Ka Nupepa Kuokoa, Volume XXI, Number 30, 29 July 1882 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

 

BUKE XXI. HELU 301        POAONO. JULAI 29, 1882       NA HELU A PAU 1078

KA NUPEPA

Kuokoa me ke Au Okoa

I HUIIA

KA MOOLELO

O

ONILA MAKA

KA MAKAI KIU KAULANA

O

ENELANI!

A O KA MEA

HOOHIHIHI O KA 1868

MOKUNA XX

Ka moolelo o ka Umi Dala—Na hana @ kahi po—Ka nuhou mai ke kulanakauhale mai—Ka moolelo a ka Makai Kiu—Nalowale o Mariona—He mau @--Ua hala no ka wa pau ole—Haalele ke pio me ka waiho ole iho i @ --Ka nuhou mai kela a me keia @ wahi mai—Na hana maloko o ke @ o ke Kapena.

Ka wa i lohe ai o Pukela no na kala he umi, hookokoke aku la oia imua o Iolana a hawanawana aku la iaia:

Mai hai aku oe i kekahi mea okoa aku au e hai aku ana ia oe i keia moolelo? 

Aole loa au e hana pela.

Auhea oe, ke hai pololei aku nei au ia oe hui pu kela kanaka me na kupua.

Ka! Ua ona ka paha oe?

Aole au i ona no ka mea, ma keia la iho @ hoohoka mai oia ia’u no ka @ o kana ai, aka ua lilo nae kona mau @ i mea aka wale ia no e a’u; a eia aku ke kupanaha; heaha kou manao no ! ka aina awakea?

Heaha ka @ kana hana i hana ai?

@ Kai no hoi, kii akku la oia i ke @ kupua a hoouna mai la e noho @ kona wahi a hele aku la kela e huli ai @ awakea maikai nona.

Aue au i @ aku nei e uku ia oe no kena @ olelo hoopunipuni au?

Auhea oe, ke hai aku nei au ia oe he oiawale no ka’u mau olelo a pau e hai aku @ ka hoike aku la ua wahi wiliki @ ua hana a pau i hana ia e kahi pio kupanaha.

Hoolohe mailie aku la no nae o Ionakana ia moolelo a kahi wiliki a hiki i kona wa hoopuka ae ai no ka hoi hou ana mai o ua wahi pio la.  Ia wa haawi aku la oia i na la ana e ae aku ai nana, a haalele iho la i ka hale paahao.

He hora mahope iho o ka haalele ana mai o Ionakana, ua komo hou mai la he malihini hou.

Halo Koma! wahi a ke pio i puana ae ai i kona ike ana akku i ka malihini hou.

Pani mai la kahi wiliki i ka puka a haalele iho la i ka malihini me ke pio.

Heaha ke kumu o kou hiki ana mai nei @ ?  wahi a Onila Maka i pane aku ai ia Koma.

E Maka, aohe i maopopo ia’u ko’u kumu no ka hiki ana mai imua ou; aka, oiai ua @ oe i kakou oihana, nolaila hoi ua lilo na mea liilii ano ole i mau mea waiwai a i kumu alakai hoi no ka kakou oihana.

Mai hoolilo wale i kou manawa ma ka wehewehe ana i kau mea i manao ai, aka @ koke mai oe i kau mea i ike a lohe ai @

Ua kauoha mai oe ia’u e lawe i kekahi leta a haawi aku i kekahi wahine opio e noho la ma Nu Ioka?

Hele aku nei no hoi au a hiki i ka hale.

Ae, a pehea aku? wahi a Onila Maka i ninau aku ai me ka manao pihoihoi.

Aole nae oia o ka hale.

A heaha kou mea o ke kali ole ana a hoi mai oia?

No ka mea, aohe i maopopo i ko ka hale poe kona wa e hoi mai ai.

Aue! Heaha ia kau e hoike mai nei ia’u?  Pehea ka loihi o kona wa i kaawale ai?

