Ka Nupepa Kuokoa, Volume XXI, Number 45, 11 November 1882 — Page 1
| This text was transcribed by: | Kehau Ward |
| This work is dedicated to: | Puakea |
Ka Nupepa Kuokoa
KE KILOHANA POOKELA NO KA LAHUI HAWAII.
BUKE XX1, HELU 45. POAONO, NOVEMABA 11, 1882. NA HELU A PAU 1093
NA HOOLAHA.
MAIKAI KA HOI
KA PAPA,
A ME
KA LAAU O KOU HALE.
NOHEA LA?
KAI NO HOI NO KAHI O
WAILA MA.
Nana aku no hoi ia la ohi ka lo o ka laau o Makawao. i ka ua mea hoi o ka nani.
NA PAPA! NA PAPA!
A ME
Na pono Kukulu Hale
O na Ano no a Pau.
AIA MA KE KIHI O NA ALANUI
Papu me Moiwahine,
HONOLULU.
@e loaa ai e like me ka makemake no ke
KUMUKUAI MAKEPONO LOA.
PAPA! PAPA! PAPA!
NA PAPA HULUHULU,
NA PAPA MANOANOA,
NA PAPA I KAHIIA,
NA PAPA KEPA,
PAPA HOLE KEOKEO,
PAPA HOLE ULAULA.
Na Laau, Na Laau,
@ KUA,
NA KAOLA,
NA AAHO,
NA MOLINA
NA PEAPEA.
PINE HULUHULU,
PINE I KAHIIA.
NA PAPA A ME NA LAAU ULAULA.
PILI ULAULA,
PILI KEOKEO,
PANI PUKA,
PUKA ANIANI,
PANI PUKA ANIANI,
PUKA OLEPELEPE.
PENA
O NA ANO A PAU,
Hulu Pena mai ka liilii a ke nui,
Aila Pena,
Aila Hoomaloo,
Waniti, Pate,
Na Lako o kela a me keia Ano.
NA AMI PUKA HALE,
NA AMI PUKA PA,
ANIANI
PEPA HALE A ME NA LIHILIHI,
E loaa no malaila.
PAAKAI HELU I,
O
KAKAAKO ME PUULOA.
No ke Dala Kuike, e loaa no na mea a pau i hai ia ae la, no ke Kumukuai Emi Loa. O na Kauoha mai Hawaii a Niihau, e loaa aku no ia lakou, e hooko koke ia no ia me ka lawa pono. E kipa nui ilaila i ike i ka oiaio.
905-tf
Na Hoolaha Kumau.
W. O. SMITH,
LOIO! LOIO!
Helu 36 Alanui Kalepa, Honolulu.
W. R. KAKELA,
He Loio a he Kokua ma ke Kanawai.
He Luna Hooiaio Palapala.
CECIL BROWN.
Loio a he Kokua ma ke Kanawai.
A he Agena no ka Hooiaio ana i na Palapala no ka Mokupuni o Oahu.
Helu 8 Kaahumanu, Honolulu, H. P. A. 2-1y
ASA KAULIA,
LOIO A KOKUA MA KE KANAWAI
Ua makaukau au e lawelawe i na hihia a pau ma keia Oihana imua o na Aha a pau o ka mokupuni o Oahu. E loaa no au ma Koolaupoko, Heeia, a ma Honolulu i kekahiu wa E hooko ia na kauoha mai na wahi a pau o ka mokupuni me ka eleu a me Kahikiwawe.
Jno. Lota Kaulukou,
LOIO A HE KOKUA.
Ua makaukau oia e lawelawe i na hihia a pau o kela a me keia ano iloko o na Aha Hookolokolo a pau o keia Aupuni. Ua hiki no hoi ke hana i na palapala a pau e pili i ka Oihana Loio me ka eleu. E loaa no au ma Heeia Koolaupoko, a ma Honolulu no hoi i kekahi manawa.
901-tf
C. C. COLEMAN,
Amara a he mea hana Mekina
Kapili Kapuai hao lio.
