Ka Nupepa Kuokoa, Volume XIX, Number 48, 27 November 1880 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

 

KA NUPEPA KUOKOA me ke Au Okoa I HUIIA. No ka Makahiki, $2. Eono Mahina, $1. Dala Kuike ka Rula. KOMITE HOOPONOPONO. Sam'l Kaaikaula, Hezekia Aea. POAONO, NOVEMABA 27, 1880

 

He mau Leta no Makonisia.

 

            Kaumakapili Nov. 19, 1880.

            E KE KUOKOA; Aloha oe. O ka leta i kakau ia malalo, ua loaa mai, mai a Mose Nakanoaro mai, e noho nei ma ka mokupuni o Apemama, he misionari kuloko no ka misiona o Gilibati. Ua haalele oia ia Butalitali ma ka makahiki 1873, a ua noho iwaena o kona mau hoa kanaka ma ia mokupuni a hiki i keia wa, he ehiku makahiki i hala ae nei; Ano, e ike auanei kakou i hua o kona hoomanawanui ana. Ke unuhi ia aku nei ma ka kakou olelo ponoi. R. M.

 

            Apemama, Aukake 16, 1880.

            R. Maka, ko'u hoahanau i aloha ia, ke makemake nei au e kakau aku ia oe, nolaila au e haawi aku nei i ko makou aloha nui ia oukou a pau loa. Nolaila au e kakau nei, no ka mea, ua hiki mai no kau wahi leta ano hauoli loa au, a ola pu me-ko'u wahi manao i keia wa no kou hoomanao ana mai ia'u, mahope o Iesu, o ko kakou hoola i make mahope o kakou, a ua oluolu loa no hoi ia kakou.

            Ke ola nei ko makou mau kino, aole he mai ia makou i keia wa, a pela no hoi ka'u wahine. A oukou, he mai anei ko oukou, aole paha? A ina he ikaika ko kakou ola, e e hui hou no kakou i ka makahiki e kokoke mai nei mahope. E hiki aku ana anei kakou ilaila, aole paha? Eia hou keia manao o'u ia oe, ke aneane nei e huliamahi loa na kanaka o keia aina i ka pono, ma ka hoolohe i ka ke Akua olelo. A eia hou keia mea hou, ua huli mai nei o Binoka ke alii o Apemama ma ka pono, a ua haalele i kona mau akua kahiko.

            A eia hou, ina hiki mai ko makou mau la kapu, (Sabati) pau loa no na kanaka i ka hele ma ka hale pule, e hoolohe ai i ka olelo a ke Akua, a ua hele aku no au ma keia aina e ao aku ia lakou i na Sabati a pau. He nui no ku'u hana, ma kuu kaapuni ana i keia aina a pau, e ao aku ia lakou.

            R. Maka, e hoolohe mai, eha wahi e ku nei na luakini o ke Akua i Apemama nei, hookahi ma Kabanaki, hookahi ma Tebana, hookahi ma Tabian, hookahi ma Abatiku. A i ka hiki ana mai nei o Rev. Tela ia nei, ua bapekikoia na mea i manaoio i ke Akua he kanaonokumamalima oia poe, i hookomo ia ma ko onei ekalesia.

            Owau no kou hoahanau iloko o Iesu.

            MOSE NAKANOARO.

 

            Maiana Augate 26, 1880.

            Rev. R. Maka Aloha oe a me Mary a me ko ka hale a pau. Ua hoea mai nei o Hoku Ao i o makou nei, aole liuliu a ke hoolale nei no e holo, aole i pau pono na mea i manao ia e kakau, ua loaa mai na leta, aole @ kilohi pono ia no ka pupuahulu loa. He oluolu ko makou mau ola i keia hora, ke e@i hope nei ka hana ma keia kihapai.

            Ke oni ae nei kahi manao e hoi hoomaha 'ku i keia A. D. 1881 ke ae mai ka Haku, aole mau mea hou na o makou nei.

            Ke aloha nui aku nei o Julia ia olua. E aloha mai ka Haku ia kakou a pau Amene.

            W. N. Lono.

 

WELIWELI KA HANA A PELE.

 

            Ua hu ae ka Pele ma ka hikina akau mai Keaiwa aku nei, nona hoi ka mamao i aneane e 14 mile a oi aku, ma ka hoomaopopo ana me he la he 10 a oi mile mai luna mai o Mokuaweoweo a hiki i kahi i hu ae ai o ke ahi a kahe awai maoli aku iluna o ka aina nona hoi ka loa i aneane ehiku a ewalu mai keia la e kakau ia nei keia leta, aka ke hoomau la no ka panee liilii ana o ka a ana iloko o na pohaku, me na laau, o keia wahi e kahe nei, aia mawaena o Ohaikea a me Ainapo, a ma ke komohana akau hoi Kilauea 'Luaopele' me he la ke mau ka a ana o keia ahi, aia paha kona palena iloko o ke kai ma ke komohana hema mai Kaluaopele mai.

