Ka Nupepa Kuokoa, Volume XXI, Number 44, 4 Nowemapa 1882 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

 

HAAWINA KULA SABATI.

HELU 8, SABATI.  NOV. 19.

Kumuhana Iesu, hona hoomaewaewaia me ke

kaukiaia au ma ke kea  Paku Baibala

Mar. 15;16 - 26

  16  Alakai ae la ka poe koa iaia i ke keena hookolokolo: a hooluulu mai la lakou i ka poe koa a pau.

  17  Hoaahu iho ialakou iaia i ke kapa ula a lili iho la i lei alii kakalaioa a hoolei aku la iaia.

  18  Aloha hoomaewaewa aku la lakou iaia, Aloha oe, e ke aloo o ka poe Iudaio!

  19  Hahau aku la lakou i kona poo ika laau, a kuhakuha aku la iaia, a kukuli iho la e hoomana iaia.

  20  A pau la lakou hoomaewaewa ana iaia, alaila, wehe ae la lakou i ke kapa ula, a hooheanu iho la i kona kapa, alakai aku la lakou iaia e kau iaia ma ke kea.

  21  A koi aku la lakou i kekahi Simona no Kurenaio, e lawe i kona kea, e hele ana ia, mai ke kuaaina mai, o ka makuakane hoi ia o Alekanedero a me Rupo.

  22  A lawe ae la lakou iaia i Golegota, o ke ano keia i ka hoakaka ana, He wahi iwipoo.

  23  Haawi aku la lakou iaia i ka waina ua wili pu ia me ka mura, aole nae ia i inu.

  24  A kau aku la lakou iaia ma ke kea, alaila, puunane iho la lakou i kona kapa, me ka pau ana ma kela mea a keia kanaka e lawe ai.

  25  I ke kolu o ka hora, ko lakou kau ana iaia ma ke kea.

  26  Eia ka palapala hoakaka i kona hewa i kauia maluna, O KE ALII O KA POE IUPAIO.

  Pauku Gula.  Hal.  22:16.

  Manao nui.  Ka hewa o keia ao, ua hoikeia ma ka hoomaewaewa ana, me ke kau ana ia Iesu ma ke kea.

  Na heluhelu la.  1.  Mar.  15:16 - 26.  2.  Mat.  27:22 - 37.  3.  Luka  23:26 - 39  4.  Io.  19:1 - 22.  5.  Hal.  2:1 - 12.  6.  Heb.  2:1 - 18.  7.  Io.  5:14 - 36.

  Ka manawa.  Poalima, la 7 o Aperila, mawaena o ka hora 9 kakahiaka a awakea.

  Kahi i hana'i.  Ka hale o Herode, me Golegola.

  Mele.  "Malu ia Ieshu,"  Hoku Ao Nani,  p 48.

  Pule i holo iloko o Iesu a maluhia.

 

KA  WEHEWEHE  ME  KA  NINAU  ANA.

  Ma ka Helu 7, ua hahauia Iesu e na kauwa a Pilato, a haawiia aku i na koa e lawe a kau aku ma ke kea.  Ua hoolahaia keia hoahewaia ana  ma kahi akea mawaho o kahi hookolokolo.  Aole nae i lawe koke aku na koa ia Iesu i kahi e kaulia ai ma ke kea.  Aka, ua lawe lakou iaia iloko o ka pa o ka hale hookolokolo i hoomaewaewaia.

 

Elua  Mahele.

  I.  Ka hoomaewaewaia ana o Iesu, P 16 - 19.

  P 16.  Alakai na koa ia Iesu ihea?  A aha i na koa a pau?  No Roma na koa.  He poe aloha ole, a maa i ka hana ino ana.  Ua hahau ino ia Iesu.  Oiai e kahe ana ke koko, alakai no koa iaia i kahi  e hoomaewaewa ia ai.

  P 17.  Aha lakou i ke kapa ula?  A hili i lei aha?  A aha ia lei?  Aloha ole!  He mea hoeha loa na kakalaoia, e like me na kui pine.

  P  18.  A aloha aha lakou iaia?  Aloha oe, ke Lii o na Iudaio!  He oiaio no ia, Iesu ke Lii o na Iudaio.  Ala, ma ko lakou waha, he aloha hoomaewaewa ia.

  P  19.  Aha lakou i ko Iesu poo?  A aha hoi iaia?  A kukuli a aha iaia?  He mau hana maewaewa hoomainoino.  Ahonui Iesu.  Aole ekemu.  Aole hana ino aku.  Aole kauoha i ahi mai ka lani e hoopau koke ia lakou.

  Ehaeha ka naau o Pilato.  Paa ka makemake hookuu aku ia Iesu.  Ia lakou e hoomaewaewa ana iaia, ua aha Pilato?  Io.  19:45.  A pane lakou pehea?  Me e ka manao ino, menemene ole!

  II.  Ke kau ana ia Iesu ma ke kea, P  20 -26.

  P  20.  A pau ko lakou hoomaewaewa ana, aha lakou i ke kapa ula?  Wehe aku a hookomo i ke kapa hea?  A alakai aku iaia ihea?  E aha?  Ua hiki mai kona manawa e make ai.  Hiki iaia ke hoohemo i na kaula, a holo mai ia lakou aku.  Hiki ke hooholo i na lima, i na wawae a hoomakapo ia lakou.  Hiki ke hoohamama i ka honua a poholo lakou ilalo.  Aka, ua hele mai oia e make no keia ao.  Ua hiki mai ka hora.  Aole oia i makau.  Aole pale i ka make.

