Ka Nupepa Kuokoa, Volume XX, Number 4, 22 Ianuali 1881 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

 

KA NUPEPA

Kuokoa me ke Au Okoa

I HUILA.

No ka Makahiki $2. Eono Mahina, $1.

Dala Kuike ka Rula.

KOMITE HOOPONOPONO.

Hezekia Aea.

POAONO IANUARI 22 1881.

 

THE SOUL'S SWEET HOME.

Joy & Gladness.

1

Ae, he oli ma o, ma ka home iai,

Kahi komo a maha na luhi nei,

Kona lama he nani alohi mai,

A iini no au la e ike ae.

 

Cho    Home oli nei.  Home makamae,

Ma na puka gula e komo ai.

Home lama a nani ke ike ae;

Oli  wale no au la ke loaa mai.

2

Ma ia awa ku lulu na moku nei,

Haia e ne na ino, ua malu e,

Ole hoopaapaa hou me na ale kai,

Pau.  ua pau na makani nou inomai.

 

Cho   Home oli nei, & c

3

Aina lai kamahao, pua nani mau,

Me na puu uli e a kauhale ao.

Ku a hooholo ae la a paa ola'e

Ma ke awa maika e maha mau ai.

 

Cho    Home oli nei, & c

 

HAWAII.

 

HOOLAHA I NA HAUMANA MUA

O KE KULA HANAI O WAIALUA, OAHU.

No Haleiwa.

     O Haleiwa ka inoa kaulana o keia Kula hanai o Waialua nei, kahi hoi e hoonaauao ia ai na kaikamahine, o O H Gulick ke kumu mua i noho mai ai ianei, mahope mai o kona haalele ana ia Waiohinu, Kau, ua kukulu hou iho la ia i keia kula, iloko o kona wa e noho alakai ana i ke kula, a ua kapa ia iho la keia kula o Haleiwa.

     A eia ka leo e kahea ana ia oukou, e na heumana o ke kula o Haleiwa, mai ka wa o Gulika a hiki i keia wa ina aole i poina ko oukou aloha no Haleiwa, ke noi aku nei au ia oukou e hoouna pakai mai oukou ia'u, he mau pane no keia mau ninau a'u e ninau nei ia oukou, no ka mea, he nui kuu aloha ia oukou, a ke makemake nei au ia oukou e hai pakahi mai ia'u ma ke ano o ka leta no keia mau pane.

     1  Owai kou inoa?

     2  E noho ana oe mahea i keia wa?

     3  Heaha kau hana i keia wa?

     4  Ua mare anei oe?

     5  I na ua mare oe, ehia au mau keiki?  A pehea ka nui o ko lakou mau makahiki?

     6  He kane haole paha, hapa haole paha, kane Hawaii paha kau?

     7  E oluolu ia oe e hoike mai ia'u i ka moolelo nou iho, mai kou wa i haalele ai i ke kula, a hiki i keia wa.

     A ina ua make kekahi o keia poe a'u e kahe nei, e oluolu mai oukou na kane paha, na makua paha e pane mai ia'u no lakou.

                                                                                                                                    MARY E GREEN.

Waialua, Ian 15, 1881.

 

Haawina Kula Sabati.

HELU 6.  SABATI FEB. 6, 1881.

KUMUHANA

Ka wa opiopio o Iesu.  Pauku Baibala.

Luka 2;40 - 52.

     40  A nui ae la ua keiki la, a ikaika ae la Kona manao, a piha i ka naauao, a maluna Ona ke aloha o ke Akua.

     41  Hele na makua Ona i Ierusalema i kela makahiki i keia makahiki i ka ahaaina moliaola.

     42  A i ka umikumamalua o Kona mau makahiki pii ae la lakou i Ierusalema mamuli o ka oihana o ka ahaaina.

     43  A pau ia mau la, hoi ae la laua, noho hoi la ke Keiki o Iesu, ma Ierusalema, aole hoi i ike o Iosepa a me Kona makuahine.

     44  Manao no laua, aia no la maloko o ka huakai.  hele no laua i ko kekahi la hele ana a imi iho la laua ia la mawaena o na hoahanau a me na hoalauna.

     45  Aole Oia i loaa ia laua, hoi hou ae la laua i Ierusalema, e imi ana ia la.

     46  Eia kekahi, a hala na la ekolu, ike aku laua ia la iloko o ka luakini e noho ana mawaena o ka poe kumu.  e hoolohe ana ia lakou, a e ninau ana hoi ia lakou.

     47  A o ka poe a pau i lohe ia la, mahalo iho la i Kona naauao a me Kana olelo ana.

     48  A ike laua ia la, pihoihoi iho la; a i aku la kona makuahine ia la, E ka'u Keiki, no ke aha la Oe i hana ai pela ia maua?  Ea ua imi ae nei maua me Kou makuakane ia Oe, me ke kaumaha.