            Nolaila, he wa maikai keia a na poe makaikai e ike pono ai, no ka mea, aia iluna o ka aina maikai, ua hiki no ke hele me ka @o a hiki i kahi a Pele e a ana.

            Aole no i holo loa ka a ana, aka, mai kahi i hoomaka mai ai e kahe awai, a hiki i kahi i komo aku ai iloko o kekahi a@, alaila, hoomaka aku e panee liilii e like me he moku la i loaa i ka pohu, e paialewa ia ana e na ale o ka moana, o keia wahi i hu ae la ka Pele, aia no ia ma ka hikina hema o Maunaloa. Owau me ke aloha.

            James Kauhane.

            Keaiwa, Kau, Hawaii, Nov 15, 1880.

 

            Aia ma Punaluu, Oahu, he mau pake hanai pua@, a ma ia wahi hookahi no he poe kanaka maoli mahiai. Ma ka la Sabati o kela pule i hala aku la, komo aku la o M ka Puaa iloko o ka mahina ai a Mika Mahiai, a alualu ia aku la na puaa a komo i ka aina o ka pake, holo mai na pake me ka papa ana i kanaka aole make hopu i ka puaa, oiai ua komo iloko o ko lakou anapuni, a o lakou no hoi na ona o ka holoholona. Hoi aku la kanaka i ko lakou wahi, a ma kekahi hora e ae o ia la no hele hou mai la lakou he lehulehu, i ka wa a na pake e paina ana, a alu nui iho la na keiki Hawaii i @ keiki o Kina. Lele liilii ka papa kaukau, a hiihia na mea ai, auhee aku la na pake me ka makau.

            Kau ka weli i na keiki o ka aina pua, a hookahi pake i hopu ia ma ka puai a upikiia ka makani a paa, a o ka aneane lele wale no koe o ke aho, ua hele na maka a uliuli. Aole i hewa na pake, oiai ua ae aku no e uku no ka poino i hana ia e ka puaa o lakou. Iloko o keia pule iho nei i hookolokolo ia ai keia hihia imua o ka Hon J Kaluhi ma Punaluu. O W R Kakela no ka aoao hoopii, a o J L Kaulukou no ka aoao pale.

 

MAI MAKAU OUKOU.

 

BE NOT AFRAID. WHITE ROSES.

1

Aia a nou ka ino, Nou mai a huhu, A molehulehu, A uhi mai ka po, Lohe ia he leo Mai ka pouli no, Owau no nei ka Haku, Mai makau oukou.

2

Aia a puni ia I ka Poe hooke, Hune, a kaumaha, Luuluu a uwe, Hamau ea, he leo, Leo oul no, Owau ko nei ka Haku, Mai makuu oukou.

3

I ka piipii ana I na mauna hau, I ka luli ana Ma ke kai huhu, Aia hoi he leo, Leo hoona no, Owau no nei ka Haku, Mai makau oukou.

            HAWAII.

 

HAAWINA KULA SABATI.

 

HELU 11. SABATI DEK. 12, 1880.

KUMUHANA.

Na la hope o Iosepa. Pauku Baibala. Kin 50;14-26.

            14 A pau ke kanu ana i kona makuakane, hoi aku la o Iosepa i Aigupita, oia, a me kona poe hoahanau a pau i hele pu me ia e kanu i kona makuakane.

            15 A ike iho la na kaikuaana o Iosepa, ua make ko lakou makukane, olelo lakou, E ukiuki mai auanei o Iosepa ia kakou, e oiaio no, e hoopai mai ia i ka hewa a pau a kakou i hana aku ai ia ia.

            16 Kauoha ae la lakou ia Iosepa, i ae la, Kauoha mai la kou makuakane, mamua o kona make ana, i mai la.

            17 E i aku oukou ia Iosepa, Ke nonoi aku nei makou ia oe, e kala oe i ka hewa o kou poe kaikuaana, a me ko lakou hala, no ka mea, ua hana hewa lakou ia oe. Ano hoi, e kala oe i ka hewa o na kauwa a ke Akua o kou makuakane. Uwe iho la o Iosepa i ka lakou olelo ana mai ia ia.