  P  21.  Owai ka lakou i koi ai e lawe i ke kea?  He mea haumaha loa ke  kea.  He laau oolea a koikoi.  Ua hoonawwaliwali ia ke kino o Iesu ma ka hina ana, ma ka hoopaa ia i ke kaula welau ooi hookahe koko.  Hiki ole iaia, oia hookahi wale no ke halihali i ke kea a pau.  Nolaila, ua kau kekahi hapa o ke kea maluna o Iesu, o kekahi hapa maluna o Simona.  No hea keia kanaka?  Kusenaio, he kulanakauhale ia no Aferika Akau.  Ua hele paha Simona i Ierusalema no ka ahaaina berena hu ole.  O kona mau makua, ua lilo laua mahope, i mau haumanana Iesu; wahi a ka moolelo ekalesia.  O ka hapa mama ka Simona i hali ai.  Maluna  o Iesu ka hapa kaumaha.  No kekahi mau mea e ae, e nana Luka  23:27 - 31, 32.

  P  22.  Lawe lakou ia Iesu i hea?  Golegota, he wahi iwipoo.  Kalevari kekahi inoa.  Aia ia ma ke komohana mawaho o ka puka o ka pa.  Nana Heb.  13:12,  Io.  19:20, 41  Luk.  23:26. 

  P  23.  Heaha ka lakou i haawi aku ai ia Iesu e inu?  No ke aha?  Io.  19:28, 29.  O keia inu, he mea hooluolu paha i ka eha.  Ua hoole Iesu, aole i inu.  Ina he mea hooluolu i ka eha, oia paha ke kumu o kona inu ole.  Aole kela i makemake e hoemiia kona eha ma ke kea.  E halihali i na eha a pau no kea aloha i na kanaka.

  P  24.  Aha lakou ia Iesu?  He lua i eliia no ke kea.  Ua hoopaaia ka lawehala ma na laau.  Ke ano o keia kea, penei:  +.  Makiaia  na lima me na wawae e na kui hao.  Alaila hoalaia ke kea, a hookomoia ke kumu iloko o ka lua.  Pehea lakou i ko Iesu kapa?  Hal.  22:18,  Io.  18:23 - 24.  He mea maa ia, o ka poe i make ma ke kea, e puunaue ia na lole mawaena o na koa, nana i kau ma ke kea.  Ua weheia ko Iesu aahu a pau loa.  Aohe wahi iki i koe e pili ana i kona kino.  Aia kona mau lole a pau malalo iho.  Lawe na koa eha, puunaue like i eha mau puu.  Aka, o ka lole komo i humuhumu ole ia, no wai ia?  Ma ke aha i maopopo ai?  Hal.  22:18,  Io.  19:24.

  P25.  Ka hora ehia i kau ai Iesu ma ke kea?  Hora ekolu, oia ko kakon hora 9 kakahiaka.

  P  26,  Heaha ka palapala a Pilato i kau ai maluna o ka hapa moe o ke kea?  Owai kai hoohalahala?  A pane Pilato pehea?  Io.  19L19 - 22.  Heluhelu.  Paa loa ko Pilato manao ma keia, aole hiki ke hoololi ia.  Maikai.

 

KA  HOOPILI  ANA.

  1  Na hewa, he mau mea ooi me na kakalaioa, me na kui hao e hou ai i ke poo, i na lima, i na wawae o Iesu.  Mai hoeha, mai kau hou ia Iesu ma ke kea ma ka hoomau ana i ka hewa.

  2  He hewa nui ka hoomaewaewa me ke kuamuamu.  Kuamuamu Isamaela.  Heaha ka hope?  Kuamuamu 42 keiki ia Elisai ke kaula.  Heaha ka hope?  Kuamuamu na koa ia Iesu?  Heaha ka hope? Ina kuamuamuia oukou, heaha ka pono?  Nana I Petero,  2.21 - 25.

  3.  E kokua kekahi i kekahi i ka halihali ana i ke kea o Iesu.  i na mea kaumaha no ka Haku.

  4  Lua ole ke aloha o Iesu.  Eha kona poo i ka lei kakalaioa, i loaa ia kakou ka lei mae ole o ke ola.  Eha kona mau lima, kona mau wawae, i eha ole ko kakou mau lala i ke ahi pio ole.

  5  Iesu no ke Lii o na Iudaio, a o keia ao a pau.  E lilo kakou a pau i mau koa nona; a nana no e uku i ke ola mau loa ma ka lani.

  Mele.  "Iehova ka Hoolako,"  Hoku Ao Nani,  p 49.

  Pule i hoolakoia mai, etc.

  Haawina no Nov. 26, Mar.  15:27 - 37.

 

MOOKEKO  O  KA  AHAHUI

KULA  SABATI  O HAWAII

KOMOHANA.

  Halawai ka Ahahui Kula Sabati maloko o ka luakini o Sana Paulo ma Waipio, ma ka hora 4 P. M. o ka la 7 o Okatoba, 1882.

  Kohoia o Rev. S. C. Luhiau i Lunahoomalu, a o P. Kaaekuahiwi i Kakauolelo.

  Nolia mai e kapaeia na rula.  Aponoia.

  Noiia mai e lilo na hoa kupono a pau i mau hoa kuka no ka aha.   Aponoia.

