Ka Nupepa Kuokoa, Volume XXI, Number 37, 6 September 1882 — Page 1
| This text was transcribed by: | Leslie Foster |
| This work is dedicated to: | Awaiaulu |
Ka Nupepa Kuokoa
KE KILOHANA POOKELA NO KA LAHUI HAWAII .
BUKE XXI. HELU 37}
KA NUPEPA
Kuokoa me ke Au Okoa
I HUILA.
HE MOOLELO KAAO
--NO--
KEANINIULAOKALANI !
KA NANI LUA OLE
--O NA--
Moku o Kuaihelani
KA MEA NANA I HOONAUEUE
KUKULU O KAHIKI,
A O KE PUKONAKONA
O NA LA I AU WALE AKU LA.
MAHELE II
A WA. kahea aku la o Kaholoholouka ia Kaholoholokai, E auhea oe?
Ea, wahi a Kholoholokai.
Ka, hoohaa hoi nei kakahiaka o kaua, wahi a Kaholoholouka.
I ke ahe hoi? wahi a Kaholoholokai i ninau aku ai.
Ka, i ke aha mai ka hoi kau; ke kuhi nei au i keia mea nui i hei mai nei he i-a, eia ka he keiki.
Heaha ?
He keiki, wahi a Kaholoholouka.
Ka, wahahoe wale hoi oe; o ka kaua wahi no hoi keia e lawaia nei aoha lo a keiki ia kaua, wahi a Kaholoholokai.
Ka, pela no hoi paha; a he hao wale hoi keia, ma no paha oe e nana mai ana la.
A no ke ano mamao iki aku o Kaholoholokai, me ke ano poeleele, nolaila aohe ona ike maopopo mai; nolaila kahea mai la ia me ka leo hoinaina, Waiho ia aku ia mea, a lawe hou mai oe i ka upena, eia no ka i-a ke kaalo nei.
Pane aku la o Kaholoholouka, E hoi kaua, no ka mea, ua loaa iho la no ka'o keiki; ma no he makemake koa i ka i-a. kii mai no i ka upena, owau nae, eia au ke hoi nei.
Pela iho la laua nei o ka hoopaapaa ana a malamalama loa, a i nana mai auanei ka hana o Kaholoholokai, e hii aku ana o Kaholoholouka i ua keiki nei. Miki mai la o Kaholoholokai a ka li aku la i ke keiki, a o ko lau ku ae la no ia holo ana, a o Kaholoholouka hoi, hoka iho la. Ko ianei hopu iho la no hoi ia i ka upena, hoi ana.
Oia hoi no hoi ko laua nei a hoea ana i kauhale. Miki mua aku la no o Kaholoholokai a kana wahi hanaukama me ua keiki nei, a hoikeike aku la, me ka olelo pu aku, he keiki ka maua.
Ninau mai la hoi kana wahine. Ihea kahi i loaa mai nei o keia keiki ia olua?
Ihea mai ka hoi kau; oia iho aku nei no hoi ko maua a kahakai, a kahi no hoi a maua e lawaia mau nei, o ko Kaholoholouka kokolo ae la no hoi ia a kukulu no hoi i ka upena, o ke u kapeku aku la no hoi ia, aole nae au i kokoke aku, o ke iala hapai ae la no ia i ka upena, a i nana aku auanei ko'u hie he mea nui ko loko o ka upena, kuhi aku la no hoi au he i-a, ko iala kaikai aku la no hoi ia a uku wehe mai ana i ka upena, a liuliu kahea mai ana ia'u, olelo mai ana kela he keiki, kuhi aku nei hoi ka'u he hoopunipuni, e a nae hui ko'u ike ana a i ao loa ae, e ko'u holo mai la no ia a hopu no i ke keiki, o ko'u ku ae la no ia hoi mai nei.
Ia laua nei nae e hamamu nei ma ko laua wahi, komo ana no hoi o Kaholoholouka a hai aku la no hoi i kana wahine i ka loaa ana o ka laua keiki. A pela no ko lakou hawawa ana, a lohe aku nei hoi o Luukia, ia manawa ninau ae la o Luukia. Heaha nei o kela hale e hauwalaoa mai nei?
