Ka Nupepa Kuokoa, Volume XXII, Number 5, 3 February 1883 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

 

Buke XXII, Helu 5.  Poaono, Feberuari 3, 1883.  Na Helu A Pau 1105

 

Na Hoolaha.

Maikai ka hoi ka paia, a me ka laau o kou hale.  Nohea la?  Kai no hoi no kahi o waila ma.  Nana aku no hoi ia la ohi ka @o o ka laau o Makawao, i ka ua mea hoi o ka nani.  Na papa!  Na papa!  a me Na Pono Kukulu Hale O na Ano no a Pau.  Aia ma ke kihi o na alanui Papu me Moiwahine, Honolulu.  Malaila e loaa ai e like me ka makemake no ke Kumukuai Makepono loa.

 

Papa!  Papa!  Papa!  Na papa huluhulu, na papa manoanoa, na papa i kahiia, na papa kepa, papa hole keokeo, papa hole ulaula.

Na Laau, Na Laau, na kua, na kaola, na aaho, na molina, na peapea.  Pine huluhulu, pine i kahiia.  Na Papa a me na laau ulaula.  Pili ulaula, pili keokeo, pani puka, puka aniani, pani puka aniani, puka olepelepe.

 

Pena o na ano a pau, Hulu Pena mai ka liilii a ke nui, Aila Pena, Aila Hoomaloo, Waniti, Pate, Na Lako o kela a me keia Ano.  Na ami puka hale, na ami puka pa, aniani Pepa hale a me na lihilihi, E loaa no malaila.

 

Paakai helu i, o Kakaako me Puuloa.  No ke Dala Kuike, e loaa no na mea a pau hai ia ae la, no ke Kumukuai Emi Loa.  O wana Kauoha mai Hawaii a Niihau, e loaa aku no ia lakou, e hooko koke ia no ia me ka @a pono.  E kipa nui ilaila i ike i ka oiaio.  905@tf

 

Na Hoolaha.:

W. O. Smith, Loio!  Loio!  Helu 36 Alanui Kalepa, Honolulu.

 

W. R. Kakela, He Loio a he Kokua ma ke Kanawai.  He Luna Hooiaio Palapala.

 

Cecil Brown.  Loio a he Kokua ma ke Kanawai.  A he Agena no ka Hooiaio ana i na Palapala no ka Mokupuni o Oahu.  Helu 8 Kaahumanu, Honolulu, H. P. A.  2-@y

 

Asa Kaulia, Loio a Kokua ma ke Kanawai  Ua makaukau au e lawelawe i na hihia a pau ma keia Oihana imua o na Aha a pau o ka mokupuni o Oahu.  E loaa no au ma Koolaupoko, Heeia, a ma Honolulu i kekahiu wa E hooko ia na kauoha mai na wahi a pau o ka mokupuni me ka eleu a me Kahikiwawe.

 

Jno.  Lota Kaulukou, Loio a he Kokua.  ua makaukau oia e lawelawe i na hihia a pau o kela a me keia ano iloko o na Aha Hookolokolo a pau o keia Aupuni.  Ua hiki no hoi ke hana i na palapala a pau e pili i ka Oihana Loio me ka eleu.  E loaa no au ma Heeia Koolaupoko, a ma Honolulu no hoii Kekahi manawa.  901-tf

 

C. C. Coleman, Amara a he mea hana Mekina Kapili Kapuai hao lio.  A me ka Hana ana Kaa Lio, etc., Hale Hana ma Alanui Alii, 905 tf  E kokoke la i ke Alanui Papu.

 

Kale Kulika, Luna hooiaio palapala kuai, molaki, a me na palapala oia ano.  Luna Hooiaio Palapala Aelike mawaena o na Haku a me na Kauwa.  Luna Haawi Palapala Ma@e.  Ma ke kihi o ke Alanui Moiwahine me Kaahumanu, kulanakaauhale o Honolulu, ko Hawaii Pae Aina.  159-tf

 

Richard F. Bickerton, [Peketona.]  Loio a he Kokua ma ke Kanawai.  Keena hana Helu @ Alanui Kalepa, Elua puka ma o aku o ka hale kauka o Kauka Minuteole. 

            E hele anan oia imua o na Ahahookolokolo a pau o keia Aupuni ma na ano hihia a pau, ina paha ma Oahu nei, a ma na Mokupuni e ae. 

            Ua makaukau mau oia i ka hana ana i @a Palapala pili kanawai o kela a me keia ano.