I ka la mamua ae o ko’u hiki ana aku.

Mai ia wa mai kou lohe ana ia mea?

Mai a Ionakana wahine mai, nana au i hai mai he pilikoko ka oia no ka wahine opio i nalowale, oiai oia e uwe ana me ka ehaeha nui.

O us wahine opio wale la no anei ka i haalele iho i ka hale?

Pela mai ka hoike a ka wahine a’u i ike ai.

Aole oe i niele pono aku no kona ike?

Aole, no ka mea, ua manao au aohe waiwai oia mea a hiki i ko’u wa e ike hou ai ia oe; oiai aohe maopopo ia’u ke ano o ka waiho ana o ka aina. 

He oiaio kau olelo.  No laila e pono oe e haalele mai ia’u i keia wa, a halawai hou aku kaua ma ke aumoe o keia po ma Nu Ioka.

Pehea oe e puka aku ai ma anei aku?  Aohe ou makemake e hele ae au e kamailio i ka Makai Nui, a e hooponopono hoi no keia hana?  Oiai ua hele mai nei au me ka makaukau, me kekahi leta i kakauia e ko kakou kapena.

Aole, e mahuka aku ana au; no ka mea, he makemake no hoi ko’u e hopu hou ia au ma keia hope aku, oiai aole i pau ka’u hana i ka hooponopono ia, aka, eia nae iloko o ko’u mana na hoike kupono.

@ iho la laua no kekahi manawa a hiki i ka wa a kahi wiliki i hoi hou mai ai.

I ka wa a kahi wiliki i hookomo aku ai i ka malihini iloko, e wehe mau ana oia i ka puka o ka rumi o ke pio iloko o kela 15 minute  a me keia 20 minute. i maopopo ai iaia ka makemake o ka malihini no ka wa hoi a me ka ole.

I ka wa i wehe mai ai ua wahi wiliki nei i ka puka, puka aku la o Koma, a noho malie iho la no hoi o Onila e hooponopono i kekahi mau mea ana i manao  ai e hoolala no kona mahuka ana aku.

Iloko hoi o ka wa pokole loa, ua lawa pono iho la na mea ana i hoolala ai, a i ka wa hoi a Pukela i hiki hou mai ai ma ka hola ewalu, ike iho la ia, ua lele ka manu.

Paikole! wahi a ua wahi wiliki nei, Ua hele hou aku nei no ka ua ua wahi pio nei e imi i aina ahiahi nona, ua hiki no, malia o noi hou mai no.

Aole i kali ka Makai Kiu a hiki i ka hora hope loa alaila hoomaka oia e mahuka.

Aka, ua hooponopono ia e ia na mea a pau, i hiki ai iaia ke haalele iho iloko o ke sekona a me ka minute ana i manao ai.

Aole i hoike aku o Pukela i ka Makai Nui no ka nalowale ana o ke pio, aka hoi aku la no oia e moe me ka manao e hoi hou mai ana no kana pio.

I kekahi kakahiaka a’e, hele aku la ka wiliki e nana ma ke keena o ke pio, aole oia i hoi mai.

Ia wa manao iho la oia i ka hana kupono ole a kahi pio.

A hoomaka iho la oia e imi i kahi i hiki ai i ua wahi pio nei ke wehe i ke pani o kona rumi.

Ike aku la oia ua nahaha liilii ka laka o ka puka, me he mea la, ua hoopahu ia me ka pauda a i ole me kekahi mea hoopahu ikaika e ae.

Mai hea mai la i loaa ai kana pauda?  wahi a Pukela i ninau iho ai.

Paikole! wahi a ua wahie wiliki nei.  He makehewa ka uwe ana i ka waiu i hanini, nolaila, o ka mea kupono wale no ia’u o ka hoike aku i ka Makai Nui ua mahuka ke pio.

Hele pololei aku la oia a kahi noho o ka Makai Nui.

A halawai aku la me ia, pane aku la ua wahi wiliki nei me ke akamai nui:

E, auhea oe, ua hala aku la kela!

