHULU, NA PAPA MANOANOA, NA PAPA I KAHIIA,
NA PAPA KEPA, PAPA HOLE KEOKEO, PAPA HOLE ULAULA.
------
Na Laau, Na Laau,
NA KUA, NA KAOLA, NA AAHO, NA MOLINA, NA PEAPEA.
PINE HULUHULU,
PINE I KAHIIA.
NA PAPA A ME NA LAAU ULAULA.
PILI ULAULA,
PILI KOEKOE,
PANI PUKA,
PUKA ANIANI,
PANI PUKA ANIANI,
PUKA OLEPELEPE.
-------
P E N A
O NA ANO A PAU,
Hulu Pena mai ka liilii a ke nui,
Aila, Pena, Aila Hoomaloo, Waniti, Pate,
Na Lako o kela a me keia Ano.
NA AMI PUKA HALE, NA AMI PUKA PA, ANIANI
PEPA HALE A ME NA LIHILIHI,
E loaa no malaila.
--------
PAAKAI HELU,
--
---O---
KAKAAKO ME PUULOA.
-----
No ke Dala Kuike e loaa no na mea a pau i haiia ae la no ke Kumukuai Emi Loa. O na Kauoha mai Hawaii a Niihau, e loaa aku no me ka hooko pololeila. E kipa nui ilaila i ike i ka oiaio.
905 tf.
--------------------------
NA HOOLAHA.
-------
PAPA! PAPA!
--NO--
ALLEN ROBINSON
-------
ua wehe ae no mana
PA KU AI PAPA,
---MA---
Ka Uwapo o Pakaka.
--------
Na Papa Ulaula a na ano a pau,
Na Papa Paina o na ano a pau,
Na Pili Hale Keokeo,
Na Pepa Molina,
Na Pepa Hoonani Hale.
Na Pena a me na Aila Pena!
Na kui o na ano a pau.
Na Pani Puka a me Na Pani Puka Aniani, Na Pani Puka a me Na Olepelepe.
------------
NA LAKO KUKULU HALE
O NA ANO A PAU!
-------
E kuaiia ma
KE KUMUKUAI HAAHAA LOA,
O KEIA MAKEKE.
------------------------------------------
PAPA, PAPA
AIA MA KAHI O
LEWERS & COOKE!
(O LUI MA.)
----------
MA KE KAHU A KAHIKO MA
Alanui Papu a me Moi!
E LOAA AI NA
Papa Nouaiki!
o kela a me keia ano.
Na Papa Nani a Paa no ke Kukulu ana i na Hale!
Na Pani Puka, Na Puka Aniani, Na Olepelepe, Na pou, Na o-a, Na Papa Hele, Na Papa Ku, A me na Papa Moe nui loa.
NA PILI O KA HALE
O NA ANO A PAU.
Na Pepa Hoonani, Na Pena o na Wai a pau, Na Kui mai ke Nui a ka Makalii, Na Ami Puka, Na Ami Puka Aniani, Na Ami o na ano a pau, Na Aila Pena, o kela me keia ano, Na Aila Hoomaloo, he lehulehu wale, Na Aila e ae o na ano a pau.
NA WAI VANIKI
----A ME NA----
WAI HOOHINUHINU NANI!
o na ano a pau loa.
NA BALAKI ANO NUI WALE!
A ke hai ia aku nei ka lono i na makamaka a pau, ua makaukau keia mau makamaka o oukou e hoolawa aku ma na mea a pau e pili ana ma ka laua oihana
---NO KA--
UKU HAAHAA LOA!
E like me ka mea e holo an amawaena o LAUA a me ka MEA KUAI.
E hele mai! E na Makamaka!!
A e lawa no hoi ko oukou makemake me ka oluolu a me ka maikai!
---------
E LOAA NO MA NA HALEKUAI O
WALAKAHAUKI MA!
MA ALANUI
Papu, Moi a me Moiwahine
OIA HOI:
Na Noho Lio hou loa o na ano a pau,
Na Palule Keokeo, Huluhulu, o na ano a pau,
Na Pio Ahinahina Pelekane hou loa o na ano a pau.
Na Pena Kukaepele.
