Ka Nupepa Kuokoa, Volume XX, Number 21, 21 May 1881 — Page 4
| This text was transcribed by: | Pualani Steele |
| This work is dedicated to: | Mapuana De Silva |
Ka Nupepa Kuokoa
KE KILOHANA POOKELA NO KA LAHUI HAWAII.
KA NUPEPA
Kuokoa me ke Au Okoa
HUIIA.
No Ka Makahiki, $2. Eono Mahina, $1.
Da@a Kuike ka Rula.
ROMITE HOOPONOPONO.
SAMUELA KAAIKAULA
HEZEKIA AEA.
POAONO. MEI 21, 1881.
INA HE HOME KO'U MA O.
Title Clear.
Colonial Singer, no 198.
1
A maopopo lea ia'u, lea ia'u:
A maopopo lea ia'u,
He home ko'u ma o,
Pau kuu uwe, pau kuu makau,
kuu makau:
Pau kuu uwe, pau kuu makau,
He oli nui ko'u.
Cho. Naue ae---i o----
Naue ae i ke ao ke ao io.
A e pae---ae auanei, auanei,
Ae, a e pae ae auanei.
Naue ae naue ae i o i ke ao, ke ao i o
A e pae ae auanei, auanei.
2
Ina haule paapu mai, paapu mai
Ina haule paapu mai
Na ino o ke ao,
Pomaikai au ke hiki ae hiki ae
Pomaikai au ke hiki ae
I kahi home mau.
Cho. Naue ae, &c.
3
Malaila au e auau ai auau ai
Malaila au e auau ai
Ma ko ka lani wai,
A maemae no a maha e maha e
A maemae no a maha e,
A malu mau loa'e.
Cho. Naue ae; &c.
Hawaii.
Haawina Kula Sabati.
HELU 10. SABATI IUNE 5, 1881.
KUMUHANA.
Ke kaulia'na ma ke kea. Pauku Baibala.
Luka 23;33---46.
33 A hiki aku la lakou i kahi i kapa ia o Kalevari, malaila lakou i kau aku ai ia la ma ke kea, a me na lawehala, ma ka akau kekahi, a ma ka hema kekahi.
34 Alaila, olelo aku la o Iesu, E ka Makua, e kala iho Oe i ko lakou nei hewa; no ka mea, aole o lakou ike i ka lakou mea e hana nei. Puunaue ae la lakou i Kona mau kapa, hailona iho la.
35 Ku iho la no hoi na kanaka e makaikai ana: a hoomaewaewa aku la me ko lakou mau alii, i aku la. Ua hoola ka Oia ia hai, a ina Oia ka Mesia, ka Hiwahiwa a ke Akua, e hoola kela ia la iho.
36 Hoomaewaewa aku la hoi na koa ia la, hele aku la lakou, a haawi aku la i ka vinega ia la;
37 A olelo aku la lakou, Ina o Oe ke Alii o ka poe Iudaio, e hoola Oe ia Oe iho.
38 He palapala hoi maluna Ona, he Helene, he Roma, a he Hepera ka olelo i kakau ia'ai la, "Oia nei ke Alii o ka poe Iudaio."
39 A o kekahi o na lawehala i kauia, hoino aku la oia ia la, i aku la, Ina o Oe ka Mesia, e hoola Oe ia Oe iho a me maua.
40 A olelo ae la kekahi e ao ana ia la, i ae la, Aole anei Ou makau i ke Akua? maloko pu hoi Oe o ia make hookahi.
41 A ia kaua, he pono ia, no ka mea, ua loaa ia kaua ka uku pono o ka kaua hana, aka. Oia nei, aole la i hana hewa iki.
42 Olelo aku la hoi oia ia Iesu. E hoomanao mai Oe ia'u. e ka Haku, i ka wa e hiki ai Oe i Kou aupuni.
43 I mai la hoi o Iesu ia ia, He oiaio Ka'u e olelo aku nei ia oe, I keia la o oe pu kekahi me Au iloko o ka Paradaiso.
44 A i ke ono o ka hora, he pouli maluna o ka honua a pau, a hiki i ka iwa o ka hora.
45 Ua hoopouli ia hoi ka la, a nahae iho la mawaena konu ka paku o ka luakini.
46 A kahea aku la o Iesu me ka leo nui, i aku la. E ka Makua. iloko o Kou mau lima ke waiho aku nei Au i Ko'u Uhane! A pau Kana olelo ana ia, make iho la Ia.
