Ka Nupepa Kuokoa, Volume XX, Number 37, 10 Kepakemapa 1881 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

 

KA NUPEPA

Kuokoa me ke Au Okoa

1 HUHA

No ka Makahiki. $2.     Eono Mahina, $1.

Daia Kuike ka Rula.

KOMITE HOOPONOPONO.

HEZEKIA AEA.

POAONO SEPATEMABA 10, 1881.

 

HOOLAHA EUANELIO.

  Ua hoololi ia ka halawai ana o ka ahahui euanelio o Hawaii hikina, mai Opihikao aku, aia ma Kalapana, Puna.

  No ka hoolaa ana i ko laila mau luakini, aia ma ka la 8 o Sepatemaba, Poalua elua 1881.

  Nolaila, e eleu na lala o ka aha euanelio a me na kahu kula Sabati, na elele oia oihana me ka makaukau, ma ka manawa i olelo ia maluna me ke kuipehe ele.

        Make ke kauoha,

            J S Kalana, Kakauolelo.

 

HOOLAHA HALAWAI EUANELIO.

 E hui ana ka aha euanelio o Hawaii akau ma Kohala komohana ke hike aku i ka la 7 o Sepatemaba 1881.

  He pono i na lala a pau oia aha hui e eleu mai.

S C Luhiau.

 

              OLELO HOOLAHA.

           Kula Nui o Lahainaluna.

  E hoomaka ana ke Kula Nui o Lahainaluna mai ka la 18 o Iulai a hiki i ka la 14 o Sepatemaba o keia makahiki, a ma ia la e hoomaka ana ka makahiki 51 o ke Kula.

  Nolaila, ke Kauoha ia aku nei na Haumana a pau i keakea ia ko lakou Hoi hou ana mai i ke Kula, e ka Mai Puupuu Liilii o na mahina i kau hope ae nei. E makaala a e Hoi mai i ka Home Naauao ma ka la i olelo ia maluna.

  A ke Kauoha ia nei no hoi na Luna Kula o na Apana, na Kumu Kula, me ka poe e ae a pau e manao ana e Hoouna mai i na Keiki i ke Kula, e Hoouna mai mamua o ka la i olelo ia maluna.

H R HITCHCOCK.

1023         2m.

 

Haawina Kula Sabati.

HELU 13, SABATI, SEPT 25, 1881.

KUMUHANA.

Na kia eha o ka Temperance. Pauku

       Baibala. 1 Kor 9;22 - 27.

 

  22 Iwaena au o ka poe makau wale, ua like me ka mea makau wale hoi au, i loaa ai ia'u ka poe makau wale. Iwaena o na kanaka a pau lilo ae la au i na mea a pau, i ola io ai kekahi ia'u.

  23 Ke hana nei no hoi au i keia, no ka euanelio, i loaa pu ai ia'u ko laila hope.

  24 Aole anei oukou i ike i ka poe kukini holo no lakou a pau, aka, hookahi wale no e loaa ka uku? Ma ka loaa oukou e kukini ai.

  25 O ka poe a pau i hooikaika i ka uku. ua pakiko no lakou ma na mea a pau. Ma ka kei mae wale lakou, aka, ma ka lei mae ole kakou.

  26 No ia mea, ke holo nei au me ke kulanalana ole, ke mokomoko ana i ka makani.

  27 Ke uumi nei au i kuu kino a lanakila maluna iho. o lilo paha wau i ke apono ole ia. mahope o kuu ao ana aku ia hai.

  Pauku Gula. Mai hoao, mai hoopa, mai lawelawe.

  Ka wehewehe me ka Ninau ana.

  Ka manawa A D 59

  Ke Lii. Nero

  Kahi i kakau ia ai Pilipi ma Kakedonia. Ka mea naua i kakau, Paulo.

  Ka poe nona i kakauia ai. Ko Korineto a no ko kela wahi, ko keia wahi.