A ME KA
Hana ana Kaa Lio, etc.,
Hale Hana ma Alanui Alii,
905-tf E kokoke la i ke Alanui Papu.
KALE KULIKA,
Luna hooiaio
PALAPALA KUAI, MOLAKI,
A ME NA PALAPALA OIA ANO.
Luna Hooiaio Palapala Aelike mawaena o na Haku a me na Kauwa. Luna Haawi Palapala Mare.
Ma ke kihi o ke Alanui Moiwahine me Kaahumanu,
kulanakauhale o Honolulu, ko Hawaii Pae Aina.
159-tf
Richard F. Bickerton,
[PEKETONA.]
Loio a he Kokua ma ke Kanawai.
Keena hana Helu 23 Alanui Kalepa.
Elua puka ma o aku o ka hale kauka o Kauka Minuteole.
E hele ana oia imua o na Ahahookolokolo a pau o keia Aupuni ma na ano hihia a pau, ina paha ma Oahu nei, a ma na Mokupuni e ae.
Ua makaukau mau oia i ka hana ana i na Palapala pili kanawai o kela a me keia ano.
Ua hiki no hoi iaia ke hoaie dala aku ma ka morakiana i na aina ma ka ukupanee haahaa loa.
E hanaia na hana me ka hikiwawe a me ka uku haahaa.
George E. Sherman,
MEA HANA NOHO LIO
A ME
Na Lako a pau o na Pono Hololio.
Ua maa kahiko oia iloko o keia hana, a ua kamaaina i ko Hawaii nei noho ana; he oluolu na auhau ana. E hele mai i ikemaka.
AIA KONA HALE HANA MA ALANUI KULA,
Ma nae iho o ka Uwapo nui.
1076-6m
JAMES M. MONSARRAT,
[MAUNAKEA]
Loio a he Kokua ma ke Kanawai.
Imua o na aha Hookolokolo a pau o keia Aupuni. E lawelawe ana no hoi ma na hana pili i ka hooponopono waiwai, me ka imi ana i na palapala Sila Aina, ka hana ana i na Palapala Kuai, Hoolimalima a me ka hoaie dala ana.
A HE LUNA HOOIAIO PALAPALA
Keena hana alanui Kalepa.
Jan. 3, 1880. 944-15
Joseph E. Wiseman,
LUNAHOOPONOPONO O NA WAIWAI PAA
A ME
Luna Imi Hana.
Helu 27 Alanui Kalepa, Honolulu
Luna Hoolimalima no na Rumi, na Hale, a me Luna Kuai me Hoolimalima o na Waiwai ma na wahi a pau o ka Paemoku. Luna imi Hana no ka poe a pau i nele i ka hana ole ma na wahi a pau i makemakeia ma kekahi mokupuni o ka Paeaina.
N. B.—Na Palapala Hoolimalima e hanaia me ka eleu; e ohiia na Bila Aie a me na hana e ae a pau e pili ana i na hana Oihana Kalepa me ke eleu a me ka pololei. O na Unuhiolelo a me na Maheleolelo ana, e hookoia me ka maikai. O na kauoha a me na kamailio ano maloko o na leta no kekahi o na hana maluna ae, e hookoia me ka eleu loa.
1076-1y
KA MOOLELO
O
Onila Maka!
Ka Makai Kiu Kaulana
O
ENELANI!
A O KA MEA
POHIHIHI O KA 1868.
MOKUNA XXVII.
HOOMAKAKIU KA MAKA KIU—KA MOOLELO KAMAHAO A KE KEIKI OPIO—KA HALAWAI ANA MA KAHAKAI—KA HOPENA HOOLELE HAULI—AOHE LOHE O KE KANAKA PUPULE I KA HEA IA AKU—KA LAUNA KAMAILIO ANA ME KA ONA NONA KA HALE—HE MANAO KOHOKOHO WALE—KA PAE HEWA MAI KA MOANA MAI—NA MEA E PILI ANA I KA PAE HEWA.