            Ua hiki no hoi iaia ke hoaie dala aku ma ka moraki ana i na aina ma ka ukupanee@haahaa loa.

            E hanaia na hana me ka hikiwawe a me ka uku haahaa.

 

James M. Monsarrat, [Maunakea] Loio o he Kokua ma ke Kanawai.

            Imua o na aha Hookolokolo a pau o keia Aupuni.  E lawelawe ana no hoi ma na hana pili i ka hooponopono waiwai, me ka imi ana i na palapala Sila Aina, ka hana ana i na Palapala Kuai, Hoolimalima a me ka hoaie dala ana.  A he luna hooiaio palapala  Keena hana alanui Kalepa.  Jan. 3, 1880.  944-@y

 

Joseph E. Wiseman, lunahooponopono o na waiwai paa a me Luna Imi Hana, Helu 27 Alanui Kalepa, Honolulu

            Luna Hoolimalima no na Rumi, na Hale, a me Luna Kuai me Hoolimalima o na Waiwai Paa ma na wahi a pau o ka Paemoku.  Luna imi Hana no ka poe a pau i nele i ka hana ole ma na wahi a pau i makemakeia ma kekahi mokupuni o ka Paeaina.

            N. B.--Na Palapala Hoolimalima e hanaia me ka eleu; e ohiia na Bila Aie a me na hana e ae a pau e pili ana i na hana Oihana Kalepa me ke eleu a me ka pololei.  O na Unuhiolelo a me na Maheleolelo ana, e hookoia me ka maikai.  O na kauoha a me na kamailio ana maloko o na leia no kekahi o na hana maluna ae, e hookoia me ka eleu loa.  1076-1y

 

F. S. Pratt & Co.  Luna K@dala, a he Komisina Kalepa.  Beaver Block, Alanui Moiwahine, Honolulu.

            E haa wiia na makaala kupono no na kauoha kuai aina, waiwai paa, a me na waiwai pilikino eae.  E uku koke ia aku na dala i ka poe mea waiwai kudala.  1095 tf.

 

Makemakeia.

            Ua makemake ia ka poe mea Ili Kao Maloo a me na Ili Bibi, a pela hoi me na Ili Miko o na ano a pau, e kuai mai i ko lakou mau Ili me makou, a e haawi no makou i ke Kumukuai Kiekie Loa o ko kakou Makeke.  C. Brewer & Co.  (Burua Ma.)

 

Ka moolelo o Onila Maka!  Ka Makai Kiu Kaulana o Enelani!  A o ka mea Pohihihi o ka 1868.  Mokuna XLII.

            Oia hou ka mea i make--Halawai ka makai kiu a me hale keleneka--Ola hou ka mea i poino--Na kukai ninau ana--Hauoli loa ka makai kiu--Ike ka makai kiu he wiwo ole kona hoa--Ka hoike akaheleia ana o na mea huna--Kahaha o hale keleneka.

            A komo mai la kekahi kanaka opio helehelena ui iloko o ka rumi.

            O ke kanaka opio i komo mai iloko o ka rumi ia wa oia no o Hale Keleneka, e alohi ana hoi ka malamalama iloko o kona mau onohi maka.

            Ia wa, aole e hiki i ka Makai Kiu ke pane aku.

            No ka mea, iloko oia wa, ua kahaha loa kona naau, a iaia hoi e ku ana pela hele loa mai la ua kanaka opio nei a ku iho la imua ona a puana mai la i na mamala olelo wainohia a kona puuwai me ka leo moakaka penei:

            E kuu makamaka malihini, e ae mai ia'u e pahola aku imua ou i ko'u hoomaikai palena ole no kau mau hana aloha maluna o ko'u kino i hoopoino ia mamuli o kou hoomanawanui ana e hoopakele ia'u mai ka poino mainoino i oi aku mamua o ka make.

            No ke aha la oe e hoomaikai mai nei ia'u?  Pehea i maepopo ai io oe ua lawelawe au i kekahi hana e pomaikai ai oe?

            Na ke kauka i hai mai ia'u i na mea a pau; nolaila, e kala mai oe ia'u iloko o ko'u mau manao ohohia ma ka ninau ana aku ia oe i ke kumu o kou lawelawe ana i na mea e pili ana i ko'u pono iho, no ka mea, aohe he mau hoomanao iloko o'u i kahi o ko'u ike ana i kou mau helehelena mamua iho o keia hui ana o kaua?

            Aole anei na kela eha i loohia maluna o kou kino, a i ole hoi i keia wa, ka mea nana i hoopoina i na hoomanao ana no kau mau hana iloko o na la i hala?