            18 Hele ae la hoi kona poe kaikuaana, haule iho la ma kona alo, i ae la, O kau mau kauwa makou.

            19 I mai la o Iosepa ia lakou, Mai makau oukou, Owau anei ma ko ke Akua wahi?

            20 I manao no oukou e hana ino mai ia'u, a hoolei mai ke Akua ia mea, i mea maikai, e hana mai ai e like me ia i neia la, e hoola i na kanaka he nui loa.

            21 Mai makau: na'u no oukou e malama aku i ka ai, a me ka oukou poe keiki. Hooluolu mai la ia ia lakou, a olelo lokomaikai mai la i ko lakou naau.

            22 Noho iho la o Iosepa ma Aigupita, oia, a me ka ohana a kona makuakane: a o na makahiki o ko Iosepa ola ana, hookahi haneri a me ka umi keu.

            23 A ike iho la o Iosepa ina keiki a Eperaima a me ke kuakolu, a me na keiki a Makira, ke keiki a Manase, o ka mea i hanau ia ma na kuli o Iosepa.

            24 I ae la o Iosepa i kona poe hoahanau, E make ana au. E oiaio no, e ike mai ke Akua ia oukou, a e hoihoi aku ia oukou, mai keia aina aku, a ka aina ana i hoohiki ai ia Aberahama a ia Isaaka, a ia lakoba.

            25 Na Iosepa no, na mamo a Iseraela i hoohiki ai, i ae la, E oiaio no, e ike mai ke Akua ia oukou, a e lawe aku oukou i ko'u mau iwi, mai ia anei aku.

            26 A make iho la o Iosepa ma ka makahiki o kona ola ana, hookahi haneri a me ka umi keu. A ialoa iho la lakou ia ia a waiho iho la maloko o ka pahu ma Aigupita.

            Pauku Gula. Sol 10;7, hoopaa.

            E kala aku i ka poe hana ino mai me ka hana maikai pu aku.

            Na heluhelu la. 1 Kin 50;1-13, 2 Kin 50;14-26, 3 Puk 1;1-4, 4 Ios 24;14-32, 5 Oih 3;12-26, 6 Puk 3;1-20, 7 Heb 11;32-40.

            Mele. "Lau wale no." Lei Alii, 154.

            Pule i loaa pu ka hua me na lau.

 

            Ka Wehewehe me ka Ninau ana.

            Mahope iho o ko lakoba hoomaikai ana ia Iosepa me kana mau keiki, kahea oia kana mau keiki a pau e akoakoa mai imua ona, e hoolohe i kana mau olelo hope.

            He mau olelo ano wanana ia.

            Hai mai i na olelo no Reubena me Simeona, a me Levi 49;5-7, me ka hooko ia ana.

            Hai mai i na olelo no Iuda 49;8-12, me ke ko ana. Hai mai i na olelo no Tebulona Isakara, Dana, Gada, Asera, me Napetali, p 13-21, me ke ko ana.

            Hai mai i na olelo no Iosepa, me Beniamina, p 22-27, me ke ko ana.

            Heaha ka Iakoba kauoha nona iho? p 29-32. Ua hookipa anei?

            Heaha mahope o keia mau kauoha? p 33.

            Mok 50;1-13. Aha Iosepa ma ka maka o Iakoba? Heaha ke kauoha no ke kino o Iakoba? Nawai i ia loa? Ehia la no ka ia loa ana? Ehia la i kanikau ai ko Aigupita no Iakoba? A pau na la kanikau, heaha ka Iosepa i noi aku ai ia Parao, me ko Parao pane ana?

            Hai mai i ka huakai kanikau i hele pu me Iosepa i Kanaana i kanu ia Iakoba p 7-13.

            P 14-17. Pau Iosepa ma ia hoi mai i Aigupita. Heaha ka na kaikuaana i makau ai? Mamua o ko Iakoba make ana, heaha kana i kauoha ai i na kaikuaana, no ka lakou hana ino ana ia Iosepa? Ua hooko anei lakou ia kauoha? Ehia makahiki i hala mai ka wa i hana ino ai lakou ia ia a hiki i ka manawa i noi aku ai lakou ia ia e kala mai i ko lakou hewa? 40 a oi aku paha, loihi no ea. Ua elemakule paha lakou. No ke aha ko lakou mihi ole mamua? Ma ia noi ana pehea iho la Iosepa?

            P 18-21. Ko hou na moe o Iosepa, aha lakou imua ona me ka olelo pehea? Pane Iosepa pehea? A ninau pehea? Nawai e kala i na hewa? Nawai hoi e hoopai?

            He manao ino ko lakou ia Iosepa. Ua hewa loa no lakou. Ua hoolilo nae ke Akua ia hana ino i mea aha? Manao ino Hamana ia wai? A hoolilo ia ia manao ino me ka hana ino i mea aha?