Pauku Baibala. Io 12;32, huli a hoopaa.
Manao nui. Ke kaulia'na ma ke kea, ke akamai me ka mana, o ke Akua ia e ola'i kakou.
Na heluhelu la. 1 Luk 19;28-48, 2 Luk 20;1-47. 3 Luk 21;1-38, 4 Luk 22;1-38, 5 Luk 22;39-71, 6 Luk 23;1-32, 7 23;32-46.
Mele. him 438. Mai ka lani iho mai la
Pule hoomaikai i ke Akua no Kona haawi ana mai i Kalahala e ola ai.
Ke wehewehe me ka Ninau ana.
Ke nauwe mai la Iesu i Ierusalema. ua hala Ieriko. Ua kokoke Betania.
Ma ka Poaono, la 9 o Nisana, A D 33, oia hoi ka la 1 o Aperila ia kakou, hiki Iesu i Betania kahi o Lazaro ma, a ahaaina pu malaila ma ia ahiahi.
Sabati Aperila 2, Sabati Pama ia. komo lanakila Iesu iloko o Ierusalema, Luk 19;28-40.
Poakahi Ap 3, hoomaemae Iesu i ka luakiki, Luk 19;45-46.
Poalua Ap 4, hele hou Iesu i ka luakini, a hai mai i na wanana no ka hoopau ia'na o Ierusalema me ka luakini &c.
Poakolu Ap 5 ohumu a kuka na luna e pepehi ia Iesu. Ma Batania Iesu.
Poaha Ap 6, ahiahi ka ahaaina barena hu ole, ma ka hookumu ana i ka ahaaina a ka Haku. Ma ia po no ka pule ana a Iesu ma ka mala o Getezemaul. A puka ka poe hopu, a hopu ia la, a lawe aku i ka hookolokolo ana.
Poalima Ap 7, Poalima pomaikai keia, ua hoomaka ia ka hookolokolo ia ana o Iesu ma ke kakahiaka nui a hoomau ia a ane awakea, aole i loaa ka hewa kupono e make ai. Ua hoahewa ia nae Oia e make me ke kea. Aole Ona hewa iki, wahi a ke kiaaina. Ua hoahewa ia ka Mea i pono e make no ka poe pono ole.
Nana no i na mokuna 19,20,21,22,23; 1-32 o Luka.
Luk 23;33-40, ke kumumanao, Iesu ka Mohai Kalahala.
1. Iesu ka Mea i kaulia ma ke kea.
P 33 Ua alakai ia aku Iesu mai kahi hookolokolo o Pilato a ihea? Me wai pu? Kalevari, Golegota kekahi inoa.
Iwi poo ke ano, no ka like paha o kona ano me ka iwi poo. He wahi puu iki ia ma ke komohana o Ierusalema.
Kaulia Iesu ma ka puu o Kalevari, me na powa elua, mahea kekahi? mahea kekahi?
Ma ka hora ehia i kaulia ai? Heaha ke ano o ka make ma ke kea? Pepea na lima, na wawae? Na wanana hea kai hooko ia? Is 53;5-9, Hal 22;16. Na hoa i lono hea kai hooko ia? Io 3;14, Puk 17;6, I Kor 10;4, I Kor 5;4. No ke aha i kaulia ia ai Iesu? Heb 9;22, Rom 3, 25;26. Make Iesu i pani no kakou. Ua kau ka make maluna o kakou, no ka hewa. Lawe Iesu i ko kakou hewa a me ka make i ole kakou e make ke manaoio nae ia Ia.
P 34 11. Ko Iesu aloha a pule no na enemi, nawai i kau ia Iesu ma ke kea? Mat 27,27.
Heaha ka lakou hana i Kona aahu? he wanana kai hookoia, nana Hal 22;18.
