Ka Nupepa Kuokoa, Volume XXI, Number 48, 2 December 1882 — Page 2
| This text was transcribed by: | Francene H Aarona |
| This work is dedicated to: | To give thanks for this opportunity to kokua. |
Ka Nupepa Kuokoa
KE KILOHANA POOKELA NO KA LAHUI HAWAII.
KA NUPEPA
KUOKOA ME KE AU OKOA.
( 1 Huiia. )
No ka Makahiki...........$2 00
Eono Mahina............... 1 00
Dala Kuike ka Rula.
POAONO, DEKEMABA 2, 1882.
Paiia e Thos. G. Thrum. ma ka halepai o ka nupepa Saturday " Press. "
KA LA 28 O NOVEMABA.
O ka Poalua o keia pule iho ei, oia no ka la i piha ai na makahiki he 39 o ka noho kuokoa ana o Hawaii nei, i haawiia mai e na mana aupuni nui o Beritania a me Farani, a nolaila ua hoomanaoia ka hanohano o ia la e na Hawaii Ponoi ma ke kulanakauhale nei ma na paina liilii a me kekahi mau lealea e ae, oiai he la kulaia aupuni ia.
Ma ka hora 10 a oi, ua malamaia he anaina haipule ma ka luakini o Kaumakapili malalo o na hoolala ana a na Ahahui Opiopio o keia kulanakauhale, a ua konoia aku e lakou kekahi mau makamaka hanohano e haawi i mau haiolelo e pili ana no ia la.
Ma ka hora 12 o ke awakea, ua ki ia na pu aloha he 21 mai ka batari pukuniahi keleawe ma Kuloloia.
Ma ka hora 2 a oi, ua puka ae na puali koa hui o keia kulanakauhale a hookahakaha hele ma na huina alanui e kipa ana ma kela a me keia hale o na poo aupuni o na aina e.
Ua malamaia no hoi ka ahaaina nui no ke kokua ana i ka halekula Sana Lui, a ua nui no ka poe i akoakoa ae malaila.
O na hiohiona holookoa o ka la, ua maluhia a maikai, a aole no i ike nui ia ka poe ona ma na alanui.
MAHALO.
---
Ma kekahi wahi kaawale o keia kulanakauhale ke ku nei kekahi hale hoolimalima ; aia iloko o ia hale he ohana haole ka poe e noho nei i keia wa ma ke ano hoolimalima. Aia e pili ana meia hale he mau pahale Hawaii maoli elua, ma ka aoao mauka kekahi, a ma ka aoao makai kekahi. He poe Hawaii wale no iloko o ia mau pa a elua, a aia ka ohana haole iwaena o lakou, elike me ka io puaa hame i hookomoia mawaena o na apana palaoa elua. Eia ka mea hilu : Ma kekahi la halawai mai la ke poo kane o ua ohana haole nei me kekahi hoa ʻ loha a ninau mai la penei : " ea, ua ike anei oe i ke ano o keia poe e noho pili nei ma ko ʻ u hale, mauka a makai?" Pane aku la keia, "ae, ua ike no au, he poe ano like ole no lakou, a pehea hoi kau ike, ka mea e noho mau nei iwaenakonu o lakou ?" Pane mai la ka haole, "he oiaio maoli kau e olelo mai nei he poe like ole lakou ; aia ma kekahi aoao o ʻ u e kani mau ana na leo walaau nui, he hakaka a he ona pinepine, pilikia au a me ko ʻ u ohana i keia poe ; aka, ma ka pa e pili ana ma kahi aoao ae o kuu hale he mea e ka maluhia, aohe ona, aohe hakaka , aohe leo nui e uwa ana i ka po, he maemae ka pa, he nui na keiki liilii, aole nae haunaele ; a kohu lahui okoa loa no ko neia mau pa hale a elua. " Pane hou aku la kona makamaka. "o kela mau ano a elua au e ike la, oia no ko ka lahui Hawaii holookoa, mai Hawaii a hiki i Kauai ; he elua mahele iloko o ka lahui Hawaii, a pela no iloko o na lahui haole a pau, he mahele maikai a he mahele ino, he mahele naauao a he mahele naaupo. "
Mahalo ke KUOKOA i ka ike ono ana o kela makamaka haole i keia mau mahele elua iwaena o kakou, aole hoi hoohuikau i ka lahui holookoa i poe lapuwale wale no, mamuli o ka lapuwale o kekahi hapa. A he mahalo piha ko keia pepa i na wa a pau no kona poe heluhelu e hooikaika mau ana e hoopaa ia lakou iho iloko o ka mahele o ko Hawaii poe maikai, e noho ana ma ke ano malamalama, a e lawelawe ana ma na hana naauao. Mahalo ke KUOKOA i na home Hawaii maemae, na home maluhia, na home aloha, na home kuikahi o ke kane ka wahine a me na keiki. Hoomanawanui e na pokii, imua aku, mai nana i hope. He lani ko luna, he honua ko lalo, naue aku ma ke ala o ka malamalama.
---
PILIKIA MA NOREWAI.
---
Ua ulu ae kekahi ulia poino maloko o ke Aupuni o Norewai, mamuli o ke kuee i hoalaia mawaena o ka Moi o ia aina a me na makaainana. He Aupuni Kuukauawai o Norewai. O Oscar II., ko laila Moi i keia wa, a i ka wa i noho ai oia maluna o ka noho alii, a ma ia hope mai a hiki i keia wa, i hoomauia ka paonioni mawaena o ka Moi a me ka hapa nui o na makaainana mamuli o ko ka Moi manao alunu a me kona keakea ana i na pono i haawi ia i na makaainana malalo o ke Kumukanawai. O na bila kanawai maikai i hooholoia e ka Ahaolelo no ka pono o ka lehulehu, ua pau loa i ka hooleia e ka Moi na bila i kupono ole i kona makemake ponoi, a ua keehi maoli no oia i kekahi pauku o ke Kumukanawai e kaupale ana i kona mana ma na hana aupuni. No keia mau kumu ua lilo na hana o ka Ahaolelo i mea waiwai ole, a ua poho wale na hana a me ka manawa o ka poe i kohoia e na makaainana.