Kahaha, he keiki hei paha, wahi a kekahi e kena mau wahine aialo.
Nahea ia keiki? wahi a Luukia.
No kahakai, i loaa mai nei ia Kaholoholouka ma, i iho aku nei hoi i ka lawaia a hei ana i ka upena ua keiki nei.
Ia manawa kauoha aku la e Luukia ia Mailelaulii e kii i ua keiki nei. O ko Mailelaulii kii aku la no hoi a loaa ua keiki nei ia Wahinenohopali kahi i hii ai; komo aku la o Mailelaulii a noi aku la i ua keiki nei me ka olelo pu aku: I kii mai nei au i ke keiki e lawe i kahi o ke 'lii, ua lohe ae nei ke 'lii i ka loaa ana mai nei o keia keiki ia laua nei, nolaila hoouna mai nei ke 'lii ia'u e kii mai a oia ka'u i kii mai nei.
Alaila, he leo hooko wale ia no hoi ko na 'lii; o ko Wahikenohopali haawi aku la no hoi ia, pa no i ko iala lima ku ae la no kela hoi ana. Oia hoi no hoi ko ia nei a ku ana i ke alo o Luukia. Ia Luukia i ike mai ai i ua keiki nei, he oi aku ka hoohihi o kona naau, a ninau mai la, Pehea i loaa mai nei keia keiki?
Ka, pehea hoi, wahi a Mailelaulii.
Ka, ia wai ka hoi ka loaa ana mai nei, i ninau hou aku ai o Luukia.
Kahuhu, i au mau lawaia ka ka loaa ana mai nei, i iho aku nei paha i kahakai.
Ia manawa kauoha hou aku la o Luukia ia Mailelaulii e kii hou i ua mau lawaia nei ana. Ko Mailelaulii kii aku la no hoi ia a hoea ana keia i kahi o Kaholoholouka ma, oiai lakou e nune ana no ua keiki nei. I ko Mailelaulii hiki ana aku, olelo aku la i ua mau lawaia nei: I kii mai nei au ia olua e iho i kai, i kauoha mai nei ke' lii ia olua e iho kakou e hai aku olua i kahi i loaa mai nei o ke keiki ia olua.
He mea malama wale no hoi ia no ka mea he kauoha na ke'lii. O ko lakou nei ku ae la no ia iho ana, a hiki lakou nei i kai, a ku ana imua o Luukia, pa no hoi kahea a ka mea hale maloko, komo aku la no hoi lakou nei a noho ana; pa no ka ninau a ke 'lii: Ihea kahi i loaa mai nei o keia keiki ia olua?
Hahai aka la no hoi o Kaholoholouka e like me na olelo maluna. A pau no hoi kana mau olelo, ia manawa olelo mai la o Luukia. Owai i ka makua o keia keiki?
Ka, owai hoi; me he mea la no a o ke keiki no keia a Hainakolo ma, no ka mea ua ike no oukou i ka hanau ana, eia hoi ka mea kupalanaha, ua hele aaia hoi ia me kana keiki, a me he la ua make laua, aka o keia keiki na maua no. no ka mea i loaa no ia maua, oia ka'u e hai aku nei imua ou e ke 'lii.
A pau ka Kaholoholouka mau olelo, olelo aku la o Luukia. Heaha la hoi kana, na olua no hoi paha keia keiki, a o ka inoa hoi ko'u, e kahea iho olua i ka inoa o ke keiki a olua o Lopaikihelewale, a na olua no e hanai a nui.
