Ka Nupepa Kuokoa, Volume XXII, Number 14, 7 April 1883 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

 

BUKE XXII, HELU 14.        POAONO, APERILA 7, 1883.         NA HELU A PAU 1114

 

KA MOOLELO

--O—

PILIPO KEKOA!

Ka Makai Ku Ilikini

--O—

AMERIKA HUIPUIA!

--A O KA—

NANE HUNA O KA 1776.

(Mui ka peni a ka mea unuhi moolelo o "Onila Maka, ka Makai Kiu Kaulana o Enelani."

MOKUNA III.

"UA MAKAMAKE HOI OE IA'U, A EIA AU LA?"

            Iloko o kona pihoihoi nui, ua hele aku la o Beramile a ka puka aniani, oiai, e pa ana ka makani me ka ikaika, a e hiolo makawalu ana na paka-ua eloelo me ke kaumaha, a iloko oia wa, ua puiwa ae la oia i kona lohe ana ae i ka pa-e ana mai a kekahi leo kanaka i ka pane ana mai:

            Ua makemake hoi oe ia'u, a eia au la?

            Huli awiwi ae la o Beramile, a ike aku la oia i kekahi kanaka kupaianaha e ku ana iloko o kona rumi.

            O ke kanaka i komo aku iloko o ka rumi, he kanaka kino loihi helehelena maikai, me na oho uliuli.

            Ua kahikoia ua kanaka kupaianaha la me na aahu o ka poe mahiai, a ua like loa hoi oia me na lima hana o na kuaaina, koe wale iho no keia, ua paa kona mau wawae me na pale wawae o ka poe Ilikini.  I ka nana aku i kona mau nanaina, he ku maoli i ka weliwelino ka mea, e a hulili ana kona mau onohi maka, a he hoa kupono ole no hoi oia ke halawai hookahi aku ma ke ala.

            Ia manawa no unuhi koke ae la o Beramile i kekahi pu panapana mailoko ae o kona pakeke, a kau aku la imua ona a pane aku la me ka leo huhu:

            Owai oe, a heaha hoi kou kuleana oonei?

            Ua makemake hoi oe ia'u, a eia wau la? wahi a ka pane.

            Mahea kou wahi o ke komo ana mai iloko o keia keena?

            Ma ka puka komo mai nei no.

            Iloko o keia wa e hai mai oe ia'u i kau hana o ka hele ana mai nei, o ki ia oe e a'u.  Aohe ou wa e hoapaapa mai ai ia'u iloko o keia keena.

            Ia wa mino aka iho la ua kanaka la, a unuhi ae la i kekahi palapala mailoko ae o kona pakeke a haawi aku-la ia Beramile.

            Aka, kau mai la no nae o Beramile i kana pu me ka makaukau ma kekahi lima, a lalau mai la kekahi lima i ka palapala.

            Ua oleloia, he kanaka hopo ole o Beramile, a e like hoi me kona kulana mau, ua kau mai la oia i kana pu no ka malama ana i ka maluhia o kona kino iho.

            Nawai mai keia palapala? wahi a Beramile i ninau aku ai.

            E heluhelu iho paha oe, wahi a ua kanaka la i pane aku ai.

            Ua maopopo no hoi ia Beramile na hana maalea a pau a ka poe powa, i wahi e aui ae ai na maka o ka poe a lakou i manao ai e pepehi, nolaila, ua kau pono loa aku la oia i kana pu i kona puuwai, i mea e hoike aku ai imua ona, ua makaukau mau oia iloko o na wa a pau.

            A penei na manao o ka palapala i haawiia aku ai iaia e heluhelu:

            E BERAMILE:--Aloha eo:  E like me kou makemake ma kau palapala i hiki mai io'u nei, ke hoouna aku nei au i kekahi o na nahesa maalea loa, nana e huli aku na wahi huna a me na mea pohihihi loa a ka noonoo o ke kanaka e hiki ole ai ke hoomaopopo; he kanaka hoi na'u i hilinai nui no kona hoopono, a ua hiki ia'u ke waiho aku i ko'u ola a me ko'u hanohano maluna ona, ma kana mau lawelawe ana a pau.  Ua hiki loa ia oe ke hilinai maluna ona no kona akamai, kona maalea nui a me kona wiwo ole.  Oia no ko'u lima akau ma ka oihana, a aole loa oia i haule iki ma kana mau hana.  E hoike aku iaia i na mea a pua.  Iloko o ke ao nei a puni, aole i loaa ia makou he kanaka i oi ae mamua ona.  Me ka oiaio,

B. C. L.—

            [Ma kahi a makou i kau iho la i na hua kumu, ua'kakau ia ka inoa piha o ka mea nana ka leta.]

