Ka Nupepa Kuokoa, Volume XX, Number 44, 29 October 1881 — Page 4
| This text was transcribed by: | Manowai Morgan Kobashigawa |
| This work is dedicated to: | Papa Aki |
Ka Nupepa Kuokoa
KE KILOHANA POOKELA NO KA LAHUI HAWAII.
KA NUPEPA
Kuokoa me ke Au Okoa
@ HUIIA.
No ka Makahiki. $2. Eono Mahina, $1.
Dala Kuike ka Rula.
POAONO. OKATOBA 29, 1881.
E HOI MAI ANA ANEI OE MA KEIA PO?
Are you Coming home to-night?
Gospel Hymns No 311.
1
Ho mai ano kuu hoa;
Ke kali nei Iesu.
Loihi kou auwana,
Auwana a nele pu.
Eia nae ke hoaloha,
Ke ku a hea no.
E hoolohe i Kona leo,
Hoi mai ma keia po.
Cho. Hoi mai ma keia po,
Hoi mai ma keia po.
Hoi mai ia Iesu Kristo
Mai ka pouli a ke ao.
Hoi mai ma keia po
Hoi mai ma keia po.
@ ka Haku kou Makua,
Hoi mai ma keia po.
2
Hoi mai na ui hewa,
A lealea e,
Ku a hea ka Hoola,
Mai aa e hoopanee
O halaʻe ka wa kupono,
Aole hoi hou.
Ala, ala, wiki, wiki.
Hoi mai ma ka po.
Cho. Hoi mai, &c.
3
Hoi mai e na keiki
E hele hewa nei.
Ke o nei ko Iesu lima
E ake e hoi mai.
Hea no, a hea hou la.
Hoolohe ano no.
Hamau ea hea nui,
Hoi mai ma keia po.
Cho. Hoi mai, &c.
Hawaii.
He awina Kula Sabati.
HELU 7, SABATI, NOV 13 1881.
KUMAHANA
Ka Ahaaina Kauhalelewa. Pauku Baibala
Oihk. 23:33-44.
33 Olelo mai la hoi o Iehova ia Mose, i mai la,
34 E olelo aku oe i na mamo a Iseraela, penei, I ka la umikumamalima o ua malama ahiku nei, he ahaaina kauhalelewa i na la ehiku no Iehova.
35 I ka la mua, he houluulu hoano, mai hana oukou i ka hana e luhi ai.
36 I na la ehiku e kaumaha ai oukou i ka mohai puhi ia Iehova; i ka walu o ka la he houluulu hoano ia oukou, a e kaumaha oukou i ka mohai puhi ia Iehova, he anaina hoano, aole hoi oukou e hana i ka hana e luhi ai.
37 Oia na ahaaina a Iehova, a oukou e hai aku ai he mau houluulu hoano e kaumaha ai i ka mohai puhi ia Iehov, i ka mohaikuni, i ka mohai ai, i ka alana ame na mohaiinu, kela mea keia mea i kona la iho.
38 Okoa na Sabati o Iehova; okoa hoi ko oukou mea haawi, o koa hoi ko oukou mau mea hoohiki a pau, okoa hoi ko oukou mau mohai na ka makemake, a oukou e haawi wale ia Iehova.
39 A i ka la umikumamalima o ka malama ahiku, aia houluulu oukou i ka hua o ka aina, e ahaaina oukou no Iehova i na la ehiku, i ka la mua, he Sabati, a i ka la awalu, he Sabati.
40 E lawe hoi oukou no oukou iho i ka la mua i na lala o na laau maikai, i na lala o na laau pama, a me na lala o na laau momona, a me na wilou o ke kahawai, a e hau oli ae oukou ma ke alo o Iehova ko oukou Akua i na la ehiku.
41 E malama oukou ia i ahaaina no Iehova, i na la ehiku o ka makahiki, he kanawai mau loa i ko oukou mau hanauna, i ka hiku o ka malama e ahaaina ai oukou ia.