Owai kai hala?

O ke pio.

Ke pio hea?

O ke pio i haawi iaia iho no na kupua.

Owai kau e olelo mai nei—o ka mea pepehi kanaka?

E.

Ia wa pihoihoi loa ae la ka Makai Nui.

Iloko no hoi oia hora ua nalo koke aku la kona kaulana a me ke akamai iloko o ke ao polohiwa eleele a ka hokahoka.

Inahea nei kou ike ana ua mahuka oia? wahi ana i ninau aku ai.

Ano mai nei no, wahi a ka wiliki i pane aku ai.

Nau i kokua iaia.

Aole loa au i kokua iaia.

Maluna o kou kokua keia hewa.  E kahea koke aku ana au e noho ka @ e nana pono i keia mea.

Ua hiki no ia oe ke hana e like ma ka mea i oluolu i kou make, aka, aole loa nae e hiki ia oe ke ahewa mai ia’u ma ka’u oihana no ka hoopalaleha, oiai ua hana au i na mea a pau me ke eleu a hiki kupono hoi i ko’u mana ke hana; aole anei au i olelo aku ia oe, no na manawa he haneri a oi ae, aole i paa pono ka halepaahao no na lawehale, aka, ano ke hoino mai nei oe ia’u, mahope iho o ka lele ana aku o ka manu mai kona hale aku.

Pehea oia i pakele ai mai ka halepaahao aku?

Kai no hoi i hoopahu ia ka laka o ka puka me ka pauda, a i ole me kekahi mea hoopahu ikaika e ae a na kupua.

Aole i maopopo ia oe kona hora i mahuka aku ai?

Hele aku la ka Makai Nui e nana i ka laka i hooiaio ia  ai na mea a pau a kahi wiliki i olelo ai.

Iloko no hoi eia manawa ua lono ia aku la ma o a maanei ka mahuka ana aku o ke pio, a e like hoi me ka mea mau, ua pakui wale ia aku la no na mea e pili ana iaia a oi aku mamua o ka mea oiaio.

I ka Makai Nui nae i hiki aku ai i ka halepaahao, ua ike aku la oia i kahi o ka poino.

No ka mea, ua hai ka wiliki i ka pololei.

Ma ka auina la ae, hiki hou mai la o Ionakana i ka halepaahao.

Ua hoike mai keia kanaka i kona manao nui no ka mahuka ana o keia pio, a ua ake hoi oia e hoopaa hou ia mai oia ma kona wahi paa.

Ua hoolaha pu ae no hoi oia e hoike ana, e loaa no na kala he 2500 i ka mea nana e hoihoi hou aku ke pio, me ka hoopuka ae i na huaolelo ino, me he mea la, e hoike mai ana oia i kona manao nui i keia hana.

Ua hoounaia aku na hoakaka e pili ana i na helehelena o ua pio la me na kauoha ma na uweaolelo a puni ka aina, a ua hoike pu ia aku no hoi i ke Keena o na Makai Kiu ma Nu Ioka no keia pio.

Aka hala ae la nae na la, aohe me i loheia mai no ke kanaka i nalowale.

Iloko no hoi o keia wa ua lono hou ia mai la kekahi hana ku i ke aloha a me ka manaonao i oi ae i ko ka mua.

Aka, mamua nae o ko makou hoike ana aku no na mea e pili ana no keia mea hou, e kamailio kakou no Onila Maka ka mea kaulan, oiai oia e ukali ana ma na meheu o ka poe i hana maoli i ke karaima.

No na mea hoi e pili ana no ka mahuka ana mai o ka kakou hiwahiwa mai ka hale paahao mai, ua lawa ka hoike ana ae, ua ikeia kekahi kanaka e like me kona mau helehelena e hele ana ma na alanui o kahi kauhale o H---- a kau aku la maluna o ke kaa ahi ma ka hola eiwa no Nu Ioka.

