Ka Nupepa Kuokoa, Volume XXI, Number 41, 14 ʻOkakopa 1882 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

KA NUPEPA

KUOKOA ME KE AU OKOA.

[I Huiia]

 

No ka Makahiki.....$2 00

Eono Mahina..... 1 00

Dala Kuike ka Rula

 

POAONO, OKATOBA 14, 1882.

 

I LA HOU NOU NO IESU.

 

(One more day's work for Jesus.) Gospel Hymns. No. 28

1.

I la hou no'u no Iesu,

I hana hou ae au,

Kuu oli ia, a me kuu lia,

E hana no Iesu.

Kuu Kia Ao, kuu Lama ma ka po.

 

Cho. - I la hou no'u no Iesu,

            I la hou no'u no Iesu,

            I la hou no'u no Iesu,

            I hana hou ae au.

 

2

I la hou no'u no Iesu,

Kuu Moi nani e.

E mililani i Lima nani,

A oli hoomaikai,

Kuu Hoku Ao, kuu Alakai a mau.

 

Cho. - I la hou no'u no Iesu, &c.

 

3

I la hou no'u no Iesu,

Kuu hana maikai nei,

E hai aku la i kuu Iesu la,

Kuu mea e ola'i.

Kuu Lama lai, kuu Kahu makamae.

 

Cho. - I la hou no'u no Iesu, &c.

 

4

I la hou no'u no Iesu,

I luhi hou ae au.

He oli ko'u la ke luhi Nona.

He maha ko'u ma o.

No ia la au, no ia la no a mau.

 

Cho. - I la hou no'u no Iesu, &c.

 

5

E hana au no Iesu,

E hana a luhi pu

He maha lani, he waiwai nani,

Ke waihoia no'u

He oli ko'u ke hana hou au Nou.

Cho.    I la hou no'u no Iesu, &c.

HAWAII.

 

HAAWINA KULA SABATI.

 

HELU 5, SABATI, OCT. 29.

 

Kumuhana Ke kumakala'na me ka hopula'na o Iesu. Pauku Baibala - Mar. 1@:43 54

            43 I kana olelo ana, hele koke mai la o Iuda, kekahi o ka poe umikumamalua, a me ia no na kanaka he nui loa, me na pahikaua, a me na newa, na ka poe kahuna nui mai, a me ka poe kakauolelo, a me ka poe lunakahiko.

            44 A o ka mea nana ia i kumakaia, ua haawi ae oia i hoailona na lakou, i ae la, O ka mea a'u e honi aku ai, oia no ia, e hopu aku iaia, a e alakai paa aku.

            45 A hiki mai la ia, alaila hele koke aku la ia i ona la, i aku la, E Rabi, e Rabi; a honi aku la iaia.

            46 Lalau aku la ko lakou lima iaia, hopu iho la.

            47 A o kekahi o lakou e ku ana malaila, unuhi ae la ia i ka pahikaua, hahau aku la i kekahi kaawa o ke kahuna nui, a oki ae la i kona pepeiao.

            48 Olelo mai la Iesu, i mai ia lakou, Ua hele mai nei anei oukou iwaho nei, me na pahikaua, a me na newa e hopu mai ia'u, me he p@wa la?

            49 Me oukou no au i noho ai iloko o ka luakini, e ao ana aku i kela la i keia la, aole oukou i hopu mai ia'u : aka, e hookoia mai no nae ka palapala hemolele.

            50 Haalele aku la kana poe haumana a pau iaia, holo aku la.

            51 Hahai aku la kekahi kanaka opiopio iaia, e aahu ana i ke kapa olona ma ka ili, lalau iho la ka poe koa iaia.

            52 Haalele iho la ia i ke kapa olona, a holo kohana aku la, mai o lakou aku.

            53 Alakai aku la lakou ia Iesu i ke kahuna nui : ua akoakoa pu mai no me ia ka poe kahuna nui a pau, a me ka poe lunakahiko, a me ka poe kakauolelo.

            54 Hahai mamao aku la o Petero iaia, a hiki i ka hale o ke kahuna nui : a noho pu ia me ka poe kauwa, e lalana ana iaia iho i ke ahi.

            Pauku Gula.    Mar. 14:51.

