Ka Nupepa Kuokoa, Volume XIX, Number 45, 6 November 1880 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

 

KA NUPEPA

Kuokoa me ke Au Okoa

I HUHA.

No ka Makahiki, $2 Eono Mahina, $1.

Ina a Kuka La Rula.

 

KOMITE HOOPONOPONO.

Sam'l Kaaikaula.

Hezekia Aea.

POAONON. NOVEMABA 6, 1880.

ALOHA SABATI.

Sabbata Welcome.

                        Hymn Service.

1

            Aloha ka la makamae e maha'i,

            Ka la Iehova i hoomaikai ai,

            E oia, hoomana, a hoomaikai pu,

            Na leo memele, a me na naau.

Cho.    Oli ae i ke Lii hoonei kini pokii,

            Oli pu na awawa na puu oli nei,

            A e hui na kai i ka hooho ae,

            Haleluia! haleluia! haleluia! Amene.

2

            E ku a e naue, e naue maikai

            I o i ka hale e hoomana ai.

            Iehova pu no me ke kokua mai

            I paa na olelo e ola mau ai.

Cho.    Oli ae, &c.

3

            Me e no ka pono ke lilo kakou

            I poe hoolohe a malama no,

            A nana iluna a imi a mau

            I loaa ke ola, ka lei kamahao.

Cho.    Oli ae, &c.

 

4

            E mele a mau, e na haipule e,

            I hiki e ae i ko o kahakai,

            Hahai no makou, a e kikoo mau ae,

            I hui pu ae ma ia home maikai.

Cho.    Oli ae, &c.

            Hawaii.

 

Haawina Kula Sabati.

HELU 8, SABATI, NOV. 21, 1880

KUMUHANA.

Iosepa me kona mau hoahanau. Pauku Baibala. Kin 44:30-34.45;1-8.

            30 No keia mea hoi, ke hiki aku au i kau kauwa i ko'u makuakane, aole ke keiki me makou, ua pai pu ia kona ola me ke ola o ke keiki.

            31 A ike mai ia, aole ke keiki me makou alaila, e make ia; a e lawe iho o kau poe kauwa i ke oho hina o kau kauwa o ko makou makuakane ilalo o ka lua me ke kaniuhu.

            32 No ka mea, ua hoohiki au ia'u iho no ke keiki i ko'u makuakane, ua i aku au.  A i hoihoi ole mai au ia ia iou la, no'u mau loa aku no ka hewa imua o ko'u makuakane.

            33 No keia mea hoi, e ae mai oe ia'u i noho au, kau kauwa i panai no ke keiki, i kauwa na kuu haku; e hoi aku hoi ke keiki me kona poe kaikuaana.

            34 No ka mea, pehea la au e hoi aku ai i kuu makuakane, aole ke keiki me au? o ike auanei au i ka mea ino e hiki mai ana maluna o kuu makuakane.

            1 Alaila aole e hiki ia Iosepa ke uumi iho i ke aloha iloko ona imua o lakou a pau, o ka poe i ku pu mai la me ia; a hea aku la ia.  E hele aku na kanaka a pau iwaho, mai o'u aku nei.  Aole i noho mai kekahi kanaka me ia, i ka manawa a Iosepa i hoike ai ia ia iho i kona poe hoahanau.

            2 Hooho ae la ia i kona leo me ka uwe nui ana: A lohe ae la na kanaka o Aigupita a lohe pu no ko ka hale o Parao.

            3 Olelo aku la o Iosepa i kona poe hoahanau, Owau no Iosepa; ke ola la no anei ko'u makuakane?  Aole, i hiki ke ekemu iki mai kona poe hoahanau ia ia: no ka mea, makau nui iho la lakou imua ona.

            4 A olelo aku la o Iosepa i kona poe hoahanau, E neenee mai oukou io'u nei.  A neenee mai la lakou, Olelo aku la ia, Owau no o Iosepa, ko oukou kaikaina a oukou i kuai ai iloko o Aigupita.

            5 Eia hoi, mai hookaumaha oukou, aole e huhu oukou ia oukou iho i ka oukou kuai ana ia'u ia nei.  No ka mea, na ke Akua au i hoouna mai mamua o oukou e hoolaha aku.