Aole i lilo i mea pohihihi i ka Makai Kiu ka imi ana aku i ka hale a ke kanaka aihue i komo aku ai.
Oiai e ku ana ua wahi hale la ma kahi mamao mai kahakai aku iwaena o kekahi apana aina i pa ole ia, a maluna hoi oia wahi apana aina i kanu iho ai ka ona nona ua wahi la i ka lakou mau mea ulu.
Aole no hoi i ake nui loa ka Makai Kiu e komo aku iloko o ua wahi la, aka, o kona ake nui nae o ka holoholo ma ua wahi la i ike aku ai oia i ua aihue la.
Oiai, aole no hoi he mea hou loa ka ike ia ana aku o na malihini e hele holoholo ana ma ka ae kai o ua wahi la, nolaila, aole i lilo i mea ano nui loa ko ka Makai Kiu ike ia ana malaila e holoholo ana.
Iaia e holoholo ana malaila, aohe ana mea i ike aku ai e puka mai ana mailoko mai o ua wahi hale la.
Aka, mahope iho nae, ike aku la oia i kekahi kanaka i ka puka ana mai a hele pololei ae la i kahakai.
Iaia hoi e haka pono ana maluna o ua mea la, ike aku la oia, aole oia ka mea ana i makemake ai.
Mahope iho, hoea mai la kekahi wahi keiki opiopio.
Kali malie iho la nae ka Makai Kiu a hiki i ka wa i kaawale aku ai ua kanaka la mai iaia aku, alaila, hele aku la oia a halawai me kahi keiki a launa pu iho la me ia ma ke kamailio ana.
He wahi opio ano eleu oia, a ua hauoli loa hoi oia i kona wa i ike mai ai i kekahi kanaka kulana keonimana e hele aku ana e kamailio pu me ia; nolaila, manao iho la oia he mea nui oia no ia wahi, a oia la ke kumu o ka hele ana aku o keia kanaka imua ona.
I ka wa a ka Makai Kiu i ike aku ai i ke ano o ua wahi keiki nei, hoomaopopo iho la oia he wahi opio naauao ka keia; nolaila, aole oia i wikiwiki i ka ninau aku iaia no kana mea i hele mai ai e ike.
Aka, mahope iho, ano hookamaaina iho la laua iloko oia wa; alaila hoomaka aku la oia e ninau penei:
O kou makuakane no kela i puka mai nei mai ka hale mai, a iho ae nei i kahakai?
O ke kanaka anei i puka mai nei mamua iho o'u?
E.
Aole oia he makuakane no'u; he hoa ai wale no oia no ko makou hale.
He hoa ai wale no ka oia no ko oukou hale?
E.
He mau hoa ai hou aku no nae paha koe o ko oukou hale?
Aohe.
Ka, kuhi au ua ike aku nei la wau i kekahi mea i puka mai la iwaho a hoi hou aku la iloko o ka hale?
Ka! O ko'u wahi luaui ia au i ike aku la.
Kahaha! aole paha ia o kou luaui?
Ma keia wahi i hoike mai ai ua wahi keiki la i kona naauao a me ka noonoo ma kona pane pakike ana aku i ka Makai Kiu penei:
Ina ua maopopo ia oe ko'u makuakane, heaha la kou mea o ka ninau ana mai ina o ko'u makuakane kela i iho ae nei i kahakai?
Ma ke ano o keia ninau; me he mea la he "kahamaha", aka, ua makaukau mau nae ka Makai Kiu no ia mea, nolaila, pane aku la oia:
Eia ke kumu, no ko'u ike ana aku nei i ke ano opiopio loa o na helehelena o keia kanaka, nolaila, hoole aku nei au, aole ia o kou makuakane.
O Pupule paha kau e mea nei?
Owai ia mea o Pupule?
Ka, he wahi kanaka pupule oia i pae hewa mai mai ka moana mai.
E hoike mai hoi ha oe i ka moolelo o ua kanaka pae hewa la ia'u.
