Ka Nupepa Kuokoa, Volume XXI, Number 43, 28 October 1882 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

KA NUPEPA

KUOKOA ME KE AU OKOA

I Huiia.

 

No ka Makahiki ..... $2 00 

Eono Mahina .....  1 00

Dala Kuike ka Rula.

POAONO, OKATOBA 28, 1882.

Paiia a Thos. G. Thrum ma ka halepai o ka nupepa Saturday "Press."

NAUE AE.

(Onward go), Gospel Hymns iv, No. 29.

1

Me ke kookoo o Iesu,

Naue ae.  naue ae.

Kana olelo ia kookoo,

Naue ae-----------

Naue,  naue.

Hapai i ke kea e,

I ko Iesu kanawai,

Hali no a naue ae.

Naue ae-----------

Naue,  ae.

2

Eli, mahi, lulu no,

Naue ae.  naue ae.

Lulu, ohi, pua pu,

Naue ae-----------

Naue,  naue.

Hana me ke aloha e,

Aloha no a hilinai

Ma ko Ia la lima e,

Naue ae-----------

Naue,  ae.

3

Loaa anei na hua maikai?

Naue ae.  naue ae.

Lulu hou a ohi ae.  

Naue ae-----------

Naue,  naue.

Nana i kou Haku e,

Kiai no a noi ae,

Lohe Ia a haawi mai,

Naue ae-----------

Naue,  ae.

4

Ane anei e po ae?  

Naue ae.  naue ae.

Hana me ka ikaika e,

Naue ae-----------

Naue,  naue.

Iesu. oia kou waiwai,

Kou kookoo e pua mau ai,

Oia hoi kou Alakai,

Naue ae-----------

Naue,  ae.

Hawaii.

Haawina Kula Sabati.

HELU 7. SABATI, NOV. 12.

Kumuhana.  Iesu imua o Pilato.    Pauku Baibala.

Mar. 15;1--15.

A kakahiaka ae la, kukakuka koke iho la na kahuna nui, a me na lunakahiko, a me na kakauolelo, a me ka ahalunakanawai a pau, a nakiikii aku la ia Iesu, a kai ae la, a haawi aku la ia ia Pilato.

2  Ninau mai la o Pilato iaia, O oe no anei ke alii o ka poe Indaio?  Hai aku la ia, i aku la iaia, Oia no kau e olelo mai la.

3  Hoopii aku la na kahuna nui nona, ma na mea he nui loa ; aole ia i olelo mai.

4  Ninau hou mai la o Pilato iaia, i mai la, Aole anei oe e olelo iki mai ; E noonoo oe i ka nui loa o na mea a lakou e hoopii mai nei nou.

5  Aole i olelo iki mai o Iesu ; nolaila kahaha aku la ko Pilato naau.

6  Ia ahaaina, kuu mai la ia i kekahi paahao no lakou, i ka mae a lakou i noi aku ai.

7  Malaila no kekahi i kapaia o baraba, ua nakinaki pu ia me ka poe i kipikipi, ua pepehi kanaka lakou me ia kipikipi ana.

8  Hooho nui ae la na kanaka, me ka nonoi aku iaia e hana mai ia lakou e like me kana mamua.

9  Olelo mai la o Pilato ia lakou, i mai la, Ke makemake nei anei oukou e kuu aku au i ke alii o ka poe Iudaio, no oukou !

10  No ka mea, na ike oia, no ka huahua i hoopaa aku ai na kahuna nui iaia.

11  Hookonokono ae la na kahuna nui i na kanaka, i kuu mai oia ia Baraba no lakou.

12  Ninau hou mai la o Pilato, i mai la ia lakou, heaha ko oukou makemake e hana aku ai au i ka mea a oukou i kapa aku ai, O ke alii o ka poe Iudaio ?

13  Hea hou aku la lakou,  E  kau ia oia ma ke kea.

14  Alaila, ninau mai la o Pilato ia lakou, Heaha ka hewa ana i hana'i?  Uwauwa nui aku la lakou, E kauia oia ma ke kea.

15  Makemake no o Pilato, e hooluolu i kanaka, nolaila ia i kuu mai ai ia Baraba na lakou ; alaila, hahau ae la kela ia Iesu, a haawi iho iaia e kaulia'i ma ke kea.

Pauku Gula.  Isaia 5 3 3

Manao nui.  Na kela, na keia e hooholo i kana e hana'i ia Iesu.

Na heluhelu la.  [text unreadable]

Ka manawa, Kakahiaka o ka Poalua, la 7 o Aperila, A. D. 33, mawawaena o ka hora o me ka 9.

Kahi i hana'i.  Ierusalema.

Mele. "Aia no Iesu."  Hoku Ao Nani, p @ 

Pule i aia a hana no Iesu.

Ka wehewehe me ka Ninau ana.

Ekolu mahele.