  Heaha ke ano o ia huaolelo, Temperance? Kona ano e pili ana i kekahi mau mea, e mea liilii, ai liilii, inu liilii, hana liilii, moe liilii, paani liilii, aole waiho loa i keia mau mea e mea pakiko, e like ma ka mea kupono.

  Kona ano nae ma keia haawina, e waiho loa aku i keia mau mea.

  Mai hoao, mai hoopa, mai lawelawe.

  Heaha ia mau mea? Ua akaka no, o kela hewa keia hewa. me na mea ano ino a pau, oia na mea i pono ke haalele loa aku, nana 1 tes 5;oo

  Aka, aole kakau e nana i keia manawa, i na mea ano ino a pau.  E wae ia kekahi mau mea ane ino nui a ma ia mau mea e kamailio ai.

  1 Na mea ona, 2 ka baka, 3 ka opiuma. Ma na mea ehia i maopopo ai he mau mea ino keia?

  Ma na mea eha i kapa ia he mau kia, I heaha ke kia mua, o ko ke kanaka lunaikehala, aole anei i maopopo lea, he mau mea ino ka rama, ka baka, ka opiuma? E nana ka maka, e hoao ke alelo, e honi ka ihu, maikai anei, ono, aole, he ino, he wela, he awaawa, he hohono.

  Pehea ke nana i ka poe lawelawe, weliweli ke ino, e owala ana iloko o ka ona, e luai ana, e walaau ana. pau kahi dala, ilihune, welawela ka lole.

  Heaha kokahi pomaikai, aole he pomaikai io.

  Pehea na keiki puhi baka, oau baka, kupono anei i ka mahalo ia?  Aole anei lakou i hilahila ke ike ia e ka poe i papa i ke puhi ana, nau ana.

  Nui ke ino o keia mau mea ekolu ma ka nana aku.

  2 Heaha ke kia elua? Ka mea i hooholo ia, a hoolaha e ka poe noeau.

  Heaha ia mea, ua huli ua imi lakou i ke ano o ka rama, o ka baka, a o ka opiuma, a akaka lea ia lakou, he mau mea ino wale no keia mau mea ekola, nui na kauka akamai i hooholo pela, koe nae ko lakou ano lapaau, ma na ano e ae, he ino wale na.

  Heaha ke ino, ka hana ino ana i ke kino, hoonawaliwali i ke kino, hana ino i ke koko, i na iwi, i na aa, i ka lolo, a pela aku, hooili mai i na mai, keakea i ka noonoo ana, kokua i ka hoonaaupo ana, hoopokole i ke ola kino.

  Nolaila anei ka loaa ole ana o ka naau ao i na keiki Hawai, no ke puhi baka, a nau baka o na makoa me na keiki pu?

  Ae, makehewa ka hoopai ana i na keiki no ka loaa ole o na ninau helu me na ninau e ae, ua komo ke ino o ka baka, o ka rama, o ka opiuma, iloko o ka lolo o ke keiki, no ka makua mai kekahi, a no ke keiki kekahi ke hoopa a lawelawe oia ia mau mea.

  3 Heaha ke kia ekolu? Ka baibala.

  Akaka anei ma ka baibala he ino keia mau mea ekolu, pela; pehea, ua komo anei ia mau hua ekolu, rama, baka, opiuma, iloko o ka baibala, aole paha e loaa ana ia mau hua ponoi, aka, e loaa ana na hua ano like.

  I ka wa i kakau ia ai ka baibala, aole paha i hoea ka rama, ka baka, ka opiuma.

  Mahope mai lakou, na hua waina, waina i awili ia, ka mea awaawa, ka mea ikaika, ka mea ona a pela aku, oia na hua i ike ia ma ka baibala.

  Ua kauoha anei ka baibala ia kakou e inu i ka waina, i ka mea awaawa, i ka mea ona, e ai i ka mea haumia. inoino, hoopailua?