I ka mohala pono ae o na papalina o ka la e kupono i ke Kau, ua akoakoa mai la na mea a pau o ke alo alii, a lilo nui aku la ko lakou manao ma ke keiki wale no, no ko lakou ike ana iho i keia keiki he oi aku o ka maikai, a eia wale no ko lakou hoohuoi o na makua, owai la ka makuahine o nei keiki, auhea la hoi ka makuahine; a he mea pahaohao keia ke hoomaopopo aku, aka o na mea i loaa ai o ua keiki nei ua kani iki ka laua la uka; eia nae ke ohumuhumu liilii nei laua i ko laua wahi e noho ai me ka laua keiki, a hooholo iho la laua iuka o Opaeloa, oia kahi kupono a laua e hanai ai.
E na hoa hooniponipo o keia kaao, pehea ko kakou manao no keia keki i ka manawa ma ka lima o keia poe, oiai lakou e hauoli nei no ka loaa ana o keia keiki; he mea maopopo he keiki omo waiu keia, aka ua pau pono ua olelo a lakou i ua keiki nei aole hookahi olelo a lakou i koe, ua pau loa i ka paanaau i ua keiki nei; aka ua manao paha lakou aohe keia i lohe i ka lakou mau olelo, nolaila aohe o lakou manao ae ua maopopo wale no iaia nei na olelo a pau.
Ia Kaholoholouka ma hoi i makaukau ai e hoi me ka laua hanai, olelo aku la o Kaholoholouka ia Luukia, E ke 'lii e, ke makaukau nei makou e hoi, eia nae ka'u kauoha ia oe, nau no e lawe ae ka ai, ka i-a, ke kapa, a o na mea no a pau a maua e kauoha mai ai, malaila wale no oe e hoolohe ai. He ae wale no hoi ka Luukia.
Ia manawa, o ko lakou nei ku ae la no ia hoi ana. Ua maopopo i ko Wa'pio poe e noho nei, o keia wahi a lakou e hoi nei he pili wale no, he wahi wai e lele pololei ana ilalo o ke kahawai nui o Waipio, a he kaulu nae aia iawena o ka pali, o ko lakoa nei wahi ia o ka noho ana; a o keia wahi wai e lele pono iho ana maluna o ko lakou nei wahi pupupu hale malaila lakou i noho loihi ai. A no kekahi manawa, ua hoouna pakahi aku la o Luukia i kona mau kaikaina e pii e nana i ua keiki nei a lakou. A i ka manawa i nui ae ai o ua keiki nei, ua nui like no me koua nani, a ua lilo loa i pulakaumaka na kona mau makua hanai. I ka manawa nae o ka loaa ana o ua keiki nei ia Kaholoholouka ma i kahakai, aia pu no me ua keiki nei ke 'kua o koua mau kupuna, a na ka mana o keia mau akue i hoomalie i ke kai a hiki i ka loaa ana ia Kaholoholouka ma.
Pehea la ka noho ana a ko Waipio poe i keia manawa? Kahunu ! Kai no hoi ke noho kumakena nei lakou no ka nalowale ana o Hainakolo me kana keiki, oia ka hana nui oia mau la. Ae, malaila aku kakou e makaikai ai.
O Ku a me Hina, me Olapana, ua hoi ae lakou i Pakaelana e kapu heiau ai, i mea e laka mai ai ke 'kua, i ike ai lakou i kahi a Hainakolo ma i hele ai me kana lei he keiki; a o na makuakane hoi o Keauiuiulaokalani oia hoi o Keaumiki me Keauka, aia pu no lakou ke noke nei i ke kahea i na 'koa o lakou, he ole nae ka maliu ia mai; ma ka nana uli hoi o na ike kilokilo, aohe wahi kahoaka o ka ike ia, nolaila nui loa ae la ko lakou kumakena ana. Nolaila hooholo iho la lakou ma o Keauka wale no e loaa ai ia lakou he pono; nolaila hoouna aku la o Keauka i kona kaikuaana ia Keaumiki e kii i mai iliili i Keaau, oia hoi na iliili o Aalmanu; aia keia wahi ma o aku o Haena; ua ike ko Puna poe i keia wahi.
