Ka Nupepa Kuokoa, Volume XXI, Number 42, 21 ʻOkakopa 1882 — Page 1
| This text was transcribed by: | Lawrence Gersaba |
| This work is dedicated to: | Judith Nalani Kahoano Gersaba |
Ka Nupepa Kuokoa
KE KILOHANA POOKELA NO KA LAHUI HAWAII.
BUKE XXI, HELU 42. POAONO, OKATOBA 21, 1882.
NA HELU A PAU 1090
MAIKAI HOI
KA PAPA,
- A ME -
@ LAAU O KOU HALE,
NOHEA LA?
@ @ KAHI O
@ WAILA MA.
@ @ ia ia ohi ka io o ka laau o
@ W @ @ na wa mea hoi o ka nani.
@ A PAPA! NA PAPA!
- A ME -
@ Na Pono Kukulu Hale
@ O na Ano no a Pau.
@ e like me ka makemake no ke
@ KUMUKUAI MAKEPONO LOA.
@ PAPA! PAPA! PAPA!
@ A HULUHULU,
@ PA MANOANOA.
@ PAPA I KAHIIA,
@ NA PAPA KEPA,
PAPA HOLE KEOKEO,
PAPA HOKE ULAULA.
@ Laau. Na Lauu,
@ KUA,
@ NA KAOLA.
NA AAHO.
NA MOLINA,
NA PEAPEA.
@ PINE HULUHULU.
@ PINE I KAHIIA.
@ APA A ME NA LAAU ULAULA.
PILI ULAULA.
PILI KEOKEO.
PANI PUKA.
PUKA ANIANI.
PANI PUKA ANIANI.
PUKA OLEPELEPA.
@ PENA
@ O NA ANO A PAU.
@ pena mai ka liilii a ke nui,
Aila Pena,
Aila Hoomaloo.
Waniti. Pate.
@ Lako o kela a me keia
Ano.
@ A HALE A ME NA LIHILIHI.
F. loaa no malaila.
@ KAAKO ME PUULOA.
@ Dala Kuike, e loaa no na mea a pau i
@ se la, no ke Kumukuai Emi Loa. O
@ kuoha mai Hawaii a Niihau, e loaa aku
@ lakou, e hooko koke ia no ia me ka la-
@ no. E kipa nui ilaila i ike i ka oiaio.
@ 905 tf
Na Hoolaha Numau.
W. O. SMITH,
LOIO! LOIO!
Helu 36 Alanui Kalepa. Honolulu
W. R. KAKELA,
He Loio a he Kokua ma ke Kanawai.
HE LUNA HOOIAIO PALAPALA.
CECIL BROWN.
LOIO A HE KOKUA MA KE KANAWAI.
A he Agena no ka Hooiaia ana i na Palapala
no ka Mokupuni o Oahu.
Helu 8 Kaahumanu. Honolulu. H. P. A. 34y
ASA KAULIA,
LOIO A KOKUA MAKEKANAWAI
Ua makaukau au e lawelawe i na hihia a pau
ma keia Oihana imua o na Aha a pau o ka
mokupuni o Oahu. E loaa no au ma Koolaupoko
Heeia, a ma Honolulu i kekahi
wa E hooloia na kauoha mai na wahi
a pau o ka mokupuni me ka eleu
a me Kahikiwawe.
Jno. Lota Kaulukou,
LOIO A HE KOKUA.
Ua makaukau oia e lawelawe i na hihia a pau
o kela a me keia ano iloko o na Aha
Hookolokolo a pau o keia Aupuni. Ua hiki
no hoi ke hana i na palapala a pau e pili
i ka Oihana Loio ma ka eleu. E loaa
no au ma Heeia Koolaupoko, a ma
Honolulu no hoii Kekahi manawa.
901 tf
C. C. COLEMAN,
Amara a he mea hana Mekina
Kapili Kapuai hao lio.
A ME KA
Hana ana Kaa Lio, etc.,
Hale Hana ma Alanui Alii.
905 tf E kokeke la i ke Alanui Papu.
KALE KULIKA,
Luna hooiaio
PALAPALA KUAI, MOLAKI.
A ME NA PALAPALA OIA ANO.
Luna Hooiaio Palapala Aelike mawaena o na
Haku a me na Kauwa. Luna Haawi
Palapala Mare.
Ma ke kihi o ke Alanui Moiwahine me Kaahumanu,
Kulanakaauhale o Honolulu, ko Hawaii Pae Aina.