Heaha ka Iesu pule no ka poe i kau ia Ia ma ke kea? Oia anei Kana pule no na kana a pau? Hooko ia anei Kana pule ke mihi ole lakou? Ua ike no kela poe i kekahi ano o ka lakou hana, aole nae i ike i ke ano nui. Pela no ka poe hewa. Ua ike no i ke ano, i ka hope o ka hewa, aole nae i ike loa, ole i ike i ke ano o ka make mau, aole nae e pakele ana i ka make mau ke mihi ole a manaoio ia Iesu.
P 35-37 III. Ka hoomaewaewa ana ia Iesu, owai ka poe hoomaewaewa ia Iesu, oiai Oia ma ke kea? Heaha ka lakou mau olelo, a me ka hana hoeha? aole anei i hiki ia Ia ke hoola ia la iho? No ke aha ka hoola ole? Ina hoola ia Ia iho, wehe ia la iho a iho aku a ola iwaena o lakou, manaoio anei lakou? Iaia i ala hou mai ai, manaoio anei ia poe hoomaewaewa?
Ina ua hoola Iesu ia Ia iho, aole ae e make ma ke kea. loaa anei ke Kalahala no kakou? Aole anei maanei kekahi poe hoomaewaewa a hana ino ia Iesu? Ina pela, u'oke koke. Aohe mea e ae e ole ai oukou.
P 38 IV. Iesu ke Lii, heaha ka palapala @ @ @ @ maluna o Iesu@ Ma na olelo ehia? No ke aha i kakau ia ai ma ia mau olelo ekolu? Nawai i kakau? Manaoio anei Pilato o Iesu ke Alii o na Iudaio?
Pela paha, a i ole, he oiaio no, Iesu ke Alii o na Iudaio, a o na kanaka a pau.
P 40-43 V. Manaoio kekahi poe ia Iesu kekahi powa. Hai mai i na pauku 40-43 me Io 19;25-27.
P 44-46 VI. Ka hopeka, heaha ma ka hora 6, oia hoi ke awakea, hora 12 ia kakou?
Pehea ka loihi o ka pouli ana? Heaha ka Iesu mau olelo hope? Hora 9 ko kakou hora ahiahi ekolu ia. Ma ia hora, make Iesu, pau Kana hana e kala ia ai na hala o ke ao.
Lua ole ke aloha o Iesu, ua haawi Oia i Kona ola i ola kakou. E haawi aku i ko kaoku ola Nona, a no hoi. E hooikaika mau e hoola i na hoa, a e hoolaha aku i ka nuhou maikai no ke ola ma o Iesu la.
Mele him 447. Hamau e, he leo aloha.
Pule i ola ma o Iesu la.
Haawina no Iune 12. Luk 24;13-32.
I keia la e hoea aku nei ko kakou pepa, a ia na haumana kula Sabati o Maui Komohana ke hoike la ia lakou iho maloko o ka luakini o Wainee ma Lahaina.
NA LETA A NA HAUMANA O HALEIWA. WAIALUA.
Kawaiahao, Honolulu, Aper 16, 1881.
Mea i aloha nui ia. Miss Mary E Green. Aloha nui oe:---
Ma ka Nupepa Kuokoa o ka la 15 o Ianuari 1881 nei, ua hoopomaikai ia mai au mamuli o ko'u ike ana i kou leo kahea walohia, e pili ana i na manu hulu like inu wai mapuna o Haleiwa, mai ka wa mai o Rev O H Kulika, a hiki mai i keia wa, nolaila, mamua ae e kuu pane ana i na haina o kau mau ninau, e haawi e aku ana au he leo kanaenae walohia no ua home la o'u, a makou me o'u mau hoa alo inea o ka inu wai o ka naauao me ka pono io a Kristo i noho ai, oia keia:
Ua lilo au i haumana no ke kula o Haleiwa i ka mahina o Sept 1867 a pau ka noho ana i ka mahina o Iune 1869.