     49  I mai la Kela ia laua.  No ke aha la olua i imi mai nei ia'u?  Aole anei olua i manao he pono No'u e lilo ma ka Ko'u Makua?

     50  Aole laua i ike i ke ano o Kana mea i olelo mai ai ia laua.

     51  A iho ae la la me laua a hiki i Nazareta, a noho la malalo iho o laua:  a malama iho la Kona makuahine ia mau mea a pau ma kona naau.

     52  A nui ae la ka naauao, a me ke kino o Iesu, a me ke aloha ia e ku Akua a me na kanaka.

     Pauku Gula.  P 40, hoopaa me na p 48 - 52.

     Manao nui.  He kumu hoohalike Iesu na na keiki a pau.

     Na heluhelu la.  1 Luka 2; 40 - 52.  2 Mat 2; 1 - 23.  3 Sol 3; 1 - 19.  4 Mat 18; 1 - 14.  5 1 Sam 3; 1 - 21.  6 Puk 12; 1 - 17.  7 Sol 4; 1 - 27.

     Mele.  Kena Iesu.  Lei Alii, 17.

     Pule i hoolohe na haumana i ko Iesu leo kena e hele e hana Nona.

Ka wehewehe me ka Ninau ana.

     Ka manawa.  Aperila 8 A D 12, 12 makahiki mahope iho o ka helu 5.

     Kahi i hana ia ai.  Ka luakini ma Ierusalema, a o Nazareta, he kulanakauhale liilii.  Nazareta ma ka aoao o kekahi awawa i hoopuni ia ai o na puu, 25 mile ma ke komohana o loredane, mai Garilaia mai, 65 mile ma ka akau aku o Ierusalema.

     Na luna.  Augurato ka Moi.  Koponio ke kiaaina o Iudea.  Herode Anetipasa ke keiki a Herode ka nui, ke kiaaina o Garilaia me Parea.

     Ma ka helu 5.  Ua lawe ia Iesu i ka luakini e hoolaa ia na Iehova, 40 la ka loihi o Kona ola kino ana.  Pau ia hoi na makua me ke keiki i Betelehema.  Mahope iho, puka na magoi me na makana mai ka hikina mai.

     Makana a hoomana lakou i ke Keiki Alii.  Imi Herode e pepehi i ke Keiki.  Pakela ke Keiki i ka make ma ka lawe malu ana o na makua ia la i Aigupita.  Noho ilaila he mau malama, a makahiki paha.  A lohe ia ua make Herode, hoi lakou i Nazareta kahi noho a loaa na makahiki he 30.

     P 40.  Ma ko Iesu ano kanaka he Keiki liilii Oi, a ai waiu.  Ua ulu mahuahua Kona kino, e like me na keiki e ae.  Ua ao ia Oia e na makua, a ma na kula paha, ika ika Kona manao.  Ikaika ka imi ana i ka naauao.  A loaa no a piha.  He punahele Oia na ke Akua.  Ehia keia mau mea e pili ana ia Iesu?

     P 41.  Ihea i hele ai na makua me ke Keiki i kela a me keia makahiki?  No ke aha?  Heaha ka ahaaina moliaola?  Pehea ka loihi?  Owai kai hele?  Puk 12; 14,, 15, 17.  Puk 23; 14.  Kan 16; 1 - 8.

     P 42.  A loaa na makahiki he 12 ia Iesu ua lawe ia oia e na makua ihea?  No ke aha?  Ua hele pu paha ke Keiki mamuli o Kona manao, Kona makemake.  Mai Kona wa uuku ka lawe pi ana o na makua i ke Keiki i ka luakini ma Ierusalema.  Ua maa ke Keiki ma ia hele ana.  Paa Kona manao e hele pu mau.

     P 43.  Pau na la ahaaina moliaola 7, hoomaka na makua e hoi aku i Nazareta.  Pehea nae ke Keiki?  Ua ike anei na makua i Kona noho ana?

     P 44.  Heaha ke kuhi ana o na makua no ke Keiki?  Pehea ka loihi o ka manawa, akaka ko laua kuhihewa?  A imi laua ia Ia mahea?

     P 45.  Loaa anei Iesu ma ka la mua?  I ka loaa ole ana pehea na makua?  Imi hou ea.  Aloha wale?

     P 46.  Ehia la ka imi ana o na makua i ke Keiki?  Aiki anei ke Keiki ma ka hooluhi ana i na makua?  Like anei Iesu me na keiki Hawaii, haalele wale i na makua, hele lalau?  Pee aku?