            Aole; no ka mea, ua hala aku la na la o ka poino, a ua hoi hou mai ka noonoo kanaka iloko o'u i keia wa e like me ko'u mau la kinohi.  A ke hoomaopopo nei no hoi au i na mea a pau o ko'u mau la i hala ae nei a hiki i kekahi manawa a'u i maopopo ole ai.

            He aa no oe e kamailio no na mea i hala?

            Ae.

            Ke hoomanao nei no oe i na mea e hanaia ana ma kou la i loaa ai i kela eha?

            Ae; ma ia la ua hele aku la au ma ke alanui e hiki aku ai i ka home o kekahi kaikamahine opio a'u i aloha ai no ka mare pu me ia; aka, he mea kamahao nae kona hoohuoi ole ae a me kona lohe ole ae no na poino i loohia iho maluna o'u, ina no paha i mahui iki oia, i na ua hiki pu mai la oia ianei; aka, he oiaio anei o oe kona elele.

            Iloko o keia wa, ua pohihihi loa ka Makai Kiu.

            Aka, ua maopopo no nae iaia kana mea e hana aku ai; oiai, ua ike iho ia, he mea pono e hoike akahele ia na mea a pau e pili ana i keia hana.

            Ma ka hoomaopopo aku ma ko Kale Keleneka mau ano, ua hiki loa ke ike ia aku kona ano ola kupono, aole oia i manao e ninau hou mai a loaa mua aku na hoakaka o kana ninau.

            He oiaio, he elele au na Moriona Adeline, wahi a ka Makai Kiu i pane aku ai.

            Oia no ka'u i hilinai ai me ka manaopaa.  wahi a ke kanaka opio, mai ka la i olino hou mai ai ka malamalama o ka manaolana iloko o'u.  Nolaila, e pane mai oe ia'u.  Ahea la wa wau laweia aku imua o ka'u mea i aloha ai? a i ole Ahea la oia e laweia mai ai imua o'u?  a i ole hoi ia, Eia anei oia malalo o ke kaupaku hale hookahi me a'u? a i ole, Eia anei oia ke kali mai nei o ka holo mai iloko o na puili pumehana hoonipo ana a ko'u mau lima nei?

            Ia wa, ua hoihoi ae la na nanaina o ua kanaka opio nei iaia i puana ae ai i na huaolelo maluna ae.

            Aka, me ke kali ole iho a pane mai ka Makai Kiu i ka haina o kana pau ninau, ua hoomau aku la no oia i ke kamailio ana:

            Mamuli o ko'u loohia ana me ka pilikia, ua lilo au i mea ilihune me ka hilinai aku anei paha i ka hai loaa.  Nolaila, ua kono ia mai au e kali me ka hoomanawanui a hiki i ka wa a na kukuna olinolino o ka malamalama e hoike mai ai ia'u i ka pomaikai, alaila, e kapae no au i keia mau haawe kaumaha pilihua o ka poino a lawelawe no'u iho.

            E oluolu oe e ae mai i ka'u noi, no ka mea, o ka'u mau hana a pau no kou pono wale no ia?

            Ke ae aku nei au i kau noi.

            Mai ninau iki oe no kekahi mea e pili ana no Mariona i k@ia wa: no ka mea aole oia ianei i keia @ a aole no hoi oe e ike koke ana ia @  Aka, e hoike ia aku ana no nae n@ ia oe o kona hiki ole ana mai. @

            Aole anei oe e ae @ @ mai i ka'u ninau?

            He ae no au i @ @ @ ia'u.

            Ua kupaa anei o Mariona mahope o'u, me ka hoolohe o @ ae i na moolelo o kela a me keia an! laha ana no'u@ ma ka la o maua i @ anao ai e mare?

            Aole he ipo e ae i @ aku ke kupaa a me ka hilinai maluna @ kana mea i aloha ai mamua o Mariona Adeline, aka, no kekahi mau mea ohihihi i like me kou ke kumu o kona @iki kino ole ana mai imua ou i keia w@

            Auwe!  E na lani @ ua pilikia ia anei oia?  A i ole, ua pupule ia anei oia mamuli o ko'u hiki kino ole ana aku imua ona?

            Aole, aole: aka, ao e nae oe i hooko mai nei i ka'u noi.  He mau ninau kekahi a'u e ninau aku ana ia oe, a mahope aku, he moolelo: alaila e pane aku no au i na haina a pau o kau mau ninau, e waiho mai ai imua o'u; aka, o keia mau mea a pau loa e pono e mahelehele like ia ko lakou manawa.