Aka, iloko o keia mau pule iho nei, i ke koho balota hou ana o na makaainana, ua haule ino loa ka aoao o ke Aupuni. Ua paa loa ka manao o na makaainana mamuli o ko lakou mau pono kivila, a e hana io ana lakou mamuli o ko lakou kuleana maluna o ke Kumukanawai. He poe hopo ole lakou, a e paa ana lakou a paa i ko lakou mau pono. Maloko o kekahi haiolelo alii a ka Moi. ua hoopukaia na olelo hooweliweli i ka Hale Ahaolelo. Aole nae emi hope na alakai o na makaainana. E hana aku ana lakou a ko, a e haule ana paha ka Moi mai luna aku o kona nohoalii. Na ke au o ka manawa e hoike mai.
KE MELE A KA ELELE POAKOLU.
---
Ua puka iho nei he mau wahi lalani mele ma ke kolamu manao pepa o ko kakou hoa o ka Poakolu i hala ae nei, e pili ana no ka la kuokoa ; aka, ke hawanawana mai nei o Ukali ua poina ia Elele ke chorus o ua mau wahi lalani nei, a ke manao nei oia he mea pono ke hoapukaia aku a pau, oia keia :
" E ola ka Moi Kalakaua,
Ma o ka Mana Lani kiekie ;
Ka Hae nani ou e Hawaii,
E mau kona welo ana.
Cho.--- Inu rama e, inu ona
A me aie miliona "
" Maluna o Kou Aupuni,
A me Kou Lahui onipaa,
Ua mau ke Ea o Kou aina
I ka Pono, ka Maluhia a me ke Aloha.
Cho.---Inu rama e, inu ona,
A me aie miliona."
Ke manao nei ke KUOKOA aohe kohu ka pai ana a ka Elele e pai mau nei i ka Pono, a i ka mau o ke Ea o ka Aina i ka Pono, a i ka mau o ke Ea o ka Aina i ka Pono, a i ka Mana Lani Kiekie, a pela wale aku ; no ka mea, he hookamani wale no keia mau olelo. Na keia Elele e pai mau nei me na" olelo hemolele"---nana i kokua me kona ikaika a pau e hookuu akea na waiona maluna o ka aina, a e hookomo pu no hoi i ke aupuni iloko o ka aie pono ole. Na keia Elele a me kona haku, ka mea nana e hookele nei ko kakou aupuni i kahi o ka poino. A iloko o ka waiona a me ka aie pono ole e poino ai kahi koena ea o ka aina, aole no ikaika loa ke ea i keia wa. E lapu mai ana na uhane o ka poe make i keia poe hookamani launa ole. Pai i ke ea o ka aina, a me ka Pono, a me ka Mana Lani ma ka lima hema, a pai hoi i ka wiona a me ka aie hewhewa ma ka lima akau ! Pehea e hiki ai ? Pehea e kuikahi ai ke ea o ka aina me ka aie nui a me na hana uhauha wale i ke dala ? Pehea e kuikahi ai ka Mana Lani me na hookahe lapuwale ana o ka wiona ?
Noho malie na leo hookamani o ka Elele Poakolu.
---
KA PONI MOI.
( Kakau ia no ke Kuokoa. )
He mau manao ko makou e hoikeike hou aku ai no na hua e hoohua ia mai ana no keia hana; oia mau hopena e ili mai ana ia iluna o ka lehulehu, a no ko makou ano makee i ko ka lahui mau pono, nolaila, aole e hiki ia makou ke uumi iho i ko makou wahi ike uuku i ka hoike ana aku i ko makou mau tausani heluhelu e ike mai ana i keia. A o ka poe hoi aia wale no ko lakou ake ma ke ano paikano aku, ma na makemake o na alakai o keia hana, a e lumai ana i ka lehulehu malalo ona hana a lakou i makemake ai, a mai hookomo iho lakou i mau alunu manao ana e like me na noonoo kaha wale o ka Elele Poakolu. Ke ike e nei no makou, e kono ia ana ko kakou aupuni e komo iloko o kekahi o na hana hoonui lilo, a penei ia kakou e nana mai ai.
Ina e kono ia mai ana ka Moi malalo o keia kumu alakai, e kahea ia i Ahaolelo Kuikawa mamua iki o ka la 12 o Feb. 1883, a e komo pu ana ia mau la, e hiki ana i ka $20,000 no na lilo wale no o ka hale ; a e like me ka makou e noonoo nei e komo mai ana iloko oia mau halawai ana he mau noi dala mahuahua hou ana mai e pili ana no ia hana, a he huina nui ia e oi ana, ea emi mai ana i ka $500,000, a ke hui pu me na hoolilo i ikeia, ai ike ole ia aku, alaila, e hiki aku ana ka huina nui o na hoolilo he $550,000 a oi a emi mai.
He hana ku anei keia i ka hooponopono aupuni ku i ka mahaloia ? Aole.
He hana uhauha wale no ia me ka hoomaunauna wale, a he hana e poino ai ka aina a me ka lahui.
A ke makaikai hou aku ko makou noonoo, loaa hou aku la no ia makou keia, he hana hookelakela a hoi hoohanohano wale ana aku no i ka nohoʻna Moi i keia wa. He hana no nae keia i ao ia ai ka Moi e kekahi Kuhina, a mau Kuhina paha, a i kokua pu ia e na manao ake lealea o ka poe opiopio o ka poe Ahaolelo o 1880, 1882. Aole makou ma ka ipuka o ka hale, a o ka nani paha a lakou e ohumuhumu nui ana, a malia he oiaio no keia mau olelo aku.
" Aia poni ia ka Moi, alaila, oi ae oe maluna o na Moi a pau o Hawaii. "
" A kau ia aku ke Kalaunu i hanaia me ke gula, ai hoonaniia me na pohaku makamae, alaila, ua nani loa kou noho ana---Ua kapukapu oe." " A o oe ka Moi i oi aku o ke kiekie o Hawaii nei; a o oe no ka oi aku o na Moi o na moana." A me na olelo ao o neia ano, ua komo aku la keia iloko o na a ua hookoia e like me na mea e hana ia nei.
Haule anei malalo iho o keia na hoomanao nui ia ana no Kauikeaouli ka Lokomaikai Emi iho anei ka naauao kiekie hooponopono aupuni o Kamehameha IV ? Nalowale anei ka manaopaa o Kamehameha V i weli ia ? Poina anei ke aloha ia o Lunalilo ? Aoleaole loa lakou nei e hemo ana maika puuwai aku o ko Hawaii poe aloha alii.
E hiki anei ke holoi ia na hana lima ikaika a ke koa o Kamehameha II ana i hookui ai i keia Pae moku ? O na kinai ana a Kamehameha II i ke kapu o kakou a me kona ae ana i ke ao palapala, e nele ana anei ia i ka hoomanao ia ?