Ka, he wahi luina oia i loaa aku i kuu makuakane e lana ana i ke kai iluna o ka waapa.
Pehea ka loihi mai ka wa i loaa aku ai oia i ko wahi luaui a hiki i keia manawa?
Ua loihi loa no.
I mai nei oe ia'u he luina oia? Pehea i maopopo ai ia oe he luina oia?
Eia, ua kahikoia oia me ka aahu o na luina; a ua i mai no hoi oia, he luina oia.
A heaha ko oukou kumu o ke kapa ana iaia o Pupule?
No kona ano opulepule no hoi paha, e like me ka papa i olelo mai ai, "ua haalele mai ka noonoo kanaka i ka pili a ke hoa."
A owai ka kona inoa maoli?
Aohe maopopo ia makou; no ka mea, e ae mai ana no oia i na inoa a pau a makou e kapa aku ai iaia.
He kii paha kana puni ea?
E, o kana puni ia o ke kii, a ua olelo mai no hoi o papa, malia ua aloha oia i kekahi wahine opio ui i make; nolaila, pupule ai oia. Nolaila, i keia wa, ke ohi mai nei oia he lehulehu wale o na kii wahine, me ka maopopo ole hoi ia papa kahi i loaa mai ai o keia poe kii he lehulehu wale.
Heaha ka mea o ko luaui i hoouna ole ai iaia i kekahi halemai pupule?
E hoouna aku ana no oia, aka hoi ua ano aloha hoi oia iaia, nolaila ua manao oia e malama iaia a hiki ae i keia hooilo, alaila, hoouna aku iaia; no ka mea, hewa pilikia loa ia no makou i ka i-a.
A aia i hea o Pupule @ wa?
He aha kou makemake nona?
He makemake hoi ko'u e ike i kekahi kakana i hoopakele ia mai ka make mai.
Aha, mai Nu Ioka mai nei ka paha oe?
E.
O ka'u no ia i manao ae nei, ina oe e noho ana ia nei, alaila ike oe i ka nui o na kino make e pae mai ai iuka nei, ei aku nae malalo iki aku nei kahi pae mau o na kino make.
Makahi hea o Pupule e hele mau ai?
Ma na wahi a pau; aka, ma ka'u koho wale aku no, eia aku nei paha i kai o ka uwapo i keia la i ka nana i ka holo o na mokuahi alo ohua o ka muliwai o Nu Ioka no Uwapo Loihi.
Kamail o iki iho la ka Makai Kiu me ua wahi keiki nei, a haalele iho la no Uwapo Loihi.
Aka, iaia nae i hele aku ai a hapalua like mai kahi ana i haalele aku ai i kahi keiki, ike aku la oia i kekahi kanaka loihi e hele mai ana mamua pono mai ona.
A iaia hoi i aui ae ai a nana, ike aku la keia o ke kanaka no ia nana i aihue na kii.
Oiai ua lilo i mea nui a hauoli hoi kona lohe ana no keia kanaka i hoopakele ia mai ka moana mai, nolaila, kau nui aku la kona manao e hui pu me ia.
No kekahi manawa pokole hiki mai la keia imua o ua kanaka la.
Ua kahiko ia oia me na aahu pupuka, a ua ulu aku hoi kona umiumi a hiki i kona umauma, a aole no hoi i hoomaemaeia, aka, i ka wa nae a ka Makai Kiu i nana aku ai iaia, hooho ae la oia me ka leo o ke kahaha.
No ka mea, oiai ua kanaka la e aahu ana ina lole inoino me ka waiho wale iho no o kona mau wawae, a me kona umiumi; ike aku la ka Makai Kiu he kanaka ui maoli no kahi pae hewa mai ka moana mai, a malia paha he keonimana oia iloko o kona mau la; aka, ano, ua lilo paha oia i maunu na ko hai makemake.
No ka nui loa o kona kahaha, ua aneane loa ua kanaka la e kaalo ae ma kekahi aoao ona.
Nolaila, hapai ae la oia i kona lima a kahea aku la iaia.