1.  Ka hoopii ia o Iesu imua o Pilato @ @ @ 

P 1.  Ma ka aha hookolokolo o ka @ na hooholoia ua kupono @ @ o Iesu i ka make.  Aole nae @ @ aha ke hooko ia hooholo ana.  @ @ aha ka hiki ole ?  Ia wai ka ma@ @ @ Ia Pilato ke Kiaaina, no @ @ Nolaila, aha lakou ma ke kakahiaka nui?  Ua nakinakiia Iesu mamua, o keia nakinaki hou ana, he nakinaki oolea loa paha.  Aka hai loa Iesu.  Aohe ano huhu, ano kue aku ano aumeume a hoao e hemo na kaula i paa ai.  he poe aloha ole kona poe hoopii.  Ua hookoia ka wanana ma Isaia 53; 7  ; Heluhelu.  A alakai ia oia me ka paa imua owai?  Owai o Pilato?  No ke aha i alakaiia'i Iesu imua ona?

P 2.  Heaha ka ninau a Pilato ia Iesu?  No ke aha ia ninau?  Nana Luka 23:3.  A pane aku Iesu pehea?

P 3.  Pehea na kahuna nui no Iesu?  A aha Iesu?  No ke aha ko Iesu ekemu ole?  He mea ole kona pane ana nona iho.  Ua paa ko lakou manao, e make Iesu.  Makehewa ke pane aku, a imi e hoaponoiaia iho.

P 4., 5.  Pehea hoi Pilato?  Pane anei Iesu ia Pilato?  A aha Pilato no ko Iesu pane ole?

II.  Iesu paha, Baraba paha, p 6--11.

P 6.  Heaha keia ahaaina?  Heaha ka mea maa ma keia ahaaina no na paahao?

P 7.  Iesu kekahi paahao, owai kekahi paahao?  Heaha na hala o Baraba?  Heaha na hala o Iesu?  Aole ona hala.  I ko Pilato hookolokolo ana, aole i loaa kekahi hewa iki iloko o Iesu.

P 8.  Heaha ka nonoi ikaika ana o na kanaka?  E hookuu i kekahi paahao.

P 9, 10.  Heaha ka ninau o Pilato?  Kona makemake e hookuuia wai?  No ke aha ?  Ua akaka ia Pilato ke kumu o ko lakou huhu ia Iesu, me ko lakou huhu  ia Iesu, me ko lakou makemake e make Iesu.

P 11.  Aha na kahuna i na kanaka ?  Heaha ke ano o keia mau kahuna?  No ke diabolo paha lakou.

III.  Heaha ka'u e hana'i ia Iesu?  P 13--15.

P 13, 13.  Ko oukou makemake e hookuu au ia Baraba ka lawehala loa.  Ina pela, heaha ka'u e hana aku ai i ka mea a oukou i kapa'i, ke Lii o na Iudaio?  A pane lakou pehea?

P 14.  A ninau hou Pilato pehea?  A uwauwa nui lakou e aha?

P 15.  Ikaika ka manao o Pilato e hookuu ia Iesu.  Aku, ikaika loa ke noi ana o na kahuna nui e kaulia Iesu ma ke kea.  I mea e oluolu ai lakou a ae ia Pilato e hookuu ia Iesu, ua aha oia ia Iesu?  Ua ike oia aole hewa Iesu, hahau ino nae oia iaia.  No ke aha?  Paa loa nae ko lakou noi ana e kau ia Iesu ma ke kea.  Nolaila, ua aha Pilato?  Nana Mat. 27:24, 25.

Akaka ole ia Pilato ka mea ana e hana'i ia Iesu.  Makemake no e hookuu, maka'u nae.

Ka hoopili ana.

1  He palena ko ka mana o ke kanaka.  Makemake na Iudaio e pepehi ia Iesu.  Aole nae e hiki no ka mana ole.  Pela no i keia wa.  Makemake kekahi poe e hoopau i ka Baibala, e hoohiolo i ke Aupuni o Iesu, aole nae e hiki.  Ke ukiuki loa nei ka Pope no ka mana ole e hoopai ai i ka poe kue i koua aoao.

2  Ka huahua me ka lili na kumu o na hana ino he nui loa, na kumu e make ai na mea he nui wale.  E hoopau aku ia.

3  E akahai, e noho ekemu ole imua o na aha e hookolokolo kumu ole ana ia oe.

4  Heaha ka oukou e hana aku ai ia Iesu, e ka poe hoomaloka, manaoio ole?  Mahea oukou e lawe ai iaia a hoonalo aku?  Nana Hoik. 6:15--17.

5  Ka maka'u i ke kanaka he pahele ia e komo ai a make.  Mai maka'u i ke kanaka.  Mat. 10:28.

Mele, "Ka Momi Maikai,"  Hoku Ao Nani, p 24.

Pule i imi nui ia keia momi, &c.

Haawina no Nov 19.  Mar. 15;16--26.

NU HOU O HAIKU, MAUI.

E KA NUPEPA KUOKOA :  Aloha Oe :---

E oluolu kou lokomaikai e lawe aku i nei mau wahi mea hou:

Ua make he keikikane, i poholo i ka wai. oiai lakou e auau ana, a kaa aku i kahi hohonu a make loa ; he eono ka nui o kona makahiki.  Ua noho ke Koronero a ua hooholo i make no ke poholo ana i ka wai.