  Hapaiia ka Hoike o na Kahu Kula Sabati nui.

  Heluhelu o W. A. Mio no na Kula Sabati o na Hamakua a me na Kohala.  Aponoia.

  Heluhelu ke Kakauolelo i na Hoike o na Kahu Kula Sabati Nui o na Kona, no J. G. Hoapili me C. W. P. Kaeo.  Aponoia.

 

Kula Sabati.                         Kahu.                            Elele.

Hamakua h.                            -                                     -

Hamakua w.,              J. W. Waipuilani,             R. P. Kuikahi

Hamakua k.,               J. W.  Kaumelelau,               J. P. Leahi

Waimea,                                -                              M. Kaholoaa

Kohala A.,                             -                                    J. Kekipi

Kohala K.,                             -                               S. C. Luhiau

Kohala He.,                           -                                     Mr. Kiki

Kekaha,                                 -                                  Mr. Paiwa

Kailua me Helani,                 -                            T. N. Simeona

Kona waena,                         -                                       -

Kealakekua,                          -                                     J. Waiau

Pukaana,                               -                                     J. Waiau

Kaohe,                                   -                                     J. Waiau

Milolii,                                  -                                     J. Waiau

Waiohinu, Kau,        (He neo mau no.)

  Hapaiia ka Hoike o na Kahu.

  Heluhelu ke Kakauolelo no ke Kula Sabati o Paauhau, Hamakua Hikina.

  J. H. Waipuilani no Hamakua Waena.

  G. P. Kaonohimaka no Kekaha.

  No Kailua, hoike o D. Kahao, na ke Kakauolelo i heluhelu me ka hoike o Pukaana, o T. K. Robata ke Kahu Kula Sabati.  Ua aponoia na hoike a na Kahu.

 

 

HOIKE  O  NA  ELELE  O  NA  KULA  SABATI.

  Hoike waha mai o R. P. Kuikahi no ke Kula Sabati o Kukuihaele ma Hamakua Waena.

  J. P. Leahi no na Kula Sabati o Waimanu me Waipio.

  Mr. Kaholoaa, no Waimea.

  J. Kekipi no ka Hoike o ke Kula Sabati o Kohala Akau.

  Hoike waha mai o Kiki no Puako, aole malamaia ke Kula Sabati malaila.

  Hoike mai o Luhiau, ua malamaia na Kula Sabati ma Kawaihae-kai me Kawaihae-uka, au ikaika loa ia kula.

  Hoike waha mai o Paiwa no na Kula Sabati o Kekaha, a pela no o T. N. Simeoina no na Kula Sabati o Kailua me Helani.

  Hoike waha mai no hoi o Moolau no ke Kula Sabati o Kona Waiau.

  Na Waiau i hoike mai no na Kula Sabati mai Kealakekua a hike i Milolii.  Ua aponoia.

  Ma ke ano nui o na hoike o na Kahu Kula Sabati me na Elele, ua mau no ka nee ana o na Kula Sabati imua.

  Noiia mai e hoopanee keia aha a halawai hou ma kahi e noho ai ka Ahahui Euanelio o Hawaii Komohana.  ma ka malama o Maraki, 1883.  Aponoia.

  Hooholoia e hoouna ia ka moolelo o ka Aha ma na nupepa elua, KUOKOA me Pae Aina.

  Hookuuia ka Aha me ka pule.

P.  KAAEKUAHIWI,

                             Kakauolelo o ka Ahahui K. S.

 

NU  HOU  MA  KIPAHULU.

  Mai a Haawinaaupo mai, kekahi ohua mai Kipahulu mai maluna o ka mokuahi Lehua i ke ahiahi o ka Poalima i hala, ua hoike mai oia i keia lono malalo iho, a he mau hunahuna mea hou makamaka loa no Kipahulu, penei:

  Ma ka Poalua o kela pule aku nei, ua hooulu hoohaunaele ae la na paahahana Kilibati o ka hui mahiko o Kalaka Ma, ma Kipahulu.  O ke kumu i ala mai ai na hoohaunaele ana, oia no ka hoopukaia ana o kekahi mau olelo maikai ole e kekahi wahine kanaka, a ma ia hoopuka ana a keia wahine ke kumu i ala mai ai keia haunaele; a penei na kumu:

  Ma ke ahiahi o ua la 'la, hele aku nei keia wahine me kana kane ma kahi e auau ai na paahana a o kahi hoi ia e hoopauia ai ka lepo o ke kino.  I ka wa a laua i hiki aku ai malaila, olelo aku la ka wahine i ke kane, "E, e auau mua kaua mamua o ka hiki ana mai o ka pu-a kao (Kilibati), a lepo e ka wai ia lakou."  I keia wa i hoopuka ai keia wahine i keia mau olelo, aia malaila he mau wahine Kilibati, a i ko laua wa i lohe ai i keia mau olelo, holo koke aku la laua e hahai i ka nui iho o lakou, a puhee nui mai la lakou ma kahi a keia wahine me kana kane e noho ana.

  Aole he mau olelo i kamailio ia e ka poe Kilibati, a ia wa no ko lakou lele nui mai la no ia e pepehi i keia wahine me kana kane.  O na wahine lele aku la lakou e pepehi i ka wahine, a o na kane hoi lele aku la e pepehi i ke kane.  Pepehiia iho la keia mau mea a aneane laua e make, a mai make no paha, e ole ka ike ana o ko lakou Luna Nui, a holo mai la oia e kokua.