42 E noho oukou iloko o na hale lalalaau i na la ehiku, o na mea a pau i hanau he poe Iseraela, e noho no lakou iloko o na hale lalalaau.
43 I ike ko oukou mau hanauna, ua hoonoho au i na mamo a Iseraela iloko o na hale lalalaau i ka wa i lawe mai ai au ia lakou mai ka aina mai o Aigupita: Owau no Iehova ko oukou Akua.
44 A hai aku la o Mose i na ahaina a Iehova i na mamo a Iseraela
Pauku Gula, Hal 103;2, hoopaa.
Manao nui. Pono ke hoomaikai i ke Akua no Kona lokomaikai a pau.
Na heluhelu la 1 Oihk 23;1-32, 2 Oihk 23;33-44, 3 Oihk 24;10-23, 4 Tek 14;16-21, 5 Puk 23;8-17, 6 Kan 16;1-20 7 Neh 8,1-18.
Mele.
Pule.
Ka wehewehe a Ninau ana.
Aia no na Iseraela ma ka papu o Sinai, ma ka helu 6, ua hoike ia ke ano o kekahi la nui, he la hooke ai, oia ka la kalahala, ka la 10 o ka malama 7. oia hoi @ T@@@, oia hoi ka la 25 paha o Sept
A hala na la 5 oia ka la 15 o ia malama 7 no, oia hoi ka la 1 o Okatoba, malaila ka hoomaka ana o kekahi ahaaina i kapa ia, ka Ahaaina Kauhalelewa. 7 la e lilo ana ia ahaaina.
O keia mau kauhalelewa, aole he mau halelole, aka, he mau hale lalalaau, he mau hale malumalu, he hale auolo kekahi inoa, he hana keia e hoomanao ai lakou i ko lakou noho ana ma na hale lole lewa ma ka waonahele o Arapia, he hana makahiki keia.
Na ninau mua.
Heaha na oihana hoomana a na Iseraela i pau iho la i ke kala ia ae?
Mahea lakou ma keia haawina?
Owai ka malama ia kakou?
Kumumanao, ka hoomaikai ana no ka lokomaikai o ke Akua.
1 Na aha nui, p 37, 38, owai na ahaaina nui o na Iudaio, nana Oihk 23;5.10,34 Kan 16;16
Pehea ka loihi o keia mau ahaaina, Oihk 23;6,21,24,26.
Mahea e malama ia ai, Kan 16,16.
Heaha na hana ma ia mau la, p 37
Heaha ka houluulu hoano?
Heaha na mohai eha ma ia mau la?
Heaha ke ano o ia mau mohai?
No ke aha e kaumaha ai i na mohai ma na la ahaaina?
Heaha na waiwai o keia mau ahaaina?
2 Ka ahaaina kauhalelewa. p 33;36,40-42
I ka manawa hea ka hoomaka ana o keia ahaaina?
Heaha kekahi mau la nui ma ia malama hookahi, p 24,27.
No ke aha i kapa ia ai ia, ka ahaaina kauhalelewa?
Pehea ka loihi, pehea i malama ia ai, ma ke aha i like ole ai ka la 1 me ka la 8, me na la 2,3,4,5,6,7?
No ke aha i hui ai ka hoomana me ka hauoli?
3 Na la hoomaikai, heaha ke ano o ka ahaaina kauhalelewa? Puk 23;16, pehea e hoike ai i ko lakou aloha, Kan 16;13-17.
Na la aha o kakou kai like me ia mau la, heaha ka kakou e hana ai ma na la hoomaikai?
E aha kakou i ka poe ilihune ma ia mau la?
4 Ka hauoli ana no na pomaikai i loaa mai, p 43,44, no ke aha lakou e noho ai iloko o na kauhale lalalaau ma ia ahaaina kau halelewa?
Heaha ka lakou e hoomanao ai? Na pilikia anei ma ka waonahele, na pomaikai paha?
O ka hoomanao ana i na pomaikai, he mea anei ia e mahuahua ai ko lakou hauoli ana, heaha ke kauoha ma Pil 4,4,6?