            Pehea Iosepa i hooluolu ai i kona mau hoahanau?

            P 22, 23. Ola no Iosepa mahope o ka make ana o kona makuakane i ehia makahiki? Owai ke keiki i hanau ia ma na kuli o Iosepa?

            P 24-26. A kokoe kona wa make, heaha ka Iosepa mau olelo i kona poe hoahanau, kana wanana hoohauoli, kana kauoha no kona mau iwi? Ua hooko ia anei? Ehia ona mau makahiki a pau? No ke aha ka ialoa ana ia ia? Ehia makahiki mahope iho a lawe ia kona mau iwi i Kanaana?

            Mele. "Na Kamaiki hele mai." Lei Alii, 154.

 

            Na Ninau a na Kahul.

            Na kane. Heaha ke kumuhana? Owai kai make mua, Iosepa anei? O Iakoba paha? Iakoba ea. Pehea na la hope o Iakoba? Nowai kana mau olelo hope? Owai ke keiki hanau mua? Owai ka lua? Owai ke kolu? Owai ka ha? Ua lilo ko ka hanau mau pomaikai ia wai? Ua hewa nae Iuda mamua. Iosepa ka mea hewa ole. No ke aha ka lilo ole ana o ko ka hanau mua pomaikai ia Iospea, aole ia Iuda? Owai ka mamo nui a Iuda? Owai Silo? Owai ka ohana alii?

            E mau ana ke kookoo alii o Iuda a hiki mai owai? Owai ke lii o Iuda i ka wa i puka mai ai Silo, aia hoi Iesu? Owai ka lunakanawai nahesa na Dana mai? Owai ke keiki a Iakoba i hoomaikai nui ai? No ka ohana hea ka oihana kahuna?

            Na wahine. Ehia keiki ponoi a Iakoba? Owai laua? Owai ke kaikamakine a Iakoba. Ua hoomaikai pu ia anei oia me na keikikane? Ina ua haule, no ke aha ka haule ana? Ina makemake na wahine e hoomaikai, a e loaa na waiwai hooilina maikai ma ka lani, heaha ka mea e hiki ai?

            Owai ka makuahine i make i ka wa e hanau keiki ana?

            Make Iakoba a hui ia oia me wai? Owai ia mau makua? Mahea kahi e hui pu ai?

            Na ui me na keiki. Owai ke keiki maikai a kina ole ma ka nana aku mai ka mua a i ka hope? Isoepa paha. Aole i kakauia kekahi hewa nona. He mau hewa paha kona, aole nae i kakau ia. E hoohalike oukou me ia. A hoowalewale ia oukou, mai ae aku. E pale aku. A hana ino ia mai, e hana maikai aku.

            A hana ino oukou i kekahi hoa, e mihi ia ia a noi aku e kala mai. A lilo ouko i poe nui, mai hookiekie. E noho no me ka haahaa. A pilikia na hoa, na makamaka, na malihini, e kokua no, e hanai i ka poe pololi.

            Ke kula a pau. Loihi ka moolelo o Iosepa. No ke aha? Pehea e loaa ai ka moolelo loihi no kekahi o kakou? Owai ka wahine nona kekahi moolelo maikai? Nui na keiki a Iakoba. Owai nae kai lilo i kupuna no Iesu? Iosepa nae ke keiki maikai loa, no ke aha kona lilo ole i kupuna no Iesu? No ke aha i hoopuehuehu ia ai ka Levi ohana mawaena o na ohana e ae? Ehia makahiki a hooko ia ka wanana a Iakoba no ka hiki ana mai o Silo?

            Nawai ke kanikau ana no na la 70? Owai na kupapau elua i ialoa ia? Heaha ke ano o ka ialoa ana? No ke aha hoi? Ehia makahiki o Iosepa? Mahea i lawe ia aku ai kona mau iwi, a kanu ia? I ka wa hewa? Owai ka Parao i ka i make ai Iosepa? Parao ehia la keia?

            Ina ua hana hewa kekahi, a noho mihi ole a loihi loa, nalo anei ka hewa, a pono ole ke mihi? Nawai e hoopai i ka poe mihi ole? Ina he poe hewa a mihi ole iloko o na kula Sabati, heaha ka pono?

            Mele. "Hea Iesu." Lei Alii, 157.

            Pule i hoolohe na haumana i ka leo hea o Iesu.

            Haawina no Dek 19. Hoi Hope.