Aka, hele aku la no nae ua kanaka la me ka nana ole mai i ka ianei uwalo aku.
Ia ike ana o ka Makai Kiu aole i hoolohe ia mai kana hea ana aku, nolaila, kahea hou aku la oia, aka, hoomau aku la no nae ua pupule la i ka hele ana me ka awiwi loa.
Ia wa manao iho la o Onila Maka e hookuu aku no iaia e hele.
Oiai ua maopopo iaia he mea makehewa wale no ka hoao ana e hoopaa mai i ka hele ana a na kapuai o ke kanaka pupule, ke paa mua kona manao ma kana mea i iini ai.
Hoomau aku la no hoi ua pupule la i ka hele ana imua me ka huli ole ae i ka akau a i ka hema paha; ia wa no hoi ukali aku la ka Makai Kiu mahope ona.
Hele pololei aku la ua kanaka la a hiki i ka hale a komo loa aku la iloko.
Ia wa no hoi ike aku la oia i kekahi kanaka, ana hoi i manao wale aku ai no o ka ona ia o ua wahi hale la.
Hele aku la oia a launa kamailio pu iho la me ia; a mahope iho, hoololi ae la laua i ka laua mea e kamailio ana ia wa, a kamailio iho la laua no na mea e pili ana i ke kanaka pupule.
Ae, wahi a ke kanaka lawaia i pane aku ai i ka ninau a ka Makai Kiu.
He kanaka ano e io no kela, aka ma ko'u manao ana, he kanaka ui oia iloko o kona mau la.
Heaha kou mea o ka manao ana pela?
Eia, ina oe e ike ana iaia, e hoomaopopo no oe he mau helehelena ui kona, a he maikai no hoi ke kulana o kona poo, aka ma ke ano o kona kino he nui a puipui, eia nae he liilii kona mau wawae a me kona mau lima; i ko'u mau la e noho luina ana ma Enelani, ua lilo i mea hiipoi nui ia ka poe wawae liilii a me na lima liilii, nolaila aole au e kahaha, ina e ike ia ae ana ka oiaio, he keiki o Pupule na kekahi o na kanaka kulana koikoi, a i ole, he pilikoko oia no kekahi ohana hanohano o na aina e; aka, hookahi nae mea i maopopo ia'u, oia hoi keia: aole oia i hanau ia mai i luina, a aole no hoi oia he keiki papa no na ale.
He moku ili nae paha kekahi o onei i ka wa i loaa aku ai oia iluna o ka waapa?
Aohe, i ka malie iho nei no, hookahi ae nei paha malama i hala, a he la malie loa no hoi ka la ona i loaa aku ai ia'u, aka, mawaena o kaua nei, me he mea la, he mea kupanaha kamahao loa kekahi e pili ana i keia keonimana.
Heaha ke ano oia mea kamahao au e olelo nei?
Alaalawa ae la oia ma o a maanei me ka nana ana i na aohe he poe kokoke mai ia laua, a hawanawana aku la:
Aole loa au i olelo i kekahi mea e aku, aka, ma ko'u hoomanao iho ua lilo keia keonimana poino i moepuu na ko hai manao lili.
Ma ke ano hea?
Eia, i kona wa i loaa aku ai ia'u, e waiho make ana oia iloko o ka waapa, e koia mai ana e ke au iloko nei o ka aina, a ma kona poo he puka nui, nolaila, ma ko'u manao, i loohia oia i ka pupule mamuli o ka loaa ana o kela palapu.
A heaha kou manao ma keia?
Ma ko'u manao, ua loohia ia oia i ka poino iluna o kekahi moku, a hookau ia iluna o ka waapa, me ka manao ia paha e make ana oia, a i ole, e poholo aku ana ka waapa, a nalo iho na hoike o ka lakou mau hana karaima iloko o ka opu o ka hohonu.
Heaha ko mea i hoike ole ai i keia hana?