Ua pa-hu ia a moku ka lima o Kiekie k, e ka pauda, oiai oia e lawelawe ana e hoomake i na i-a.

Ua hanauia mai he mau mahoe kaikamahine, na Milaina me Namaka ma Maliko, i ka la 12 o keia mahina.

Ma ka la 13 ae, hanauia na Lilia me Hoopai he kaikamahine.

Aohe ike iki ia o ka ona rama ma o makou nei i nei mau la.

Ua poloke iho nei ka nihoniho o ka hale wiliko ma kahi kokoke i ka nau.

He am-u mau keia mau kakahiaka i na paka ua, aole hoi he papaa la.

J. P. HAULANI.

Haiku, Oct. 20, 1882.

HOIKE A KA PAPA KAHU WAIWAI

O KA HUI MAHIKO O

KA PAEAINA.

Ma ka hoike a ka Papa Kahu Waiwai o ka Hui Mahiko o ka Paeaina, ua manaoia e lakou aole he papa hoike ano nui ka lakou e hoike ana no na hana i hanaia, oiai lakou he mau mahina wale no ma ka oihana, aka, ua manao lakou e nana aku no keia mua e hiki mai ana a me ka hana e hana ia ai e ka Ahahui Mahiko.

He mea no ia e haohao ole ia ai e kekahi poe ke ike iho iloko o na mahina uuku i hala hope ae nei mai ka hookumuia ana o ka Ahahui, a me ke kohoia ana o keia Papa Kahu Waiwai, ko lakou noho palaka ole.  O na hana ano nui a pau i hanaia oia no na hana e pono ai ka Ahahui ma keia mua iho.

He elua mea ano nui i makemake loa ia ma na hui mahiko ; ka mua, o ka hoomauia o ke Kuikahi Panailike : ka lua o ka loaa o na paahana kupono.  Ua noonoo nui Papa Kahu Waiwai no keia mau kumuhana maluna.  Ke nele i na paahana kupono, alaila, ua lilo ke Kuikahi Panailike i mea ole.

Mawaena o kekahi o na hana nui i waihoia aku imua o ka Papa Kahu Waiwai, oia no ke kumuhana e noi aku imua o ka Ahaolelo e hookapu loa ia ka hookomo, ka hana, a me ka inu ana o ka waiona ma ka Paeaina nei.  Ua waihoia aku keia kumuhana imua o ka Ahaolelo, a ua imi ka Papa Kahu Waiwai i loio kupono nana e hana i bila kanawai e papa loa ana i ke kuu akea ana o ka waiona.  Aka, ma ka waihoia ana aku o ua bila la a me kekahi mau palapala hoopii e iho e pili ana no ia mea hookahi, ua kapae loa ia ka noonoo ia ana no ia mea e na lala o ka Ahaolelo, a hooholo aku la lakou he bila kanawai e hoonoa ana i ka waiona maluna o ka Paeaina.  Ua ikeia ka poino nui o keia mea o ka rama, aka, aole he manao nui ia o ia mea.

O kekahi mea ano nui ikeia ma na hana a ka Ahaolelo, oia no ko lakou hoolilo uhauha ana a hawawa, i alakaiia e kekahi poe e iho i loaa na kulana kiekie.  He poe naauao lakou, ua hoonaauao kupono ia, aka, ma ka lakou hana, ua hoikeia, ua uhauha maoli lakou i ka loaa uuku o ke Aupuni ma na hana lapuwale, a he mau hana ia e alako aku ana i ka lahui a like pu me Aigupita.

Alaila, o ka ninau ano nui i keia wa e ku nei, "Heaha la na hopena o keia mua iho?"

Ke uku mau nei na hui mahiko i kela a me keia makahiki i ka huina dala he $120,000, a ke uku pu ia nei no hoi e lakou na auhau o na paahana. ka poe i hoolimalimaia e hana ma na mahiko, oia hoi he $75,000, a me kekahi mau puu dala nui e ae i hiki aku i ke $50,000.  Maluna o na mea a pau i auhauia ma ka Paeaina nei, aole he poe e ae i uku aku i ke Aupuni ma ka auhauia ana e like aku me ka huina nui o na dala i hookaaia e na hui mahiko, a o ka eha hapalima o na loaa o ke Aupuni, mai na mahiko mai no ia, mamuli o na auhauia ana.  Heaha la ka mea i makemake ia e na hui mahiko e hanaia aku e ke Aupuni?  Eia, ke noi nei lakou e hoolilo pono ia ua mau dala la no ka pono o na makaainana a me ka aina pu.  I poe hoopono ma na oiha na aupuni a pau a e hoopauia na luna aupuni hawawa ike ole a kumakaia lahui.  Oia ka ma i makemakeia a oia maoli no ka mea e pono ai.  E hanaia na hana malalo o na kanawai a me na Kumukanawai o ka aina a e ku kaawale ka Moi mai kona lawelawe ana i na hana a pau e hanaia ana e kona mau makaainana.  E noho oia ma kona ano Moi.