 

            Ua oluolu i ke Alii ka Moi ka hookau ana aku maluna o Sir Thomas Hesketh, Bart., ka ona o kela mokuahi kiakolu haapuni honua Lancashire Witch, i ku iho nei ma ko kakou awa nei, i ke Kea Hanohano o ka Hoa Naita o Kamehameha, no kana mau hana aloha ma ka hoouna ana i kona moku mai Kapalakiko ae, e hoopakele i na luina o ka moku kiapa Hawaii Mathilde, i ili ai ma ka mokupuni o Socorro, mawaho ae o na aekai o Mesiko. O ka hoikeia ana keia o ka manao o ka Moi e haawi i na kokua a me na hoomaikai ana i ka poe kokua i kona lahui ponoi.

 

KA MOOLELO O AHAHUI LUNAKAHIKO O NA MOKUPUNI O MAUI.

 

            La hana 1 Poalua Nov 2, 1880.

            Halawai ka ahahui lunakahiko ma ka halepule ma Haiku.

            Koho ia o J K Iosepa i lunahoomalu. Wehe ia ka halawai me ka pule.

            Koho ia o Rev A Pali, D Puhi a me S K Kauwe i komite imihana, o E Helekunihi i kakauolelo ku i ka wa.

            Malama ka aha i ka manawa haipule.

            Hoike hapa mai o A Pali ka lunahoomalu o ke komite imihana i na kumuhana i makaukau. 1 hapalua hora haipule, 2 hoike kihapai, 3 na palapala hoopii, 4 heluhelu haawina, 5 na ekalesia kahu ole, 6 no ke ola kahu, 7 he mau komite hoeueu i na ekalesia, 8 kula kahunapule, 9 i puu dala hui, 10 ka mahina hou, 11 no ka ona.

            Kahea ia na hoa o ka aha.

Ekalesia Kahu Lunakahiko Haiku Rev S Kamakahiki Paele Huelo P Keaupuni Samuela Keanae J Kuluhiwa Hana J K Iosepa H Kekahawalu Kipahulu D Puhi J Pamaiaulu Kaupo J Kawaiaea Honuaula S K Kauwe P W Kimeone Waikapu Naonohielua Wailuku Papu Waihee O Nawahine J S Lono Honokohau S L Kalaola Kaanapali J H Hihio haiolelo, J A Kaukau Lahaina Rev A Pali P Kamanonui Olowalu S K Makahiki haiolelo, S Kaalawa Paia J P Kuia haiolelo, J M Napulou.

            Aole o Molokai a me Lanai.

            Na lala mau Rev W P Alexander, J M Alexander, E Helekunihi, Rev A O Polepe kakau leta.

            Ae mai ka aha i na poe a pau i akoakoa mai i mau hoa kuka, koe ka hooholo ana. I na he mau hoahanau lakou.

            Hapai ka aha i ke kumuhana elua, oia ka hoike kihapai.

            Heluhelu mai o P Keaupuni i ka hoike kihapai o ka ekalesia o Huelo a me ka ekalesia o Keanae.

            Heluhelu mai o J K Iosepa i ka hoike kihapai o ka ekalesia o Hana.

            Heluhelu mai o D Puhi i ka hoike kihapai o ka ekalesia o Kipahulu a me Kaupo, kamailio mai ka aha no keia hoike.

            Heluhelu mai o S K Kauwe i ka hoike kihapai o ka ekalesia o Honuaula.

            Heluhelu mai ke kakauolelo i ka hoike kihapai o ka ekalesia o Wailuku.

            Heluhelu mai o S L Kalaola i ka hoike kihapai o ka ekalesia o Honokohau, kamailio mai ka aha no keia hoike.

            Heluhelu mai o J K Hihio ka haiolelo o Kaanapali i ka hoike kihapai oia ekalesia, kamailio mai ka aha no keia hoike.

            Heluhelu mai o A Pali i ka hoike kihapai o ka ekalesia o Wainee Lahaina.

            Heluhelu mai o S K Makahiki haiolelo o Olowalu i ka hoike kihapai o ka ekalesia oia ekalesia.

            Ma ke noi, ua hoopanee ia a halawai hou i ka hora 1:1-2, ia S Kamakahiki ka pule.

            Halawai hou ka aha ma ka hora 1:1-2 e like me ka hoopanee ana me ka pule a A Kaukau.

            Hapai ka aha i ke kumuhana 3, na palapala hoopii.

            Heluhelu mai ke kakauolelo i ka palapala kahea a ka ekalesia o Kaanapali ia J K Hihio i kahu no lakou, ma ke noi a S Kamakahiki, ua waiho ia ma ka lima o ke komite, S Kamakahiki, S K Kauwe, P Keaupuni, ke komite.

