Ka Nupepa Kuokoa, Volume XX, Number 37, 10 September 1881 — KA PELE MA HILO. [ARTICLE]

KA PELE MA HILO.

Mai ka la 7 mai o Augate iho nei, ka ike ia ana aku o ke ahi pele ma Hilo nei ma ka emi ana mai o ka a ana, aole i nee ae ma kai, a ua ike no na kamahele malihini ma ka pa nui i hana ia e na haole mahiko oia no ka palena ma keia wahi. O ka hapa nui o ka pahoehoe, ua maalili e hiki no i ka mea kamaa oie ke hele maluna me ka wela ole a ma kau wahi aole i pio ke ahi ikaika no ka a ana, aia ma loko o ka lua, aia ma Kukuinui a ma uka aku olaila, he lua nui ua piha i ka pele, a ma loko o ia lua ua ike ia aku he mau mea kupanaha ua like ke ano me he pahu kupapau ula me na pihipihi ma luna o ke pani, a me ke kii ma ke poo o ka pahu, a elua keia mau pahu kupapau iloko oka lua ahi pele. Kupanaha ka ke Akua mau hana ma o ka pele ala.

Ka noho ana o ko Hilo nei i keia manawa, me he ala ua hala ka hooile, ua pau ka ua, ua pau ke kupilikii ana o ka manao no ke kaumaha no ka hana a ke ahi pele ai honua. Ekolu mau mea nui ma ka olelo a kanaka no ka emi ana o ka pele. 1 No ka hiki ana mai o Keelikolani ke lii a ma kahi o ka pele, a olelo kaukau aku la i mua o Pele a me kana wahi makana me ka hiki pu ana mai no hoi o ke Alii ke Kahu Aupuni a me ke alii Pauahi, pela na olelo. 2 No na mohai hoomanamana a kekahi poe, maloo ka puaa iluna o ka pahoehoe, me ka manao e pau ana ia Pele, aole nae, ahu wale na hana o ka pouli, ike ia ka niu, a me ka awa ke ahu mai iluna o ka pahoehoe pau ole ka epa ia Hawaii, e aho ka paeaina o Kilibati. 3 O ka pule a na haipule mai Hawaii nei i a Kauai o Mano, a hala aku i na aina kristiano o ka honua e noi ana imua o ke Akua e malama ia keia kulanakauhale ma ka lokomaikai oke Akua a me Kona aloha, ma ko ke Akua poe ia olelo. A e hoolilo ia ana paha kekahi la ma keia mua aku i la hoomaikai i ke Akua no Kona lokomaikai pau ole, Oia ka Oiaio. O ka a ana nae a ke ahi pele i keia manawa, aole i pio loa ke a nei no maloko o na lua. Haiolelo a ke alii Simona Kaai ma Kaipalaoa, Hilo, ma ka la 25 o Aug nei. "Ina makaainana o ka Moi ma Hilo nei. Aloha oukou: "E noonoo nui oukou ma ko oukou noho ana, e noho me ka makaalai na hana a pau oia ke kumu o ke kuonoono o ka noho ana, i ole e lilo ka aina i na pake a me ka haole mai hoopili meai ia hai, e hooikaika i pomaikai ka noho ana, i loaa mai ka hua maikai e like me keia niu e ku nei ekolu hua o luna, oiai hoi ua pau ka a ana o ka pele

aole a hou, ua pule iho nei na haipule aole pio, nolaila, e pule oukou i elima akua. A ke noi aku nei au ia oukou e koho oukou ia J Nawahi i lunamakaainana no oukou, he aha olelo ano nui ae keia." A haawi ae la na kanaka i na huro ana ekolu, ua hele ka uapo a ohuohu lua i na kanaka ke nana aku, kohu honolulu, oia no hoi ka la i hookuku ia ai ka aha kiure a hoi ko kela wahi a me keia wahi. Me ke aloha i ka Lunahooponopono a me na Keiki ulele hua Pai o ka Nupepa. J S Kalana Hilo, Sept 1 1881.