            6 No ka mea, ua wi ae nei ka aina i keia mau makahiki elua; a elima hoi makahiki e koe, aole e mahi, aole hoi e hoi mai.

            7 A ua hoouna mai ke Akua ia'u mamua o oukou, e hookoe aku ia oukou ma ka honua, a e hoolaha ia oukou i ke ola nui.

            8 Aia hoi, aole na oukou i hoouna mai au ia nei, na ke Akua no, a ua hoolilo ae ia ia'u i makuakane no Parao, a i haku no kona hale a pau, a i kiaaina no Aigupita a pau.

            Pauku Gula.    Roma 12;21, huii a hoopaa

            Manao nui.      E hoihoi i ka maikai no ke ino.

            Na helehelu la.            1 Kin 42;1-20, 2 Kin 42;21-38. 3 Kin 43;1-25, 4 Kin 43;26-34, 5 Kin 44;1-34, 6 Kin 45;1-28, 7 Roma 12;9-21.

            Mele. "He Ano." Lei Alii. 145.

            Pule i hele na keiki ano io Iesu la.

            Ka Wehewehe me ka Ninau ana.

            Iosepa ka mea nui ma Aigupita, oia ka hoola kino.  Pau ko na aina e i ka hele io na la i ai ma lakou.  Aia no ka wi ma Kanaana.  Ua wi ka ohana o Iakoba.  Ua lohe kakou, aia ka ai ma Aigupita.

            Ua hiki mai ka wa e hooko ia ai na moe o Iosepa.   Heaha kona moe mua?  Mok 37;7.  Ke kupono ai la ka pua a Iosepa ma Aigupita.  Na pua a kona mau hoahanau, he hele aku la e ku poai a kulou iho imua o ka pua a Iosepa.

            Heaha ka oukou e nana aku nei kekahi i kakahi?  Ninau lokota i kona mau kaiki kane.  Aia ka ka ai ma Aigupita.  E iho oukou ilaila e kuai i ai na kakou i ole kakou e pau i ka make.

            Ka hele no ia o lakou he 10.  Koe ka pokii Beniamina.  Hele no lakou a hiki i Aigupita.  Ninau, auhea ka luna ai?  Eia no ia.  Ke kulou koke iho no ia o lakou imua ona.  Ua ike anie Iosepa, o kona mau hoahaoau no keia?  Ua ike anei lakou, o Iosepa no keia?  Ua hala na makahiki he 15.  Ua ano e ko Iosepa helehelena.  Aole nae i ano e na helehelena o kona mau hoahanau.

            Ke ko ana keia o ko Iosepa moe mua, ma keia kulou ana o na hoahanau ona imua ona.  Hai mai i na kamailio iwaena o Iosepa me ona mau hoahanau, na hana hoeha a Iosepa, ka hoi ana io Iokoba la, me ka lakou mau oleelo ia ia, me kona kaumaha.  Mok 42;1-38.

            Mok 43;1-34.  Ua hala ka iho mua ana o ka Iakoba mau keiki i Aigupita.  Hai mai i keia iho elua ana, ke kumu o ka iho hou ana, ka hana ana a Iosepa me lakou, ka ninau ana, ka ahaaina pu ana.  Heaha ka lakou i haphao nui ai ma ka hoonohonoho ana i na hoaai, ka hoonui ana i ka ai a Beniamina?

            Mok 44;1-29.  Pau ka ahaaina pu ana me ka olioli, hoomaka lakou e hoi aku me eke palaoa.  Aole nae i loihi ka hele ana, nana aku lakou i hope, aia hoi, ua alualu ia!  Auwe! heaha ka hihia?  Ku malie oukou.

            He poe aihue oukou.  Ke kiaha dala a ke kiaaina, eia ka ia me oukou.  Ua lawe malu ia.  Aole, aole, aole makou he poe aihue.  E huli i na eke ai.  I na loaa ia kiaha dala e make no ka mea nana i lawe malu.  Hai mai i ka huli ana, ka loaa ana, ka hoi ana i ke kulanakauhale, na olelo a Iosepa ia lakou, ka uwao ana o Iuda no Beniamina.