Aole, aole loa lakou nei e homo ana mai ka puuwai aku o ko Hawaii poe aloha alii.
E hiki anei ke holoi ia na hana lima ikaika a ke koa o Kamehameha I ana i hookui ai i keia Pae moku ? O na kinai ana a Kamehameha II i ke kapu o kakou a me kona ae ana i ke ao palapala, e nele anaanei ia i ka hoomanao ia?
Aole, aole loa e nalo-Ua ulu, ua hihi a upa paa loa ko lakou hoomanaoia ana.
He oi aku ka hanohano ke kiekie a me ke kapukapu o ko lakou kulana, a ua ike ka poe Hawaii i ka oiaio o keia mea, aole nae lakou i poni ia-aole hoi he Kalaunu i hookau ia aku ; aka, he Kapu, he Ihiihi, he Hoano a me ka Makaʻuia ko lakou i hoomanaia mai ka po mai.
He minamina makou i ka hoike ana aku, o kela Hale Alii hou, ai manaoia o kona nanai a me kona ihikapu, e hoau pu ia ana ko laua eehia me ka eehia pu o ko ka Moi poni ia ana, aka, ua lilo nae i mea hehi ku ia e kekahi kanaka ona, a poino iho ia kekahi mau mea i hoomomoa ia no ka wa e poni aku ai, a he mau mea hoi ia i wae ia mailoko mai o ke ano Europa, a pehea la ia ? momoa e no hoi ka hale.
O kekahi mau koa hoi, pii ae la lakou a kekahi o na aleo kiekie, ua hoonaniia ia wahi me na wai hinuhinu, a me ka maloo ole, ua lalama aku la lakou a ilaila lakou kahi i peahi aku ai i na wahine e hele ae ana ma ke alanui. Auwe no hoi e---Ka mananalo koke no ka hoi keia o ke kapu o ka Hale Alii, aole ka hoi i poni ia ka Moi, aole hoi i mo ka piko o ka hale, o ke komo ia no nei e ka poe ona e haunaku ai me ka hookano. A malia no paha auanei pela aku no paha ua poe la e hana aku ai i ka Moi, alaila he mea ano ole ka poni ana ; aka, haule iho la nae iluna o ko kakou mau hokua he haawe o ke kaumaha.
Ke komo hou aku nei no ko makou mau noonoo ana no keia mea, a oia ka makou e makaʻu nui nei.
E hapai ia auanei kekahi hana hou aku, a oia io paha kekahi o na noonoo ana i ake nni ia a e hana ia mai ana no ka lahui. Malia o hookomoia a onou ia aku paha i ka Moi i mana e lawe ai iaia wale no ka hooponopono aupuni.
E ka poe i ka noho ana, he aupuni kumukanawai; a e lilo o ka Moi ka mana a pau no ke aupuni, a o ka olelo e puka mai ana mai kona waha mai, oia ke kanawai, he mana ia. Aia ilaila kakou e ike ai he ino.
A o keia noonoo nui ana a makou e hoike aku nei, oia ka makou e hoomalamalama aku nei i ka poe. Hawaii ponoi, a me ko Hawaii poe makamaka ponoi, i ole ai kakou e noho naaupo wale no.
O ka hanaia ana o ke ano e like me keia, he auhulihia maoli ana ia e hiki ole ai ke hoomanawanui ia keia mau hana pono ole e hookumu ia nei, ina o ka hana ia e hana hope ia aku ai no keia hana. Oia ka lawe wale ia o ka pono o ka lahui, ka wawahi ana i ke kahua o ke aupuni, oia ke kumukanwai, oia ko ka Moi kue ana i kana hoohiki; a ina e ulu mai ana ka hopena e like me keia, he mau hana ia e holo aku ai ke kulana ao malamalama mai o Hawaii aku.
---
NUHOU O NA AINA E.
---
Mai ka makahiki 1879 a komo wale mai iloko o keia makahiki, he 90 poe i ahewaia e make ma ka amana ma Farani. Mailoko mai o keia huina he 10 wale no i make ma ka amana, a o ke koena he 80 ua hoopaahaoia a pau ke ola.
He 58 mau nai fiva lenalena hou i loaa ma ke kulanakauhale o Pensacola Alabama i keia mau la mai nei me keia huina, ua hui he 3 kauka i loohia i keia mai fiva lenalena oiai lakou e lapaau ana i ka poe i loaa mua i ua mai la.
Ua makana aku ka Moiwahine Victoria i ka Duke o Westminister he lio holo kiau mama loa, a o kekahi ia o na lio kumukuai pii loa ma Enelani a puni.
He makana keia i ka Duke oiai oia i mare ai i ka wahine.
Ua hoikeia ae he lono, o ka huina nui o na hale keaka i wela i ke ahi ma Kapalakiko iloko o na makahiki 3 i hala ae nei, he 252.
Mailoko mai o ka pau ana o keia mau hale i ke ahi, ua poino he 4,370 ola oia hoi pau i ka make, a he 3,000 a oi i poino ma o na palapu like ole.
Ua kauoha ae o Bisimaka i na makai e hopu aku i kekahi kanaka pepehi bipi no kona hana ana i ka naaukake a kapa aku la i ua naaukake la ma ka inoa o "Bisimaka."
Ua ike kakou a pau loa i ka nui o na kanawai oloko o ka baibala a ke akua i haawi mai ai ia Mose maluna o ka papa pohaku ma ka mauna o Sinai. Ma kekahi baibala i pai kokeia mai nei ma Nu Ioka a ua hoolahaia ma o a maanei ua ikeia he 35 kanawai. Ua oleloia he opulepule ka mea nana i hoolala keia baibala.
Ua pau mai nei i ke ahi kekahi hale hana keaka nui o ke kulanakauhale o Nui Ioka i ka la 30 o Okatoba. I ke ao keia pau ana i ke ahi. Ina i ka po keia pau ana i na la he mau tausani ola i make. Ma keia au ana he mau ola uuku loa ka i pau i ke ahi. Ua pau loa keia hale i ke ahi iloko o ka wa pokole loa.
Penei kekahi moolelo kupanaha o Sir. Garnet Wulese ka alihikaua o na puali koa Beritania nana i alakai ma ke kaua kipikipi o Aigupita, oiai oia i kona mau la opiopio.