            Manao nui.      He hewa nui loa ke kumakaia ana ia Iesu.

            Na heluhelu la. 1. Mar. 14:43-54.  2. Mat. 36:47-58.  3. Luka 22:47-55.  4. Io. 18:2-18.  5. Mat. 27:3-10.  6. Oih. 1:15-26.  7. Hal. 55:1-14.

            Ka manawa. Ap. 7, mawaena o ka hora i me ka @. Poalima kakahiaka, A.D. 33.

            Kahi i hanaia ai. Ka mala o Getesemane me ka hale o ke Kahuna Nui ma Ierusalema.

            Na hi. Oia mau alii no o ka Helu 4.

            Mele. "He Leo Kahea." Hoku Ao Nani, p. 146.

            Pule i hooloheia ia leo kahea.

KA WEHEWEHE ME KA NINAU ANA.

Elua Mahele nui.

            1. Ke kumakaia ana, p 43-45.

            P 43. Mahea Iesu? p 32. I ka Iesu olelo ana i ke aha? p 42. Owai kai puka koke mai? Iuda hea keia? Iuda Isekariota. p 10. Ua kapaia o Iuda Isekariota. no ka mea paha, no Keriota oia, he kulanakauhale ma ka aoao hema o Iuda. Oia kekahi o na haumana he ia a Iesu i koho ai, Mat. 10.4 No ke aha Iesu i koho ai i keia kanaka hewa i haumana nana? Ua akaka iaia ke kumu. He hana kana e hana'i, he hana kupono ole i kekahi haumana e ae ke hana.

            Owai kai hele pu mai? Nana hoi Io. 18:3,12: Luk. 22:52: Io. 18:10. Lehulehu no. Me ke aha ko lakou hele ana? Me na pahikaua, na newa, na kukui. He mahina konane no, aka, he wahi malumalu a pouliuli paha ia i ka nui o na laau.

            P 44. Heaha ka hoailona a ke kumakaia i haawi e mai i maopopo ka @ lakou e hopu ai?

@ ha ka Iuda mau olelo @. E ke Kumu, e @ aha ia i hoo@ @ hoi keia? @ kuma@ @ oia ia @

            P 46. Ia Iuda e honi ana ia Iesu, pehea na kanaka? Ua akaka ia lakou ka mea a lakou i manao ai e hopu. Ua ninau no oia ia lakou, ke imi nei oukou ia wai? Pane lakou, Iesu no Nazarea. Olelo Iesu, owau no ia. Makau nae lakou e hopu koke.

            P 47. Heaha ka hana a kekahi haumana? Owai ia haumana? Petero. Aha oia me kana pahikaua? Owai ia kauwa? Nana Io. 18:10. Ua hoapono anei Iesu i keia hana a Pileto? Pehea hoi Iesu i ka pepeiao i oki ia? Luka 22:51. Kuhihewa na haumana, kuhi lakou, aole hiki ia Iesu ke malama iaia iho, aole hiki ke pale aku i na enemi, oiai ua hiki no iaia ke luku koke ia lakou a pau. Aka, aole oia i hele mai e pepehi i na kanaka ; ua hele mai oia e hoola. Nolaila kona ae ana e hopuia, e kaulia ma ke kea, i loaa ka mea e ola ai na kanaka. Ina ua pale aku Iesu i ka hopu ana me ka make ana, aohe mea e ola ai kakou. Pau pu kakou i ka make.

            P 48, 49. Heaha na ninau a Iesu i ka poe i hele mai e hopu iaia? Ua ike anei lakou i kekahi hewa e pili ana ia Iesu? No ke aha ko lakou hopu ole ana iaia mamua? Ua imi no e hopu. No ke aha ka hopu ole? No ka mea, aole hiki mai kona manawa. No ke aha keia hopu ana? Mahea ka wanana i hookoia? Aole i kakauia ka hopu ana, aka, ua kakauia kekahi mau mea e pili ana i ka hana ino ia ana o Iesu, Hal. 22, Isa. 53.

