Ka Nupepa Kuokoa, Volume XIX, Number 32, 7 August 1880 — Page 4

This text was transcribed by:	Francene H Aarona
This work is dedicated to:	To those who will do the rechecking, mahalo !.

Ka Nupepa Kuokoa

KE KILOHANA POOKELA NO KA LAHUI HAWAII.

Nou ka Nani

Thine The Glory

Clonial Singer No. 169

Hoonani ka makua maikai

I haawi ia Iesu i mea e ola ai.

Cho. Haleluia ! Amene

Haleluia nou ka nani

A mau loa no.

Hoonani ia ae la ka Haku Iesu

Ka mea aloha, e hoola pu.

Cho. Haleluia ! nou ka nani. &c.

Hoonani ia ae la ka Uhane pu no

Ka Lama, ke kumu i ao ia makou.

Cho. Haleluia ! nou ka nani. &c.

Hoonani ia ae la ke Kahu Iesu

Ka mea kiai me ka alakai pu.

Cho. Haleluia ! nou ka nani. &c.

Hoala, hoolana, a hoano hou

Ho mai la i ahi mai luna mai no.

Cho. Haleluia ! nou ka nani,

Haleluia ! Amene.

Haleluia ! nou ka nani.

A mau loa no.

Hawaii.

KA NUPEPA

Kuokoa me ke Au Okoa

I HUIIA.

No ka Makahiki, $2 Eono Mahina, $1.

Dala Kuike ka Rula.

KOMITE HOOPONOPONO .

Sam ʻ l Kaaikaula,

Hezekia Aea.

Poaono. Augate 7, 1880.

Haawina Kula Sabati.

Helu 8. Sabati, Aug. 22, 1880

KUMUHANA.

Ka Berita me Aberama. Pauku Baibala,

Kin. 15 ; 1-18.

1 Ahope mai oia mau mea, hiki mai la ka olelo a Iehova ia Aberama ma ka hihio, i mai la. Mai makau oe, e Aberama, owau no kou palekaua a me kau uku nui loa.

2 I aku la o Aberama. E ka Haku, e Iehova e, heaha kau mea e haawi mai ia ia ʻ u, no ka mea, ke hele keiki ole nei au, a o ka puuku o kuu hale, oia o Eliezera no Damaseko.

3 I aku la o Aberama. Aia hoi, aole oe i haawi mai i keiki na ʻ u ; a o kekahi i hanau iloko o ko ʻ u hale, oia kuu hooilina.

4 Aia hoi, hiki mai la ka olelo a Iehova ia ia, i ka i ana mai. Aole keia o kou hooilina ; aka, o ka mea e hele mai ana mailoko mai ou iho, o kou hooilina ia.

5 Kai aku la oia ia ia mawaho i mai la. E nana aku oe iluna i ka lani, e helu i na hoku, ina e hiki ia oe ke helu i mai la kela ia ia. Pela auanei ka poe mamo.

6 Manaoio aku la oia ia Iehova, a hooili mai la oia ia mea i pono nona.

7 I mai la kela ia ia. Owau no o Iehova nana oe i lawe mai nei, mai Ura o ko Kaledea mai, e haawi aku nou i keia aina i wahi e noho ai.

8 I aku la ia E ka Haku, e Iehova e, pehea la au e ike ai, e ili mai anakeia aina no ʻ u ?

9 I mai la kela ia ia. E lalau oe na ʻ u i bipiwahine akolu makahiki ona, i kaowahine akolu makahiki ona, i hipakane akolu ona makahiki, i manu kuhukuku, a me ka nunu opiopio.

10 Lawe mai la oia ia mau mea a pau io na la, a mahele ae la ia lakou mawaena, a waiho iho la i kela apana i keia apana e ku pono aku i kona hoa aka, aole ia i mahele i na manu.

11 A lele mai la na manu maluna iho o na mohai, hoopuehu aku o Aberama ia lakou.

12 A i ka napoo ana o ka la, ua pauhia o Aberama i ka hiamoe nui ; aia hoi, kau mai la ka weliweli a me ka pouli nui maluna iho ona.

13 Olelo mai la ia ia Aberama. E ike pono oe, e lilo ana kau poe mamo i malihini ma ka aina e aole no lakou, a e hookauwa aku na lakou ; a e hoinoia mai lakou e kela poe i na haneri makahiki eha.

14 A o ua lahui kanaka la nana lakou e hooluhi mai, na ʻ u lakou e hoohewa aku a mahope iho, e puka mai lakou iwaho me ka waiwai nui.