            Malia paha e pono au e hooko aku i kau noi; aka, ano, ke kokoke nei ko'u puuwai e naha no ka nui o ke kaumaha o ko'u naau; nolaila, e pane mai ia'u; owai la oe e makee mai nei i ko'u pono a e hana nei hoi no ko'u pomaikai?

            O Onila Maka kou inoa.

            He inoa na'u i lohe ole mamua.

            Pela io no paha.

            A heaha kou kumu o ka hoomanawanui ana mahope o'u?

            He Makai Kiu au, a ua hoouna ia ae au e hele e imi ia oe, he elua la mahope iho o kou nalowale ana.

            Olino mai la ka malamalama ma na onohi maka o Hale Keleneka a puana ae la:

            A! akahi no a maopopo ia'u.  Me he mea la, aia no ke n@ho la o Adeline me ka m@opopo ole ia@ @ loaa iho nei au; no ka mea, mamuli o kou ike ana iho nei i ko'u kulana pilikia, ua kali iki oe i ka hoike ana aku iaia a hiki i ko'u wa e oluolu kupono ai.  Nolaila, ke haawi hou aku nei au i ko'u mahalo ia oe, mamuli o kou hoike ana mai i kou hilinai mahope o'u a me kau mau lawelawe no ko'u ola.

            Ua pane mai ua kanaka opio la i keia mau hauolelo maluna ae me ka hikiwawe, e hoike mai ana i kona manaopaa no kana mea i li'a ai.

            No ia kumu, ua manao iho la ka Makai Kiu he mea kupono ole ka hoouluhua ana aku i kona noonoo iloko oia wa, a no kona pane ole ana aku hoi, ua manao iho la ke kanaka opio, ua like ka manao o kona hoa me kona.

            Ano, e hoike mai ia'u, wahi a Hale, pehea la i loaa ai ia'u keia poino, a heaha hoi na ulia i ili mai maluna o'u ma ka la a'u i manao ai oia kekahi o na la hauoli loa o ko'u ola ana.

            Aole anei he mau hoomanao kekahi iloko ou no na mea i hanaia ma ia la?

            Aole.

            Alaila, ke hoomaopopo nei no paha oe no na mea a pau mamua iho o kou hora i pau ai kou noono kanaka?

            Ae.

            Alaila, e pono oe e hoike mai ia'u, a e hoomanao pu iho hoi oe he hoa'loha pilikino au nou, nolaila, he mea kupono ia'u e lohe i na mea a pau.

            Ma ua la la, oia no ka wa a'u i haalele iho ai no H-- maluna o kekahi kaa ahi, aka, hiki e mai la nae kekahi mea hihia ma ko'u keena, nolaila, ua noho iho la au e kali no ka lua o ke kaa ahi-  Ma ko'u ala e hiki aku ai i kahi hookio o na kaa ahi, ua kaohi hou ia iho la au, nolaila, aole ae i hiki aku mamua ae o ka haalele ana iho o ka lua o ke kaa a'u i manao ai e kau.  O ka hopena oia, ua kono ia mai au e kali no kekahi kaa ahi okoa e holo ana aole i hiki loa aku i H-- a hiki i ka poeleele ana.  He kaa lio hoi kekahi a'u i manao ai e kali mai ana no na kahi hookio o na kaa ahi ma H-- aka, ia'u i hiki aku ai ilaila, aohe kaa e ku ana, nolaila, hooholo iho la au iloko o'u, e hele wawae a hiki i Ulu Paina Iuiu.

            A heaha kou mea i hoolimalima ole ai i kaa?

            No ka mea, ua manao au he mea kupono no'u ka hele wawae ana aku a hiki i ka hale o ka'u wahine hoopalau, a oiai hoi, o kekahi no ia o na ahiahi kaulana iloko o ko'u mau la, nolaila, ua hooholo iho la au e hele wawae, i hiki ai ia'u ke kuka pu me ko'u noonoo no na mea e pili ana i keia ola ana.

            Aole anei oe i haohao iki no ke kali ole ana o ke kaa ia oe.

            He oiaio, ua kahaha no au, aka, aole nae au i kali e noonoo no ia mea.

            Aole anei oe i kamailio iki me kekahi mea iluna o ke kaa ahi, mai kou wa i kau ai a hiki i kou lele ana ma H--?

            Aole; no ka mea, ua lilo loa ko'u noonoo no na hana oia po.

            Aole anei oe i halawai pu me kekahi mea i kamaaina mua ia oe?