  Elua, ekolu Kilibati, pukui ia ae la na poo i kahi hookahi, peku i ke kamaa, pau alu ana i ka holo.  pela kana haua a pau ae la ka uluaoa.

  Hoopii keia mau mea a pau iho la keia poe i ka hoopaiia.  Koiia lakou e hoi hou i ka hana ma ka mahiko, aole he ae o keia poe, a ma keia hoi hou ana mai a Lehua e pau mai ana lakou i ka laweia mai ianei.  Ilaila aku nei o Binamu kahi i hooponopono ai no keia mea.

 

 

LETA  A  REV.  J.  KEKELA.

PUAMAU,   Aug.  7,  1882.

  Aloha nui oe me kou ohana a pau.

  Ua hiki mai kau leta o Iune 5 inehinei, a ua ike i na mea a pau.  Nui ka hauoli i ka loaa mai o kau leta ia'u, a ike i na hana kupaianaha a ka Haku ma Hawaii, i kona hoohuli ana i kekahi poe hewa mai ko lakou aoao hewa mai, a i ka pono o Kristo.

  E hoomaikaiia ka inoa o ka Haku ma kana mau hana a pau.  Ua kakau au ia oe i leta ma ka malama i hala, mamua ae o ka hiki ana mai o ka moku mai Kaleponi mai.

  A e palapala hou no au ia oe i keia manawa.  He lono kaumaha kai hiki mai ia maua o Naomi, i ka hora 8 o keia po, mai Atuona mai, e hai ana ka elele, ua make o Mrs. Hana Hapuku, ka wahine a Z. Hapaku, e kauoha ana ia maua e hele aku e ike i ka mea i make, a e launa hoi me Hapuku, ka mea i hooneleia i ke koolua ole.

  Eia ka laua kaikamahine me maua kahi i noho ai, no ka mea, eia ke kula leo Farani no ko kakou aoao ma Puamau nei.  Ua noho ka laua kaikamahine ma Uapou me ka maua mau keiki eha, malalo o ke ao ana a Samuela Kekela me kekahi wahine mai Tahiti mai, ma ka la 28 o Mei, 1882.

  Ua haele aku o Samuela Kekela me kana wahine e noho ma Taiohae, ma ka malama o Iulai, e lawelawe ma ka halekuai no ka Hui o John Hart & Co.  Ua hooholo na Agena o ka hui, e noho ia ma ia hana no hookahi makahiki e hoao, no $400 o ka makahiki.  A ina ikea kona maikai ma kana mau hana, e noho hou aku a e pii ae no kona uku.

  He maikai ko'u ola kino, a pela no hoi me Naomi, a me ka maua mau kaikamahine: elua a maua mau keiki i doe, aia me S. Kauwealoha ma, e hoi mai ana i keia mau la aku.  He maikai hoi ke ola kino o ke ola kino o ke kumu hou.  Rev. A. Sarran.  Ke lawelawe nui nei oia ma ka oihana ao kula keo Farani.  Ehia ae nei mahina i hala kona ao ana.  Ua loaa mai kahi mau haumana wae mai na wahi e mai.  Ke manaolana nei makou e loaa mai ana kahi mau haumana makaukau, a e hoonoho aku i mau kumu ma na wahi e aku, no ka manawa mahope.

  Ke hoouna aku nei au ia oe he papa inoa o na haumana kula i keia manawa.  He mau kula liilii no kekahi me na kumu kokua.  Aia ma Fatuiwa he kumu ao kula me kana wahine.  Kimo, he kanaka Hawaii, ma Tahuata.  Kaiawa me kana wahine Nuuhiwa, mai Atuona aku laua.

  Ma Hiraoa nei.  Tiota no Hanaiapa me Hanatakuua kumuao, Hio no Taaoa, kumuao, no Atuona laua.   Honiae, i Hanamenu ia, o Huiputona i Hanapaaoa, kumuao, mai Puamau aku laua, ua hoi mai nae laua i Puamau i keia wa, no ka mai o Huiputona.

  I ka malama iho nei o Iulai, launa aku la au me ko Fatuiwa poe, a malama i mau halawai pule, a malama pu me lakou no ka ahaaina a ka Haku.  He nui ko lakou makemake e loaa i kumu hou mai Hawaii mai, e noho pu me lakou a e hanai ia lakou i ka berena o ke ole ma o Iesu la.  Owai la e hele ilaila?

  Owai la o na haumana o kou kula i aloha ia Kristo?  E hele a noho me kela poe ma Oomoa, Fatuiwa, oia no na wahi i hookumuia i ka pono o ka Haku ma keia Paeaina, he loihi do lakou kahea ana i misionari.  "E hele mai e kokua ia makou."  Ke kahea mai nei ko Tahuala poe i kumu no lakou.

  Pehea la o Kahoopai me kana wahine Rahela, oia no ko maua kaikamahine i hanauia ma Hivaoa nei?  e ninau ia laua i ka manao no ka Haku, a no ka hana misionari ma ko Nuuhiwa paeaina.  Ua elemakule au me Kauwealoha.  Ua lawe aku ka Haku ia Hana Hapuku.  Aloha ino keia hoa paahana maikai no ka hana a ka Haku.  "Pomaikai ka poe make iloko o ka Haku."  He kristiano oiaio no ia, a ua mahalo nuiia e na kanaka o ka aina.  Ke ehaeha nei ko maua naau nona.

