Ka Nupepa Kuokoa, Volume XX, Number 6, 5 February 1881 — NA HUNAHUNA MEA HOU O HILO. [ARTICLE]

NA HUNAHUNA MEA HOU O HILO.

Ke ike mau ia aku nei ka wahine o ka lua, i ka po a me ke ao, ma kona wahi mau, ma ka hoomaopopo aku ke nee mai nei oia i ke kaona o Hilo nei ma ka laina pololei, a he ku i ka weliweli ke ike aku, ke pahola pu mai net hoi me kona uahi, ke olelo nei kekahi poe, e hooko ia ana ka wanana a ka luahine, a ke olelo nei hoi ka poe haipule, aole i hiki mai ka manawa, ke manao nei au he oiaio ia, oiai ina e hiki ka pele i kai nei o Hilo, alaila, o Hilo nei no ke pau, koe aku na wahi e ae. Makani Nui. Ma ka la 27 o Ianuali nei, ua pa mai la kekahi makani nui ikaika, e lauwili ana i na laau, a e hoonaueue ana hoi i na hale, a e hoale ana hoi i ke kai lana malie o ke kai kuono o Hilo nei, a e kuehu ana hoi i ka lepo o na alanui, a hui hoi me ka uahi o Pele he mea e ka hakumakuma o na ao o ka lewa i ka nana aku. Mau moku Kuna i puhi ia mai. Ma keia mau la no hoi a ka makani e auhele ana ia Hilo nei, ua puhi ia mai la he mau moku kuna Hawaii, a ke ko nei laua i Hilo nei, ua hooikaika na kapena a me na sela e holo i ko lakou mau awa ku, aole e hiki. Ua maalahi no nae, aohe mau mea i poino. Me ke aloha. ED PIHI HOAAI Puueo, Hilo Hawaii, Jan 27, 1881