Ma kekahi kakahiaka mai o ka mahuka ana o ke pio, e noho ana o Onila Maka iloko o ke Keena o na Makai Kiu.

Iloko hoi o na hora pokole o kona hiki ana aku malaila, e kamailio ana oia me kona Kapena, ia wa no i komo aku ai kekahi wahi wahine iloko o ke keena.

I ka wa ike mai ai o Onila Maka i keia wahine, a mino aka iho la oia me ka hauoli a pane aku la i kona poo me ka leo hawanawana:

E waiho mai oe i keia wahine me a’u.

                                                                                    Aole i pau.

 

KA M OOLELO O KA

AHAOLELO

KAU KANAWAI

O KA

A.D. 1882

ALIIOLANI HALE, IULAI 18, 1882

La Hana 60—Noho ka Hale ma ka hora 10 am. e like ma ka hoopanee ana.  Peresidena ma ka noho.

Pule ke Kahunapule Rev. M Kuaea.

Heluheluia ka moolelo o ka la i hala a aponoia.

Ma ke kapae ia ana rula, ua heluhelu mai o Brown he palapala noi mai a J C Merrill e hoihoi ia aku kona poho no ke koi ia ana aku e ke Aupuni Hawaii no na mea e pili ana i ka moku kiapa Kalakaua no ka hihia hoopae opiuma.  Waihoia i ke Komite wae—Kuhina Waiwai, Bihopa, Wilimana, Aholo, Pilipo.

Waiho mai kelii Kapena he hoike o ka Papa Hoonaauao a no ka lohi loa o ia hoike, ua haawi ia i ke Komite.

Waiho mai o Rice he hoike mai kekahi Komite wae ia lakou ka noonoo ana no ka Bila Kanawai e hoomalu ana i na Kulahanai kaikamahine ua noi mai ua Komite la ua hoapono lakou i ka bila me na hoololi a ua noi mai e hooholo loa; aponoia ka hoike a waihoia ma ka pepa.

Na Kauwila he olelo hooholo e kauoha ana i ke kakauolelo e kikoo aku i ke Kuhina Waiwai i $240,00 a e uku aku i kela a me keia Lunamakaainana.  Hoihoi hou ia.

Heluhelu mua loa mai ke’lii Kamika he Bila Kanawai e dute ole ana i na mea hoomomona lepo a e hookomo ia mai me ke keakea ole ia.  Waihoia no ka heluhelu elua.

Heluhelu mua loa mai o Aholo he Bila Kanawai e pili ana no kekahi mau aina e koi ia ana e kekahi mau kanaka e noho ana maluna.

Kapae ia na rula a heluhelu elua ia ma ke poo; aeia a heluhelu ia a haawi ia i ke Komite wae, Aholo Loio Kuhina Wilimana, Kaulukou, Richardson.

Heluhelu mua loa mai ka Loio Kuhina he Bila Kanawai e hoomana ana i na Komisina Lei Alii e haawi aku i kekahi mau aina Lei Alii ia C Spreckles.

Kapae ia na rula a heluhelu elua ia ma ke poo.

Noi mai ke Kuhina Kalaiaina e noonoo ia imua o ke Komite o ka hale i keia la Iulai 18; hooholo ia, a hapai ia.

Na Hana o ka La.

Noho ka hale iloko o ke Komite holookoa o ka hale, Kale Kauka ma ka noho.

Hapai ia ka noonoo ana no ka Bila Kanawai a ka Loio Kuhina maluna ae, ma ka noonoo ana ma ka pauku.  Heluhelu ia ka pauku1.

Noi mai o Pilipo e hoopanee loa i keia pauku.

Hoomaha ka hale a noho hou i ka hora 1 me ka hapa.

Noho hou ka hale i ka hora 1:30.

Kamailio mai ka Loio Kuhina maluna o ke kumuhana.