  O keia kumu ao leo Farani, he kokua maikai loa ia no ka hana misionari a ka Haku ma keia paeaina o Nuuhiwa nei.

  Owau no, kou hoa kristiano, polole ka wa ke hele no Atuona e ike ia Hapuku wahine.

J.  KEKELA.

 

NA  MEA  HOU  O  HILO.

E  KA  NUPEPA  KUOKOA;  Aloha Oe: -

  He wahi ukana ka'u e hooili aku nei ia oe, a nau hoi ia e hoaiai ae ma na kihi eha o keia mau paemoku.

  He nui ka mai e laha nei ma Hilo nei i keia mau la, oia ka mai hi koko, ke laha nui nei ia anoano ino ma kela wahi keia wahi, pau o na kane, na wahine me na keiki pu.  He keu keia o ka mai ikaika, me ka malama loa e pono ai.

  Ua haalele mai i keia ola ana, ma ka la 11 - o keia mahina, o Mr. Hehena.  He mai hi koko kona i make ai.  aloha wale ia.

  No ka Ahahui Opiopio. - Ua hoala ae nei makou i Ahahui Opiopio ma Onomea, ma na la mua o keoa mahina.  Ke ala nui mai nei na kane me na wahine e lawelawe i keia hana maikai, oia ke pale ana aku i na mea ino, oia ka waiona, malalo o ke alakai ana o Rev. J. H. Pahio me D. Kamai.  O laua no na poo o keia ahahui, o makou aku malalo o na hoahanau, e lawelawe pu ana i keia hana maikai.  He kumu ia e alakai aku ana i loaa ka noho'na kristiano oiaio.  He nui ka mahalo o ka mea e kakau nei i ka loaa ana o keia hana maikai ma Onomea nei.

  Nolaila, ke poloai aku nei au i na wahi koe aole i loaa keia haawina, e huli i loaa, a kau i kaupoku o Hanalei.

  Ua lawa ae la au maanei.  No ka Luna Hooponopono ko'u welina, a me na keiki ulele hua metala ka welina pau ole.                                       J.  B.  M.  KAPULE.

  Aleamai,  Hilo,  Okatoba  26,  1882.

 

PO   POAKAHI  OCT.  23,  1882.

  Ua weheia he halawai makaainana ma ka luakini o Kawaiahao, malalo o ke alakai ana a J. U. Kawainui Luna Hoomalu, a me Hon. G. W. Pilipo ka Haiolelo, o B. W. Kawainui ke Kakauolelo; a mailoko mai o ka haiolelo ana a G. W. Pilipo ua loaa mai he olelo hooholo maikai e noi ana i ka Moi e hoopau i keia Aha Kuhina.

  O ke anaina i akoakoa mai ua maluhia a hiki wale i ka wa i laweia mai ai ka olelo hooholo i kumuhana.  Eia ka mea lea; i ka hoolohe aku i na kalai olelo ana a kekahi poe kakaikahi opu aloha ole, ma ko'u noonoo, a hooholo iho  o ke koena mai keia o ka poe o Herode, no ka mea, o ka pilikia, ua ike ka elemakule e noho ana ma kae kapuahi, a ua kani ke-u, o keia poe kino maikai nae e manao ia aku ai he mau naau aloha ko loko o lakou, eia nae ua ku mai kela a me keia ai loaa o keia Aha Kuhina a akiaki i ka olelo hooholo naauao, me ka i iho paha o loko; ka, pau paha auanei kuu Kuhina, ka pau no paha auanei ia o ka noho wale ana, maka'u ino i ka hana poola; kal e aho ka hooikaika e hoopau i keia olelo hooholo.  Ea e ka poe a pau i hoao e hohiolo i ka ihiihi a me ka maluhia o ka halawai makaainana ma ka po Poakahi iho nei, hilahila ole oukou, e aho na ka poe paaua e hana ia ano hana, aole na oukou na ka poe i kau i ke Aki.  Ke hooki nei ka'u makapeni maanei no ka manawa pokole, a kulapa mai oukou, loaa oukou i ka pehi welawela a ka Wai Apo a ka makasila.

J.  NALUA.

 

 

KE  DEREGONA  ULAULA.

HELU  2.

  Ma ka helu i ua haiia'ku ke ano o keia Deragona Ulaula i hoopaaia mamua, ai i hookuuia i keia wa.  Aole i hai ia aku kona ano apau.  Ma kekahi mau mea, ua like ia me ke Deragonama Hoikeana 12:3, 4.

  Ehiku ona poo, he umi ona pepeiao hao, ehiku lei alii.  Huki mai la kona huelo i ka hapakolu o na hoku o ka lani, a kiola iho la ia lakou i lalo i ka honua.

Ma ka hoopili ana.

  He holoholona weliweli loa no keia.

  Na ke aupuni ia i hookuu ae e holo iwaena o keia lahui.  Ehiku ona poo.

  Oia paha na moku kanaka ehiku, Hawaii, Oahu, Maui, Kauai, Molokai, Lanai, Niihau.  Aoie paha he kanaka ma Kahoolawe.

   Na pepeiaohao he 10, oia paha na mahele nui oia mau moku.  Na Le Alii 7, oia paha na Kiaaina, na Kuhina paha.

  Ka hapakolu o na hoku, oia paha ka hapakolu o na luna, a me na kanaka o keia aupuni.