     Loaa ke Keiki mahea?  E aha ana?  E kalohe ana anei?  E paani ana anei?  Aole, e hoohalike ana oia me wai?  Maikai ea?

     47 Pehea ka poe i lohe i ka Iesu mau olelo, mau ninau, mau haina?  Mahalo ea.  Akahi no paha a ike ia keia naauao e like me keia.  He mau ninau ono nui paha Kona, aole like me kekahi mau ninau ano waiwai ole i hoopuka ia i kekahi manawa ma na kula Sabati Hawaii. 

     P 48.  A loaa ke Keiki, pehea na makua?  A ninau ka makuahine pehea?  A olelo pehea?  Me he la, ua kolohe ke Keiki, ua lalau, a pono ke ao ia.

     P 49.  A pane ke Keiki pehea?  He olelo aha ia?  He olelo ana hoahewa i na makua no ko laua ike ole ana i ke ano, i ka hana a ke Keiki i hele mai nei e hana.

     Ua lohe no laua na ka anela mai, a na na kaula mai i Kana oihana.  poina nae.

     P 50.  Pehea laua na makua?  No ke aha ko laua ike ole?  Ua hewa ole anei Maria?  Ua piha anei i ka hemolele?  Hemolele anei oukou ke hoomaopopo ole i na mea a oukou i lohe pinepine ai?

     P 51.  Hoi aku lakou ekolu ihea?  Hoao ke Keiki e hana i Kana oihana, aole nae i hiki no ka hoomaopopo ole ana o na makua.  Nolaila, hoi Oia a noho pu malalo iho o laua, a kokua ke Keiki i ka makua ma ka oihana kamana, a hiki i Kona makahiki he 30.

     P 52.  Ma keia pauku, ua pau ka moole lo io o Iesu mai Kona wa opio a hiki i Kona wa kanaka makua, oia hoi ka mak 30.  Ua like Kona kino me ko ka poe opio e ae.  Ua ulu ae a kiekie kupono.  Mahuahua Kona naauao.  Ua aloha ia e wai?  Nui paha Kana mau hana maikai, olelo maikai a naauao.  Haohao a noonoo ka makuahine, He Keiki aha auanei Oia nei?

     Mele.  Iesu wale no.  lei Alii, 19.

Na ninau a na Kahu.

     Na kane.  Heaha ke kumuhana?  Heaha ka hana Iesu i Kona wa opio?  Heaha ke kumu o ko na kumu mahalo ana ia la?

     Heaha ke kumu o Kona hoi pu ole ana me na makua?

     Na wahine.  Ua pono anei ka Maria mau olelo ao i kana Keiki?  Ua like anei oukou me Maria ma ka imi koke ana i na keiki ke auwana lakou?

     Lawe pu anei oukou i ka oukou mau keiki i na halawai Sabati, kula Sabati, na ahaaina a ka Haku?

     Na ui me na keiki.  Ma ke aha oukou e hoohalike ai me ke Keiki Iesu?

     E hèle pu ea me na makua i na halawai, i na ahaaina a ka Haku.  E ikaika ko oukou manao.  E hoomahuahua i ka naauao.  E hoolohe i ko na makua.  E hana i na hana kupono i ka mahalo ia, i ke aloha ia e na kanaka, a e ke Akua.

     Ke kula a pau.  Heaha na manao pili?

     1 E hoohalike me Iesu i loaa ka hemolele?

     2 Pono ke hele na keiki i na halawai Sabati.

     3 E malama pono na makua i na keiki ke hele pu i na halawai.

     4 E hui na keiki me ka poe naauao, aole me ka poe naaupo.

     5 E hana i na hana a ke Akua i kau mai ai maluna o kakou.

     E hana i na hana kupono i ka mahalo ia i ke aloha ia e ke Akua, a e kanaka.

     Mele.  Eu na wawae iki.  Lei Alii, 33.  Pule i eu a hoohalike me Iesu.  Haawina no Feb 13.  Luk 3; 7 - 18.

 

MOOLELO O KA AHAHUI EUANELIO O HAWAII HIKINA.

     Halawai ka Ahahui Euanelio o Hawaii Hikina ma ka luakini o Haili, Hilo, i Dek 30, hora 10 am.

     Koho ia o Rev J H Pahio i lunahoomalu, J S Kalana i kakauolelo.

Na Lala.

                                    Kihapai                                                            Kahu                                                               Elele.

                                    Haili, Hilo,                                                      Rev T Coan                                                     Honuakau,

                                    Onomea "                                                        " J H Pahio                                                      Kekaula

                                    Laupahoehoe,

                                    Hakalaua,                                                        haiolelo D Kalauhala                                       Puaa,

                                    Puula, Puna                                                     Rev J N Kamoku                                            Manoanoa,

                                    Kalapana

                                    Opihikao                                                                                                                                 Kealo.