Na Kopa Bulu. Na Lole o na Wahine o na ano a pau. Na Pahu Aila
Mahu maikai loa. Na Silika, Pahoehoe, o na ano a pau. Kihei o na ano a pau.
HAINAKA LAU NUNUI SILIKA O NA ANO A PAU.
-------------
He nui aku no i koe, he piha pono na Koluma o ka pepa, in a e huai pau la aku nei.
Eia hou ae a hoea mai i keia mau la iho he Lako Waiwai hou loa o na ano a pau, a he lako hou loa i wae pono ia e J.T. WATERHOUSE, JR., ma Enelani, a he mau waiwai hoi i kupono loa no ko kakou mau kaiaulu. Nolaila, e eleu mai e na makamaka a me na hoaʻloha e hoonuu i keia mau lako waiwai hou loa.
1076-3m
-------------------------
KA MOOLELO
---O---
PILIPO KEKOA!
Ka Makai Kiu Ilikini
---O---
AMERIKA HUIPUIA!
---A O KA---
NANE HUNA O KA 1776.
-------
(Mai ka peni a ka mea unuhi moolelo o "Onila Maka, ka Makai
Kiu Kaulana o Enelani.")
----------
MOKUNA IV.
KA MAKAI KIU.
Ia wa, kulou aku la ke poo o ua Makai Kiu nei imua ia Beramile i pane mai ai:
Ua olelo ae ua whai luahine aeahaukae la, ua ike oia ia Wekila Pika a me Lu Lavonia e noho pu ana, me ka lohe pu aku ia laua e hoohiki ana, a lohe hou aku la no hoi ia ia Wekila i ka olelo ana ae: Ina e kaawale ae ana o Mariona, alaila, e noho no auanei kaua me ka oluolu.
Ua ae nae paha ua wahi luahine la i ka manawa i hanaia ai ua mau mea la?
Ae.
Me ka pololei loa?
Ae, ua hai ae no ia i ka la a me ka hora.
Pehea? wahi a ka Makai Kiu i ninau aku ai.
Ua maopopo iaʻu, aohe i pololei ka la a me ka hora ana i hoike ae ai, oiai, iloko oia wa, e noho pu ana o Wekila me aʻu; no ia kumu, aole au i hilinai nui i ka olelo ao a ua wahi luahine la; aka, i keia manawa, ke hilinai nei au, ua hai ae no ia i ka oiaio, a ua kuhihewa oia i ka manawa.
Ua wahahee ua wahi luahine la! wahi a ka Makai Kiu.
Ke hilinai nei au ua hai mai no oia i ka oiaio, wahi a Beramile.
Ua hiki no, no ka mea, ua kamaaina au i ka manao o ka poe nana ka hana, ma ke kue ana mai i koʻu; aka, e hoolohe mai oe i kaʻu mau olelo i keia wa, mai hana oe i kekahi mea e eha ai ko Wekila Pika manao, o mihi auanei oe mahope aku, ke ike iho oe, ua hoahewa hala ole ia oia.
He mau hoike e ae no hoi kekahi aʻu e hiki ai ke hooia aku imua ou, o Wekila Pika no ka mea nana i paipai e pepehi i kuu aloha he kaikamahine.
Ina pela, aohe waiwai o koʻu hiki ana mai ianei, no ka mea, ua maopopo mua no ia oe ke kumu i make ai ko kaikamahine.
He makemake no au i kokua.
No ke aha?
No ka imi ana aku i na meheu a hiki i ka wa e maopopo ai o Wekila Pika no ka mea nana i pepehi.
He oiaio, aole e hiki ia oe a iaʻu hoi ke hana ia mea; oiai, aole oia i hewa.
Pehea oe i ike ia?
He hoike wale aku no kaʻu ma na mea aʻu i lohe pono ai, a ua lawa hoi au ma ia aoao.
Ia wa, mino aka iho la o Beramile a pane mai la:
Ae, e hooiaio aku ana au imua ou i ke kahua o koʻu manao koho, he kahua kupono loa hoi e hiki ole ai ke kanalua ia, a in a no hoi aole au i hilinai loa mahope o keia kanaka opio, aole la e loohia ia ke kino o kaʻu kaikamahine e ka make iloko o keia hora.