Minamina au no ka hiki ole mai o ka Luna hanohano o Kona Akau.  No ka mea, ua makemake au e lohe oia i na kumu o ko makou lawe ana mai i keia bila.  He hana nui io no keia a ua loihi ko makou noonoo akahele ana.  Aole keia he hana hewa ua lohe na Loio a pau a ua hoike lakou i ko lakou manao.  Olelo iho nei ka me hanohano o Kona e haawi ia keia bila imua o ka Aha hookolokolo.  He oiaio io no ia aole au e hoole ana.  E Mr. Lunahoomalu ua ike au e hooholo ana ka Aha e like me ka manao o ke kanawai oia ke kumu i lawe ia mai ai imua o keia hale.  Ua minamina au no ka hilinai ole ia o’u e like me ka mea i olelo ia ua minamina au aole i hilinai ke aupuni maluna o’u aka, e Mr Lunahoomalu mahea na hana a ka Luna o Kona i hana ai a i aie ai ke aupuni iaia a i hilinai ia ai hoi oia e ke aupuni?  He oiaio no o wau ka mea i ao aku ia Spreckles no kekahi mau manao e pili ana i ke kanawai aole nae i na manawa a pau.

E noonoo kakou i ke kumu i ala mai keia koi:

I ka makahiki 1848 ua hana o Kamehameha III he palapala hoolilo e hookoe ana nona kekahi mau aina a no ke aupuni hoi.  O keia mau aina me he mea la oia ka hapalima o na aina a pau o keia aupuni.  Ua lawelawe o Kamehameha III i keia mau aina a ua hoolilo aku no ke aupuni a ua hoaponoia e kekahi kanawai i hooholoia e ka Ahaolelo.  O keia mau aina e koi ia nei e Spreckels no Kamehameha III ponoi a oia no hoi na aina lei alii e koi ia nei i keia wa, nolaila ua loaa he kuleana i ka mea e koi i keia wa.

Ua hoolilo aku o Keelikolani i kona mau aina ia Spreckels a oia ka Spreckels e koi nei i kona kuleana iloko o keia mau aina lei alii, aole he mea e ae i kuleana iloko o keia aina o Spreckels wale no a oia kana e koi nei, nolaila ke noi nei au e hooholoia keia pauku.

Kamailio na Hon Keau me Nawahi, ma ka aoao kue i ka bila.

Kamaillio mai na Hon Kaulukou, Richardson, Kuhina Kalaiaina ma ka aoao kokua i ka Bila Kanawai.

Kamailio ka Hon Kalua ma ka aoao kue i ka Bila.

Kamailio mai ke’lii Kapena Loke ma ka aoao kokua i ka bila a no ka hope o kana mau kamailio ana ua noi mai oia e hooholo loa i ka pauku.

Kamailio mai o Hon Nakookoo ma ke ano kue hapa i ka bila a noi mai oia e hookomo ia keia mau hoololi iloko o ka bila penei:

“Koe keia mau aina e noho ia la e kanaka a e kuai aku ke Komisina lei alii i na kanaka e noho ana iluna o ua mau aina la.”

Kamailio hou mai o Pilipo ma kona kahua mau a hoike hou mai oia i kona manao.

Mamuli o ke noi a Hon Kalua ua kahea ia na ae a me na hoole, a ua hoole ia ka hoopanee loa.

Na Hons ma a aoao ae e hoopanee loa; Keau, Kalua, Kamakele, Gardner, Nawahi, Kauwila, Pilipo, Aiwohi,--8.

Na Hons ma ka aoao hoole i ka hoopanee loa; Kipikona, Kaai, Bush, Preston, Bihopa, Dominis, Ake, Parker, Isenberg, Moanauli, Kapena Loke, Kamika, Lilikalani, Lahilahi, Pahia, Frank Brown, Mahoe, Kaluhi, Kaulukou, Aholo, Richardson, Nakookoo. Haupu, Kauhane, Nahinu, Kaunamano, Kauai, Palohau, Nakaleka, Kaukau,--30 a ua hooholoia ka pauku 1.