            P 50. I ka hopuia ana o Iesu, pehea na haumana? Ko anei ka Iesu olelo? p 27, me Zek. 13:7. No ke aha ko lakou haalele ana ia Iesu? No ka makau paha o make pu. Ua naaupo na haumana ia manawa. Aole akaka ke ano o kona aupuni. Aole i manao e make ana Iesu. Ua hai e aku no Iesu ia lakou e make ana oia me ka mainoino. aole nae akou i hoomaopopo.

            P 51. He kanaka opiopio keia. He haumana paha na Iesu. Ma ka manao o kahi poe o Mareko no ia. Na haumana he 11, ua holo a pakele i ka hopuia. Keia haumana, ua pipili no, ua hahai mamuli o Iesu. Ua aha ia nae oia? Ua lalau ia.

            P 52. Pehea oia? Haalele i kona aahu, a holo kohana aku, a pakele i ka hoopaaia. Makau no i ka hoopaa pu ia me Iesu. Aole makaukau a ae e make pu me Iesu. Ua loaa nae ka makaukau mahope iho.

            P 53. Ua hoopaaia Iesu i ke kaula, ua alakai aku lakou iaia i o wai la? Kaiapa ke kahuna nui, na na koa o Kaisara i alakai iaia ma ka po mai Getesemane a hala ae o Kederona, a pii ae i kahi kiekie a hiki i ka hale o Kaiapa. Owai kai akoakoa malaila? He mau lala keia no ka Aha Hookolokolo nui ka Sanederima, na lala e imi ana e hoahewa ia Iesu. E kali ana lakou i ka puka ana o ka poe i hoounaia aku e hopu ia Iesu a e alakai iaia malaila.

            P 54. Owai kai hahai mamao aku? Petero la. Ua haalele no oia iaia, hahai no nae. Aole pau ke aloha. Hahai kaawale aku nae. A hiki i hea? A aha oia malaila? Makemake oia e ike i ka hope o keia hopu ana ia Iesu.

KA HOOPILI ANA.

            1 Akaka ko Iesu ano Akua ma kona ike e ana ia Iuda ma e hele mai ana e kumakaia iaia. He hele malu ia. Nawai i hai? Na Iesu no.

            2 E hoomanao, ina he manao kumakaia, he hana kumakaia ia Iesu ka kekahi, ua akaka ia ia Iesu. Aole hiki ke huna. He olelo hookamani anei kou? He honi hookamani, he honi kumakaia anei kou? Ua akaka ia ia Iesu.

            3 E nana ia Iuda e kuai ana ia Iesu kona Haku no na apana dala ke 30. E nana iaia e alakai ana i na enemi ma ka po i kahi malu o Iesu. E nana iaia e honi ana ia Iesu, e haawi ana iaia iloko o ka lima o na enemi. Lalau lakou iaia, a hoopaa i kona mau lima me ke kaula mahope o kona kua. Ka mihi koke iho la ia ona. Lawe oia i na apana dala he 20, a hoihio aku i na kahuna, me ka olelo, Ua hewa au i ke koko hala ole. A hele a kaawe iaia iho. Alaila, e hoomanao, he hewa nui ke kumakaia ana ia Iesu. He hewa nui ke kuai ana i ka pono ekalesia no kekahi mau dala. no kekahi mau lealea, no kekahi mau hewa i minamina ia. Aia o Iuda Isekariota ma ka lua ahi pio ole i keia wa, e mihi uwe makehewa ana no kona kumakaia ana i kona Haku.

            Mai kumakaia kekahi ia Iesu. Mai haalele kekahi ia Iesu no ka makau i ka poino, i ka make o ke kino.

            Mai nana ia Iesu, a hahai ma kahi loihi. E hoopili loa iaia me ka ae e hahai pu me ia a hiki i ka make.

            Mele. "Bula Lai," Hoku Ao Nani, p 150.

            Pule i naue aku ia aina.

            Haawina no Nov. 5, Mar. 14:55-72.

 

KE OLA O KA LAHUI.

            Oiai, ke kamailio nui ia nei e ko kakau mau nupepa, a me kekahi poe kalaimanao no ke ola a me ke emi o ka lahui, nolaila, ua lana ko'u manao e kamailio pu aku me lakou malalo oia kumuhana, a maluna hoi o keia ninau: Heaha ka mea e ola ai, a e ulu ai, a @, a lehulehu, a piha ka aina i na ka@?