     Na lala mau. Rev E O Polepe, kakau leta, Rev D B Lyman, J S Kalana, Kaawa, Paakaula.

     Komite imi kumuhana.  T Coana, Rev D B Lyman, Paakaula

     Hapalua hora haipule, hoike kihapai, na palapala hoopii, komite imi haawina, heluhelu haawina, no ka oihana kuloko, no ka oihana kuwaho, kahi a me ka manawa e noho hou ai keia aha. 

     Apono ia ka hoike a ke komite, koho ia o Kipi, Kapahee, Puaa, P Hoaai, Kaelemakule i mau hoa kuka.

     La hana 2, Ianuari 3, na palapala hoopii.  Waiho mai he palapala kahea kahu no Laupahoehoe me Hakalau ia D Kalauhala Pa.

     Ma ka noonoo ana e hoi hoi ia ka palapala a ka lunahoomalu me ke kakauolelo na lala.

     He palapala hoopii na E Kekoa, no ka makua kahu o ka ekalesia o Haili e hoopau i kona noho kahu ana.

     Heluhelu mai o D Kalauhala i kona hoike kihapai no ka ekalesia o Laupahoehoe me Hakalau.Ua nee aku na hana a ka Haku imua ma na kokua a me na hana pono, ua paa ka hale o ke kahu.

     Heluhelu mai o J H Pahio i kona hoike kihapai o Onomea.  Ua mau na hana a ka Haku.

     Heluhelu mai o Rev T Coana i kona hoike kihapai no Haili, ua nee mau no na hana oia ekalesia ma ka hapanui o na apana, ma na kokua me ke kuikahi o na hoahanau.

     Heluhelu mai o Rev J N Kamoku i kona hoike kihapai o Puula, Puna.  Ua nee ka hana a ka Haku imua ma kau wahi.  Hoopanee ia ka halawai a noho hou ma ka hora 1; 1 - pm.

     Heluhelu mai o Paakaula i ka hoike kihapai o Opihikao me Kalapana, ke hooikaika ala no na luna a me na hoahanau ma na hana a ka Haku, he iini nui ko lakou e loaa ko lakou kahu, au paa ka hale.

     Na Rev E O Polepe e palapala aku ia Ref J Kauhane no ka hiki ole mai i ka manawa e noho ai keia aha.

     Koho ia ke komite imi haawina D Kalauhala Pa, J N Kamoku na lala.  Heluhelu mai o Rev D B Lymana i kona haawina Mat 18; 1 - 6.

     Heluhelu mai o Rev T Coana i kona haawina, kekahuna 9; 18.

     Hoopanee ka halawai apopo hora 9 am.

     La hana 3, Ianuari 3, wehe ia ka halawai me ka pule

     Heluhelu mai o Paakaula i kona haawina Iakoba 4; 11.

Ka Oihana Kuloko.

     Waiho mai o Rev E O Polepe i kekahi mau kahua e pono ai o na kula Sabati malalo o keia aha.

     Hooholo ia.  E kukulu ia ka ahahui kula Sabati o na ekalesia o ka aha ekalasia o Hawaii Hikina.  O na lala o keia aha kula Sabati, oia na kahu ekalesia, na elele o ka aha, a o na kahu kula Sabati a me na elele pakahi o na kula Sabati maloko o na palena o ka aha ekalesia o Hawaii Hiina.  E halawai ka aha kula Sabati ma kahi, a i ka manawa e halawai ai ka aha ekalesia o Hawaii Hikina.

     E lilo na kahu kula Sabati a me na elele i mau hoa kuka no ka aha ekalesia.

     E hiki no i keia aha kula Sabati ke hana i na rula hooponopono nona iho, ke kue ole i na rula o ka aha ekalesia o Hawaii Hikina.

     Hooholo ka aha ia Mr Honuakau i haumana no ke kula kahunapule ma Honolulu. 

     Hooholo ka aha ia J P Hanaaumoe W M Kalaiwaa i mau keiki na ka aha.

     Hoopanee ka aha a halawai hou ma ka hora 1 pm, halawai ka aha ma ka manawa i hoopanee ia.

     Hapai ia ke koena o kaoihana kuloko.  Kulakaikamahine o Kohala, hooholo ia, e noonoo ia na mea e pili ana no ia kula, ke pane ia mai ma na kumu kupono e hiki ai ke nana aku i mea e pono ai ia kula hanai.  Hoolaa ekalesia.

     Hoike mai ke komite imi haawina i na haawina.  

    "E hoopai like mai anti ka Haku i na kanaka hewa a pau, D K P.