15 E huiia ʻ ku oe i mau makua me ka malu ; a e kanu ia oe i ka wa elemakule maikai.

16 Aka, e hoi hou mai no lakou ia nei i ka ha o ka hanauna : no ka mea, aole i lawa ka hewa o ka Amori i nei manawa.

17 A napoo iho la ka la, a poeleele iho la aia hoi, nee ae la ka umuahi e punohu ana a me ke kukui e a ana mawaena o ua mau apana la.

18 Ia la no, hoopaa iho la oia i berita me Aberama, i ka i ana mai. Ua haawi aku no wau i keia aina no kau poe mamo, mai ka muliwai o Aigupita a hiki aku i ka muliwai nui, ka muliwai o Euperate :

Pauku Gula. Rom. 4 ; 3. Hoopaanaau, me p. 5-7. Kin. 15

Manao nui. Ka manaoio ke kumu o na pomaikai he nui wale.

Na heluhelu la. 1. Kin. 15 ; 1-18. 2. Rom. 4 : 1-14. 3. Rom. 4 ; 15-25. 4. Pok. 32 ; 1-14. 5. Kan. 10 ; 11-22. 6. Pok. 6 ; 1-13, 7. 7. I Na Lii. 4 ; 20-28.

Mele. " Ma ka noho nani." Lei Alii. p. 108.

Pule : makaukau e mele pu me na kini lani.

Ka Wehewehe me ka Ninau ana.

Nowai ka helu 7 ? Owai kai oi o laua ? He hoailona Melekizedeka nowai ? Owai kekahi mau kupuna o ka Mesia ma ke kino ? Hai mai i 10 kupuna. Owai ke kupuna nui ma keia helu ? Hai mai i ko Aberama kuauhao mai ia Sema mai.

P. 1. Mahope mai o ia mau mea. Heaha ia mau mea ? Nana i ka mok. 14. Heaha ka i hiki mai ? Ma ke aha ? Heaha ia olelo ? Pehea e hiki ai ia Iehova ke lilo i pale kaua a i uku hoi no Aberama.

P. 2. 3. A pane aku Aberama pehea ? Heaha kau e haawi mai ai ia ʻ u ? Ua olelo e ke Akua ia Aberama, e hoolilo ana oia ia ia ia mea nui, e like ana kana mau mamo me na hoku o ka lani, oiai nae aole ana keiki. Heaha la ka manao o Aberama no kona hooilina ? E lilo ana owai i hooilina ? O Eliezera, kana puuku anei ? Kekahi mea e ae ? Damaseko. Heaha ia ? Aia ia mahea ? Pehea i lilo ai Eliezera no Aberama ? Malia ua hele pu mai oia me Aberama ma mai Harana mai. A i ole ia mai Hoba mai. No ka mea, aia no Hoba ma akau aku o Damaseko. A ua hiki aku Aberama i Hoba mok. 14 ; 15. Hoi pu paha Eliezera ma Aberama a Heberona. Hookama ia oia iloko o ka ohana o Aberama, a no kana hana maikai, lilo oia ia puuku no Aberama.

P. 4. Pehea ke Akua i pane aku ai ia Aberama no ka hooili ?

P. 5. Kai o Iehova ia Aberama ihea ? Me he la he kino ko Iehova. Pela io no. Ka Logou ia me ke kino kanaka. E nana ae ihea ? A e aha i na hoku ? Hiki anei ke helu ia na hoku ? Me ia ke aha ? Na mamo hea ia ? Na mamo muli, oia hoi na Iudaio. Na mamo ma ka uhane, oia hoi na lehulehu e manaoio ana ia Iesu ka mamo nui o Aberama ma ke kino.

P. 6. A pehea Aberama ? Manaoio oia i ka Iehova olelo hoopomaikai. A lilo ia manao io i aha no Aberama ? Hoapono ke Akua ia ia. A loaa no ka pomaikai kino, ka pomaikai uhane ia Aberama ma kona manaoio i ka mamo nui e hiki mai ana. Nana Rom. 4 : 3.

P. 7. Heaha kekahi olelo a Iehova ia Aberama no ka aina kahi e noho ana ? Nowai ia aina ia manawa ?

P. 8. Heaha ka Aberma i ninau aku ai ia Iehova no ka lilo ana o ia aina nona ?

P. 9. A kauoha Iehova ia Aberama e lalau a lawe ia ia i ehia mau mea ?

P. 10. Hana Aberama pehea me ia mau mea ? Na mea aha kai mahele ole ia ?

P. 11. Pehea na manu i na mohai ? A pehea Aberama i na manu ?

P. 12. A napoo ka la ua aha ia Aberama ? A heaha kai kau mai la maluna iho ona ?

P. 13-16. Na olelo a Iehova ia Aberama. Ua la paha oia. A hoakaka o Iehova i ke ano o ia mau mea.

Heaha ia mau olelo ? 1 E ike pono oe e lilo ana kau poe mamo i poe aha ? Ma ka aina hea ? Owai ia aina ? Kekahi hapa o Kanaana a o Aigupita.