I kekahi la, oiai e hele holoholo ana iloko o kekahi ululaau e kokoke ana i kona home, ike aku la oia i kekahi kumu laau a he hua apala ke kau ana iluna o ua kumu laau la. Kupu ae la ka manao ilo ona e pii iluna o ke kumu laau no ua wahi apala la. Pii aku la oia a kokoke e loaa ka lala kahi i kau ai ua wahi hua pala la, a i kona anehe ana aku e kokoo i kona lima e lalau aku a paa i ua hua apala la, haki e iho la ua lala la ana e kau ana a haule iho la oia ilalo o ka honua a haki iho la kona lima, a o ka lima no hoi ia ana i anehe aku ai e lalau i ua hua apala la.
Poino loa iho la oia. Huli ae la oia iluna a nana aku la i ua wahi hua apala la, e kau mai ana no oia me kona mau hiohiona nani. Kupu ino iho la na manao kuko iloko ona no ua wahi hua apala la; nolaila pale ae la oia i na koni ehaehaʻana o kona lima haki a hoomaka hou aku la oia e pinana hou iluna.
I keia wa aole oia i pinana aku me kona mau lima elua, aka, me kona lima hookahi a me kona mau niho oia i pii aku ai a hiki i kona hiki ana iluna o ua kumu laau la a loaa ua wahi hua apala la. Ma keia pii hope ana, aole oia i awiwi loa me ka pupuahulu, aka, ua pinana oia me ke akahele loa a hiki i ka wa i loaa ai ua wahi hua apala la.
He wahi moolelo hoohalike keia me kana mau hana pili kaua i ikeia i keia mau la iho nei. Ma kana mau hookele a hoolala kaua ua ikeia ua ano pupuahulu kana alakai ana i kona puali koa ma ke kahua kaua, a o ka hopenao ia mau alakai pupuahulu ana, he hookuemi hope ia kona mau puali kaua me ka poino nui.
E ikeia no na hoailona hiki mua o keia mau hoaiai maluna, mamuli o kana mau alakai ana i kona puali koa kaua ma ke kahua kaua o Aigupita.
I ka hoomaka ana o ke kaua i kinohi loa, ua komo a manao kuko iloko ona e hoolele kaua aku i kona puali holookoa maluna o ko Arabi puali koa, aka, iaia i hoao ai e hooko aku ia manao oloko ona, ua hoohalawai ia kona puali me ka poino nui me ka hoemi ia i hope.
Alaila, ma keia hana ke ike nei kakou ua hookoia na wehwehe mua o keia wahi moolelo. a e nee aku kakou i ka lua o na wehewehe ana.
Mahope iho o keia poino nui o kona puali koa ua hoololi hou ae oia i ke kulana kana puali koa a me ke kulana o kona mau hoolala ana a ua akahele no hoi oia, a mamuli o ia hoololi hou ana ona, ua loaa iaia ka lanakila nui a me ka hanohano maluna o ko Arabi puali koa, a o ka hopena ua hoi aku oia i Enelani me ka lanakila a me ka hanohano hui.
Me keia mau hoaiai maluna e ike no kakou, he pupuahulu na manao mua o keia kanaka a o na manao hope aku, he akahele.
O ka nui o na loio ma ke kulanakauhale o Bosetona, he 1,500 a o keia poe a pau loa he poe lae oo wale no ma keia mea o ka ike kanawai.
I ka wa i aahu ai keʻlii Catewaio o ka lahui Zulu i ka paikini hou o na lole o keia wa, a o ia paikini ka kakou e paikano nei i keia wa, ua hoikeia he keu aku a ke ano e o kona mau nanaina, ua like oia me kekahi kii i hoaahu ia me na lole, a o ka mea e nana aku ana iaia , aole oia e nele i ka hehe o ka aka.
O Kapena Uweba, kekahi o na haole kaulana o Enelani ma ka au me ka luu a me ka aho loa, ua luu mai nei iloko o kekahi luawai ma Bosetona ma ke ano hoao o kona aho loa, a ua ikeia he hookahi haneri hora o kona noho ana iloko o ua luawai la, oiai he 85 degere ke anu o ka wai ia wa. Ea, pehea la keia ? He aho loa maopopo io no paha.
-----
NA NU HOU O HILO.
---
E KA NUPEPA KUOKOA; Aloha oe:---
Ke haule mau nei na pakaua o Hilo iloko o keia mau la. "Eleele Hilo e, panopano i ka ua la." Nana aku ia i na alanui o Hilo nei, weliweli ka ukelekele.
O na Ahahui Opiopio oonei, ke mau nei no na hana imua, ua ala like iwaena o ke kaona nei.
Ma Hilo pali-ku aku nei, he oi aku ka inoino o na alanui, koe wale iho no na wahi i hoohana ia e ka Luna Alanui oia ke kahawai o Honomu. O na wahi o uka ae, ke iho nei ka ihu o ka palau, ke paapu mai la ka aina i ka uliuli i ka lau o ke ko. He mau makahiki i aui hope ae nei, aole o ia mau ano ma ia wahi, he ulu nahele wale no, he inoino maoli, aka i keia makahiki iho nei, ka nani ma ua wahi nei.
Ma ka lono mai, ua lilo ae nei i ka Hon. J. Nawahi kekahi apana aina nui ma o aku o Peleau, he 100 a oi eka ka nui, no $300 wale no. Maikai maoli ua wahi nei. KAMAHELE.
ANA AINA ! ANA AINA !!
---
Frank Pahia a me Samuel M. Kaaukai.
---
KEENA HANA---Aia ma Alanui Moi, kokoke loa i ka Uwapo o Hooliliamanu. 1096 tf
Ma ke Kauoha.
KUAI KUDALA O NA LAIKINI KUAI AWA.
E kuai kudalaia aku ana ma ka POALIMA, DEKEMABA 1, 1882, na Laikini Kuai Awa malo iho nei no Hookahi Makahiki, mai Ianuari 1, 1883.
OAHU.
Honolulu...............3
Ewa me Waianae...1
Waialua.................1
Koolaupoko..........1
MAUI.
Lahaina.................2
Wailuku................2
Makawao..............1
Hana.....................1
Molokai me Lanai.1
HAWAII.
Hilo.......................1
Kona Akau............1
Kona Hema...........1
Kohala Hema........1
Hamakua...............1
Puna......................1
KAUAI.
Lihue.....................1
Koloa....................1
Hanalei.................1
E kudalaia aku ana na laikini no Oahu ma ke alo o Aliiolani Hale, ma ka la i hoikeia maluna, i ka hora 12 awakea.
O na laikini nona mokupuni e ae e kuai ia no maloko o ko lakou mau apana iho, ma na wahi a na Makai Nui a o ko lakou mau Hope paha e kauoha ai.