            Oiai ua lawelawe mua a ua kamaaina hoi o Beramile me ke alii o na Makai Kiu i kona lima kakau a me kona mau huakumu, nolaila, aole ola'i kanalua i na huaolelo o loko.

            Owai kou inoa? i ninau aku ai o Beramile.

            O Pilipo Kekoa.  He Ilikini ko'u makuahine, a o ko'u makuakane hoi, he Aliikoa no ka puali koa o Amerika Huipuia,  Ua mare ia laua.

            Ua puana mai ka Makai Kiu Hapa Ilikini i ka huaolelo "mare" me ke ko'iko'i, a au ae la kona mau maka me ka hoihoi nui, me he mea la, e hoike mai ana, ua hanau pono ia oia iloko o ka berita maemae o kona mau makua, a ua loaa iaia ka haaheo ana malalo o na kanawai o Amerika Huipuia.

            Ia wa, peahi mai la o Beramile i kona hoa e noho iho iluna o ka noho, a ninau mai la:

            I nahea hei kou hiki ana mai?

            Ma ke kaa ahi hope loa o ke kulanakauhale mai nei.

            Ua hiki mai ua kaa ahi la i ke ahiahi okoa no.  A heaha kou mea i hiki mua ole mai ai ianei?

            Ua pilikia loa ia wau i ka hana ia wa.

            Heaha ia hana?

            Aole au i hele mai ianei e hai aku i na mea i hoolalaia, aka ina mea i ike makaia? wahi a ka Makai Kiu i pane pakike aku ai.

             A heaha na mea a kou noonoo i hooholo ai?

            Aohe.

            Aohe mea iki a kou noonoo i hooholo ai la?

            Alaila, Ua ae ia anei au e lawelawe i keia hana?

            Ae.

            Alaila, e hoike mai oe i na mea a pau e pili ana.

            Ia wa, hoike aku la o Beramile i na mea a pau malalo o na nieniele noeau ana a Pilipo Kekoa ka Makai Kiu Ilikini.

            O ka'u kaikamahine a me Wekila Pika, he kaikuahine a kaikunane ma ka hanana; a malalo o kekahi palapala hooilina e haawi ana i kekahi apana aina nui ia laua like, malalo o kekahi mau kumu ano e.

            Pehea ke ano o ua mau kumu la?

            Penei: E mahele like ia ua waiwai la mawaena o laua, ke male kekahi i kekahi.  A ina e hoole kekahi o laua i ka male ana i kekahi e like me ka olelo o ka palapala kauoha, alaila, e ili aku no he ekolu hapaha o ke kuleana o ka mea e hoole ana i ka mea e hooko ana i na olelo o ka palapala kauoha.

            A ina e make ana kekahi o laua, alaila, heaha ka hopena?

            Alaila, e ili aku no ka waiwai a pau i ka mea e ola ana.

            Ae, ina e make ana kau kaikamahine alaila, e lilo ana o Wekila Pika ka hooilina o ua waiwai la, a ina hoi e make ana ia, alaila, e lilo ana ko kaikamahine ka hooilina o ua waiwai nei ea?

            Ae.

            Ua manaoia o ko laua po ia e male ai, ma ka po ona i make ai?

            Ae.

            A ina e hooko io ia ka male, alaila, e ili no ka waiwai ia laua like?

            Ae.

            Ua aloha anei laua kekahi i kekahi?

            Ma ko'u hoomaopopo aku, ua aloha no , a hiki i ka po i make ai kekahi o laua.

            Noho malie iki iho la ua Mnkai Kiu nei no kekahi manawa, me ka noonoo nui ana iloko ona no na mea ana i lohe ai i keia wa, a pane aku la:

            Aohe manao iloko o Wekila Pika e hiki ai iaia ke pepehi i ko kaikamahine?

            He manao no, wahi a Beramile i pane ae ai me ka leo okalakala.

            E hai mai.

            Eia ma ko'u hale ke noho nei kekahi makamaka kaawale loa.

            He wahine anei oia?

            Ae.

            Alaila, e hoike mai oe ia'u i na mea e pili ana iaia.