O ke kulana a me ka hiona o ka home Haleiwa, aole i poina ia'u kona mau paia, na rumi moe, ka rumi paina a me kona mau lako, na rumi hana a me na mea hana, na rumi kula a me na pono kula, na kihapai o na ano mea kanu a pau, na kumu kukui a me na kumu wi &c.
O na leo aloha o na kumu, he mea poina ole ia ia'u e noho nei a hiki i keia wa. O na hiohiona, me na luana ana me o'u mau hoa uhai a holo o ka ike, he moolelo kaao pau ole ia na'u e kaao ai i na wa a pau loa. Nolaila, no ka nui o kuu hoomanao no ua home la o'u, i haku ai au i keia mau Iolani mele penei:
HOME ALOHA SONG.
1
"He aloha kuu home hoonui ike,
O ka uka io ano o Haleiwa,
Ka hoku hele ia o Hawaii.
Ilaila i luana ai me na hos.
Hau kolokio, o ke ahiahi.
Hui koni i ka hau kakahiaka.
Hui koni i ka iwihilo,
Lokuloku i ka manawa o makou.
2
Hu ae nei ko'u aloha,
I o'u hoa oia home hoonui ike.
I hoomanawanui ai na inea,
Na la ikiiki o ke kau.
U-uku, kahi ai,
Moe ole iho ai o ka po,
One wale iho no,
I o ia nei no makou.
3
He aloha i ka leo na makua,
I ke kaukau mai me ka waimaka,
E hoi oukou ma na home,
E malama i ka pono i ao ia.
He hoku hele, ke welo la,
Ua hiki aku la ma na aina pegana,
E welo ana, a welo mau,
Na pokii makamae o Haleiwa."
Ma keia wahi, ke huli hope nei au e pane aku i kau mau ninau, a me ka wehewehe pu ana i na haina, oia iho keia.
O Mary Kaaialii Koiku ko'u inoa ma ke kula o Haleiwa.
Ma ka mokupuni au o Mille paeaina o Makela ka hapa nui o ko'u noho ana, a i keia wa, eia ma kapa o ke kula kahunapule ma Honolulu, Oahu nei.
Ua hoopalau kane ia wau i ka la 14 o Marake 1869, Iune 15 oia makahiki no, mare ia wau me Simeona Kahelemauna e Rev O H Kulika ma ka luakini hoole pope o Waialua, Oahu.
Mai ka makahiki 1869 a hiki i keia wa, he misionari wahine au na ka Papa Hawaii i hoouna ia, a noho me Rev S Kahelemauna ma ka mokupuni o Mille no na makahiki he ehiku a oi, malaila, make o Rev S Kahelemauna, hoi mai i Hawaii nei i ka m h 1876, a mare hou me Mr S P K Nawaa kaikaina ponoi o Mr Kahelemauna, Iune 14 1877, holo hou no ka paeaina o Makala a noho hou no na Mille no eha makahiki. Mamuli o na palapala hoopii a na hoa misionari haole no ka'u kane i hoi hou mai nei, a ke kali nei i na manao o ka Papa Hawaii i na e kena hou e hele, e ku no au a hele.
Elua a'u mau keiki, he keikikane oia ka mea e ola nei nona na makahiki eiwa, a he kaikamahine ka lua, he eiwa mahina wale no o kona ola ana a make oia, me kuu kane mua no keia mau keiki, e olioli ana o Rev O H Kulika, ke ike mai, eia he moopuna kane ka@a me o'u nei.
He mau kane Hawaii oiaio no ka'u, no Kona Hema, Hawaii, ma Napoopoo laua.
Mamua ae o ko'u mare ana me ka'u kane mua, aole makemake o ko'u mama a me kana kane hou e holo au i na aina e me na manao naaupo maopopo kiekie. Aole nae au i hoolohe i ko laua mau leo aua, oiai, ua oi loa aku ko'u aloha i ka poe e noho ana iloko o ka pouli, mamua o lakou a pau, ia'u e noho ana malalo o ko'u makua mua, ua malama pu au i na hooponopono hale ana a pela pu me ka ohana.