Hookahi ninau i koe a e noonoo pono ia.  "Heaha la ka hana e hana ai i holopono na ano hana a me ke kulana o ke Aupuni?"  Eia, e lokahi like.  E hoikeia aku i ka Moi a me kona mau Kuhina a i na makaainana no hoi, ua lokahi like na hui mahiko mai o a o, e kue aku i keia ano hana e hanaia nei i keia wa, a e hoikeia aku no hoi, ua ake ia e hoololi ae i ke ano o ka lawelaweia ana o na hana aupuni.

Me keia mau hoakaka maluna, ke manao nei makou e hooko pono ia ana keia mau kumuhana me ka lokahi.

O makou no,

S. T. ALEXANDER,

Peresidena.

W. G. IRWIN,

Hope Peresidena.

E. P. ADAMS,

Kakauolelo.

JOHN H. PATY,

Puuku.

J. C. GLADE,

A. S. HARTWELL,

Z. S. SPALDING,

Na Hoa Kuka.

MOOLELO O KA AHAHUI

EUANALIO O HAWII

KOMOHANA.

LA HANA 1---Oct. 5, 1882.

Halawai ka Ahahui o Hawaii Komohaua maloko o ka luakini o Sana Paulo ma Waipio.  Na ka lunahoomalu mua Rev. J. P. Kaononimaka i wehe na hana.

Kihapai.                                   Kahu.                                      Elele.

Hamakua Hikina         .....       ----------                        .....       Ahia

Hamakua Waena         .....       Rev. J. Bicknell                       .....       R.P. Kuikahi

Hamakua Komohana  .....            "     "                  .....       W.A. Mio

Waimea                       .....       ----------                        .....       Mose Kaholoaa

Kohala Akau               .....       Rev. E. Bond              .....       J. Kekipi

Kohala Komohana      .....       S. C. Luhiau                .....       ----------

Kohala Hema              .....            "     "     (komite)         .....       Mr. Kiki

Kohala Kona Akau     .....       C.P. Kaonohimana      .....       J. Kaiekoeli

Kailua & Helani          .....       ----------                      .....       T.N. Simeona

Kona Waena               .....       Rev. G.W. Waiau (komite)     Moolau

Kealakeakua                .....            "     "                  .....       ----------

Pukaana                       .....            "     "                  .....       ----------

Kaohe & Milolii          .....       Waiau (komite)                       .....       ----------

Waiohiau, Kau (he noo mau no ia.)

Kohoia ma ka balota o Rev. J. Bicknell i lunahoomalu, P. Kaaekuahiwi kakauolelo.  Na hoakuka, Rev. S. K. Kauwe, J. W. Kaumelelau, G. K. Heleihonua a me na hoahanau kupono e ae.

Hoopanee ka aha a hiki i ka hora 9 1/2 A.M. o ka la apopo.  Pule o M. Kaholoaa.

LA HANA 2---Oct. 6, 1882.

Akoakoa mai ka aha, malamaia ka manawa haipule, kaheaia na inoa, heluheluia ka moolelo a aponoia.

Ma keia la ua hiki ma kekahi mau lala, Rev. E. Bond, J. Kekipi, Rev. S. C. Luhiau.

Noiia mai e lilo o J. Waiohinu i hoa kuka no ka aha.  Aponoia.

Koho ka lunahoomalu i na komite mau.  1.  Komite Imihana, E. Bond, G. P. Kaonohimaka a me Ahia.  2.  Komite Imihana, G. W. Waiau, S. C. Luhiau, a me S. K. Kauwe.

Hoike hapa a ke komite.  1.  Hapalua hora haipule, 2.  hoike kihapai, 3.  heluhelu haawina, 4.  kula kaikama.  5.  na ekalesia kahu ole, 6.  na palapala hoopii, 7.  na keiki a ka aha, 8.  kula kahunapule, 9.  ahahui karistiano opiopio, 10.  kahi e halawai hou ai ka aha.

Kumuhana 2---Hoike Kihapai

Hoike pokole mai o Bicknell no Hamakua Hikina, a hoike waha mai o S. K. Kauwe no ia kihapai.

Hamakua Waena me Hamakua Komohana na J. Bicknell.  Waimea na ke kakauolelo i heluhelu.  Kohala Akau, na E. Bond.  Kohala Komohana me Kohala Hema na S. C. Luhiau.  Kekaha, na G. P. Kaonohimana.  Kailua a me Helani, na ke kakauolelo.  Kona Waena, na Moolau, Kealakeakua, Pukaana, Kaohe Milolii me na mea i koe o Kona Waena ia G. W. Waiau, ke komite o ia mau kih     Ua ala na ekalesia i keia wa.

Hoomaha ka aha a ka hora 1 P. M. ia G. W. Waiau ka pule.

Noho hou ka aha pule o Moolau.

Kumuhana 3---Heluhelu Haawina.

Na L. Lyons ma Mat. 25:31---33, na ke kakauolelo i heluhelu.  Ua hooholo ka aha e hoouna e paiia ma na nupepa elua KUOKOA me Ko Hawaii Pae Aina.

Na G. P. Kaonohimaka, "Pono anei ke noho loihi kekahi kahu ma kona kihapai?"