            Mamua o ko'u hai ana aku i ka haina o ko kakou ninau, e pono au e wehewehe aku i ke ano o ko kakou aina aloha.

            O Hwaii, ua lako oia me na aina momona, me na kualono uliuli, me na kahawai maikai, me na ea oluolu, a he maikai ka makani e pa ana ma ka aina iho, a ma ka moana mai, a he hoea pinepine ole mai na mai ahulau, koe wale no ka mai Lepera e hoomailo nei iwaena o na kanaka; a ua hiki hoi ke noho ia maluna o ka ili o Hawaii me na haneri tausani o na kanaka me ka lawa pono.

            Ua oleloia, i ka wa i hiki mai ai o Kapena Kuke i Hawaii nei, he 400,000 ka nui o na kanaka, a mai ia wa mai ke emi ana a hiki i ke 40,000 a oi i keia wa; nolaila, ua hoea ae na olelo a na kilokilo o ka aina no ke ola o ka lahui, a me na kalaimanao a na loea, a ua poha pu mai hoi he leo aloha mai ka Nohoalii mai, "O ka Hooulu Lahui, oia ka Makia o ke Aupuni."

            Maanei, ua hiki mai la au i kahi e hai aku ai i ka'u haina no ka ninau, a oia keia: "O ka lokomaikai o ke Akua me Kona aloha mau ia kakou, oia ka mea e ola ai keia lahui."

            O Iehova ko kakou Haku, oia ke kumu o ke ola a me ka make. Iaia ka mana ma ka lani maluna, a me ka honua malalo nei. Ina makemake oia e hoonui i na kanaka a nui loa, hiki no Iaia; a ina e hooneoneo i keia lahui a koe ka lepo, he hiki wale no Iaia.

            I mea no kakou e ike ai i ko ke Akua lokomaikai, e nana aku kakou ia Iakoba, a me na keiki na moopuni ana; he 70 ko lakou huina i ko lakou wa i komo aku ai i Aikupita, o Parao ke 'lii o ia aina ia wa, aka, puka mai lakou mai Aigupita mai malalo o Mose, ua manaoia he 2,000,000 ko lakou nui.

            Ua hooikaika o Parao e hoemi i ka ulu nui ana o keia lahui, mamuli o kona luku ana i na keikikane, aka, aole nae emi kela lahui, pii mau no lakou iluna, a loaa kela heluna i haiia.

            No ke aha keia ulu nui ana? Eia, mamuli o ko ke Akua lokomaikai mai me ke aloha ia lakou, no ko lakou paulele me ka hilinai aku Iaia, a pela no o Hawaii nei ke hilinai nui aku iaia.

            A eia keia, ua luku ke Akua i ka lahuikanaka i ka wa o Noa, a i ka lahui Kanaana i ka wa o Iosua, a i na Iudaio e noho haakei ana ma Ierusalema i ka wa o Iesu ma ka honua nei, mamuli o ko lakou mau hewa keia luku ana. Pela auanei ko kakou lahui, ke kokua ole mai o Iehova, mamuli o na hewa a kakou e paluku aku nei imua ona.

            Nolaila, eia ka ninau, Heaha ka kakou e hana aku ai imua o ke Akua i oluolu mai oia. a maliu mai, a aloha mai, a kokua mai, a hoonui hou ae i na kanaka o keia lahui? Ke manao nei au, hookahi wale no haina kupono a kakou e hana ai, oia keia, O ka mihi, a e kapae loa aku i na ano ino a pau.

            Ke i mai nei o Davida, ka mea haku halelu, "O na mohai no ke Akua, oia na uhane mihi, o ka naau mihi me ka pepe, o kau ia e ke Akua e hoowahawaha ole ai." A eia hoi ka Paulo, "Aole no ka hewa e make ai ke kanak. aka, no ka mihi ole."

            Ma keia, e nana aku kakou i na hana a ko Nineva, i ko lakou lohe ana no i ka hua o ka make mai ka waha mai o ka kauwa, no ko lakou hewa, a pau mai ka Nohoalii a i na makaainana, hookahi ke pelu ana o na kuli imua o ka Mea Mana Loa me ka mihi oiaio ana. Ua olelo ka Palapala Hemolele, ua hoopakele ia lakou i ka make. Pehea oe e Hawaii, aole anei he mea pono e hahai aku mamuli o ko Nineva mau hana?