            Aole.

            Alaila, hele wawae hookahi aku la oe no Ulu Paina Iuiu mahope iho o ka poeleele ana?

            Ae.

            Heaha na mea i ulia mai maluna ou ma kou alanui?

            Aohe mea i ulia mai maluna o'u.

            Aole loa no la?

            O ka'u i hoole aku nei, aole o'u hoomanao i na mea i ulia mai maluna o'u.

            A heaha na mea au i hoomaopopo ai iloko o ia wa?

            O ka'u mea i hoomanao ai, e hele ana au maloko aku o kekahi ulu laau, ma ke alanui e hiki aku ai i Ulu Paina Iuiu.

            Noho malie iho ia ka Makai Kiu no kekahi manawa.

            No ka mea, e hoonohonoho pono ana oia i ke koena aku o na mea a ke kanaka opio i hiki ole ke hoike mai, mamuli o kona haua ia ana e ka puuwai eleele, a waiho a make aku la oia i ka honua me ka oni hou ole ae.

            Alaila ninau mai la ke kanaka opio:

            He hiki anei ia oe ke hai mai ia'u i na mea i ulia mai maluna o'u iloko oia wa?

            He hiki no.

            E hai mai.

            He manao anei kou he hiki no ia oe ke hoolohe mai me ka hopo ole?

            He hiki loa.

            Ua haua ia oe e kekahi mea.

            A! oia ka paha ke kumu o ko''u pupule ana?

            Ae.

            A ihea wau iloko o na hora mahope mai o kuu hahau ia ana?

            Na ka mea nana oe i hahau e hai mai i ka haina kudono oia ninau au.

            Alaila, ua nalowale paha au no kekahi manawa?

            Ae.

            Aole anei i hoao kekahi mea e imi i ko'u wahi i nalowale ai?

            Ua hoao ia no; no ka mea, ua ukali mau au mahope o kou mau meheu mahope iho o kou la i pepehi ia ai a hiki i keia hora.

            Na Ionakana kane anei oe i hoouna e hele e imi ia'u?

            Aole.

            (Aole i pau.)

 

            Ka moolelo a me na hana a Jas. A. Gafila, ka iwakalua o na Peresidena o Amerika Huipuia.  Ka mea i hookumu i kona kahua: "Ua ahona au e hoino ia mai no ka pono mamua o ko'i hooko ana i ka hewa."

 

            O na koa aupuni e pii hoomau nei iloko o ke awawa, ke hoomau nei no ua Gfila nei i ke alakai ana i kona mau koa.  O ka leo weliweli o na pukuniahi e kani mau nei mai na enemi mai, halakika ae la na poka ma o a maanei, e ku ana na laau loloa a hina aku la ilalo, e paiakuli ia ana na pepeiao no kekahi mau minute pokole, huli ae Ia ua Gafila nei a kahea aku la i na wahi kauna koa lio ona, a haawi aku la oia i ke kauoha, e hoopii koke aku lakou iluna o kahi kiekie o ka puu, i loaa ai hoi he manawa e komo aku ai o na puali koa hele wawae iloko o na ala ololi e pii la iluna o ka puu.

            O ke ala a na koa aupuni e pii nei, oia ke ala oi loa aku o ke ino a me ka make.  O keia mau koa hele wawae malalo o Kenela Gafila, ua hele lakou a pau i ka maluhiluhi, e laa na opeope nunui e kau nei mahope o ko lakou mau kua, o ke anu hoi o ka pili kuahiwi, me he mea la e houhou ana i ko lakou mau aoao, aole keia o ka mea pilikia nui, aka, o ka oi loa aku o ko lakou pilikia, oia hoi ka nele i na lako ai, a i ka manawa hea la e komo ai kahi wai wela hoopumehana i ko lakou mau opu.

            I ka wa i lihi kokoke aku ai o na koa hele wawae iluna o ka puu e noho ia ana e na enemi, hoouna koke aku ia ua Kenela Gafia nei i kona mau koa e lele kaua aku maluna o na enemi e hoouka la i ke haua me na koa kaua lio.  O ka hana e hana ia nei i keia manawa e keia mau koa, he wahi hana ia e hoopumehana iki mai ana ia lakou, e holo ana lakou imua o na enemi, e hou ana me ka lakou mau pu elau, e hehi ana hoi na koa lio ia lakou, a iloko o kekahi mau hora o keia kaua ana me ka pouli nui o ka po, ua ano kuemi hope aku la na koa kipi, a o na pukuniahi a lakou e kau ana ma ko lakou mau wahi, ua lele liilii ae la lakou ma o a maanei, iloko o na minute pokole loa o ka pii ana aku o na koa aupuni.