            He wahine opio ui oia, aka, he ilihune nae,--a eia oia ke noho nei me ka hilinai ana maluna o ka'u mau loaa.

            A heaha hoi kona manao o ka pepehi ana iaia?

            He ekolu pule ae nei i hala, ua lohe iho la au i kekahi mea kupanaha.  E holoholo ana au i ke ahiahi mawaho o ko'u malapua e hoopuni ana i ko'u hale, ia wa i lohe aku ai au i kekahi mau hauwawa leo, Nolaila, manao iho la au he leo no ka poe powa; alaila, nini malie aku la au a ike aku la me ke ka haha nui o ko'u naau i ka ike ana aku i ka'u kaikamanine e kamailio pu ana me kekahi luahine aeahaukae.

            He poe aeahaukae no nae paha kekahi e hoomoana ana ma keia wahi iloko oia wa?

            Aole i maopopo ia'u ia mea, aka, ma ko'u manao, ianei no kekahi o lakou.

            A heaha na mea a ua luahine la e olelo aku ana i ko kaikamahine?

            He mau olelo ano e loa kana e olelo aku ana iaia.  Ua hai aku la oia i ka'u kaikamahine ua aloha o Wekila Pika i kekahi mea okoa, a eia ke kau nei ka poino maluna o ka hale o Beramile.

            Ia wa, hulili ae la na onohi maka o ka Makai Kiu a ninau aku la:

            Ua hai mai nae paha ua luahine la i ka mea ana i aloha ai?

            Ae.

            Owai?

            O kuu hanai a kaikaina hoi o ka'u kaikamahine, o Lu Lavonia.

            Ua hai mai nae paha oia i ke ano o kona manao ana pela?

            Ae.

            E hai mai oe ia'u i kana mea i olelo ai—na olelo ponoi ana.

(Aole i pau.)

 

HE MOOLELO NO

Kapena Pelelika

HE WAHI KOA KAULANA NO PERUSIA.

            Hu ka makani a haalele wale, i alawa ae ka hana o ke kaikamahine alii i hope, e hele ana ua wahi kanaka mama nei imua he mau mile aku la ka mamao iloko oia imo ana iho a kona mau maka, a ma kona hoohalike ana aku, aole oia e holo maoli ana, aka, me he mea la, na kekahi makani nui ikaika oia e hapai ana i ka lewa, e alo ana i na laau, e lele ana ma na kahawai akea, a e hooiho ana hoi ma na kipapali kuninihi, a iloko o na sekona pokole loa, pau aku la ka ike ana a ke kaikamahine alii i ua wahi kanaka nei, a iloko o ia manawa i hooikaika loa ai oia e lihi kokoke aku mahope o ua wahi kanaka nei.

            Iloko o kekahi manawa mahope mai, hiki aku la kahi kukini mama a Pelelika ma kapa o ua luawai anuenue nei, a ua holo ia hoi e ia he 15 mile mai ke kahua heihei mai, iloko o ekolu hapaha hora wale no, nolaila, hookuu iho la ia i kona wawae akau i ka honua, wehe ae la i kana Pikawai, hoopiha iho la a piha i ka wai, hapai hou ae la no oia i kona wawae akau mahope o kona kua, a iloko no o ia manawa oia i kuupau hou mai ai i kona mama e like me mamua, me kona manao, ua ano kokoke mai la hoi ke kaikamahine alii i ka luawai wai anuenue, eia ka, eia no i muliwaa loa kahi i eku maiai ua kaikamahine alii nei iloko o ka e'a o ka lepo me ka hoomanawanui.

            He mau minute pokole wale no keia huli hoi ana mai la a kahi kukini mama, loaa hou mai la ke kaikamahine alii iaia ma ke alauui e ku'e nome aku ana no i kona mama.  Ike mai la ua kaikamahine alii nei iaia nei, hoopakaki loa ae la oia ma kekahi aoao o ke alanui, me ka manao aole oia i ike mai iaia nei.  O kahi kanaka mama hoi, huli ae la ia i hope a ike aku la i ke ano paupauaho o ke kaikamahine alii, koho aku la oia i kona manawa e holo la, aole oia e hiki ana i kahi ana e ku la mai ka punawai mai iloko o ka hapalua hora, a i ole no ia iloko o ka hora okoa, a o ka hapalua like hoi keia o ka loihi mai ke kahua heihei mai.