            Pane ia mai paha au, me ka i ia mai, owai iho nei hoi ka Iona o keia mau la i kala hele iho nei ma ke kulanakauhale o Honolulu nei, a ma na pea o Hawaii holookoa, he 46 la i koe, lukuia o Honolulu nei, a o Hawaii paha a pau? Ae, aohe no paha he Iona, aka, he mau leo paha i like me ko Iona. Oia hoi, ma kekahi mau anaina, ua kamailio ia no ke ola o Hawaii, a ua wanana ia ae na hopena o keia lahui, ina me nei mau makahiki aku nei i hala ka nui o na make; a ua hoaiai ia ae hoi iloko o na nupepa o kakou, ma ia mea hookahi no; a ua hala loa aku iloko o ka puuwai o ko kakou Ahaolelo Kau Kanawai, ka noonoo ana no ke ola o ka lahui, a kau loa aku hoi i ka pane poo o ke aupuni, oia ko kakou Moi.

            A eia hoi kekahi, iloko o na helu ana i ka nui o na kanaka mai mua mai a hiki i keia wa, ua ikeia ka emi mau ana o keia lahui ma ka make. A ke makaikai aku i keia wa mai Hawaii a Kauai ma na wahi i noho nui ia e na kanaka mamua, he mehameha wale no ia i keia wa.

            Nolaila. he leo nui weliweli keia e kau mai nei imua o na maka o ke keiki ui, na kaikamahine ui, na makua, na makaainana, na 'lii a me ke Aupuni. Nolaila, heaha kau e Hawaii e hana ai nou? Noho iho anei kuka i puu dala, a i ole e kii aku i ko waho e komo mai i Hawaii nei?

            Ke manao nei au, he makehewa ka manao ana o ke dala ka mea e ola ai ka lahui, a e ulu ai hoi; oiai, nui ke dala a me ka waiwai i ko Sodoma a me Gomora, aole nae pakele i ka luku mai ke Akua mai. Heaha la ia mau waiwai imua Ona? O ka wahine a Lota make pu aku oia me ka waiwai, a o Lota me na kaikamahine kai pakele aku. Pela no o Nineva, aole lakou i ola me na puu dala, aka, ua loaa ke ola ia lakou me ka mihi. Aole au e kamailio ana ma keia no ka maikai ole o ke dala a me ka waiwai, oiai ua ike nui ia ke kuonoono o ke kanaka a aupuni paha me ke dala: he oiaio he mea kokua ke dala i ke kanaka a me ke aupuni, he mea e hooholo pono ai i na hana, a he mea e pale aku ai i na pilikia o keia noho ana kino, a pela aku. Aka, o ke ola o ke kanaka, a me ka ulu ana o ka lahui, aole ia e hiki e uku ia me ke dala, aia wale no ia i ka lokomaikai mai o ke Akua.

            Nolaila, o na imi ana a me na noonoo ana, o ka Ahaolelo a me ka Ahakukamalu, ka hoonoho ana i Papa Ola, ka pai ana i na Buke o ke Ola Kino, a pela aku. he mau mea wale no ia ma ka aoao o ke kanaka e imi nei i mea e pale aku ai i na pilikia e kau mai ana maluna o ka lahui. A pehea, ua ulu anei ka lahui? A ua auhee aku anei na pilikia mai ka aina aku? Eia ka mea e ikeia nei. ke mau nei no ka lawe ana aku a ka make, a ke unu aku nei no hoi na lima lawelawe o ke aupuni i na hoakanaka i loaa i ka mai lepera, i Kalawao, a he pihe uwe kumukena ke lohe mau ia aku nei ma na kapakai ou e Hawaii.

            E kala kahiko na kanawai, na Papa Ola, na puu dala i hookaawaleia no ke ola o ka lahui, he mau makahiki lehulehu i hala aku nei, a pehea ka lahui? Ke mau nei no ka emi, a ke mau nei no ka anai a ka make, a ke mau nei no hoi ka pulumi a ka mai hookaawale ohana.