            P 30-34.  Ka hapa hope keia o ko Iuda uwao ana no Beniamina.  Ua akaka ia Iosepa ko lakou aloha ia Beniamina, a i ko lakou makuakane, me ko lakou manao nona iho, me ko lakou kaumaha no ka hana ino ana ia ia mamua.

            Ina puka aku lakou i ko lakou makuakane ia Iakoba, aole nae Beniamina pu me lakou, heaha ka hope?  Pehea ka makuakane?  I ole e loaa ia kaumaha nui.

            Ua noi aku Iuda ia Iosepa e ae e lilo oia i aha no Beniamina?  Nui kona aloha ia Beniamina?  Nui hoi kona aloha i kona makua elemakule?

            Mok 45;1-3.  Lanakila ka uwao ana o Iuda.  Hiki ole ia Iosepa ke uumi iho i ke aloha ikoko ona.  Ane moku kona naau.  Kena eia i na kanaka a pau e aha?

            Owai wale no ke koe?  E na lani, e nana mai a e uwe pu, oiai e  hoike ana Iosepa ia ia iho i kona poe hoahanau.  Eia ka mea i kuai.  Ua kuhi lakou ua make ko lakou kaikaina.  Aole ka, ke ola nei oia.  E pau ana kakou i ka make ia ia.  Kamailio oia mamua ma ka olelo Aigupita.  Na hai mahele.  Ka olelo Hebera kana olelo ponoi.  Oia ka olelo a kona mau hoahanau.  Huna eia i kana olelo ponoi.  Kuhi lakou he kanaka Aigupita keia.  Aia hoi, pane mai oia ma ka lakou olelo.   Owau no o Iosepa?  Me ka uwe nui, a lohe na kanaka o Aigupita me ko ka hale o Parao.  Heaha kona ninau mua? Kau kona manao nui maluna o kona makuakane.  Ekemu koke anei lakou?  Makau lakou i ke aha?

            P 4-7.  Heaha kana olelo hou ia lakou?  Pehea oia i hoopau ai i ko lakou makau?  Ehia makahiki wi i pau?  Ehia e koe ana?  Heaha ka ke Akua i hana e ai i hookoe ia lakou ma ka honua?

            P8.  Ua aha ke Akua ia Iosepa no Parao, a no Aigupita a pau?  He mea hoolana keia i ka manao o na hoahanau ona, aole no ke kaena ana.

            Mele. "Ke kula Sabati." Lei Alii 146

Na Ninau a na Kahu.

            Na kane.  Heaha ke kumuhana?  Owai na hoahanau o Iosepa?  Ehia ka i hele i Aigupita?  No ke aha?  Owai kai hoonoho ia?  No ke aha?  Manao anei keia poe hohanau, e ola ana Iosepa?  E hele ana nae hooko i ka moe aha?  Owai ke kiaaina o Aogupita?  Pehea oia i hana ai i hoohewahewa kona mau hoahanau ia ia?  Pehea oia i hoao ai i akaka ko lakou ano?  Ua hoopoina anei lakou i ka lakou hana ino ana ia ia?

            Heaha kai hoala ia i ka hoeha ana o Iosepa i ko lakou naau?  Hiki anei ke pepehi i ka lunaikehala a make loa?  Aia mahea e ala ai ka lunaikehala, a lilo i ilio nahu mau loa?  E ka poe hana hewa malu a hona ia, e mihi e.  Mai kali a make, o ala ko oukou lunaikehala ma ka po, a lilo i ahi aa mau.

            Na wahine.  Owai ka makuahine o Beneiamina?  Owai kai uwao nui nona, a ae e lilo i pani nona?  Ua hewa anei Beniamina?  No ke aha ke kuhi ana, ua hewa oia?

            Ua hewa io nae kakou, a ku i ka make.  Owai kai ae e lilo i pani no kakou?

            Owai kai hana ino ia, a hana maikai aku oia?

            Na keiki me na ui.  I na hana ino ia oukou, pehea oukou e hana aku ai?  E hoohalike me wai?  Heaha ke kanawai hou a Iesu?