Ua puka mai no hoi au mai ke kula o Haleiwa iloko o Iune 1869, a mai laila mai a hiki i keia wa, e noho pono ana me ke aloha paumako no ua home aloha. A oiai, he wa kupono keia ia'u e hoomanao pu ae ai ia'u mau kumu, nolaila, eia au la e Rev O H Kulika ke poo o na kumu o ke kula, kuu makua a me kuu kumu aloha.
Me na hoomanao walohia, ke hu ae nei kuu hoomanao no ka mama o makou, Mrs Kulika. Eia au la e Miss E Laiana, ke haawi aku nei au i kuu lima akau aloha nou, Aloha oe:---
Ke hoomanao pu ae nei au ia oe e Mis Haloke ka hope kumu a me kahi mau kaikuaana o'u i noho ma ia ano. Aloha kakou a pau loa.
Ke hooki nei au i kuu mau manao maanei, me ke aloha ia oe a me o'u mau pokii o Haleiwa.
MARY KAAIALII NAWAA.
Lahaina, Maui, Mei 1 1881
Miss Mary E Green. Aloha:---
Ua ike au i kau hoolaha ma ka Nupepa Kuokoa o Ianuari 22, e kahea ana i na haumana o Haleiwa, mai ka wa o O H Kulika a hiki i ka wa e noho makua nei no ia kula.
A no ia leo poloai, ua oluolu loa ia'u e pane aku i kau mau ninau.
Oiai, owau kekahi haumana oia kula i ka wa o O H Kulika.
A ua aloha nui au ia Haleiwa, ka home o kuu wa opio, aneane e piha na makahiki eha o ko'u noho ana ma ia kula. A i pane no kau mau ninau, ke panai aku nei au me ke kanalua ole.
1 Owai kou inoa?
O Batereba Kahe Moo ko'u inoa i ka wa i ke kula.
2 E noho ana oe mahea i keia w ?
Ma Lahaina Maui.
3 Heaha kau hana i keia wa?
He hooponopono hale a me na hana a pau i pili i ko'u hale iho, me ka malama ana i na keiki.
4 Ua mare anei oe?
Ae.
5 Ina ua mare oe, ehia au mau keiki, a pehea ka nui o na makahiki?
Ewalu, o ka mua. ua make no i kona hanau ana mai, he keikaik@e, o ka lua, 9 makahiki, he kaikamahine, ke kolu, ua make i ka 2 malama he kane, ka ha, 6 makahiki he wahine. ka lima ua make no na la pokole w. ke one. 4 makahiki k. ka hiko, ua make i ka ekolu malama w. ka walu. 4 ma@ina w, a ua make koke iho nei i Aper 27 o keia makahiki he iwa ka mai i make iho nei.
6 He kane haole paha, hapahaole paha, kane Hawaii paha kau?
He haole maoli.
6 E oluolu oe, e hoike mai ia'u i ka moolelo nou iho, mai kou wa i haalele ai i keia kula a hiki i keia wa.
Eia kahi Moolelo no'u iho.
Ua puka mai au mai ke kula mai i ka malama o Iune 17 1869, a hoi mai la no Lahaina nei, oia ko'u one hanau, a noho iho la malalo o na makua me ka maluhia. a hala he mau malama 3 paha, haalele iho la ia Lahaina no Lihue Kauai, ua noho wau malalo o ka malu o Rev J Waiamau, oiai hoi o ko'u mua oia kana wahine.
Ua noho wau malalo o laua me ka malu, a he lala kokua kumu kula Sabati no ia apana, i ka hala ana o na malaa a ehiku paha o ko'u noho ana malalo o laua, ua hoopalau ia iho la wau i ke kane i ka malama o Mei no na pule pokole, a ma ka malama ae o Iune 4 1870, ua hoohui ia iho la wau ma ka berita hemolele o ka mare, me W H Stephenson, na ka Rev J Waiamau maua i mare, a hoi aku la a noho ma Koloa, oia kahi noho o ka'u kane.
Ua noho malaila he mau makahiki, Sept 1872, haalele ia Koloa, no Lahaina, Ianuari 1814, haalele ia Lahaina, no Kauai. Nov 1876, haalele ia Kau i no Halaulau Plantaton, Kohala, Hawaii. malaila i noho loihi ai me ka hoomanawanui i na inea o keia noho ana, ma ke ano o keia lewa hele ana, he luna hana ka'u kane malalo o na ona mahiko.