  Auhea ka pauku, aole ea, sole anei Paulo i kauoha ia Timoteo e inu i ka waina, ae i mea laau nae no kona nawaliwali pinepine, aole anei Iesu i hana i waina no kekahi ahaaina mare?  Ae, aole nae i akaka he waina ona kela, aole anei i kapa ia Iesu he kanaka pakela inu waina?

  Pela Kona mau enemi, ua olelo hoi lakou he daimonio ko Iesu, a hana ma ka mana o na daimonio, he mau olelo wahahee wale no.

  Pehea ka poe inu waina, Noa, Sota, &c. ua hoopai ia maluna o na mamo.

  Hai mai i kekahi mau pauku baibala no ke ino &c,  o ka waina, Sol 20;1, Sol 23;29 - 32, 1 Kor 6;10, Is 5;11,22, pehea Paulo ma Rom 14;21, aole loa oia e inu i ka waina a e hana i kekahi mea e hina'i kona hoahanau, ua kue ka baibala i na mea ona, awaawa, inoino.

  Heaha ke kia eha?  Ke ino o ka hoao, a hoopa a lawelawe, nui ka poe i hoao a ai, a inu a lawelawe ma keia mau mea ekolu, ka rama, baka, opiuma. A ua ike lea lakou, he mau mea ino wale no lakou, e ninau aku ia lakou, a na lakou e hoike me ka oiaio i na ino, i na poino, i na pilikia, na poho, ka ilihune, na mai, na haule i loss is lakou.

  E ala kakou a pau, a e hooikaika e hoopau i keia mau mea ino ekolu ma o ke ke Akua kokua ana mai.

  Haawina no Oct 2.  Puk 35;25 - 35.

 

HE NINAU BAIBALA I HOOPAAPAA NUI IA MA KE KULA SABATI O WANANALUA,

            HANA, MAUI.

 

E Mr Lunahooponopono.    Aloha oe.

  E ae mai oe ia'u i kau wahi o ko kakou Nupepa Kuokoa, no kekahi nimau i ulele nui ia e na kakai iwi oolea o Hana nei, e like me ia e kau ae la maluna, maloko o ka luakini hoole pope o Wananalua ma ka la Sabati Iulai 17 1881/

  Ua waiho mai ko makou kahu kula Sabati i kekahi ninau baibala mawaena o na haumana kula Sabati i hoike ia ma Mar 8; 12 penei:

  "Uwe nui aku la ia iloko o kona naau, i ae la.  No ke aha la keia hanauna e imi mai nei i hoailona? oiai ke hai aku nei au ia oukou, aole e haawi ia aku ka hoailona no keia hanauau."

  Ma ka hapa hope o ka pauku, penei ka ninau.  "Ua pono anei ko Iesu hoole ana, aole make haawi i ka hoailona i na Parisaio aole paha.

  Ua ae kekahi poe haumana, ua pono no, hoole hoi kekahi poe haumana, ua hewa o Iesu no kona hoole ana, aole e loaa ka hoaliona i na Parisaio hookawani, mai loko mai o keia mau haina a elua, ua hoolilo ia paha hookahi hora o ke kamailio ana o na aoao a elua.

  Ku mai la ke kahu kula Sabati e like me ke kulana oia wahi, a hoomalu mai la i ka hale. me ka poha koikoi i kina haina, olelo hooholo.

  "Ua hewa o Iesu."  Ia puka ana o ka olelo hooholo, ua hewa o Iesu. o ka pioloke ae la no ia o ka hale nai-o a o, a kamailio mai la kekahi mau haumana me ka i mai, ina pela ka olelo hooholo. ua like no ia me ka mea e kipaku ana ina kanaka a pau loa, aole make hele mai i ka pule, no ka mea, ua hewa ae la o Iesu ka mea i olelo ia, he hemolele loa ma keia ao.