            Nolaila, he wa pono keia, e huli aku ai ka lahui imua o ka Mea Mana Loa, mai na 'lii a i na makaainana, hookahi ke pelu ana o na kuli imua ona, me ka haalele aku i na hewa a pau, e like me Nineva. A e malama loa hoi i na kanawai a me na rula o ke ola kino. E ola o Hawaii i ke Akua.

DAVID KEAWEAMAHI.

 

KE DEREGONA ULAULA.

 

UA HOOPAAIA OIA MAMUA. UA HOOKUU IA NAE OIA I KEIA WA. E MAKAALA OE O ALE IA.

E ka Lahui Hawaii mai Hawaii a Niihau; Aloha oe:-

            Maloko o Feberuari, ua koho oe i mau Lunamakaainana e hele i ka Ahaolelo Aupuni e imi pu me na Luna Alii me ka Moi i na mea e pono ai oe.

            Ua hele lakou, ua hana; ua imi kekahi poe i na mea e pono ai oe, a o kekahi poe, ua imi lakou i na mea e poino ai.

            O ka hapa mua, ua hooikaika e hoopaaia ke Deragona Ulaula, e like me kona paa mua ana. O ka hapa hope, ua imi ikaika e hookuuia ke Deragona Ulaula. Ua kokua ia lakou e kekahi poe Luna Alii, me ka Moi pu, a ua lanakila. Ua hookuuia ka Deragona Ulaula, a ke holoholo nei oia i o ianei e imi ana i kana mea e ale ai.

            Owai ua Deragona Ulaula nei? Ka Rama me kana mau keiki deragona, ka waina, ela, pota, gini, wiseki, barani, bia, saida, na mea ona no a pau. Ke holoholo nei lakou nei i o ianei, e imi ana i na mea i makemake e kuai aku. E kahea ana, Auhea oukou ka poe i makemake e kuai liilii aku i na mea ona? E ku a hele imua o ke Kuhina Kalaiaina, me ka pakahi o ke tausani dala, me kou hope hoi, i bona no kekahi tausani dala hou aku, alaila, e loaa ana ia oe ka laikini e kuai aku ai ia mau mea ona. He aupuni aloha kakou e Hawaii, e noi ana i kekahi keiki au i hookahi tausani dala e waihoia iloko o kona opu i mea aha? I mea e hiki ai ia oe ka mea nona ua laikini nei e hoohei a alakai i ua Deragona Ulaula la me kana mau keiki, iwaena o na kanaka, o na ohana, o na kula, i haehae ia a weluwelu, i ale ia a nalowale.        

            Mai kuhihewa oe e Hawaii; he kanawai ikaika keia; ua hanaia i mea hoohaiki i ka puka e loaa ai ka laikini, i mea e emi ai ka ona, ke kuai ana i na mea ona. Hea mea aha ka hoi ia? He mea ia, he lua mimilo e moni ana i kau dala.

            Ke dala, ka puni dala ke kumu o keia kanawai. E nana oe: Hookahi tausani dala i moni koke ia e ke aupuni. Kona makemake ia o kau dala, aole imi ke aupuni i kou pono, i kou pomaikai, aka, ke imi nei oia i kau dala, me ka nana ole i kou poino e loaa pu ana me kou dala.

            Kau dala hoi ka mea i makemake ia e kou mau Lunamakaainana i kokua i ka hana ana, me ka hooholo ana i keia kanawai rama. Ua ike lea no lakou, aole he kanawai keia e pono ai oe, aka, he kanawai no e poino ai oe. Ma ka nana aku e hui ana lakou me kekahi poe e ae, he mau Luna Aupuni paha, me ka poe kuai, e haawi ana i ko lakou mau dala a hiki i ka hookahi tausani, i mea e loaa ai ka laikini no ka mea e kuai ana. A o ka puu dala e loaa ma ke kuai ana, e puunaue ia ana ia mawaena o ka mea kuai me ka poe kokua i ka imi ana i ke tausani dala no ka laikini. E makaala oe.

(Aole i paa.)

 

NA HOOLAHA.

 

MAIKAI KA HOI

KA PAPA,

-A ME-

KA LAAU O KOU HALE.