            Heluhelu hou mai ke kakauolelo i ka palapala kahea a ka ekalesia o Olowalu ia S K Makahiki i kahu ekalesia no lakou, a me ka palapala a na poe mawaho no ia mea hookahi no, waiho ia keia mau palapala i ke komite mua.

            Heluhelu mai ke kakauolelo i ka palapala kahea a ka ekalesia o Paia ia J P Kuia i kahu no lakou, koho ia ka makua W P Alexander i komite no ia palapala kahea.

            Heluhelu mai ke kakauolelo i ka palapala kahea a ka ekalesia o Waikapu ia J N Paikuli i kahu no lakou, ma ke noi, ua waiho ia keia palapala ma ka lima o W P Alexander, a nana e palapala aku ia Paikuli, oiai aole oia maanei.

            Noi mai o S Kaalawa e hoopai ia ka ahahui kula Sabati, ma ka ninau ia ana, ua hoole ia.

            Heluhelu mai o W P Alexander ke komite no ka palapala kahea a ka ekalesia o Paia a me Waikapu i kana hoike.

            Ke koi aku nei ko oukou komite e hooholo ka aha.

            1 E waiho aku i ka palapala kahea a ka ekalesia o Paia iloko o ka lima o J P Kuia ka mea i kahea ia.

            A nana no e hoike aku i kona ae a me ka ole.

            2 E hoike aku i ka palapala kahea a ka edalesia o Waikapu ia J N Paikuli, ka mea i kahea ia aku ai e lakou.

            Hapai ia ke kumuhana 4, oia ka heluhelu kumumanao, heluhelu mai o E Helekunihi i kona kumumanao, pehea ia e pau ai ka ona ana.

            Hooholo ka aha e hoouna ia e pai ia ma ka "Nupepa Kuokoa," heluhelu mai o A Pali i kona kumumanao, ko ke Akua alakai ana i kona poe kanaka, hooholo ka aha e hoouna ia e pai ma ka Nupepa Kuokoa.

            Heluhelu mai o S K Kauwe i ka hoike a ke komite no ka palapala noi a ka ekalesia o Kaanapali ia J K Hihio.

            Hoike a ko oukou komite no ka palapala kahea a ka ekalesia o Kaanapali ia J K Hihio i kahu no lakou.

            Aole i pau.

 

I NA KANAKA O HAWAII NEI! INA I MAKEM@KE OUKOU E KUAII GITA, AKODIANA, BANJO, OHE, VIOLINA, PAHU Hookani Nunui a Liilii, HE PONO LOA IA OUKOU KE HELE MAI I KA HALEKUAI O GEO. F. WELLS, HELU 66 ME 68 ALANUI PAPU.

            Ke malama nei no ou i na Lako Hale o na ano a pau. Na Noho no $1.00 Na Moe Laau no $7.00 Na Punee nani loa no $15. A me na ka lako hale piha no ke $45.

            Ina i makemake oukou i na Mekin@ Humuhumu lole, e loaa no ia oukou ka MEKINI HUMUHUMU AMERIKA o ke kumukuai makepono, me ka makana he pila Gita maikai a he kii nui paha.

            Ua pai iho nei o Mr. Wells he Buke kuhikuhi no ka Huila Humuhumu ma ka olelo Hawaii. A i keia wa, o ka poe e noho ana ma na wahi kuaaina, ua hiki ia lakou ke kuai i ka Huila Humuhumu me ka haawi manawalea ia aku o ka Buke kuhikuhi, a mailoko aku o keia buke e ike ai i na loina o ka humuhumu ana.

            O na kumukuai oukou i ka Mekini maikai loa me ke pakaukau akea a me ka huila kala, ua hiki no ia oukou ke hoouna mai ma ka leta ia GEO. F. WELLS ma HONOLULU.

Me ka hookomo pu iho i ke $55. a nana no e hoouna aku me ka buke kuhikuhi a me ka makana i hai ia. Na oukou no e hai mai i ka makana a oukou e makemake ai.

E loaa no na WATI maikai no ka $7, Na WATI kau hale mai $2.50, $3, $4, a hiki i ka $5. Na KAULA WATI no ka $1.00 wale no. Eia no hoi ma keia hale no Laau kii emi loa o ke kumukuai GEO. F. WELLS, Helu 66 me 68 Alauni Papu. 972 3m

 

PAPA KUHIKUHI MANAWA HOLO O KA MOKUMAHU HAWAII "LIKELIKE," KAPENA KING.