Noho lakou mamua ma Kanaana, a ma Padanasama, a hoi hou i Kanaana, a malaila aku a i Aigupita no ka wi ma Kanaana. Maikai ka noho ana mamua malalo ae o Iosepa me kona alii o Parao. Mahope iho nae o ka make ana o Iosepa me ia Parao he Parao hou, a nana i aha i na mamo o Aberama, oia hoi ka poe Isaraela ? Ehia makahiki e hookauwa ia"i ? a e hooino ia ʻ i ? Aole pau loa ia mau mak. eha haneri ma Aigupita, ma Kanaana kekahi.

2 A pehea ke Akua e hana ʻ i ia lahui hooluhi a hookauwa ? Ma ka hooko ana, pehea ke Akua i hana ʻ i ko Aigupita poe ?

3 A puka na mamo o Aberama iwaho o Aigupita me ke aha ? Nana Puk. 12 ; 32, 35, 36, 38.

4 Pehea Aberama ? Mahea kahi e hui ai Aberahama me ona mau makua me ka malu ? Mahea oia i kanu ia ʻ i ? Ehia ona mau mak. ? Kin. 25 " 7-10.

5 Ahea na mamo o Aberama e hoi hou ai i Kanaana ? No ke aha ke kali ana a loihi mamua o ka lilo loa o Kanaana no na mamo o Aberama, oiai he aina hooili ia no lakou ?

P 17. A napoo ka la, a poeleele, pehea ka umu ahi ? Heaha mawaena o na apana i olioli ia ? He hoailona paha ia no na pilikia e hiki mai ana i na mamo o Aberama, a no ka malamalama e puka mai ana mahope iho.

P. 18. Heaha keia berita a ke Akua i hoopaa ai me Aberama ? Pehea na palena o ka aina ? Ua hooko ia anei ? Nana 2 Oih. Lii 9 ; 26.

Mele. "Mele au no Iesu." Lei Alii, p110.

Na ninau a na Kahu.

Na kane. Heaha ke kumuhana ? Ka berita ehia keia a ke Akua i hana ʻ i me kanaka ? Heaha kana berita me Noa ma ? Heaha keia berita me Aberama ? He keiki ponoi anei na Aberama ia wa ? Pehea e hiki ai ke mahuahua kana poe mamo ina aole ona keiki ponoi ?

Na wahine. Owai ke keiki e puka ana no loko mai o na pohaku o Aberama ? Heaha, a nohea Eliezara ? Heaha a mahea Damaseko ? Heaha ka lole mai no ia kulanakauhale mai ? E aha ia ʻ na na mamo a Aberama ? Mahea ? Pehea ka loihi ?

Na @ui me na keiki. Owai ke alii i hoolohi ino i na mamo o Aberama ? Heaha ke nohe o Parao ma ? A mahope iho ua aha na Iseraela ? Hiki koke anei lakou i Kanaana ? Ehia makahiki a hiki ilaila ? No keaha ke loihi ? I na hoomaloko oukou, heaha ko oukou hope ? Hai mai Heb. 3: 7, 8, 12, 13.

Ke kula a pau. Pehea na mamo o Aberama ? Lilo ko Aberama manaoio i aha nona ? Ma ke aha oukou e hoapono ia ʻ i ? Ma keaha e hiki ai ia oukou ke hui pu me Aberama ma ka lani.

Mele. "Ma na Puu olino." Lei Alii p. 112.

Pule i makaukau e hui ma na Puu Olino

Haawina no Aug. 29. Kin. 18 : 16-33

He wahi leta Ka ʻ u, a he Ninau.

Ma kekahi o na mahina i hala ae nei ua loaa mai ia ʻ u he wahi leta, a penei na olelo o ua leta nei, koe nae na inoa a ʻ u e huna nei: "Aloha oe, E oluolu oe e hooaiai ae i keia mea hou i hana ia ma ka apana o K.-nei. I ke Sabati, la 25 o Januari, 1880, ua hoohui ia ma ka bertia o ka mare o Rev. J. K.-, ko makou Kahunapule, me Mr. S. B. K.-e ka Rev. J. Kaona, ma ka luakini. He mare nuhou keia ia makou. Wahi a ke Kahunapule nana i mare keia mau kanaka, o Rev. J. K.-oia ke kane, ko Iesu Kristo hope ma keia ao, a o S. B. K.-, oia ka wahine ma ka aoao o ka ekalesia. Ke ulu nei ka anoano a Kaona i keia wa maanei. A he mea pono anei i ko makou Kahu ka ae ana i keia hana naaupo ? * * * " Owau me ke aloha. " " A.--"

