Ka Nupepa Kuokoa, Volume XXI, Number 14, 8 April 1882 — HOOPUNIPUNI NUI. [ARTICLE]

HOOPUNIPUNI NUI.

E ka Nupepea Kuokoa e. Aloha oe:— I ka Poakahi, Mar 27, ma Koko Maunalua, ua eleu ae na kane me na wahine, kamalii, no ke kuu i ka ia, akule, aku, ua hele mai o Moluhi k, he kanaka malihini no Waianae mai, a hoike i kana mau olelo hoopunipuni, aole e kuu ka ia i keia la, apopo ka Poalua, alaila, kuu ka ia, nui ka loaa mai, ku ka pilau i kahakai. No ka mea, hele mai nei no au mai Waianae mai, hele pu mai no me ke akule, a ma keia kamailio ana a wa hoopunipuni nei, pane koke aku la kekahi kanaka kamaaina, aole paha keia ke ia hou mai, he mea mau no paha ia no Maunalua nei, i na wa a pau. A ma keia mau paleo ana a ka malihini me na kamaaina, ua loaa ke kanalua ma ka aoao o na kamaaina, no ka mea, o keia kaula wahahee, aia oia ma ka hale o Kanealauahine k, ka mea nana e malama nei ka aina o na 'lii, nolaila ulu ka manao i ka poe i lohe pono i na olelo a keia haukae nui. Ano keia lohe ia ana, ua lilo ia mea iwaena o ka lehulehu o na kanaka e papau nei, i mea e hoomanao ai no ka manawa i olelo ia ae nei, a ma ke kakahiaka nui Poalua ae, ua piha pu mai ia na kanaka o Kuliouou, Niu a me ko Wailupe mai, e ike i ka oiaio o ka mea i wananaia e kahi eepa, hilahila ole no hoi i kana mau alakai hoopunipuni i ke au malamalama o ka noho'na pono. A i ka hiki ana mai o ka lehuiehu o na kanaka, ua piha-u ke kahakai o Maunalua i na kane, wahine, kamalii, no ke ake o ka makapehu ia o ka uka, e loaa kahi ia hoi ana me ka pomaikai, aka ku e i ka puu i kai o kahua, eia ka mea nui i ka waha o ka iehulehu. Auhea ke akule! auhea ke akule!! kahaha, kupanaha ka hoopunipuni, mai hea mai no ia keia eepa o ka hele ana? e hoopunipuni hele ai. A ma keia lohe ana mai o ua kanaka lalau nei, a me ka poe a pau o loko o ua hale nei, aole o lakou mea puka iki iwaho, papani ka puka, noho malie iloko, no ka hilahila i ka mea i kamailio ai me ka io ole, o ke kahu malama aina hoi, lilo wale aku no ma na mea e pomaikai ole ai ka aina o ka poe mea aina. Nolaila, ke hoike aku nei au i ka laau e ola ai kona mai nui, he hoopumpuni, e huli a e nana aku i ka Baibala ma Kinohi 1:22 —31, alaila e ike koke no ia, aole o ke kanaka ka mea nana i hana i na mea a pau, o ke Akua wale no, mai ke kahi o ka la a hiki i ke ono o ka la, pau Kana hana ana. Nolaila, e na makamaka a pau, mai noho a hoohalike me ka hana uko ole a keia kanaka pegana e haukae hele nei. Owau no o IKEPONO.