            K kula a pau.  Hai mai mok 45;5.  Hai mai i kekahi mau hana ino i hoolilo ia i mea e pono ai kanaka.  Pono anei ke hana ino i mea e pomaikai ai?

            Mele. "Ili Iki."  Lei Alii, 147.

            Pule i lilo na haumana i poe hai i ko ke Akua lokomaikai, &c.

            Haawina no Nov 28. Kin 47;1-12.

           

MOOLELO O KA AHAHUI EUANELIO O KA MOKUPUNI O OAHU

            Halawai ka ahahui euanelio o ka mokupuni o Oahu, ma Kalihi Oct 12, 1880, hora 10 am.  Rev J W Kaapu ma ka noho, hoomaopopo ia na iaia i hiki mai.

Ekalesia.          Kahu.  Elele.

Kawaiahao                              D R Lapati

Kaumakapili    M Kauea         Naukana

Kalihi & Moanalua      S Paaluhi         D Kahakalau

Ewa                             G M Keone

Waianae                      Maikai

Waialua           E S Timoteo    A Emesona

Kahuku                       Kuia

Hauula J W Kaapu                  J Kupau

Waikane          J N Paikuli                   J Kalili

Kaneohe                      S K Pokea

Waimanalo      S Waiwaiole    Naholowaa.

            Na makua misionari.  S E Bihopa, C M Hyde D D, A O Forbes, H Binamu, W Frear L Kamika

            Koho ka aha ia C M Hyde i lunahoomalu, S Paaluhi kakauolelo.

            Koho ka lunahoomalu i na komite mau, komite imihana, Timoteo, Pokea, Lapati; komite imi haawina, Kauea, Naukana, Kaapu, komite pai moolelo; Pareka, Paaluhi.

            Hooholo ka aha, e hoopanee ka haiao a ka lunahoomalu mua a ka ia apopa, hora 9 am.

            Koho ka aha i mau hoa kuka, Kapali, Maka, Pii, Naili, Kekiokalani, na kahu kula Sabati a me na elele i akoakoa mai, e lilo lakou i mau hoakuka.

            Hoopanee ka aha a hiki i ka pau ana o ka hoolaa luakini.

            Hoomaka ia ka hoolaa luakini.

            Himeni me ka pule, J W Kaapu, himeni elua, E S Timoteo, pule loihi, R Maka, heluhelu baibala, C M Hyde, himeni ekolu, J N Paikuli, olelo hoolaha, S Paaluhi, haiao.  A O Forbes, pule hoolaa, S E Bihopa, paipai i ka ekalesi, M Kauea, himeni a me ka pule hookuu, S Waiwaiole.

            Lulu dala - $212.75, na na kamaaina, $52.00, na na malihini, paina awakea.

            Halawai houi ka aha i ka hora 2 pm, pule ka lunahoomalu.

            Heluhelu mai ke komite imihana, hapalua hora haipule, na hoike kihapai, heluhelu haawina, na palapala hoopii, no ke kula kahunapule, no ka ona, no na kula kaikamahine, ka hebedoma haipule o Ianuari, ka Poaha hope o Feberuari i la haipule no na kula, ka hoeueu ana i na ekalesia, na kula Sabati, ka maluhia o ke kula Sabati.

            Heluhelu mai o Kuaea, Maikai, Waiwaiole, Kaapu, Paikuli, Pokea i ka hoike o ko lakou mau ekalesia.

            Heluhelu mai o Pokea i ka haawina o ka ekalesia o Kaneohe, he pono anei i na ekalesia ke mokuahana me na kahu o lakou?

            Heluhelu ma o Keone i ka haawina o ka ekalesia o
Ewa, heaha la ka mea e malama pono ia ai ke ola o na kahu iwaena o na ekalesia?

            Hoopanee keia aha, a halawai hou i ka hora 9 am, pule o Kanakaokai.

La hana 2.

            Halawai hou ka aha i ka hora i hoopanee ia, Oct 13, 1888, lunahoomalu ma ka noho.  Malama ka aha, i ka haiao a ka lunahoomalu mua, Rev J W Kaapu, ma Roma 12;16.

            Heluhelu mai o kakauolelo i ka moolelo o ka la muaili hoapono ia.