A heaha ua mau hoike la?
E hahai mai iaʻu a hiki i ka rumi i hanaia ai ka pepehi kanaka, a e ike no auanei oe i na mea a pau ma ko lakou wahi iho, e like me ka wa i hanaia ai ke karaima.
E mau ana no ka pa ana a ka ino i ka wa a Pilipo Kekoa i ukali aku ai mahope o Beramile no ka rumi o ke kaikamahine.
I ka wa a ka Makai Kiu i komo aku ai iloko o ka rumi, ua ano e ae la kana mau hana.
Oiai ka Makai Kiu e kamailio pu ana me Beramile maloko o kona keena heluhelu buke, he ano molowa oia ma ka nana aku, aka, iaia i hiki aku ai mawaena o na hoike menemene leo ole e waiho ana iloko o ka rumi, ua hoike mai la kona mau helehelena i ka hauoli.
Ia Beramile a me Pilipo Kekoa i haalele aku ai ia loko o ka rumi heluhelu buke, ua lawe mai o Beramile i kekahi ipukukui.
Ia wa, waiho iho la ka Makai Kiu i ka ipukukui ma kahi kupono e maamaama ai ka rumi holookoa, a haule iho la oia maluna o kona mau lima a me na kuli.
E like me ka nahesa e komo ana ilalo, pela no oia i kolo ae ai a puni ka rumi me ka hanu ana o kona ihu ilalo, oiai hoi kona mau maka e haka pono ana iluna o ka papahele, e like hoi me ka ilio e hanu ana i ka meheu, pela no hoi oia i hanu hele ae ai a hiki i ka puka aniani.
Uunnuhi ae la oia i kana ipukukui makai mailoko ae o kona pakeke a hoolele aku la i kona malamalama iluna o ka moena mamua pono iho on a.
Iaia i hiki aku ai ma ka uka aniani, hapai ae la oia iluna a nana pono iho la i na mea a pau malaila.
Aia hoi iluna pono o ka paepae o ka puka aniani, e waiho ana ka meheu o ka wawae kanaka i hehi ia iluna o ke koko.
Ana pono iho la ka Makai Kiu i keia mea, me ka hoomaopopo ana i na mea a pau, a mahope iho o kekahi manawa, hoomaka hou aku la oia e kolo ilalo a puni ka rumi.
A mahope iho, ku ae la ia iluna.
Aia hoi e waiho ana iluna o ka moe kekahi pahi i oki loa i ke koko.
Pela iho la no nae paha ka waiho ana a kela pahi i kou la i komo mua mai ai iloko nei? wahi a ka Makai Kiu i ninau aku ai ia Beramile.
Pela no; aohe mea i lawelaweia.
Nana pono iho la ka Makai Kiu i ke kulana o ka waiho ana a ka pahi.
Mahope iho o ka maopopo ana iaia, lalau aku la oia a nana pono iho la i na kulu koko oluna, a akaa mai la ia i kekahi mea mailuna mai o ka pahi a malama iho la.
Huli ae la ia a ike aku la ia Beramile e nana pono mai ana iaia me ka hoihoi.
Ua ike iho la oe i kena pahi? wahi ana.
Ae.
Na Wekila Pika paha keia pahi.
Ae?
Ua hauoli loa au ia, wahi a ka Makai Kiu; no ka mea, he kumu ia nana e hoike mai ana i kona hewa ole, oiai, ua hanaia me ke akamai nui e holoi loa ae i kona inoa i kuni ia maluna nei o ke kumu.
Oia anei ka hoike oiaio no kona hewa ole?
Ae.
Aole loa, he hoike oiaio kena no kona hewa maoli.
Pela paha, wahi a ka Makai Kiu i pane aku ai, a niele hou aku la.
He wahine ui maoli io no o Lu Lavonia?
Aole loa.
A pehea ka oe i ike ai?
Ke honi nei au i kona mau helehelena ma na ea mama o ka lewa.
Ke koho nei paha kou manao, oia kekahi i komo iloko o keia hana? wahi a Beramile.