Na J. Waiamau i ke kakauolelo, "Ua pau anei ka makemakeia o ka oihana kahunapule iwaena o na kanaka Hawaii?"

Na E. Bond, "Na ouli o ka manawa."  Ua hooholo ka aha e hoouna e paiia ma ka nupepa KUOKOA me  Ko Hawaii Pae Aina.

Kumuhana 4---Kula Kaikamahine.

Heluhelu o e. Bond i ka hoike no ua kula la no ka makahiki 1881 i pau.

Ua kuka nui ka aha no keia kumuhana.  Koho ka lunahoomalu i komite e noonoo a hoike mai ma ka la apopo.  G. W. Waiau, G. P. Kaonohimaka, W. A. Mio, S. Kekipi, R. P. Kuikahi.  Aponoia.

Hoopanee ka aha a hiki i ka hora 1:30 P. M. o ka la apopo.  Pule o Mr. Ahia.

LA HANA 3---Oct. 7, 1882.

Akoakoa mai ka aha.  Pule ka lunahoomalu, kaheaia na inoa, heluheluia ka moolelo.  Aponoia.

Hoike a ke komite no ke kula kaikamahine.  Hooholoia.  No ka nele o ke kula kaikamahine o kakou, a no ka nele hoi i ke dala e lawa ai no ke ola o ua kula nei, nolaila, me ka minamina a kaumaha hiki ole ke haiia aku.  ke hooholo nei makou penei:

Ma ka la hope o Dekemaba ae nei, e paniia na puka o ua kula nei, me ka manao nae e alakai ka lima kuhikuhi o ka Haku ia kakou ma nei hope aku, ma na ma pili i ke ola a me ka make loa o ua kula nei.

Komite---G. W. Waiau, W. A. Mio, G. P. Kaonohimaka, J. Kekipi, R. P. Kuikahi.

OLELO HOOHOLO.

Hooholoia---Ke haawi aku nei keia Ahahui Euanalio i kona aloha palena ole ia Miss E. W. Lyons no kona hoomanawanui papauaho ole i ka luhi a nui wale o kana oihana alakai a kumu hoi iloko o keia kula i na makahiki ewalu i hala ae nei ; me ke noi pu aku hoi i ke Akua nona, i hooluolu a hoomaikai oia iaia ma keia hope a mau loa aku.  Aponoia.

Heluhelu mai o John Kekipi he olelo hooholo :

Hooholoia---No ka manao o Rev. E. Bond i waihoia mai nei imua o keia aha e haalele i kana oihana poo no ke Kula Kaikamahine o ka Mokupuni o Hawaii nei, ma ka la hope o Dekemaba ae nei, nolaila :

1.  Ke waiho aku nei keia aha i ka oihana puuku no keia kula iloko o ka lima o Mr. E. N. Dyer, me ke noi aku aku iaia e malama pono i na mea pili i ka waiwai o ke kula, a e hana hoi i na mea a pau e pono ai ua kula nei e like me ka mea hiki iaia me ka lokomaikai ia mai e ko kakou Haku Iesu Kristo.

2.  A nolaila, ke kauoha aku nei keia aha ia E. Bond, aia a hiki mai kona manawa e waiho ai i ka oihana poo o ke kula e hoihoi aku i na mea a pau e pili ana i ke kula e waiho la iloko o kona lima ia Mr. E. N. Dyer i ka puuku a keia aha i wae iho nei.  Aponoia.

Waiho mai o E. Bond he olelo hooholo e pili ana i ke kauoha ana i kumu hou no ke kula kaikamahine.  Ua hooholo ka aha e mau no ia kauoha ana.

Hooholoia---Ina e wehe hou ia ke kula kaikamahine o kakou ma neia mua aku, he kanalima dala ($50.00) oia ka uku makahiki no ka haumana hookahi.  Aponoia.

Kumuhana 5---Na Ekalesia Kahu ole.

Ua kuka ka aha a hooholoia e hoomauia no ka noho komite ana o Rev. G. W. Waiau no na ekalesia kahu ole mai Kona Waena a hiki i Milolii, o Rev. S. C. Luhiau no Kohala Hema.

No Waiohinu, Kau, hooholoia o Rev. J. Waiamau me John Kekipi ke komite e hele e hui pu me na ekalesia ma Kau, a hoike mai imua o ka aha ma ka halawai hou ana.

Kumuhana 6---Na Palapala Hoopii.

Palapala hoopii mai na ekalesia o Kona Waena me Kealakeakua e kahea ana ia Rev. G. W. Waiau i kahu no lakou.  Waihoia ma ka lima o ke komite, J. Kekipi, S. K. Kauwe, G. P. Kaonohimaka na lakou e noonoo.  Aponoia.

HOIKE A KE KOMITE IMIHANA.

1.  E wehewehe ia Iakobo 4:6---Rev. J. Bicknell.

2.  Na ouli o ka manawa---Rev. E. Bond.

3.  No keaha i oleloia ai, ua oi aku ka mea uuku iloko o ke aupuni o ke akua mamua o Ioane Bapetise?  Luka 7:28 hapa hope---na Rev. L. Lyons.