150 tf
Richard F. Bickerton,
(PEKETONA.)
Loio a he Kokua ma ke Kanawai.
Keena hana Helu 23 Alanui Kalepa.
Elua puka ma o ak u o ka hale kauka o Kauka Minuteole.
E hele ana oia imua o na Ahahookolokolo
a pau o keia Aupuni ma na ano hihia a pau,
ina paha ma Oahu nei. a ma na Mokupuni e ae.
Ua makaukau mau oia i ka hana ana i na
Palapala pili kanawai o kela a me keia ano.
Ua hiki no hoi iaia ke hoaie dala aku ma ka
morakiana i na aina ma ka ukupanee haahaa loa.
E hanaia na hana me ka hikiwawe a me ka
uku haahaa.
George E. Sherman,
MEA HANA NOHO LIO
- A ME -
Na Lako a pau o na Pono Hololio.
Ua maa kahiko oia iloko o keia hana, a ua
kamaaina i ke Hawaii nei noho ana; he
oluolu na auhau ana. E hele mai i
ikemaka
AIA KONA HALE HANA MA ALANUI KULA,
Ma nae iho ok ka Uwapo nui.
Hawaii.
JAMES M. MONSARRAT,
(MAUNAKEA)
Loio o he Kokua ma ke Kanawai.
Imua o na aha Hookolokolo a pau o keia
Aupuni. E lawelawe ana no hoi ma na hana
pili i ka hooponopono waiwai, me ka imi
ana i na palapala Sila Aina. ka hana
ana i na Palapala Kuai, Hoolimalima
a me ka hoaie dala ana.
A HE LUNA HOOIAIO PALAPALA
Keena hana alanui Kalepa.
Jan. 3, 18@ 944 1y
Joseph E. Wiseman,
LUNAHOOPONOPONO O NA WAIWAI PAA
- A ME -
Luna Imi Hana.
Helu 27 Alanui Kalepa. Honolulu
Luna Hoolimalima no na Rumi, na Hale, a me
Luna Kuai me Hoolimalima o na Waiwai
Paa ma na wahi a pau o ka Paemoku.
Luna imi Hana no ka poe a pau i nele
i ka hana ole ma na wahi a pau i makemakeia
ma kekahi mokupuni o ka Paeaina.
N. B. - Na Palapala Hoolimalima e hanaia
me ka eleu; e ohiia na Bila Aie a me na
hana e ae a pau e pili ana i na hana Oihana
Kalepa me ke eleu a me ka pololei. O na
Unuhiolelo a me na Maheleolelo ana, e hookoia
me ka maikai. O na kauoha a me na
kamailio ano maloko o na leta no kekahi o na
hana maluna ae, e hookoia me ka eleu loa.
1076 1y
HE MOOLELO KAAO
- NO -
KEANINIULAOKALANI !
KA NANI LUA OLE.
MOKU O KUAIHELANI
Ka mea ana I Hoonauene
KUKULU O KAHIKI
A O Ke Pukonakona
O NA LA I AU WALE AKU LA.
MAHELE II.
Auhea oukou e na'lii a me na makaainana, ke hai aku nei au ia oukou, owau ka mea nana i hele ia alanui a ua ike au aole i kupono i keia ui ke hele; no ka mea, he hookahi kino, aohe ona kokua, nolaila, e pono no kakou ke aua mai iaia, he uku hoi ka hele ana i pololei a loaa ke kino o kana ea e imi nei, makepono hoi ka hele ana. No ka mea ke hoole mai nei na ouli o ka lani.
O ka naulu pehu aia iluna o ke kino o Lonokaeho ke huli kua nei a oia no ke alai o kou alanui e hele aku ai; o ka ea nui kua wakawaka ke hoonoho la kana papa kaua, a o keia ike a'u e hai ake nei aole e hiki i kekahi o lakou nei ke hoole mai, no ka mea, ua noho wale ia no e a'u ka lakou nei papa hana a ua ike wale ia no e a'u.
Ua huli aku la Lono
Kuli na Kooluu,
Ua nahaehae kukulu o ka Kahiki,
Hoomakaulii ka makani noho i Kaelei
Kuehu mai la i kona kapa o ka ale,
Ua kupuni loko i ka inaina,
Ua noa.