     Pono anei i na hoahanau ke koho i ke kanaka hoopunhipuni i lunamakaainana, J H Pahio.

     Pono anei i elua kahu o ka ekalesia hookahi, J S Kalana.

     Heaha ka hoino i ka Uhane Hemolele, D B Lyman.

     Ma ke ano hea e lilo o Kristo i Panihakahaka, J N Kamoku.

     E hoi hou mai anei na Iudaio i ka aina o Kanaana, T Coana.

     Pehea e maopopo ai au kahea mai ka Haku i kekahi mea i kauwa Nana, W M Kalaiwaa.

     O ka ekalesia Pope, he lala anei ia no ka ekalesia o Kristo, J P Hanaaumoe.

     Apono ia ka hoike a ke komite, hoopanee ka halawai a halawai hou ma ka Poalua elua o Aperila, 1881, hora 10.

                                                                                                            J S KALANA, Kakauolelo.

 

E NA KEIKI E HOOLOHE I KO OUKOU MAU MAKUA.

 

     Hele aku la wau maloko o kekahi hale paahao, e ike i kekahi kanaka opio i ahewa ia a make ma ka amana no ka pepehi kanaka, i kuu wa i komo aku ai ma ka puka o ka hale paahao.  Lawe ae la ka luna o ka hale paahao he huihui ki, a alakai aku la ia'u maloko o kekahi rumi pouliuli i ka wa i wehe ia ai ka puka o ua rumi nei a komo aku la wau.  ike aku la wau he kanaka opio e noho ana maluna o kekahi puu opala me ka paa o na lima i ka hao, he kanaka helehelena maikai me he mea ala he iwakalua kona mau makahi.

     Hele aku la wau a noko iho la ma ka aoao o ua kanaka opio nei, me ka haawi aku i na olelo hoolana ia ia, nana mai la oia ia'u a helelei iho la kona mau waimaka, a pane mai oia ia'ui me ka leo mokumokuahua.

     O, wahi ana, i na wau i hoolohe i ko'u mau makua a me kuu kumu kula Sabati, i na aole au e hiki ma keia wahi aole hoi e paa ko'u mau lima i ka hao, a aole hoi e kau mai keia make weliweli maluna o'u ka make maluna o ka amana.

     O, aole no na'u i pepehi kuu makamaka aka, na ka waiona, ina aole wau i hopu i ke kiaha ina aole wau i puni i ka hoowalewale ia mai, o, i na aole wau e hana i keia karaima.

     Ia'u i makaukau e hoi, pane mai la au kanaka opio nei.  E pule oe no'u, a kukuli iho la wau a noi aku la.

     "I ka Haku aloha, e kokua i keia kanaka opio poino, a wahi ana, e hahai aku Oe i na keiki a pau, e hoolohe i ko lakou mau makua, a e malama i na olelo a ko lakou mau kumu kula Sabati e hookaawale ia lakou mai na hoa ino mai, a mai hoopa i ke kiaha waiona."

     E na makamaka opio - e nana mai kakou i keia kanaka, mamua he keiki hoolohe, he keiki aloha na kona mau makua, aka, i kona wa i hui pu ai me na keiki ino hoowalewale ia oia, a ua puni oia a ua hopu i ke kiaha waiona.  A o ka hopena, e pani ana oia i kona ola no ke ola ana i pepehi ai, e hoomanao i keia kanaka.  He iwakalua wale no kona mau makahiki e make ana nae oia.                                                                            BAND OF HOPE REVIEW.

 

HE NANE - HOONANEA.

 

     He wahi manu ka'u, e lele nei ma ka aina, he no io-a-e ale no ke kai loa, he hoa kaunu no ka poe naauao, a he kauwa hooluhi no Mareka, e hooluhi mau ia ana i ka ua me ka makani, e kuoi ai i ka loa me ka laula keia wahi manu, au poai puni ia e kuu manu keia honua poepoe, ua ana ia no kuu manu e ka poe naauao, a ua ike ia kona loa me kona laulu, a me kona nui, a au kau ia he hoailona alii maluna ona, ma kahi e hele ai o kona kahu; kona wahi e kipa ai, aka, he wahi manu kupanaha keia, no ka mea, aole e loaa ke kii wale, aia me ke kuai e loaa ai i na mea a pau, o kona inoa, ua hooipo ia iloko o na makahiki eha.

     Ina e mahele ia na makahiki eha, e loaa ka huina houluulu o nahua helu Alabia i ka eha, e like me keia 1 2 3 4 , a o ka huina no ia o na hua palapala, i na e hoolilo ia ae e like me keia 4, 1, aia kuu manu i ka olelo haole, ina e unuhi ia mai loko ae o ka olelo haole a i ka olelo Hawaii, na ke Akua i hana kuu manu, a e mahalo ia auanei e na mea a pau, 3, 2, aia kuu manu i ka waha o kanaka, a ua hoowahawaha ia e lakou i na e loli iki aku kuu manu i ka namu a ka haole e lilo kuu manu i mea mahalo ia.  Eia ka ninau owai ka inoa o kuu manu.