I ko Keaumiki kii ana i ua mau iliili nei, a mamua ae o kona hele ana, na kauoha mai la kona kona kaikaina penei: He umikumamakolu au iliili e lawe mai ai, ehiku mau iliili keokeo a i eono hoi mau iliili eleele, puolo no hoi a paa i ka oloa, alaila, hoi mai oe a loko o Panewa aia alaila ka awa, oia ka awa maikai no ka mea aole na ke kanaka i kanu, he awa kela na ka .. anu i kanu; a loaa ia mau mea ia oe hoi mai oe a keia ahiahi kakou nana , a i ku no hoi i kahi o ka pono, pono no hoi, aka i ku i ka hewa, oia iho la no hoi.
(Aole i pau.)
KA MOOLELO
--O--
ONILA MAKA!
KA MAKAI KIU KAULANA
--O--
ENELANI!
--A O KA MEA--
POHIHIHI O KA 1868.
----------
MOKUNA XXVI.
Ike pono ka poe popo i ke ano o ka malihini-- Hoomau ana i ka pepi- - Kekahi mea e pili ana i ka hoa hou-- Lilo ka Makai Kiu a me Keaka Ilikini i mau hoa'loha-- Ko ka Hapa-Ilikini ano ma ke kulanakauhale--Maalea kue ia maalea--Na mea akamai elua--He kono.
I KEIA WA, ua auhee aku la na manao kuhihewa o ka poe e pili ana no kahi maihini hupo, a houiaio iho la lakou he helu ekahi oia ma ia oihana.
Nolaila, ua haka pono aku la lakou maluna ona me ka makaala loa.
I ka ha o ka haawi waiho hou iho la oia he haneri dala maluna o kekahi pepa ana i manao ai.
Ia wa ukali aku la kekahi mau mea elua i kana pili, aka, lawe hou ae la nae oia i kana pili iluna a waiho iho la no hoi ka laua mau pili ilalo a lilo aka la.
Iloko oia wa, aole he mea i pane ae. A ua malamaia hoi ka maluhi o ka aha pepa me ka maikai.
I ka lima hoi o ka haawi ana, waiho hou mai la no ua wahi Geremania nei i kana pili maluna a kekahi pepa.
A ukali hou mai la no kekahi poe mahope o kana pili, aka lawe hou ae la no keia i kana pili, a lilo hou aku la no.
No keia hana kupaianaha a ua Geremania nei, ua kahaha loa na mea a pau.
Nolaila, manao iho la kekahi o lakou, ke hana nei kekahi mea i ka hana kupono ole.
I ke ono o ka haawi waiho hou iho la no ua wahi Geremania nei i kana pili he elima haneri dala maluna o kekahi pepa.
Aohe nae he mea i ukali mai mahope one, a i ka wa o hoohuli ia ae ai o ua pepa la, ua eo aku la iaia, a lawe mai la oia he hookahi tausani dala.
Ia wa, ano pihoihoi mai la ka mea e haawi ana, aka aohe nae oia i pane mai.
Hoomau ia aku la no ka pepa ana, aka aole nae i hoololi ae ua wahi Geremania nei i kona kulana mua.
Aole no hoi oia i hoao hou aku e pili ia haawi hookahi.
Aka, i ka hiku o ka haawi hoomaka hou aku la no ua wahi Geremania nei e pili hou e like me ka mea mau. I keia wa nae ua waiho iho la oia he hookahi tausani dala ilalo.
Ia manawa no hoi, ua ukali mai la kekahi poe iho he lehulehu wale.
Aka, e like no hoi me kana hana mau, lawe hou ae la no oia i kana pili a waiho aku la no hoi kekahi poe iho i ka lakou pili a lilo aku la. Pela i hana mau ai keia a hiki i ka walu o ka haawi, aohe mea i okali aku i kana pili a ao ae la iaia.
Ia wa hoomaka ae la ka poe pepa e hawanawana mawaena o lakou. Me ka hoomaopopo iho ke hanaia nei kekahi hana kupono ole. Nolaila, ua lokahi ka manao o kekahi poe, oia ka mea haawi ke kokua nei i kahi Geremania.