 

Poalua, Nov. 9, hora 5 pm…Hilo Poalua, Nov. 16 hora 5 pm…Kaapuni ia Hawaii Poalua, Nov. 23, hora 5 pm…Hilo Poalua, Nov. 30, hora 5 pm…Kaapuni ia Hawaii Poalua, Dek. 7, hora 5 pm…Hilo Poalua, Dek. 14, hora 5 pm…Kaapuni ia Hawaii Poalua, Dek. 21, hora 5 pm…Hilo Poalua, Dek. 28, hora 5 pm…Kaapuni ia Hawaii

 

            AOLE AIE NO NA UKU OHUA?

 

            Ke hooleia aku nei ka aie no ka uku ohua, a ke hoikeia aku nei i ke akea, ina he mau paiki, ukana a puolo hooili ko lakou, e pono e hoailona ia me ka moakaka lea. Aole no e ae ia ka lawe ana i na ukana, paiki a puolo i hoailona ole ia ke ole e kakouia ka loaa ana mai.

 

            HE KUIKE KA UKU UKANA.

 

            Ma na ukana a pau o na makamaka, e pono e uku mua ia. A e hookoia no na kaueha no ka lawe a hiki i kahi i makemake ia. A e malama ia no me ka makaala na ukana, paiki a me na puolo, lio, pipi a me ka hoki.

 

            E hoailona ia me ka moakaka na Pahu Rama a me Waina.

 

            O ka poe no lakou na ukana o keia ano, e pono e hoailona ia me ka moakaka, a i ole e kakauia me ka moakaka ka loaa ana mai o ka poe no lakou keia mau waiwai.

            O na koina no na pilikia a me na poho, e pono e hoike koke ia mai iloko o ka malama hookahi.

            Aole e aeia na hookele kaa, na keiki a me na mea like e pii iluna o ka mokuahi i ka wa e pili mai ai i ka uapo, aia wale no a pau na ohua eepakeke i ka lele.

            No ke ake nui e hoopomaikai ia ka lehulehu kaahele, ua hooioli ae nei na Ona o Likelike i ka Papa Hoike Manawa oia Mokuahi e like me maluna.

 

            Ma ka Hale Oihana e loaa'i na Palapala.

 

            Aole Keena o hope e lilo, aia wale no a kaa mua mai ka uku moku. Aole e ili ka hewa no na paiki, ukana a puolo paha, ke ole e kakauia ka loaa ana mai. E hookaaia ka uku ukana e ka wa e noiia aku ai. WAILA MA.

 

            S. B. DOLE. HE LOIO A HE KOKUA MA KE KANAWAI.

 

E hiki no iaia ke lawelawe i na hihia o kela a me keia ano imua o na Ahahookolokolo a pau o keia aupuni.

            Keena hana ma Alanui Papu, maluna ae o ka Halekuai o Likikini. Honolulu, Oahu, Iulai 10, 1880. 97I tf.

 

            J. W. M. POOHEA. He Loio a he Kokua ma ke Kanawai.

 

No na kanaka a pau imua o ka Aha Apana a hiki imua o ka Aha Kaapuni ma ke keena no ka Mokupuni o Molokai; a he Agena Hooiaio Palapala Kepa no hoi no ia Apana. E hookoia na koi-i a ka makemake me ka eleu loa. E loaa no au ma ko'u home ponoi oia o "Kalauonaona," ma Wawaia, a i ole ia, ma ka Halehookolokolo ma Pukoo.

            895 ly Jan 25

 

            JNO. LOTA KAULUKOU. LOIO A HE KOKUA.

 

UA makaukau au e lawelawe i na hihia a pau o kela a m keia ano iloko o na Aha Hookolokolo a pau o keia Aupuni. Ua hiki no hoi ke hana i na palapala a pau e pili a@ i ka Oihana Loio me ka e@eu. E loaa no au ma Heeia Koolau poko, a ma Honolulu no hoi i kekahi manawa. 901 tf

 

            ASA KAULIA, Loio a Kokua ma ke Kanawai.

 

UA makaukau au e lawelawe i na hana a pau ma kela Oihana imua o na Aha a pau o ka mokupuni o Oahu. E loaa no au ma Koolaupoko, Heeia, a ma Honolulu i kekaii wa Hooko ia na kauoha mai na wahi a pau o ka mokupuni me ka eleu a me ka hikiwawe.

 

            KA MAKEPONO! A ME KA OLUOLU! Na Pila Umeume maikai, Na Pila Hamonica, Na Violina me na kaula Gita, Na Kopa Aala, Na waiwai nani o kela me keia ano. Na Pale Ili oluna, Na Pale Ili Wawae, Na Uhi Moe, Na Mamalu Liilii. O keia wale no ka hale emi a makepono. Ua lawe pololei ia ma i@ waiwai.