Heluhelu ia ka pauku 2 a noi mai ka Loio Kuhina e hooholo loa ka pauku.

Kue hou mai no o Pilipo i ka hooholo loa o ka pauku 2.  Kamailio mai no o Nawahi ma ia alanui hookahi a kue ikaika no oia e hoopanee loa i ka pauku 2, a noi mai oia e kahea ia na ae me na hoole.

Ma ka aoao ae.  Na Hons Keau, Kamakele, Gardner, Nawahi, Kauwila, Pilipo, Aiwohi,--7.

Ma ka aoao hoole.  Kipikona, Kaai, Bush, Prerton, Bishopa, Dominis, Ake, Parker, Isenberg, Moanauli, Kapena Loke, Kamika, Lilikalani, Lahilahi, Pahia, Mahoe, Kaluhi, Kaulukou, Aholo, Richardson, Nakookoo, Kaupu, Kauhane, Nahinu, Kaunamano, Kauai, Palehau, Nakaleka, Kaukau—29, a hooholoia ka pauku 2.

Heluhelu ia ka pauku 3.

Noi mai ka Loio Kuhina a hooholo i ka pauku; hooholoia me ke kue ole ia.

Heluhelu ia ka papa oka nui o na eka aina he 24,000 e manao ia ana e hoololi aku hooholoia.

Heluhelu ia ke poo o ka bila a hooholoia a ma ka noi ua hoopau ia ke Komite a aponoia ka hoike a ka Lunahoomalu, a heluhelu ekolu i ka Poaha.

Hoopanee ka hale a noho hou i ka hora 10 am Poakolu.

ALIIOLANI HALE, Iulai 19, 1882

La Hana 61—Noho ka Hale ma ka hora 10 am e like ma ka hoopanee ana.  Peresidena G Rhodes ma ka noho.

Pule ke Kaunapule Rev. M Kuaea.

Heluheluia ka moolelo o ka la i hala aponoia.

Aole he h oike a na Komite mau a me na Komite wae a aole no hoi he mau olelo hooholo nolaila.  ma ke noi a Kaulukou ua hapai ia.

Na Hana o ka La.

Bila haawina iloko o ke Komite o ka hale.  Ke’lii Kapena ma ka noho. Penei na mea i hooholoia.  Malalo o ke poo o na lanui a me na alahaka, ua hookomo mai o Kalua i $30,000 no ke alanui pali mai Lahina a i Wailuku.

Noi mai o Nawahi i $500,000 no ke alanui hao mai Hilo a i Hamakkua, hoole ia.

Huina o na kala alahaka a me na alanui i loaa ma ka aie 262,400.

Noi mai o Pilipo e kapae ia na huaolelo “a loaa ma ka aie.”  Kokua ke Kuhina Waiwai a md ke ‘lii Bihopa, hooholoia.

Eli Luawai pipii.

Kona Akau.......................................................................................$5,000

Molokai     .......................................................................................$5,000

Makua Oahu.....................................................................................$5,000

Kela me keia e hoolilo ia e ka Kkuhina Kalaiaina 20,000.

Malalo o ka Oihana Hoonaauao ua hookomo ia he $2,000 no ke kukulu a me ka hana hou ana i ke Kula kaikamahine o Makawao.

Hoomaha ka hale a noho hou i ka hora 2.

Noho hou ka hale i ka hora 2, a ua hoomaka ka noonoo ana o ke Komite o ka hale no ka Bila haawina.

Noi mai o Kalua e hookomo ia maloko o ka Bila haawina kekahi itamu penei:

Kokua i ke Kulahanai Kaikamahine o Makawao, aka ina ua lawa e

aole e koi ia......................................................................................$2000

Ua hooholoia keia itamu me na  hoakaka kupono ana.

Hapai ia ka noonoo ana o ka itamu maloko o ka bila penei:

Hoihoi hoopae kanaka no ka hooulu

lahui e like me ka bila aie...............................................................500,000

Noi mai ke Kuhina o ko na aina e, mahope o na o na hoakaka moakaka ana i ke kupono a me na pomaikai, e hooholo ia keia huina.