A pau ka Olelomoana mau wanana, ia manawa, ku mai la o Holei a olelo mai la penei:
E o'u haku alii a me o'u hoa kahuna, he oiaio, ma ka'u ike i ao ia ai, ke hai aku nei au ia oukou, me he hihio la, ua ike aku nei au i na hoku o ka lani ua ku mai nei imua o'u a olelo mai nei, o ka aina no keia noho iho, aohe ala e hele aku ai, aia o mua la ua paa i ka ino; o ka papaku aia iluna, ke akoakoa la iluna, o na keiki kapu a Hina laua o Malaehaakoa ke au hele nei i ka moana. Oia ka make la i lohe oukou, aka, ina he hoomaloka ko oukou i ka'u mau olelo e hoike aku no au ia oukou, e ikeia no ke ano o ka'u mau hana maloko o ka apu awa.
Ia manawa, hookolo like ae la na mea a pau, inu ae la ia i ka apu i piha, a hahae iho la i ka lanai a elua apana a waiho pea iho la iloko o ka apu, a olelo aku la i ka ohana'lii penei:
E kahee ana au i ka awa, e nana oukou i kahi e ku ai o ka apu. I ku ma ka akau, ko kamahele ia, alaila, hai aku no au ia oukou ua hala ka'u ike ma ke kakaolelo, alaila, ua pono ke hele. I ku hoi ma ka hema, o ko'u aoao ia, alaila, e noho ka pono. I ku ma ka hikina he mau kaua ke loaa aku ana iaia ma kahi ana e hele aku ai, ina hoi ma ke komohana, e halawai aku ana oia me ka make.
A pau ia mau kuhikuhi a Holei, olelo hou aku la ia penei:
Ina hoi i ku au i ka pule a i haki ka pule, alaila, manao ae kakou e pilikia ana no, nolaila, e hamau ka leo; ia manawa, kahuli pono iho la ia a hoomaka iho la e pule penei:
Ia Ku la, ia Ku la,
Kulia iuka, kukia i kai.
Kulia iluna ilalo
I Kahiki ku, i Kahiku moe.
Ia Kanelaauli e Uli - e.
Lalau aku la oia i ke kanoa a ninini iho la i ka awa me ka hoomau no i ka pule penei:
Ulia iluna. Ulia ilalo,
I kumo i ka apua kiikii.
Ka apua nahanaha
Nahae kau mai Hawaii
A Kuaihelani.
Haona iloko oka Nuumea,
I ke ao palalalahiwa Kanaka,
E Kane - e
Eia ka ai e ke akua,
Ka waha o ka honua ke ale oe.
Ai no muki koe ke oka,
O ko oukou ola la haina mai.
A i ka amama ana o kana pule, nana, like iho la lakou i ka apu awa a ike iho lakou he kuakea like wale no mai o a o. Ea ae la kona poo iluna, a olelo aku la i na'lii a me na kahuna penei:
Ke ike like iho la no kakou o ka hoku koluna o ka ale ko lalo, ke olelo aku nei au, e pau ka manao hele ana o ke kama alii e noho e ai i ka momona o ka aina. A pau ka Holei mau olelo, ia wa ku mai la o Haehae a olelo mai la penei:
He mea kupanaha. aole pahaiaoka kakou hana okahookakaukau, ka i no okaolelo aku e hele no ka mea i kauohaia ae kakou e hele mai e nana i ka pilikia o ke alanui, Kanalaila kakou e pule aku ai e hoomahie i kahi o ka hele ana, aole ka, ke lohe aku nei au he okoa loa ka oukou @ hana. Nolaila, ke hai aku nei a @ ka'u ike, a i ku i ka'u ike, alaila. hai aku no au, aka, i holohua ae hoi ke akua o ko'u haalele no ia i keia hana. Ia wa kahea aku la ia i na kahuna penei:
O keia mau kahuna o kakou, ua hala ka lakou ike, ua oke hoi lakou a o kakou hoi koe, nolaila, e kahee ko kakou awa a ia wa kakou e ike like iho ai. He manawa ole pau ka awa iloko o ka apu. Ia wa olelo aku o Haehae, o kakou a pau, mai ke ku a ke kaloa, o kulou na poo e nana i ka hana a ke aka, a e hoolohe i kuu pule ana. A pau kana olelo ana noho iho la a kukuli iho la a hoomaka iho la e pule penei:
O Kaulana ka la e kau nei,
Kau ka hoku o Hokula o Hokulai.