Na ninau i o Ianei.
Na kane. Owai na ahaaina nui ekolu? I ka berena hu ole, 2 ka penetekoka, 3 ke kauhalelewa.
Na wahine. Me ke aha lakou i malama iaʻi? 1 me ka hoomana, 2 me na makana, 3 me ka hauoli.
Na keiki. Heaha ka ahaaina kauhalelewa, oia ko na Iudaio la hoomaikai makahiki.
Ke kula a pau. No ke aha ia ahaaina? He mea hoike i ko lakou aloha i ke Akua no ka ohi ai ana me na pomaikai e ae.
Na manao pili.
1 he mau hoailona na ahaaina ekolu no ka hoomaka ana, hoomau ana me ka hoopau ana i ke ola haipule, a ohiia iloko o ka lani.
2 nui na pono o na ahaaina kristiano, e hoomau ia lakou.
3 ke ola haipule, he ola hauoli me ka hoo maikai.
4 e like me ka nui o na pomaikai, pela e hoonui ai i ka hoomaikai ana i ke Akua.
5 ke aloha io i ke Akua he mea paipai ia e kokua i ka poe ilihune.
E hoopiha i ke ola kino ana i na hana maikai i loaa ka hopena pomaikai me ka hauoli nui.
Mele,
Pule,
Haawina no Nov 20. Oihk 25;8-17.
NA IUDAIO.
HELU 2.
Ma ka helu akahi, ua hele na Iudaio no na wahi loihi mai, a hui ma Ierusalema, ma kahi e uwe ai no ko lakou luakini i hoopau ia, a lilo i mea neoneo. e like me ka wanana a Iesu.
Na pani no ka luakini. - Oia na Sunegaga, oia hoi na halehalawai, aole i kala ke kukuluia ana ia mau hale. Ka luakini, he hale kapu ia, aole hiki i na kanaka ke komo iloko, na kahuna wale no; ma na lanai mawaho kahi i hoomana ai na kanaka.
Na Sunegoga nae, ua noa lakou , hiki i na kanaka a pau ke komo iloko a hoomana pu i ke Akua.
Ma ka luakini wale no ka mohai ana i na mohai. Aole hiki ke hanaia ka oihana mohai ma na Sunegoga.
Nui na Sunegoga ma Ierusalema i keia manawa; no na Iudaio Rusia kekahi, no na Iudaio Paniolo kekahi, he mau doma (hale poepoe) e kau ana maluna o lakou a pau.
Ma ka Sunegoga Rusia, he wahi noho i hookiekieia kahi e noho ai na wahine, a hiki ke nana i na kane, aka, aole ikeia lakou e na kane.
Ma ka Sunegoga Paniolo, he wahi a wai poepoe mawaena, ilaila na noho no ka poe kiekie, ilaila hoi na palapala auo baibala.
No na Parisa io kekahi Sunegoga, ilaila i akoakoa ai kekahi poe Iudaio Rusia: ma ke ahiahi o ka Poalima i ka napoo ana o ka la ko lakou akoakoa ana me ka poe e ae, e heluhelu i na pule. He pa holoi ma ka puka o ka hale, kahi e holoi ai i na maka mamua o ka puka ana. He wahi papakaukau liilii kahi e kau ai i ka buke pule no kela no keia kanaka.
Hoomaka ka Rabi (Kumu) i ka hana ma ka heluhelu ana i kahi mau hua pule. ka hoomaka no ia o ka poe hoomana a pau e pule like me ka leo nui ma ke ano pualu Hawaii, me ka hooluliluli ana i na kino imua a i hope a pau ka hapalua hora, a piha ka lewa i ko lakou pualu pule ma ka olelo Hebera.
Aia ilaila kekahi Parisaio nona na makahiki he 80 a oi, me kona lole komo loihi. Malalo ae o kona noho he wahi pahu. Heaha la ko loko? He buke pule paha, he buke baibala paha. Aole ia. He Gasa ka, (he mea hoomalamalama,) he pahu gasa no Nu loka mai. Na ko na aina e ka e hoomalamalama ana i ka Sunegoga Parisaio ma Ierusalema.