No ko'u makemake ole no hoi paha e pilikia, oiai ua hilinai mai ko'u ohana i ko lakou ola maluna o'u, a ina au i hoike i keia mea, alaila, e paa ana au malalo o ka bona, a i ole paha, e kohokoho ia mai ana na'u i pepehi; alaila, e pilikia ana wau, aka, e lilo no paha keia i moolelo kamahao, aka, o ka oiaio no nae ia.
He oiaio ma ka hoolohe aku i ka moolelo a ke kanaka lawaia, he oiaio loa, a aole hoi mea e kanalua ai.
Ia wa kulou iho la ka Makai Kiu e noonoo no kekahi manawa loihi no na mea e pili ana i keia mea.
(Aole i pau.)
NU HOU.
Ma ka la Sabati, Nov. 5, ua poni ia o D. Keaweamahi i Kahu Ekalesia no Wailuku, mamuli o ka hooholo ana iho nei o ko makou Ahahui Lunakahiko. A e lohe pono ana paha i ka moolelo o keia mau mea ia A. O. Forbes. Eia na lala o ke Komite: N. W. Lane, W. P. Kahale, W. P. Alexander, Rev. O. Nawahine. J. HAOLE.
Ua aeia o Lorrin A. Thurston e lawelawe loio ma na aha a pau.
Ua hookohuia o J. S. Walker i Luna Hooiaio o na Buke Helu Aupuni.
Ma ka po o ka Poaha o ka pule i hala ka ho-a ia ana o na kukui o ka Hale Alii hou. Maikai na hiohiona.
HEMOOLELO KAAO
NO
KEANINIULAOKALANI!
KA NANI LUA OLE
O NA
MOKU O KUAIHELANI
Ka mea nana I Hoonaueue
KUKULU O KAHIKI
A O Ke Pukonakona
O NA LA I AU WALE AKU LA.
MAHELE II.
Wawahi iho la ia i ke kua o ua honu la a nahaha liilii, ko ia nei hoomaka aku no ia e hele. Iaia nei nae e hele nei ke hoomaka hou mai nei no ka ino o ka moana aole nae oia nei manao ae no ia mau ino, no ka mea, ua maopopo wale no iaia nei na mea e loaa aku ana ma kana huakai. Hoomau aku la no keia i ka hele, a liuliu loa no hoi, ike aku la keia i kekahi mea ula e nee hele mai ana i ka moana; hele awiwi aku la keia ma kahi a keia mea nui e nee mai nei a kokoke loa, maopopo loa aku la ke ano o keia kupua o ka moana.
Hoomau aku la no keia i ka hele a ku ana keia ma ka aoao i nana pono iho ka hana makena no hoi ua nui, aole hoi e like me kela mea mua i loaa ai ia ia. Ninau mai la ua mea la. E hele ana oe i hea? Wahi a ua Ea nei, oia ka inoa o keia hoa paio o Lonokaiolohia, olelo aku la o Lonokaiolohia, ka, ua ninau ia aku hoi kau wahi e hele nei.
E hele no paha oe i kau huakai a loaa no hoi ka mea e like me kou ano, alaila o kou hoa kamailio ia. Kahaha, aole no hoi keia o kou kuamoo? He keu oe o ke kanaka hookano. E, wahi a Lonokaiolohia, mai olelo hou mai oe ia'u o eha loa aku auanei oe ia'u. He maunu oe na'u i haawi ia mai nei e ka honu e ai, apau kii aku au e pepehi i ua honu la no kona hookuu ana mai nei ia oe e hele mai i ke kai kapu o kuu alii.
Owai kau alii wahi a Lonokaiolohia.
O Hinakeka kaikamahine a Pimoe: lohe oe, nolaila, ke makaukau nei au e pepehi aku ia oe. Ia wa hoomaka koke mai la ua Ea nei e kope mai i ke kai ma kona hui akau e like no me ka honu
Lele aku la oia a ku iho la ma kona aoao akau, ka aoao e kihelu mai ana i ke kai, ku iho la keia malaila a hiki i ka manawa i hooki ae ai kona eheu peekue i ke kihelu ana i ke kai me ka manao ua make la kona hoa paio, ia manawa hoomaha iho la ia i kona luhi oia manawa ana i noke ai, a o ka wa koke no ia a Lonokaiolohia i hoomoe iho ai i ka laau palau a pa pono iho la ma ka hookuina o ka hui akau o ua Ea nei, a haki pu ae la.