Hoohaa ka ua i Mahel ia
Ka makani hoi a kona lua,
Pupukahi e ke akua
O Ku o Kane o Kanaloa
Pau kauna i ke alanui,
I ke alahele a ke Namu,
Halawai me ke kupu ino
Me ka Honunuikuaeaea,
Me ka ea nui kua wakawaka
Me Kihanuilulumoku,
Hio e Hina i ka makani
Opaipai e Kahikiku,
Haki ka pewa o Moanaaha,
Kunou aku kunou mai
Mimimihi aku mimimihi mai,
Ei ae la e lakou nei,
O Kamaalii ka ouli nui
Oili ke ahi o Keaolewa,
Papapae a kau iuka - e
E ke akua - e homai he ola
E Uli - e nana ia -
O ka'u pule la ia oukou @
Elieli kapu elieli noa, @
Amama ua noa lele wale
A pau ka Haehae pule ana, ia wa papaiaawa like ae la na kahuna a pau me na olelo ma ko lakou waha penei:
E Lonokaeha lae koakoa,
Ka waha o ke akua Aiahua,
Ku ka makaia - e pau oe,
O Kuwahailo - e pau oe,
O Niuloahiki - e pau oe,
Papa i ka awa ai a makou,
Ke aina nei e - ua ola,
Ua noa.
Lalau like iho la lakou i na apu awa a inu ae la, ia wa, olelo aku la o Haehae penei:
E ke'lii, ke hai mai nei na kahoaka o ka po, ua maikai ka huakai a ke'lii, aka, e loaa ana no mae ia oe ka pilikia, oia mau mea nae, no ka po lakou a no ka po mai no hoi ka mea nana ka huakai. Nolaila, aole e hiki ia kakou ke hana aku; oia iho la ka'u ike.
Ia manawa, ku ae la o Lonokaiolohia a hoopuka mai i kana mau olelo ku i ke aloha penei:
E kuu makuakane aohe mau mea e aku a kakou e hana hou aku ai no ka mea he lauwili ka ike a lakou nei. Nolaila, o ka'u olelo paa no i hai aku ai, aole au e noho ana e hele ana au a ike i ka aina o kuu mau kupuna i noho ai a mailaila aku au a loaa ke kino uhane o kuu makuakane, alaila, hoi mai au.
(Aole i pau.)
KA MOOLELO
- O -
Onila Maka!
Ka Makai Kiu Kaulana
-O -
ENELANI!
- A O KA MEA -
POHIHIHI O KA 1868.
MOKUNA XXV.
HANA KA MAKAI KIU I MEA E LOAA AI KA AIHUE - KA HELE HULI ANA
MA KE AUMOE ILOKO O KA MALA PUA - KA MAAKAAMA ANO E KE
AKUA LAPU - LA HAHAI ANA ME KA POMAIKAI OLE - HOAA KA MAKAI
KIU - KE KIAI ANA ILOKO O KA HALE.
Ia Onila Maka e nana ana i na buke hoomaopopo iho la ia iloko o kona noonoo ua loaa iaia kekahi wahi hana ano ole a ua makaukau hoi oia e hoikeike aku i na wahi pohihihi o keia mea kupanaha.
Oiai ma kana mea i hoolaia ai ua ike oia aole keia he mea pohihihi.
No ka mea, ma ke ano o kana mau ninau, ua hooholo mua oia i kona manao o ka opio lauwa a ua kanaka la ka aihue.
Oiai, he kanaka opio o Kome Robata, a e hoohai mau ana hoi oia i na kaikamahine a pau ana e halawai pu aku a a e ike ai paha, nolaila, i wahi e lawa pono ai kona iini ua kii aku la oia e haehae i na kii oloko o na buke a me na kii hooleleaka o na wahine e waiho ana iloko o ka hale o kona haku.
Ua manaolana oia e loaa ana iaia he mau meheu o na manamana lepo iluna o na aoao o na bude ana i huli ai, i mea hoi nana e alakai i kona noonoo.
Aka, ua haule nae kona manaolana ma ka loaa ole ana o keia wahi ike ano ole i mea e kokua aku ai i kana mea i manao ai.
A i wahi hoi e loaa ai ka haina o ka ninau o ka mea nana ka hana pane aku la ka Makai Kiu.