            "E hoomaha ana wau," wahi a ua wahi kanaka mama nei iaia iho, "No kekahi hapalua hora, alaila, huli hoi aku au i ka pahu hopu, a na'u ke eo o keia heihei ana."  Nolaila, hoomaha iho la kahi kukini mama ma ke alanui, he ewalu mile i koe mai ke kahua heihei mai.

            Iloko o kekahi mau minute loihi a kahi kukini mama e hooluolu ana, ike aku la ia i kekahi pauku laau nui poepoe e waiho ana ma kapa alanui, kii aku la ua wahi kukini mama nei ia mea a lawe mai la a ma kahi ana e noho ana waiho iho la oia ia mea ilalo, a no ka maikai o ka manienie e ulu ana, manao ae la oia e hiamoe iki no ka manawa pokole a ala ae, alaila, hoi aku i ka pahu hopu.  Kukulu aku la oia i kana Pikawai ma kahi paa o na pohaku, moe iho la oia ilalo iluna kona a'o, me ke kau ana aku o kona poo iluna o keia pauku laau oia kona uluna, a iloko wale no o na sekona pokole, pauhia loa ia iho la ua wahi kanaka mama nei i ka hiamoe kulipolipo a Niolopua.

            O Pelelika a me kona mau hoa'loha, aia lakou iluna o kekahi a@ kiekie e noho nei, a maloko o ka @ o kekahi ohenana hoonui ike, ike ma@ la o Pelelika i na mea e hana ia ana ma keia wahi me ka moakaka loa.  Aole i manao o Pelelika ma, ua hiamoe l@ ia kana kukini mama i keia wa, n@ha paha e hoomaha wale ana no oia n@ ka manawa.  He hora hookahi a ke@ keia nana hoomau ana a Pelelika, iloko oia manawa i ike aku ai oia i ke k@mahine alii e huli hoi mai ana ma k@ alanui kahi hoi a kahi kanaka kukini mama e hiamoe haaupo nei.

            E like me ka manao ano lili o ke kaikamahine alii no ka puka @ ana o ua wahi kanaka nei mamua ona, pela oia i manao ai e kalohe i keia wahi kanaka i puka ai oia mamua.  Hiki mai la ua kaikamahine nei ma kahi a na wahi kanaka nei e moe ana, a ike iho la oia, ua pauhia loa ia kela e ka hiamoe nui, hoohalulu iho la oia malaila ia wa, aole no oiala wahi mea a eueu ae, nolaila, ko iho la ka manao lili kohu ole o ua kaikamahine alii nei i ke k@ ana aku i ka Pikawai a kahi kanaka, a ninini aku la oia i ka wai i ka honua; @uli ae la ia a kuupau aku la i kahi aho uuku i koe me ka mama kupono ole.

            Ua ike kakou i ka olelo a ka Lunakanawai o ka la heihei ia laua, aia o ka mea o laua e hoi aku ana me ka wai iloko o na Pikawai i haawi ia aku ai ia laua, oia ka mea nana ke @o o keia la heihei.  O Pelelika ma, mamuli o kona ike ana maloko o kana ohenana hoonui ike e nana hoomau ne@ ua ike aku la oia i ke kaikamahine alii i ke kii ana a ka Pikawai a kahi kukini mama ninini aku i ka wai iwaho, a eia ua kaikamahine nei ke huli hoi mai nei i ke kahua heihei ua kokoke loa, a o kana kukini hoi, aia oia ke hiamoe la ma ke alanui, aole nae he wai maloko o kana Pikawai.

            Heaha kana mea e hana aku ai i koe?  E pau anei kona hilinai ana i keia wahi kanaka kukini mama no kana mau olelo no kona mama, a na Pelelika na lilo o ka huakai makaikai a puni ka honua nei?  Huli ae la oia no ko lakou pono o ka manawa hope loa, a pane aku la o Pelelika ia kanaka kipu pololei, i ka i ana aku,--

            "E manao anei oe he hiki i kou akamai kipu pololei ke ki a ku ka pauku laau malalo o ke poo o kanaka kukini mama?"  "Ae," wahi a ka pane a ke keiki eueu ma ia hana.

            Ku ae la ua kanaka kipu pololei nei iluna, lalau mai la i kana pu raifela kupanaha, a pane iho la oia me keia mau wahi huaolelo pokole:

            "E kuu milimili a punahele hoi," wahi a ua keiki nei me ka paipai ana ae ma ka aoao o kana pu milimili.  "I keia sekona e ike ia ai ko'u akamai, a i keia manawa hoi au i makemake ai ia oe e hooko oe i ka'u mau kauoha."