            He mea e ke kahaha o ke auhee e ana o keia mau koa kipi imua o na koa aupuni.  Ua lawa lakou me ka ikaika o na lako kaua, a ua oi aku hoi ko lakou heluna nui mamua o na koa aupuni, aka, o ke alakai ana a Gafila i keia mau koa, ua lawe mai oia i ke ano maoli o ke kaua hikiwawe, oia hoi ka hiki kino ana aku imua o lakou.  Ua kaua ia iloko o keia po, a aole hoi i emi iho malalo o na @ausani eha na poka i ki ia i ka lewa, a na ka ikaika hoi o ka pauda i hoopouli ae i ke kuahiwi, a me he mea la, ua kau ia keia mau puali kaua e ka ohu o ka hooilo, i ka hele a pouli i ka uwahi, a ma ka wanaao hoi o ke kakahiaka nui, iliki iho ia ka ua me ka ikaika, a o na wahi a pau loa, ua piha wale no i ka wai, a e kahe ana na kahawai nui ua hele a hu ka wai ma o a maanei o kona mau aoao.  O na koa kipi i haalele iho i ko lakou mau kulana kaua, ua ike ia aku la lakou e pinana ana iluna o na kaekae pali, a e uahi ana na koa aupuni ia lakou mahope.

            O ka po i hooili ia ai keia kaua, aole hookahi o keia poe koa i hooluolu no na la elua me na po ekolu.  O ka mea nui ia lakou, ina he mea hiki ka loaa ana mai o kau wahi mea ai mai kekahi mau wahi e mai.  O ko lakou kahua e ku nei i keia wa, aia lakou iloko loa o ke kuahiwi, kahi hiki ole i na hui mahiai ke pii aku maluna o na kualapa me na holoholona.  He muliwai nui e kahe ana, aia nae kekahi waapa e pili ana ma kaekae, a o na mea nona ka waapa, e kali ana laua ma kula, a hiki i ka manawa e ano akakuu iki mai ai o ka ino o ka waikahe, alaila, holo aku ma ka laua huakai holo i kai o na kahakai.  O keia mau kanaka, ua ike laua, ua nele keia mau puali koa me na lako ai, a ina e hala ana keia mau la elua, alaila, aole lakou e ola ana, aka, e pau ana lakou i ka make a ka pololi.

            Nana ae la ua Gafila nei a ike aku la i kona mau koa ua hele a poopoo na maka, ua ano nawaliwali maoli hoi no ka hakahaka maoli mai o loko; hooholo ae ia oia i kona manao, e hele ana oia iuka o keia kahawai e nana wale ai, malia o ike lihi wale aku oia i kekahi puali kaua aupuni e hele mai ana la e kokua ia lakou, alaila, ninau aku ina ua lako lakou me na lako ai.

            Haalele aku ia ua Gafila nei i kona mau koa, a hele auwana aku la oia iloko o na nahelehele, e pii ana iluna o na puu, e iho ana iloko o na oawa, a he mau mile keia hele ana a ia nei, aia hoi ike aku la oia i kekahi waapa e lana malie ana ma kae o ka muliwai; nolaila, iho pololei aku la oia a hiki ana ilaila, ike aku la oia he mau kanaka e noho ana ma kula, a ike mai la no hoi ua mau kanaka nei iaia nei, e hele aku ana me ka lole koa a me ka pahikaua, huli ae la ua Gafila nei a ninau aku la i ua mau kanaka nei, nowai la keia waapa e lana nei?  A hai mai la no hoi ua mau kanaka nei, no laua no ka waapa, a e kali ana laua o ka malie mai o ka waikahe, alaila, holo aku no ka laua huakai i kai o na kauhale.

            O keia hai ana mai la a na kanaka elua, e holo ana laua i kai o na kauhale, pane hou aku la oia ia laua, ina ua ike laua i kahi a na puali kaua o Kenela Buela e ku nei, oia hoi he ewalu paha mile mai keia wahi aku, hai mai ia no hoi ua mau kanaka nei ua ike no laua, ua hiki ae nae na hui mahiai e lawe ana i na lako mea ai no na koa, iloko  aku nei o keia mau la pokole.  Lohe iho ia ua Gafila nei i keia mea, nolaila, huli hou ae la oia a pane aku la i na kanaka, ina he mea hiki ia laua ke lawe koke ia ia nei i kahi o na lako mea ai e waiho la i kai o na kauhale i keia manawa.  O ua mau kanaka la, i ka lohe ana i keia mea, huli ae la kekahi i kekahi me he mea la e ano henehene mai ana laua ia Gafila, no ka hoonana o keia kanaka i keia ino nui o ke kahawai, no ka mea, e iho mai ana na kumu laau nui a me na lala laau, a ua paa ka muliwai i ka hihipea ia e keia mau mea, a o keia kanaka hoi e makemake nei ia laua e holo koke i keia manawa, huli mai la ua mau kanaka nei a hoole mai la aole laua e ae e holo i keia manawa, mamuli nahaha ko laua waapa i keia ino nui o ka wai e kahe nei.