He mau mahina iho nei ka waiho ana o keia leta maluna o ko ʻ u papakaukau, me ke kanalua iloko o ʻ u no ka hoopuka ana ma ke akea. O ka io o ka palapala oia keia ua mare ia kekahi mau kane a elua--o ke Kahu o ka eklesia a me kekahi o na luna o ua ekalesia nei--A oia no ka hoike o ka hui pu ana o Iesu Karisto me kona ekalesia ma ka noonoo ana o ka poe nana keia hana. O ka mea nana keia hana i hapai, oia o J. Kaona, nana i hooala ka hoomana ano e i kapa ia " ka hoomana Kaona," ma Kona, Hawaii, he mau makahiki i hala iho nei, a i komo ia e Kakina ma a me Kamauoha; (aole nae keia o Kakina makua misionari o kakou, he kanaka okoa keia) aole no paha i poina i ka poe heluhelu kahi mau hana apiki aia poe hoomana Kaona iloko oia mau makahiki, a me ko lakou pepehi ana ia Liki. E kuhi ana au ua puehu liilii ia hana, aka ke olelo mai nei keia leta ke ulu hou nei ka anoano.

Mahope o ka noonoo loihi ana ua manao au he mea pono ke hoopuka i keia leta ma ke akea; no ka mea, e loaa ana iloko o keia kekahi mau kumu keakea i ka holo mua o ka hana a ka Haku i keia wa, a malia paha o hoomalamalama ia ka noonoo o kahi poe hoa hana.

1. He hana ano e keia, i like ole me na hana i maa ia kakou mai ka wa mai o na makua misionari o kakou. Aole no hoi i ao mai lakou ma na hana e like me ia. Aole no hoi e loaa ana iloko o ka Olelo a ke Akua na alakai ana ia kakou e hooko aku i ka oihana mare mawaena o kekahi kane a me kekhi kane. Ua kue ia mea i ka noonoo maikai o ke kanaka.

2. Elike me ke @auo e o ka hana, kela i kii ia ai ke kanaka ano e nana e ho@o ia hana heaha la ka mea i kii ai na makamaka oia wahi ia Kaona nana e hana ia mea? Malia paha nana i hoala ka manao e mare ko lakou Kahu me ka luna ekalesia ina pela, no ke aha la lakou i hahai ai mamuli o keia kanaka alakai ono ole? Ua poina anei kana hana pono ole ma Kona, me kona alakai hewa ana i kela @puuiu kanaka a komo lakou iloko o ka pilikia? Aole anei lakou i ike mua ua kohu ole kana alakai ana, a ku ole hoi i ka malamalama o ka Olelo?

3. O na hana ano e i kaa mawaho o na alakai ana o ka Olelo, he mea kue ia i ke aupuni o ka pono. Ua ike no au, ua maa kahi poe i ka wae ana i ka poe pono ole o ka noho ana, poe ona, poe manuahi, a me ka poe i piha i na hana apiki, a kukulu aku ia lakou e alakai i na hana pono, paipai i na anaina Kula Sabati, a pela aku. Heaha ka hope oia? Eia no, ua hoolapuwale ia na oihana pono. Ua kumakaia ia ka Pono, e ka poe nana e malama, iloko o na lima o ka poe lapuwale a na lakou e pepehi.

O ka ʻ u pane i ka ninau a A., aohe pono ia hana a Kaona i kona mare ana i ko lakou Kahu me ka luna o ka ekalesia. Ke noi nei au i na makamaka o na hana pono o ka aina, e hai mai i ko lakou pane no ka ninau a A. Paleka.

Kawaiahao, Augate 1, 1880.

Waialua, Iulai 25, 1880.

E ke Kuokoa :--Aloha oe.

Ua hiki ka wa kupono e hoike aku imua o kou alo no kekahi mau mea e pili ana no ka ekalesia o Waialua nei.

Ma kuu noonoo ana, iwaena o na makana a ka Lani i haawi mai ai ia makou i keia makahiki, eia ka oi ka loaa ana ke kaku no keia ekalesia a makou i hauoli nui ai oia o Rev E S Timoteo. I keia la, maka lohe ana i kona haiolelo ana ma ka luakini, ua piha ka naau me ka mahalo. He awiwi, he naauao, he kanaka makua no oia, ma kona wehewehe ana i na olelo o ka Baibala.