O ke Kumukuai e hoomaka aku ai ke koho ana---no Honolulu he $500 no kela me keia laikini; a no Hilo, Lahaina a me Wailuku, $300 no ka laikini hookahi ; a no na apana e ae aku a pau $100 pakahi.
HOAKAKA.---E hookaa ua ia i 25 pa keneta i ka manawa e haule ai ka hamare, a e lilo loa ia uku mua ke hookaa pau ole ia ka huina pau o ke kumukuai o ka laikini iloko o na la he 10 mai ka la aku o ke kudala ana. JNO. E. BUSH
Kuhina Kalaiaina.
Keena Kalaiaina, Nov. 13, 1882. 1095 2t
HOOLAHA KULA AUPUNI.
E hoomaha ana na Kula Aupuni a pau, mai o a o, mai ka Poalima la 12 o keia malama o Dekemaba e hele nei, a hiki i ka Poakahi, la 8 o Ianuari, 1883, a ma ia la e hoomaka hou ai ke kula ana. W. JAS. KAMIKA, K. P. H.
Keena Hoonaauao, Dekemaba 1, 1882. 1096 3t
Ua hookohuia aku o Mr. W. F. Mossman e ka Papa Hoonaauao, i Luna Kula no ka Apana o Makawao, Mokupuni o Maui, ma kahi o Mr. H. P. Baldwain i waiho mai. W. JAS. SMITH, Kakauolelo.
Keena Hoonaauao, Nov. 21, 1882. 1096 3t
I kulike ai me ka mana i hookauia maluna oʻu, ua kauoha aku au e hanaia i Pa Aupuni no na holoholona hele hewa ma Paalaa-uka, ma ka Apana o Waialua, Oahu. JNO. E. BUSH Kuhina Kalaiaina.
Keena Kalaiaina, Nov. 18, 1882. 1095 3t
KUAI AINA AUPUNI
Ma ka POAKOLU, LA 27 o DEKEMABA, 1882, ma ke alo o Aliiolani Hale, ma ka hora 12 o ke awakea, e kuai kudalaia aku ana kela mau apana aina Aupuni i ikeia ma ka inoa o LELEPAUA a me KAIHIKAPU, e waiho la ma Kona, Oahu, a i hoolimalimaia i ka la 1 o Sepatemaba, 1877, ma ka $200 a ka makahiki.
Manawa---Dala Kuike. Uku koho, $500 a pii aku no na apana a elua. JNO. E. BUSH, Kuhina Kalaiaina.
Keena Kalaiaina, Nov. 2, 1882. 1095 3t
Aie Aupuni.
Ke hoolahaia aku nei ma keia, o na noi a pau no kekahi mau Aie Aupuni hou a hiki i ka $500,000, e waiho mai ma ka Waihona o ke Aupuni.
O ka ukupanee he eono pa keneta no ka makahiki a e hookaaia ma kela a me keia hapalua makahiki.
Aole no hoi he hiki ke heluia na bona e na Luna Helu ma ke ano he waiwai maoli, no ka mea ua hookuuia na auhau o ke Aupuni maluna o keia mau bona. SIMON KOLOA KAAI. 1083 tf Kuhina Waiwai.
Ua hookohuia o Mr. J. H. Kapuniai a me Holi i keia la i mau Komisina no na Alanui Liilii a me na Pono Wai, no ka apana o Waimea, mokupuni o Kauai, ma kahi o V. Knudsen a me Kahoa i waiho mai. Eia ka papa o ua apana la : Rev. Geo. Rowell, J. H. Kapuniai, P. R. Holi. JNO. E. BUSH, Kuhina Kalaiaina.
Keena Kalaiaina. Novemaba 23, 1882. 1096 3t
Ma ke Keena o ka Lunakanawai Kaapuni Apana Ekolu o ko Hawaii Paeaina. Ma ka waiwai o Kaie k., no Hilo, Hawaii, i mke.
Ua heluheluia a ua waihoia ka palapala noi a D. Kaawa k, e noi anae hoonohoia oia i Lunahooponopono Waiwai no na waiwai o Kaie k, no Kahua, Hilo, Hawaii, i make, a e hoonoho aku iiaia i Kahu Malama no na hooilina oo ole.
Nolaila, ua kauohaia na mea a pau ke pili, o ka POALIMA, oia ka la 22 o DEKEMABA, 1882, ma ka hora 10 A. M., ma ka Hale Hookolokolo ma Hilo, oia ka manawa a me kahi i kohoia no ka hoolohe ana i ua noi la a me na mea kue ke hoikeia.
F. S. LYMAN, Lunakanawai Kaapuni.
Hilo, Hawaii, Nov. 22, 1882. 1096 3t
Ma ke Keena o ka Lunakanawai Kaapuni Apana Ekolu o ko Hawaii Paeaina. Ma ka waiwai o Pahukoa w., me Hoee w., no Hilo, Hawaii, i make.
Ua heluheluia a ua waihoia ka palapala noi D. Kaawa k, e noi ana e hoonohoia oia i Lunahooponopono no na waiwai o Pahukoa w, me Hoee w, no Kuhua, Hilo, Hawaii, i make.
Nolaila, ua kauohaia na mea a pau ke pili, o ka POALIMA, oia ka la 22 o DEKEMABA, 1882, ma ka hora 10 A. M., ma ka Hale Hokolokolo ma Hilo, oia ka manawa a me kahi i kohoia no ka hoolohe ana i ua noi la a me na mea kue ke hoikeia.
F. S. LYMAN, Lunakanawai Kaapuni.
Hilo, Hawaii, Nov. 22, 1882. 1096 3t
Aha Hookolokolo Kaapuni Apana Eha, ko Hawaii Pae Aina,ma ka hooponopono waiwai. Ma ka hana o ka waiwai o PAIEIE w, o Koloa, Kauai, i make. Imua o ka Lunakanawai Kaapuni ma ke Keena.
Ma ka heluhelu a me ka waiho ana mai o ka palapala noi a me ka papa hoike o A. K. Mika, Lunahooponopono o ka Waiwai o PAIEIE w, no Koloa, i make, e noi ana e apono ia na hoolilo he $13.75, a e hoike ana o na mea i loaa mai iaia he $---, a e noi ana e nana a aponoia kela mau mea, a e kauohaia e mahele i na waiwai e waiho ana ma kona lima i na mea i kuleana malaila, a e hookuu ana iaia a me kona mau hope mai ko lakou noho ana ma ia ano.