A pane aku la kekahi i ka mea e haawi ana, ma kona inoa:
Auhea oe e Tome, ke hana pono ole nei kekahi e kakou.
No keia pane, ua hoole aku la ka mea haawi.
E hoopau aku i ka pepa ana o kela kanaka, wahi a ka mea mua nana ka pane.
He makemake kou e poho au, oiai he tausani a oi ko'o lilo, me he mea la, o oe ka lawelawe pu nei me kela pio, ino aole, alaila, he akua oia.
I ka wa e hoopanapana ana keia mau mea, aole i pane aku ua wahi Geremania nei, aka kamailio malie aku la oia ia Keaka Ilikini:
No keia kamailio mau o keia wahi opio Geremania ia Keaka, ua hoihoi loa iho la oia, i ka ike ana, ua manao nui loa ia oia e keia kanaka akamai nui wale i ka pepa.
I ka wa i ike mai ai o kekahi poe i ka noho loa o ua wahi Geremania nei e pepa, ku ae la kekahi poe a haalele iho la.
I ka haalele ana mai o ka nui o lakou, ua koe iho la keia me ka mea haawi.
Aole nae oia i hopohopo iki.
I kona ike ana ua koe hookahi oia, hoano e ae la oia i kona kulana e pepa ai a pili ino aku la me ka hoomaopopo ele ae i ka nui o kona lilo, aka, mahope iho nae o na kemu elua ana i pili naaupo aku ai, ku ae la oia mai ke pakaukau mai a nana iho la i kana mau wahi dala, aole oia i lilo aku aole hoi i loaa mai.
Me ka leo akaaka, ku ae la oia a olelo ae la, ua pau ia, a hoomau ia aku la no ka pepa ana mawaena o ka pepa mau oia kahua.
I ka wa nae ana e pepa ana, ua hoao mau oia e eo iaia o Keaka Ilikini
malalo o kana mau olelo wainape.
Iaia i haalele aku ai i ka aha pepa, nui ae la oia a kono mai la ia Keaka Ilikini e ka mau wahi kiaha.
Ia laua e inu ana, hoao iho la o Keaka e hai mai iaia me ke akamai nui no na mea e pili ana i kona ano.
Ma kekahi wahi o kana moolelo i hai mai ai nona iho, ua hoike mai oia he keiki oia na kekahi kanaka mahiko waiwai o Kuba.
A i holo mai oia i Nu loka e hoolawa ai i na iini a kona naau.
A e like hoi me ka mea mau, ua ume ia aku kana mau wahi okeni a pau loa, a e kali ana hoi oia o ka hoea hou mai o ia puu dala ana mai ka home mai.
I ka lohe ana o ka Makai Kiu i keia mau olele, hoao ihe la e huna i kona manao maoli a hoike aku la ia Keaka Ilikini, ua manaoio loa oia i kana mau olelo, a ua hauoli loa hoi kona puuwai i ka loaa ana o kekahi hoa'loha waiwai e like me ia.
Mahope iho o ko laua launa loihi ana, pane aku la o Keaka:
E haalele ia aku e oe ka pepa ana, i kou wa i ike ai ua nui kou loaa.
Ka! He makemake ko'u e heike aku ia lakou i ke ano o ka pepa ana, aohe no ka loaa, wahi a kahi Geremania.
Alaila, o oe hookahi wale no ka mea i manao nui ole i ka loaa, wahi a Keaka, me ka i hou aku: No'u iho, ke malama mau mai nei no ko'u mauakane ia'u me ke dala, aka,he mea hoohauoli nae i ko'u naau ke eo ia'u na dala he nui.
E haele kaua e paina ahiahi, wahi a ka Makai Kiu.
Kanalua iho la nae o Keaka.
Oi hoi, wahi a kahi Geremania; Ua hele au a like me kekahi hea pololi, a pau ka kaua ai ana, huli hou kaua i hoa hakoko hou no kaua ma ka oihana pili waiwai.