            Heluhelu mai o Timoteo, Keone, Lapati, Paaluhi i ka hoike o ko lakou mau ekalesia.

            Heluhelu mai ke kakauolelo he palapala hoopii no Kahuku, hooholo ka aha, e waiho ia palapala hoopii ma ka lima o kahi komite, J N Paikuli, J W Kaapu, E S Timoteo.

            E hoomau aku i ko S E Bihopa noho kahu ku i ka wa ana no ka ekalesia o Ewa, ia S Waiwaiole no ka ekalesia o Kaneohe.

            Heluhelu mai o Kaapu i kona haawina, he mea pono anei i na kahunapule ke koi aku i ka aie i na ekalesia ilihune, i na he aie ko ia ekalesia ia kahunapule.

            Heluhelu mai o C M Hyde i kona haawina, heaha ka like ole o ka babetiso ana a Ioane Babetiso me ka babetiso ana a Paulo i hoike ia ma Oihana19;5?

            Heluhelu mai o E S Timoteo i kona haawina, o ke apo o ke kuikahi, heaha la ia:

            Heluhelu mai ke kakauolelo he palapala hoopii no Kaumakapili, no ko lakou kahu ekalesia.

            Hooholo ka aha, e koho ka lunahoomalu i kahi komite, i elima lala, nana e noonoo i na mea i wawa ia e kue ana i ka inoa maikai o ko kakou hoa Rev M Kuaea, a e hoike mai lakou i kekahi halawa ku i ka wa o keia aha, i mea e hiki ai i keia aha, ke hookolokolo pono i keia mea, S E Bihopa, L Kamika, J N Pailuli, S Waiwaiole, J W Kaapu.

            Hooholo ka aha, e hoopau i ke komite mua, no ka hoopii o ka ekalesia o Kaneohe no J Manuela, a e hoopau loa ia ka noopoo ana no ia mea.

            Hoopanee keia aha, a halawai hou i ka hora 2 pm, pale o S E Bihopa.

            Halawai hou ka aha i ka hora i hoopanee ia, pule o Kamakaokai, hapai ka aku no ke kula kahunapule, aohe mau haumana a keia aha i makaukau.

            No ke kula kaikamahine, na hoakaka mai o E S Timoteo no ke kula o Waialua, a o C M Hyde no ke kula o Kawaiahao.

            No ka ona, @ kamailio ke aha, aohe mea i hooholo ia.

            Ke hebedoma haipule o Ianuari 1881, e malama keia aha, a na ka Papa Hawaii, e hoomakaukau ka papa @ o na la haipule.

            Ka hoeuee i na ekalesia, aohe mea a ke aha i hooholo, ka maluhia o ke Sabati, aohe mea i hooholo ia.

            Heluhelu mai o Kaapu i na haawina.

            1 He nele maoli anei ko ke kanaka aia i ka uhane ole i hoole ai oia aohe Akua nana i hana na mea a pau loa?  Rev E S Timoteo.

            2 O Petero maoli no anei ko Iesu Kristo hope ponoi, i waiho mai ai oia i kona mana a pau, a ka pope e hilinai nei o ko lakou kumu kauoha ia?  Rev C M Hyde.

            3 Heaha ka hoeha i ka Uhane Hemolele o ke Akua i hoike ia ma Epeso 4;30.  Ekalesia o Kaneohe.

            4 E wehewehe i ka pauku ma Halelu 41; 1,2,  Z S K Paaluhi.

            5 Heaha ka kuikahi ana o ka ekalesia me kona kahunapule?  Rev J W Kaapu.

            6 E wehewehe mai i ke ano o ka puka kuikele i komo holookoa ai kela holoholona nui he kamelo, i hoike ia ma Luka 18;25, a pilikia hoi ka puka i ke kanaka waiwai.  Ekalesia o Ewa.

            7 He poe haipule io anei ka poe holoholo olelo no ka Haku, i na he mau hoahanau a he mau kahunapule paha, S Kaili.

            8 Heaha ke ano o ka hookokoke ana o ke kanaka i hoike ia e Iakoba 4.8  P K Malauea.

            9 E wehewehe i na pauku, Halelu 28;8,9  J S Kaeha.           

            O ka poe i heluhelu ole i ko lakou mau haawina, o ka lakou no ia.