     Me ka lana o kuu puuwai he mea ole ina liona o ke kukulu hikina.  Hooipo iho hoi na hoku hele o ke komohana, puehu ka hulu ia io.

     Aloha oukou e ka poe huli nane.  Me ka lunahooponopono ko'u aloha waianuhea, a i na keiki ulele hua kopau ke aloha lulu lima.  Owau no me ka anoi.

                                                                                                                      J L H Kaua Lanipolua.

                                                                                                            Puehuehu, Kohala Akau, Hawaii.

                                                                                                            Haina o keia Nane, oia keia Leta.

 

     Ke eli ia nei kekahi auwai ma ka puu o Puoina a hala i kahawai ma Pauoa, no ka hoomakaukau ana no ka wa e ua ai; i ole e hoopoino mai i ke kulanakauhale nei.

     Ma ka Poakahi la 3 o Ianuari, ua hookui ia mai la he elemakule e noho nei ma ka pa o Keoni Kamaki o Waimanalo, e kekahi lio i holo puiwa mai ai ma ke alanui Ema.

     O na hanau, make a me na mare o Kona Hema n na Hapaha eha o ka makahiki 1880 penei:  Mai Ianuari a Maraki,  18 hanau, 22 make; mai Aperila a June, 16 hanau, 5 make, 1 mare; mai Iulai a Sept., 16 hanau, 14 make, 6 mare; mai Oct. a Dek., 15 hanau, 12 make, 1 mare - Huina, hanau, 65; make 53, mare 8; mailoko mai o na hanau, he 5 keiki kane.      

                                                                                                            D. K. N.

 

ASA KAULIA,

Loio a Kokua ma ke Kanawai.

     UA makaukau au e lawelawe i na kana a pau ma keia Oihana @ o na Aha a pau o ka mokupuni o Oahu.  E loaa no au ma Koolaupoko, Heeia, a ma Honolulu i kekahi ua Hooko ia na kaaoha mai na wahi a pau o ka mokupuni me ka @ a me ka hikiwawe.

JAMES M. MONSARRAT.

{MAUNAKEA.}

He Loio a he Kokua ma ke Kanawai.

            - A ME -

     KA LUNA HOOIAIO PALAPAA.

     IMUA O NA AHA HOOKOLOKOLO A PAU o keia Aupuni.  E lawelawe ana no hoi ma na hana pili i ka hooponopono waiwai, me ka imi ana i na palapala Sila Aina, ka hana ana i na Palapala Kuai, Hoolimalima a me ka hoaie dala ana.

     Keena hana helu 9 alanui Kaahumanu.

Jan. 3, 1880.       944 lv

 

PAPA KUHIKUHI MANAWA HOLO

- O KA -

MOKUMAHU HAWAII

"LIKELIKE,"

KAPENA KING.

                        Poalua, Nov.  9, hora 5 pm…………………………………………………………………………………………   Hilo

                        Poalua, Nov. 16, hora 5 pm…………………………………………………………………………   Kaapuni ia Hawaii

                        Poalua, Nov. 23, hora 5 pm………………………………………………………………………………………… Hilo

                        Poalua, Nov. 30, hora 5 pm…………………………………………………………………………   Kaapuni ia Hawaii

                        Poalua, Dek.   7, hora 5 pm…………………………………………………………………………………………. Hilo

                        Poalua, Dek. 14, hora 5 pm……………………………………………………………………………Kaapuni ia Hawaii

                        Poalua, Dek. 21, hora 5 pm…………………………………………………………………………………………. Hilo

                        Poalua, Dek. 28, hora 5 pm……………………………………………………………………………Kaapuni ia Hawaii

AOLE AIE NO NA UKU OHUA!

     Ke hooleia aku nei ka aie no ka uku ohua, a ke hoikeia aku nei i ke akea, ina he mau paiki, ukana a puole hooili ko lakou, e pono e hoailona ia me ka moakaka lea.  Aole no e ae ia ka lawe ana i na ukana, paiki a puolo i hoailona ole ia ke ole e kakouia ka loaa ana mai.

HE KUIKE KA UKU UKANA.

     Ma na ukana a pau o na makamaka, e pono e uku mua ia.  A e hookoia no na kaueha no ka lawe a hiki i kahi i makemake ia.  A e malama ia no me ka makaala na ukana, paiki a me na puolo, lio, pipi a me ka hoki.