NOHEA LA?

KAI NO HOI NO KAHI O

WAILA MA.

 

Nana aku no hoi ia la ohi ka lo o ka laau o Makawao, i ka ua mea hoi o ka nani.

NA PAPA! NA PAPA!

A ME

Na Pono Kukulu Hale

O na Ano no a Pau.

AIA MA KE KIHI O NA ALANUI

Papu me Moiwahine,

HONOLULU.

Malaila e loaa ai e like me ka makemake no ke

KUMUKUAI MAKEPONO LOA.

 

PAPA! PAPA! PAPA!

NA PAPA HULUHULU,

NA PAPA MANOANOA,

NA PAPA I KAHIIA,

NA PAPA KEPA,

PAPA HOLE KEOKEO,

PAPA HOLE ULAULA.

 

Na Laau, Na Laau,

NA KUA,

NA KAOLA,

NA AAHO,

NA MOLINA,

NA PEAPEA.

            PINE HULUHULU,

            PINE I KAHIIA.

NA PAPA A ME NA LAAU ULAULA.

PILI ULAULA,

PILI KEOKEO,

PANI PUKA,

PUKA ANIANI,

PANI PUKA ANIANI,

PUKA OLEPELEPE.

 

PENA

O NA ANO A PAU,

Hulu Pena mai ka liilii a ke nui, Aila Pena, Aila Hoomaloo, Waniti, Pate,

Na Lako o kela a me keia Ano.

NA AMI PUKA ALE,

NA AMI PUKA PA,

ANIANI.

PEPA HALE A ME NA LIHILIHI,

E loaa no malaila.

 

PAAKAI HELU 1,

O

KAKAAKO ME PUULOA.

 

            No ke Dala Kuike, e loaa no na mea a pau i hai ia ae la, no ke Kumukuai Emi Loa. O na Kauoha mai Hawaii a Niihau, e loaa aku no ia lakou, e hooko koke ia no ia me ka lawa pono. E kipa nui ilaila i ike i ka oiaio.

905-tf

 

HE NUI ANEI KOU MAKEMAKE I NA

Mikini Humuhumu Lole!

Ina pela, e kipa mai no ma ka Halekuai o

Kakela & Kuke!

A malaila oukou e ike ai a makaikai i na ano

Makini a WHEELER a me WILSON

mai ke $40 a hiki i ke $50 ke kumukuai ka mea hookahi

NA MIKINI A SINGER!

ma ke $30 pakahi me ke ano

MIKINI A WIILCOX ME GIBBS

ma ka $30 a hiki i ke $40 ke kumukuai.

I mea e pau ai ko oukou kanalua e na makamaka no ke kupono o keia mau Mekiai, e nane mai no me ke kuike ole, a e ike no oukou iho.

603 tf

 

NA HOOLAHA.

 

NA WAIWAI HOU LOA

O NA ANO A PAU.

 

E LOAA NO MA NA HALEKUAI O

WALAKAHAUKI MA!

 

MA ALANUI

Papu, Moi a me Moiwahine

OIA HOI:

Na Noho Lio hou loa o na ano a pau, Na Palule Keokeo, Huluhulu, o na ano a pau, Na Pio Ahinahina Pelekane hou loa o na ano a pau. Na Pena Kukoepele. Na Kopa Bulu. Na Lole o na Wahine o na ano a pau. Na Pahu Aila Mahu maikai loa. Na Silika, Pahoehoe, o na ano a pau. Kihei o na ano a pau.

 

HAINAKA LAU NUNUI SILIKA O NA ANO A PAU.

 

He nui aku no i koe, he piha pono na Koluma o ka pepa, ina e huai pau ia aku nei.

 

E hou ae a hoea mai i keia mau la iho he Lako Wafwai hou loa o na ano a pau, a he lako hou loa i wae pono ia e J. T. WATERHOUSE, JR., ma Enelani, a he mau waiwai hoi i kupono loa no ko kakou mau kaiaulu. Nolaila, e eleu mai e na makamaka a me na hoa'loha e hoonuu i keia mau lako waiwai hou loa.

1076-3m

 

NU HOU! NU HOU!

 

Na Waiwai Hou Loa!