            J W Kaapu, M Kuaea, J W Naukana na komite.

            Eia iho na haawina mua a ka poe i heluhelu ole.

            10 He okoa anei ka ekalesia a me kona kula Sabati iho i kuokoa ai ko laua mau waihona a kue ia laua,  Rev S Paaluhi.

            11 O ka babetiso ia ana o Iesu e Ioane Babetiso ma ka muliwai o loredane, ua hooluu maoli ia anei iloko o ka wai nui, aole paha,  Rev H H Pareka.

            12 E hoike mai i ka moolelo ano nui a pokole hoi o ka hoonohonoho ia ana o na buke o ka baibala, ka poe nana i hoonohonoho, na kumu oia hoonohonoho ana, a me na manawa oia hoonohonoho ana,  Rev S E Bihopa.

            13 E wehewehe mai i na holoholona eha ma Hoikeana 6;2,4,5,8,  Rev S Waiwaiole.

            14 E wehewehe mai i ke ano o na pauku ma Ezekiela 47;1-12, Rev J N Paikuli.

            15 E wehewehe i ka pauku ma Halelu 76;18,  Rev M Kuaea.

            16 Ma ke aha la e lanakila ai ko Iesu aupuni i ko Satana, ma ka hai ana i ka olelo wale no paha, ma kona mana nui paha,  Rev J Kekahuna.

            Ina e hoopanee keia aha, e halawai hou aku ma Waialua i ka Poalua elua o Aperila, 1881, hora 10 am.

            Ke mahalo aku nei keia aha, i ka ekalesia o Kalihi a me Moanalua, no ko lakou hoolako ana mai i na mea e oluolu ai ke ola kino o na hoa o keia aha.

            Hookuu keia aha, ma ka hoonani ana i ke Akua ma ka himeni 601, me ka pule a ka lunahoomalu.  S Paaluhi, Kakauolelo.

 

            HE UWE KANIKAU ALOHA NO L. PANIOIKAWAI.

 

He kanikau aloha no Panioikawai,

Kuu makuahine mai ka hau anu o Maunakea,

Mai ka ohu kipu mai iluna o Mana,

Ke kahiko mai la i ke oho o ka Mamane,

Ia pua haaheo i ke alo a na mauna, e auwe!

Anu maeele au i ko aloha.

Kuu makuahine hoi mai kaua e,

Kuu makuahine mai ka lepo hakinua mai i ke pili,

Ke punohu ula mai la iluna o Holoholoku,

E hehi ku ana i ka lau Akolea,

Pula ka maka o ke Koolau,

Ke hoohei hewa la i Naulaelua,

Aohe lua o ko aloha i hiki mai nei,

Ke wawahi nei i kuu manawa,

Ke hoopulu nei i kuu lihilihi,

Hanini kuu waimaka aloha ia oe-e,

            Auwe kuu makuahine hoi-e,

Kuu makuahine mai ka ohia loloa o Lauae,

Mai ka ia hauwalaau mai i ka nahele,

Ke olo alu mai la i Puio,

Ua hei aku la i ka upena a ke akamai,

Ua paa, ua komo aku la i ka eke paloa,

Loa ka hele'na, ka leina a ka uhane aloha,

Aia la i ke opu mai la i ka lewa,

Ke hoolai mai la ka noho i Kealohilani-e,

            E mama, e hoi mai kaua,

Kuu makuahine mai ka ua Apuupuu o Waimea,

Mai ka wai huihui anu hoeha ili o Waikoloa,

E nanau pu ana i ka Piko o Imoku,

Moku Lanimaomao Ii e ike i ke anu,

Ke hapuku la ke kini kamaaina oia uka,

Ke lalala na lima i ke ahi i mehana e,

Ua mehana au, ua wela i ko aloha,

Ke kukuni nei i kuu houpo,

Ke lokuloku nei i kuu puuwai,

Me he wai welawela la ia e paila nei,

I kuu aloha i kuu makuahine-e,

            Auwe kuu makuahine-e,

Kuu makuahine mai ka nalu hai mai i ka nahele,

Ke popoi mai la i ka wili wahine

E hee auauei i Uluomalama,

Na nalu haaheo i ka hokua o ke kanaka,

He nalu kai ko ka Moana,

He nalu popolo ko Waimea.