Ka Sabati Iudaio. - Hoomaka no ia ma ka napoo ana o ka la ma ka Poalima, a oki ma ka napoo ana o ka la ma ka Poaono; oia hoi, o ko kakou Poaono, oia ko na Iudaio Sabati.
Ka mea i ikemaka ka i kakau i keia mau mea maluna, a makemake oia e ike i ke ano o ka hoomaikai ana i ka la Sabati, nolaila, hele oia i ka hale o kekahi Iudaio, he wahi hale uuku no, 10x6 kapuai, kahi moe no na ohua eono, hookahi noho loihi.
I ka napoo ana o ka la, ku ke poo o ka hale e paa ana i ke kiaha waina ma kona lima, ku ka ohana a pau iluna; heluhelu ke poo ma ka olelo Hebera i ke Kanawai, e hoomanao i ka la Sabati, pualu like ka ohana a pau ia kanawai. alaila pule like lakou a pau i ke Akua e kokua i malama pono lakou ia la. Pau ia, alaila, hoopa ka makuakane i ke kiaha waina i kona mau lehelehe, a haawi aku ia i kona makuahine kahiko, hoopa oia i ka waina i kona mau lehelehe, a haawi aku i ka wahine a ka makuakane, a inu ka wahine, a hoohainu i kana mau keiki nui elua, a hoopili aku ia i na lehelehe o kana keiki ai waiu. A pela ka la Sabati i hoomaikaiia ai. Ma ka makana nui i ae ai keia makua Iudaio e hoike i keia malihini i keia hana.
Ma ka makana nui hoi oia i ae ai e hoike a kuai mai iaia i kona mau phylacteries, oia na apana kanawai i kakauia ma Mataio 23:5. He mau ili eleele ia, elua iniha kuea me na kaula e nakii pahiku ai ma ka lima, hookahi hoi no ka lae. Malaila i kakau huna ia i na apana kanawai eha. Ua lilo keia mau apana ma ke kuai ana i ka malihini, a hoike ka Iudaio i ke ano o ka hoopaa ana ma ka lima hema. Penei: Ma ka hoopaa ana, ekolu hoike ana i ka hoailona o ke Akua Mana Loa; a ma ka pelu ana o ka lima, pili ia i ka puuwai. He hana malu keia a ka makuakane, aole ike kana wahine; aole loa laua e ae i keia kuai ana.
Na Iudaio ma Ierusalema. - He poe ilihune lakou, ua hele lakou ilaila no ka uwe a pule no ka luakini i hoopauia a no ka hoomau i ka hoomanao ana i na mea kahiko. Na ko lakou mau hoahanau Iudaio ma Europa a ma Amerika i kokua i ko lakou ola kino ana, ma ka puunaue ana iwaena o lakou he 40 tausani dala i kela i keia malama. E pule nui no na Iudaio i hoopauia ko lakou naaupo, a i hoopihaia i ka malamalama Euanelio.
Helu 3.
Ua lohe kakou, ua hoopuehu ia na Iudaio iwaena o na lahui kanaka e, no ko lakou hookuli ana, no ko lakou hoole ana a hana ino ana ia Iesu.
Ma na wahi i hoopuehu ia ai lakou ua hana maikai ia i kekahi manawa, a mahope iho, ua hana ino ia lakou.
Nui na Iudaio ma Sepania i kekahi manawa, loihi loa ko lakou noho ana malaila, kuonoono a hookupaa ia a like lakou me na kamaaina, a like ia aina ia lakou me ko lakou aina ponoi o Kanaana, kuikahi no ka noho ana.
Aka aole i hoomau ia ia kuikahi a maluhia ana, iloko o ke keneturi 1400 i ke kau ia Feredinana me Isabela, ua aia he hoomaau nui.