Ke manao mei au aohe pohihihi no ka imi ana aku i keia mea huna, aka ano, e hoi ae kaua a ke kumuhana, nolaila ke noi aku nei au i kou ahonui e oluolu oe e lawe aku ia'u imua o kou mau ohana a hoike aku ia lakou he hoa paahana au me oe iloko o kekahi oihana. A aole hoi e ike a e lohe kekahi o kau mau kauwa a o kekahi poe e ae paha i ko'u ano maoli.
Ua hiki loa ia ke hooponopono ia, wahi a Pakekona.
Hookahi a'u ninau i koe ia oe:
Ua laha aku anei keia mea ma o a maanei?
Aole.
Pehea i maopopo ai ia oe, aole i hoolahaia aku e kau poe kauwa?
Aole au i ae e lohe ka'u mau kauwa i keia mea, a aole no hoi o'u makemake e lohe lakou no na mea i aihueia, oiai ua kiai ia lakou e a'u i kela a me keia manawa.
Ua maikai, oia ke kumu e holopono ai o ka'u mau hana ke lawelawe aku.
Iloko o keia wa a laua e kamailio ana, ua kahikoia ua Makai Kiu nei me na kapa nani, a ke nana aku i kona mau ano a pau he nani maoli no.
Ma ke ahiahi iho, laweia aku la ka Makai Kiu a mua o kekahi papa aina i luuluu i na ono a pau, a hoikeia aku la oia imua o Palekona wahine a me ka laua kaikamahine.
Oiai, iloko o kekahi mau makahiki i hala, ua holo aku keia mau wahine i Europa a ua kamaaina i na mea a pau olaila.
Mahope iho o na kukai olelo lealea ana a lakou, ua hauoli loa na kamaaina i ka lohe ana he poo oia no kekahi hale hana o Pakekona na Euoropa.
Ma ia ahiahi no hoi oiai lakou maloko o ke keena hookipa, ua hookahahaia ka naau o kela a me keia i ka lohe ana aku ia Onila Maka e kamailio ana me ka milolii o na huaolelo he lehulehu wale, oia hoi ka Italia, Geremania, Farani a me ka olelo Beretania.
Aka, aole nae i kahaha o Pakekona.
No ka mea, ua hoomaopopo mua oia ma ke ano he poe loea na Makai Kiu ma na olelo he lehulehu wale o ke ao nei, aka, aole loa nae i like me ke ano o ke kanaka me na kahiko nani e kamailio nei imua o lakou.
E ku ana no hoi he piano nani iwaena o ka rumi hookipa, a noi aku la ka malihini ia Lu Pakekona e hookani mai i ka piano.
I ka malihini i pane aku ai i ke kaikamahine ua ae koke aku la oia i kana noi.
I ua kaikamahine la e hookani ana noi hou aku la ka malihini iaia ina e oluoln oia e mele mai i kekahi mele i paanaau iaia.
Aka, olelo mai lanae kela, aole i hoomaamaaia oia ma ka himeni, nolaila, e kalaia oia no ka nele anaokenoi a ka makamaka.
Malia paha he akamai no hoi oe i ka himeni? wahi a ka wahine opio.
Ae, he himeni no au mamua, wahi a ka Makai Kiu, aka, mahope mai, no ko'u paa mau i ka hana, nolaila, aole i loaa ia'u he manawa e hoomaamaa ai i ke kani o ko'u kileo.
Aohe no hoi e hiki ia oe ke hoolealea ae ia kakou i keia wa? wahi a Lu Pakekona.
I hoao no paha ka malihini, wahi ana i pane aku ai. A ku ae la o Onila Maka a hele aku la a noho iho la mamua o ka piano.
Hooholo ae la oia i kona mau manamana lima maluna o ka papaki me ka mikioi. me hemea la e hoike mai ana. ua lehia wale oia ia hana a himeni ae la oia ma ka leo tenora i kekahi mele hoolohaloha o ka wa kahiko o Irelani ka aina hoi ana i aloha nui ai.
Iloko o ka wa a ka Makai Kiu e hoike ana i ke kani ko'uko'u o kona kileo ua piha hauoli loa ia na mea a pau oloko o ka hale a mamua ae hoi o kona haalele ana aku i ka piano. ua kono hou ia aku la oia e himeni hou mai, a i kela a ne keia wa ana e himeni ai. e puana mau ana oia i kekahi o na mele hoonaue puuwai e hoohaili ana i ka manao e imi. a e kono ana hoi i ka nui kino e naue.