  Heaha la ka huelo?  oia paha ka laikini.  Aia a loaa na laikini, alaila, hiki i keia Deragona ke hoohei, lalau, a huki i na hoku ilalo.  Aole piha kona makemake i ka hapakolu wale no.  He holoholona makee loa keia: o kona makemake nui e huki a kiola i na hapakolu o na hoku ilalo.  E like me ke Poo o ka hoomana Katolika, aia a huli keia ao apau mamuli o ka Pope, alaila ua lawa kona makemake.

  Hawaii ke ike nei oe i ka hoku welowelo e kau ana ma ka lani i keie mau hebedoma.  He hoailna ia no ke aha?

  No keia Deragona Ulaula me kona huelo loihi e hoao ana e huki i kou mau hoku ilalo.  Aole anei oe e minamina ana i kou mau hoku, i na 'lii, i na luna, i na ui, i na keiki, i na ekalesia, i na kahu, i na kula?

  I na ua minamina, mai kokua i ka huki ana ia lakou ilalo ma ke noi ana i mau laikini e huki ai.  Mai haawi i kou mau dala pakausani i loaa ia mau laikini.

  A i maalo oe, a ike he hoailona e kau ana mawaho o kekahi hale, e kahea ana ia oe e komo maloko e kuai wahi kiaha rama, kiaha waina, kiaha wiseki, kiaha bia, mai komo oe, e waiho ia hale me kona hoailona, a maloo i ka la, a popo, a hina wale i lalo.  Mai haawi i kekahi kenikeni i ka ona.  E imi ana oia e hoohina ia oe.  E huki ia oe ilalo.

  Pela no ia poe apau e haawi ana, e kuai ana i ka waiona ia oe.  E imi ana lakou e hoilihune ia oe, e hoopau i kou waiwai, i kou mau hale, i kou mau holoholona, i kau mau keiki, e hana ino i kou kino a i kou uhane.

  E ke Aupuni o Hawaii; ke manao nei anei oe, e laki ana oe no na kausani dala e komo ana iloko o kou opu no na dute o na mea ona, a no na laikini i haawiia no ke kuai ana ia mau mea ona?

  He mau dala aha ia?  Mahea ka lua i hooheheeia'i?  Aia no ia ma Gehena.

  Ua hanaia a wela a enaena.  Ua kahakahaia ma kekahi aoao, ke kii o ka Deragona ulaula me kona huelo loihi.

  A o Gehena ma kekahi aoao.

  Oct.  1,  1882.  He dala aai keia me he ahi'la i kou loko, a e lilo auanei ia i mea e make ai oe ke oluolu oe e hopu a hoopaa hou i ua Deragona ulaula nei, a e hookapu loa i kona komo mai iloko ou.

 

 

 

KENELA  COMLY  MA  KONA  HOME.

  Ma na lono hope mai nei maluna o ka mokuahi Kulanakauhale o Nu Ioka i ka la Sabati nei, ua loaa mai na lono e pili ana no Kenela Comly, ke Kunina noho mua iho nei o Amerika Huipuia ma Hawaii nei, kona hiki ana ma kona home ma Ohio, a me na hoohanohano ana a ka Ahahui "Curtis Club,"  oiai o Kenela Gomly no kekahi lala oia hui.

  Ma kona la i hoea aku ai ma Ohio, ua hoholaia mai na hoonanohano lehulehu a me na hoomaikai ana imua ona e ka Ahahui a me na hoa'loha lehulehu, a ua haawiia no hoi he paina hoohanohano nona e ka Ahahui.  Ma ia ahaaina, ua haawiia he haiolelo e ka Peresidena o ka Ahahui; a penei kana mau mamala olelo pokole:

  "E Kenela Comly, ua hookauia na hiona hauoli maluna o'u ma keia ahiahi, ma ka hoike ana aku imua ou i ke aloha a me ka hauoli o na makaainana o kou one hanau nei, a me na lala a pau o ka Ahanui.

  "Oiai ia oe e noho ana ma kela Aupuni Komohana ma ke ano o ke Aupuni o Amerika Huipuia, a oiai ke ike mau ia nei na kukuna olinolino nani o ia aupuni oiai oia iwaena o ka moana Pakipila, o makou a pau loa maanei ua mau no ko makou hoomanao ana nou mana launa oluolu ana o keia ano, a ua manao mau no makou o oe no ka mea nana e hookiekie ae i ka inoa o ko kakou mokuaina nei oiai oe ma na wahi a pau e hoounaia aku ai e ke Aupuni.

  "A ana, ke kono aku nei au ia oe e launa oluolu iho iwaena o kou mau hoa'loha lehulehu i akoakoa mai imua ou i keia ahiahi."

  Ua pane aku o Kenela Comly me ka haawi ana aku i kona mahalo piha no na hoohanohano i waihoia mai imua ona.

 

NUHOU  O  NA  AINA  E.

  Ua hoike ae kekahi Kuhina Noho o Aigupita i kona manao.  aole ka oia e noho Kuhina hou no Aigupita a me kona mau hoa, ke ole e hookolokoloia o Arabi Pasha a me kekahi mau alakai e ae i kokua iaia ma ke kekahi mau alakai e ae i kokua iaia ma ke kaua kipi.  Ua manao paa keia Kuhina na Arabi no i haawi malu aku i kekahi kauoha e puhi ia ke kulanakauhale o Cairo i ke ahi.