E hooikaika ana me ka hoomanawanui i loaa ko maua ole me na keiki, Sepatemaba 1880, haalele aku la ia Kohala no Lahaina nei, mamuli o ka nawaliwali o ka'u kane, me ke kaumaha walohia a ehaeha hoi au e hai aku nei ia oe.
O kuu puuwai aloha, o kuu makua hoi W H Stephenson, ua hala i ke ala hoi ole mai, ua haalele mai ia'u me na keiki ekolu a maua, ua make oia i ka malama o Aperila 21 i hala iho nei, he luai a koko ka mai o ka make ana.
Ua hanau ia oia ma Livapulu, Enelani, i ka malama o Iulai la 4 1832, nolaila, ua aneane e piha na makahiki he 49, a kuu aku la kona luhi.
He makua lokomaikai, he heahea i na makamaka, a me na malihini kipa mai i ko maua wahi, he kane aloha wahine a aloha keiki hoi, ua hala kela me ka maua bebe ka hua hope loa o ko maua puhaka ma ka manawa hookahi.
A ua waiho iho i ka ukana luuluu a ke aloha na'u e auamo me ka paumako no laua. Auwe! Kuu luuluu.
"Na ke Akua i hana, a Nana no i lawe aku, E hoomaikai ia Kona Inoa." E welina oe a nui loa.
BATEREBA STEPHENSON.
KE KULA HANAI O HILO.
Ke Kanahakumamaha o na
Hoike Makahiki.
E ka Nupepa KUOKOA e; Aloha oe:
Ma na la 10 a me 11 o Mei i hala iho nei, ua hoike ke kula Hanai me ka maikai a me ka holomua, malalo o na lawelawe ana a na kumu kokua, ka Rev Edward P Baker a me Joseph Nawahi.
Ua manao ia, mamuli o ke kaawale ana aku o Rev W B Olson, a me kona waiho ana mai i kona kulana kumu nui no ke kula Hanai a me ka holo pu ana aku o kekahi kumu kokua i ukali aku iaia; ua ili iho he mau manao hookunana iluna o ka Papa Kahu no na kumu, hoomau aku i ke kula a me ke hopena no na la hoike mamua ae o ka wa e hoomaha ai ke kula. Aka, me he anuenue olinolino la i poha mai iloko o na ao poluluhi ua kilihune, pela ke Akua i hoouna mai ai i mau paahana kokua iloko o ka wa i manao ia, he nele, a me ka hemahema o ke kula. Ke hoomaikai nui nei ka Papa Kahu i ke Akua.
He maikai ke ola o na haumana a pau loa a ua hooikaika makaala hoi i ka lawelawe hana lima ma na kihapai i mea e kokua ai i ke ola o ka noho ana imi naauao, no ka mea, aole loa i kuhihewa ia, he naauao ka palaualelo.
Ua hoomaka ka hoomaha o ke kula ma ka la 12 o Mei, a e komo hou mai ana ma ka la 28 o Iulai ae nei.
Ua manao ia, ina e holopono na kauoha e hiki hou mai ana no he kahu hou mai Amerika mai e noho ai, a e hapai hou i na hana hooholo mua i ke kula Hanai.
E hoomau ia no ko Mr Joseph Nawahi noho kahu koikawa ana, oiai, ua ano ulolohi ka hiki ana mai o ke kahu hou, a e hoomaka ia na hana a pau loa no keia makahiki hou ae e hiki mai ana, me ka makemake e hooholo mua i ke kula ma ke ano maikai.
Ua makemake ia na makua mea keiki e hoihoi pono mai i na keiki ma ka la i hoike ia maluna ae, a ina he mau keiki e komo hou mai ana, oia la hookahi no ka manawa e komo mai ai. Na ka Papa Kahu o ke Kula. per. J NAWAHI.
KA ALOPEKA ME NA HUIHUI
WAINA.
He olelo Nane.