            PICKERING & Co.

            Helu 92 Alanui Alii. Hookahi puka mai ke Alanui Papu mai 972 3m

 

            C. C. Coleman. Amara a he Mea Hana Mekini Kapili Kapuai Hao Lio A ME KA Hana ana i na Kaa Lio, &c., Hale Hana na Alanui Alii, e kokoke la i 905 ke Alanui Papu. tf

 

            HOMEPATICA DR. E. STEVENSON, LALA O KE KULA KAUKA Ma Onaterio Canada, 1860. KEENA OIHANA A ME KAHI NOHO Ma ke kihi o na Alanui Hotele a me Alakea.

            Ho@ 22, 1880 9@ tf

 

            RICHRDA F. BICKERSON. (PEKETONA.) LOIO a he KOKUA ma ke KANAWAI!

 

E HELE ANA @A IMUA O NA AHAHOOKOLOKOLO a pau o keia Aupuni ma na ano hihia a pau, ina paha m@ Oahu nei, a ma na Mokupuni e ae.

            Ua makaukau mau ola i ka hana i na Palapala pili kanawai o kela a ma keia ano.

            Ua hiki no hoi iaia ke hoaie dala aku ma ka m@rake ana ina aina, ma ka ukupanee haahaa loa.

            E hauaia na hana me ka hikiwawe a ma ka uku haahaa.

            Keena hana, Hule 23 Alanui Kalepa, elua puka ma o aku o ka hale kauka o Kauka Minu@eole. 840 ly

 

            KAUKA BERODI. (O KE KULA NUI O KANADA)

 

            Ua makaukau au i ka lapaau ana i na kanaka Hawaii no na ano mai a pau. Ke kahea aku nei au i na poe i loohia i ka mai e hele mai ia @u KEENA OIHANA Aia ma Monikahaae maluna ae o ka Hale Kuai o Mellis a me Fishel, mai ka hora 8 a me 10 o kakahiaka a mai 2 me 4 a mai 7 me 8 ahiahi.

            3-m 969

 

            E. Cook Webb. M. D. HOMEOPATIKA.

            (Kauka o ka Halemai Homeopatika, ma ka Mokupuni Ward's. N. Y.)

            KEENA OIHANA.-Helu 60, Alanui Papu. Makaukau mau e lawelawe i na pilikia mai o na wahine a me na kamalii.

            HORA HANA.-Mai kakahiaka a hora 10 am.-2 a i ka 4 pm. 967 4m

 

            PAPA! PAPA! NO ALLEN & ROBINSON UA WEHE AE NEI MAUA I PA KUAI PAPA MA KA UWAPO O PAKAKA

            Na Papa Ulaula o na ano a pau. Na Papa Paina o na ano a pau. Na Pili Hale Ulaula. Na Pili Hale Keokeo. Na Pepa Hoonani Hale, Na Pepa Molina. Na Pena a me na Aila Pena! NA KUI O NA ANO A PAU. NA PANI PUKA a me NA PANI PUKA ANIANI. NA PANI PUKA a me NA OLEPELEPE.

 

NA LAKO KUKULA HALE O NA ANO A PAU! E KUAIIA MA KE KE KUMUKUAI HAAHAA LOA O keia Makeke.

            ALLEN & ROBINSON

            Honolulu a n. 1, 187@ 863 tf

 

            LOLE MAKEPONO Ke Kuike. E LOAA NO IA MA KAHI O KAKELA ME KUKE! E LAA NA Ahinahina, Kalakoa, Keokeo, Leponalo, Pena, Aila, Aniani, KA MEA PIULA! KOPA, AILA HONUA, AILA HOOMALOO

            Kui Kakia, Pakeke, Tabu, Kaula, Noho Lio, Hulu Palaki, na Pulumi. A HE AGENA NO HOI NO NA MOKUPUNI O HAWAII NEI NO NA Lainakini-nao, Lainakini Maoli, Palule Kalakoa, Alapia, Kelepa, Kilika, Na lole kupono i ka wawae, Palule Huluhulu, Na Lole Huluhulu, Na Lole no ka hoohehelo ana Lipini, Lihilihi, &c. LIPINE, LIHILIHI, &c. A ME NA Mikini Humuhumu MakeponoLoa! A HE MEA AI KAHI Ka Palaoa, Kopaa, Raiki, Pia, Hoohu, Paakai, Huaala, Pia Kulina, &c A he Laau Lapaau Kaulana Lea A DR. JAYNES. Laau Kunu, Laau Hoomaemae Koko, Laau Hoopau Naio, Penikila Huaale A ME NA LAAU HAMO, A PELA'KU@

            840 t@