  O ka la 23 iho nei o kela mahina kona la i hookolokoloia ai.  Ua olelo paa oia ua hiki no iaia ke pale iaia iho imua o ka aha hookolokolo Enelani.

  Ua hoopukaia kekahi palapala.  e kuahaua ana i na Kanikela a me na Luna Aupuni a pau o Enelani e noho mana ana ma Aigupita, e hoike ae lakou i na inoa a me ka nui o ka poe i komo ma ke kaua kipi e noho ana ma na kulanakauhale kahi a lakou e noho mana ana: ua kauoha hou ia no ma ua palapala la e hakilo makaala ia na kauoha a ke Aliikui, oia hoi ke kauoha e malama pono ia ua poe pio la.

  Ua hoikeia ae he lono, ua hoole aku nei na poo mana aupuni e noho mana la ma ke Alawai o Sueza, i ka poe a pau i kokua i ka puali koa Enelani, ma keia kaua ana mai nei, a o keia poe i hooleia oia no na paahana e hana ana ma ua alawai la.  O ka hopena o keia, ua nui ka poe i nele i ka hana.  He mau hana hoomauhala keia a keia poe a e ake ana lakou e hoohoka ia Enelani a me ke aupuni pu, ma o ko laua mau makaainana.

  Ke manao wale ia nei ua loaa he kumu kupono e maikai ia ka noho'na mawaena o Enelani a me Farani no na mea e pili ana no Aigupita.

  O na hoili kaua kipikipi mawaena o Peru a me Kile i keia wa, ua ikeia aku ka hahana a me ka wela o na hoili kaua ana mawaena o laua.  Mai ka 8,000 a hiki i ka 10,000 koa o Kile malalo o ka alakai ana a kekahi Kenela akamai o Kile.  He hakaka nui keia e ikeia nei mawaena o laua i keia wa.  He kaua hoomauhala keia.

  O ka Peresidena o Peru i keia wa, aia ma Aiguripa i keia wa kahi i hoouluulu ai i puali kaua nui no ke kue ana aku i ka puali koa Kile.  I kokuaia e kekahi Kenela o Cariho kona inoa.  O Carese, kekahi o na Peresidena mua iho nei o Peru, aia oia ma kahi he 30 mile ka mamao mai ke kulanakauhale o Lima ma ka akau, i kokuaia e kekahi o kona mau hoaloha ponoi kakaikahi, no ka hoala ana i kekahi puali koa hui ma ia wahi, a ua papa aku no hoi oia i ka hoomauia ana o na hana kalepa piepii ele na ia wahi.  Ke manaolana nei e pau koke ana keia ano hana kuee mawaena o keia mau aupuni a e hanaia no hoi na kuikahi lokahi mawaena o keia mau aupuni.

  He keu keia a ke kaua kipi loihi mawaena o keia mau aupuni a o ka wa hea la e pau ai aole i maopopo pono O ka lanakila o kahi a pio kekahi oia auanei ka panina hope o ka laua mau hana.

  Ua loaa mai nei i na koa kumau o Farani he mau mea hoopa-hu (dynamite), he 15 ka nui, ua hunaia ma kahi kokoke i kekahi halekula nui a ua ho-a ia ka uiki.  O ka loaa aku no hoi koe o ka mea hoopa-hu, loaa e a kinai ia a pio.  No keia kumu ua hoonoho kiai ia he 1,000 koa ma kahi e pili kokoke ana i keia halekula.

  O ke kukui uwila, oia kekahi maunu maikai loa e loaa nui ai na i-a.  Ua hana nui loa ia keia mea mawaena o na kanaka lawaia o Farani mamuli o ka ae ana o ke Aupuni.  Ua hookomoia ua kukui uwila la iloko o kekahi aniani nui poepoe a hookuuia iloko o ke kai, a no ka olinolino loa o kona mau kukuna, oia ka mea e mumulu nui mai ai na tausani i-a, alaila, hookuuia iho la ka upena, oia puuluulu nui no ia la noho ana iloko.

 

AMERIKA  HUI.

  O ka poe ona aina ma Long Branch, Nu Ioka, ke hana nei lakou i keia wa he pa paa loa me kae o ko lakou mau aina e pili ana i ke kai, oiai i keia wa ke komo loa mai la ke kai iloko o ka aina.

  O ka manawa holo loa no ka pahu loa i holo ia e na kaamahu, ua holo ia mai nei e kekahi kaamahu o na mokuaina komohana a o ka hui hooholo kaamahu o Burlington: ua holo ia e keia kaa he 59 mile i ka hora.

 

  He 7 la holo o ka mokuahi Kulanakauhale o Nu Ioka mai Kapalakiko a i Honolulu nei.  Ua laweia mai e ia he 40 ohua a oi o mua, me 64 tona ukana; no Honolulu nei kekahi mau ohua a no Kikane kekahi mau ohua.

 

  O na mahina ua mau keia o ka makahiki, a o na mahina ino no hoi keia.  Ua ikeia ka hikimua o na pakaua eloelo i ka la Sabati nei, a me ka Poakahi a me ka Poalua o keia pule.

 

NA HOOLAHA @

                    

                    PAPA! PAPA!

                           - NO -

               ALLEN & ROBINSON

           UA WEHE AE NEI MAUA I

                   PA KUAI PAPA

                           - MA -

              KA UWAPO O PAKAKA

        Na Papa Ulaula o na ano a pau.

        Na Papa Paina o na ano a pau.

                        Na Pili Hale Ulaula.