Na keia mau olelo hope i kono aku ia Keaka Ilikini e hahai mahope o ka malihini, a haalele iho la laua ia wahi.
Ua hai mua aku o Keaka i kona inoa ponoi i kena hoa'loha malihini, a hai pu mai la hoi kona hoa'loha o Alekanedero Lei kona inoa.
Ia laua e hele ana, ua lilo i mea aka na ka Makai Kiu na mea liilii a pau a Keaka e kamailio ae ai.
Haele aku la laua e paina, a i ka pau ana, komo aku la laua iloko o kekahi hale pepa hou.
Alakai aku la o Keaka Ilikini ua laua a komo iloko a hui aku la me na hoa'loha oia aha pepa.
A noho iho la o Keaka e pepa pu me ka poe pepa, oiai, ua haawi mua aku kahi Germemania opio iaia i mau dala.
Aka lilo aku la nae o Keaka.
Ia wa, hoomaka aku la o Alekanedero Lei e pepa.
Aka, iaia nai i pepa aku ai, ua eo mai la iaia nei na dala o Keaka i lilo aku ai me hookahi haneri dala ka oi aku.
Pela iho la i hele like ai laua mai ia hale aku a ia hale aku, malalo o ke alakai a Keaka.
Ua pili no hoi laua iloko o kela a me keia hale a laua i komo aku ai, a ma na hora o ke aumoe, hoomaka iho la oia e helu i kana mau dala, a ike iho la aole oia i lilo aole no hoi i loaa mai.
Ia wa, hooholo iho la Keaka e hele laua e nana i kekahi mokuahi a iluna hoi olaila e hoao hou ai laua e pepa me ka poe o luna.
He ukiuki ko'u ia lakou, a he makemake ko'u e pau lakou ia'u i keia po, wahi a Keaka, me ka olelo hou aku. Me kou akamai a me ka manao pihoihoi ole ke lana nei ko'u manao e eo ana lakou ia kaua.
Ia wa, hoonaona iho la keia e like me kekahi mea i ona loa, a ae aku la i ka Keaka mau wahi a pau e makemake ai e hele.
He hana akamai keia a ka Makai Kiu.
A ua maopopo hoi iaia ke ano o ko Keaka manao o ke kono ana mai iaia e hele laua iluna o kekahi mokuahi e pepa ai.
Aka, malalo o kona ano hou, ua kiai aku oia i na hana a pau a Keaka me ka maalea nui.
He moolelo hoopunipuni wale no ka moolelo o ka mokuahi. i wahi e hiki ai laua i ka uwapo, nolaila hoopuka ai oia i kela mau olelo.
Malia ia laua e hiki aku ai i kai o ka uwapo e hoao mai ai oia e powa iaia, a i ole e pepehi mai iaia a make.
Oiai, ua ike o Keaka Ilikini i ka nui o ke dala a kahi Geremania iaia e pili naaupo ana.
Aka, i hoikeike maoli ae no ka Makai Kiu iaia e pili naaupo ana i wahi e kono ia aku ai o Keaka e hoaikane me ia.
He po pouli ua po la a laua i hoomaka ai e iho i kai o ka uwapo kahi hoi o ka mokuahi e ku ana.
Ia laua e hele ana, hoomaka koke mai la no ua Hapa-Ilikini nei e hoike i kana hana ma ka olelo ana mai:
E pono paha kaua e mahele i na loaa o keia po?
Mino aka iho la ka Makai Kiu a pane aku la:
No hea hoi ia mau loaa a kaua?
No ke aha hoi, no ka mea, he elima haneri dala ko kaua loaa i keia po, wahi a Keaka.
(Aole i pau.)
_______________________
Kokua Luakini.
-----------------
O keia poe nona ka inoa malalo iho, o lakou kai haawi makana a kokua-no hoi i ke kukulu ana i ea Luakini Hou ma Anahola, Kauai, a i haawi aku i ka lakou mau kokua ma ka lima o ke Komite Hon. G B Palohau.