Aole loa au i koho iki oia kekahi , aka, e hoao ana au e imi pono i keia hana mamua o koʻu make ana. Aole anei e pono e hoi aku oe i kou rumi, a i ole, e ukali mai oe mahope oʻu.
E hele ana oe ihea?
E imi i ka meheu.
Ka meheu hea?
O ko kaikamahine.
Alaila, e ukali aku no au mahope ou.
O, e hele kaua, wahi a ka Ilikini, a e hoike aku no auanei au ia oe i kekahi mea kamahao mamua o ka hiki ana mai o ka malamalama o ke kakahiaka.
I ka Makai Kiu i pane ae ai i keia mea, lele aku la oia iwaho o ka puka aniani a haule aku la ilalo o ka honua, a lele pu aku la me Beramile.
I ua Ilikini la i haule ai ilalo, ua hoomaka koke iho la oia e kolo ilalo e like me kana hana iloko o ka rumi.
Kolo aku la oia ilalo me ke kaapuni ana ia wahi me ka malamalama o kona ipukukui imua on a.
No 15 minute paha kona kolo kaapuni ana pela, a mahope iho, hooho ae la ia i keia huaolelo: Uku! a hoomaka aku la e hahai pololei mahope o ka meheu.
Hoomau aku la oia i kona kolo ana pela, me ka hoomaopopo pono ana i ke ano o ka waiho ana o ka lepo.
Oiai ka Makai Kiu e nee nei ma kana hana, ua piha iaia he hora okoa iloko o 500 iwilei.
Ia Beramile hoi e hookolo nei mahope aku o ka Ilikini e kupee la ilalo me he ilio la, ua hoomaopopo iho la ia, eia oia a me ua Ilikini la ke hookokoke aku nei i kekahi kiowai.
I laua i aneane aku ai e hiki i ua kiowai la, ku ae la ua Ilikini la iluna, no ka maopoo ole iaia o kana wahi e hele hou aku ai.
Ua nalowale iho la ka meheu? wahi a Beramile i ninau aku ai.
Aole.
A heaha kau mea e kali nei?
Ua hiki anei ia oe ke nana maluna o kekahi mea weliweli me ka hopohopo ole?
Ia wa, ninau aku la o Beramile me ka leo haalulu:
Ke kokoke aku nei ka paha oe i kahi o ke kino mainoino o kuu kaikamahine i waiho ai?
Ua makaukau loa au e hoike aku imua ou i kekahi mea weliweli, in a he hiki ia oe ke hoomanawanui.
E hoao au e hoomanawanui.
Ia wa, hoolele aku la ka Makai Kiu i ka malamalama o kona ipukukui maluna o kekahi mea.
E nana pono aku oe ma kahi o ka malamalama o ke kukui e pa la, wahi a ka Ilikini.
Ia Beramile i nana aku ai, ike aku la ia i kekahi mea e anapa mai ana.
Ke ike aku la no oe?
Ae, ke ike nei au, wahi a Beramile.
Oiai, ua ike aku la na maka o ua kanaka la i ka hapa o ka lima o kekahi wahine i kanu ia iloko o ke kiowai lepo, a o ka mea e anapa ana i ka malamalama o ke kukui, he komo daimana ma kekahi manamana o ka hapa o ka pulima.
(Aole i pau.)
------------------------
HE MOOLELO NO
Kapena Pelelika
----------
HE WAHI KOA KAULANA NO PERUSIA.
-----
O ka mea e eo ai o ke kaikamahine alii ma ke kukini ana, ua ae ka Moi e male kana kaikamahine alii i ua mea la, a nana e malama ke aupuni; o keia ae la na olelo a ka Moi ia Pelelika mamua ae o ka la heihei, a i ke eo ana hoi o ua kaikamahine alii la i ke kukini a Pelelika, ua piha hauoli loa ia lakou nei, no ka lilo ana na lakou e hookele ke aupuni e like me ko lakou makemake iho me ke kuhihewa nui.