Heaha la ke kumu ua kipaku ia na Iudaio a pau mai Sepania aku. 8 haneri kausani kai hoonele ia i ka home ole, a hele auwana wale i kahi e hele ai, he poe hana lakou, he poe noeau ma kela a me keia oihana, he poe waiwai hoi kekahi, ma ia kipaku ana, ua hoopilikia na Sepania aole i na Iudaio wale no, aka ia lakou iho kekahi. Ua lilo ia i mea e emi ai ka waiwai kalepa o Sepania.
O na poe Iudaio i kipaku ia, ua hele kekahi hapa i na aina karisitiano e ae.
A no ko lakou ikaika ma ka hana, a no ko lakou akamai ma kela a me keia oihana mahuahua ko lakou waiwai a lilo ia i mea e lili ai, e ukiuki ai a hana ino na kamaaina ia lakou.
Ka hapa nui nae o ka poe i kipaku ia, ua hele lakou i na aina mahomeda, no ka mea, ua noho pu na mahomeda me na Iudaio ma Sepania, a ua kipaku pu ia lakou me na Iudaio mai Sepania aku, nolaila, he poe hoa pilikia pu lakou na mahomeda me na Iudaio nolaila paha ka oluolu o na mahomeda e noho na Iudaio ma ko lakou mau aina.
A hoonoho nui ia no lakou ma na kulanakauhale mahomeda ma Tureke ma Europa, a ma Tureke ma Asia.
A no ko lakou makaukau a ikaika ma kela a me keia oihana, aole liuliu a kuonoono hou lakou, a no ka oi o ko lakou naauao, ua lilo kekahi poe i luna aupuni.
Noho maluhia na Iudaio ma ia mau aina mahomeda me ka ae ia e hooponopono i ko
lakou mau mea e like me ko lakou mau kanawai.
Emi nae ka lakou hana no ka hoonaauao ana ia lakou iho, a mahope iho ane like lakou ma ka naaupo me na lahui naaupo e ae ma Asia.
Ku kaawale keia poe Iudaio o Sepania mai, aole launa nui me na Iudaio e ae, ae no e mare pu, aka aole hele i ko lakou mau halawai.
Kaena lakou no ka noho pu ana me ka poe naauao a hanohano ma Sepania.
No ka paakiki o na Iudaio Sepania, a kue loa i ka hoomana karisitiano, he mea ane hiki ole ke hoomaka i ka hana misionari karisitiano iwaena o lakou, ua hoao no nae na ekalesia karisitiano ma Enelani me Sekotia e ao i na Iudaio ma Tureke.
Ua kanakolu a kanaha paha makahiki i hala mai keia hoao mua ana a hiki i keia manawa, pokole no ka manawa.
He mau kausani kamalii no nae i ao ia ma na kula misionari, ua unuhi ia ka baibala ma ka olelo Iudaio Sepania, nui na palapala karisitiano i pai ia no na Iudaio, nui ka poe i ao ia a lilo i poe naauao, nui ka poe i hele i na halawai karisetiano, a nui iki no ka poe i huli mai a manaoio ia Iesu, a ua hookomo ia iloko o ka ekalesia, kue no a hoomaau na rabi Iudaio i keia poe manaoio ia Iesu.
Kupaa nae lakou, a hoomau no na misionari i ka lakou ao karisetiano ana.
(Aole i pau.)
NA ANOAI O KA MAKANI APAAPAA O KOHALA.
E ka Nupepa KUOKOA e; Aloha oe:
He mau wahi mea hou ka'u e hoouna aku nei, a nau ia e hoolawa ae i na poe puni mea hou o ke Kuokoa.
Wai ole. He mea hou ano nui keia i ike ia ma keia apana, aole no pela mai mua mai.
Ua maloo loa na kahawai a me na auwai aole wahi pipiwai, a iahona ko Kohala nei mau wiliko e noke nei i wai mapuna o kuahiwi.
Ua manao wale ia, ina pela mau aku a hala he mau mahina hou, e pilikia loa ana ko Kohala nei poe kanaka a me na holoholona.