            Honi iho la ua kanaka nei i na papalina o kana pu raifela, a kau pololei aku la oia i ka waha o kana pu i ka pauku laau e kau ana ke poo o kahi kanaka kukini mama, nona ka loihi mai ke kahu heihei aku he ewalu mile a oi.  I kona wa i manao ai ua hiki aku la kana kau ana i ka hoailona pololei, ia wa no i hookuu pau aku ai ua kanaka kipu pololei nei i ka ikaika o kana pu punahele, a lele pololei aku la ka poka me ka hikiwawe loa a ku kahi pauku laau e hiamoe nei ua wahi kanaka nei, lele liilii ae la i o a ianei me ka haule ana iho o kona poo i ka honua, a puiwa ino ae la ua wahi kanaka nei, i nana ae ka hana, ke iho aku nei ka la e napoo, lele koke ae la oia iluna a holo aku la no kana Pikawai, i nana iho ka hana, ua ninini ia ka wai o loko, nolaila, heaha la kana mea e hana ai.

            Ua olelo mai ka Lunakanawai ia laua, aia o ka mea e hoi aku ana me ka wai i ke kahua heihei, oia ka hoailona no ka mea e eo ana.  O ua wahi kanaka nei, e like me na hana maikai a Pelelika iaia nei, pela oia i hoomanawanui ai e eo keia heihei ia lakou nei, nolaila, paa ae la oia i kana Pikawai ma kona lima, a hapai ae la i kona wawae akau mahope o kona kua; a iloko oia manawa oia i holo hou ai i hope no ka luawai, me ka pa iwakalua ia o kona mama i ko ka makani ikaika e puhi ana, a iloko wale no o na sekona pokole, halulu ana ua wahi kukini mama nei i ka luawai anuenue, ukuhi iho la oia a piha kana Pikawai, hapai hou ae la no oia i kona wawae akau mahope o kona kua, a iloko no o ia wa oia i kuupau hou aku ai i kona mama nui no ka pahu hopu, a oiai hoi ka la e iho iho ana a hapalua like o ka ilikai, halulu ana ua wahi kukini mama nei i ka pahu hopu, a haawi aku la i ka Pikawai i ka Lunakanawai, a hooholo ae la oia, na ke kukini a Pelelika ke eo o keia heihei.  Huro na kanaka a haalele wale.  He mama aku a he mama mai.  He elima minute mahope mai, kapalulu ana ke kakamahine alii i ka pahu hopu, a ua hoopahaohao kokeia kona mau helehelena i ka ike ana mai i kahi kukini mama e noho aku ana.  Huro na kanaka a haalele wale!  Huro hou na kanaka no ka male o Pelelika i ke kaikamahine a ka Moi i ka la apopo!

(Aole i pau.)

 

KUMU MANAO.

KA AUA ANA ME KONA HOPE.

            "Aua kekahi i ka mea ku ole i ka pono, a o ka nele ka hope."   Sol. 11; 24, lalani hope.

            I kuu nana'ku io ia nei heaha ka'u i ike ai a i lohe ai hoi?  Ka nele i kahi mau mea.  He nele piha ma kauwahi, a he nele paha ma kauwahi.

            O ke kupu mai no ia o ka ninau.  Heaha ke kumu o keia nele, nele piha nele hapa,?  Ua huli ae, a huli, a huli, a loaa ka haina, oia keia, o ka aua ana i ka mea i ku ole i ka pono.

            Ma ka wehewehe a hoomaopopo ana e nana kakou i na mea malalo iho;

            1  Ka Aha Euanelio o Hawaii Komohana.

            Heaha ke kumu o ka uuku o na kahu, o na elele, o na hana ma kona mau halawai hapalua makahiki, a o ka poe e hele mai e nana a hoolohe i kana mau hana?  He mau kumu pono paha kekahi.  Aka, aole anei o ka aua ke kumu nui?  Ua auaia na kino e na ona.  Ua auaia kekahi e na haku hana.

            Pokole na hoike hana.  Pokole na hoike manao.  Pokole ke kuka ana ma na mea e pono ai.  A pela aku.  No ke aha?  No ka aua ana i ka manawa, i ka manawa noonoo, i ka manawa kakau, a pela aku.