5.  He hana anei ka keia Ahahui Euanalio maluna o kekahi ehalesia iloko o kona malu?---Rev. G. P. Kaonohimaka.

5.  E lawa ana anei ka ike olelo Beretanai iloko o na kula la aupuni?---Rev. J. Waiamau.

6.  E wehewehe ia Oihana 2:40 hapa hope ia Rev. S. K. Kauwe.

E hoomauia no na haawina i heluhelu ole ia.  Komile---G. W. Waiau, S. K. Kauwe, a me S. C. Luhiau.  Aponoia.

Kumuhana 7---Na keiki a ka aha.

Mr. Eli Kekipi me Mr. Kaleoiki, ua apono keia aha i ko laua komo ana i ke kula kahuna.

Kumuhana 10---Kahi e halawai hou ai ka aha.

Waiho mai o T. N. Simeona he mau olelo hooholo :

Hooholoia---Aia a hoopanee keia aha e halawai hou maloko o ka luakini ma Helani, Kahaluu, Kona Akau ma ka Poalua mua o Maraki, A. D. 1883, ma ka hora 10 A. M. Aponoia.

Hooholoia---Ke haawi aku nei na lala o keia Ahahui Euanalio i ko lakou aloha nui a me ka mahala o  na hoahunau o Waipio me Kukuihaele no ko lakou malama pono ana mai i na mea o ke kino e oluolu ai.  Aponoia.

Heluhelu mai o J. Kekipi ka lunahoomalu o ke komite no ka palapala hoopii imua o ka aha.  Hooholoia e hoopaneeia keia palapala, kahea a halawai hou keia aha ma ka malama o Maraki, 1883, no na kumu ekolu.  1.  Aole pololei keia kakau inoa ana.  2.  Aole kupono keia uku.  3.  Aole i pau  pono no hoahanau.  Aponoia.

Noiia mai, aia hoopanee keia aha e halawai hou ma kahi i hooholoia.

Heluheluia ka moolelo o ka la hope a aponoia e hoounaia ka moolelo e paiia ma na nupepa elua KUOKOA me Ko Hawaii Pae Aina.  Aponoia.

Hookuuia ka halawai me ka himeni me ka pule a ka makua Rev. E. Bond.

P. KAAEKUAHIWI, Kakauolelo.

HE HUPO MAOPOPO  A HE EPA

KA MEA I KAPA I KONA

INOA KAIOPUA.

E KA NUPEPA KUOKOA ; Aloha Oe:---

Ma kou helu 41, ua ike ua i na manao epa o Kaiopua, nona ke poo, "Na Moani Kaumaha o Kona Akau."  Aohe oiaio.  Ua minamina au i kuu NUPEPA KUOKOA i ka lilo na na manao epa o ua Kaiopua la e hooluhi ai ; ua kupono kela mau hua e kau keha ae la maluna ona.  He epa, he hupo, etc.  Penei e maopopo ai :

1.  Ma ka la 19 me 20 o Sept. ka noho ana o ka Aha Kaapuni Apana Ekolu o Hawaii ma Kona Waena.  O ka Kaiopua hoi ma ka la 30 o Sept, He hupo ia.  Hooliloia ka la 19; 20 i la 30.

2.  O ka olelo hooholo a C. F. Hart no ka hoopii a Luahine, k., vs. makainai, e hoihoi aku ka mea hoopii i ka hoki a i ole $80.  Eia ka oiaio.  Aole like me ka ua Kaiopua, hoihoi i ka hoki me kanawalu dala, a i ole $150 e hoihoi aku ai ka mea hoopiiia.  He epa ia.

3.  Ua umi poe o kahaluu i hele e mihi imua o ka L. A. me ka hewa ole wahi ana.  Owau kahi oia puulu ; ma ko makou ano he mau hoaaina no ka L. A. oia ko makou haku.  Ua noi makou iaia e hookuuia ko makou mau holoholona e hele wale ma ke kula me ka uku ole, oiai he hoolimalima okoa ko ke kula.  Ma ia noi ana a makou imua o kona kiekie ua ae mai oia ma kona ano alii.  Oia la ka oiaio.  Ua pono loa oe e kapaia he epa, etc., malalo o keia kalai manao hemahema ana au, he Lahainaluna hoi oe, he hoopunipuni nae.  Oia no nae paha ke ao a kau kumu.  Haalele ia no kau wahi apana hana maikai ; pii kumulau pani na pepeiao i na hoino.  Hewa anei ia la ?  he ma'u wahi vineka ia malie o mu-o ka waha.  Aloha nui.

JOS. W. POHOLALO, JR.

Aekai o Kona, Oct. 20, 1882.

PULU E I KA UA MAULE O LUNA.