Na hana ku i ka Pono.
Ma ka hiki ana mai o Mr Halanabeka ia nei iloko o Sept a haiolelo ma loko o ka lua kini o Iole. Ua nui na poe haole, a me na kanaka i akoakoa ae e lohe i ka pono, a ua hua nui mai ia hana i keia mau la mawaena o na haole a he kakaikahi o na kanaka Hawaii.
Ke oia mau nei ka nee ana o na hana kula Sabati o Kohala nei.
Ua koho lokahi ka aha kula Sabati ia C Kahai Jr i mea nana e alakai i ke kula Sabati ma na himeni e pili ana ia hana, a ua lana ka manao e holomua ana kana mau lawelawe ana.
No Mahukona.
He mea nani i ka poe waiwai, e like me S G Waila & Co, ka lawe ana mai i na mea ano hou a hookahua ma Mahukona, kela wahi panoa a ua kohu taona maoli no i keia mau la, he mau hale laau, a he mau uwapo a ke hoomoe nei ka hao o ke alahao o Kohala nei.
He mau ia mau wahi mea hou. O ke aloha no kou, a me na keiki o ka Papapai.
Jefferson B Kaleihopu.
Kohala, Oct 15 1881.
OLELO HOOLAHA.
AOLE e hookaa ka mea nona ka inoa malalo iho i kekahi mau ale i hoale ia ma kona inoa a i kakauia paha ma kona inoa mai keia la aku. J R MILLS,
Honolulu, Oct. 12, 1881. 1038 2t
CHRISTIAN GERTZ
Mea Hana Buti
me
NA KAMAA MAOLI!
Alanui Papu, makai o ke Keena o Lui & Dickson
KE HAI AKU NEI OIA I NA MEA A PAU
Ua hoi mai oia mai Kapalakiko mai,
Ilaila Oia i ohi kino mai nei i na @@@@@@ nani a paa o kana oihana, a ke waiho ia aku nei no ke kuai ana no na kumukuai o ka manawa
HE MAU WAIWAI PIHA O NA BUTI
Na KAMAA HAAHAA a me na ano kamaa no na Lede. Na Buti, na Kamaa Haahaa a me na ano kamaa e ae a pau no na Keonimana.
NA BUTI & KAMAA HAAHA
A ME NA ANO KAMAA E AE A PAU
NO NA KAMALII!
NA KAMAA O Na ANO HE NUI
O NA KAMAIKI OPIOPIO.
O neia mau mea a pau na kanaka me ke akamai loa a me ka p@@ o na ano @oa @@@ a ke @@@@@ ia aku nei ia mau mea e like me ka mea i olelo ia
@ E lawe ia no na kanaka mai na@@@@@@@@ me ka @@@ @@ @@@ ka @@@@. @@@@@@
E. Cook Webb. M. D.
HOMEOPATIKA.
(Kauka o ka Halemai Homeopatika, ma ka Mokupuni Ward's. N.Y.)
KEENA OIHANA. - Helu 60, Alanui Papu. Makaukau mau e lawelawe i na pilikia mai o na wahine a me na kamalii.
HORA HANA. - Mai kakahiaka a hora 10 am. - 2 a i ka 4 pm. 967 4m
Dr. E. H. THACHER.
KAUKA HUKI NIHO
Aia @@ na keena hana ma Alanui Papu helu 104 @@ ma @@@@ Ma@@@@ oia e loaa ai i na poe a pau i @@@@ ia me na niho eha. E loaa no oia mai ka hora 9 am a hiki i ka@ @@@ p@@
Ua loaa hou kekahi mea huki niho, a o ka poe e makemake ana e huki ia ko lakou mau niho eha, e naue oe i keia hale, no ka uku kupono.
Honolulu, Dec. @@, 1@@@. @@@ @@
J. B KAOHI.
LOIO A KOKUA MA KE KANAWAI.