  Aole au i manao e hoolaha aku i keia mea imua o ka lehulehu, aka no ka piha ana ae nei o kauna o na olelo hooholo o keia ano ma ko makou kula Sabati, e ahewa ana ia Iesu ma kekahi mau mea, nolaila, ke waiho aku nei au imua o oukou, aka me ka lana o kuu manao e ae mai ana no oe e Mr Lunahoopuka, e kakele mua iho i ke kahua no ka mea, o kau kawa ia i lele a opu, a me lakou pu nei ae.

  Koailo ia mai, a eia ka nea loa, iloko o na haina a pau o keia ano, aole i ike ia aku o na wehewehe ana o lo makou kahunapule.

  Ua pau me ke aloha, ke kani pipi mai nei ka puka iho o Mokuhono i ke kai.

      Haumana  Kula Sabati.

 

HOIKE KULA SABATI O KEANAE.

E ka Nupepa KUOKOA e;  Aloha oe:

  E oluolu oe e hookomo iho ma kahi kaawale o koa mau kolamu i na mea hou o ke kula Sabati o Keanae nei, i ike mai ai na elakesia o kaua.

  Ma ka ia 27 o Aug 1881, ua hoike ke kula Sabati o Keanae nei malalo o ka noho kahu ana o K Makaena, a ua hoomaka na hana o ke la e like me na kahikahi malalo nei.

  Ua hoonohonoho ia ka huakai malalo o na hooponopono ana a na komite oia hana, J W Kahuhu me D W Napihaa.

  O ka papa o Ellia Malailua ka mua me na pahu a me na ohe e uhene ana i ke kula pili o Malama, o ka papa iho o na kane o S Kamakahiki ke kumu,o ka papa iho o na wahine o Mrs G Kamaka ke kumu, ka papa iho o na opio wahine o Mrs Mary Kahuhu ke kumu, ka papa iho o na pokii ke hope loa o D W Napihaa ke kumu.

  A ma ka pau ana oia mau hooponopono ana, ua kai aku la ka huakai no ka hikina a ma kahi o Kalilimoku ua aoi hou ae la ka nee ana o ka huakai i ke homohana a pela no i nee ai a hiki i ka luakini.

  Na ka bana i lawe kela papa keia papa ma kona wahi iho ma ka mau no o ke ku ana iluna e mele ala i ke mele.   "Hosanna to the Lamb of God."  Pule na ke kahu kula Sabati nui o Maui hikina J K Iosepa.

            Hoike Haawina.

  1 hike ka papa o Mrs Kamaka no ekolu haumana ma kekahi, o na hana mana a Iesu ma ke Kauoha Hou.

  2 himeni na ia papa no.  Eu na hoa.

  3 hoike ka papa a Elia Malailua no eha haumana ma kekahi mau ninau o ka buke wehewehe o ko ke Akua ano.

  4 elua himeni na ia papa no. Hapehape me La Hoike.

  5 hoike ka papa senate o Rev S L ke kumu ma na hana mana ma ke Kauoha Kahiko.

  6 himeni ia papa.  He Akua Hemolele.

  7 hoike ka papa a M Kahuha he himeni ka mua.   Eu e eleu ae.

  8 hoike haawina ia papa ma ka Uikamalii no 2 haumana.

  9 himeni hou ia papa.

 10 hoike ka papa a Napihaa ma ka olelo akamai a Solomona,

 11 himeni noi dala na ka papa a Mrs Keawe, o na loaa ma ia himemi $11.75.

 12 lulu dala no ke kula Sabati, o na loaa ma ia lulu ana he $70.25 hui me na dala i loaa ma ka himeni, piha 82.00 oia na loaa o ke kula Sabati.

  Mahope o ka lulu ana ua hoopiha ia iho la ka lua o ka inaina a ko-u ka puu i na hohi kelekele a ka puukolu a mahope iho ua hoomaka ka hoike no na haawina i koe.

 13 hoike ka papa a Mrs Kamaka no eha haumana ma kekahi mau hana mana a Iesu ma ke Kauoha Hou.