Ma ka papa konane o ke Kilohana ka NUPEPA KUOKOA, Helu 40, ua ike ia na hoa@aka ana no na hana a ka waiona iloko o kona mau la i kuu akea ia ai.  A ma ka Elele no hoi o Okatoba nei.  ua ikeia ka nui o na ona i hopu ia no ka ona, nolaila, ke ninau nei au ia Hawaii makee oia, o ke oia anei keia o kuu lahui Hawaii a oukou e makee iho ai he oia ? A i ole, o ke kau like anei keia a Elepaio ma e makaleho iho ai he kau like? Oiai, pulu e no i ka ua maule o luna.  Ina no ka pane e puana mai i ka haina, a ina no ka hauoli e hoike mai i ka makemake.  He ninau loaa wale no keia i ko Waolani poe, a i puehu e mai no hoi ia oukou, he mea ia na'u e olu ai.

O ka mea i ikeia e a'u he pono e lilo no ia i hoa kuilima no keia maka peni.  Me ka mahalo.

L. S. KEANIANI.

Kawaihae-uka, Hawaii, Oct. 21, '82.

KUE I KA MALUHIA O KE SABATI.

E KA NUPEPA KUOKOA :  Aloha Oe:---

He wahi manao pokole ko'u e waiho aku nei ma kahi kaawale o kou kino a nau ia e hoaiai aku i na makamaka mai Hawaii a Kauai, penei ;

O ko'u ekolu malama keia a oi ma ke kahua hana paakai ma Kukuluaeo a Kalia, a ua ike au i ka hana hehi Sabati a ka poe hana paakai maanei, oia hoi ua kauo i na kaa paakai i ka la Sabati ma ko lakou mau hale, me ke kapi ana i ke kai ma na aina paakai.

Eia no kekahi, ua lilo na lanai kau paakai ia lakou i wahi luana maikai loa i na la Sabati a pau, a o ka maluhia o ka halepule he mea ole loa ia.

Ke hao ino nei na paakai a ua poe nei, no ka maka' i ka ua o ka hooilo.

O ka'u wahi manao iho la ia i manao ai e ulele ma ke aiai o ke kanana, no ka pomaikai o na tausani waihooluu like ole e heluhelu ana i kou kino.

Me ka welina i na keiki ulele hua kepau a me ka lunahooponopono.

Owau no me ka oiaio,

SAM'L D. MANUHOA.

Honolulu, Oct. 23, 1882.

NA HIONA O KA AINA KOOLAU.

Ua lana ka manao o na haipule mai Hawaii a hiki i ka palena o kona mau mokupuni, no ka ulu nui o na hana pono a ka Ahahui Opiopio ma na apana a pau.  Eia ma Hamakua ka oi, e mapu ana ka lea o na hui opio ma na kauhale, iwaena o na hui mahiko, a me na wahi e ae, a ma na alanui.  O na opio wahine a me na opio kane ma Paauilo ka oi ; ua hookuu ia na kanaka e manao ana e hele ma na kauhale o kekahi poe i wae ia e hele e paipai, e haiolelo, e himeni, a pelu aku.  Eia ka hope, ma keia mua aku, he pono i na ahahui a pau e lulu i puu dala, i kela hui a me keia  hui, a e hoolilo loa aku kakou i kekahi mea kupono i haiolelo kaapuni mai Hawaii a Niihau, oia ka iini o keia makakila.

Ua hauoli na kanaka e loaa ona haiolelo kupono, a e malamaia oia e ka Ahahui Opiopio, a o na loaa a pau, e waihoia i ka Papa Hawaii.

O ka ona, aole i ike ia iloko o keia mau la, mai Waipio a hiki i Kaala.

Owau no,     S. KAHIEHIE.

Paauhau, Oct. 13, 1882.

NU HOU MA PAAUHAU, HAMA-

KUA, HAWAII.

E KA NUPEPA KUOKOA ; Aloha oe:---

Ma ke aloha o ke Akua, ua loaa ia'u he manawa e hooili aku i na mea hou e oluolu ai ka manao o na makamaka, ma hamakua nei.

Ma ke Sabati, la 8 o keia mahina, ua hookomoia ma ka hoike manaoio no ko kakou Iesu Kristo, he 4 poe ; o keia poe ua hoihoi ia mai iloko o ka pa hipa me ko lakou mihi me ka manaoio.  Hookahi keiki i bapetizo ia.  O keia na hua i loaa no ka Hui Opiopio Karistiano o Paauhau nei a me Honokaia.  A ma ka la 15, ua loaa hou ma ka Hui Opiopio Karistiano ma ka luakini o Maunahoano, 2 hoahanau i hoihoi ia ma ka manaoio, a i keiki i bapetizo ia.

Nolaila, ua loaa na hua mua o ka pono ma keia mau Hui Opiopio, 4 poe i hookomoia ma ka manaoio, 4 hoi i hoihoiia mai, a 2 keiki i bapetizo ia, oia na mea hoike aku.

Ke nee nei no na hana pono imua, a ke kaahele pu nei no au me ka'u wahine ma na kauhale.  Ma ka Poalua me ka Poalima e malama ai ka'u wahine i na halawai me na wahine, a ma na ahiahi kekahi mau halawai, a ke mahalo nui nei au i ko ke Akua aloha.

SAM. K. KAUWE.

IMI POMAIKAI.