            2  Na luakini, na anaina hoomana, na halawai haipule, na Kula Sabati, na kula himeni me na papa himeni.  Heaha ke kumu o ka uuku o ka poe hele?  Nui na noho i noho oleia.  Kawalawala ka noho ana.  Uwe kaumaha na kahu, na kahuna na haiolelo, na kumu no keia nele, a nele paha.  Aole anei o ka aua ke kumu?  Aua na kane, na wahine, na keiki i ko lakou mau kino.  Aua na haku hana i na paahana, i na kahu holoholona, i na kuke.

            3  Na ekalesia.  Ke uwe nei na kahu ekalesia no ka uuku o ka poe komo iloko o ka ekalesia.   Ma kekahi mau ekalesia, aole he ohua hou.  Ma kekahi he mau ohua hou he kakaikahi.   Ka makemake o na kahu, i nui ka poe hou.  No keaha ke ko ole o ka makemake?  Aole anei no ka aua?  Ua aua ke Akua i ka Uhane Hemolele, Ae.  No keaha nae?  No ka aua ana o na kahu me na hoahanau i ka pule, i ka ikaika me ka wela o ka pule a me ka waimaka.  Ua nawaliwali ka haiolelo, ua nawaliwali ka pule, ua nawaliwali ka manao, ua nawaliwali ke aloha i kapae mawaho, ua nawaliwali ke kii ana, ka paipai ana, ka imi ana i ka poe auwana.  Ua auaia ka manawa, ka ikaika, ka noonoo ana i ka pono i ka hoohuliia mai o ka poe hewa.

            A o ka poe hewa, a poe mawaho, ua aua lakou i ka mihi, i ka manaoio, i ka imi, i ka ninau.  Heaha ka makou e hana ai i ola makou?  No keia mau aua ana ka nele o na ekalesia i na ohua hou.

            A malia paha he poe huli, he poe mihi, he poe kupono e hookomoia iloko o ka ekalesia, ua aua nae na kahu, na luna ekalesia ia lakou, a hoopanee ia lakou, a waihoia mawaho, ma kahi anu, kahi o na ilio hae.

            4  Na kahu ekalesia.  Ke uwe ala no ke ola ole o ke kino.  Ua hapa ka hana no ka Oihana ekalesia, a lilo i ka hana e kekahi i lawa ke ola kino.  No ke aha?  Aole anei no ka aua ana o ka ekalesia i ke dala hanai kahu?  Ua hapa ia dala.  Aole i lawa pono.

            5  Ka Papa Hawaii.  Ke uwe ala ia no ka hiki ole e hoouna nui  i na misionari i ko na aina e, a e hoonuii ko lakou uku, a e hoonui i na hana, i ke pai buke ana i mea e pono ai na ekalesia Hawaii.  No ke aha?

            Aole anei no ka aua?  Ua aua na hoahanau i ke dala, aole i haawi i ka hapa i ku i ka pono, no ke kokua i kona aina e.  A o kekahi poe i kupono ke lawe i ka Oihana misionari, ua aua lakou ia lakou iho no ka makemake ole ia Oihana maikai.

            6  Na Aha Hui opiopio Hawaii.  Ke uwe la na Peresidena no ka emi o na lala, a no ka make o kekahi mau Aha.  No ke aha ia?  Aole anei no ka aua?  Ua aua ka poe opio i ko lakou mau kino, i ko lakou manawa, aole i hoomau i ka haawi ana ia mau mea.

            7  Na Aha kinai rma, kinai baka.  Ke uwe nei lakou no ka hapa o na lala.  No ke aha?  Aole anei no ka aua?  Ua aua ka poe inu rama i ka rama.

            A o ka poe puhi baka, a nau baka, ua aua lakou i ka baka.  Aole lakou makemake e haalele i ka rama me ka baka.  Mau ka hana, mau ke kuai, mau ka inu, mau ka nau, mau ke puhi.  A ua aua na luna, na lala o ia mau Aha i ka ikaika, i ka manawa, i ka pule i kupono e haawiia aku ia mau Aha.

            8  Ka Aha Hui Kula Sabati o Hawaii nei.  Ke uwe la ia no ka hiki ole e hoonui i kona mau hana.  He wahi hana uuku no kana i keia wa.  Heaha la?  He halawai makahikii ma Honolulu.