I kekahi la maikai o ke kau, kokolo ae la kekahi wahi alopeka iloko o kekahi mala waina pala, noho iho la oia malalo o kekahi kumu waina i hele a luluu i na huihui waina, me ke kuka nui no na huihui waina me kona ninau iho. pehea la e loaa ai ia'u kela mau huihui waina, a mahepe, ua hoao aku ia ua wahi alopeka nei e lele e hopu i kekahi lala me kona manao, i na loaa ana ia lala, alaila, e ai waina ana oia.
Aka, no ke kiekie loa aole i loaa iaia no kekahi manawa loihi kona hoao ana, aole nae he loaa iki.
A no ka loaa ole, huli ae la ua wahi alopeka nei a hele aku la me ka olelo iho iaia, "heaha no la hoi kau mea i hooluhi ai ia'u no kela mau huihui waina, no ka mea, he awaawa ka waina."
Pela no na keiki hele kula i ko lakou wa e hoao ai no kekahi makana a loaa ole alaila e olelo iho no lakou, aole no he waiwai ke loaa ia makana.
LOLE MAKEPONO
Ke Kuike.
E LOAA NO IA MA KAHI O
KAKELA ME KUKE!
E LAA NA
Ahinahina, Kalakoa,
Keokeo, Leponalo,
Pena, Aila, Aniani,
NA MEA PIULA!
KOPA, AILA HONUA,
AILA HOOMALOO
Kui Kakia, Pakeke,
Tabu, Kaula, Noho Lio,
Hulu Palaki, na Pulumi.
A HE
AGENA NO HOI NO NA MOKUPUNI O HAWAII NEI NO NA
Lainakini-nao,
Lainakini Maoli,
Palule Kalakoa,
Alapia, Kelepa, Kilika,
Na lole kupono i ka wawae,
Palule Huluhulu,
Na Lole Huluhulu,
Na Lole no ka hoohehelo ana
Lipini, Lihilihi, &c.
LIPINE, LIHILIHI, &c.
A ME NA
Mikini Humuhumu MakeponoLoa!
A HE
MAU MEA AI KAUI
Ka Palaoa, Kopaa,
Raiki, Pia, Hoohu,
Paakai, Huaala,
Pia Kulina, &c
A he Laau Lapaau Kaulana Loa
A DR. JAYNES.
Laau Kunu,
Laau Hoomaemae Koko,
Laau Ho opau Naio,
Penikila, Huaale.
A ME NA LAAU HAMO, A PELA 'KU
840 tf
PAPA, PAPA
AIA MA KAHI O
LEWERS & COOKE!
(O LUI MA.)
MA KE KAHUA KAHIKO MA
Alanui Papu a me Moi
E LOAA AI NA
Papa Nouaiki
o kela a me keia ano.
Na Papa Nani a Paa no ke Kukulu
ana i na Hale!
Na Pani Puka, Na Puka Aniani,
Na Olepelepe, Na Pou, Na O-a,
Na Papa Hele, Na Papa Ku,
A me na Papa Moe nui loa
NA PILI O KA HALE
O NA ANO A PAU.
Na Pepa Hoonani, Na Pena o na Wai a pau,
Na Kui mai ke Nui a ka Makalii,
Na Ami Puka, Na Ami Puka Aniani
Na Ami o na ano a pau,
Na Aila Pena, o kela me keia ano
Na Aila Hoomaloo, he lehulehu wale,
Na Aila e ae o na ano a pau.
NA WAI VANIKI
A ME NA
WAI HOOHINUHINU NANI!
o na ano a pau loa.
NA BALAKI ANO NUI WALE
A ke hai ia aku nei ka lono i na makamaka pau, ua makaukau keia mau makamaka o oukou e hoolawa aku ma na mea a pau e pili ana ma ka laua oihana
NO KA
UKU HAAHAA LOA!
E like me ka mea e holo ana mawaena o
LAUA a me ka MEA KUAI.
E hele mai! E na Makamaka!
A e lawe no hoi ko oukou makemake
me ka oluolu a me ka maikai!
845tf
AINA KUAI MA KOHALA AKAU.