Noi mai o Richardson e hoololi ia i $100,000.

Noi ke ‘lii Kamika e kapae ia na huaolelo—“no ka hooulu lahui.”

Noi mai o Aholo e hoopanee loa i ka huina holookoa.  Kamailio loihi mai o Aholo me Pilipo ma na aoao koua e hoopanee loa; a o Richardson, Kaunamano, me Kalua no ka hoololi i $100,000; a o Kaai Kauhane, Kaulukou, Bihopa, Kamika, Palohau, Ake. Kapena Loke a me ke Kuhina o na aina e ma ka hooholo loa.  Mahope o neia mau paio loihi ana, ua koho ia ka ninau e hooholo ia ka itamu he $500,000 a ua hooholo ia me ke kakau ana i na ae me na hoole penei:

Na Hons ma ka ae: Kipikona, Kaai. Bush, Preston. Bihopa, Dominis, Ake, Parker, Waila, Isenberg, Kapena Loke, Kamika, P P Kanoa, Lilikalani, Lahilahi, Pahia, Kaluhi, Kaulukou, Aholo, Kalua, Cardner, Haupu Kauhane, Nahinu, Aiwohi, Kaunamano, Rice, Kauai, Palohau, Nakaleka, 31.

Na Hons ma ka hoole: Kaae, Keau, F Brown, Mahoe, Richardson, Nakookoo, Kamakela, Nawahi, Pilipo, Kaukau, 10.

Hoopau ia ke Komite, a hoopanee ka hale, a noho hou i ka la apopo Poaha hora 10 kakahiaka.

Aliiolani Hale, Iulai 20, 1882

La Hana 62—Halawai ka hale i ka hora 10 a.m. o keia la, ka Peresidena Hon G Rhodes ma ka noho.

[E nana ma ka Aoao 4]

 

MAIKAI KA HOI KA PAPA

-A ME-

KA LAAU O KOU HALE!

NO HEA LA!

KAI NO HOI NO KAHI O

WAILA MA

Nana aku no hoi ia la

Ohi ka lo o ka Laau o Makawao

I ka ua mea hoi o ka nani

NA PAPA!  NA PAPA!

-A ME-

NA PONO KUKULU HALE

O NA ANO NO A PAU

 

Aia ma ke kihi o na

ALANUI PAPU ME MOIWAHINE

HONOLULU

MALAILA E LOAA AI

E LIKE me ka MAKEMAKE

NO KE

KUMUKAHI MAKEPONO LOA

PAPA, PAPA, PAPA,

Na Papa Huluhulu.

Na Papa Manoanoa

Na Papa i kahiia

Na Papa Kepa

Papa Hole Keokeo

Papa Hole Ulaula

 

NA LAAU, NA LAAU

Na Kua,

Na Kaola,

Na Aaho,

Na Molina

Na @

Pine Hulululu

            Pine i kahiia

NA Papa a me na Laau Ulaula

            Pili ulaula

            Pili Keokeo

            Pani Puka

                        Pani Puka Aniani

                        Ipuka Aniani

                        Puka Olepelepe

 

PENA O NA ANO A PAU

Hulu Pena mai ka Liilii a ke Nui

            Aila Pena

                        Aila Hoomaloo

                                    Waniti, Pate.

NA LAKO O KELA A ME KEIA ANO

Na Ami Puka Hale

            Na Ami Puka P.

            ANIANI

Pepa Hale a me na Lihilihi

            E LOAA NO MALAILA.

PAAKAI HELU 1 O KAKAAKO me PUULOA

No ke Dala Kuike, e loaa no na mea a pau i hai ia ae la, no ke Kumukuai Emi loa.  O na kauoha mai Hawaii a Niihau, e loaa aku no ia lakou, e hooko koke ia no la me ka lawa pono.  E kipa mai ilaila i ike i ka oiaio.   906 tf