E hoailona ia me ka moakaka na Pahu Rama a me Waina.

     O ka poe no lakou na ukana o keia ano, e pono e hoailona ia me ka moakaka, a i ole e kakauia me ka moakaka ka loaa ana mai o ka poe no lakou keia mau waiwai.

     O na koina no na pilikia a me na poho, e pono e hoike koke ia mai iloko o ka malama hookahi.

     Aole e aeia na hookele kaa, na keiki a me na mea like e pii iluna o ka mokuahi i ka wa e pili mai ai i ka uapo, aia wale no a pau no ohua eepakeke i ka iele.

     No ke ake nui e hoopomaikai ia ka lehulehu kaahele, ua hoololi ae nei na Ona o Likelike i ka Papa Hoike Manawa oia Mokuahi e like me maluna.

Ma ka Hale Oihana e loaa'i na Palapala.

     Aole Keena o hope e lilo, aia wale no a kaa mua mai ka uku moku.  Aole e lii ka hewa no na paiki, ukana a puolo paha, ke ole e kakauia ka loaa ana mai.  E hookaaia ka uku ukana i ka wa e noiia aku ai.                                                                                          WAILA MA.

 

NA KANAKA O HAWAII NEI!

INA I MAKEMAKE

- OUKOU E KUAI I -

GITA, AKODIANA, BANJO, OHE, VIOLINA, PAHU Hookani Nunui a Liilii,

HE PONO LOA IA OUKOU KE

HELE MAI I KA HALEKUAI O

GEO. F. WELLS,

HELU 66 me 68 ALANUI PAPU.

     Ke malama nei no au i na Lako Hale o na ano a pau.  Na Noho no $1.00  Na Moe Laau no $7.00  Na Punee nani loa no $15.  A me na ka lako hale piha no ke $45.

     Ina i makemake oukou i na Mekini Humuhumu lole, e loaa no ia oukou ka

MEKINI HUMUHUMU AMERIKA

     o ke kumukuai makepono, me ka makana he pila Gita maikai a he kii nui paha.

     Ua pai iho nei o Mr. Wells he Buke kuhikuhi no ka Huila Humuhumu ma ka olelo Hawaii.  A i keia wa, o ka poe o noho ana ma na wahi kuaaina, ua hiki ia lakou ke kuai i ka Huila Humuhumu me ka haawi manawalea ia aku o ka Buke kuhikuhi, a mailoko aku o keia buke e ike ai i na loina o ka humuhumu ana.

     O na kumukuai o ko makou mau Mekini Humuhumu, mai ke 40, 45, 50, a hiki i ke $55.

     I na i makemake oukou i ka Mekini maikai loa me ke pakaukau akea a me ka huila kala, ua hiki no ia oukou ke hoouna mai ma ka leta ia

GEO. F. WELLS ma HONOLULU.

     Me ka hookomo pu iho i ke $55.  a nana no e hoouna aku me ka buke kuhikuhi a me ka makana i hai ia.  Na oukou no e hai mai i ka makana a oukou e makemake ai.

     E loaa no na WATI maikai no ka $7.  Na WATI kau hale mai $2.50, $3. $4. a hiki i ka $5.  Na KAULA WATI no ka $1.00 wale no. Kia no hoi ma keia hale na Lasu kii emi loa o ke kumukuai

GEO. F. WELLS,

Helu 66 me 68 Alauni Papu.       972 3m

 

MAKEMAKEIA.

     Ua makemake ia ka poe mea ILI KAO MALOO a me na ILI NIBI, a pela hoi me na ILI MIKO o na ano a pau, e kuai mai i ko lakou mau ILI me makou, a e haawi no makou i ke KUMUKUAI KIEKIE LOA o ko kakou Makeke

C BREWER & CO.  Burua Ma.)

Honolulu, Sept. 29, 1880.       998 tf.

 

 

              HOOLAHA PAPA.

     KE hookapu loa aku nei au i kuu aina o Hakipuu.  Aole hooku na Lio, Bipi, Puaa, Hoki, Piula, Moa, Pelehu, Kaka malama o ua aina la, o paa auanei ia'u, e like me ke Kanawai.

C. H. JUDD, (Kale Kauka.)

995   4t.

 

C. C. Coleman.

Amara a he Mea Hana Mekini

Kapili Kapuai Hao Lio

-A ME KA -

Hana ana i na Kaa Lio, &c.,

Hale Hana ma Alanui Alii, e kokoke la i

905       ke Alanui Papu.       tf

 

J. W. M. POOHEA.

He Loio a he Kokua ma ke Kanawai.