O ka Moi, i kona wa i kamailio ai ia Pelelika i ka mea e eo ai, oia ke male i kana kaikamahine, aole oia i manao pela. Aole oia he pupule e hoomale ai i kana kaikamahine alii punahele i keia aeahaukae. He wahi kanaka oia no ka papa haahaa loa o na makaainana, a pehea la ia e hoomale ai i ka Hooilina Alii o kona aupuni me keia wahi kanaka palaualelo. A i mea e ku like ai me kana olelo akea e male kana kaikamahine i ka mea e eo ai, he mea hilahila loa nona ke hoole maoli mai no kana mau olelo mua. O ua Moi nei a me kona mau Alihikaua, kuka malu iho la lakou i ka mea e hana aku ai ia Pelelika a me kona mau hoaʻloha i kekahi hana akamai a maalea i kumu e pau ai lakou i ka make, a oia keia:
O ka hale paikau o na koa aupuni o ua Moi nei, ua hanaia ia hale me ka hao wale no ma na wahi a pau; e laa na puka, na puka makani, ka papahele, kaupaku, na noho o loko, a me na paia o ua hale al, ua hanaia lakou me ka hao wale no. O ka olelo hooholo iho la a ua Moi nei, oia hoi, e kono aku ia Pelelika a me kona mau hoaʻloha e hele ae iloko o ua hale la, a e ai i na mea ai i hoomakaukau ia ma ka papaaina. He wahi paina keia na ka lokomaikai o ka Moi e pahola aku ana i na malihini, no ka eo ana ia lakou o keia heihei. A i ko lakou wa e komo ai iloko, ua makaukau na koa kiai puka e pani aku i na puka a me na puka makani, a ki aku ia lakou a paa iloko o ua hale hao la, a e ho-a ia kekahi ahi nui malalo ae o ua hale nei i kumu e wela ai ka hao, a e pau no auanei kela poe kanaka i ka make iloko o ua hale la, a e paapaa no auanei ko lakou mau kino i ka wela o na paia o ua hale la, me ka hoolilo ia o ko lakou mau iwi i mau poke lanahu.
Holo iho la keia manao lokoino o ua Moi nei me kona mau Alihikaua, hoouna mai la oia i kona Elele, e hele mai e hai ia Pelelika ma, ua makaukau ka Moi e hookipa mai ia lakou maloko o kekahi papaaina e haawiia ana no ko lakou hanohano maloko o ka hale paikau koa aupuni.
O Pelelika ma, i ko lakou lohe ana i keia, ua hauoli loa ia lakou no keia papaaina a ka Moi e haawi ana ia lakou. Kau aku la lakou nei maluna o na kaa a ka Moi i hoouna mai ai, a holo pololei aku la lakou no ka hale koa, a ma ka hora 7 ponoi o ka po, hiki aku la lakou nei ma ke alapii o ua hale nei, a hookipa ia aku la e kekehai Alihikaua me na laina koa e kuku mai ana, a komo ana lakou nei iloko o ua hale kamahao nei, kahi hoi a ka Moi i manao ai, i ko lakou wa e komo ai iloko o keia hale, alaial, ua make e lakou mamua o ke kani ana o ka hora 12 o keia po.
"Ma ke kauoha a ka Moi iaʻu," wahi a ka Alihikaua i pane mai ai ia Pelelika ma, "ua loaa iaʻu ka hanohano o ka hookipa ana mai ia oukou maloko o keia hale kamahao, e ai, e inu, a e hana e like me ko oukou makemake iho."
Komo aku la lakou nei iloko o ua hale nei; a iloko no hoi o ia manawa i pani ia mai ai na pani hao, na puka makani, a ki ia mai la a paa me na kaulahao nunui, a kauoha ae la ka Moi i kona mau kuke o ke alo alii, e ho-a ia kekahi ahi nui malalo o ua hale nei; a iloko no hoi o ka manawa pokole loa, ua e ae la ua ahi nei; a o ka ikaika i manao ia no keia ahi e a nei, ua like ia me ke tausani kanaka hookahi, in a e kiloi ia lakou iloko o keia ahi, e pau no auanei ko lakou mau kino i ka a ia a lilo i lehu iloko o na sekona pokole.