OIAI ua oluolu i ka mea nona ka inoa ma o@ @ e @ i keia mau mokupuni, nolaila e waiho aku @ @ @ ke kuai i kona aina ma na apana, e kulike ana i ka @ make o ka poe kuai. O kuu aina holook@ a pau ma Kohala Akau, @ @ hoi
Na Aina Kanu Ko a me na Aina Kulu.
Na Hale Hana,
Na Hale Noho a me ka napo.
Na Lio a me na Bipi.
Ke ko e ulu nei a me
Na Kaa Lio ukana.
Na Mea Paahana Amara.
Na Waiwai Halekuai a me
Na Lako Hale & Co
Ina aole e lilo keia mau mea a hiki i ka la 1 o Iune @ @ alaila, e waiho ia aku keia mau waiwai maluna ae ma ke @ dala akea. No ke kumukuai o kela mau waiwai e @
S STAINES.
1008 2m ma Kohala, Hawaii.
CHRISTIAN CERTZ
Mea Hana Buti
ME
NA KAMAA MAOLI!
Alanui Papa, makai o ke Keena o Lui & Diek@a
KE HAI AKU NEI OIA I NA MEA A PAU.
Ua hoi mai oia mai Kapalakiko mai,
Ilaila Oia i ohi kino mai nei i na @ nani a paa o kana oihana, a ke waiho ia aku nei no ke kuai ana no na kumukuai o ka manawa
HE MAU WAIWAI PIHA O NA BUTI
Na KAMAA HAAHAA a me na ano kamaa no na Lede. Na Buti, na Kamaa Haahaa a me na ano kamaa e ae a pau no na Keonimana.
NA BUTI & KAMAA HAAHA!
A ME NA ANO KAMAA E AE A PAU
NO NA KAMALII!
NA KAMAA O NA ANO HE NUI
O NA KAMAIKI OPIOPIO.
O neia mau mea a pau ua hanaia me ke akamai loa a me ka paa o na ano hou loa, a ke hoola ia aku nei ia mau mea e like me ka mea i olelo ia!
E lawe ia no na kauoha mai na Mokupuni me ka @ au me ka eleu. 942 3m
NU HOU! NU HOU!
MA HOPE AKU O KA 1 O IANUARI, 1880, E HOOmaka ana makou malalo o na rula
DALA KUIKE,
I ka Loaa ana aku o ka Waiwai @ ka Mea Kuai.
E hookahua ana makou i ka makou oihana malalo o ke DALA KUIKE, e kuai ia aku ana na lako waiwai a pau no ke Kumukuai malalo iho o ka
MEA I IKE IA MAMUA
E LIKE ME KA LILO.
He Huina nui ko makou o na Oo, Kopala Ho, &c., &c. i kuai ia mamua ae o ka hoopii ia ana o ka auhau o ka poe nana i hana.
HE MAU LAKO NUI KO MAKOU
O NA
PALAU
A makou e kuai aku ai no ka $7 a hiki ka $7.50 Malalo iho o ke Kumukuai mua no kela a me keia PALAU.
Ano ko oukou manawa kupono e loaa a@ na waiwai makepono loa.
E hele mai Hookahi, E hele mai a pau loa.
DILINAHAMA MA.
942 tf 73 Alanui Papu.
PAPA! PAPA!
NO
ALLEN & ROBINSON
UA WEHE AE NEI MAUA I
PA KUAI PAPA
MA
KA UWAPO O PAKAKA
Na Papa Ulaula o na ano a pau.
Na Papa Paina o na ano a pau.
Na Pili Hale Ulaula.
Na Pili Hale Keokeo.
Na Pepa Hoonani Hale,
Na Pepa Molina.
Na Pena a me na Aila Pena!
NA KUI O NA ANO A PAU.
NA PANI PUKA a me
NA PANI PUKA ANIANI.
NA PANI PUKA a me
NA OLEPELEPE.
NA LAKO KUKULU HALE
O NA ANO A PAU!
E KUAIIA MA KE
KE KUMUKUAI HAAHAA LOA
O keia Makeke.
ALLEN & ROBINSON
Honolulu @ @ 2, 1878 @ @