 14 himeni ia papa  Nami keia la maikai.

 15 hoike ka papa a Elia Malailua no 2 haumana ma kekahi mau ninau o ka buke wehewehe o ko ke Akua ano.

  Himeni ia papa. Ulu,

  Hoike hou elua haumana a Elia ma kekahi mau ninau o ka buke wehewehe o ko ke Akua ano, himeni na ia papa no  Mine Baraunu.

  Hoike ka papa a Napihaa 3 haumana ma ka olelo kike me ka haiolelo ma ke Aoheluhelu; himeni ia papa. Kula nani nei.

  Hoike ka papa a Mrs Kamaka no 4 haumana, no kekahi mau hana mana ma ke Kauoha Hou, himeni ia papa, E ala na moku o kai lilo.

  Hoike ka papa a E Malailua 2 haumana ma kekahi mau ninau o ka buke wehewehe o ko ke Akau ano, himeni ia papa, luanu. Hoike hou 2 haumana o ka papa a Elia ma ka wehewehe i ko ke Akua ano, himeni na ia papa no, Hehene.

  Hoike ka papa a Mary Kahuhu ma ka Oikamalii 3 haumana, himeni ia papa, La Hauoli.

  Hoike hui no ka papa a Mrs Kamaka ma ka a-h-a aha, himeni ia papa, Hoonani ia

  O ka pau ana keia o na hana o ka la ua ku mai ia o Puoina, Kamakahiki, Lono me Iosepa, o ke ano nui o ka lakou mau olelo, he mahalo no ke kula Sabati.

  Nolaila, ke eki nei au maanei, me ka Lunahooponopono a me na Keiki ulele hua Metaia ko'u welina.

         J W KAHUHU.

  Keanae, Koolau.   Aug 30 1881.

 

HOOMAEMAE ANA IA ZIONA HOU, KA KUAKINI O ONOMEA, HILO, HAWAII.

 

E ka Nupepa Kuokoa e.  Aloha oe: -

  Ma ka pule mua o Ianuari, 1881, ua noho ka Aha Luna a noonoo e hoomaemae i ka luakini, oiai ma ka nana ana ae, ua hapauea ke kino o ka hale; a ia wa i lawe ai na hoa a hooholo e hoomaemae i ka luakini, a ua koho koke ia na Luna paipai mawaena o na Apana penei:

E H Umiamaka, mai Kawainui a Pepeekeo Plantation; J Pinao, ao Onomea Plantation; D Kamai, no Aleamai a me na apana e pili ana.

  1 ka la 16 o Ianuari no, ua lula dala na hoahanau me ka hooikaika nui. a ua loaa ina ia lulu dala ana, $400 a oi; u@ ka hauoli no keia puu dala i kokua ia, aka, aole i pau loa ua hemahema ma keia lulu ana, a no ia mea, ua koha hou ia i la e lulu dala hou ai, oia ka la 10 a lulai.

  Ua koho hou ia no i mau Luna paipai a noi dala, ma iho keia poe: Mrs Lee Loy no Pepeekeo, Mrs. Pinao no Kawainui, Mrs Umiammaka no Onomea, Kula o Pepeekeo, Miss Keaomakani no Kula  o Onomea. Kula o Alakahi a me ke Kula a E Mau. A i ka hiki ana i ka la i oleloia, Iulai 10, ua lulu hou, a eia na mea i loaa: Kula a E Mau $8.25, Kula a Miss Keaomakani $7.10, Kula a Hattie Umiamaka $9.25. Na Apana: Kawainui $76.10, Apana o Puumoi $30.25, Onomea $22.25, Pepeekeo $70.25, a na ke keiki kokua i na hana pono, oia o Mr. Lee Loy he $26.00, a na Mr. me Mrs. Nawaaa $5.50.