Ia manawa, hoomanao iho la kona hoa paio naaupo eia no ka ke ola nei keia hele hewa i kahi kapu o ke alii ana, nolaila, hoohuli hou mai la kona hui hema e lumai mai iaia nei iloko o ke kai, a o ka a-i loihi wiwi hoi, hapai ae la iluna a kiekie loa, a o na wahi wawae pokopoko hoi ke noke la i ke kupaka no ka mea, ua kuamaha loa ke kino no ka haki ana o kona eheu akau.
Ia wa hahau mai la kona a-i e like ka ikaika me ka hina pu ana o kekahi kumu laau nui ikekahi makani ikaika, pela no ka ikaika o ka hahau pono ana mai iluna oianei, a ia wa owili ae la o Lonokaiolohia i kana laau a hahau ae la ma kahi e pili ana i ke kino, a haki pu ae la a pahu ana iloko o ke kai. O ka ahui hema hoi hikau ae la; a ia wa i pepehi aku ai o Lonokaiolohia a make ua Ea nei, ku aku la no keia hele ana.
Iaia no e hele la, ua pau ae la kona manao ana he mau pilikia no koe, ia wa kuu pau aku la ia i kona mama ma ka hele ana.
E na makamaka ke manao mai nei paha oukou eia no i ka aina maloo kahi i hele ai o Lonokaiolohia, aole, aka, ua like kona hele ana i ka aina maloo me keia ana e hele nei.
A no ka loaa ole hou aku o kekahi mea keakea iaia e hele nei, nolaila, ua nanea loa ia i keia manawa ana e hele nei, a i ke kupono ana a ka la i ka lolo ike aku la ia i keia mea nui loihi e lana hele ana i ke kai, me he pauku laau la ka loihi.
Ia wa hele pololei aku la ia ma kahi a keia mea nui e lana nei a i kona kokoke loa ana aku, ike aku la ia i ka okala ana ae o ke kuala, hoomaopopo iho la keia he mano ka keia mea; a i kona pili ana aku ma ka aoao, nana iho la keia aohe halo o keia mano, he nemonemo pu wale iho no. Hoopa aku la keia ma ke kuala, ike iho la keia aole ka he mano. A no ka puiwa ana o ua mea la i ka inei hoopapa, puoho mai la kona poo iluna, a ike pono aku la keia he poo o ka puhi.
Olelo aku la keia, ka, i na paha o ka loaa ana o keia puhi a ua hiki au i uka loaa ka pupu awa o kuu mau kupuna o Kuaihelani, o ka loihi hoi ka hewa o kahi aku i koe, kaumaha loa paha wau ke auamo aku. Olelo mai la ka puhi. E ke kanaka hookano, o kau mahaoi hele ana mai nei ka ia a owau iho la kau pupu awa e na makawelawela; o oe ka'u e ai aku, no ka mea ua komo mai nei oe i ko'u wahi, nolaila e ai koke aku no au ia oe i keia manawa.
Olelo hou aku la o Lonokaiolohia, ka, aole au i manao nau au e ai mai, o oe ka—aole i pau loa aku na olelo a Lonokaiolohia; o ka loaa koke mai la no ia i ka huelo, pa no ma na wawae o ka kakou kamahele hina ana keia ilalo. kuhi iho la ua moo nei ua make la kona hoakaua, huli mai la ke poo e nahu mai iaia nei, ia wa ua pii koke aku la keia iluna pono o ka hono poo a makia iho la i kana laau palau a i ke komo pono ana o ka laau iloko o ka iwi poo o ka manawa no ia i a ae ai o ke ahi a hemohemo ae la na hookuina iwi, a lilo ae la i mau momokuahi, a mailoko aku o kona kino nui alualu i puka mai ai kekahi wahine ui maikai, a olelo mai la penei: Mai hea mai nei oe a e hele aku ana i hea? Mai Hawaii mai nei au a e hele ana wau i Kuaihelani. A heaha kou mea o ka pepehi ana iho ia'u wahi hou a ua wahine nei?