                        Na Pili Hale Keokeo.

       Na Pepa Hoonani Hale.

       Na Pepa Molina.

 

      Na Pena a me na Aila Pena

    NA KUI O NA ANO A PAU.

 

NA PANI PUKA a me

NA PANI PUKA ANIANI.

                   NA PANI PUKA a me

                   NA OLEPELEPE.

 

NA LAKO KUKULU HALE

      O NA ANO A PAU!

       E KUAIIA MA KE

KE KMUKUAI HAAHAA LOA

         O keia Makeke.

 

PAPA!  PAPA!

AIA  MA  KAHI

LEWERS  &  COOKE

(O  LUI  MA.)

ma ke kaua kahiko makahiko ma

E loaa ai na

PAPA  NOUAIKI     

o kela a me keia ano

Na Pani Puka, Na Puka Aniani, Na Olepelepe.

Na Pou, Na O-a. Na Papa Hele, Na Papa Ku

A me na Papa Moe nui loa

Na Pili o na Hale o na Ano a Pau

Na Pepa Hoonani, Na pena o na Wai a pau,

Na Kui mai ke Nui a ka Makalii, Na Ami

Puka, Na Ami Puka Aniani Na Ami he lehulehu wale,

o na ano a pau. Na Aila Hoomaloo,

Na Aila e ae o na ano a pau.

NA WAIVANIKI                   

- A ME NA -

WAI HOOHINUHINU NANI!

o na ano a pau loa.

NA  BALAKI  ANO.  NUI  WALE

A ke hai ia aku nei ka lono i na makamaka

pau, ua makaukau keia mau makamaka

o oukou e hoolawa aku ma

na mea a pau e pili ana,                 

ma ka laua oihana

 

      

- NO KA -

UKU HAAHAA LOA!

E like me ka mea e holo ana mawaena o

LAUA a me ka MEA KUAI.

E hele mai! E na Makamaka!

A e lawa no hoi ko oukou makemake

me ka oluolu a me ka maikai

845 tf

 

LOLE  MAKEPONO

Ke Kuike. e loaa no ia ma kahi o

KAKELA  ME  KUKE!

- E laa na -

AHINAHINA, KALAKOA, KEOKEO,

LEPONALO, PENA, AILA,

AILA HONUA, ANIANI.

NA  MEA  PIULA!              

Kopa,  Aila Hoomaloo, Kui Kakia,

Pakeke,Tabu, Kaula, Noho Lio, Hulu

Palaki, nu Pulumi, ahe agena no hoi

no na mokupuni o Hawaii

nei no na Lainakini-nao

Lainakini Maoli, Ki-lika, Palule                      

Kalakoa, Alapia, Kelepa, Na lole

kupono i ka wawae, Palule Huluhulu,

Na Lole Huluhulu, Na

ka hoohehelo ana

Lipini, Lihilihi, &c.              

LIPINE, HIHILIHI, &c.              

 - A ME NA -

Mikini Humuhumu

MAKEPONO LOA!              

a he mau

MEA AI KAHI

KA PALAOA, KOPAA,

RAIKI, PIA, HOOHU,                      

PAAKAI, HUAALA,

PIA KULINA, KOPE               

- A  HE -   

Laau Lapaau Kaulana Loa                         

A DR. JAYNE .                        

Laau Hoomaemae Koko,                        

Laau Hoopau Naio,                        

Penikila, Huaale                        

Laau Kono.

Me na Laau Hamo,  a Pela’ku      840  tf

PAPA  KUHIKUHI  MANAWA  HOLO

- O  KA -

Mokumahu  Hawaii.

"LIKELIKE."

Kapena  King,

AOLE  AIE  NO  NA  UKU  OHOA?

  Ke hooleia aku nei ka aie no ka uku @

a ke hoikeia aku nei i ke akea, ina he mau

paiki, ukana a puolo hooili ko lakou,  a pono

hoailonaia me ka  moakaka lea.  Aole no @

ia ka lawe ana i na ukana, paiki a @

hoailona ole ia ke ole e kakauia ka @

mai.

HE  KUIKE  KA UKU  UKANA.

  Ma na ukana a pau o na makamaka,  @

e uku mua ia.  A e hookoia no na k @

ka lawe a hiki i kahi i makemakeia.  A @

lamaia no me ka makaala na ukana. @

me na puolo lio, pipi a me ka hoku.

E  HOAILONAIA   ME   KA  MOAKAKA NA

PAHU RAMA A ME WAINA.

  O ka poe no lakou na ukana o kela  @

hoailonaia me ka moakaka, a i ole e  @

me ka moakaka ka loaa mai iloko o ka  @

hookahi.

  Aole e aeia na hookele kaa, na keiki @

me na mea like e pii iluna o ka mokuahi @

wa e pili mai ai i ka uapo, aia wale no a pau

na ohua eepakeke i ka lele.

  No ke ake nui e hoopomaikaiia ka lehulehu

kaahele, ua hoololi ae nei na Ona o Likelike i

ka Papa Hoike Manawa oia Mokuahi e like

me maluna.

Ma  Hale  Oihana  e  loaa  ai  na  Palapala.

  Aole Keena o hope e lilo, aia wale no a kaa

mua mai ka uku moku.  Aole e ili ka hewa no

na paiki, ukana a puolo, pahu ke hele ke

kakauia ka loaa aua mai  E hookaaia ka uku

ukana a oi aku.

                               WAILA  MA.     

.