  Ma keia mau lulu dala ana, ua mahalo nui ia o Lee Loy, he pake kokua i na hana makai, a me kana wahine, a he Luna Mahiko hoi no Pepeekeo, ua paipai nui aku oia i kona mau paahana.

  A he mea no hoi mahalo ia no ko P Wahakane ula ana mai e kokua me kona poe paahana i keia hana nui.  He Hawaii ponoi keia e hookele nei i kona ikaika ma ka mahiko, a ua like ka laua hana me Lee Loy.  Olioli ka manao i ka ike aku i ka hana a ka Haku ma o keoa mau kanaka.

  Pela no hoi, aia no ma ia alahele a ke kokua i na hana pono o D Kamai, he he mau lima hana no kona, a he mahiai kana hana nui.  A pela ao me na makamaka e ae, ua haawi lakou me ka makee no na pono o ka Haku; a ua ikeia aku ke ala nui ana mai o ua hoahanau a me na kanaka mawaho e kokua i keia hana nui.

  A i ka loaa ana o keia puu dala, ua hooliloia no ka hoomaemae ana i keia hale, a ke ku nei oia me na hiohiona nani, a ua hala ka hapauea, he opioopio ia e ku nei.

  Eia keia; Ma keia la hope no i lulu dala ai, ua lulu pu na hoa no ka hale o ke Kahu, a ua loaa na dala he 70. Piha hauoli ke anaina a me ka lehulehu i na hana, a me he mea la, ua iho mai ke aloha o ka Huku ma keia apana.

                                    E. H. UMIAMAKA,

                Komite    {

                                    J. H. PAHIO.

 

            KA PELE MA HILO.

  Mai ka la 7 mai o Augate iho nei, ka ike ia ana aku o ke ahi pele ma Hilo nei ma ka emi ana mai o ka a ana, aole i nee ae makai, a ua ike no na kamahele malihini ma ka pa nui i hana ia e na haole mahiko oia no ka palena ma keia wahi.

  O ka hapa nui o ka pahoehoe, ua maalili e hiki no i ka mea kamaa ole ke hele maluna me ka wela ole a ma kau wahi aole i pio ke ahi ikaika no ka a ana, aia maloko o ka lua, aia na Kukuinui a mauka aku olaila, he lua nui ua piha i ka pele, a maloko o ia lua ua ike ia aku he mau mea kupanaha ua like ke ano me he pahu kupapau ula me na pihipihi maluna o ke pani, a me ke kii ma ke poo o ka pahu, a elua keia mau pahu kupapau iloko o ka lua ahi pele.  Kupanaha ka ke Akua mau hana ma o ka pele aia.

  Ka noho ana o ke Hilo nei i keia manawa, me he ala ua hala ka hooile, ua pau ka ua, ua pau ke kupilikii ana o ka manao no ke kaumaha no ka hana a ke ahi pele ai honua.

  Ekolu mau mea nui ma ka olelo a kanaka no ka emi ana o ka pele.

  1 No ka hiki ana mai o Keelikolani ke lii a ma kahi o ka pele, a olelo kaukau aku la imua o Pele a me kaoa wahi makana me ka hiki pu ana mai no hoi o ke Alii ke Kahu Aupuin a me ke alii Pauahi, pela na olelo.

  2 No na mohai hoomanamana a kekahi poe, maloo ka puaa iluna o ka pahoehoe, me ka manao e pau ana ia Pele, aole mae, ahu wale na hana o ka pouli, ike ia ka niu, a me ka awa ke ahu mai iluna o ka pahoehoe pau ole ka epa ia Hawaii, e aho ka paeaina o Kilibati.

  3 O ka pule a na haipule mai Hawaii nei a Kauai i Mano, a hala aku i na aina kristiano o ka honua, e hoi ana imua o ke akua e malama ia keia kulanakauhale ma ka lokomaikai o ke Akua a me Kona aloha, ma ko ke Akua poe ia olelo.