O kekahi mea i kaulana ai keia Kahunapule, oia no kona akamai ma ka hoohui nui ana i na opio o Waialua nei iloko o na hale halawai. Oia no ko makou Kahu Kula Sabati maanei ano kona aloha, akahai, ua hohulihuli mai oia i na keiki mehe mageneti la iloko o ka luakini, malaila no lakou e himeni ai i ka la Sabati a me na la e ae; nolaila ke hoomaikai nei na makua, na keiki a mea na hoalauna i ka mea Mana Loa no ka haawi ana mai i keia Kahuhipa hou.

Ua akaka no ma ke ano o ka Timoteo lawelawe ana, ua paa kona mau maka maluna o Mataio 10:16, nolaila na nui ka lana o ka manao no ka pii pono ana a me ka mahuahua ana o keia ekalesia, ma ke kokua ana o ka Haku i kela a me keia mea no ka haawi mau ana i kela mahina keia mahina i na dala no ke ola kino o keia Kahu o makou. Kamaaina.

MOOLELO O NA LA

--O KA --

HAKU VISA KAUNA NELEKONA,

KE DUKE O BERONETI.

KE KAUA ANA O NA AUMOKU KAUA

BERITANIA. -- A ME KO ENELANI

MAU PAPU LAAU, &c.

I ka manawa i lawe pio ia mai ai o keia moku, ua waiho aku la o Nelekona ia mea malalo o Kapena Peard, nana ke alakai ana aku a hiki imua o ka Haku Kita ma Malata, i mea e hoike aku ai iaia, pela iho la ke ano o ke kulana a Nelekona i alakai ai i kona mau aumoku i ka lanakila imua o na kahakai o Italia, a he mea hoi ia na ka Haku Kita e kuihe ai ka manao no kalilo pio ana mai o keia moku Farani Genereux, a me ka make ana o Adimarala Perree iloko o kela po pouli a me kela ino nui i hookaawale ai ia laua.

O ka manao lili hanohano o keia Adimarala ka mea nana i hoohaahaa iho i kona inoa wiwo ole. O Nelekona, he mea ia nana e hoohauoli mai ana i kona manao ka lilo pio ana mai o kekahi o na moku o kona mau enemi, i kona wa i uhaki ai i na kauoha a ka Haku Kita e komo iloko o Malata. Maloko o kekahi leta a Nelekona i palapala aku ai ia Mr. Rose ma ke Keena Kaua ma Enelani, e hai aku ana oia i keia mau olelo e pili ana nona a me ka Haku Kita no ka uhaki kanawai, a e heluhelu ia keia leta penei :

" O makou o Nelekona o ka Naile, aole i kulike me na kuhikuhi a ka Haku Kita, a e manao ia ai hoi e loaa ka hanohano malalo o ke alakai ana a ke kanaka akamai." I mea e hoomaikai loa ia ai keia leta anonui, ua hooholo loa aku la oia i kana leta penei : " A no ko ʻ u ola kino, ua manao au ua ano maluhiluhi au i ka hiki ana mai i ka hopena o keia kaua ana. He nui o na mea i hana ia ( o kekahi) iloko o kou mau la, ua hookoia ia me ka eleu. Eia au ma ko ʻ u alahele e ike i ko ʻ u mau hoaloha ma Palemo. E noho iki au malailano na pule pokole elua, a e nana iho au ia ʻ u iho ina he mea hiki hou ia ʻ u ke hoomau aku i ka oihana me ka hololea. Ua olelo ia ae, eia ka ma keia alahele na aumoku kaua hui e hele mai nei, e like paha me ko lakou pakele ana i kela makahiki i hala aku ei; aka, he wahi olelo kahiko keia--"O ka pika-wai, aole oia e lawe pinepine ia ana i ka luawai, aka, e hoihoi ia mai auanei oia i kona home--ua nahaha."

He hookahi moku Farani i koe mai ke kahua kaua mai o ka Naile, ka Guillaume Tell, aia iloko o ke awa oValetta, mahope iho o ko Nelekona haalele ana aku i na kahakai o Italia no Enelani. Mahope iki iho o kona pakele ekahi ana, ua alualu ia iho la keia moku e na moku Beritania ekolu--ka Farodoiana, Liona a me ka Penilope, a o ka hopena iho la keia o na aumoku kaua Farani ma ke Kaiwaenahonua. He elua mau moku i ike hou ia iho mahope o ia manawa iloko o ke awa o Valetta, ua pakele aku hookahi, a ua lawe pio ia mai ka lua, a pela iho la ka mea i olelo ia--"Ke Kahua Kaua Weliweli o ka Naile ! "

" O lakou," wahi a Nelekona maloko o kekahi leta i ka Alihikaua, " e haawi mai auanei ia ʻ u i na hoohauoli ana. O ka ʻ u mau keiki, ke ao ia nei lakou ma ka ʻ u kula; a o makou a pau, ua loaa na hoohiwahiwa a me na hoomaikai a ke ahi mai ka Alihikaua Nui a me ke Kiekie Lord St. Vincent. He mea e ka oluolu a me ka olioli, ka lilo ana o na aumoku kaua o ka Naile malalo o ko ʻ u mau kauoha a me na rula !" Ua hoopuni ia o Malata ma ka la 5 o Sepatemaba.