Ua kaena ae ka Elele Poakolu, o ka Aha Kuhina ka e noho nei, he Aha Kuhina imi ka i ka pomaikai o ka lahui.  Pela paha.  Ua kau kekahi Kuhina o keia Aha Kuhina i mau Rula no na Kaa Hoolimalima, eia nae, ua kau pu iho no oia i mau rula hookaumaha ; aia ka a i pihi metala no ke kahu kaa, nona na a-la paa $4.50, alaila hookele ia i ke kaa ; ina e kaa ka laikini a loaa ole ke pihi, alaila he mea ole ia laikini, aia ka a loaa ke pihi a me ka laikini, alaila kani pono ka ka pelehu.  Pomaikai io no ka lahui.  I ehia la palau ana e pono ai.     J. NALUA.

E HOOPUKA MAU MAI I NA MO-

OLELO O ONILA MAKA.

E KA NUPEPA KUOKOA ; Aloha Oe:---

E oluolu oe a me kou mau hookele e maliu mai i keia wahi leo e hoene aku nei, oia keia:  E hoopuka mau ia mai ka moolelo o Onila Maka, ka Makai Kiu kaulana o Enelani, ke Akeakamai kamahao lua ole.

E hooki au maanei, ke koiawe mai ia ka ua i Maunawili.  Good bye na keiki ulele hua metala a me kou mau hookele.     Kou oiaio,

H. D. S. KAILUA.

NA HOOLAHA.

PAPA! PAPA!

---NO---

ALLEN & ROBINSON

UA WEHE AE NEI MAUA 1

PA KUAI PAPA

---MA---

KA UWAPO O PAKAKA!

Na Papa Ulaula o na ano a pau.

Na Papa Paina o na ano a pau.

Na Pili Hale Ulaula.

Na Pili Hale Keokeo.

Na Pepa Molina,

Na Pepa Hoonani Hale,

Na Pena a me na Aila Pena!

NA KUI O NA ANO A PAU.

NA PANI PUKA a me

NA PANI PUKA ANIANI.

NA PANI PUKA a me

NA OLEPELEPE.

NA LAKO KUKULU HALE

O NA ANO A PAU!

E kuaiia ma

KE KUMUKUAI HAAHAA LOA

O keia Makeke.

PAPA! PAPA!

AIA MA KAHI O

LEWERS & COOKE.

(O LUI MA.)

ma ke kahua kahiko ma

Alanui Papu a me Moi

E loaa ai na

PAPA NOUAIKI

 

o kela a me keia ano.

Na Papa Nani a Paa no ke Kukulu

ana i na Hale!

Na Pani Puka, Na Puka Aniani, Na Olepelepe,

Na Pou, Na O-a, Na Papa Hele. Na Papa

Ku, A me na Papa Moe nui loa.

NA PILI O KA HALE

O NA ANO A PAU.

Na Pepa Hoonani, Na Pena o na Wai a pau.

Na Kui mai ke Nui a ke Makalii. Na Ami

Puka, Na Ami Puka Aniani, Na Ami

o na ano a pau, Na Aila Pena, o

kela me keia ano. Na Aila Hoo-

maloo.  He lehulehu wale.

Na Aila e ae o na

ano a pau.

NA WAI VANIKI

---A ME NA---

WAI HOOHINUHINU NANI!

o na ano a pau loa.

NA BALAKI ANO NUI WALE

A ke hai ia aku nei ka lono i na makamaka a

pau, ua makaukau keia mau makamaka

o oukou e hoolawa aku ma

na mea a pau e pili ana

ma ka laua oihana

---NO KA---

UKU HAAHAA LOA!

E like me ka mea e holo ana mawaena o

LAUA a me ka MEA KUAI.

E hele mai!  E na Makamaka!!

A e lawa no hoi ko oukou makemake

me ka oluolu a me ka maikai!

LOLE MAKEPONO

Ke Kuike! e loaa no ia ma kahi o

Kakela me Kuke,

---E laa na---

AHINAHINA, KALAKOA, KEO-

KEO, LEPONALO, PENA,

AILA, AILA HO-

NUA,  ANIANI,

NA MEA PIULA,

Kopa, Aila Hoomaloo, Kui Kakia, Pa-

keke  Tabu Kaula,  Noho Lio, Hulu

Palahi, na Pulumi, ahe agena

no hoi no na mokupuni o Ha-

waii neino na Laina-

kini-nao

Lainakini-Maoli, Kilika, Palule Kalakoa,

Alapia, Kelepa, Na Lole kupono i

ka Wawae, Palule Huluhulu,

Na Lole Huluhulu, Na

ka hoohehelo ana, Li

Lole no pini, Li-

hilihi, &c.

A ME NA

Mikini Humuhumu

Makepono Loa

A HE MAU

MEA AI KAHI :

KA PALAOA, KOPAA,

BAIKI, PIA, HOOHU

PAAKAI, HUAALA,

PIA KULINA, KOPE,

---A HE---

Laau Lapaau Kaulana Loa

A DR.  JAYNE.

 

LAAU HOOMAEMAE KOKO,

LAAU HOOPAU NAIO,

PENIKILA, HUAALE,

LAAU KUNU.

 

Me na Laau Hamo, a Pela 'ku.