Pela iho la ka Makai Kiu Onila Maka ka mea nona ka moolelo a kakou e hooipo pu nei i lawelawe ai i kana hana malalo o na hana akamai.
Aka, i ka Makai Kiu e hoonanea ana i na mea oloko o ka hale. ua kuhi ae la ka manamana lima o ka wati i na hora o ke aumoe, e hoike mai ana ua lawa ka ai a ka manao. a e pono e hanai i ko ka maka a me ke kino holookoa.
Hoi aku la na wahine e hooluolu a koe iho la laua me Pakekona maloko o ka rumi hookipa.
Ke manao nei au ua like no kou akamai me ka mea aihue au i hele mai nei e huli, wahi a Pakekona i pane aku ai.
Pehea i maopopo ai ia oe? wahi a ka Makai Kiu i ninau aku ai.
Eia ka mea i maopopo ai ia'u, no ka mea, ma ka nana ana i kau mau hana i keia ahiahi me he la he kanaka oe i ao ia ma na lala hohonu o ka naauao, nolaila, ua lilo i mea haohao na'u kou ake nui ana e lawe i keia oihana i kupono ole no kou kulana.
Aoho pela, wahi a ka Makai Kiu i pane aku ai, a olelo hou aku la: No ka mea, i kekahi wa, ua konoia mai kakou e lawe i ka oihana i makemake ole ai, aka, ina he oiaio ka oleloia ua maheleheleia na keena o ko ke kanaka mau makemake, alaila, he mea maopopo he mea okoa ka kekahi e lia ana a okoa hoi ka kekahi nolaila, o ka pono, "aia noi kahi a ka puu e ono ai."
No keia mau pane a ka malihini ua hooi loa ia aku ko Pakekona ilihia. a au ake loa hoi e niele hou aku iaia i kona moolelo, aka, oki pu e ia mai la nae e Onila Maka kana mau ninau ma ka pane ana mai penei:
I hele mai nei au e huli i keia mea aihue pohihihi, aole o ko'u moolelo.
A lohe aela o Pakekona i kana olelo, hoopau loa ae la oia i kona manao, aka, ninau aku la nae oia:
Heaha kau hana mua e lawelawe ai no ka huli ana i keia hana?
E kiai aku ana au i keia po.
Iloko nei o ka hale?
Maloko nei a mawaho o ka hale: e pono oe e haawi mai i ki ia'u.
No kekahi manawa pokole mahope iho haalele mai la o Pakekona a noho hookahi iho, la ka Makai Kiu.
Ua like keia po me na la i aui hope aku la, wahi a Onila Maka iaia iho, oiai, oia e mili ana i ke ki a ka haku hale i haawi aku ai iaia.
E like no hoi me ka mea i kuluma mau iaia hoomaka iho la oia e kuka pu me kona noonoo ma ke kamakamailio ana:
He wahine opio ui o Lu Pakekona i ka nana aku, aka, ma ko'u manao iho. aole paha oia e manao ia mai pela e ko ke ao a puni. Aka, he wahi kumuhana ano e no hoi keia nana i kono mai ia'u e holo mai ianei, aka, ua oi loa aku nae ke kamahao o ka lauoho kui nana i hoano e ae i ko'u mau helehelena a ike ole mai la ka makuahine a me ke kaikamahine i ko'u ano maoli, a malia paha, aole no lakou e ike ana i ko'u ano maoli, a aole no hoi au e hai aku ana ia lakou, a e oi aku ana paha ko lakou, a e oi aku ana paha ko lakou kahaha. ina wau epuana ae ana i ka haina a ka moe.
No hookahi hora paha a oi ka Makai Kiu noho ana malaila e kamailio ai iaia iho, a mahope ku ae la oia iluna a pane ae la:
Aohe e pono me keia e noho ai; he Makai Kiu au, a i hele mai nei au ianei e huli i ka aihue, nolaila, e hana au ano a haalele iho i keia kauhale, no ka mea, aohe kuleana o ka limu lana wale iho no iluna o ka ili kai e paialewa ia ana hoi e na ale o ka moana ma o a maanei e noonoo no na mea o keia ahiahi.
Hele aku ia oia a puhi iho la i ke kukui a nihi hele aku la a loko o ka rumi waiho buke kahi hoi ana i waiho iho ai i kona paiki lole. a hoomaka iho la e komo i kapa hou nona.
Ano i keia wa he Makai Kiu oia.