Ua kauohaia, o ka POAONO, ka la 30 o DEKEMABA, M. H. 1882, ma ka hora umi o kakahiaka, imua o na Lunakanawai la, ma ke Keena ma ka Hale Hookolokolo ma Koloa, oia kahi a me ka manawa i kohoia no ka hoolohe ana i ua noi la, a me na papa hoike i oleloia, a o ka poe a pau i pili malaila e hele mai a e hoike i ke kumu, ina ke kumu io ko lakou, e ae ole ia ai ua noi la, a malaila e hoike mai ai na hoike o na mea i kuleana maloko o ka waiwai i oleloia. A o keia kauoha ma ka olelo Hawaii, e paiia maloko o ka NUPEPA KUOKOA, he nupepa i pai a hoolahaia ma Honolulu, i ekolu pule mamua ae o ka manawa i oleloia no ka hoolohe ana.
Kakauia ma Koloa, ko Hawaii Pae Aina, i keia la 18 o Novemaba, M. H. 1882. JACOB HARDY.
1096 3t Lunakanawai Kaapuni Apana 4
HOOLAHA HOU.
Ma ke Keena o ka Lunakanawai Kaapuni Apana Ekolu o ko Hawai Pae Aina. Ma ka waiwai o KUPIHE k, no Hilo, Hawaii, i make.
Ua heluheluia a ua waihoia ka palapala noi a Kaaimawaho, e noi ana e hoonohoia o J. Kupihe i lunahooponopono no na waiwai o Kupihe k., no Puueo, Hilo, Hawaii, i make, a e hoomaopopoia na hooilina o ka mea make.
Nolaila, ua kauohaia na mea pau i pili, o k, POALIMA, oia ka LA 22 o DEKEMABA, M. H. 1882, i ka hora 10 o kakahiaka, ma ka Hale. Hookolokolo ma Hilo, oia ka manawa a me kahi i kohoia no ka hoolohe ana i na noi la, me na mea kue ke hoikeia.
F. S. LYMAN, Lunakanawai Kaapuni.
Hilo, Hawaii, Nov. 22, 1882 1096 3t
Aha Hookolokolo Kaapuni Apana Eha o ko Hawaii Pae Aina, ma ka hooponopono waiwai. Ma ka hana o ka Waiwai o KAHAWAI k, o Kamoaloa, Kauai, i make. Ma ke keena, imua o ka Lunakanawai Kaapuni ma ke keena.
Ma ka heluhelu a me ka waiho ana mai o ka palapala noi a me kapapa hoike o A. K. Mika. Lunahooponopono o ka Waiwai KAHAWAI, no Kamoaloa, i make, e noi anae aponoia na hoolilo he $15.75, a e hoike ana o na mea i loaa mai iaia he $---, a e noi ana e nana a aponoia kela mau mea, a e kauohaia e mahele i na waiwai e waiho ana ma kona lima i na mea i kuleana malaila, a e hookuu ana iaia a me kona mau hope mai ko lakou noho ana ma ia ano.
Ua kauohaia o ka POAONO, ka la 30 o DEKEMABA, M. H. 1882, ma ka hora 10 A. M., imua o ua Lunakanawai la, ma ke keena ma ka Hale Hookolokolo ma Koloa, oia kahi a me ka manawa i kohoia no ka hoolohe ana i ua noi la, a me ka papa hoike i oleloia, a o ka poe a pau i pili malaila e hele mai a e hoike i ke kumu, ina he kumu io ko lakou, e ae ole ia ai ua noi la, a malaila e hoike mai ai na hoike o na mea i kuleana maloko o ka waiwai i olelo ia. A o keia kauoha ma ka olelo Hawaii, e paiia maloko o ke KUOKOA he nupepa i pai a hoolahaia ma Honolulu, i ekolu pule mamua ae o ka manawa i oleloia no ka hoolohe ana.
Kakauia ma Koloa, o Hawaii Pae Aina, i keia la 18 o Novemaba, M. H. 1882.
JACOB HARDY, Lunakanawai Kaapuni Apana Eha 1096 3t
Aha Hookolokolo Kaapuni Apana Eha o ko Hawaii Pae Aina, ma ka hooponopono waiwai. Ma ka hana o ka waiwai o KUAANA k., o Koloa, Kauai, i make. Ma ke keena, imua o ka Lunakanawai Kaapuni, ma ke keena.
Ma ka heluhelu a me ka waiho ana mai o ka palapala noi a me ka papa hoike o A. K. Mika, Lunahooponopono o ka Waiwai o KUAANA, no Koloa, i make, e noi ana e aponoia na hoolilo he $15.00, a e hoike ana o na mea i loaa mai iaia he $---, a e noi ana e nana a aponoia kela mau mea, a e kauohaia e mahele i na waiwai e waiho ana ma kona lima i na mea i kuleana malaila, a e hookuu ana iaia a me kona mau hope mai ko lakou noho ana ma ia ano.
Ua kauohaia, o ka POAONO, ka la 30 o DEKEMABA, M. H. 1882, ma ka hora 10 A. M., imua o ua lunakanawai la, ma ke keena ma ka Hale Hoookolokolo, ma Koloa, oia kahi a me ka manawa i kohoia no ka hoolohe ana i ua noi la, a me na papa hoike i oleloia, a o ka poe a pau i pili malaila e hele mai a e hoike i ke kumu, ina he kumu io ko lakou, e ae oleia ai ua noi la, a malaila e hoike mai ai na hoike o na mea i kuleana maloko o ka waiwai i olelo ia. A o keia kauoha ma ka olelo Hawaii, e paiia a hoolahaia ma Honolulu, i ekolu pule mamua ae o ka manawa i oleloia no ka hoolohe ana.
Kakauia ma Koloa, ko Hawaii Pae Aina, i keia la 18 o Novemaba, M. H. 1882. JACOB HARDY, Lunakanawai Kaapuni Apana Eha. 1096 3t
Aha Kiekie o ko Hawai Pae Aina, ma ka hooponopono waiwai. Mokupuni o Oahu, ko Hawaii Pae Aina, ss. Ma ka waiwai o KAAUA CUMMINGS o Napoopoo, Hawaii, i make. Olelo kauoha e koho ana i la e hooiaio ai i ka Palapala Kauoha, a no ka hoolaha ana.
No ka mea, ma ka la 25 o Novemaba, M. H. 1882, ua waihoia mai imua o ka Aha, kekahi palapala i oleloia, oia no ke Kauoha Hope Loa o KAAUA CUMMINGS i make aku la ; a me ka Palapala Hoopii e noi ana e hooiaioia kela Palapala Kauoha a e hoopuka hoi ka Palapala Luna Hooko no L. Loka ua waihoia mai e L. Loka.