            Ma ia halawai ka hoike ana o na kahu i ka lakou mau Kula Sabati, me ka lakou mau hana.  A koho ia na Kahu Kula Sabati no na mokupuni a pau.  He hana maikai no ia.  Aka, makemake ia Aha i luna nui e kaahele a puni keia Paeaina no ka Oihana Kula Sabati.  Makemake hoi ia Aha i halekuai buke no kona mau kula Sabati he 70 a oi aku.

            Aohe hale kuai buke i keia wa. Aole oia he ona no ka buke hookahi.  Aole ona Nupepa Kula Sabati.

            No ke aha keia nele, Aole anei no ka aua?  Ua aua paha na Kula Sabati i ke dala i kupono e haawi aku i mea e hooko ia ai ka makemake oia Aha.

            Ua nanaia ke kumu o ka nele piha, me ka nele hapa.  Pehea la e pau ai ia okoa, me ia nele hapa?

            1  E mihi nui me ka ana ana i na mea i kupono e haawi aku.

            2  E hoopaa i ka aua ana i na mea i auaaia.

            3  E wehe i na mea i hoopaaia mamua.

            1  E wehe i ka puka o na hale, a e hookuu aku i na kino i aua ia mamua, i hele lakou a hoopiha i na halawai Aha Euanelio, i na luakini, i na halawai haipule, i na kula Sabati, kula himeni, papa himeni, na Ahahui opio, na Aha misionari.

            2  E wehe na haku hana, i ka puka o ka waha a e olelo i na ohua, i na paahana.  E hele oukou i na halawai.

            3  E wehe i ka puka o na waha, a e hoopuka aku i na pule, i na olelo paipai, na olelo mihi me ka waimaka pu.

            4  E wehe i ka puka o na naau a e hookuu aku i ka manaoio, me ke aloha.

            5  E wehe i ke pani o na pahu, a lu aku i na dala, i na aahu i auaia mamua.

            6  E wehe i na eke dala, eke gula, i hoopihaia mamua, a haawi aku i ka poe ilihune, i ko na aina e a pela aku.

            7  E wehe i na lua dala, kahi i huna ia i ke dala.  Heaha kona waiwai i loko o na lua?

            8  E wehe i na lima, e hookuu aku e hele e hana, e mahi, e humuhumu, e kakau i mea e pau ai kekahi mau hemahema; i mea e loaa ai na dala kokua mahina hou, a pela aku.

            9  E wehe i ka waha a e hoolei aku i ke kiaha rama, i ka ipu baka, i ka baka nau.

            10  E wehe i ka naau, a e ninini aku i ke ino, i ka minamina, i ka pi, i ka aua, i ka ukiuki, i ka hoohalahala a pela aku.

            11  E wehe i ka puka o ka pa holoholona, ae hookuu aku i na pipi, i na lio, i na hipa, i na kao, a pela aku, i auaia mamua, a e haawi aku i pau kekahi mau nele.

            12  E wehe i ka puka o ka hale kuai, na hale baneko, na hale pehia ko, a e hookuu aku i na mea i hoopaaia maloko, o na mea i auaia mamua, na mea kupono e haawi aku i ke Akua, i ke aupuni o ke Akua.

            I na me ia ka hana ana alaila, e pau ana ka nele, ka hemahema. E piha hou ana na luakini, na kula Sabati, ma na wahi e nui ana na kanaka, me na wahine, me na kamalii.  E ala ana e huli ana, e mihi ana e komo ana na ohua hou iloko o naekalesia.  E lanakila hou ana ka pono ma Hawaii Komohana, a ma keia Paeaina a puni, a hiki aku i na aina e.  Ka kakou pule like ia, e hiki mai ana ia manawa.

L. LAIANA.

Waimea, Hawaii, Feb, 26, 1883.

 

HE NUHOU

E KA NUPEPA KUOKOA E:  Aloha @.—

            He wahi manao ko'u e hoike aku ana ia oe, penei:--Ua hooponopono iho nei o Rev. J. S. Kalana i ka ekalesia makua o Haili, penei:

            Papa 1.—Makua alii o ka pono.

            Papa 2.—Lunakahiko.

            Papa 3.—Diakona.

            Ua kohoia ma na apana a pau e like me @

            In@ @ ka hihia iwaena o ka ekalesia, alaila, na ka papa 3 e hookolokolo, ina like ole na ka papa 2, ma hoio pono ole ia papa, alaila, na ka papa 1 ina no aole he holopono @ki, alaila, e lawe ia mai imua o ka Aha Luna o ka ekalesia holookoa, pela e hana ia ai.  Ua hoolaha ia keia a puni ka ekalesia.  Ua kahaha loa makou no keia mea, a makou i ike ole ai mamua.  Nolaila, ke ninau aku nei au i ke akea e hoike i ka oiaio o keia hooponopono ekalesia.