     No na kanaka a pau imua o ka Aha Apana a hiki imua o ka Aha Kaapuni ma ke keena no ka Mokupuni o Molokai; a he Agena Hooiaio Palapala Kepa no hoi no ia Apena.  E hookoia na ko-i a ka makemake me ka eleu loa.  E loaa no au ma ko'u home ponoi oia o "Kalauonaona," ma Wawaia, a i ole ia, ma ka Halehookolokolo ma Pukoo.

895   ly       Jan 25.

 

UA MAKEMAKE IA

NA ILI BIPI, NA KIWI BIPI, NA IWI BIPI,

E haawi ia no ke kumkuai kiekie a ko kakou makemake nei e H. Hackfeld & Co.

Honolulu, Mei 22, 1880       914 ly

 

RICARDA F. BICKERTON,

 

(PEKETONA.)

     LOIO a he KOKUA ma ke KANAWAI I HELE ANA IA IMUA O NA AHAHOOKOLOKOLO Ea pau o ieie Aupuni me na ano hihiu a pau, na paha ma Oahu nei, a ma na Mokupuni e ae.

     Ua makaukau mau oka i ka hana ana i na Palapala pili kauawai o kela a me keia ano.

     Ua hiki no hoi iaia ke hoaie dala aku ma ka muraki ana iau aina, ma ka akupanee hoahau loa.

     E hanaia na hana me ka hikiwawe a ma ka aku @.

     Keena haa, Helu 23 Alanui Kalepa, elua puka ma o aku o ka hale kauka o Kauka Mina@.       840   ly

    

KAUKA BERODI.

(O KE KULA NUI O KANADA)

     Ua makaukau au i ka lapaau ana i na kanaka Hawaii no na ano mai a pau.  Ke kahea aku nei au i na poe i loohia i ka mai e hele mai ia'u

KEENA OIHANA

     Aia ma Alanui Papu, Helu 129, mauka iho o ka Hale Kamana o D. Burrous.

996   tf.

 

E. Cook Webb. M. D.

HOMEOPATIKA.

(Kauka o ka Halemai Homeopatika, ma na Mokupuni Ward's. N. Y.)

     KEENA OIHANA. - Helu 60, Alanui Papu.  Makaukau mau e lawelawe i na pilikia mai o na wahine a me na kamalii.

     HORA HANA. - Mai kakahiaka a hora 10 am. - 2 a i ka 4 pm.      967   4m

 

PAPA! PAPA!

- NO -

ALLEN & ROBINSON

UA WEHE AE NEI MAUA I

PA KUAI PAPA

- MA -

KA UWAPO O PAKAKA

 

Na Papa Ulaula o na ano a pau.

Na Papa Paina o na ano a pau.

Na Pili Hale Ulaula.

Na Pili Hale Keokeo.

Na Pepa Hoonani Hale,

Na Pepa Molina.

 

Na Pena a me na Aila Pena

NA KUI O NA ANO A PAU.

NA PANI PUKA a me

NA PANI PUKA ANIANI.

NA PANI PUKA a me

NA OLEPELEPE.

 

NA LAKO KUKULU HALE

O NA ANO A PAU!

E KUAIIA MA KE

KE KUMUKUAI HAAHAA LOA

O keia Makeke.

ALLEN & ROBINSON

Honolulu a n. 1. 187       565   tf

 

LOLE MAKEPONO

Ke Kuike.

E LOAA NO IA MA KAHI O

KAKELA ME KUKE!

- E LAA NA -

Ahinahina, Kalakoa,

Keokeo, Leponalo,

Pena, Aila, Aniani,

HA MEA PIULA!

KOPA, AILA HONUA.

AILA HOOMALOO

Kui Kakia, Pakeke,

Tabu, Kaula, Noho Lio,

Hulu Palaki, na Pulumi.

 

- A HE -

 

AGENA NO HOI NO NA MOKUPUNI O HAWAII NEI NO NA

 

Lainakini-nao,

Lainakini Maoli,

Palule Kalakoa,

Alapia, Kelepa, Kilika,

 

Na lole kupono i ka wawae,

Palule Huluhulu,

Na Lole Huluhulu,

Na Lole no ka hoohelo ana

Lipini, Lihilihi, &c.

LIPINE, LIHILIHI, &C.

 

- A ME NA -

 

Mikini Humuhumu MakeponoLoa!

 

- A HE -

 

MAU MEA AI KAHI

 

Ka Palaoa, Kopaa,

Raiki, Pia, Hoohu,

Paakai, Huaala,

Pia Kulina, &c.

 

A he Laau Lapaau Kaulana Lea

A DR. JAYNES.

 

Laau Kunu,

Laau Hoomaemae Koko,

Laau Ho opau Naio,

Penikila, Huaale

 

A ME NA LAAU HANO, A PELA'KU!

840 tf