Nolaila, ua kauohaia o ka Poalima oia ka la 22 o Dekemaba, M. H. 1882, ma ka hora 10 A. M. ma ka Rumi Hookolokolo o ia Aha, ma Honolulu, oia ka la a me ka hora, e hooiaioia ai ia Palapala Kauoha, a e hoolohe hoi no ia noi ana mai, a me ka poe a pau i pili, e kue ana ia Palapala Kauoha, a me ka hoopuka ana i ka Palapala Luna Hooko.
A ua kauoha hou ia, e hoolaha no ia mea no na pule ekolu iloko o ka nupepa KUOKOA, he he nupepa i paiia a i hoolahaia ma Honolulu.
Kakauia ma Honolulu, ko Hawaii Pae Aina Novemaba 25, 1882. A. FRANCIS JUDD, Lunakanawai o ka Aha Kiekie, Ikea : D. K. Fyfe, Hope Kakauolelo. 1096 3t
Aha Hookolokolo Kaapuni Apana Eha, ko Hawaii Pae Aina, ma ka hooponopono waiwai. Ma ka hana o ka waiwai o NAKAIEWALU k, o Koloa, Kauai, i make.
Ma ka heluhelu a me ka waiho ana mai o ka palapala noi a me ka papa hoike o A. K. Mika, Luna Hooko Kauoha o ka waiwai o NAKAIEWALU k, no Koloa, Kauai, i make, e noi ana e aponoia na hoolilo he $---, a e hoike ana o na mea i loaa mai iaia he $20.00, a e noi ana e nana a aponoia kela mau mea, a e kauohaia e mahele i na waiwai e waiho ana ma kona lima i na mea i kuleana malaila, a e hooku ana iaia a me kona mau hope mai ko lakou noho ana ma ia ano.
Ua kauohaia, o ka POAONO, ka la 30 o DEKEMABA, M. H. 1882, ma ka hora 10 o kakahiaka, imua o ua Lunakanawai la, ma ke Keena ma ka Hale Hookolokolo ma Koloa, oia kahi a me ka manawa i kohoia no ka hoolohe ana i ua noi la, a me na papa hoike i oleloia, a o ka poe a pau i pili malaila e hele mai a e hoike i ke kumu, ina he kumu io ko lakou, e ae ole ia ai ua noi la, a malaila e hoike mai ai na hoike i ke kumu, ina he kumu io ko lakou, e ae ole ia ai ua noi la, a malaila e hoike mai ai na hoike o na mea i kuleana maloko o ka waiwai i oleloia. A o keia kauoha ma ka olelo Hawaii, e paiia maloko o ka NUPEPA KUOKOA, he nupepa i pai a hoolahaia ma Honolulu, i ekolu pule mamua ae o ka manawa i oleloia no ka hoolohe ana.
Kakauia ma Koloa, ko Hawaii Pae Aina, i keia la 18 o Novemaba, M. H. 1882.
JACOB HARDY, Lunakanawai Kaapuni Apana 4. 1096 3t
Aha Hookolokolo Kiekie o ko Hawaii Pae Aina, ma ka hooponopono waiwai. Ma ka hana o ka waiwai o KEKELE k, o Koloa, Kauai, i make. Imua o ka Lunakanawai Kaapuni ma ke Keena.
Ma ka heluhelu a me ka waiho ana mai o ka palapala noi a me ka papa hoike o A. K. Mika, Lunahooponopono o ka waiwai o KEKELE k, Lunahooponopono o ka waiwai o KEKELE k, no Koloa, i make, e noi ana e aponoia na hoolilo he $2.75, a e hoike ana o na mea i loaa mai iaia he $---, a e noi ana e nana a apono ia kela mau mea, a e kauohaia e mahele i na waiwai e waiho ana ma Kona lima i na mea i kuleana malaila, a e hookuu ana iaia a me kona mau hope mai ko lakou noho ana ma ia ano.
Ua kauohaia, o ka POAONO, ka la 30 o DEKEMABA, M. H. 1882, ma ka hora umi o kakahiaka, imua o ua Lunakanawai la, ma ke Keena Hookolokolo ma Koloa, oia kahi a me ka manawa i kohoia no ka hoolohe ana i ua noi la, a me na papa hoike i oleloia, a o ka poe a pau i pili malaila e hele mai a e hoike i ke kumu, ina he kumu io ko lakou, e ae ole ia ai ua noi la, a malaila e hoike mai ai na hoike o na mea i kuleana maloko o ka waiwai i oleloia. A o keia kuoha ma ka olelo Hawaii, e pai ia maloko o ka NUPEPA KUOKOA, He nupepa i pai a hoolohaia ma Honolulu, i ekolu pule mamua ae o ka manawa i oleloia no ka hoolohe ana.
Kakauia ma Koloa, ko Hawaii Pae Aina, i keia la 18 o Novemaba, M. H. 1882. JACOB HARDY, Lunakanawai Kaapuni Apana 4. 1096 3t
HOOLAHA HOU.
Aha Hookolokolo Kiekie o ko Hawaii, Pae Aina. Ma ka hooponopono waiwai. Ma @ hana o ka Waiwai o AH WO o Kona, Hawaii, i make. Ma ke Keena, imua o ka Lunakanawai Nui. Kauoha e hoolaha i @ @ @ na papa hoike, hookuu ana, a e mahele @ waiwai.
Ma ka heluhelu a me ka waiho @ @ palapala noi a me ka papa hoike @ @ Luna Hooponopono o ka Waiwai @ @ no Kona, Hawaii i make, e noi ana e aponoia na hoolilo he $2349.15, a e hoike ana o na mea i loaa mai iaia he $2349.15, a e noi ana e nana a aponoia kela mau mea, a e kauohaia e mahele i na waiwai e waiho ana ma Kona lima i na mea i kuleana maila, a e hookuu ana iaia a me kona mau hope mai kolakou noho ana ma ia ano.