No ka mea o na noonoo palanalelo e hoopunana ana iloko o kona lolo iloko o na hora i hala aku la ua kapae ae oia ia mau mea a pau. aka ano, o Onila Maka no oia ka Makai Kiu.
Ma ko Onila Maka manao iho, aohe keia he hana ano nui.
Oiai. ua hooholo mua oia i kona manao i kana wahi e moe ai a kiai no ka aihue, nolaila. ua lana kona manao e hooiaioia mai ana kana mea i hoolala ai.
Mahope iho o kona makaukau pono ana, nihi malie aku la oia a pee iho la iloko o ke opu nahelehele e kokoke ana i ka hale lio.
Iaia e pee ana malaila, ike adu ia keia i ka a powehiwehi mai o ka malamalama mai ka puka aniani maluna ae o ka hale lio, nolaila. hoonaopopo iho la oia i ka oiaio o kona manao oiai, eia keia i na hora liu wale o ke aumoe.
No ka mea, heaha na kumu nana i hooloihi aku i na hora o kona ala wale ana a hala na hora kupono no ka hooluolu aia wale no a loaa he mau hana ano nui a i ole ia he hana okoa loa nana i hoouluhua i kona noonoo e ala.
Hookokoke aku la ka Makai Kiu i ka hale lio, a nana iho la i wahi kupono nona e hiki ai ke nana aku ia loko o ka rumi.
Aka, aohe nae ana mea i ike aku, a aole no hoi ana kukui i ike aku a aole no hoi i maopopo iaia kahi o ka malamalama kukui ana e ike ai.
Ua pohihihi loa oianokekahi manawa, aka, kaniiki iho la nae kana aka a iho mai la ilalo.
Ua alakai hewa ia kona noonoo e ka malamalama kukui o kahi e. aka, iaia nae i huli aku ai ihope, ike aku la oia i kahi i pa mai ai o ka malamalama mailuna mai no o ka hale nui.
Hele kaapuni ae la ka Makai Kiu me ke ano hoonaukiuki no kona hokaana.
A mahope iho o kana holoholo ana, hoi aku la oia iloko o ka hale a hiamoe aku la iluna o ka punee. me ka manao ina e komo mai ana kekahi iloko e lohe ana oia.
Oiai, ua hoao mau oia e hiamoe mamua i kona wa e ku wati ana, a aole hoi oia i haule mahope o kona manawa, oiai ua ala ae oia i ka wa kupono.
Aole no hoi oia i manao e halawai mai ana me ia kekahi mea hou, aka he mea mau iaia ka makaala mau i na wa a pau, nolaila, hoi aku la oia i ka hale.
Aole i loihi aku kana wahi i hele aku ai, kaalo ana kekahi kino wailua ma mua o kona alo.
{Aole i pau.}
HE OLELO HOALOHAALOHA A KA
AHALUNA MAKUA O KAWAIAHAO
I KA OHANA O KAPULE.
I ka Ohana o Kapule; Aloha oukou:
Mamuli o ka oluolu o ke Akua Mana Loa, ua laweia aku ko oukou makua i aloha nui ia, a hoahana pu hoi me makou iloko o na hana a ka Haku. Oia kekahi o na makua kahiko i noho i ka Ekalesia o Kawaiahao, a he loa ikaika hoi ma ka aoao a Iesu Kristo; nolaila,
E Hooholoia: - O makou o na Hoa o ka Ahaluna Makua o Kawaiahao, ke haawi aku nei i ko makou aloha nui i ka ohana o Kapule, oiai ko makou hoahana a makua iloko o ka pono i hala.
Hooholoia: - Ke komo pu aku nei makou me na hoomanao kanikau ana me oukou ka ohana, no ko oukou makua, i hoi aku ma ka aoao mau o ko keia ola ana.
Hooholoia: - Ke nonoi ne makou i ka Makua Mana Loa, nana e hoomama mai i kooukou mau manao luuluu a me ke kaumaha, a nana hoi e hoomalu mai ia oukou a pau.
"E hoomaikai ia ke Akua ma na lani kiekie loa, no ka mea, Nana no i haawi mai, a Nana hi i lawe aku; e hoomaikaiia ka inoa o Iehova."
Ma ke kauoha a ka Ahaluna Makua o Kawaiahao, ma o kona Komite la.
JAMES K. KAULIA.
Honolulu, Oct. 10, 1882.