MOKUNA V.

Ma ka la 25 o Iune, kalewa ae la ka moku kaua Beritania Farodoiana, me ka hae o Adimarala Nelekona iwaho o na kahakai o Legahone. Ma ka la 28, hoololi ae la o Nelekona i kona moku mua, a kau ia ae la kona hae ulaula Adimarala ma ke kiawaena o ka moku Alexander. Iloko o ia mau pule pokole o Nelekona ma na kahakai o Legahone, hooholo ae la oia i kona manao e hoi oia ma ka aina o Europa no Enelani, no ka mea, aole e hiki iaia ke lawe mai i hookahi moku mai na kahakai o Italia, oiai lakou e hoomau ana i ke paniku i na kahakai a me na kaikuono nui, nolaila, ma ka la 13 o Iulai, haalele aku la o Nelekona a me kona mau hoala Sir Wiliama a me Ema Hamiletona i na kahakai o Legahone, a loaa pu mai la hoi na hoomaikai ana a ke kulanakauhale i ke koa kaulana no kana mau huakai wiwo ole no ke kuokoa o Italia.

Hoomau aku la na kamahele ekolu i ka hele ana ma ka aina a hiki ma ke kulanakauhale o Felolena ma ka la 19, a ma Anakona ma ka la 24. Ma ka inoa kiekie i loaa ia Nelekona, ua kau aku la oia maluna o kekahi moku Rukini a holo aku la no Tariseta a ku aku la i ka la 9 o Augate. Ua noho iki iho na kamahele ma Viena ma ka la 12, a haalele aku la i keia kulanakauhale ma ka la 26 o Sepatemaba. Ua oluolu oia e hoololi ae i kona alahele ma keia wahi, no ka mea, aole no i loaa hou he moku kaawale nana e hoihoi aku i kona aina, nolaila, ua hele hou aku na kamahele ekolu ma ka aina, mawaena o Parague. Magadeboro a me Hamebolo. O na hoomaikai a me na hookipa hanohano ana, ke kali la nei oia i na wa a pau no kona hiki aku.

O ke Keiki Alii o Esetahexa, (Prince of Esterhazy ) ua hookipa hanohano mai la oia ma ka inoa o ke koa kaulana--ma na kahiko o ke aupuni Hanegariana. Ma Magadeboro o ka mea nona ka hotele a na kamahele i kipa aku ai i ka po, ua kuai malu aku oia i na palapala komo i kona mau hoaloha no na hapalua dala, a oiai hoi ke Koa Hena o ka Neile e noho ana maluna o ka papakaukau me kona mau hoaloha, ua ae aku keia haku hotele i kona mau hoaloha e nana malu aku iaia maloko o kekahi puka aniani uuku no ka hoikeike. i ke kanaka a lakou i lohe wale ai no kekahi mau la loihi, a o la mea hoi nanai noho alii iho ke Kaiwaenahonua malalo o kona mau rula.

Ma Hameboro, e noho ana kekahi elemakule kalepa waina nona na makahiki he 70, ua kamailio mai la oia ia Ema Hamiletona, aia iloko o kona poli kahi i malama ai no ka hapalua kenetuma, he waina Rains (Rhedish wine) o ka manawa ohi waina o ka makahiki 1625. Ua malama oia i keia mau mea no kekahi mau hookipa hanohano e ae e hiki mai ana, a ua manao oia, ua oi loa aku keia hookipa ana ma ka inoa o ke koa holo moana kaulana. Ua makana aku la keia elemakule kalepa waina ia Nelekona he eono mau omole waina maikai loa, a ua inu ae la ke koa kaulana i kekahi hapa o ua waina nei, a o keia makana a ka elemakule iaia, aole oia i poina iloko o na la loihi o kona ola ana.

Komo aku la ua Nelekona nei maloko o ka rumi o ka elemakule kalepa waina, lulu lima aloha iho la laua no ka manawa, a haawi hou mai la ka elemakule i eono mau omole waina hou, a waiho ae la ua Nelekona nei ia mea i mea hoomanao no kekahi mau lanakila hou aku e hiki mai ana.