IMUA o na Aha Hookolokolo a pau ma ka Mokupuni o Hawaii a i mua hoi o na Aha Hoo@@ @@@ Apana a pau o keia Aupuni. E loaa no @@ ma Kohala Akau Hawaii.
@@@ @@
J. W. M. POOHEA.
He Loio a he Kokua ma ke Kanawai.
NO NA kanaka a pau imua o na Aha Apana a pau, a me na Aha Hoo@@@@ o na Apana Hookolokolo Kaapuni a pau o keia Aupuni. a imua o ka Lunakanawai Kaapuni o ka Apana 11 ma ke Keena ma Molokai no na makahiki elua, a he Agena Hoo@a@o Palapala Kepa no hoi ma ka Apana. E hook@@@ aku no na @@@@@@ o ko oukou mau makemake me ka eleu. E loaa no au ma "Ka@@@@@@@@@ Home." a i ole ia, ma na wahi e halawai ai.
Ke hoike akea aku nei au i ka lehulehu, ua wehe au i ko'u hoopaa ana he Loio no ka Hui Mahiko o Moanui, Molokai, a e lawelawe no au i ka'u Oihana no ka pono o ka lehulehu mai o a o. Ke ike ia'u, e hea mai e kokua i na pilikia pili Kanawai Mai no@@@@@@@ a kulou na maka ilalo. @@@@ @@
JAMES M. MONSARRAT.
[MAUNAKEA.]
Loio a he Kokua ma ke Kanawai
IMUA O NA AHA HOOKOLOKOLO A PAU o keia Aupuni. E lawelawe ana no hoi ma na hana pili i ka hoponopono waiwai, me ka imi ana i na palapala Sila Aina, ka hana ana i na Palapala Kuai, Hoolimalima a me ka hoaie dala ana.
A HE LUNA HOOIAIO PALAPALA.
Keena hana helu 9 alanui Kaahumanu.
Jan. 3, 1880. 944 1v
UA MAKEMAKE IA
NA ILI BIPI, NA KIWI BIPI, NA IWI BIPI,
E haawi ia no ke kumukuai kiekie o ko kakou makeke nei e
H. Hackfeld & Co.
Honolulu, Mei 22, 1880 964 1y
ALOHA! ALOHA!
I O'U MAU MAKAMAKA PONOI A ME na makamaka o ke One Oiwi, e hoomanao i keia maluna ae Oiai ke hoike aku nei au imua o oukou, ua hoonee ae nei au ko'u wahi hana mai ko'u kahua mua i kamaaina ia oukou, a ka Helu 70 Alanui Moiwahine, e pili pu ala me ko Hackfeld & Co halekuai, malaila au e hoomakaukau nei e hana i na ano hana a pau e pili ana i ke Kaa a me ke kapili ana i na kapuai hao o na lio me ka maikai a me ka maiau. A ke hooiaio aku nei au, o ka poe a pau e lawe mai ana i ka lakou mau hana ma ko'u hale hana, e ike no lakou ua kaulike ko lakou manao me ka'u mea i hana ai, a i oi aku ka emi mai kekahi mau hale hana e ae o ke kulanakauhale nei.
Aole au i lawe mai i na lima hana o ka papa elua, aka o na lima hana o ka papa ekahi, a o lakou ka poe nana e lawelawe nei i na hana ma na lala a pau o ka'u oihana.
E hele mai hookahi, e hele mai no a pau. E hookoia no na hana me ka maikai, maiau a me ka holopono. E hele nui mai.
1021 @@ G. WEST
He Nui Anei Kou Makemake i na MEKINI HUMUHUMU LOLE!
Ina pela, alaila, e kipa mai no ma ka Halekuai o KAKELA & KUKE,
A malaila oukou e ike ai a makaikai i na ano MEKINI a WHEELER a me WILSON
mai ke $40 a hiki i ke $30 ke kumukuai o ka mea hookahi.
NA MEKINI A SINGER,
ma ke $50 pakahi, me ke ano
MEKINI a WILCOX me GIBBS,
ma ke $30 a hiki i ke $50 ke kumukuai.