O Pelelika a me kona mau hoaʻloha, noho iho la lakou maluna o na noho hao, e ku ana hoi kekahi pakaukau hao ua hele a piha i na mea ai o kela a me keia ano maluna o na pa hao. lalau aku la lakou nei i na pahi a me na o, he hao wale no, nana ae la ma o a maanei o ua hale nei, he hao wale no; a ma ka lakou hoomaopopo ana iho i ke ano o keia papaaina i pahola ia mai imua o lakou, ua hauoli loa lakou no keia lokomaikai nui o ka Moi, me kona maumanao waipahe, a nolaila, haawi ae la o pelelika a me kona mau hoaʻloha i na leo huro ekolu, me ka inu ana ae i ke ola o ka Moi a me ke kaikamahine alii.
Ua ai iho la lakou i na mea ai o ka papakaukau me ka inu ana ae i na kiaha wai momona, a ua hoohala ia hoi keia mau hora loihi e Pelelika ma ma na noonoopili aupuani, a e kohokoho ana hoi oia i ke kulana o kela a me keia hoaʻloha on a e noho ai e malama i ka oihana aupuni; a oiai lakou e piha hauoli ana i keia wa mamuli o kekahi mau haiolelo naauao a Pelelika, i ka wa i kokoke ae ai i na hora aumoe, aia hoi, puapuai liilii mai la ka mahanahana o ke ahi wela o ka papahele hao o ua hale nei, me ka hiki ole ia lakou nei ke ku iho na wawae i ka papahele no ka nui loa o ka wela; hilinai aku la lakou nei ma ka paia o ua hale nei, he mea e ka nui o ka wela mahope o ko lakou mau kino, a me he mea la, iloko o na minute pokole mai keia wa aku, e puni ana lakou i keia ahi wela lalapa o keia hale hao e hoopuni nei ia lakou.
(Aole i pau.)
-------------
NA HOONANEA.
Ma ko hai mau lawehala ana e hoopololei ai kekahi poe naauao a pau i ko lakou mau lawehala iho.--O ka makee a alunu dala ka mole ia o na hana hewa a pau.--O ka inoa maikai aala o ke kanaka a i ole o ka wahine paha, he momi maemae ponoi ia no ko lakou uhana pakahi.--O ke kanaka kuokoa a hoopono, he hopena nani kona.--O ka Hanohano a me ka Hilahila, aole no ke kulana a me na hiohiona i hanaia, aka, e hana pono i kau mau hana ponoi iho me ka pololei, aia ilaila ka hanohano, kahi i waiho ai.--E hiolani no ka pono no kekahi manawa, aka, aole ia e make he manawa no a ala mai.--He nui na kanaka o kela a me keia ano, me ko lakou mau manao nui like ole.--E aloha i kou hoalauna e like me oe ia oe iho.--Mai kiola aku i na momi imua o na puaa, a pela no hoi, mai kiola wale aku i na huaolelo maikai imua o ka poe muhee.--Na ke au o ka manawa e hoike mai i na hana huna a malamalama.--E hoao kela a me ekia e hana i kana hana ponoi iho--O kahua olelo Oluolu waipahe imua o na manao huhu o kekahi mea, oia ka mea nana e hoopuehu liilii i na manao huhu.--O kea mea kamailio ma ke ano haanui, he poe palaualelo lakou.--O na manao kipi aole ia e lanakila.--Aole he wahi kupono e ae elike me ka home i na haahaa a hanohano paha.
---------------
KA INO O KA MAHINA O MARAKI.
O keia malalo iho na hoaiai ana no na ino nui i ike mau ia iloko o na mahina o Maraki no na makahiki he umi i hala ae nei, a he hoike ana hoi i ke akamai hawawa o kela haole Kanada i kona wanana ana no ka ino nui e pahola ana maluna o Amerika hui, iloko o ia mahina, no ka mea, ua ike mua ia no a ua kuluma no hoi ka maihna o Maraki--o ke mahina ia e pahola nui ai na ino nui ma na poai o Amerika ka hui--penei na hoaiai ana i unuhiia mai e makou:
Iloko o ka mahina o Maraki o ka makahiki 1873, ua ikeia he umikumamakahi manawa o kekahi ino nui i pahola iho maluna o Amerika.