Ua kauohaia, o ka POALUA, ka la 10 o DEKEMABA, 1882, ma ka hora 10 kakahiaka , imua o ua Lunakanawai la, ma ke Keena ma ka Hale Hookolokolo ma @ @ Honolulu, oia kahi a me ka manawa i koho ia no ka hoolohe ana i ua noi la, a me ka papa hoike i oleloia, a o ka poe a pau i pili malaila, e hele mai e hoike ke kumu, ina ke kumu io ka @ @ @ @ ai na noi la, a malaila e hoike mai ai na hoike o na mea i kuleana maloko o ka waiwai o oleloia. A o keia kauoha ma ka olelo H@ Enelani, e paiia maloko o ka NUPEPA KUOKOA me Hawaiian Gazette he @ nupepa i pai a hoolahaia ma Ho@ ekolu pule mamua ae o ka manawa i oleloia no ka hoolohe ana.
Kakauia ma Honolulu, ko Hawaii Pae Aina, i keia la 14 o Novemaba, M. H. 1882. A. FRANCIS JUDD
Ikea: Lunakanawai Nui o ka Aha Kiekie
D. K. Fyfe, Hope Kakauolelo o ka Luna Kiekie. 1096 3t
Aha Hookolokolo Kiekie o ko Hawaii Pae Aina, ma ka hooponopono waiwai. Ma ka waiwai o ELIAMA w, o Kalihi, Oahu i make kauoha ole. Imua o ka Lunakanawai Ben. H. Austin. Olelo kauoha e hoolaha aka @ @ noi ana mai e koho i Lunahooponopono o ka Waiwai.
Ma ka heluhelu a me ka waiho ana mai o ka palapala noi a Kahookuilani no Kalihi, Honolulu, Oahu, e hoike mai ana o Eliama @ Kalihi i oleloia, ua make kauoha ole ma Kalawao, Molokai, ma ka la ---o---M. H. 1882, me ka hana ole i Palapala Kauoha @ loa, a e noi ana e haawiia ka Palapala H@ hu Lunahooponopono Waiwai Kahookuilani w, ka makuahine o ELIAMA w, i make kauoha ole.
Ua kauohaia o ka POAKAHI, ka la 18 o DEKEMABA, M. H. 1882, maka hora 10 A. M. oia ka manawa i kohoia no ka hoolohe @ ua noi la, imua o na Lunakanawai la, ma ke Keena Hookolokolo o keia Aha ma Honolulu, a ma ia manawa a ma ia wahine @ aina mea a pau i pili e hoike mai @ @ ina he kumu oiaio ko lakou, e ae ole @ noi la. A o keia olelo kauoha e hoolaha ma ka olelo Hawaii, i ekolu pule ma ka NUPEPA KUOKOA, he nupepa ma Honolulu.
Kakauia ma Honolulu, ko HAWAII PAE AINA, Nov. 17, 1882. BENJ. H. AUSTIN
Ikea : Lunakanawai o ka Aha Kiekie
D. K. Fyfe, Hope Kakauolelo. 1094 3@
Aha Kiekie o ko Hawaii Pae Aina. Ma ka hooponopono waiwai. Ma ka waiwai o ka @KUA (k) o Honolulu i make, kauoha. @ ka Lunakanawai Hon. A. Francis Judd. Olelo kauoha e hoolaha aku no ke noi ana ma @ e koho i Lunahooponopono Waiwai.
Ma ka heluhelu a me ka waiho ana mai o ka palapala noi a Beni Kokua o Makawao, Mokupuni o Maui, e hoike mai ana, o @KUA (k) no Honolulu ua ake kauoha ma Honolulu, ma ka la 10 o Novemaba, M. H. 1882 a e noi ana e haawiia ka Palapala H@ Lunahooponopono Waiwai iaia a me K@ (w) ka wahine mare.
Ua kauohaia, o ka POALUA, ka la 5 o DEKEMABA, 1882, ma ka hora 10 o kakahiaka oia ka manawa i kohoia no ka hoolohe @ ua noi la, imua o ua Lunakanawai la, ma ke Keena Hookolokolo o keia Aha, ma H@ a ma ia manawa a ma ia wahi no e hele @ na mea a pau i pili e hoike mai i ke kumu, a he kumu oiaio ko lakou, e ae ole ia @ @ la. A o keia olelo kauoha e hoolahaia m@ olelo Hawaii, i ekolu pule maka NUPEPA KUOKOA, he nupepa ma Honolulu.
Kakauia ma Honolulu, ko Hawaii Pae Aina, Novemaba 13, 1882. A. FRANCIS JUDD
Ikea: Lunakanawai o ka Aha Kiekie
D. K. Fyfe, Hope Kakauolelo, 1094 @
C. B. MAKEE A. A. COURTENEY
MAKEE & COURTENEY
HANA POI ! HANA POI !!
MA WAIHEE, MAUI.
---
O na Paiai aweawe, ono, a kuhinia, e la no ma ko maua hale hana Paiai ma kahi @ ikeia maluna. O ka poe a pau ma na mokupuni e ake ana i mau Paiaia, e hiki no ia ma ke hoolako aku a lawa pono ka makemake E laweia no na Paiai ma Maalaea. @Helu keneta o ka paona.
He 60 aina Kalo a oi e mahiia nei i k@.
Eia ka wa kupono a e hoouna awiwi ma na kauoha.
Na kauoha ma na leta e hooko awiwi ia. 1089 3ms
CALIFORNIA.
FURNITURE CO.
---
O KEIA HUI A HALEKUAI O
Na Lako Hoonani o na Hale !
I ike mua ia iho nei ma kona kahua ma
iho nei ma ke Alanui Papu, ma-
kai iho o ka
Halekuai o na Mea Kani o Geo. F. Wells
Ua Hooneeia ai Nei a i na
Helu 56 me 58 Alanui Moiwahine
He Hookahi Ipuka ka mamao mai ka Hale Ma.
---
A malaila e loaa ai na Lako Hale Emi Loa
Eia iho ka inoa o ia mau Lako Hale:
Na Moe maikai loa,
Noho o na ano a pau,
Noho koki, Pakaukau,
Noho huleilua,
A HE NUI AKU.
---
EIA PU NO HOI ME MAKOU,
Na Uluna,
Na Bela Moe,
Na Kihei Moe,
A me na Pale Uluna,
A oiai na makou iho no e hana keia mau mea maluna @
nolaila e kuaiia aku ana me ke
Kumukuai Haahaa Loa !
E. P. AKAMU, Agena
OLELO HOOLAHA.
Ke papa ia aku nei ka poe a pau e ki ana i na mau maluna ona aina ma Kaneohe, Kailua, Koolaupoko, Mokupuni o Oahu. O ka poe e kue ana i keia, e hoopii ia no ma ke Kanawai. M. ROSE, Luna o ka Hui Mahiko o Kaneohe.
Nov. 1, 1882. 1094 4t