O kekahi kahunapule Geremania kaulana nona na makahiki e kokoke ana e piha i ke 80, e kaahele mau ana oia he kanaha mile ma na mokuaina e kokoke mai ana me ka baibala ma kona lima noi aku la oia ia Nelekona e kau mai i kona lima kakau ma ka aoao mua, no ka mea, ua koho aku oia iaia--Ka Hoola Karistiano o ke ao nei.

Ma na la hope loa o Okatoba, ua hiki aku la na kamahele ekolu ma na kahakai o Holani, a kau akua la maluna o kekahi moku kaua Rukini e kali ana no kona hanohano, a na keia moku i lawe aku i na kamahele i ka aina o ka uani a me ke ala, a ma ke kakahiaka o ka la 6 o Novemaba, kalewa ae la ka moku o na kamahele he 12 mile mai ke awa mai o Yarmouth, Enelani. Aole i pau.

M O O L E L O

-- O KA --

Ahaolelo Kau Kanawai o 1880.

La Hana 70, Poakolu, Iulai 28, 1880.

Halawai ka Hale e like me ka mau.

Hoike Komite.

Mai ke Komite wae mai i koho ia no ka noonoo ana i ka bila Kanawai e pili ana i ka lapaau ana o na kauka Pake. Ua noi mai ia Komite e hooholo loa aku i ka bila kanawai. Ma ke noi ua waihoia ka hoike a noonoo pu me ka bila.

Na Olelo Hooholo me na Bila.

Hoike mai ke Kuhina Kalaiaina : Ua oluolu i ke Alii ka Moi e hoihoi mai me ka apono ole i ka bila Kanawai Waiona, no ka nui o na hemehema, a ua hoole ia mai aole e kakau ino ia.

Noi mai o Kamika e lilo ka Poalima i la e noonoo ai i ka bila kanawai e pili ana i ka oihana mare.

Mai a Robt. Wilikoki he olelo hooholo e noi ana e hoopau ia J D Kililika mai kona noho Lunakula ano no ka apana o Makawao. Ma ke noi ua hoopanee loa ia.

Na S W Kaai he olelo hooholo e noi ana i $300 no ka Halepaahao o Kona Hema; moe ma ka papa.

Na Keau he hoolaha kanawai e hoomana ai i ke Kuhina Kalaiaina a me ke Kuhina o na Aina e, e kuai kudala ia ka ai no ka Halepaahao a me ka Hale Koa ma ke kuai emi loa. Moe ma ka papa.

Ma ke noi, ua hapai ia na hana o ka la.

Na Hana o ka La.

Ka noonoo hou ana i ka bila haawina.

Noi o Kalua e hapai hou ia ka haawina no ka Laina Mokuahi o Kina i $24,000. Ua kamailio nui ka Hale no keia itamu, a mahope ua kahea ia na ae a me na hoole. Na ae i ka Laina Mokuahi : S K Kaai, Bush, Kahanu, Martin, Lilikalani, Baker, Keau, Kalama, Kahulu, Kaanaana, Aholo, Kipikona, Nahaku, Kalua. R W Wilikoki, Glendon, Hanuna, Wahine, Kaunamano, Kapahu, Mahoe, Kuapuu, Kakina, Kanoa a me Kupihea--25. Ka poe hoole loa : Kuhina Kalaiaina, Kuhina o na Aina e. Loio Kuhina, Ake, Kakela, Kapena Loke, Kamika, Kale Kauka, Kaulukou, Nawahi. Woods, S W Kaai, Pilipo a me G N Wilikoki, Kanoa a me Dominis--16.

Hoomaha ma ka hora 12, a hoomaka hou ma ka hora 1.

Hapai hou ia ka noonoo ana no ke koho ana o ka Hale i na mea e pili ana i ka Laina Mokuahi o Kina. Aponoia.

Noi ke Kuhina waiwai e apono loa; noi ke Kuhina o na aina e e kahea i na ae me na hoole; aponoia.

Ka poe ae i ka Laina Mokuahi o Kina : S K Kaai, Kanoa, Kahanu, Bush, Lilikalani, Baker, Keau, Kalama, Kahulu, Kaanaana, Aholo, Kipikona, Nahaku, Kalua, R W Wilikoki, Glendon, Hanuna, Wahine, Kaunamano, Kapahu, Mahoe, Kuapuu, Kakina, Beckley, Kupihea--25. Ka poe hoole loa : Kuhina Kalaiaina, Kuhina o na aina e, Loio Kuhina, Ake, Kakela, Kapena Loke, Kamika, Kale Kauka, Kaulukou, Nawahi, Woods, S W Kaai, Pilipo, G N Wilikoki--14.

Hapai hou ka Hale i ke koho ana e pili ana i ka haawina no ke ʻ Lii Likelike : $8,000 ; aponoia.