C Sprecklels - - $100
Waimea - - - 25
W O Smith - - 20
W M Gibsen - - 10
E Preston - - 10
A F Judd - - - 10
J E Bush - - 10
W C Parke - - 10
L McCully - - 10
Char. R Bishop - - 10
Allen & Robinson - 10
J L Kaulukou - - 10
G L Fitch - - 5
E O Hall & Son - - 10
A L Smith - - 5
Thomas Brown - - 10
W D Alexander - - 5
C J Lyons - - - 5
W J Kamika - - 5
Henry S Tregloan - - 5
H Dimond - - - 2
S E Bishop - - 1
Chulan & Co. - - 14
Huina, $202
Hon. G.B. PALOHAU,
Komite Ahahui Opiopio o Anahola.
_________________
------------------------
Ua haulehia mai maluna o S W B Kaulainamoku, hoa kauwa lawelawe hoi o keia nupepa, ke kaumaha a me ka luuluu, no ka laweia ana aku o kana wahine mare, ma ka Poaono, la 9 e keia malama; a ma ka la Sabati nei, ua hoolewaia kona kino kupapau a waiho aku la ma ka pa Ilina o Kawaiahao, " Na ke Akua i haawai mai, o Nana no i lawe aku e hoomaikaiia Kona inoa."
_____________
Ua hoike ae kekahi punahele a Kipikona o na la i hala, i ka wa a laua e noho pu ana ma ke Keena o ka "Nuhou Hawaii," ua hooikaika pu laua ma ka aua ana ia Puuloe, aka ma ka haawi aina iho nei o Kamaomao ua hoowahawaha loa oia ia Kipikona, a ua minamina oia i kona hooikaika ana iho nei ia Kipikona ma ke koho Lonamakaeinana, a "akahi no a kaakaa ko'e mau maka no keia haole". Aloha wale keia kanaka i puni i na pahele a Kipikona i na la i hala, aka, pomaikai oia i koaa ike pono ana i kona ano.
MAIKAI KA HOI KA PAPA
- A ME-
KA LAAU O KOU HALE
NO HEA LA
KAI NO HOI NO KAHI O
WAILA MA !
Nana aku no hoi ia la
Ohi ka lo o ka Laau o Makawao
I ka ua mea hoi o ka oeu
Na Papa ! Na Papa
-A ME-
NA PONO KUKULU HALE
O NA ANO NO A PAO
.
-------------
Aia ma ke kihi o na
ALANUI PAPU me MOIWAHINE
HONOLULU
MALAILA E LOAA AI
E LIKE me ka MAKEMAKE
-NO KE-
KUMUKUAI MAKEPONO LOA
_________
PAPA, PAPA, PAPA,
Na Papa Huluhulu,
Na Papa Manoanoa.
Na Papa i kahiia
Na Papa Kepa.
Papa Hoie Keokeo,
Papa Hole Ulaula.
___________
NA LAAU, NA LAAU,
Na Kua,
Na Kaola,
Na Aaho,
Na Molina
Na Peapea,
Pine Huluhulu,
Pine i kahiia
NA Papa a me na Laau Ulau'a
Pili ulaula,
Pili Keokeo.
Pani Puka,
Pani Puka Aniani,
Ipuka Aniani,
Puka Olepelepe.
_______
PENA O NA ANO A PAU
Hulu Pena mai ka Liilii a ke Nui.
Aila Pena,
Aila Hoomaioo.
Waniti, Pate.
NA LAKO O KELA A ME KEIA ANO
Na Ami Puka Hale.
Na ami Puka Pa.
ANIANI!
Pepa Hale a me na Lihilihi
E LOAA NO MALAILA.
PAAKAI HELU I O KAKAAKO me PUULOA
No ke Dala Kuike, e loaa no na mea a pau i hai ia ae la, no ke Kumukuai Emi loa. O na kauoha mai Hawaii a Niihau, e loaa aku no ia lakou, e hooho koke ia no ia me ka lawa pono. E kipa nui ilaila i ike i ka oiaio. 905 tf