            Ma keia mau mea a'u e hoike ae la Pela io anei ka hooponopono ana o ka ekalesia, oiai he haumana wau o Rev. J. S. Kalana?  Owau no me kahaahaa.

E. P. HOOAL

 

NA MEA HOU O KAU, HAWAII.

E KA NUPEPA KUOKOA E, Aloha @

Ke ike ae la no kakou i ke poo o keia kukulu manao e kau ae la maluna, "Na mea Hou o Kau Hawaii," a eia ua mau mea hou la.

            He 17 la i nalowale ai kekahi kanaka o Waiohinu nei, o kona inoa o Kualaula, ua hoomaka kona nalowale ana i ka Poakahi, oia ka la 12 o Maraki nei, a mai ia la a hiki i keia la a'u e kakau nei, oia ae la ka nui o kona mau la i hai ia ae la maluna, aole no ia i loaa, ua nalowale loa, ua huna kele ia kona hanu hope loa ma kahi ike ole ia, o kona wahi i nalowale ai, aia i kai o Kamilo-pae-kanaka.

            He nui na ano kanaka ma keia Apana, mawaena o na kanaka Hawaii, ke ano e loa, a e nana mai kakou i ke ano e.  He kanaka Hawaii, he 22 ona manamana ke huiia kona mau manamana-lima me na manamana-wawae, o kekahi kanaka he 21, he 19½, o kekahi he 19, o kekahi he 15, o ka hapanui o na kanaka he 10, a ina e palua ia, ua piha ka iwakalua.  Ma Kau wale no anei ka like ole o na manamana o kanaka, aole paha?

            Elua Ahahui ma Kau nei, "Ka Ahahui Imi Pono Karistiano o Ka Ua Haao, he Ahahui ia i ulu ae iloko o na malama elua, ua nui a mahuahua ka nani o Iehova maluna o ka poe e imi ana i ke aupuni o ka lani, ke noi ae nei au, e hoomau ia aku ka hana pono imua a kau ka lei nani o ka lanakila.

            O ka lua ka Ahahui i kapaia ka inoa "Ka Hui Kalepa Hawaii," oia kahi hana nui e imi ia nei i keia manawa, ma keia apana, ke makemake ia nei e loaa ke kuonoono i na kanaka Hawaii, i ike ai lakou i ka hua o ko lakou luhi ana i ka hua o ko lakou luhi ana i ke anu a me ka wela o ka la, he haneri a oi ae ka nui o na lala, kiokoke e piha elua haneri mahele, he iwakalua dala no ka mahele hookahi, ua manao wale ia e piha ana ka $4,000.00 dala a oi a emi mai paha, he kumu waiwai nui keia, a ua kohoia o Jos. H. S. Martin i Peresidena, o J. K. Naeole i Hope, o J. Kauhane i Puuku, o R. K. Pahee i Hope, o J. N. Kapahu i Kakauolelo, o J. K. Kekaula i Hope Kakau olelo, a ua bona ia ka waiwai o na Puuku a me eono poe i hoopaaia i mau Hope, o keia iho la na mea hou.  Aloha oukou.        J. KALANIKUIA

Kau, Hawaii, Mar. 28, 1883.

 

            I ka Poalua nei ke ku ana mai oka moku kalepa Geremania Bikopa mai Beremena mai, iloko o na la holo he 165; ua lawe pu ia mai eia he 2 mau bipi waiu me 1 bipi bulu no ka Lunakanawai Makale.

 

            Ma ke kakahiaka o ka Poalima o kela pule aku nei ka loaa ana o ka wai o ka luawai e eliia nei ma Tamaki Kuea, ma Koula, i ka 400 kapuai kona hohonu.  Ua hoomauia aku no ka eli ana a loaa ka hohonu kupono e loaa ai ka ikaika kupono o ka pipii ana o ka wai iluna.

 

            E halawai ana ka Ahahui o na Ekalesia o Kauai nei m@ ka luakini ma Ko loa, Kauai, ma ka Poakolu ekolu o Aperila 1883.  E hele ae na lala o ia Ahahui me ka makaukau i na haawina.

Ma ke Kauoha.