I mea e pau ai ko oukou kanalua e na Makamaka no @@@ pono o keia mau Mekini, e naue mai no me ke kuihe ole, a e ike no oukou iho.
628 tf
PAPA! PAPA!
NO
ALLEN & ROBINSON
UA WEHE AE NEI MAUA I
PA KUAI PAPA MA
KA UWAPO O PAKAKA
Na Papa Ulaula o na ano a pau.
Na Papa Paina o na ano a pau.
Na Pili Hale Ulaula.
Na Pili Hale Keokeo.
Na Pepa Hoonani Hale.
Na Pepa Molina.
Na Pena a me na Aila Pena!
Na Kui o Na Ano A Pau.
Na Pani Puka a me Na Puka Aniani.
Na Pani Puka a me Na Olepelepe.
NA LAKO KUKULU HALE
O NA ANO A PAU!
E KUAIIA MA KE
KE KUMUKUAI HAAHAA LOA
O keia Makeke.
ALLEN & ROBINSON
Honolulu @@ @@@@
LOLE MAKEPONO
Ke Kuike.
E LOAA NO IA MA KAHI O
KAKELA ME KUKE!
E LAA NA
Ahinahina, Kalakoa, Keokeo, Leponalo.
Pena, Aila, Aniani.
NA MEA PIULA!
KOPA, AILA HONUA. AILA HOOMALOO
Kui Kakia. Pakeke, Tabu, Kaula, Noho Lio, Hulu Palaki, na Pulumi.
A ME
AGENA NO HOI NO NA MOKUPUNI O HAWAII NEI NO NA
Lainakinionao, Lainakini Maoli, Palule Kalakoa. Alapia, Kelepa, Kilika.
Na lole kupono i ka wawae. Palule Huluhulu. Na Lole Huluhulu, Na Lole no ka hoohehelo ana Lipini, Lihilihi, & c.
LIPINE, LIHILIHI. & c.
A ME NA
Mikini Humuhumu Makepono Loa!
A ME
MAU MEA AI KAHI
Ka Palaoa, Kopaa, Raiki, Pia, Hoohu. Paakai, Huaola, Pia Kulina. @
A he Laau Lapaau Kaulana Loa
A Dr. Jaynes.
Laau Kunu, Laau Hoomaemae Koko, Laau Hoopau Naio, Penikila, Huaale.
A ME NA LAAU HAMO, A PELA AKU
840 tf
---
PAPA, PAPA
AIA MA KAHI O
LEWERS & COOKE!
(O LUI MA.)
MA KE KAHUA KAHIKO MA
Alanui Papu a me Moi
E LOAA AI NA
Papa Nouaiki
o kela a me keia ano.
Na Papa Nani a Paa no ke Kukulu
ana i na Hale!
Na Pani Puka, Na Puka Aniani, Na Olepelepe, Na Pou, Na O-a, Na Papa Hele, Na Papa Ku, A me na Papa Moe nui loa
NA PILI O KA HALE
O NA ANO A PAU.
Na Pepa Hoonani, Na Pena o na Wai a pau, Na Kui mai ke Nui a ka Makalii, Na Ami Puka, Na Ami Puka Aniani, Na Ami o na ano a pau. Na Aila Pena, o kela me keia ano. Na Aila Hoomaloo, he lehulehu wale. Na Aila e ae o na ano a pau.
NA WAI VANIKI
A ME NA WAI HOOHINUHINU NANI!
o na ano a pau loa.
NA BALAKI ANO NUI WALE
A ke hai ia aku nei ka lono i na makamaka pau, ua makaukau keia mau makamaka o oukou e hoolawa aku ma na mea a pau e pili ana ma ka laua oihana
no ka
UKU HAAHAA LOA!
E like me ka mea e holo ana mawaena o
laua a me ka mea kuai.
E hele mai! E na Makamaka!
A e lawa no hoi ko oukou makemake
me ka oluolu a me ka maikai!
845 tf