Noi o Hanuna i $400 no ka hale ilina o Lunalilo; aponoia.

Noi o Kuapuu i $8,000 ka uku o Mr. Parke; haule.

Noi o Robt. Wilikoki i 100,000 no ka lawe mai i wai no Kula mai Makawao mai; haule.

Noi ke Kuhina o naaina e e hoomau : ka uku o ke Kauka Luna mai Lepera i $8,000 ; haule.

Noi e Lilikalani e hoonui i ka uku o ka Lunakanawai kiekie i $15,000.

Noi o Hanuna no ke koena uku o ka hale ilina o Lunalilo i $133. Aole i uku ia; ua haawi ia na hai.

Noi o Kalama e kapae loa i ka haawina o D Keawemahi he $22l: haule.

Noi o Hanuna e kakau poepoe ia ka bila Haawina, a e heluhelu akolu ia ma ka Poalima. Hoopanee ka Hale.

Kauka O. S. Cummings, M. D.

HOMEOPATIKA.

Oia ke Kauka i kamaaina mua ia oukou e na kanaka Hawaii ma ka inoa.

" KULU WAI LIILII "

Ua hoi mai nei oia, a e pahola hou mai ana oia i kona akamai lapaau ia kakou. Aia kona Keena Lapaau a me kona wahi noho i keia wa me kahi o Mr. Wm. G. Irwin, ma ke kihi o na alanui Papu a me Beretania, ma keia aoao aku o ka luakini o Kaukeano. 888tf

UA LE-I KA HALE !

Eia i ka Nuku na Waiwai ! !

O kela me keia ano. Nolaila, ia oukou e na hoaaloha maikai a pau o ke one nani o Kakuihewa, e kuai aku ana au me ka makepono loa i na lole o kela me keia ano, o na lede, keonimana a me na kamalei, mai luna o ke poo a hala i na wawae. I mea e maopopo ai, e hele mai no, eia au la, ua hele a kupai ka lole i Makena. Me ka Mahalo. Goo Kim. Alanui Nuuanu, Iulai 1880. 971 2m

CHRISTIAN CERTZ

Mea Hana Buti

--ME--

KAMAA MAOLI !

Alanui Papu, makai o ke Keena o Lui & Dickson

KE HAI AKU NEI OIA I NA MEA A PAU.

Ua hoi mai oia mai Kapalakiko mai,

Ilaila Oia i ohi kino mai nei i na waiwai

nani a paa o kana oihana, a ke

waiho ia aku nei no ke ku-

ai ana no na kumukuai

o ka manawa

HE MAU WAIWAI PIHA O NA BUTI !

NA KAMAA HAAHAA a me na ano kamaa

no na Lede. Na Buti, na Kamaa Haa-

haa a me na ano kamaa e ae a pau

no na Keonimana.

NA BUTI & KAMAA HAAHA !

A ME NA ANO KAMAA E AE A PAU

NO NA KAMALII !

NA KAMAA O NA ANO HE NUI

O NA KAMAIKI OPIOPIO.

O neia mau mea a pau ua hanaia me ke akamai loa a me ka paa o na ano hou loa, a ke hania ia aku nei ia mau mea e like me ka m@a i olelo ia.

E lawe iano na kauoha mai na Mokupuni me ka mai au me ka eleu. 3m942

LOLE MAKEPONO

Ke Kuike.

E LOAA NO IA MA KAHI O

KAKELA ME KUKE !

--E LAA NA --

Ahinahina, Kalakoa,

Keokeo, Leponalo,

Pena, Aila, Aniani,

HA MEA PIULA !

KOPA, AILA HONUA,

AILA HOOMALOO

Kui Kakia, Pakeke,

Tabu, Kaula, Noho Lio,

Hula Palaki, na Pulumi.

--A HE--

AGENA NO HOI NO NA MOKUPUNI O HAWAII NEI NO NA

Lainakini-nao,

Lainakini Maoli,

Palule Kalakoa,

Alapia, Kelepa, Kilika,

Na lole kupono i ka wawae,

Palule Huluhulu,

Na Lole Huluhulu,

Na Lole no ka hoohehelo ana

Lipini, Lihilihi, &c.

LIPINE, LIHILIHI, &c.

--A ME NA--

Mikini Humuhumu MakeponoLoa !

MAU MEA AI KAHI

Ka Palaoa, Kopaa,

Raiki, Pia, Hoohu,

Paakai, Huaala,

Pia Kulina, &c

A he Laau Lapaau Kaulana Loa

A DR. JAYNES.

Laau Kunu,

Laau Hoomaemae Koko,

Laau Hoopau Naio,

Penikila, Huaale

A ME NA LAAU HANO, A PELA ʻ KU @ 840 tf