            No ka hoole ia ana o ko Gafila manao e na kanaka nona ka waapa, pane koke mai la oia ia laua i ka i ana mai:

            "O kekahi waapa e loaa ana ia'u, na@a e kii kela mau lako ai," wahi ana, "no ka mea, aole au i makemake e make ko'u mau koa no ka pololi, aole hoi no ke kaua.  Ua makemake au ia olua e holo me a'u i keia manawa, a i ole, e @ele olua i ka waapa ole, a e lilo keia no ke aupuni."

            O keia mau olelo a Gafila i na wahi kanaka, hooholo ae ia laua me ke ano makau, e holo io laua o nele i ka waapa ole.  O kekahi mea minamina nui loa a ua mau wahi kanaka nei, ua maopopo no ia laua, e nahaha ana kahi waapa, e laa keia mau pauku laau nui e iho mai nei, aole he mea e hiki ai ke pakele ae.  Aole paha laua i ike mua ia Gafila, o kana hana mua ia he holo ma na muliwai nui e lawe ai i ka wahie, a aole nae i loaa kekahi poino ma kana alakai ana.

(Aole i pau.)

 

Na mea hou o hana.

            Ma ka po o ka la 17 o keia malama, hora 10 a oi, ua pepehi iho la kekahi nika hou o A. Unna i kekahi nika kahiko, a ua make loa, a ua mahuka aku la ua nika nei me kana wahine, a me 3 nika kane; a i ka huli ia ana aku o lakou, ua loaa aku 3 nika e hoi mai ana, a koe aku ka nika nana i pepehi me ka wahine, aole i loaa.

            A mahope iho o ka pau ana o ka Aha Koronelo mahope o ka paina awakea, ua huli hou ia aku ua mau, nika nei a ua loaa aku laua i ke kuahiwi, nona ka loihi he 3 mile a oi; i ka manawa i loaa aku ai, ua paa ko laua wahi hale lau maia.

            Ia manawa, ike aku la o Heanu e moe ana laua, hai aku la o Heanu ia Nahuina a ike like aku la lakou a pau ehiku; ia manawa, holo aku la o Keawe e kiola i ko laua wahi hale, me ka manao e hopu i ka nika, aka, ike aku ia nae oia e noho ana laua iluna me ke koi e paa ana ma ka lima o ke kane, a holo hou aku@ ia oia ma kahi e ku ana o kona poe hoa.  Ia manawa, oili mai ia ua nika nei a hoana mai la i kana koi, ia manawa i kau pololei aku ai o Heanu i kana pu panapana i ua nika nei, a olelo aku ia ua nika nei aole ona makau i ka pu a me Heanu, hoonou mai la ka nika i ka laau a me ka @, a mahope alualu aku la ia Heanu a me Kahinu; ia manawa hookuu aku la o Heanu i ke kahi o kana pu, a hina iho ia ka nika ilalo ke a@o, a holo aku ia o Kahinu me ka manao e hopu, ia manawa ala hou ae ia no ua nika nei a alualu mai ia @ oki i ke koi, a moku iho la mai ke kuka hinuhinu, palaka ahina, a me ka palemai, a moku pu iho la me kona kua; ia manawa pa koke mai la no ua nika nei ia Nahuina i ka pauku laau a hina iho la ilalo, a holo mai la ka wahine e puliki i kana kane, a ua paa pu iho la laua a elua.

            Ua hoihoi ia mai la ia ahiahi a poeleele komo i ka hale paahao ma Punahoa; ua piha ku'i i na kanaka, aole emi lalao o elua haneri kanaka, me ka manao ole i ka ua.

            Aka, ua make loa aku ka nika i pepehiia, ua lele kekahi mau manamana wawae, a me kekahi mau manamana lima, a he lehulehu wale aku na moku me ka manaonao.  Hookahi nika i ola mahunehune, ua moku pahia ma kekahi lima.