  A e hoolilo ia ana paha kekahi la ma keia mua aku i la hoomaikai i ke Akua no Kona lokomaikai pau ole, Oia ka Oiaio.

  O ka a ana mae a ke ahi pele i keia manawa, aole i pio loa ke a nei no maloko o na lua.

  Haiolelo a ke alii Sonoma Kaai ma Kaipalaoe, Hilo, ma ka la 25 o Aug nei.

  "Ina makaainana o ka Moi ma Hilo nei,'' Aloha oukou:

  "E noonoo nui oukou ma ko oukou noho ana, e noho me ka makaala i na hana a pau oia ke kumu o ke kuonooao o ka noho ana, i ole e lilo ka aina i na pake a me ka haole mai hoopili meai ai hai, a hooikaika i pomaikai ka noho ana, i loaa mai ka hua maikai e like me keia niu e ka nei ekolu hua o luna, oiai hoi ua pau ka e ana o ka pela aole a hou, ua pule iho nei na haipele aole pio, nolaila. e pule oukou i elima akua.

  A ke noi aku nei au ia oukou e koho oukou ia J Nawabi i lunamakaainaae no oukou, he aha olelo ano nui ae keia."

  A haawi ae la na kanaka i na huro ana ekolu, ua hele ka uapo a ohuohu lua i na kanaka ke nana aku, kohu honolulu, oia no hoi ka la i hookuu ia ai ka aha kiure a hoi ko keia wahi a me keia wahi.

  Me ke aloha i ka Lunahooponopono a me na Keiki ulele hua Pai o ka Nupepa.

           J S KALANA.

Hilo , Sept 1 1881.

 

Halekuai Ili hou o

HUGH MACKAY

  Ka mea hana Ili akamai o Hawaii nei.

Aia malaila na Ili o kela me keia ano i

Hooluu ia me ka nani lua ole.

E aku no ae i DALA KUIKE  @ na @ ano ILI a pau, ina

ILI MALOO A MAKA PAHA

no ka auh@ kiekie ke lawe ia mai i o'u nei.  E kaa no au ma

      ko'u Hakekuai Hou o

WEHE KA OLU!

  Ma Halemahoe, Alanui Moiwahine. e hui plolei ana ke alo

i ke Alanui Kaahumanu.

  C ka'u ia e kauleo aku nei i na makamaka e nane mai i o'u

nei.           1024               Iulai 13 tf

 

OLELO HOOLAHA,

 

  Maikai ka hoi kou Paa Lole?

    Nohea la kahi i loaa ai ia oe?

       No kahi o

ROBSON & SORENSON,

  ma Alanui Papu.

    Keena o McINTRE.

1022           6m.

 

  CHRISIANT GERTZ

Mea Hana Buti

- ME -

NA KAMAA MAOLI!

Alanui Papu. makai a ke Keena o Lui & Dickson

KE HAI AKU NEI OIA I NA MEA A PAU

Ua hoi mai oia mai Kapalakiko mai,

llaila Oia i ohi kino mai nei i na waiwai

nani a paa o kana oihana, a ke

waiho ia aku nei no ke kuai

ana no na kumukuai

o ka manawa

HE MAU WAIWAI PIHA O NA BUTI

 

Na KAMAA HAAHAA a me na ano kamaa

no na Lede.  Na Buti, na Kamaa Haahaa

a me na ano kamaa e ae a pau

no na Keonimana.

 

NA BUTI & KAMAA HAAHA

A ME NA ANO KAMAA E AE A PAU

NO NA KAMALII!

NA KAMAA O Na ANO HE HUI

O NA KAMAIKI OPIOPIO.

 

  O keia mau mea a pau ua hanala me ke akamai loa a me ka

paa o na ano hou loa, a ke hoola ia aku nei ia mau mea e like

me ka mea i olelo ia

  E lawe ia no na kauoha mai na Mokupuni me ka mai

au me ka eleu.                      9423m

 

    PAPA! PAPA!