Aloha kuu makuahine mai ka i-a iwi ole,

He i-a hoolau kanaka ia no ia uka,

A kaua e walea ai i ka leo o ka manu,

I ke kani hone, ulili hoae mai iluna o ka pua,

He pua lei hoi au nau no na kai ewalu,

He hoa pakui no na ale o ka Moana,

Ua ana au i ka hana a ke Aloha,

E lokuloku nei i ka puuwai,

            Auwe kuu makuahine-e,

Kuu makuahine mai ko kai aahu Lehua o Paihana,

Ke hamumu mai la ike uuku o ka manu,

Ke hoonuanua mai la i ke kai o Mokulehua,

Ke kahiko mai la i ka malu o Huia-e

Hui aku la olua me ka Puuleh@,

Me ka moani honu aala lau lehua o Puna,

Kuu lei aloha-e, auwe, ike wale oe iaia e

Ike wale oe ia lolii maikai ka pua i Homelani,

Ko po@@ mai la i ka pili o Halai,

Ua nohea wale no moku i ka na Kauilehua,

Aia la ke walea mai la me na mana iluna o Haili-e,

He ilihia aloha ku'u ia oe e noho nei,

He minamina pau ole i kuu makuahine,

I kuu mea laha ole he makuahine, na hala,

            Auwe kuu makuahine-e.

 

OLELO HOOLAHA.

Ua papa ia na mea a pau, aole e komo hewa a @@@

            933 tf  JAMES CAMPBELL

 

UA MAKEMAKE IA

NA ILI BIPI,

NA KIWI BIPI

NA IWI BIPI,

            E haawi ia no ke kumukuai kiekie o ko kakou makeke nei e  H. Hackfeld & Co.

            Honolulu, Mei 22, 1880          984 ly

 

KA MAKEPONO!

A ME

KA OLUOLU!

            Na Pila Umeume maikai,

            Na Pila Hamonica,

            Na Viokiona me na kaula Gita,

            Na Kopa Aala.

 

Na waiwai nani o kela me keia ano,

            Na Pale ili oluna,

            Na Pale Ili Wawae,

            Na Uhi Moe,

            Na Mamalu Liilii.

O keia wale no ka hale mai a makepono.  Ua lawe pololei ia mai na waiwai.

            PICKERING & Co.

Helu 92 Alanui Alii.  Hookai puka

mai ke alanui Papu mai           972 3m

 

NU HOU! NU HOU!

MAHOPE AKU O KA LA 10 IANUARI 1880, E HOOmaka ana makou malalo o na rula

DALA KUIKE,

I ka Loaa ana aku o ka Waiwai i ka Mea Kuai.

E hookahua ana makou i ka makou oihana malalo o ke DALA KUIKE, e kuai ia aku ana na lako waiwai a pau no ke Kumukuai malalo iho o ka

MEA I IKE IA MAMUA E LIKE ME KA LILO.

He Huina nui ko makou o na Oo, Kopa la Ho, &c., &c. i kuai ia mamua ae o ka hoopii ia ana o ka auhau o ka poe nana i hana.

 

HE MAU LAKO NUI KO MAKOU

O NA

PALAU

A makou e kuai aku ai no ka $7 a hiki ka $7.50 Malalo iho o ke Kumukuai mua no kela a me keia PALAU.

            Ano ko oukou manawa kupono e looa ai na waiwai makepono loa.

E hele mai Hookahi, E hele mai a pau loa.

                        DILINAHAMA MA.

942 tf  37 Alanui Papu.

 

PAPA, PAPA

AIA MA KAHI O

LEWERS & DICKSON!

(O LUI MA.)

MA KE KAHUA KAHIKO MA

Alanui Papu a me Moi

E LOAA AI NA

Papa Nouaiki

o kela a me kaia ano.

Na Papa Nani a Paa no ke Kukulu ana i na Hale!