            M@ na keiki hoonoho hua me@ala ko'u welina.  He mau wahi mea hou ia o kuaaina.  D. U. Kikaha.

 

Lalau Pohihihi.

            Nohea keia ulu haumana hikiwawe?  Nawai e hoomaopopo mai?  E nana kakou i ka moolelo o ka halawai makahiki o ka Ahahui Kula Sabati Nui.  Iune, 1882.

            Kula Sabati o Kawaiahao, Honolulu, Oahu.

            Na pokii kane              247

            Na pokii wahine          904

            Na keiki kane              0

            Na kaikamahine          139

            Makuakane                 301

            Makuahine                  441

                        Huina              2,032

            Ma ka papa hoike helu nae 2,532.  Nohea la keia heluna nui?  Mahea la kahi akea i kula'i?  Nana hou.

            Kula Sabati o Hauula Oahu.

            Na pokii kane              960

            Na pokii wahine         780

            Na keikikane               1,664

            Na kaikamahine          1,248

            Makuakane                 1,040

            Makuahine                  840

                        Huina              6,532

            Nohea ia heluna lua ole?  Mahea kahi akea i kula ai?

            Ma kekahi mau kula, he heluna kupono no; ma kekahi mau kula, he heluna hehena, no ia mau heluna hehena, ua loaa ka huina o na haumana Kula Sabati o keia Pae Aina he 39,566.

            Auhea na maka o ka poe i pai i keia mau heluna, me na maka o ka poe hopololei i ke pai ana?  Ka lua keia o ka hoike lalau loa a'u i ike ai no na haumana Kula Sabati Hawaii.  E lilo ana keia Buke Moolelo i hoike hoopunipuni.

            Ua akaka ia'u ka nui o na Kula Sabati mai Hawaii a Niihau, ua 76 ma ka makahiki i hala; ma ka avarika ana, aole paha i oi aku na haumana i ke 30 ma ke kula hookahi.  Ina ua pa 30 ua like me 2,280.  Malia paha ua hiki aku i ke 3,000, aole paha.

            Ma Iune 1883, ke noi aku nei au i ka Ahahui Kula Sabati Nui e hoike pololei i ka nui o na haumana o kela a o keia Kula Sabati.  E nana i na palapala hoike o kela kahu o keia kahu, ina ua hewa ma ka nana aku, e hoopololei ia.  Heaha ka waiwai o keia hoike lalau loa?  Ina akaka ole ka heluna oiaio, e waiho no aole make paiia.  H. H. K. S.

 

Pane ia S. P. Keaniani.

            E ka Nupepa Kuokoa e: Aloha oe: Ua ike au i ka pane a S. P. Keaniani, ma ka helu 3 o ka Elele Poakolu o ka la 17 Ianuari 1883, e pili ana ia u a me J. N. Uahinui.

            Auhea oe e S. P. Keaniani huna i ka inoa oiaio, ihea la hoi ko pepeiao i pane ia aku nei ma ka helu 69 o ka Elele Poakolu o kela makahiki aku nei, e hoike ae ia kaua imua o ke akea e like me kau hoolaha.

            Eia hou keia pane: E hoomakaukau oi i na hoike i lohe a i ike maka i kuu anehe ana e hopu i ka pahu rama o ka pake ma ke awa o Pukoo, ia Lehua i ku mai ai, e ole ai ka lunakanawai, ina ua paa o Lehua; e akoakoa ae oukou ma ka hale Hookolokolo o Pukoo ma ka hora 10 o ke kakahiaka o ka la 20 o Feberuari, o keia makahiki.  Ma ia la e akaka ai ka oiaio o kau mea e hoolaha nei, a me ka ole; ina aole oe e ae mai ana i keia, alaila, e hoopau ana au i ko'u pane hou ana aku ia oe; no ka mea, ua akaka kou hoopunipuni a me kou wahahee i ka lehulehu.  Oia ka ka buke nui i hoakaka ai, "Hohe wale ka mea hewa i ka mea pono."

            Aka hoi, ina e hiki io mai ana oe ia la, alaila, e papa lealea auanei kaua.

            Ke hooki nei au maanei; a ke haawi nei au i ko'u mahalo ina keiki ulele hua matala a me ka Lunahooponopono pu.  E. Lililehua.  Kaluaaha, Ian. 25, 1883.

            (Ke manao nei makou, ua lawa ka oukou kamailio ana ma na kolamu o keia pepa, malalo o keia kumuhana, Me ke aloha no.  L. H.)