- NO -

ALLEN & ROBINSON

UA WEHE AE NEI MAUA I

PA KUAI PAPA

- MA -

KA UWAPO O PAKAKA

     Na Papa Ulaula o na ano a pau.

     Na Papa Paina o na ano a pau.

     Na Pili Hale Ulaula.

     Na Pili Hale Keokeo.

     Na Pepa Hoonani Hale.

     Na Pepa Molina.

 

Na Pena a me na Aila Pena

NA KUI O NA ANO A PAU.

 

NA PANI PUKA a me

NA PANI PUKA ANIANI.

     NA PANI PUKA a me

     NA OLEPELEPE.

 

NA LAKO KUKULU HALE

O NA ANO A PAU!

E KUAIIA MA KE

KE KMUKUAI HAAHAA LOA

O keia Makeke.

Allen & Robinson

Honolulu a o 1, 187@      848 tf

 

LOLE MAKEPONO

Ke Kuike.

E LOAA NO IA MA KAHI O

 

KAKELA ME KUKE!

-E LAA NA -

 Ahinahina, Kalakoa,,

Keokeo, Leponalo,

Pena, Aila Aniani,

HA MEA PIULA

KOPA, AILA HONUA.

AILA HOOMALOO

Kui Kakia, Pakeke,

Tabu, Kaula, Noho Lio,

Hulu Palaki, na Pulumi

- A ME -

AGENA NO HOI NO NA KOKUPUNI O

HAWAII NEI NO NA

  Lainakini-nao

  Lainakini Maoli,

  Palule Kakakoa,

  Alapia, Kelepa, Kilika,

 

  Na lole kupono i ka wawae,

  Palule Huluhulu,

  Na Lole Huluhulu

  Na Lole no ka hoohehelo ana

  Lipini, Lihilihi, &c.

 

LIPINE, LIHILIHI, &c.

 

-A ME NA -

Mikini Humuhumu MakeponoLoa!

 

- A HE -

MAU MEA AI KAHI

Ka Palaoa, Kopaa.

Raiki, Pia, Hoolu,

Paakai, Huaala,

Pia Kulina, &c.

 

A he Laau Lapaau Kaulana Loa

A DR. JAYNES.

Laau Kunu,

Laau Hoomaemae Koko,

Laau Ho opau Naio,

Penikila, Huaale.

 

A ME NA LAAU HAMO, A PELA 'KU

840 tf

 

PAPA, PAPA

AIA MA KAHI O

LEWERS & COOKE!

(O LUI MA.)

MA KE KAHUA KAHIKO MA

Alanui Papu a me Moi

E LOAA AI NA

Papa Nouaiki

o kela a me keia ano

Na Papa Nani a Paa no ke Kukulu

ana i na Hale!

Na Pani Puka, Na Puka Aniani,

Na Olepelepe, Na Pou, Na O-a.

Na Papa Hele, Na Papa Ku.

A me na Papa Moe nui loa

NA PILI OKA HALE

O NA ANO A PAU.

 

Na Pepa Hoonani, Na Pena o na Waia pau.

Na Kui mai ke Nui a ka Makalii,

Na Ami Puka, Na Ami Puka Aniani

Na Ami o na ano a pau.

Na Aila Hoomaloo, he lehulehu wale,

Na Aila e ae o na ano a pau.

NA WAIVANIKI

- A ME NA -

WAI HOOHINUHINU NANI!

o na ano a pau loa.

NA BALAKI ANO. NUI WALE

 

A ke hai ia aku nei ka lono i na makamaka

pau, ua makaukau keia mau makamaka

o oukou e hoolawa aku ma

na mea a pau e pili ana,

ma ka laua oihana

- NO KA -

UKU HAAHAA LOA!

E like me ka mea e holo ana mawaena o

LAUA a me ka MEA KUAI.

 

E hele mai! E na Makamaka!

A e lawa no hoi ko oukou makemake

me ka oluolu a me ka maikai

845tf