Na Pani Puka, Na Puka Aniani.

Na Olepelepe, Na Pou, Na U-a,

Na Papa Hele, Na Papa Ku,

A me na Papa Moe nui loa

 

NA PILI O KA HALE

O NA ANO A PAU.

N Pepa Hoonani, Na Pena o na Wai a pau,

Na Kui mai ke Nui a ka Makalii,

Na Ami Puka, Na Ami Puka Aniani,

Na Ami o na ano a pau,

Na Aila Pena, o kela me keia ano,

Na Aila Hoomaloo, he lehulehu wale,

Na Aila e ae o na ano a pau.

 

NA WAI VANIKI

A ME NA

WAI HOONINUHINU NANI!

o na ano a pau loa.

NA BALAKI ANO NUI WALE

A ke kai ia aku nei ka loao i na makamaka a pau, ua makaukau keia mau makamaka o oukou e hoolawa aku nei na mea a pau e pili ana ua ka laua oihana

NO KA

UKU HAAHAA LOAI

E like me ka mea e holo ana mawaena o

LAUA a me ka ME KUAI.

E hele mai! E na Makamaka!

A o lawa no hoi ko oukou makemake me ka oluolu a me ka maikai!

845tf

 

KAUKA BERODI.

(O KE KULA NUI O KANADA)

            Ua makaukau au i ka lapaau ana i na kanaka Hawaii no na ano mai a pau.  Ke kahea aku nei au i na poe i loohia i ka mai e hele mai ia o.

KEENA OIHANA

Aia ma Mo@@@ iuna ae o ka Hale Kuai o Millis a me @@@ ma ka @@ kakahiaka a mai 2 me 4 a mai 7 me ka ahiahi.

3 m 969

 

E. Cook Webb, M. D.

HOMEOPATIKA.

            (Kauka o ka Halemai Homeopatika, ma ka Mokupuni Ward's N.Y.)

            KEENA OIHANA. – Helu 60, Alanui Papu.  Makaukau mau e lawelawe i na pilikia mai o na wahine a me na kamalii.

            HORA HANA. – Mai kakahiaka a hora 10 am – 2 a i ka 4 pm.                                967 4m

 

MAIKAI KA HOI KA PAPA

A ME

KA LAAU O KOU HALE

NO HEA LA!

KAI NO HOI NO KAHI O

WAILA MA I

Nana aku no hoi ia la

Ohi ka Io o ka Laau o Makawao

I ka na mea hoi o ka nani o

Na PAPA! Na PAPA!!

A ME

NA PONO KUKULU HALE

O NA ANO NO A PAU

 

Aia ma ke kihi o na

ALANUI PAPU me MOIWAHINE,

HONOLULU

MALAILA E LOAA AI

E LIKE me ka MAKEMAKE

 

NO KE

KUMUKUAI MAKEPONO LOA

 

PAPA, PAPA, PAPA,

Na Papa Huluhulu,

Na Papa Manoanoa

Na Papa i kahua

Na Papa Kepo

Papa Hole Keokeo

Papa Hole Ulaula

 

NA LAAU, NA LAAU

Na Kua, Na Kaola, Na Aaho, Na Molina, Na Peapea, Pine Huluhulu, Pine i kahua

NA Papa a me na Laau Ulaula!

Pili ulaula, Pila Keokeo, Pani Puka, Pani Puka Aniani, Ipuka Aniani, Puka Olepelepe.

 

PENA O NA ANO A PAU

 

Hulu Pena mai ka Liilii o ke Noi, aila Pena, Aila Hoomaloo, Waniti, Pate.

NA LAKO O KELA A ME KEIA ANO!

Na Ami Puka Hale, Na Ami Puka Pa. ANIANI!

Pepa Hale a me na Lihilihi

E LOAA NO MALAILA.

PAAKAI HELU I O KAKAAKO no PUULOA

            No ke Dala Kuike, e loaa na na mea a pau i hai ia ae la, no ke Kumukuai Emi loa.  O na kauoha mai Hawaii a Niihau, o loaa aku no ia lakou, e hooko koke ia no ia ma ka lawa pono.  E kipa nui ilaila, i ike i ka oiaio.              905 tf