Ka Nupepa Kuokoa, Volume XX, Number 30, 23 July 1881 — NUHOU NO KA PELE. [ARTICLE]

NUHOU NO KA PELE.

Mr D Keaweamahi. Aloha oe;O ke ahi Pele, eia no oia ke nee mau nei i mua me ka lohi, aole awiwi, aka, o ke ahi Pele i keia wa, ua oi loa kau ka ikaika o ka a ana i ko ka wa i hala aku, he palahalaha a akea no me ka hoaleawai ana, aole o kana mai ka ikaika o ke ahi. E hele ana i ka akau a me ka hema, ma ke ano me he mea ala e hoopuni ana i ke kaona o Hilo, e like me ka puali koa e hoopuni ana i ka enemi, pela ke ano o ka Pele e ike ia nei. Ua kokoke ke ahi Pele e hiki mai i Waiola, aia keia wahi makai iki mai o Kaumana ma ka aoao hema o ka aina, oia ke ahi makamua loa ma ke ano pololei, e kupono ana i ka lokowai o Waiolama a o ke ahi Pele alua, ke a makawela mai la i luna pono o ka aina. Aole ma ke kahawai e like me ke ahi Pele mua, o ke kolu o ke ahi pele, aia ia iuka pono o Piihonua e pili ana i kekahi mana wai o ke kahawai nui o Wailuku, me kona ikaika no hoi e hele nei. Ma ke kihi akau o keia taona 1-2-3, ke mau nei ko lakou nee ana i mua me ka ikaika loa o ka a ana, aole holo kiki aku, he nee malie no. Eia kekahi mea hou. Ma ka la 6 o Iulai nei, ua kukala akea ae ka Hope Kiaaina o ka mokupuni o Hawaii nei, e malama ia ia la i la Hoomanao i ke Akua Mana Loa, ma ke ano e noi aku iaia me ka oluolu, no keia pilikia nui weliweli e pahola mai nei ma ke taona o Hilo nei. A i ka hiki ana i a la, hola 11 am, ua pani ia na hale oihana o kela a me keia ano, a ua hookuu ia na hana lima o na pa mahiko a pau o Hilo nei, a hiki loa aku i Hilo akau. Kani na bele o na hale pule e kahea ana i na poe kristiano oiaio o Hilo nei e hele iloko o Kona hale e hoomana ai iaia. A i ka nana ana, ua ku i ka eehia na hana o ia la. Na haole, na pake, me na Hawaii maoli, ua piha o Haili ia la. Mahalo piha keia taona i ka hana maikai a ka Hope Kiaaina o Hawaii, oia o F S Lyman. Oia aela no na mea hou. Owa no o kou haahaa, E P Hoaai. Puueo, Hilo, Iulai 14, 1881.