Iloko o ka makahiki 1874, aole i emi iho malalo o umikumamalua manawa i poai ai kekahi makani ikaika i kapaia he Cyclone maluna o Amerika Hui, a na ia makani i ulupu iho a waiho kuahea ka aina.
Iloko o ka makahiki 1875, he ino nui ka i ikeia ma na kapakai o Nu Ierese a me ke Kaikuono o Mekiko ma na la 2, 3, 4, 5, a me 6 o ka mahina o Maraki. He umikumamakahi no hoi ino i hoohakui iho ma Amerika iloko no o ia makahiki hookahi a iloko no o ka mahina o Maraki.
O ka ino nui i ikeia iloko o ka makahiki 1876, a iloko no o ka mahina o Maraki--he ewalu ka nui. Ma na wahi he nui ua ikeia ua pa ka makani me ka ikaika loa iloko o na mile he kanalima iloko o ka hora. Ma na kapakai o ka moana Atelanika a me ke Kaikuono o Mekiko ka ikaika loa o ua ino la a o kahi nui hoi o ka poino.
Iloko o ka mahina o Maraki o ka makahiki 1877, he umikumamalua manawa i hoohakui ai kekahi ino nui ma Amerika, i kukai pu ia me kekahi makani Kelewini.
O ka ino nui o ka mahina o Maraki o ka makahiki 1878, ke hoomanao nei no ko Amerika poe, oia no ka ino nui i pahola iho ma na kapakai Komohana akau; o ka ino ikaika ia i ikeia.
Pela no me na ino o ka mahina o Maraki ʻ79, ʻ80, ʻ81, ʻ82, ua pahola iho ia mau ino maluna o ka aina me ka ikaika. Ma keia mau hoakaka maluna ua ikeia he mea hiki ole ke i ae he la maikai kela a keia la o ka mahina o Maraki, aka, na kela a me keia la e hoike nona iho.
--------------------
HOOPAU DALA MAOPOPO.
--------
E KA NUPEPA KUOKOA. Aloha oe:--
E ninau mai ana paha oukou iaʻu. Owai keia hoopau dala nui? O W.W. Kipiko-na-ko-na; Pehea au i ike ai? penei: Aole koʻu he lohe pepeiao, aka, he ike maka koʻu. Aole owau wale no , o kuu mau hoa kekahi o keia aina malihini.
Akahi. I ka makahiki 1880. Ua loaa i keia panalaau he 85,000 dala mai ka Ahaolelo i ke au o na Peresidena mua o ka Papa Ola. Ua mahele pono ia keia mau dala e ko lakou puniu piha ike maluna iho o keia lahui pilikia: penei ka mahele ana: 21 paona ai, 7 paona pipi i kela a me keia mai i ka pule hookahi, 1/2 auka kopa a me 2 kuaka paakai i na mai pakahi i kela a me keia malama, 1 kuaka ailamahu i kela a me keia hale i ka malama $6.00 i kela a me keia mai me ka bila lole i ka makahiki, hookahi. Eia no na mai Lepela a pau ke noho nei malalo o keia mau hoakaka ana maluna o ua ike ia kekahi mau hana hou ma Kalawao nei iloko oia au, oia na Halelaau a me na hana e ae.
Alua. I ka makahiki 1882, ua loaa i keia panalaau he 95,000 dala mai ka Ahaolelo mai, i noho Peresidena ia e ka hapa ike (W.M.K.) nolaila, 10,000 dala ka oi o keia mau makahiki i mua o na makahiki, i hala. Eia ka ninau: Aihea keia mau dala he 10,000? Ua haawi ia anei i kekahi hana e ae o ke Aupuni ai ole, ua lilo auanei ia Hagai ma laua o Pali?
Ina ua nalowale kumu ole keia 10,000 dala, alaila, aia ke poo manao ke kau aela maluna. "Hoopau dala maopopo," aole o keia wale no, he nui na hana lua ole a keia W.M. Kipikona i alakai ai a haule.
Nolaila, aole i kupono keia haole (W.M.K.) i Peresidena no ka Papa Ola. Pela no oia e kupono ole ai ma na Oihana nui o ke Aupuni Hawaii nei.
W.H.K. KEKALOHE.
Kalawao, Molokai. Maraki 27, 1883.