Aole au i manao e pepehi ia oe, aka o ko olelo ana mai nei hoi ia'u owau kau ai o keia la, nolaila hakaka pu iho nei no kaua me kuu manao la o oe ke oolea, eia ka he palupalu loa oe, a ke hoolilo nei au ia oe i umu ahi no keia moana; ae wahi hou a ua wahine nei, ua make au ia oe ma na kino o'u, o keia kino nae o'u, mai manao oe e pepehi mai, no ka mea, aole i ku pono ia oe ke hoolilo mai ia'u i hoa hakaka nou he nani iho la no ia ua hakaka iho la no olua a ua make iho la no ia oe keia kupua o ka manao nei.
Ia wa ninau pono aku la o Lonokaiolohia i ka inoa o keia kupua, a hai mai la no hoi kela i ka inoa o ua poo kalakala nei. O ka inoa o keia kupua, o Waka, a mai loko mai nei ona i puka mai nei au; a no ka ike mai o ua wahine nei i ko Lonokaiolohia ui, ia wa pane mai la oia penei: Ke manao nei au e lilo oe i kane na'u, a o kaua pu ke hele ma kau huakai makaikai, kulou iho la o Lonokaiolohia a liuliu olelo aku la i ua wahine nei penei: X Mai pono kau olelo i na o ko'u alanui hoi mai keia, aole, eia hoi au ke hele nei i ka loa, ka laula o ka'u huakai. Eia nae ka,u kauoha ia oe, e hoi oe i kou wahi i hele mai nei; a owau, e hele no hoi au i ka'u huakai, a hoi mai au, alaila, hele kaua. Ia wa, olelo hou mai la ua wahine nei penei: Ka, hoi hou aku auanei au a ike mai kuu haku ia'u i kuu hoi aku, pepehi mai kela ia'u. No ka mea, ua hoonoho ia au maanei he kiai no keia wahi. Ninau aku la o Lonokaiolohia, owai kou haku? O Hinakeka; ka Pimoe alii ia a o makou na kiai o keia wahi i hoonoho ia ai. A i na ua make mai nei ia oe la, o ka pau ae la no ia o na kiai o ua haku nei o makou.
No ka mea ke ike aku nei au ia oe, he okoa loa kau mea hana, me he mea la o ka Kuwahailo mamo oe, no ka mea, ua lohe makou ia Pimoe i ka olelo o ka oi aku ia o ka mamo ikaika loa, nolaila, ke halialia wale mai la no ia'u, no ia hanauna mai oe.
Ia wa, olelo aku la o Lonokaiolohia, o hele, a ia hiki oe i kuu aina, alaila, kali mai oe ia'u a hiki aku au, alaila, manao ae oe owau kau kane.
Eia nae ka'u kauoha ia oe, e hele oe a hiki aku ilaila, noho oe me ka hewa ole a hiki aku au. Aka, i loaa ia oe ka hewa, mai manao mai oe owau kau kane, nolaila e hele oe, a e hole no hoi au a o ko iala kaha aku la no ia hele ana.
O Waka hoi, hele mai la no ia ma kana huakai imi aina, no ka mea, aole e hiki hou iaia ke hoi hou i kona wahi i hele mai ai.
E na makamaka, e waiho kakou ia Lonokaiolohia ma kona alahele, a e nana ae kakou i ka Waka alanui e hele nei. Ua hele auwana mai o Waka me ka maopopo ole iaia o ko Lonokaiolo- wahi i hele aku ai, aka, ua hoomau mai no kela i ka hele ana imua a hiki i kona ike ana i a Oahu nei, a pae i uka o ka ainaa a hookamaaina keia ma Laiewai.