NA PAIKINI O KEIA AU.

 

E Loaa no ma ka ha Halekuai o

DILINGHAMA MA.

Ma Alanui Papu.

 

Oia na waiwai alalo iho nei:

Na Palau, Kaa Huilapalala, Kopala, Piki, Oo, Koi, Koilipi, Na Hamare Kamana o na ano a pau, Na mea Hana a na Kamana, Poe Hamo Puna, na Amara a me na mea hana o ka Poe Akeakamai a pau. Pena Aila, Vaniki a me na Palaki, Pauda, Poka, a me na Kukaepele, Palaki Hamo Puna, Pulumi Pakeke, Kapu Holoi Lole a me na Papa Holoi Lole, na Iputi, na Pa Palai, na Makau Lawaia, Na Aho Lawaia o na ano a pau, na Kaula o na ano a pau, na Paki, O, a me na Puna, a he nui aku no na mea i koe.

I KUPONO NO KA HOOHIWAHIWA ANA !

NA HALE.

 

I hiki ole ia makou ke huai pau aku, aka, na oukou no e hele mai a e hoonuu iho. O keia maluna ae, e loaa no ma ka halekuai o

Dilinahama Ma,

1036-3m]Ma ka helu 37, Alanui Papu.

 

NA HOOLAHA.

 

PAPA! PAPA!

NO

ALLEN & ROBINSON

 

Ua wehe ae nei ma@a i

PA KUAI PAPA.

MA

Ka Uwapo o Pakaka.

 

Na Papa Ulaula o na ano a pau.

Na Papa Paina o na ano a pau.

Na Pili Hale Ulaula.

Na Pili Hale Keokeo.

Na Pepa Molina.

Na Pepa H@.

 

Na Pona a me na Aila Pona

Na kui o na ano a pau

Na Pani Puka a me

Na Pani Puka Aniani.

Na Pani Puka a me

Na O@

 

NA LAKO KUKULU HALE

O NA ANO A PAU

 

E kuaiia ma

KE KUMUKUAI HAAHAA @

O keia Makeke.

PAPA! PAPA!

AIA MA KAHI O

LEWERS & COOKE

(O LUI MA)

ma ke kahua kaniko ma

Alanui Papu a me M@

E loaa ai na

PAPA NOUAIK@

o kela a me keia ano.

Na Papa Nani a Paa no ke Kukul@ ana i na Hale!

 

Na Pani Puka, Na Puka Aniani, Na Olepe@, Na Pou, Na O-a, Na Papa Hele, Na P@, Ku, A me na Papa Moe ma@

Na Pili o na Ha@

O NA ANO A PAU.

 

Na Pepa Hoonani, Na Pena o na Wa@, Na Kui mai ke Nui a ka Makalii, Na A@ Puka, Na Ami Puka Aniani, Na A@ o na ano a pau, Na Aila Pena, kela me keia ano Na Aila Hoomaloo, he lehulehu wale. Na Aila e ae o na ano a pau.

NA WAI VANIK

A ME NA

WAI HOOHINUHINU NANI

O NA ANO A PAU LOA.

NA BALAKI ANO NUI WALE

A ke hai ia aku nei ka lono i na Maka@ pau, ua makaukau keia mau Maka@ o oukou e hoolawa aku ma na mea a pau e pili ana ma ka laua oihana

NO KA

Uku Haahaa Loa

E like me ka mea e holo ana mawaena LAUA a me ka MEA KUAI

E Hele mai! E na Makamaka

A e lawa no hoi ko oukou makemake me ka oluolu a me ka maikai.

 

UA MAKEMAKE IA

NA ILI BIPI, NA KIWI BIPI, NA IWI BIPI,

            E haawi ia no ke kumukuai kiekie @ kou makeke nei e

H. HACKFELD & CO.

Honolulu, Mei 22, 1880.

 

MAKEMAKEIA.

            Ua makemake ia ka poe mea ILI KA MALOO a me na ILI BIBI, a pela @ na ILI MIKO o na ano a pau, e kuai @ lakou mau ILI me makou, a e haawi @ kou i ke KUMUKUAI  KIEKIE LOA @ kakou Makeke.

C. BREWER & CO. (Burna Ma.)